ما عندنا ليهو رقبة !ا
12-17-2011 12:57 PM

ساخر سبيل

ما عندنا ليهو رقبة !

الفاتح جبرا

ما كنت والله أعتقد بأننا مع ضعفنا وهزالنا و(حالنا المايل) قد دخلنا إلى عالم صناعة الطيران (وما أدراك ما صناعة الطيران) وصرنا ننتج الطائرات (الوااحده دى) بل ونشارك بها في أرقي المحافل الدولية ويكون لنا (جناحا) جنباً إلى جنب أجنحة شركات الطيران العالمية كشركة دي هافيلاند الكندية، والبوينج واللوكهيد الأمريكية و سود أفياسيون الفرنسية !
إلى أن قرأت خبراً يفيد بمشاركتنا بعرض إنتاجنا من (الطائرات) في أحد معارض الطيران العالمية وهو (معرض دبى للطيران) والذى افتتحه الشيخ محمد بن راشد رئيس مجلس وزراء الإمارات حاكم دبي صباح يوم 13 نوفمبر الماضى والذى شاركت فيه 960 شركة من مختلف دول العالم قدمت أحدث ما أنتجته في مجال الصناعات الجوية !
بينى وبينكم فى بداية الأمر لم أصدق الخبر وظننت أنه (نكتة) وطرفة .. فهل لبلد يستورد النـــبـــق الفارسي من ايران والثوم من الصين والبيض من الهند والفول من اثيوبيا والطماطم من الأردن رغم مساحاته الشاسعة وأراضيه الخصبة أن يتجه لصناعة الطائرات ويقوم بعرضها في المحافل الدولية ؟
غير أننى قد توثقت من صحة (الحدث)، فقد شارك السودان كما يقول الخبر بطائرة تدريب (صغيرة) تدعى SAFAT-03 مصنعة كلياً بالسودان واخرى عمودية خفيفة تستخدم لاغراض التدريب تدعى SAFAT-02 تم (تجميعها) في السودان كلتاهما من إنتاج شركة صافات السودانية للطيران !
يبدو يا سادتي الأفاضل أن مسئولينا بعد أن إنتهوا بنجاح من حل مشكلات برامجنا (الأرضية) قد إتجهوا على (الجوية) لذلك فالعبدلله بالطبع لن يفاجأ بإشتراكنا بالمركبة (المرخية) فى معرض (ناسا) لمركبات الفضاء جنباً إلى جنب مع (ديسكفري) و(لونا) وأبوللو ، فطالما أن مسيرتنا القاصدة قد قصدت (السماء) وواسع (الفضاء) فهى لن تقف أبداً بحول الله وقوته وقريباً إذا إستمر الحال كما هو (ماشى) فلن نفاجأ بمشروع قرار لإنشاء الوكالة القومية للفضاء وأهو برضو فرصة لخلق وظائف دستورية وشبه دستورية جديده يمكنها المساعدة في عملية (ترضية) أحزاب (الفكة) وتمومة الجرتق ، والمساعدة على ترهل (الجسم الحكومى) إذ لابد حينها من إستحداث منصب لمدير الوكالة القومية للفضاء ووزير الفضاء وأيضاً وزير (دولة) للفضاء وأمين ديوان الفضاء ورئيس اللجنة العليا لأبحاث الفضاء وعدد سبعة مستشارين فضاء (مستشار لكل كوكب) ورئيس هيئة مستشارين الفضاء و رئيس اللجنة القومية العليا للفضاء ومدير عام مشروعات الفضاء ومقرر اللجنة العليا للإستراتيجية الفضائية الكونية الشاملة ورئيس المجلس العلمى لجامعة علوم الكون والفضاء و(مفتى فضائي) لتحديد إتجاه القبلة في الفضاء وإثبات هلال رمضان !
ولكم سادتي أن تعلموا بأن المسئول الرفيع الذى رافق الطائرتين (التحفة) قد أعرب (كما يقول الخبر) عن الاعتزاز والفخر بهذه المشاركة السودانية في المعرض، منوها بأنه لولا معرض دبي للطيران ما تمكن السودان من عرض إنتاجه الوطني السوداني كما عبر عن امتنانه للقائمين على تنظيم معرض دبي للطيران الذين سهلوا مهمة مشاركة السودان في المعرض وعرض تلك الطائرات، حتى يتعرف الاف الزائرين على القدرات التكنولوجية السودانية.
إنتهي الخبر .. ولم تنته حيرة العبدلله ودهشته ! وطفقت أسائل نفسى : ما هى القدرات التكنولوجية (الطيرانية) التى نود أن يتعرف عليها ألاف الزائرين لهذا المعرض العالمى؟ وهاتان الطائرتان يمكن أن تكونا مشروع تخرج لأى طالب هندسة طيران في اى جامعة ، بل يمكن لأى (خواجة) هاوى طيران أن يقوم بتصنيعهما داخل (قراش بيتو) بسهولة ويسر (للتحقق من صدق ما أقول ما عليكم إلا البحث في موقع اليوتيوب على الإنترنت لتجدوا مئات الأشخاص الذين قاموا بتصنيع مثل هذه الطائرات الصغيرة والتحليق بها) !
سألت نفسي فى غباء : ماذا نستفيد من الإشتراك بهكذا طائرات (تدريبية صغيرة) عادية الكفاءة في معرض مخصص لإستعراض آخر ما توصلت إليه تكنولوجيا صناعة الطيران؟ وأين التكنولوجيا فى (تجميع) طائرة (عمودية) صغيرة ؟ يمكن لأى (ميكانيكى طيارات) لو أدوهو (الكاتلوج) وزردية ومفتاح تلطاشر ومفك (نجمة)أن يقوم بتركيب أجزائها؟ بالطبع مثل هذا الحديث الذى أفاد به المسئول (ممكن يقولو لينا نحنا ديل) ولكنه لا يصلح أن يقال فى معرض يضم شركات تقوم بتصنيع طائرات تخترق حاجز الصوت !
إذا سلمنا جدلاً بأننا نود أن نبدأ عصر صناعة الطائرات وهى صناعة مكلفة للحد البعيد وتحتاج إلى مكونات ليس لنا بها قبل ، فهل هذه هى الأولوية في ظل إقتصادنا المتهالك ومناداة وزيرنا للمالية برفع الدعم عن الوقود (وفك الشعب عكس الهواء) ! أوليس الأجدى أن نتجه بل نوجه كل طاقاتنا نحو إعادة تأهيل مشاريعنا الزراعية (البنعرف ليها) بدلا عن إهدار مواردنا (الشحيحة) في مثل هذا التخبط الغريب ومثل هذا الشعر (الما عندنا ليهو رقبة) !
العبدلله بالطبع يغبطه أن تنتج بلاده (طيارات) وأن تكون بلاده لديها مصانع صواريخ بل ومركبات فضائية ،على الأقل نشغل فيها أولادنا الخريجين (الطايرين) ديل .. لكن يحزنه تماماً أن تدار مؤسساته بمثل هذه (الهاشمية) دون التبصر أو التأمل أو الدراسة !

كسرة :
يا جماعة طيارات شنو؟ سراويلنا .. سراااااااويلنا (الواااحده دى) .. بتتصنع في الصين .. يا مثبت العقل والدين ... يااااااا رب !


الراي العام


تعليقات 39 | إهداء 3 | زيارات 7672

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#258651 [TIGER SHARK]
0.00/5 (0 صوت)

12-19-2011 12:34 AM


FUNNY SUBJECT.......VERY FUNNY COMMENTS


#258275 [kakom]
0.00/5 (0 صوت)

12-18-2011 10:51 AM
هههههههههها والله هذي بلشة ....!


#258263 [kaka]
0.00/5 (0 صوت)

12-18-2011 10:38 AM
والله نحن السودانيين للاسف فينا الكثير من طباع العبيد فهذه التصرفات المتمثلة في الحكومة تثبت ذلك فالواحد المفروض يمد رجلو علي قدر لحافو وبعدين نحن حساسين جدا عن كل مايقال أو حتي تعليق عابر من الاخوة العرب ونعتبرها حقارة فبالله عليكم ما معني المشاركة في معرض طائرات وشبح المجاعة يهدد اجزاء كبيرة من الوطن ..؟؟؟


#258233 [هجو نصر]
0.00/5 (0 صوت)

12-18-2011 10:11 AM
جميعنا يعرف ال(Jigsaw) التي يحملها اطفال الروضة لتساعدهم علي الرياضة العقلية وهذا في كل العالم وعند اطفال النخب السودانية وهي لعبة الصاق قطع عديدة لتكوين احد الاشكال ! والطريف ان انشتاين الحيوانات هو احد الدببة استطاع تركيب شكل مبسط من هذا( الجيق سو) !وما قاله الاخ ابكر عن تطوير اللعبة لتفيد حتي الكبار ترينا الفرق بين العقلية المسؤولة وتلك التي منتهي همها الفم والفرج ! والله زي مصانعكم دي ماشة بكرعينها في كل الدنيا وعاااااااااادي زي الزبادي ! بلا لمة يارحمك الله ابو اّمنة حامد


#258191 [سمارة]
0.00/5 (0 صوت)

12-18-2011 09:00 AM
استاذناجبرة متعك الله بالصحة والعافية ;) ;) ;) ;) ;) ;) ;) ;) ;) ;) ;)


#258183 [محبط]
0.00/5 (0 صوت)

12-18-2011 08:38 AM
انت ماتقول لو ما الصين كنا مشينا ام فكو


#258167 [قول النصيحة]
0.00/5 (0 صوت)

12-18-2011 05:45 AM
يا جبرة سلاااااااااااااااااام

جبرة ولا وين

و الله الليلة ضحكت جنس ضحك منك و من المعلقين

انت قاصد ياتو لباساااااااات

و بعدين ياتو لباسات بتاعات التكة والا اللستك

مباااااالغة يا جبرة

طلب الفول بخمستاشر جنية ، الفول حبيب الشعب الما عندو عدو

تقولي شنو و تقولي منو

بني كوز الله يهدهم الليلة قبل بكرة يا رب يا رب يا رب


#258113 [ابن السودان البار]
0.00/5 (0 صوت)

12-18-2011 12:15 AM
ستلذ الفاتح جبرة حلاتك ؟؟؟ انت لسة ماودوك بيوت الأشباح ؟؟؟ والله انا خايف عليك ؟؟؟ الناس ديل ما بهدلتهم كان يحسوا ؟؟؟
كسرة :- الصناعات التجميعية دي ابو الفساد ذاته وتدخل في الدول المتخلفة في غفلة من شعوبها لتستعمرها أقتصادياً بطريقة يصعب الفكاك منها ؟؟؟ علي سبيل المثال شركة فييات الأيطالية ادخلت تجميع سياراتها الصالون في مصر قبل حوالي 50 سنة تحت اسم شركة نصر لصناعة السيارات وفرح بعض السذج بأنهم سوف يتعلموا صناعة السيارات يوماً ما بالأستفادة من التجميع ؟؟؟ وطبعاً الشركات لا تسمح بذلك لأنه لو علمتك لأنخرب بيتها ؟؟؟ فتحتكر السوق دون منافسة وتستفيد من العمالة الرخيصة وتستقدم لك الأجزاء التي بها اسرار فنية مقفولة جاهزة وما عليك الا ان تربطها في مكانها المحدد وقد تترك لك تصنيع الأجزاء الخطرة التي تضر العامل الأوربي مثل عمل الطلاء ؟؟؟ او تصنيع البطاريات ؟؟؟ ويفرح السذج والسياسين يخدعون شعوبهم بأنهم دولة متطورة تصنع السيارات ؟؟؟ تنتشر سيارات هذه الشركة وتحقق مبيوعات خيالية وتخلق سوق مهولة للأسبيرات ويتعلم المكانيكية ليجيدوا فقط صيانة هذا النوع وتفشل اي سيارة اخري منافسة من قبل الشركات الأخري دخول هذا السوق المحتكر ويرسخ في ذهن الناس اسم هذه الشركة فقط حتي لو كانت الشركة المنافسة اسعارها اقل وصناعتها اجود ؟؟
ان هذا النهج اي الأهتمام بالمظاهر يناسب عقلية العسكر والمنتفعين الذي بعد الأنقلاب مباشرة يقومون بتجميل الصواني اي الدوارات صينية الحركة وتجميل شارع القصر ؟؟؟ وتعريف العالم الثالث المتخلف هو البلد الذي يحتاج لشرب مياه نظيفة صالحة للشرب ويقوم رأيسهم ويعلن بكل فخر بناء مدينة رياضية ؟؟ ويحتاجون للدواء ويستورد لهم رئسهم نبق قلاد فارسي ؟؟؟ والخرطوم جايها الأمطار لتقرقها والبشير مشغول بصناعة الطائرات ؟؟ بالله عليكم مين الحايشتري طيارة مجمعة في السودان البيتج جبنة تسمم الأطفال ؟؟؟ ولك التحية يأاستاذ يا كبير ووطني حفظك الله لهذا الوطن المنكوب وقاتل الله الكيزان اللصوص مقتصبي الرجال والنساء والثورة قادمة انشاء الله ؟؟


#258112 [عثمان الصراف]
0.00/5 (0 صوت)

12-18-2011 12:05 AM
خبر سرى ياجبرة عن صافات3 المكنة حقتها * مكنة دفار31 *


#258059 [القوس]
0.00/5 (0 صوت)

12-17-2011 09:48 PM
يالفاتح الجماعة ديل عندهم انفصام شخصية - ويقودهم اهبل ما عاقل مطلوب للمحاكم - وفي رقبتو دماءآلاف الابرياء الذين قتلوا وهو من هذا الخوف والمصير (في الدنيا والاخرة )يرقص مع بنات في عمر الزهور هو شائب اقترب من نهاية العقد السابع - ويقول لمن حوله سوف يطبق الشريعة -حقيقة الاختشوا ماتو


#258058 [Ali]
0.00/5 (0 صوت)

12-17-2011 09:48 PM
ود أب زهانه لابس صديري و...... عريانه


#258041 [hajabbakar]
0.00/5 (0 صوت)

12-17-2011 08:18 PM
السافات سفا
حكى لى صديق بانه شاهد احد هواة الطيران يحمل فى يده شنطة
وجلس على الارض وفتح الشنطة وقام بتركيب طائرته دون ان يستمل شاكوش
وبعد برهة توجه الى تلة مرتفعة وحلق لسويعات فى الفضاء ثم عاد الى مكان الاقلاع
فلم يندهش الا صديقى فلا ادرى ان كان انقاذيا ام لا


#258036 [الشايل المنقة]
0.00/5 (0 صوت)

12-17-2011 08:07 PM
... الحاجه ام الاختراع ...ومشوار الالف ميل يبدأ ب خطوة ...


#258030 [الفاروق]
0.00/5 (0 صوت)

12-17-2011 07:58 PM
معليش ياجماعة ما ديل ينطبق عليهم المثل \" عريان في صلبو ... اشترى سديري \"


#258004 [ عوض عبد الله الحاج مصطفى]
0.00/5 (0 صوت)

12-17-2011 06:19 PM
اخى الفاتح قول يامثبت العقل والدين عرفنا الهبل الحصل فى المهزلة المشاركه وكنت احسبها نكته ولكن اليوم تاكد لى نوع الهبل الذى يعيش فيه بعض من ابتلانا الله بهم لحكم بلادنا والذى لا شك فيه انه غضب من الله بان ابتلانا بمفكر بالاشتراك فى معرض كمعرض دبى - هل هنالك من سال كم دفعنا للاشتراك فى هذا المعرض وكم عرض شراء لطائراتنا قد تسلم مندوبونا الذين اقاموا فى فنادق دبى وكم كانوا يتقاضون بدل سفريه يوميا بالدولار الذى يبحث عنه مرضى يعانون الامرين بحثا عن معالى السيد الدولار طلبا للعلاج
اى فساد تتكلون عنه ويكاد الفساد يقول نحن هنا - انها بجد مهزله ويالها من مهازل ولا استبعد ان ياتينا عبقرى اخر بانهم سيرسلون رجل فضاء الى القمر مساعدا لرجال الفضاء من اجل تجهيز الحله لرواد الفضاء - طالما الموضوع فيه بلع - والعبقرى الذى لم تلد سودانيه مثله وزير الماليه يفكر فى زيادة سعر البنزين - يهمه شنو طالما عنده 3 عمارات كما قرانا فى الراكوبه ممكن تؤجر بالدولار ويحول الائجار الى مليزيا


#257995 [saad]
0.00/5 (0 صوت)

12-17-2011 05:39 PM
قبل فتره نشرت الراكوبه , بأن طائره نزلت علي بوكس وهو ماشي . المره دي انشاء الله تنزل علي راس البشير


#257993 [sami]
0.00/5 (0 صوت)

12-17-2011 05:36 PM
أنا معجب بكلمة مستشار لكل كوكب دي حلوة .....:D :D


#257992 [saad]
0.00/5 (0 صوت)

12-17-2011 05:35 PM
يا أستاذ جبره يا أخي نحن حتي الأن عندنا مشكله حقيفيه في المواصلات داخل العاصمه , وبدل ما يجمعوا البصات ويعملوا ليها طرق .......................


#257970 [أبو علي أبو]
0.00/5 (0 صوت)

12-17-2011 04:54 PM
[جرب عباس ابن فرناس الطيران فوقع علي قنيطه فكسره ! ياناس ريحوا الورق شوية وحلوا لينا المواصلات البرية والبحرية ثم اتجهوا للطيران ب أو بدون طيار ! الشفقة تطير


#257952 [انور]
0.00/5 (0 صوت)

12-17-2011 03:55 PM
شر البلية ما يضحك .
صافات او ركشة طائرة ،
قبل ايام قليلة كنت اعبر منطقة المصانع بمارنجان ( الجزيرة ) و عجبت كيف كانت حالة هذه المصانع قبل العهد المشؤوم لقد كانت مثل خلايا النحل من كثرة العمال و الموظفين وكانت تعمل 3 ورديات في اليوم ، و اليوم يسكنها البوم ، حتي الفئران لا توجد بها .
في قريتي يوجد صاحب جرار اشتري محراث دسك من مصانع شركة جياد , والله المحراث عمل في الراجل دا عمائل كل يومين ثلاثة يستأجر دفار و يجيب العتالة يرفع المحراث لجياد ويتم تصليحه و اعادته ثم يذهب مرة اخري و هكذا الي ان تركه و اشتري دسك برازالي قديم جدا من اولاد راجل مات ليه اكثر من عشرين سنة حتي صاحبنا ارتاح من تصليح محراث جياد .
عالم وهم والله .
برا صافات برا ابابيل .


#257942 [rasheed]
0.00/5 (0 صوت)

12-17-2011 03:11 PM
طيارات شنو البنصنعها نحن قال مصنوعه كليابالسودان قال دي ودوا ليها زول مخصوص عشان يتعلم يفكها ويجي يركبها في السودان زي شركة جياد البتجيب السياره كلها مفككه وبركبوها هنا.هو نحن صرف صحي ما عندنا طيارات شنو البنصنعها.


#257936 [محسيه]
0.00/5 (0 صوت)

12-17-2011 03:02 PM
اهمه حاجه ياجبرا

ما يعملوا احتفال ما يجريبوها لينا

وتقع ليها في راس بيت نحنا الفينا مكفينه


#257923 [عبداللطيف]
0.00/5 (0 صوت)

12-17-2011 02:42 PM
والله بالجد ضحكتونا. قوموا يا مسعولين علي اوكامبوا وخليكم من الطيران والكضب في الفارغة .


#257922 [ابومروة]
0.00/5 (0 صوت)

12-17-2011 02:42 PM
لقد برر مصطفى عثمان اسماعيل سقوط سودانير من قبل بسبب الحصار الامريكي للسودان ومنع سودانير من استيراد قطع الغيار الامريكية.... طبعا دا كلام فضيحة ولكنه مر مرور الكرام وغير الكرام ... المهم
طالما كنا يا سعادة المستشار نستطيع صناعة الطائرات لماذا لا نبدأ بقطع الغيار لسودانير...؟
سؤال آخر... ما هي ميزانية مصنع الصافات ومن اين يتم تمويله وما اسم بيت الخبرة الذي اعد دراسة الجدوى ومن هو المهندس الاول الذي حصل على براءة انتاج طائرة التدريب اياها؟
كم عدد الدول التي ابدت رغبتها لاستيراد هذه الطائرة العملاقة؟
هل استطاعت هذه الطائرة الوصول الي الامارات لوحدها ام تم شحنها؟
اذا كانت الحكومة هبلاء وبلهاء فيجب ان يكون المواطنين عقلاء .. ولذلك ادعو كل مواطن لاخذ الساتر اذا سمع فوق رأسه صوت طائرة ما مألوفة او شعر بزيت ينقط من السماء برضو الحذر مطلوب كفاية بلاوي الوطاة ... وعلى رأي عادل امام
انا تطلع لي صافات...؟


#257920 [Wyoming]
0.00/5 (0 صوت)

12-17-2011 02:37 PM
تقول شنو يا استاذ جبرة في بلد حكامها هم جهلاء والموضوع كل بوبار في بوبار عشان الناس تقول شوفوني.
ملعون ابو حكومة تخلي الخبرات و الكفاءات تهاجر وبعد داك يقولو ليك نحن صنعنا طائرة انشاءالله طائرة تاخذهم جميعا من اكبر مسئول الي اصغلر واحد
والله المستعان


#257912 [ود ابوشوارب]
0.00/5 (0 صوت)

12-17-2011 02:23 PM
آآآآآآآآآآآآآآآآآآآآآآآآآآآآآآآآآآآآآآآآآآآآآآآ
خخخخخخخخخخخخخخخخخخخخخخخخخخ


وكيف يحلب الثور؟؟؟؟؟؟؟؟؟؟

سؤال موجه لسادتنا


#257909 [mohd]
0.00/5 (0 صوت)

12-17-2011 02:19 PM
شر البلية ما يضحك

وهسع مدير صافنات دا شكله هاوي والنوع البحب يفكك وتلقاهو خرب اجهزة البيت كلها من زماااااان وبقى مؤتمر وطني وقال لهم نعمل مصنع طيارات عشان يجرب ويخرب ويسجل على حساب الشعب لحدي ما صادفت الطيارة دي يعني الطيارة دي قبل ما تطير تكون وقعت ستين مرة لحدي ما طارت بصورتها حقت اليوم والطاير الراكب فيها دا (كان طاير ما عنده وظيفة ولقى له وظيفة في صافات) تلقاه مركب له برشوت في ظهرة وخاتي يده في وكرة الباب لو بطلت يفتح الباب ويخارج رقبته

يا امة ضحكت من جهلها الامم

عريان ولابس له صديري


#257907 [مغبون]
0.00/5 (0 صوت)

12-17-2011 02:14 PM
نسيت اهم وظيفة انقاذية كسار تلج فضائي لزوم نفخ المسعولين فى الفارغة والمقدودة ومقارنة طائرات اللعب بال اف


#257904 [كبكبه]
0.00/5 (0 صوت)

12-17-2011 02:10 PM
هل تعلم ان موتورات او مكنة الطائرات دى مكنتة موتر سوزوكى وكان طارة صوت موتر سوزوكى فى عشش فلاته وكان قعدة تلف فوق ذى فسوة ابليس فى صيف حلفا الساعة اطناشر ودى معارض لزوم اكل عيش ومصدر رزق للكيزان اولادهم عايزين مصاريف وقالو لزوم نطلع نجيب حق الاكل من دبى


#257898 [jangy]
0.00/5 (0 صوت)

12-17-2011 02:00 PM
الفاتح يوسف الحسادة ليك شتو .. خليهم يجربو لينا الفضاء وكت الواطا ما نفعت ويشغلو الشعب الفضل انشاء اللة وزير لكل نجمة من نجوم السما ونستورد وزرا كمان .. قال علم فضاء و ناسا .. قوم شوف ليك سروال وارد الصين


#257899 [واحدة بطنا طامة من رباطية المؤتمر الوطني وكل الاحزاب]
0.00/5 (0 صوت)

12-17-2011 02:00 PM
ما تتحير يا ود جبرة لانو بصناعة الطيارتين ديل بنكون قربنا من تحقيق مشروعنا القاصد الي الله وطالما انو ربنا في السماء فاكيد المشروع في حاجة الي طيارات فهمت ولا افهمك ;( ;( ;( والله العظييييم هلكنا


#257887 [الصيف السوداني]
0.00/5 (0 صوت)

12-17-2011 01:34 PM

أستاذنا الفاتح جبرا

السلام عليكم

أصبت كبد الحقيقة ، كي لا تزداد حيرتك أعرف أن الموضوع كلو مأكلة و غش و محاولة سلخ لجلد النمل.

أنا مختص في هذا المجال و قد قلت مثل كلامك هذا من قبل فإنبري لي حشد النفعية بأوصاف أكيد تكون وصفت بها من قبل.

قواك الله في كشف هولاء الأرزقية الطفيليون (الطفابيع). و باعد بينك و بين صحفيو الدفع المقدم ، الذين يقولون أنهم إتصلو علي مامون حميدة لإستجلاء الحقائق (كما تسأل السارق من سرق و تعتمد علي شهادته في حكمك علية).





الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة