يا ربي أبقى وزير
12-24-2011 09:37 AM


يا ربي أبقى وزير

احمد المصطفى ابراهيم
[email protected]

ــ يارب وزارة، يا ربي وزارة.
ــ تقصد شنو؟
ــ يا أخي، أتمنى من الله يبقوني وزير، فيها حاجة؟
ــ قول بقوك، أها تستفيد شنو؟
ــ بالله أول حاجة سكن مجاني، وما بدفع فاتورة كهرباء ولا بوقف المكيفات لا ليل لا نهار.
ــ بالله دي حاجة تتمنى ليها وزارة.
ــ أزيدك من الشعر بيت فاتورة الموبايل ما عليّ. البيت كلو ينضم بره وجوة يعني داخلي وعالمي وما يدفعوا قرش.
ــ طيب يا أخي ما تبقى وزير وتتكلم قدر قروشك.
ــ طيب بنزين العربية أو العربيتين بي بلاش كلما تعاين في العداد تلقاهو full هيع. والعربية ملمعة دائماً ونظيفة.
ــ خلي السفر وبدل السفر كان مشيت لي عرس ود خالتك يحسبوا ليك بدل سفرية ليك ولي السواق والبودي قارد.
ــ يا أخي كلو دا ما حاجة تستحق وتتمنى.
ــ والغريب لمن تدخل الوزارة الوزير وصل، الوزير مرق، الوزير جاء، الوزير ما جاء الناس ما عندها شغلة غير الوزير. وما في زول بسألك بتسوي في شنو؟
ــ يا أخي، كل حركة محسوبة عليك في الدنيا وفي الآخرة.
ــ أصبر أصبر كدي الآخرة دي خليها هسة.
ــ ما هي مؤهلاتك لهذه الوزارة؟
ــ هي عايزة مؤهلات دي الحاجة الوحيدة في بلدنا دي الما عايزة مؤهلات ولا عُمر، عمرك سبعين ممكن تبقى وزير عمرك تلاتين ممكن تبقى وزير. بس يكون عندك حزب بيعرف يلعب صاح.
ــ طيب أنت ناسي أنه فترة سنة سنتين وترجع كما كنت.
ــ لا يا أخوي ما ممكن وزير يرجع كما كان أولاً هناك رضوة بعد الانتهاء عشرات الملايين وعربية كرت وأرض في مربع فاخر. تقول لي أرجع كما كنت دا كان ما شافوا ليك مجلس إدارة أو أي مفوضية تتعايش منها.
ــ صراحة كلامك محبط.
ــ خلي الكلام بتاع المثقفاتية دا هناك. الغريب ممكن تقعد في وزارة عدة سنوات ما في زول يقول ليك سويت شنو؟ أو أنجزت شنو أو خطتك شنو؟ بس أهم حاجة تكون أنت وموبايلك على الصامت في مجلس الوزراء.
ــ الوزارة البتتمناها دي اتحادية ولا ولائية ؟
ــ لا يهم أي وزارة.
ــ الآن عرفت لماذا عدد الوزراء عندنا بالمئات، والكل يتمنى أن يصبح وزيراً كأسهل مهنة للتكسب.
طيب لماذا لا يصبح كل الشعب وزراء؟؟؟؟؟؟؟؟؟؟؟


تعليقات 12 | إهداء 0 | زيارات 2189

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#262064 [wedhamid]
0.00/5 (0 صوت)

12-25-2011 02:07 AM

حليلك يا أستاذ أحمد المصطفى بقيت تكلم نفسك كمان بصوت عالى مسموع --آسف مكتوب--؟؟؟

متمنى تبقى وزير ؟؟؟ أتـارييييييك شغال للموضوع دا فى كل مقالة رافعا شأن واحد من ناس السلطه ----مره البديوى .........و آخر مره بنتك الوزيرة الرائعه !! عازه عمر الــ لسه ما دخلت المكتب !!!!

يا خى مش قالوا فى المثل (( مـدْ رجـلـيـك قـدر لـحـافـك))


#261882 [أسامة عباس]
0.00/5 (0 صوت)

12-24-2011 05:29 PM
بلدا حكومتها ( المتقشفة ) بدأت ب 66 وزير وحتى اليوم جارى الاستوزار بصدور القرارات الجمهورية يوميا ... بلد دخلت موسوعة جنيس بعدد الوزراء المهول والمبهول... بلد عدد وزرائها يزيدون يوما عن آخر ... بلدا اذا حسب عدد وزرائها منذ عام 1989 وحتى اليوم تجد الرقم خرافى ... بلدا طريقة الاستوزار فيها فى غاية السهولة ( أن تعلن تمردك على السلطة ... تجد السلطة تجيك بوزارة على طبق ) بلدا كل شيىء فيها ماشى بالعكس ( مثال... رئيسها اعلن قبل فترة بأن حكومته القادمة ستكون مرشدة العدد ... وحكومته حتى تاريخة مبهولة لم تكتفى بعد ...


#261875 [ساجد]
0.00/5 (0 صوت)

12-24-2011 05:08 PM
الطريق المجيد للاستوزار السعيد!!!
ابدا ببندقية صيد حديد!!!
ثم تحول لاقرب غابة ماتبعد.. بعيد !!!
اشترك في الاتصال.. من بعيد!!!
صرح بانك مع المهمشيين شديد!!!
وانك لسن عنصريا وتحب الكيان العتيد!!!!
واختر فندقا للتفاوض ..وحدد عملة التسديد!!!!
او ادلف للحزب الوسيط !!!
ومجد مولانا بانه الرجل الرشيد!!!
راعي ارعاة وصاحب الغير المديد!!
واغضب قفزا للحزب لجديد!!
حزب الحكومه والمال المديد!!
اخير لاتنسي الوصفة فقط لسودان العهد الجديد!!!


#261728 [مهموم بالســـــــــــــــــــــودان]
0.00/5 (0 صوت)

12-24-2011 12:41 PM
الظاهر العطبراوى زعلان من عثمان ميرغنى شديد شديد وبى صراحة عثمان بزعل


#261727 [المغتاظ]
0.00/5 (0 صوت)

12-24-2011 12:38 PM
والله يا اعطبراوي بالغت الزول ده ماعثمان مرغني . الما بدورك في الظلام احدر ليك . عموما انا حا اقدم لوظيفة بضي قارد ليهو تعال اتوسط ليك لوظيفة سواق


#261720 [زول مسكين ]
0.00/5 (0 صوت)

12-24-2011 12:07 PM
يا عطبراوي انت مطشش وللا شنو ؟

ده ما عثمان ميرغني !!


#261710 [وحيد]
0.00/5 (0 صوت)

12-24-2011 11:47 AM
جمهورية الوزراء السودانية هي البلد الوحيد في العالم الذي يمتلك مئات الوزراء الفاشلين و الاف المستشارين و المساعدين و الخبراء الوطنيين - اتحادي و ولايات - و غيرها من المسميات التي تطلق على من يتم \" توظيفهم \" على بند العطالة بدرجة وزير ليخموا ما تجمعه حكومة المحفل الماسوني من جبايات و اتاوات و دقنية مفروضة على شعب اصبح مجموعة من العبيد تعمل بنظام السخرة ليترفه اسيادهم


#261703 [العطبراوي]
0.00/5 (0 صوت)

12-24-2011 11:32 AM
والله انت يا عثمان ميرغني ما تنفع حتى ( غفير ) ما فالح الا في الفتن والكلام الفارغ و الله لا أدري كيف اصبحت صحفيا -


ردود على العطبراوي
Sudan [ابو ملاذ] 12-24-2011 01:25 PM
يا عطبراوي سلامة النظر مين عثمان ميرغني..؟
شفيق يا رااااجل


#261697 [ودالدكيم]
0.00/5 (0 صوت)

12-24-2011 11:24 AM
يا ستاذ اذا كنت غير منتمياً للحزب اليهودى السودانى الحاكم لحاكم هفل الرصة مواتية لأن أكون وزيراً


#261688 [رضوان الصافى]
0.00/5 (0 صوت)

12-24-2011 11:06 AM
اخى ود المصطفى
هناك كتاب اسمه ( كيف تستزور فى بلد كلها وزراء ) وقد يفيدك كثيرا
هناك 99 وصية لتكون وزير
1- ان تتمتع بالمصداقية امام الناس ومن خلفهم تسخر من سذاجتهم
2- ان تكون اذان صاغية وتبصم بالعشرة لمن فوقك وتكون بعبع مخيف لمن تحتك وتحفظ بعض الكلمات احسبها ولا سئما وتغمض عينيك فى ابتسامه غامضه
3- ان لا تتحدث عن الفساد والافساد
4- ان تحمل البندقية من اجل الاستزوار

5- ان لا تتحدث عن مشروع الجزيرة ولا سودانير ولا الخدمة المدنية ولا التعليم ولا الصحة ولا ولا ولا
6- وان لا تكتب فى الصحف
7-
8-
9-

98- وان تغمض عينيك عن كل ما ما يبعدك من عدم الاستزوار
99 - وان تقول نعم بالملايين نعم


#261676 [د.سيد عبد القادر قنات]
0.00/5 (0 صوت)

12-24-2011 10:36 AM
سلام يا إبن العم

شوف لي أخوك بس وزير دولة صغنتوته كده
لكن أنا بفتكر لمن تكون رئيس مجلس إدارة الحكاية غير لاظابط لارابط ولا كلام جرايد ، ولو لعبتها صاح تبقي عضو مجلس إدارة في خرتمية موءسسة وهاك ياداك اللغف والسف والماعارفو شنوداك
يديكم دوام الصحة وتمام العافية


#261664 [عــــــــــادي]
0.00/5 (0 صوت)

12-24-2011 10:05 AM
عاوز تبقى وزير وتضرب الكبد .. والكلاوي ...


ردود على عــــــــــادي
Saudi Arabia [Abu Hadi] 12-24-2011 11:57 AM
والله يا حبيبنا انت راجل طيب قوي الكبد والكلاوي دي ناس قريعتي راحت بضربوها - دة بفتش للضرب فوق في العلالي..


احمد المصطفى
احمد المصطفى

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة