12-22-2011 08:59 PM


حميد أخوي

إبراهيم الكرسني
[email protected]

أهدي هذه الخواطر الى الأخ الفاضل، الشاعر الفذ، الأستاذ المناضل محمد الحسن سالم \"حميد\"، بمناسبة إهدائي نسخة من ديوانه، \"أرضا سلاح\" والذى تم تدشين إصداره بقاعة الصداقة بالخرطوم فى الحادي و العشرين من شهر أكتوبر الماضي، آملا أن تليق بمقامه الذي نحته بأشعاره الخالدة فى وجدان الشعب السوداني، ومتمنيا له موفور الصحة و العافية على الدوام .
إبراهيم الكرسني


حميد أخوي
\"أرضا سلاح\"
نطقا القلب
قبل اللسان
فشان بلدنا المستباح
من جوهو ناس هولاكو ديل
حتى الكتل أصبح مباح
...
حميد أخوي
وينا البلد؟؟
ما أصبحت محتله بى ناسن كتار!!
واحدين حبش
واحدين ترك
واحدين أفارقة بلا بلاد
نسأل نقول
يا أخوانا من وين جونا ديل؟
قالونا جونا من الأمم
مرتزقة مخلوتين جنود
و المغسة بيناتن هنود
...
حميد أخوي
من إنتا فارقتا البلد
جفا الضرع
عدم المراح
والناس بتاكل فى التبن
مع إنوخيرن كيف كتير
لكنو منهوب من بشر
لا بعرفو دين لا بدورو خير
شيتن زكاة
ودمغة جريح
وشيتن حرب
وشيتن سلام
وشيتن بيهرد للقلوب
الميتي بى قولة تمام
من فارقت درب النضال
درب البنا...ودرب النفير
...
حميد أخوي
كان شفتا ناس حلوف هناك
بقى عيشتن زي السجم
يصحو الصباح
فتاح يا عليم
رزاق يا كريم
تلقى الزويل
فوق همو داك
شايلو مليون ألف هم
...
حميد أخوي
من وين يجيب شاي الصباح؟
طول عمرو يشرب فيهو
بي عسمان حسين
يسكت يكب.. من دون حساب
لامن مزاجو ده يتعدل
مو قايل الزمن اللعين
بيحرمو من شيتن
بيشربو بالسنين!!
...
حميد أخوي
من وين يجيب حق الفطور؟
والله \"فد فرطاقة ما دخلت جرابو\"
ده ليهو دور
ما خيرو شالو أبان كروش
ناسن غراب
لا بنشبهن لا مننا
ناسن تقول غازننا
كان شفتهن حميد أخوي
والله لابد من تدوش
...
حميد أخوي
من وين يجيب حق الملاح؟
ما أصلو كان ساعي المراح
من لبنو داك شاي الصباح
والروب مجهز فى المعاليق للملاح
لكين مراحو صبح عدم
مسكين هو زاتو
الزادو أصبح هم وغم!!
...
حميد أخوي
من وين يجيب حق الرغيف؟
عشرين سنة
عايش محل عز الخريف
ضبحوهو ناس هولاكو
بالضرايب والجبايات والرسوم
شفنا الضرايب للزرع
وشفنا الضرايب للضرع
لكين عمركم شفتو زول
دفع الضرايب .. كان..
فى الحلي ساكت دار يحوم؟!
...
حميد أخوي
من وين يجيب حق العلاج؟
أمونة راقدي بقالا دور
بالوردي دمها دار يفور
لكنو محتار وين يغور؟
الإسبتاليات الزمان
كانن كتار فى كل بكان
الليلي صارن فى العدم
إلا البيدفع كم..وكم
حتى العلاج
سوهو للناس الجعاص
أبان كروش
ما أصلو عندهم القروش
والله يا حميد أخوي
الجونا ديل ماهن بشر
لكين وحوش
...
حميد أخوي
والله شفعنا الصغار
الليلي بايتين القوى
تذكر أيامنا الصغار
وحردتنا للعشي باللبن؟
وزينوبة تجري على التكل
وتنزل الحله أم ضراع
وتشيل وتغرف فى الملاح
وأما شبعنا شبع تمام
والله ما تنوم للصباح!
يا ربي حالا بكون نصيح
لو شافت أولادنا الصغار
ما إتعشوا بايتين القوى
ما جاهن النوم ضمه تب
لامن ديوكنا بدت تصيح؟
...
حميد أخوي
من إنتا فارقتا البلد
رحل الحمام
حتى الزرازير فارقت
رحل الرهو
بلدن فضل فيها الغراب
وجاها الرخم
والله يا حميد أخوي
أكلوها تب
خموها خم
...
حميد أخوي
كان شفتا ساقة الكرسناب
نشفت خلاس
وتمرا الكتير أصبح يباب
و المنقة والليمون خراب
وباجورا مويتو بقت رهاب
وجروفا ديكا بقت تراب
مع إنو نيلنا يفيض دميري
لكنو أصبح زي سراب
حتى الجبل
الكان قبيل قبلة و أمل
للعابدين و الصالحين
أصبح حزين
يشكيلنا من جور السنين
الجابو ناسن كيف قباح
ناسن كتر.. ومتأسلمين!!
...
حميد أخوي
قام حمد إحمد شاف غراب
ينقشلو فى وشمن غريب
ختاهو فى قلب البلد
صعبت عليهو قرايتو تب
ما أصلو شوفو صبح رهاب
سأل الوليد..
يا وليدي أقرأ الكلمة ديك
قالو.. الهناك منقوشة فى قلب البلد؟
أظنها \"الإنقاذ\"..تقول!!
...
يا وليدي دقق فى الكلام
قام الوليد يمشي ويجي
يمشي ويصنقع فوق بعيد
يجري ويقع
ومرات يقوم
وفوق الوشم يسكت يحوم
قام الوليد شاف الوشم
شاف \"وصمة\" الإنقاذ
موسومة فى قلب البلد
والمرة دي إتأكد تمام
لأنو دقق فى الكلام
...
قام حمد إحمد مندهش
سأل الوليد..والله صح؟
إنقاذ شنو؟
إنقاذن البعني الدمار!!
إنقاذن البعني الودار!!
إنقاذن الشرد ولادنا من الديار!!
إنقاذن البعني الضياع
إنقاذن القلع شبابنا من البلد
وقام هجرن من غير متاع!!
إنقاذن الرمل نساوين البلد
وخلا البلد من دون رجال!!
آآآآآخ يا بلد.. كل الحصل
والله قبل الكتله دي
ده أصلو ما كان فى الخيال!!
وتقولي إنقاذ ..يا وليد
وبرضك تأكد لي وتكرر
إنو إنقاذ يا وليد
إنقاذ شنو؟
و إنقاذ منو؟؟
...
حميد أخوي
\"أرضا سلاح\"
كلمة نصيحة وقلتها
فشان بدل السلاح
والبندقيي اليوما ما جا بت ملاح
لوبينا يزهر فى الجروف
وشفعنا يجلسو فى المدارس بالصفوف
يتعلمو الدين و الحروف
ومرضانا يلقو الأدوية
من دون ضرايب أو فلوس
وشبابنا يدخل للشغل جوا
المصانع والجناين و المزارع
ويبدأ تزيين الشوارع
...
وبعد العمل والإجتهاد
يبدا الجهاد
ماهو الجهاد حق الزناد
لكنو فى درب العمل
درب الكفاح
الهدفو تعمير البلاد
التلقى فيهو إيدين صفيي وحمد إحمد
فوق بعض قايدي الصفوف
لا يشيلو هما للجلد
لا يدخلن هم والله خوف


20/12/2011م


تعليقات 6 | إهداء 4 | زيارات 4602

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#261406 [رشيديه]
4.15/5 (7 صوت)

12-23-2011 03:28 PM
اخى ابراهيم. لك التحيه. رجعت بى والله لبلداّ حبيب. مش بس ساقة الكرسناب مر على كل الحلل من الجبل مر بالدوداب و عسوم وللطريف. تتذكر كيف كان منظر الخضره وريحة نوار الليمون و وزهور الحنه. اليوم اصبح يباس و الناس يا الله بقت تشوف الخضره إلا فى الاتوزات atoz الجاريه فى الدرب البلد ما بقت البلد ى يا خوى .حاله تحززززن والله. الله لا تكسب الكانوا السبب


ردود على رشيديه
Saudi Arabia [الدودابي] 01-31-2012 07:52 AM
قصيده معبره عن الحال الذي اوصلتنا اليه الانقاذ وتسلم يادكتور واعدتنا بكلماتك الحانيه الى البلد وريحة التراب.


#261338 [عبدالحق]
4.15/5 (7 صوت)

12-23-2011 01:11 PM
لا يوجد خلاص من قوادى الانقاذ وتجار الدين الا بالثورة المسلحة .. اننى اقبل كل يد حملت السلاح للتحرر من رجس الجبهة الاسلاميه وكهنوتها الدينى المرتشى الحرامى .. على الجميع حمل السلاح لدك امبراطورية الظلم وهدم القصر الجمهورى على امير المؤمنين الكذاب الحرامى المسطول ..


#261232 [صديق الرعاة]
4.15/5 (8 صوت)

12-23-2011 09:27 AM
أخي إبراهيم...يبدو أن الهم الوطني والكتابة الراتبة عنه قد أحيا شيطان الشعر فيك..القصيدة روعة وتعبر عن أحزان وأحلام كل سوداني غيور على وطنه...فقط هناك هنة صغيرة...لماذا ربط \"المغسة\" فقط بالهنود \"مرتزقة مخلوتين جنود...والمغسة بيناتن هنود\"...هل هي إسقاطة سودانية من باب \"قايلني أنا هندي\"..أم من اسقاطات الإغتراب الطويل في الخليج...أما المسألة أملتها فقط ضرورة زبط القافية...المرتزقة مرتزقة بغض النظر عن جنسيتهم...كل ذلك لا يقدح في القصيدة ومضامينها الوطنية الصادقة...
صديق قديم


#261145 [حمدالنيل]
4.11/5 (10 صوت)

12-23-2011 12:55 AM
لك التحية والاجلال ايها المبدع شعراً وسياسة واحساس صادق.. والتحية والتعظيم للمبدع القامة الوطنية حميد ..ولكن قسما لن نلق السلاح
طول ما بلدنا من ديل مستباح
شيلوا السلاح لامن يطل علينا الصباح
شيلوا السلاح
من الغرب لي دار صباح
شيلوا السلاح


#261117 [hakeem]
4.11/5 (7 صوت)

12-22-2011 11:34 PM
والله عفيت منك ... الله ينعلكم ياكيزان


#261102 [Khalaf]
4.11/5 (8 صوت)

12-22-2011 10:57 PM
Dear Ibrahim

Now it is confirmed to me that the shaigiya are born with creativity genes. I knew
you as a political analyst and activist but not a poet. But this is great.
You could have excelled on poetry specially fired by your love to Sudan

By the way,
It is only after I returned to Sudan few months ago that I came to know about

Hamied as as great talented man as Mahgoub Sherif and el Gadal.

Old friend


إبراهيم الكرسني
إبراهيم الكرسني

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة