دخل ... خرج !ا
12-12-2011 01:19 PM

ساخر سبيل

دخل ... خرج !

الفاتح جبرا

* دخل المريض إلى عيادة الطبيب وهو يتألم من المرض وخرج وهو يتألم من جيوبه الخاوية .
* دخل المواطن إلى حافلة الركاب في كامل لياقته البدنية وخرج منها بي كم قطيعة .. (كرسى النص وكده)!
* دخل الطالب إلى الجامعة وأبوهو بيصرف عليهو .. وخرج منها وأبوهو بيصرف عليهو برضو !
* دخل الراكب إلى إحدى طائرات ناقلنا الوطني وهو يدعو الله السلامة وخرج منها عندما حطت وهو يدعو الله شاكراً أن حقق له هذا الإحتمال الضعيف .
* دخل الطباخ فى المطعم البلدي يده المليئة بالعرق داخل الحلة ليغرف منها للزبون وأخرجها دون عرق (يكون العرق مشى وين)؟ !
* دخلت العروس إلى محل الكوافير وخرجت منو (العريس ذاااتو ما قدر يعرفا).
* دخل الوزير إلى الوزارة وعلى بدلته تسعة ثقوب وخرج منها وفي دولابه تسع عملات مختلف ألوانها (ده غير الفي البنك) !
* دخلت يد النشال في جيب الموظف وخرجت وهى نادمة !
* دخل الشاب إلى منزل العروس فرحاً طالبأ يدها وخرج حزيناً حانف وشو (أبوها يكون سألو مرتبك كم) !
* دخل المريض إلى عربة الإسعاف وهو مصاب بكسر في قدم واحدة وأخرج من الإسعاف وقد كسرت قدماه الاثنتين (بطيروا جنس طيران) !
* دخل الجراح إلى حجرة العملية وفي يده موبايل وخرج منها وأيدو فاضية (ح يكون وين يعني؟).
* دخلت ست الشاي إلى السوق ممنية نفسها بتحصيل رزق اليوم وخرجت من القسم باالضمانة (كشة وكده) !
* دخل الطبيب إلى غرفة الولادة وخرج منها فرحا قائلاً للمواطن : مبروك جابوا ليك تيمان فخر المواطن مغشياً عليه (طبعن ما من الفرح) !
* دخلت بعض الأحزاب فى التشكيلة الوزارية الجديدة كتمومة جرتق فخرج الحزب الحاكم بمكاسب (هلامية) .
* دخلت الأغاني الهابطة من شاكلة (أضربني رصاص) إلى أجهزة الإعلام فخرجت الأغاني الرصينة من نوعية راجل المرا ده حلو حلا ! (إنتو من زمن أنا والنجم والمساء !!) .
* دخل أحدهم سوق المواسير وهو يمتطى (برادو) وخرج منه وهو يمتطى (فيسبا) !
* دخل الموظف يده في (الخزنة) ولغف ما إستطاع وأخرجها وهو مطمئن (يعنى ح يعملو ليهو شنو؟) .
* دخلت البنت إلى الجامعة خام لا تعرف تلت التلاتة كم وخرجت منها وهي تعرف تلت (القندول) بي كم .
* دخلت (الأطباق الفضائية) إلى المنازل فخرجت كثير من القيم السودانية .
* دخل رجال الأعمال إلى مجالس أندية كرة القدم فخرجت المؤسسية (مؤسسية شنو مع القروش الكتيرة دى؟) !
* دخل الخريف فجأتن وخرج .. وبرضو السنة الجاية ح يدخل فجأتن ويخرج .
* دخلت الترضيات فى تشكيل الحكومة الجديدة فخرجت مصلحة السودان من الحسابات !
* دخل أولاد الأسياد الحكومة الجديدة فرحين فخرجت جماهيرهم مستنكرين !
* دخل النواب إلى البرلمان وخرجو منه وهم في بر الأمان !
* دخلت البلاد في حرب وخرجت منها بالسلام .. (لتدخل حربا أخرى) ما معروف تنتهي بي شنو !
* دخلت البنوك في حكاية (البيع بالأقساط) فخرج دورها كرائد من رواد التنمية (أصبحت دلالية ساااكت) !
* دخل اللص إلى المنزل ليسرق فخرج بعدة إصابات وكسور (لقاهم عزابة وكده) .
* دخلت الواسطة والمحسوبية في التوظيف فخرجت النزاهة والعدالة إلى الأبد .
* دخل الطالب إلى الجامعة وخرج منها وهو بفك الخط (مش برضو كويس؟) .
* دخلت الملاريا إلى جسم أحد المواطنين وخرجت تلعن اليوم الدخلا (لقت الدم موية فووول ساااكت) .
كسرة :
دخل الآن متحصل المياه ومتحصل النفايات من باب المنزل فخرجت أنا من الباب الآخر !

الراي العام


تعليقات 24 | إهداء 6 | زيارات 7937

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#256511 [ود البلد]
0.00/5 (0 صوت)

12-14-2011 05:56 PM
الاخ مدحت عروه جاب موضوع فى الصميم الله يديك العافيه العرب الجرب يازوول انتى زولى تب يعتى السودانيين فرحانيين بالعرب ديل ومكرمنهم فى بلادنا تكريم شديد مع اتوا السودانيين فى جميع الدول العربيه ماعندوا اى قيمه وشايفيين نفسهم حاجه كبيره وهم ولاحاجه وزى ماقلت اخى الكريم جزمه سودانى احسن من اى امير والله ملك عندهم لك التحيه اخى




لك التحيه اخى مدحت وجبره ده بدال مايجيب لينا امتحانات صعبه زى دى يورينا كيف نقدر نطير الجماعه ديل ويرتاح الناس جميعا منهم ومن ناس سيدى ديل


#256107 [المهموم]
0.00/5 (0 صوت)

12-14-2011 09:15 AM
دخل م. عالم جامعة الخرطوم وخرج الضار


#255935 []محمد عبد الكريم]
0.00/5 (0 صوت)

12-13-2011 08:52 PM
دخل كوز زيرا\" , قال الزير : بسم الله , اعوذ بالله من الشيطان الرجيم . من اي منطلق وعلى اي اساس قال الزير ذلك؟؟؟؟؟؟؟؟؟؟؟ الاجابة بسيطة . لقد عرف الزير ان الكوز العن من ابليس نفسو.(؟) (؟) (؟)


#255789 [عبدالله محمد أحمد]
0.00/5 (0 صوت)

12-13-2011 03:00 PM
آل المهدى وآل الميرغنى دخل القش وما قال كش


#255655 [ود العمدة]
0.00/5 (0 صوت)

12-13-2011 10:01 AM
اخي مدحت عروه الرسول صلي الله عليه وسلم قال فيما معني الحديث لاتسبوا العرب فأن منهم يعني حفظا للسان واحترام وتبجيل للرسول الكريم لاتسب العرب لهذا السبب ، اما غير ذلك فقل ما تقل لكن ليس العرب بعموم فهيم وفيهم - فيهم ا لكرم والشهامة والجوار. بالنسبة للسياسة عندنا قدمت بريطانيا زمان قبل الاستقلال بقليل انضمام السودان لدول الكومنوليث السودان رفض بحجة انهم بلد عربي ولكن لبنان اعترض علي عضوية السودان في الجامعة العربية ولكن هي غير جامعة تخيل!
اخي من أين اتي اجدانا ومن اين لنا اللسان العربي ، قدموا مهاجرين مع الفتح الاسلامي وتصاهروا مع السكان الاصليين وخرج الخليط العجيب الذي لا تحبه العرب ولايقبل به الافارقة.
بالنسبة الي دخل وخرج - دخلت الانقاذ وخرج كل قيم الشعب السودانية.


#255485 [مدحت عروة]
0.00/5 (0 صوت)

12-12-2011 11:56 PM
معليش يا قراء و معلقى الراكوبة التعليق ده ما عنده علاة بموضوع جبرا لكن انا الآن بشاهد فى قناة النيل الازرق و بشوف احتفال لبنان بالاستقلال فى الخرطوم و هى نفس العاصمة التى اعترضت لبنان على انضمامها للجامعة العربية بحجة ان السودان ليس ببلد عربى!!! و طبعا انا شخصيا لا اتشرف بانى عربى و ماذا استفدنا من انضمامنا للعرب الجرب!!! و التقول هم حاجة كويسة عشان نجرى و نتلصق فيهم!!! المشتهى الحنيطير يطير!!!!!! و طبعا بتتذكروا الضرب و الشتائم العنصرية ضد السودانيين فى لبنان!!! و انا اقول لهم و للعرب ان جزمة مواطن سودانى مهما يكن عرقه او دينه بالعرب كلهم من المحيط الى الخليج و عليكم الله يا ناس الراكوبة انشروا تعليقى هذا عشان بطنى تبرد و انحنا اصلا ما بنشبه العرب لا فى اخلاقنا و لا لوننا و لا فننا ولا ثقافتنا!!! هسع عليكم الله احسن الكومونولث ولا هؤلاء الاعراب الما عندهم غير الخيانة و الغدر و التكبر بدون سبب منطقى لانهم التخلف يمشى على رجلين( تخلف فى المخ)!!!! و السودانيين البيحترموا العرب اكثر من مواطنيهم السودانيين هم اناس زبالة و خليهم يرحلوا من السودان اكان ما عاجبهم ناسه!!!!! اعتزوا بسودانيتكم و بلدكم مليانة خير كتير و تحالفوا مع الدول المتطورة تكنولوجيا تبقوا عمالقة!!!!!!


#255466 [مدحت عروة]
0.00/5 (0 صوت)

12-12-2011 11:29 PM
ادخات كلمة الكذب فى قوقل خرجت الاجابة بعد البحث الانقاذ!!!


#255426 [حسن]
0.00/5 (0 صوت)

12-12-2011 10:42 PM
دخل تقرير المراجع العام عن الفساد المجلس الوطني ....ووخرج بسرعة لانه وجد الجماعة غير وطنيين!!!!!!


#255425 [على صالح]
0.00/5 (0 صوت)

12-12-2011 10:41 PM
واحد دخل صندوق خرج بالصرفه الاولى..... ده يكون حريف. ولا شنو


#255407 [القوس]
0.00/5 (0 صوت)

12-12-2011 09:51 PM
دخلوا الجامع ونادوا على الناس لكن بسرعة ودهاء (حيرو ابليس )عقبوهم على السوق
دخل الشيخ حيرانو القصر ودخل السجن بمزاجوا - ولكن بعد أن خرج رجعوه تلاميذو للسجن تاني لكن المرة دي بمزاجم


#255380 [nagatabuzaid]
0.00/5 (0 صوت)

12-12-2011 07:13 PM

الله يديك العافية يا جبرة تخيلوا الراكوبة كبييييييييييييييرة و قبيلة الراكوبة كلها متجمعة انا مسمية

رو ا د الراكوبة قبيلة وكل من الكتاب ناس جبرة وابو الجعافر ومنى سلمان وكلهم كل واحد عنده ركن

ومجموعة يللا الورجغى والمناكفات بالله عليكم مش حنحقق الوحدة ونشكل وطن جميل وننسى الحكومة

والحكومة ذاته حتجى تدخل معانا الراكوبة وجماعة عطا ذاتهم هم مش من الشعب مننا وكدة نكون كونا

دولة الراكوبة انا اخترت ركن شوقى بدرى وممكن ارخى اضانى مع جبرة يديكم العافية قبيلة الراكوية


#255335 [طفشان]
0.00/5 (0 صوت)

12-12-2011 05:34 PM
يا جبرة فجأتن وقع ليك ............. انت من زمن الطالبة بتعرف سعر ( القندول ) ........ حسع الطالبة البرلومة في السمستر الاول بتعرف سعر الربع والشوال والاردب وحسب النوعية وارد من وين ؟ واو أو من الغرب او من الحدود الشرقية ..... ؟ اللهم نسالك الستر والعافية .....


#255304 [محمد عبد الكريم]
0.00/5 (0 صوت)

12-12-2011 04:39 PM
دخل واحد المدرسة قضى فيها سنوات عديدة خرج منا بليد .يكون حصل لبهو شنو ؟ قا(؟) (؟) (؟)


#255303 [محمد الشيخ احمد]
0.00/5 (0 صوت)

12-12-2011 04:39 PM
يا سلام يا بروف والله ما اديتنا فرصة نقدر نعلق زاتو ايه الحلاوة دي ,,,
دخلوا الحكومة والسودان مليون مربع,,,,
ولا يهمهم ان خرجوا منها والسودان اصبح ميل مربع هو مساحة القصر الجمهوري والقيادة ومباني الوزارت ,,,,
لكن بالجد حكاية دخلت البنت إلى الجامعة خام لا تعرف تلت التلاتة كم وخرجت منها وهي تعرف تلت (القندول) بي كم دي قلبت فيها الهوبة عديل كدا ,,,
دخل القش و ماقال كش ,,,,
يابرف الثورة قادمة وراجحة الرجاء شحز همم الشعب الفضل وتحريضه علي الخروج الي الشوارع ,,,,


#255296 [محمد عبد الكريم]
0.00/5 (0 صوت)

12-12-2011 04:31 PM
دخلت مجموعة من المناشير بلد ما , فخرجت وبطونها مليانة. ياربي اكلت شنو؟;( ;( ;(


#255283 [ياسين]
0.00/5 (0 صوت)

12-12-2011 04:11 PM
:D بيت المهدي دخل القش ما قال كش


#255276 [حسن عبد الله]
0.00/5 (0 صوت)

12-12-2011 04:01 PM
و الله الدخلت فينا لي هسه ما خرجت ياربي بتخرج متين مع انو خرجنا من البلد قبل عشرين سنة و ما عارفين ندخل متين


#255273 [salah]
0.00/5 (0 صوت)

12-12-2011 03:57 PM
دخل الآن متحصل المياه ومتحصل النفايات من باب المنزل فخرجت أنا من الباب الآخر !


ياخى كويس انو عندك باب اخر


#255268 [أبو علي أبو]
0.00/5 (0 صوت)

12-12-2011 03:50 PM
تاب نديمهم ولكن ظل جليسهم كل مرة يأتي وفي يده المعلومة يضعها علي الطاولة قائلا : تبنا من شرابو لكن ما تبنا من شرايتو .. أها تفضلوا ده شيري معاكم .


#255266 [mokhtar]
0.00/5 (0 صوت)

12-12-2011 03:47 PM
\'\'* دخلت البنت إلى الجامعة خام لا تعرف تلت التلاتة كم وخرجت منها وهي تعرف تلت (القندول) بي كم .\'\'

بس يا أستاذ ما وضحت لينا قندول شنو ؟ دبر ولا ودأحمد ولا طابت و لا يكون شنو يا ربي ......


#255255 [زيكو]
0.00/5 (0 صوت)

12-12-2011 03:27 PM
البنت دخلة الجامعة وخرجت ماعارفة تلت القندول بكم لكن عارفة شمة البودرة بكم ومعلوماتها عن المايقوما اكثر من معلومتها عن الجامعة ودخل الكيزان القصر الجمهورى وشرد مليون شاب الى خارج البلد


#255236 [الزول الكان سمح]
0.00/5 (0 صوت)

12-12-2011 03:11 PM

يا أستاذ جبرا

دخل كوز فى الزير مرق مليان....ودخل كوز تانى مرق مليان....ودخل كوز تالت برضو مرق مليان...والزبر قعد فاضى

دخلت نملة أخذت حبة وخرجت...ودخلت نملة وأخذت حبة وخرجت...وجا باقى النمل ولسه بيلقط فى الحبوب


#255212 [ايمن ]
0.00/5 (0 صوت)

12-12-2011 02:19 PM
ده كلو هين المشكله في الدخلو وابو يخرجو ديل


#255204 [Saifalhag]
0.00/5 (0 صوت)

12-12-2011 02:08 PM
دخل كوز نملة خرج فيل
---------------------------
اقفل الباب يا جبرا دخول الحمام مش زى خروجوا
والجوا جوا والبرا برا
جاكم بلا يا الجوه


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة