يقولون
01-02-2012 12:31 PM

ساخر سبيل

يقولون

الفاتح يوسف جبرا

يقولون : نعم الإله على العباد كثيرة وأجلهن نجابة الأبناء

فأقول : بس ما في الزمن الردئ ده .. لأنو عندي صديقى عندو أولاد إتنين خريجين طب وقاعدين عاطلين !
يقولون الصبر مفتاح الفرج
فأقول : المسألة في الأخير تعتمد على ماركة (الطبلة)
يقولون : سافر ففي الأسفار سبع فوائد
فأقول : نسافر بي شنو تطير عيشتنا نحنا قادرين ناكل عشان تجيب ليها سفر كمان
يقولون : الدراهم مراهم
وأقول : وكمان مضادات حيوية
يقولون : لاَ تُعطِني سَمَكَةٌ بَلْ عَلِّمْني كيف أَصْطَادُها
وأقول : أها والزيت والفحم كيف؟
يقولون : اطلبوا العلم ولو في الصين
وأقول : طيب ناس الصين يطلبوهو وين؟
يقولون : أعط الخبز لخبازه ولو أكل نصفه
وأقول : عيشنا أساسا (نص) عشان كده يتم تعديل المثل ليكون (ولو أكل ربعه)
يقولون : ما طار طير وإرتفع إلا كما طار وقع
فأقول : كلام صاح 100% بس في حالة (اللساتك ما تنزل عند الهبوط) !
يقولون : أنا وأخوي على بن عمى وأنا وبن عمي على الغريب
فأقول : أنا وأخوي وبن عمى (على الحديدة) ! قبل شوية جوني مزنوقين في قرشين لاقونى (أباطي والنجم) !
يقولون : عرس وجيب ليك ولد يشيل إسمك
فأقول : طيب مش ممكن يشيل حالك !
يقولون : من لم يمت بالسيف مات بغيره
فأقول : أكيد (شارع مدني) !
يقولون : تعددت الأسباب والموت واحد
فأقول : بل تعددت المستوصفات
يقولون : مافيش دخان من غير نار
فأقول : طيب نار الأسعار دى دخاخينا وين؟
يقولون : لو كانت الأرزاق تجري على الحجى لهلكن إذن من جهلهن البهائم
فأقول : وكمان (بعض البشر) !
يقولون : صاحب بالين كضاب
فأقول : كان كده عندنا كترة كضابين .. تلقاهو رئيس مجلس إدارة .. وعضو منتدب .. وسكرتير مجلس أمناء وشنو ما عارف !
يقولون : كان ما متنا شقينا المقابر
فأقول : كمان شن جاب (العملي) للنظري !
يقولون : جوع كلبك يتبعك
فأقول : قبل ما تجوعو إتأكد من قواه العقلية
يقولون : يقولون العدل أساس الحكم
فأقول : وبرضو كمان القفة (يا حليل القفة) !
يقولون : من طلب العلا سهر الليالي
فأقول : عندنا لازم يسهر الليالي ... يقرأ في أرسين لوبين !
يقولون : السماء لا تمطر ذهباً ولا فضة
فأقول : ولا موية ذاااتو .. الخريف بقى مطرتين وبس !
يقولون : لا بد دون الشهد من إبر النحل
فأقول : هنالك من يتحصلون على الشهد لا إبر ولا نحل ولا بطيخ
يقولون : من سار على الدرب وصل
فأقول : هذا صحيح في حالة أن لم تدركه المنية قبل أن يصل !
يقولون : شَمِّرْ وائتزر والبس جلد النمر
فأقول : وطوااالي أمشي سجل إسمك في الفنون الشعبية
يقولون : الصديق وقت الضيق
فأقول : هسه الواحد يعمل شنو؟ إذا أصحابنا كووولهم متضايقين !
يقولون : اخوك كان حلقوا ليهو بل راسك
فأقول : مش ضروري أوى حكاية تبل راسك دى لأنو في حلاقه (على الناشف)
يقولون : الماشاف البحر تخلعوا الترعة
وأقول : وكمان أكيد الما شاف الهنتر تخلعوا البرادو
يقولون : الجاتك في مالك سامحتك
فأقول : كدي واحد يقول الكلام ده لي زول سرقوا ماهيتو !
يقولون : سيد الرايحة يفتش خشم البقرة
واقول : طبعن لو لقاها في خشم البقرة .. (التجاني الماحي) على طول !
يقولون : لا يضيع حق وراءه مطالب
وأقول : بس السرعة مطلوبه
يقولون : الدهر يومان يوم لك و يوم عليك
وأقول : ما طواااالي .. مرات يوم ليك وستين يوم عليك
يقولون : التدبير نصف المعيشة
وأقول : ده لمن يكون في معيشة من أساسو
يقولون : العين ما بتعلا على الحاجب
وأقول : والله مع تطور الطب ده ممكن يختوها ليك (بوصة ونص) فوق للحاجب
يقولون : من راقب الناس مات هماً
وأقول : والله المراقبة دى كان بتكتل ما يفضل شرطي مرور واحد
يقولون : عند الإمتحان يكرم المرء أو يهان
وأقول : ده طبعن لو الإمتحان (ما مكشوف)
يقولون : الخواف ربى عيالو
وأقول : على الخوف طبعن
يقولون : ان كترت عليك الهموم ارقد نوم
وأقول : لو بنمشي بالمثل ده كان الشعب ده هسه كلو راقد
يقولون : الشقي يلاقي العضم في الكبدة
واقول : هسه السعيد يلاقي الكبده ذاااتا !


كسرة :

يقولون : المصائب لا تأتي فرادى .. (بتاع النفايات) ومتحصل (الموية) على الباب !





تعليقات 13 | إهداء 3 | زيارات 5719

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#268153 [Wad Adam]
0.00/5 (0 صوت)

01-04-2012 09:43 AM
(الطبلة) مرات كثيرة بتكون مفتوحة أساساً..!!!!:D :D :D :D :D


#267986 [الاسم الكامل انسان ]
0.00/5 (0 صوت)

01-03-2012 11:03 PM
قالو به فلس اصابه
قلت : علمت مكان صرافة قطبي : تسع عملات اجنبية بما فيها اليوان الصيني
يقولون : لاَ تُعطِني سَمَكَةٌ بَلْ عَلِّمْني كيف أَصْطَادُها
وأقول : أها والزيت والفحم كيف؟
واقول : ترجعو البحر تاني عشان السمكة يحرك ضنبها ويقول سير سير يا بشير


#267306 [نيام]
0.00/5 (0 صوت)

01-02-2012 10:58 PM
يقولون : سافر ففي الأسفار سبع فوائد (7 UP )
اولها انك حتحتفظ باخلاقك السودانية (اصلو الناس السافرت سافرت لمان كان في اخلاق)
ثانيا ماحتشوف ناس الجبايات لمدة (مرات يلاقوك في باب البيت )
ثالثا حتغير ذاكرتك الكارهة للوطن (بدل ما كل ما تصحا تقول دي بلد دي)
رابعا علاج من شعورك بالغربة في بلدك (احسن الغربة العديل بخشم الباب)
خامسا ما حتسمع اصوات مكرفونات التعيينات الجديدة وهي تلعلع في الفضاء السوداني (الايام دي في ازمة مكرفونات)
سادسا حتساعد اهلك بدل ما تقعد تعاين للبلاوي و تمصمص في شفايفك (احسن يا عبدالمعين تعين)
اما سابعا فاحتمال تحلم انو الجماعة فرتكو (اهو حلم لحدي ما تتاكد من صحتو)


#267284 [مرتضي ]
0.00/5 (0 صوت)

01-02-2012 10:12 PM
يقولون الانقاذ عاوز يقتل الشعب السوداني كله جوعا يقولون الانقاذ يقتل شباب السودان عطاله يقولون مفوضية مكافحة الفساد ....نقول عام 2012 نهاية الانقاذ بإذن الله


#267271 [alitaha]
0.00/5 (0 صوت)

01-02-2012 09:50 PM
قال بشبش انو خليل مات انتقام رباني.....
طيب راجل وداد مات كيف
الزبير مات كيف
والعمارة سقطت كيف
وعلي عثمان وجهو بقي اسود كيف

والكرسي الي جدعو بيهو نافع كيف والجزمة الجدعوك بيها كيف
مالكم كيف تحكمون


#267227 [صادميم]
0.00/5 (0 صوت)

01-02-2012 08:39 PM
يقولون من بيته من زجاج فلا يرمي احداً بالحجارة
و اقول من كان بيته من زجاج فليستحم (او يعمل اي حاجة ثانية) في بيت جاره


#267150 [ودالدكيم]
0.00/5 (0 صوت)

01-02-2012 06:04 PM
هل تعلم أستاذنا جبرا (قناة الشروق) لسان حال الحزب اليهودي السوداني الحاكم منذ انطلاقتها هذا العام وبمحاولات خجولة هذا العام تذكرت يوماً اسمه استقلال السودان صراحة أستاذنا جبرا ذهبت بنا الظنون بأن تاريخ السودان تريد القناة أن تؤرخ له بيوم 30/6/1989م


#267143 [المفتى]
0.00/5 (0 صوت)

01-02-2012 05:47 PM
يقولون خليل مات قصاصا.. ويقولون مات شهيدا.. واقول لله فى خلقه شئون وهو القاهر فوق عباده.. ( ولا تقف ما ليس لك به علم .. )


#267090 [المجروس]
0.00/5 (0 صوت)

01-02-2012 04:11 PM
يقولون ان البوشى ما ليهو حق يعملها ظاهرة امام د.نافع.. فاقول لهم بان الجماعة دقسوا باعتقاله.. اذ ادخلوه تاريخ السودان مرتبطا بالانقاذ كما القرشى مع اكتوبر .. وربنا يفك اسره ويكذب الشينة...:D


#267065 [سمبوك]
0.00/5 (0 صوت)

01-02-2012 03:36 PM
يقولون الانقاذ ستبقى 20 سنة اخرى.. فاقول لهم و مالو على الاقل العصى سوف تكثر.. فذاك القذافى جلس 42 عام وخرج بعصاية...


#266971 [القوس]
0.00/5 (0 صوت)

01-02-2012 01:09 PM
خليل قتل وقالوا دا قصاص رباني
اقول الدور الجاي على منو
كسرة : التسوي (كريت ) فى (القرض) تلقاهو فى ( جلدا)


#266969 [نادر محمد]
0.00/5 (0 صوت)

01-02-2012 01:07 PM
يقولون خبير الانقاذ حمدى قبل عشره سنوات مستغرب كيف الشعب السودانى ده بدبر معايشه الان يا شيخ جبرا ممكن اقول شنو مع الدولار الوصل 4000 بالقديم وعليك الله خلينا على طول بالقديم ده كان تنصلح الاحوال


#266966 [محمد]
0.00/5 (0 صوت)

01-02-2012 01:02 PM
حبيبنا جبرا وفقك الله دائما كلامك فى محلو وبتوصل رسائل جميله عسى ولعل ان يفهموها الطرش بس ياجبر الفقرتين الاوائل دى عندى عليها تحفظ لان متعلقه بفضائل الاسلام علينا وتتسلم حبيبى


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة