يسألونك !ا
12-21-2011 12:45 PM

ساخر سبيل

يسألونك !

الفاتح يوسف جبرا

* يسألونك عن الفول .. قل ٌإنه إذا إستمرت أسعاره بهذا التصاعد فسوف يصاب الشعب الفضل بأنيميا (عدم) أكل الفول (ودي غير أنيميا أكل الفول)!
* يسألونك عن إقرار الذمة .. قل (هى وينا الذمة البيعملوا ليها إقرار) ؟!
* يسألونك عن التقشف .. قل هو تجويع الشعب حتى يتقشف جلده!
* يسألونك عن العالم التالت .. قل هو الذي لا يستطيع شعبه ان يقول (تلت التلاته كم)!
* يسألونك عن المرحلة الجامعية .. قل إنها المرحلة التي تسبق العطالة!
* يسألونك عن الفلوس .. قل الشعب مش محتاج ليها (مش عندو الماستر كارد والفيزا كارد) !
* يسألونك عن السجين .. قل هو مجرم (بس ما لقى ليهو واسطة تخارجو)!
* يسألونك عن قنواتنا التلفزيونية .. قل هى أداة من أدوات التعذيب!
* يسألونك عن تعدد الزيجات .. قل هو عمل يقوم به (المؤمنين) الصالحين من أجل تقليص نسبة العنوسة زى ما بيقولوا (بس قاعدين يعزلوا البنات الصغار وسمحات !)
* يسألونك عن المؤامرة .. قل إنها شماعة نعلق عليها فشلنا وأخطاءنا ( هو الشغال بينا بالله منو؟)
* يسألونك عن الشفافية .. قل هى لباس يظهر العورات .. (وطبعن إظهار العورة حرام يا جماعة)!
* يسألونك عن البطالة .. قل هي المشكلة التى تسبب للدول (البتحترم نفسها) هاجساً مرعباً
(وعشان كده بتسعى لحلها والقضاء عليها)!
* يسألونك عن الفساد .. قل هو آفة تعانى منها معظم الدول ما عدا السودان (عشان الواعظ الديني وكده)!
* يسألونك عن الغلاء .. قل هو أن يساوي مرتبك خمسة كيلو لحمة (وهى قيمة الحد الأدنى للأجور)!
* يسألونك عن التسول .. قل (كان توسل وهسه بقى قلع عديل) !
* يسألونك عن الحزام الناسف .. قل إنه ربما يكون اسما لأغنية جديدة بعد الأغنيات الحربية مثل (قنبلة) و (أضربنى بى مسدسك وأملاني أنا رصاص) !
* يسألونك عن حظر النشر في جرائم وفضائح الفساد .. قل (مال يكتلوها كيف)!
* يسألونك عن إخفاق بعثة الدورة الأولمبية الأخيرة قل (شئ متوقع ..هو شنو الشئ الما أخفقنا فيهو)
* يسألونك عن تذاكر دخول المستشفيات لزيارة المرضى .. قل أنها لا تتفق بل تتعارض وتوجيه الرسول الكريم الذى يحضنا على زيارة المرضى (ونحنا دولة رسالية وعندنا مشروع حضاري كده)
* يسألونك عن تقرير المراجع العام .. قل (يعنى شنو ما قاعدين نقراهو كل عام) !
* يسالونك عن الصرافات .. قل (ياتا الفى البنوك وللا الفى البيوت؟)
* يسألونك عن الشريعة .. قل (عفواً لا أستطيع رؤيتها دون نظارة مكبرة)
* يسألونك عن الإغتراب .. قل هو مشروع لتسمين الحكومة وإفقار المغترب
* يسألونك عن الأعياد .. قل أصبح (الفلس) لا يجعلنا نتذوقها
* يسالونك عن حملة الدكتوراة في بلادنا ... قل (إنهم أصبحو أكثر من الباعة الجائلين على شارات المرور) !
* يسألونك عن هيئة الحج والعمرة.. قل (إنتا من زمن كانت هيئة؟ مش قلبوها بنك وبقت تدى مرابحات) !
* يسألونك عن الميزانية .. قل هى إجراء أكدت التجربة أن العمل به غير ملزم (وبكرة يزيدو ليكم البنزين وبعدين قولوا الفاتح جبرا قال) !
* يسألونك عن خط هثرو -الخرطوم .. قل (هههههه مش الموضوع خلاس مات وكده) !!
كسرة:
* يسألونك عن الموت الأكلينيكى .. قل (دى الحالة الأنحنا فيها دى)!


الراي العام


تعليقات 20 | إهداء 2 | زيارات 5928

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#261132 [ابن السودان البار]
0.00/5 (0 صوت)

12-23-2011 01:10 AM
الأستاذ الفاتح جبرة انت رائع ومبدع ويا حلاتك ؟؟؟ وطريقة نقدك فعالة ومبتكرة واسمح لي بالتقليد
يسألونك عن جيش السودان ؟ قل هو أسد علي شعبه ونعامة في حلايب وكل أراضي السودان ؟؟؟
يسألونك عن قضاء السودان ؟ قل هو تعزيب وقتل وأغتصاب معارض الكيزان ؟؟؟
يسألونك عن إقتصاد السودان ؟ قل هو إقتصاد الفاشل المستورد للبصل والنبق كمان ؟؟؟
يسألونك عن العلاج في السودان ؟ قل هو الجهل والإهمال والأجرام ويا بخت الأردن ومصر المهيصين بدولارات السودان الفلسان ؟؟؟
يسألونك عن الأقزام ؟ قل هم جيل السودان الغذاه موية الفول والفاقد حنان ؟؟؟
يسألونك عن الرياضة بالسودان ؟ قل هي رياضة الموهوب الجعان وهفتان وطيش العربان ؟؟؟
يسألونك عن الشهادات في السودان ؟ قل هي بروف ودكتور توزع للأهل والحبان ؟؟؟
يسألونك عن المغتربين ؟ قل هم بقر الفريزيان الحالباهم حكومة الكيزان ؟؟؟


#260950 [حتو]
0.00/5 (0 صوت)

12-22-2011 05:14 PM
يسألونك عن النفايات والبلد في كوم نفايات


#260905 [abuzifit]
0.00/5 (0 صوت)

12-22-2011 03:54 PM
في عهد الإنقاذ

يسألونك عن العرقي الأصلي .. قل بجيك بالركشة دليفري
يسألونك عن البنقو الأخضر .. قل بجيك بالموتر
يسألونك عن بائعات الهوي .. قل في شوارع الإنقاذ قد رفعن اللوا
يسألونك عن الشذوذ الجنسي .. قل في الشوارع عريانهم والمكسي
فأن قالوا فأين هي الشريعة الرحيمة قل يالموضتكم القديمة


#260545 [القوس]
0.00/5 (0 صوت)

12-21-2011 11:37 PM
يسالونك - عن الرقيص الرئيس حرام ( قولهم هي دي دايرا كلام)
يسالونك عن الجنوب - قل لهم لاعاش من يفصلنا
يسالونك - عن لحس الكوع ( قولهم برنامج كومدي سئ الاخراج )
يسالونك - عن بنغازي قولهم حررتها انا بس ما حد مصدق
يسالونك - عن الشريعة - شعار رفعتو الاتقاذ لتخدير الناس
يسالونك عن الشعب السودان ( قل لهم لم ار شعب يشبه هذا الشعب المنكوب )
يسالونك عن شباب السودان ( قل جبان ، جيعان رضا بالهوان والهوان ما رضا بيه )
يسألونك ان تدعو لهم - قل اللهم قد سلط عليهم من لا يخافك ولا يرحم - نسالك ان تطعم جائعهم وتشفي مرضاهم وتعجل بخلاصهم من الظلمة والظالمين آمين

كسرة
يسالونك عن الحكومة الموسعة - دلهم على غرفة الانعاش




#260478 [مايسترو]
0.00/5 (0 صوت)

12-21-2011 08:48 PM
ينصر دينك يااستاذ


#260411 [انور]
0.00/5 (0 صوت)

12-21-2011 07:05 PM
يسألونك عن القوى الأمين ؟؟ ... قل هو صاحب الكرش السمين
تمساح الاربعين بلفح شمال و يمين .
وكمن يقول نحنا ناس متوضيين


#260403 [واحدة بطنا طامة من رباطية المؤتمر الوطني وكل الاحزاب]
0.00/5 (0 صوت)

12-21-2011 06:56 PM
ويسألونك عن الشعب السوداني ,قل الفضل ولا واحد تاني

ويسألونك عن الاخلاق والمثاليات ,قل الكانت زمان ولا البقت مانشتات

ويسالونك عن وطن الجدود قل الوصونا عليهو زمان ولا الفصلوهو بالحدود

ويسالونك ويسالونك ويسألونك وانت تجيب علي كل التساؤلات دون ان تجرؤ علي الضجيج علنا في سوق الله اكبر الذي اضحي كالمرجل ,ولنا الله ولكل ظالم نهاية


#260346 [ابوهاشم]
0.00/5 (0 صوت)

12-21-2011 05:07 PM
يسالونك عن الصرافات .. قل (ياتا الفى البنوك وللا الفى البيوت؟)
;) ;) ;) ;) ;) ;)
يسألونك عن خط هثرو -الخرطوم .. قل (هههههه مش الموضوع خلاس مات وكده) !!;( ;( ;(


#260310 [A.Idris]
0.00/5 (0 صوت)

12-21-2011 04:05 PM
يا عمنا الفاتح جبرا سمعنا تحت تحت انك إنته وفاكنك الجماعة تكتب عشان يعرفوا بيك
مزاج الرايء العام رغم ان الراي العام اصبح معروف ومش محتاج لوسائل ايضاح

الشيء الغريب سخريتك وصلت لكل النافذين ورغم ذلك انت عائيش في سلام وامان
وقفتك مستورة وحلتك مليانة عضة وقرقوش مافي ولا يوم نمت وباب بيتك معصور بعوود من الداخل عشان ما يتلبوا عليك زوار الليل بتاعين النظام

شكيناك للشديد القوي ان كنت كذلك
وارجوا ان يخيب ظني وتكون انسان نظيف وشريف وصاحب يدين نظيفة عشان كلنها نهتف معاك
ونكون ساخرين سبيل ولافين من سبيل لسبيل الى ان نسلم للباريء

أرحموا الشعب يرحمكم من في السماء

وأخيرا نقول

عوضنا الله


#260295 [المهموم]
0.00/5 (0 صوت)

12-21-2011 03:41 PM
يسألونك عن السودان ؟؟ ... قل ماراح معي ديل في خبر كان

يسألونك عن الاسلام؟؟ ... قل هو وينو الاسلام مع الكيزان

يسألونك عن الكيزان؟؟ ... قل ديل هم اخوان الشيطان

يسألونك عن ساخر سبيل ؟؟ ..... قل ما دا ذاتو الحيعملها في البشير


#260264 [ودالخضر]
0.00/5 (0 صوت)

12-21-2011 02:54 PM
يسألونك عن المؤتمر الوطنى قل (ياهو يابيت ابى)


#260258 [سوداني موجوع]
0.00/5 (0 صوت)

12-21-2011 02:48 PM
يسألونك عن عيد الإستقلال ؟؟؟؟؟؟ قل إسألوا شهقة جروف النيل مع الموجة الصباحية


ردود على سوداني موجوع
Sweden [A.Idris] 12-21-2011 06:57 PM
يازول ما تذكرهم وتجيب سيرة جروف النيل دي ثاني
يقوموا يكابسوا اهلها ويكرهوم بالضرائب او يبيعوها منهم زي المرحوم مشروع الجزيرة


#260244 [أبو طاقية]
0.00/5 (0 صوت)

12-21-2011 02:22 PM
يسألونك عن القوى الأمين ؟؟ ... قل هو صاحب الكرش السمين


#260241 [تونا المهزومة ]
0.00/5 (0 صوت)

12-21-2011 02:19 PM
يسألزنك عن جمهورية السودان قل ( ايتها الاولي ولا الثانية )


ردود على تونا المهزومة
Sweden [A.Idris] 12-22-2011 03:04 PM
الله يكفيكم شر الهزيمة وخلي اخلاقكم رياضية
ما اخذ القوة لا يسترد الا بالقوة


#260234 [ما مهم]
0.00/5 (0 صوت)

12-21-2011 02:11 PM
يسالونك عن الفاتح جبرا
قل هو الوحيد الذي يصنع لنا الضحكة دون ان يطالبنا برسوم


#260224 [انا سودانى انا]
0.00/5 (0 صوت)

12-21-2011 01:58 PM
يسالونك عن القصر.. قل ده حولوه لروضة دار الحنان وكمان معهم المسنين من ايام زمان...
يسالونك عن البرلمان.. قل صار فضيحة وما بخاف من ربنا وعاوز زيادة امتيازات كمان...
يسالونك عن الحكومة العريضة... قل دى شبعت مرض واتملت قراد كمان...


#260196 [ود كسلا]
0.00/5 (0 صوت)

12-21-2011 01:26 PM
شكرا للتنبيه


#260189 [ود كسلا]
0.00/5 (0 صوت)

12-21-2011 01:21 PM
قلت ليا التشكيل الوزاري قامت بيهو مكنة تصوير توشيبا؟؟ ههههههههههه أحييك يا استاذ على هذا النهر المتدفق من الإبداع .. ربنا يخليك


#260177 [الزول الكان سمح]
0.00/5 (0 صوت)

12-21-2011 01:07 PM

يسألونك عن مواصلات العاصمة: قل ( هى فى إنتظار الدلالة )

يسألونك عن البترول: قل ( شربو الغول )

يسألونك عن المناصير: قل ( دايرين يطيروا البشير )

يسألونك عن البرلمان: قل ( أريتو بالبمبان )

يسألونك عن المستشار: قل ( دى أكلة بدون شمار )

يسألونك عن أطور: قل ( لحقوهو التور ..بتاع خال الرئيس )


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة