دابينا الزاد بلاوينا
01-02-2012 11:31 PM

تأمُلات

دابينا الزاد بلاوينا

كمال الهِدي
[email protected]

كأنها ناقصة ليها بلاوي وتصدير فضائح!

يعني ما كفتكم الشحدة بي اسمنا من العرب والعُجم!

ولا ما سمعتوا بمهازل الدوحة التي اجتذبت اهتمام حتى من ليس لهم أدنى حد من الاهتمام بالشأن الرياضي!

عشان تجوا كمان تفكوا الفريق الدابي يتم الناقصة في سوريا!

معقول بس يا ناس فريق وخبير عسكري مخضرم يرسلوه لمراقبة عمايل حكومة تقتل شعبها وتعتقله وتنتهك حرماته على مدار الساعة يقول \" وجدنا الحالة تعبانة فعلاً لكن ليس هناك خطورة\" !! تعبان انت يا خي.

لغة شنو دي زاتا بالله عليك!

بعدين الخطورة دي كيف حسب فهمك ليها يا سعادة الفريق! بس عشان نكون عارفين ونفهم حاجة.

ناس بتموت في كل ساعة، بل كل لحظة.. دبابات في وسط المدن.. انتهاكات.. اغتصاب.. تعذيب.. تجويع.. حصار.. وبعد ده كله الحالة تعبانة بس لكن ما في خطورة تذكر؟!

يا دابي الهناء ما بهدلتنا وبشتنتنا وزدت ضحك الناس علينا!

من يوم سمعت بأن رئيس بعثة المراقبين سوداني وقبل الإعلان عن اسمه وهويته قلت أكيد الحكومة السورية رفضت أكثر من مرشح لرئاسة البعثة، ولم توافق إلا على هذا السوداني لشيء في نفس يعقوب.

لكن وبالرغم من كده توقعنا أن يخليها رئيس المراقبين حلوة شوية.

ما معقول من اولا كده يقول للناس ما في حاجة تخوف في سوريا!

طيب وكت مافي حاجة بتخوف جامعة السجم دي رسلتكم هناك لي شنو يعني؟ عشان تشتغلوا تجارة شنطة مثلاً؟ ولا عشان تلهطوا النابلسية وتزوروا المواقع السياحية!

يا خي بي خبرتك الطويلة دي كان تقول أي كلام معقول، إلا ما في خطورة دي!

أنا ما عارف الواحد بشتغل ليهو عشرين ولا ثلاثين سنة في مجال ما ويطلع منه ملوص بالطريقة دي كيف!

عرفناك يا دابينا انك عاوز تتعاون مع الحكومة السورية.. ومفهوم أنو كل همك أن يرضوا عنك.. لكن لابد من اختيار الطريقة المناسبة على الأقل! طبعاً ما حا نطلب منك وبعثتك أن تكونوا حياديين ونزيهين في أداء المهمة لأنو دي أمور ما بوصوا عليها، لكن بس بنقول ليك ما كان تعملا ظاهرة كده!

أها الليلة رئيس البرلمان العربي بشتن بي بعثتكم عديل كده يا الدابي!

قال أن على الجامعة أن تعيد هذه البعثة فوراً لأنها لا تفعل أكثر من تغطية جرائم النظام السوري! عاجبكم كده!

شايفين يا ناس الهنا النحن فيهو ده!

ما أصلو نحن ناس جود وكرم وشهامة ومروءة وكل الحاجات السمحة الجميلة عشان كده دائماً بنتكرم على الآخرين ومابنتوقف معاهم في أي حاجة ولا بنغلط على زول.

لمن نمشي الدوحة بنتغلب ما لي ضعف مننا، لكنه تواضع الكبار وعشان ندي الصغار من أخوتنا العرب فرصة للظهور!

نرسل دابينا لي سوريا يقوم طوالي يعبر عن احترامو الشديد للحكومة هناك، مش طاعة ولي الأمر واجب ديني وأخلاقي!!

وتعرف يا الدابي بعض أخوتنا العرب الذين نعيش وسطهم هنا ما كانوا فاهمين الكثير عن مشاكل دارفور والنيل ( الأبيض) و ( شمال كردفان) – ما بين الأقواس ما مني يا جماعة الخير، لكن ده كلام مساعد رئيس الجمهورية ونحن طبعاً ما حا نعرف أحسن من الحكومة – أخوانا العرب ديل يا الدابي كانوا فاهمين أن مشاكل السودان دي كلها سببها الأجنبي وأن حكومتنا لا يمكن أن تغلط مع مواطنيها، لكن بعد عمايل بعثتكم المهببة في سوريا الجماعة ديل فتحوا على أشياء كثيرة ما جات على بالهم قبل كده! شفت المصيبة دي كيف وعرفت ليه بنقول انك زدت بلاوينا يا دابينا؟!


تعليقات 4 | إهداء 0 | زيارات 1058

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#267824 [مشاتر]
0.00/5 (0 صوت)

01-03-2012 05:52 PM
بعيدا عن السياسه . كمال الهدي واحد من اكثر الصحفيين تأجيجا لنيران الفتنة بين

قطبي الكره فمقالاته تدعو للفتنه والحقد والكراهية للفريق الوحيد الذي وشح

بالذهب بسخريه وسذاجه تدعنا لا نحب ان نقرأله اي مقال حتي لو كان للوطن


#267414 [andrab]
0.00/5 (0 صوت)

01-03-2012 03:59 AM
والله يا كمال شر البليه ما يضحك الدابي هو دابينا المعضينا


#267355 [مجنون ليلى]
0.00/5 (0 صوت)

01-03-2012 12:18 AM

استاذي كمال الهدي

اليك نماذج من تعليقات الاخوة السوريين على تصريح رئيس لجنة المراقبين ( الدابي) وذلك في موقع سيريانيوز الالكتروني ..

1-- مابين حمص و دارفور
من أجل الحقيقة و الإنصاف , فبالمقارنة مع الجرائم التي حصلت في دارفور و راح ضحيتها عشرات الآلاف من الأبرياء , والتي أمرت فيها المحكمة الجنائية الدولية بتوقيف السيد محمد الدابي لتورطه بها , فإن وضع حمص لازال مطمئناحتى الآن . ربما يصبح غير مطمئن خلال الأيام القليلة القادمة بعد مغادرة البعثة .

2- الرجاء النشر
نطالب الجامعة العربية بارسال لجنة لتراقب الوفد في حمص...

3- الحل العربي - المسخرة
حين قلنا أن الحل العربي مسخرة لم يبق أحد إلا وزاود علينا بالوطنيات فتفضلوا مثل هذا الرئيس للجنة يا رعاكم الله! كلنا شاهدنا المراقب وهو يقول لرئيسه أنه لم يستطع الدخول بسبب القنص ثم يأتي هذا الفريق ليقول لنا أن الأمور جيدة! أراهن أنه الآن في فندقه ***** فيما يقوم بعض \"المقاومين\" بتصويره وأتباعه لتهديدهم فيما بعدّ! هذا هو حال العرب من يوم يومهم. ربما جنابه يقارن الوضع بدارفور التي نكل بأهلها وارتكب بحقهم جرائم تفوق بكثير حمص.

4-لجنة المتفرجين العرب
عجيب كيف يتفرج على مأساتنا المطلوب من محكمة العدل الدولية، لك الله يا شعب سوريا...

5- البامبو السوداني
هل يعتبر مقتل العشرات في يوم واحد في حمص أمرا مطمئنا ..؟؟!!

نسوق هذه الامثلة لاراء الاخوة السوريين في دابينا الزاد بلاوينا كما وصفته انت ، وذلك مصداقا لما خطه قلمك ...


اخوك مجنون ليلى والهلال


#267330 [عمر الفنان]
0.00/5 (0 صوت)

01-02-2012 11:43 PM
يا سلام عليك ياكمال اهو كده الوطنية والكلام المليان اعتذر لك اخي بما بدر مني في الرسالة السابقة بعدم وطنيتك وكتاباتك عن الكورة واغفال الحالة المتردية في هذا الوطن العظيم اكرر اعتذاري وانا فعلا بحب الكورة لكن هنالك اولويات عزيزي كمال لك الشكر


ردود على عمر الفنان
Oman [كمال الهدي ] 01-03-2012 09:58 AM
التحية لكم اخوتي [andrab وعمر ومجنون ليلى... وشكراً عمر وانا أصلاً من زعلت من تعليقك السابق ولم يكن ردي الذي حاولت ان ابين لك من خلاله انني اكتب في الرياضة من نفس المنطلق الذي أشرت له أنت إلا لأن البعض يخلطون علينا الأمور.. يعني مرات تنتقد الوالي يقوم مريخابي من النوع البفتكر انه الوالي ده هو المريخ يقول لي خلونا من الكورة وانتو ما عندكم موضوع! تقول صلاح إدريس غلط يطلع واحد يقول ليك شيء من هذا القبيل.. وعموماً لست غائباً تماماً عن المجالات الأخرى حيث أتناولها لكن ليس بصورة يومية لقناعة محددة هي أن لدينا الكثير جداً من الأقلام الجادة والفطاحلة الذين يكتبون في الشأن السياسي، لكن في الرياضة ما زلنا في حاجة لأقلام جادة حيث أن الغالبية تركز على التجهيل والضحك على العقول.. ودمتم جميعاً..

Norway [مجنون ليلى] 01-03-2012 01:00 AM

يا سلام عليك انت ياعمر ..

حقيقة احييك على شجاعتك وقوة شخصيتك وإتزان تفكيرك ..

فالاعتذار قوة شخصية ، واتزان التفكير .. وهو القدرة على المواجهة في الحياة ، وللاسف

هو ثقافة غائبة عن مجتمعنا السوداني خصوصا والعربي عموما ...

فالاستاذ كمال وكما نلاحظ من كتاباته نجده رجل وطني غيور مهموم بهموم الوطن بالرغم من بعده عنه ..

لك الشكر اخي عمر الفنان وبذات القدر لاستاذنا كمال الهدي ....


مجنون ليلى والهلال


كمال الهِدي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة