نجر ساااكت
01-04-2012 02:01 PM

ساخر سبيل

نجر ساااكت

الفاتح يوسف جبرا

عزيزي القارئ .. إلتقى مايكرفون (ساخر سبيل) بعدد من المواطنين وقد كان موضوع الحلقة هو سؤال يطرح على المواطنين : ماذا لو تم تعيينك مستشاراً في تشكيلة الحكومة (الجديدة)؟ .. أتركك والإجابات

■عوض كلتشات (ميكانيكي) : أول حاجه أعملا ح أشوف حكاية بصات الوالي المما جابوها ما إشتغلت ليها يومين بركت دى .. ح أفتح المكنة وأشوف البايظ شنو؟ وأشوف السلندرات مخروطة على كم أصلو حكاية إنها جديدة دى ما بتمشى علينا يا (فردة) .. المهم كان بتقبل عمرة نعمرا وأكان كمان ما بتقبل نقوم نركب ليها مكنة جديدة أصلو الحكاية كووولها مكنات في مكنات !
■حسن سلوكة (مزارع) : شوفو أنا أولن بالتبادى ح أمشي للزول الإسمو المطيرى وللا شنو ما عارف ده .. العاوز يعمل لينا أطول برج في العالم وأكبر مدينة بتاعت شنو ما عارف وأقول ليهو .. شوف يا زول الجداشر مليار دولار بتاعتك دى أنحنا محتاجنك تستثمرا فى مشروع الجزيرة ده .. وده الكلام البيخلينا من الدول المتقدمة .. ما تسمع ليا الكلام القالوا ليك مستشار الرئيس بإنو برجك ده ح يخلينا دولة متقدمة عشان الزول ده والله بقى يتكلم سااااكت وأنا المزارع (الزول الله ده) قاعد أضحك بقيت من تصريحاتو !
■علي بليه (عجلاتي) : شوفو مع إنو حكاية إنى أبقى مستشار دى واسعة شوية (والجنزير) بتاعا عاوز يتشدا حبه لكن بقول ليكم على بالطلاق أول يوم أمسك فيهو أركب ليكم البلد دى كوووولها عجلات .. وأول ناس أركبهم ليك المسؤولين ..قال أيه عاوزين مرسيدس سوداء بالنهار وبيضاء بالليل .. والله أخليهم ليك أي زول فيهم ماشي ليهو إجتماع ما يقوم (سداري) ما يصل !
■محمد برمة (بتاع اللبن) : لو ده حصل بعد كده الواحد (يزيد الموية) للبن بى إضمئنان .. مش أى مسئول أول ما يعينوهو أول قرار ليهو بيعملو عشان صالح لبنو .. بسم الله أقصد (ورقو) ؟ أنا أول قرار ح أتخذوا هو (عدم فحص الألبان المغشوشة) !!
■حسين بنبار (جزار) : يا سلام والله دى ح تكون حاجة جميلة أقل حاجة الواحد يعمل ليهو (سنكيت) زى الجماعة .. لكن بس المشكلة الواحد يشتغل فى الحكومة العاملة زى (الكمونية) دى كيف؟
■آدم سلسيون (بتاع أورنيش) : شوف يا معلم .. أهم حاجه في الموضوع إنو الواحد من صباح الرحمن ح يطلع مصاريفو .. أمسك ليك المسؤولين المعاي ديل وأدى ليك كل واحد (وش) أورنيش لماع مصلح .. بعدين أنا زول تفتيحة ما ح يقدر واحد فيهم يقول ليا إنتا زول دستوري ومسؤول بتشتغل شغل خاص ليه؟ ما هم كوووولهم العندو شركة والعندو مزارع والعندو شنو ما بعرف داك يعنى جات على (الأورنيش)؟
■أحمد عراوى (ترزي) : أنا والله من زمان عارف إنو الجماعة ديل ح يستعينو بيا عشان قصة التفصيل دي عاوزه ليها ترزى فنااان وكده .. أول حاجة الجلاليب دى ح نعمل ليها جيب رابع نسميهو (جيب الكومشن) وجيب خامس (حق المخصصات) والزول الح يكون باع (خط هثرو) ده ح نعمل ليهو جيب مخصوص نسميهو (باااالغتا لكن) !
■على الله (معاشي) : شوف يا بنى .. أول حاجه أنا ما بستغرب إنى أتعين بعد عمرى بقى كم وستين ونزلتا المعاش لأنو ناس الحكومة ديل تلات أرباعهم أكبر منى ولسه شغالين .. الحاجة التانية انا لو إتعينت ح أقوم أول حاجه أجيب كل المعاشيين وأسالهم واحد واحد وأقول لكل واحد نفسك في شنو؟ الح يقول ليك (حبوب الضغط) الح يقول ليك رسوم (عملية بروستاتا) الح يقول ليك (متأخرات الإيجار) الح يقول ليك (شية جمر) !! أنأ ح أرفع المعاش الشهري لكل معاشى عشان يكفيهو للعيش في حياة كريمة .. معقولة يا إبنى الزول يدفع للبلد دى أغلى سنوات عمرو وشبابو بعدين معاشو ما يجيب ليهو خمسه كيلو لحمة ؟
■ عبدو نازل وين (كمساري) : شوف أنا ما تشوفنى كده .. عندى بكالريوس هندسة كهربائية يعنى العملوهم مستشارين ديل ما أحسن منى .. بس الظروف ما خدمتنا ولجنة الإختيار كل ما أمشى معاينة يقولوا ليا سمع لينا سورة الكافرون وأنا بينى وبينك مما كنتا في الإبتدائي حفظت السور كووولها لكنى بس معقد من السورة دى وما قادر أحفظا ثم ياخي هم عاوزين يشغلونى مهندس وللا (داعية؟) غايتو أنا أول ما أمسك ح أعين كل الكماسرة الشغالين معاي ديل في عربات المسؤولين .. يعنى كل عربية مسئول يكون فيها كمساري راكب معاهو ... العربية البيتحرك بيها في الشغل ... كمساري .. البوكس البجيب الخدار ويودى الأولاد المدارس ... كمساري .. العربية البتودى المدام بيت الحنانة ومحل الطلح ... كمساري .. كل مشوار بي حقو .. وآخر اليوم الكماسرة ديل كووولهم يوردوا ليا القروش وأوع زول فيكم يقول ليا ح تورد القروش دى للمالية؟ أوردا للماليه ليه؟ إنتو ما قريتو تقرير المراجع العام البيقول ليك المسؤولين ديل كل واحد عامل ليهو حساب (جانبي) ؟ هو الجانبي ده أنا ما بعرفو ؟
■حنان مسكول (حنانة) : والله أنا ما عارفة يعنى ح يستفيدوا منى في شنو ... لكن على المستوى المهنى الشخصي بفتكلر إنو المسألة دي لو حصلت ح تكون (طاقة القدر) إتفتحت ليا .. لأنو إضافة لمتطلبات العمل والوظيفة الما عارفاها شنو ولا عارفه مهامها شنو لكن دى فرصة إنو الواحده تدخل منازل زملائها المسؤولين وتتعرف على زوجاتهم وتوسع السوق بتاعا شوية وطبعن الحنة بتاعت زوجات المسؤولين دى سعرها براااهو وبعدين إضافة لكده يعنى ما بخلوها (تبهت) !!


■كسرة :
جارنا عباس النجار قال ليا ما سألتنى أنا ليه يا أستاذ ؟ والله أنا أكتر زول مؤهل يكون مستشار ما الحكاية كوووولها بقت (نجر) سااااكت !!


تعليقات 25 | إهداء 6 | زيارات 7282

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#269521 [هجو نصر]
0.00/5 (0 صوت)

01-06-2012 11:02 AM
يا جبرة الله يلعنك كما كان يقول الطيب صالح لصديقه منسي رحمهما الله عن محبة وهو يضحك رغما عنه لمقالب وحلبسة صديقه والله العظيم ضحكتني شديد وبكيت الحكومة شديد . اهي دي الحلبسة السودانية علي اصولها !


#269463 [المعلم]
0.00/5 (0 صوت)

01-06-2012 07:51 AM

التقى جبرة في بيت العزاء بالكوكبة النيرة ..كان عزاء المرحوم بإذن الله علي محمد حسين.. على فيافي (.......) ليت كل من قرا التعليق يقرأ الفاتحة على روحه رحمه الله رحمة واسعة.. كان سيكون خير من يقسم الادوار..

بدأ الحديث تحت تحت
- ياجبرة لكن بالغتا.. كان تلافينا في مكان تاني عشان نقدر نتكلم بي راحتنا لكن حنقول ليك في جمل قصيرة اصلو الوضع ما يستحمل نشطح

عمر ايزي(بتاع شرايح مميزة): نفرض شرايح مميزة على المسؤلين اولا ثم الشعب السوداني واي زول لازم ياخد موافقتي عشان يشتري من محلاتي الحتكتر بعدين

زكريا ما جستير (بتاع طبلية جنب الجامعة) : اصلو حاولنا نقرا ما جستير قالو الا نكون قاريين جامعة في الاول بدي منح دراسية لاي بتاع طبلية .. هم اقل من المسؤلين بي شنو ؟؟ الاخلاق والامانة والقوة على مصارعة ظروف الحياة.. كلو في

صلاح قوته (بتاع مطعم) بمنع منعا باتا تانول اي مسؤول اكل في البيت عشان ما يدفق تلات ارباعو وفي مساكين ما لاقين ياكلو.. يجي هني يدفع وياكل قدر قدرتو والباقي من حلتو وللمساكين ..

ود الفي مطار (ابن فراش في مطار الخرطوم) : بخلي الغلابة يشترو بيوت ومزارع كان انشالله مساحة متر عشان التعويض يجي لي ناس يستاهلو لم المطار يحتاج يقوم بيت زول ..

عبود سلطان(بواب في السينما): اوصي بمشاهدة المسؤوليين افلامهم مع عامة الشعب عشان مايقولو المسؤولين بيشاهدو افلام اياها بالدس والشباب الشايل صورة اليسا يتجلد بتهمة صور فاضحة

صلاح محطة (كمسنجي): المسؤوليين كلهم يمشو محال الشغل بالمواصلات ومافيش حد احسن من حد عشان يعرفو الشعب دة غلبان قدر شنو وطبعا شركة المواصلات حقتي حتكون..

حافظ عينيا (شاعر أغاني): الحفلات الرئاسية تطلع بترخيص مني وكل حفلة تكون كلمات والحان جديدة لنج والعداد لازم يكون يبني مدرسة لتعليم النشء فنون الشعر وكدة

عمر اللتي (استاذ لغة عربية): لازم تتراجع خطب المسؤولين عندي خشية الاحراج وابتعد من الالفاظ متعددة المعاني يجي مسؤول يقول اتبرعنا للحي دة بي مدرسة وظلت .. تمشي استلام القروش يقول ليك حسب الالية نبدا بالمرحلة الاولى السنة دي للفصل الاول (وهكذا دلاليق) اما الظلط دة المرحلة التانية ذاتا جاهزة بس السنة الجاية نبدا المرحلة التالتة الا وهي قياس المسافة بين بداية ونهاية الظلط المقترح

بدر الدين اوكي (استاذ لغة انجليزية): المسؤولين ديل لازم نراجع معاهم فردا فردا فهمهم لمعني كلمة اوكي عشان ما يحرجونا مع الخواجات يقولو اوكي في اي حاجة من دون ما يشوفو الجدوي للشعب الفضل

مبارك غرف (بناء طوب) اي مسؤول من حقو يبني اي عدد من الغرف لكن ما في بيتو في بيوت دار السلام والامبدات وفي الولايات نكتب اسم المسؤول في الباب ويسكن اي زول غلبان تسمية الغرف عندي ليها ازوال...

عثمان كشكوش (تاجر لعب أطفال): لعب الطفال دي بتجمع وتزيل الفوارق بين هياثم الخلا وهياثم المدينة بقدر بوفر خمسين لعبة لكل شويفع مسؤول اللعب دايما يكون في الاحياء الشعبية..

شهاب كباس (مفسر أحلام): المسؤولين عندهم احلام مزعجة بفسرها بتخفيضات هائلة مليون للحلمة مع اطعام 60 مسكين وربنا يزيل البلاء وتفسير واحد لجميع انواع الاحلام

بخاري مدردم (بناء جالوص): اصدر قرار يتكسر اي بيت طوب يتبني جالوص من جديد سيدنا عمر كان بينوم تحت شجرة لازم نتقتدي بيهو .. عندي طلب


على جنبة(بتاع نقاشة) النقاشين اعلى راتب

عوض قوقل (بتاع محل انترنت): ندرب المسؤولين على استخدام الانترنت .. عيب كبارات في احزاب ما عندهم ايميلات يا خي نحن في عصر السي دي!!!

عادل باسطة (بتاع حلواني): مناسبات الوزراء ديل مسعوليتي السعر دة بخمش براي مافي عوجة
عبدو في الجو (بياع طيور زينة): اي مسؤول ممنوهع يشتري كم دستة طيوزينة من البرازيل وجزر البهايما وشنو مابعرفو داك يجي عند العمال بتاعينني الطيرة التجي طايرة في الجو يأشر عليها والنبلة تجيبا الواطة .. (جنة جنة)تنا ولا كناري الناس

عمران صيني(تاجر أواني منزلية): عيب مناسبة مسؤوول او ولدو او قريبو كل مرة بي اوني مستعملة اللنج دة جبنا لي منو ؟؟ صاحب العقل يميز

حمزة فرملة(مكانيكي جديد): يومي على الله لازم نفحص فرامل العربات حقة الجماعة كووولهم عشان الصباح مسؤوليتنا اي فرملة تكون مية مية وباليل ما تسألو نعمل شنو .. المهم كل يوم باليل الفرامل ما اوكي شغالين شنو نحن الصباح فرملة لنج في اي عربية
صديق اف ام(راديوهاتي): بدل الموبايلات دي وخسارة رصيد في فاضي اي واحد يكون شايل رادي يستمع كان فاضي كان مافاضي الاوامر من فوق للمسؤولين والمواطن يكون متااااااااااااااابع اي لكلكة في تنفيذ كلام الكبارية معناه .. واشار باصبعة دليل فهم الناس لمايريد ان يقول ..

يوسف جوز (تاجر حمام): ياخي بدل اللحم الغالي دة الله ما كتر الا حمامنا دة .. ومافي عوجة يوم ينعدم عندنا بديل قماري سنابر المهم طير مما يشتهون !!

آدم طحنية (بتاع كنتين): طحنية بس مافي اي عوجة سكر غالي وبيسبب امراض اي مسؤول لازم يبدل السكر بي طحنية سودانية مية المية .. وناكل عيش كيف اذا ما شيلناهم ليها اصلو 99 في المية من قروش البلد في جيوبهم نبيع لي منو غيرهم ..


عبد العال حبة (ممرض): عملا بمبدا توطين العلاج اي بشر يكون مشتري حبة من اي نوع لاي مرض عشان الوقاية خير من العلاج وبدل تكاليف السفر خاصة لاخواننا الطيبين اهو حباية في كل كباية .. لا مسؤول يسافر لا مرة تجيها عوجة جنب مستشفى

النور تسالى (بتاع المراسم والاضيافة ): الاحتفالات والمسيرات والهتا... باختصار الحاجات دايرة حاجة تسنن الحلق وتروق المزاج ... خلوها علينا..
عمر سيركي ( بتاع نكات وحاوي وخلافو): لا لا انا خلو على تنفيس الغضب الشعبي عشان الشعب الفضل يقدر يصبر لخطب المسؤولين ديل فقرة من هناك وضحكة من عندنا فقرة من عندهم ونكتة من عندنا العداد حسب عدد الحاضرين لاي مخاطبة جماهيرية وكدة

آخر لمسة(بتاع كريمات ): رفض ذكر اسمه... اي بت او مرة ياخ بي اولادهم وهم ذاتم علبة كريم حسب المناسبة وحسب الجو وحسب الانباء والنشرة ..كلو يكون تمام عامل ماتش تنعمل آخر لمسة عندنا..

كسرة: كل الاسماء أعلاه حقيقية مية المية في هذا البلد الامين.. اللهم اشفي مرضانا وارحم موتانا ويسر لنا امور ديننا ودنيانا


#269282 [زيكو]
0.00/5 (0 صوت)

01-05-2012 07:32 PM
اين علماء او تنابلة السلطان من كلامك ده اظهر بقيت تخاف ام اكل العيش غلاب


#269198 [سوداني]
0.00/5 (0 صوت)

01-05-2012 04:26 PM
ياااااخ..!!
انت مشكلتك شنو مع خط هيثرو ده!!
ماخلاص اتلطش هو براهوه واللا لطشو زول واحد..؟


#269037 [نادر محمد]
0.00/5 (0 صوت)

01-05-2012 12:27 PM
والله يا شيخ جبرا نسيت زول خطير جدا وهسى بكون زعل منك ياخى حد انسى بركه فتاوى ده لو اتعين بباصى ليك مسائل مريحه جدا فى ما يسمى لا للسلطه ولا للجاه


#268940 [ام الحسن]
0.00/5 (0 صوت)

01-05-2012 10:21 AM
حواء حت وسكسكة (معلمة عرائس)....والله انا من زمان نفسى فى المنصب ده عشان غايظنى بشبش ده عندو مؤ هلات بتاعة رقيص مبااااااااااالغة...بس اشتر وناقصاهو شوية فنيات...والله لو فكونى ليهو اربعين يوم اخلى يقول لفيفى عبدو انت شن بتعرفى..بس خايفة نافع يشوف انجازاتى دى يقوم يبقر.. بس يانافع ..صراحة..انت مفاصلك دايرة شوية تزييت وشغل بتاع موص شهر شهرين بعدها بتبقى لهلوبة


#268935 [Khatim Al-Anbia]
0.00/5 (0 صوت)

01-05-2012 10:13 AM
والله اقول ليك حاجة ,, البتسوى فيهو ده ما بى كروت .. الكروت معروفات حدودا !!! الشىء دهـ نصيبة جديدة من نصايب الزمن !!! والخريبة أن مؤيينك لا يندب البتة !!!! كل هاجة منك هلوة وموزونة !!! وفى شان كلام دى يا أو أنهنا بنهبك سديييد يا جبرا ( جبرا ونستبرا ) !!!
ملهوزة :- اللخة أهلاهو ليس القصد منها السخرية ,, بل تذكيراً بالتنوع الثقافى الذى لازمنا وميزنا بين الأمم رهطاً من الزمن !!! معاً لأعادة الأعتبار لل1000000 ميل مربع وأمريكا الأفريقية !!!


#268887 [القرفان]
0.00/5 (0 صوت)

01-05-2012 08:47 AM
بس يا جبرة نسيت الجنس اللطيف ناس عوضيه جداعات (حنانه)ممكن تحنن دقونهم دى ...وعندك احلام باغات(فنانه)حفلات لزوم....انت ما عارف اكتر منى....وعندك صفيه مسكول(اتصالات)وعندك امانى دلاقين (دلاليه).....فتش الباقى واسالهن يا جبرة ......ولك كل الود استاذى الفاضل..


#268855 [الروي]
0.00/5 (0 صوت)

01-05-2012 06:08 AM
ياجبرة اكثر الله من امثالك مقالك قمة في الابداع وحقيقة شر البلية ما يضحك


#268770 [سلمي حايك]
0.00/5 (0 صوت)

01-05-2012 12:40 AM
بالمناسبة اللبن بقي بزيدوه (سيليكون) - يا جبرا اللبن البزيدوه موية دا لبنكم المحلي بس - قال موية قال :D :D :D :D :D


#268723 [مجنون ليلى]
0.00/5 (0 صوت)

01-04-2012 10:57 PM

امر عجيب يا ود جبرا، عليك الله بتجيب الكلام ده من وين ؟؟

كدي شوف ديل

1- عوض زمبه ( بنشرجي ) ..لو كنت مستشار في الحكومة السجمانه دي امسك ليك وزير وزير وانفخو ليك لغاية ما يطرشق ..

2- ابكر كرين ( بتاع تنزيل اموال وكده) لو كنت مستشار في الحكومة الرمتانة دي امسك ليك وزير وزير وانزل ليك ليهو شوية دولارات لغاية ما يقتنع وبعد داك اقنعو ليك بانو ح يموت السنة الجاية ،يمكن يعمل حاجة لاخرته ويشتغل بضمير ويبطل سرقة واستهبال ويعمل حاجة تفيد البلد و المواطن الغبان ده .


مجنون ليلى والهلال


#268710 [نيام]
0.00/5 (0 صوت)

01-04-2012 10:28 PM
المرة دي علي حسن كابوس جاب ظرف اصلي يا جبرا ....ادام الله عليك الصحة ...بتفشفش الفشافش وتريح المآوح ...نسال الله ان يديم ضحكاتك ..ياخ الكتوموندو عمل لينا انكتام في الشوكمان..


#268678 [Nagi]
0.00/5 (0 صوت)

01-04-2012 09:29 PM
شفتو الحبش كترو كيف فى البلد دى بطريقه تهدد الامن القومى

وده كلو لحفظ علاقات مع اثيوبيا لكى لا تسمح ليناس عقار بالحركه

يعنى ممكن يبيعو البلد من اجل بقاهم فى السلطه


#268648 [القوس]
0.00/5 (0 صوت)

01-04-2012 08:43 PM
نسيت ( الجكس )
لو سألتها كان شرحت لك برنامجها المعد للرقص – للجمهورية الثانية
وحا تقول ليك الرقص دا يا ود أمي فن - ونحن تخلفنا عشان تركنا هذا الفن الحلو - و الناس البترقصو صاح الليلة عندنا قليلين و (في الحقيقة ) كتير من الناس ما بتعرف تفرق بين رقيص الغناء ورقيص المديح ورقيص الزار – شوف كل زول عندنا برقص على كيفوا (يعني جبانة هايصة ) – شئ مهستر وأخر مدستر - مخير الله- - ما عارف ياربي الخواجات بره يقولوا علينا شنو - متخلفين - هههههههههه -
وبعدين يا أخي المحيرني القنوات الفضائية كل واحد عمل ليهه واحدة وهي كلها وحياتك - ما عندها شغل ولا مشغلة غير الغناء ليل ونهار - وهي ياريت لوبتدفع مليم لاهل الفن -بري منهم


#268593 [اسقاط النظام]
0.00/5 (0 صوت)

01-04-2012 06:46 PM
على الله (معاشي) : شوف يا بنى .. أول حاجه أنا ما بستغرب إنى أتعين بعد عمرى بقى كم وستين ونزلتا المعاش لأنو ناس الحكومة ديل تلات أرباعهم أكبر منى ولسه شغالين .. الحاجة التانية انا لو إتعينت ح أقوم أول حاجه أجيب كل المعاشيين وأسالهم واحد واحد وأقول لكل واحد نفسك في شنو؟ الح يقول ليك (حبوب الضغط) الح يقول ليك رسوم (عملية بروستاتا) الح يقول ليك (متأخرات الإيجار) الح يقول ليك (شية جمر) !! أنأ ح أرفع المعاش الشهري لكل معاشى عشان يكفيهو للعيش في حياة كريمة .. معقولة يا إبنى الزول يدفع للبلد دى أغلى سنوات عمرو وشبابو بعدين معاشو ما .....
جميع فقرات اضحكتني عدا الاقتباس اعلاه لا ادري لماذا تمالكت نفسي من البكاء وغالبتني دموعي


#268582 [ود البلد]
0.00/5 (0 صوت)

01-04-2012 06:19 PM
والله يا استاذ الفاتح انت الوحيد البتزلينا الضغط


#268562 [ودالدكيم]
0.00/5 (0 صوت)

01-04-2012 05:40 PM
يا أستاذنا جبرا والله أنا روحي طلعت من الغربة دايرك تشوف لي طريقة أشتغل وزير وأبشرك أنا حرامي وبعرف اللف والدوران يعني حركات الجبهجية كلها بعرفها وهذه أهم مؤهلات الوزير صدقني أستاذنا جبرا ما حنساك لكن بعد ماأشبع وان شاء الله أشوفلك قطعة في حي كافوري طبعاً انتي وحظك لو جماعة الرئيس الراقص خلوا فيها حاجة بعدين ولايهمك حاشوفلك بند لتشيدها بعدين أهم حاجة تكتب عني في جريدة (الراكوبة) والله الوزارة دي ودالدكيم طريقة ادارته مثالية ووزير سائر علي طريقة الشريعة وعشان تستفيد تتحدث ياأستاذ جبرا وتقول في الانتخابات القادمة يجب أن يترشح هذا الرجل في الانتخابات القادمة لأن الرجل يطبق الشريعة بطريقة الحزب اليهودي السوداني الحاكم


#268522 [ود البشير]
0.00/5 (0 صوت)

01-04-2012 04:55 PM
غايتو اظنها دي بي ثلاثة كروت يا جبرا , الله يجازي شيطانك


#268497 [عمر الامين]
0.00/5 (0 صوت)

01-04-2012 04:27 PM
واللة حنان مسكول لو لقتها اي مسؤول عندو تلاتة زايد المرشحات للرابعة


#268490 [Iالقبطان]
0.00/5 (0 صوت)

01-04-2012 04:19 PM
قمه الابداع ...


#268466 [مين قدك]
0.00/5 (0 صوت)

01-04-2012 03:47 PM
نجـــــــــــــــــــــــــــــــــــــريولوجي وبس ... زي التحليل الدالي او الابستراكت او البماريات التفاضلية


#268419 [ود ابوشوارب]
0.00/5 (0 صوت)

01-04-2012 03:06 PM

مستمعينا الكرام وسنوافيكم فى الحلقة القادمة بآراء :
1- جبارة ( طلاق ) السمسار ( عندو اعقاد راسخ بقدرته على تسويق اخوته الدستوريين برغم اعطابهم الظاهرة عيانا بيانا )
2- على خضره الخضرجى والماحى عطارة ( لهما رؤية مشتركة بخصوص اضافة التوابل والشمار لاجتماعات العصبة الدستورية لجعل حتى ولو بعض قراراتها مستساغة )
3- محمد صالح قدرة الفوال ( لشرح مسوغات قبوله للمنصب وما قد يتكرم به من جوف قدرته من فول مصلح للسادة الدستوريين لمساعدتهم على السرحان مما يوفر على الشعب السودانى الكثير من ( اشياء كثيرة )
4- العطا مليس الزبالة ( هذا الرجل أسر لبعض خاصته بأنه لو ظفر بالمنصب المعنى لكب زملاءه الجدد فى الحوض (( لتخميره ))
5- غريب ( فايات ) وهذا الأخير تأفف عن المنصب باعتبار أن شاغليه بتاعين فايات ساكت ولو أن هناك بعض اصدقاءه مازالوا يحاولون معه


#268394 [بت الجزيره]
0.00/5 (0 صوت)

01-04-2012 02:39 PM
صباح الروقان استاذنا,انا لو سالونى اول حاجه اعمله اشوف خط هيثرو ده الباعو منو؟ واجيبو ليك انت عشان تعمل فيه الدايرو لانى ملاحظه انه حارقك شديدددددددددد


تحياتى لك.........


#268392 [الاسم الكامل انسان ]
0.00/5 (0 صوت)

01-04-2012 02:37 PM
يا ود جبرا ياخي نسيت اهم زول (السمسار) عشان يبيع باقي البلد يوصلو لخط هيثرو وجزيرة (شنو ما عارف داك ) وحلايب والشلاتين وووووووو
ونسيت لينا بتاع الصرافة : كان تديه حاجة هو زاتو , بدل ما زولك داك الخاتي 9 نوع من انواع العملات في بيتو . علي الاقل يضيف عليهم الشلن اليوغندي والفرنك التشادي ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;)


#268373 [زول محبط شديد]
0.00/5 (0 صوت)

01-04-2012 02:19 PM
والله من ما دخلت علي الراكوبة دي اليوم وانا بقرا في الاخبار المهببة بتاعت الجماعة ديل كنت محبط شديد وعابس والله ماشفت الابتسامة الا لما شفت مقالك وقبال ما افراه كمان....ولما قريتو والله ضحكت من الاعماق...لك التحية يامبدع ............


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة