المقالات
السياسة
ارشيف مقالات سياسية
والي الخرطوم ده عايش وين؟ا
والي الخرطوم ده عايش وين؟ا
01-04-2012 10:39 AM

تأمُلات

والي الخرطوم ده عايش وين؟!

كمال الهدي
[email protected]



· نائب رئيس الجمهورية دشن ليهو 530 بص اضافي لأسطول مواصلات ولاية الخرطوم.. لحدي هنا والموضوع عادي.

· لكن الشيء الما عادي هو فرحة والي الخرطوم بعد أن صار العدد الكلي لبصاته 1000، طبعاً ما قدر يلتزم الصمت ويخلي راعي المناسبة يتكلم، وكعادة مسئولينا تلقف المايك ليخطب في حضور حفل تدشين البصات فماذا قال الوالي؟

· قال \" إن الهدف الأساسي هو توفير خدمة جيدة في عاصمة وطنية متحضرة، ولا بد أن تشبه المواصلات بالعاصمة شكل المواصلات بالعواصم العالمية.\"

· وده طبعاً نوع من النكات اللا تعرف تضحك منها ولا تبكي!

· فأين هي العاصمة الوطنية المتحضرة التي لابد أن تشبه مواصلاتها المواصلات بالعواصم العالمية يا حضرة والي الخرطوم؟! بل أين هي العاصمة أصلاً حتى تحدث الناس عن إمكانية أن تصبح وطنية أم عالمية؟!

· هل يعلم الوالي أن أفضل شوارع الخرطوم لا يرقى لأن يوصف بالشارع المسفلت بالمقارنة مع العواصم العالمية التي يتحدث عنها!

· جل شوارع عاصمتنا إما أنها مليئة بالحفر والمطبات أو (طالع نازل).

· ومن لا يجد هذا الوصف دقيقاً ما عليه إلا أن يملأ معدته جيداً – إن تيسر ما يملأها به - ثم يستغل عربة ويسير بها بسرعة على شارع عبيد ختم الأكثر شهرة بين شوارع الخرطوم، وهناك إن لم يشعر بأنه يوشك أن يتقيأ ما بداخل بطنه المليء من شدة تدحرج العربة صعوداً وهبوطاً على هذا الشارع فليأتني ليقول لي أنت ( كاذب).

· لكنني أنصح من يعانون من مشاكل السلسلة الفقرية من المجازفة بهكذا تجربة لأن ( الفلايت) هي أقل ما يمكن أن يٌصاب به من يقود عربة على هذا الشارع المشهور.. علي شنو ما عارف!

· قبل أن تفكروا يا والي الخرطوم في تمليك السائقين البصات عالمية المواصفات ( طبعاً مع اقتناعنا التام بأن الصين لا يمكن أن ترسل منتجاً عالمياً لبلدان العالم الثالث)، لكن إن سلمنا بتوصيف الوالي، فلابد أن ننبهه إلى أنهم قبل ذلك يفترض أن يراجعوا الطريقة التي تُسفلت بها شوارع الخرطوم.

· حاسبوا أنفسكم وأصحاب الحظوة لديكم على تنفيذ مثل هذه المشاريع وقولوا لهم اتقوا الله في أنفسكم وفي هذا الوطن ليقوموا بتسوية الأرضيات جيداً قبل الشروع في ( مسحها باللون الرمادي المائل للسواد).. فسفلتة الشوارع ليست مجرد تلوين، بل هي عملية تخضع لمواصفات محددة لا أظن أن من يشيدون طرق الخرطوم يلتزمون بواحد على الألف منها.

· الخرطوم مدينة تعيش في ظلام دامس يا واليها، فكيف يجوز تغمرها ببصات عالمية المواصفات!

· الخرطوم متسخة وقذرة ومليئة بمظاهر الفوضى والعشوائية في كل شيء، وليس هناك أدنى اعتبار للنواحي الجمالية عند تنفيذ أي مشروع فيها، فكيف تريدنا أن نقتنع بحرصكم على جعلها حضارية!

· الخرطوم أهلها يجدون مشقة حقيقية في الحصول الغذاء والماء الصالح للشرب والدواء، فكيف نتوقع أن يأتي يوم تضاهي فيه هذه الخرطوم العواصم العالمية سواءً في بصاتها أو في أي ملمح آخر!

· الخرطوم سكانها مشغولون بالزيادات اليومية في كل السلع الأساسية ولا يعرفون من أين يحضرون الحليب لصغارهم أو السكر لـ ( ظبط) رؤوسهم، فكيف لمثل هؤلاء أن يفكروا في حضارية ونظافة عاصمتهم!

· كلما نسمع تصريحاتكم كمسئولين يا والي الخرطوم يساورنا شك حقيقي في أنكم تعيشون بيننا، ويبدو لنا وكأنكم تحكمون هذا البلد بالريموت كنترول من إحدى العواصم العالمية التي أشرت لها في حديثك.


تعليقات 8 | إهداء 0 | زيارات 2718

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#268813 [moonshussien]
0.00/5 (0 صوت)

01-05-2012 02:45 AM
رد على احمد الخضر: الظاهر عليك قريب الوالي وساكن في شارع العبيد ختم الفي الاردن وحارقك الكلام الصح عن الشوارع السبهلل الفاقدة لكل المواصفات الهندسية السليمة وذلك لعدم دراية \"المهندسين\" المشرفين عليها ولقف المقاولين المكلفين بها للقروض الاجنبية التي تصبح بقدرة قادر ديناً على الشعب السوداني الفضل والنتيجة شوارع اي كلام بأقل تكلفة ممكنة مغطية بطبقة قشرية من الزفت وبدون الطبقات المعروفة دولياً الضرورية لصنع شوارع. فأتقي الله انت وانظر الى شوارع الاردن يا هذا كيف صنعت!!!!تقول لي كوز بيدافع عن عصابة حرامية؟


#268646 [احمد الخضر]
0.00/5 (0 صوت)

01-04-2012 08:40 PM
اتقى الله ياراجل انا ساكن في شارع عبيد ختم وليس بألسوء الذي تتحدث عنو نعم في بعض المشاكل الفنيه لكن انت ماشايف ان التطور الذي حدث يعتبر انجاز رغم امثالك من المحبطين والذين يرفعون السلاح اعطوا هؤلاء القوم خمسه سنين بلا قتال وشوف الطرق التى تتحدث عنها ويعني انت بس الفاهم في السودان وجاي تورينا الشارع بمواصفات ولأ لا ومادام انت عارف الصين ماعندها باصات عالميه امشي انت وخلي اوربا تبيع لينا ونحنا باصاتنا عاجبانا ونحمد الله عليها وبنجيب احسن منها وبنعمل مترو وبنعمل اجمل عاصمه وخلي التنظير واعمل حاجه تنفعك


#268429 [بت ابوها ]
0.00/5 (0 صوت)

01-04-2012 03:18 PM
الله يجازي محنك يا مجنون ليلي ضحكتني لمن معدتي الملانة موية وجعتني وشكرا لليلي الخلتك تجن قدر دا وتحية للهلال -قلت لي برمائية ولا شنو؟ يا اخ انت زول دمك خفيف جدا و برضو نحن بخير طالما في الزيك -شكرا


ردود على بت ابوها
Norway [مجنون ليلى] 01-04-2012 11:14 PM

تسلمي انت ويسلم ابوك ..

نسوي شنو يا بت ابوها مع الحال المايل ده ...


مجنون ليلى والهلال


#268360 [امير ]
0.00/5 (0 صوت)

01-04-2012 02:08 PM
ارجو من السيد والي الخرطوم ان يامر باصلاح الحمام الطافح في صالة الوصول بمطار الخرطوم ويركب ترباس من الداخل للحمام الثاني . حتى تكتمل العالمية المنشودة .
شر البلية ما يضحك .


#268346 [adil]
0.00/5 (0 صوت)

01-04-2012 01:58 PM
البصات أغلبها توقف عن الخدمة لعدم وجود الإسبيرات في الورشة المخصصة للبصات
يعني الورشة أصبحت مغبرة
وبعض البصات لم تعمل لمدة شهر وتوقفت
والمعروف إنو البصات على الزيرو تعمل من غير الحاجة لإسبيرات لمدة أقصاها سنة
وبعض هذه البصات جابوها من تشليح الإمارات
والجماعة ضربوا ضبرتم
وأول مرة أسمع بإحتفالات لقدوم بصات إلا في السودان
أفتتاح شارع بإحتفال
إفتتاح صينية يوسف عبد الفتاح بإحتفال
إفتتاح كبري مشاة بإحتفال
والسودان ما شاء الله دايما عايش في إحتفالات واحتفالات
ويقولوا ليك الحكومة ما شغالة . . .
حاجة تجنن


#268257 [sa]
0.00/5 (0 صوت)

01-04-2012 11:59 AM
عفيت منك
يساورنا شك حقيقي في أنكم تعيشون بيننا، ويبدو لنا وكأنكم تحكمون هذا البلد بالريموت كنترول من إحدى العواصم العالمية التي أشرت لها في حديثك
ربنا ينتقم منهم
وبعدين هى باصات شنو اللى بعد 4 شهور ثلث ارباعه دخلت الصيانة ولم تخرج


#268253 [مجنون ليلى]
0.00/5 (0 صوت)

01-04-2012 11:50 AM

ان شاءالله تكون الباصات دي برمائية لانو لو جاءت مطرة مطرتين من النوع التقيل داك الكان بجي ايام الدنيا بخيرها حتفضح ليك الوالي ده، خصوصا في اشباه الانفاق ( حافرين حفره وفوقها شارع قال نفق قال ) ...

الخرطوم دايره شغل كتير جدا الحكاية ما باصات بس ..

اول حاجة دايرين ناس بتشتغل بضمير وامانة واخلاص ووطنية بدون الجري وراء العمولات والكموشينات من الشركات دون مراعاة للمواصفات والمقاييس ...

ارهنكم بان الباصات دي غير مطابقة للمواصفات والمقاييس العالمية والسودانية من ناحية الطقس وطبيعة شوارع السودان وناس السودان ...

تلقى الميزانية معمولة ومصدقة لتنفيذ شارع بعرض 20 متر وبعد التنفيذ تلقي الشارع عرضه 10 امتار وعالي واطي وسمكه زي طرقة الكسرة وطبعا ميزانية العشرة امتار المنقوصة بتكون بقدر قادر اتحولت لعمارات وفلل في دبي وماليزيا .. وعلى ذلك قس بقية المشاريع .......

لك الله يا سودان ...


مجنون ليلى والهلال




كمال الهدي
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة