حكومة قدر ظروفك
12-10-2011 08:34 AM


حكومة قدر ظروفك

أسماء الجنيد
[email protected]

********
سلام يا الحبان بعد غيبة

تشكيل حكومتنا الجديدة دي مطمورة ناس ما شاء الله تبارك الله ودقر العين , وقل هو الله أحد ما غلبوا حد,
ما قصرتوا معانا كلو كلو يا ناس الحكومة , وزراء بالكيمان والمقاسات والمواصفات والأعمار , حسب الطلب ,( قدر ظروفك)
ناس الحكومة قصدوا بالتنوع ده يا جماعة , حسب مقدرة المواطن البسيط
يعني زول متعلم يمشي طواااااااالي يطلع السلم ويشكي امره لي وزير عنده حبة ثقافة.
مواطن تاني زهجي وعينو طالعة من الوضع الحاصل , ويمكن يكفت طوالي من اول النقاش, ده يمشي لي ناس لحس الكوع , عشان العوا والملافظ بأنواعها
اما ناس قريعتي راحت والما ليهم لا في الشر ولا في التعليم . يحمدوا سيدهم عينوا ليهم ناس قدر ظروفك , قدر قدرتهم في التعليم والفهم وفي العمر, عينوا ناس حلاتو على قول اخوي ود جبرا الله يدي العافية ويسكنوا الصافية.
اها يا جماعة وبما إنه كتروا ليكم الوزراء بالعددية المهولة دي , يعني لازما ولا بد يا المواطن الغلبان الطفشان تتم جميلك وتطفش زيادة , يعني الحكومة دي تكفي الوزراء عربات وعمارات وخدم وحشم , ولا يكفوك إنت كسرة وملاح , وتعليم وعلاج ؟ مالكم كيف تحكمون يا اهلنا الغبش ؟؟
لازم تكربوا البطون وتعلنوا الجهاد على ارواحكم .خلوا الناس يعيشوا ويتمتعوا بي حقوقهم القسموها ليهم في صمة خشومهم ..
يعني ناس الحكومة ديل بعد كده إلا يقطعوا هدومهم عشان يرضوكم !, ما خلوا شيء في البلد ما فصلوا عليه وزير ولا مساعد رئيس. في كل فرقة ختوا ليكم وزير , أي شق فيه ضب سلوه وختوا مساعد وزير, أي حفرة دفنوا بيها وزير, نحمد الله بلدنا ملانة حفر ومجاري , أي زقاق تكلوا فيه مساعد رئيس ,
تشكيلة وزارية تحفة جمعت ليكم المتردية والنطيحة وما اكل السبع !!!!
اها تاني يسوا ليكم شنو ؟
اتقي الله يا شعبنا الصامت وحدد مواقفك , يا اصمت نهائي وواصل في نومك وسكاتك على المر والأمر منه وبطل شكية ونقة وململة ..
يا هبوا وانفضوا غباركم المكندكم 22 خريف وغسلوا البلد من ما علق بها من شوائب وفساد ودمار يحتاج 22 سنة تانية عشان يتعمر ويتلم على البلدان.
وخافوا الله في جيلكم الجاي, إنتوا خلاص شربتوا المر واتجرعتوا العلقم لامن قلتوا بس, خافوا الله في الجيل الجاي الما عنده ذنب , يصحا يلقى قدامه دمار وخراب وتفرقة وعنصرية ما تتعالج مدي الحياة !!!!!

متاوقة
ــــــــــــــــــــــ
باقيلكم بعد التنوع والكترة دي كلها , في زولا منهم بدور يسمع شكية مواطن ؟
حاشا وكلا ’ سباق شديد في باقي الفضل من حق شعبنا الصاااااااامت
يمهل ولا يهمل
ودعتكم الله


تعليقات 12 | إهداء 3 | زيارات 3381

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#254428 [عبد الله ]
0.00/5 (0 صوت)

12-11-2011 09:29 AM
يا بت الجنيد
أتي بتنفخي في قربة مقدودة


#254387 [وهج الشعاع]
0.00/5 (0 صوت)

12-11-2011 03:33 AM
باقيلكم بعد التنوع والكترة دي كلها , في زولا منهم بدور يسمع شكية مواطن ؟
حاشا وكلا ’ سباق شديد في باقي الفضل من حق شعبنا الصاااااااامت
يمهل ولا يهمل....


#254176 [لماذا نغالط الحقائق]
0.00/5 (0 صوت)

12-10-2011 04:02 PM
الى الكاتبة و عمر الشريف و wahied

كان المهدي يخاطب اتباعه بالحبيب ( انظر (ي) كتاب منشورات الامام المهدي للدكتور ابو سليم) و الانصار اليوم ينادون بعضهم بلفظ المحبة هذا... فدعوا عنكم هذه الخيالات.. هل يمكن ان يقول عاقل للناس انا سيدكم و يتبعوه؟!...

لم يدع حزب الامة يوما الى جهل بل الى التعليم و التنوير ويكفي دليلا وجود العدد الهائل من الخبرات و الكفاءات و العقول و سط اتباعه و اعضاءه


#254175 [الطيب محمد عبدالله]
0.00/5 (0 صوت)

12-10-2011 04:02 PM

مرة ما بتلاوز .. لا بتخاف .. زي الضفاف

دي طيبة الأسماء .. أسماء الجنيد بت الخزين ... لك التيحة بقدر شموخ نيلنا

كلامك دا ياهو الحاصل


#254128 [babiker]
0.00/5 (0 صوت)

12-10-2011 01:58 PM
قريتك جرايد حوامد شواكر عليها المصائب تمام التمام هكذا حال البلد يا بت الجنيد


#254116 [wahied]
0.00/5 (0 صوت)

12-10-2011 01:46 PM
والله فعلا حكومة قدر ظروفك فقد وصفتيها احسن وصف . البلد اصبحت مهزلة عديل ولكن حتى الان لم نعرف القصد من تعيين اولاد السيدين ديل . باين عليها توطئة لدخول الابوين عما قريب ولكن المهم والاهم حتى لو حكمونا جميع مشايخ السودان مالذى سوف يتغير . ؟؟ هؤلاء الفيهم اتعرفت واملنا كبير فى الثوار الاحرار ربنا ينصرهم على حكومة البغى هذه ويزيل عنا هذا الغبن وهذا السرطان القذر .


#254100 [وحدوي]
0.00/5 (0 صوت)

12-10-2011 01:17 PM
ههههههههههههههههههههههههه والله لو ما الاختشي يابت الجنيد أُختي (قلنا الروب ) تسلمي يا رائعة


#254094 [مهزومة في بلدي]
0.00/5 (0 صوت)

12-10-2011 01:12 PM
يسلم قلمك والله اصبت كبد وطوحال الحقيقة التي تقع جنب المرارة المفقوعة ..... الله في


#254075 [المغتاظ]
0.00/5 (0 صوت)

12-10-2011 12:38 PM
يا اخ حتو بت الجنيد اسهمت وتسهم بقلمها الجرئ . والتغييير زي ماقلت ايضا يحتاج للعمل في الداخل وهناك ناس تعمل من الداخل الان ومن زمان يله ارمي سهمك معاهم وخليك ايجابي وادعم المسيرة مااستطعت بالكيفية التي تراها


#254024 [حتو]
0.00/5 (0 صوت)

12-10-2011 11:19 AM
التغير دائما بجي من الناس الجوا ما الناس البرا اله ليك يا بنت الجنيد تعالي وعايزين فعل ما كلام خلاص تعبنا من الكلام


#253985 [عمر الشريف بخيت]
0.00/5 (0 صوت)

12-10-2011 10:46 AM
ما فى غير نلوك الصبر البلد اصبحت ملك حر للمؤتمر الوطنى والحاكمية لله (نحن عبيد نرضى بحكم السيد) والسادة تنازلوا عن عروش المعارضة وشاركوا فى النظام بأبنائهم ولو عملوها زمان كان اختصروا لشعب السودانى لحس كوعه


#253939 [سمارة]
0.00/5 (0 صوت)

12-10-2011 09:04 AM
هههههههههههههههههههههههاي
ماقصرتي


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة