رئيسنا محتاج يربّطوه
01-10-2012 02:28 PM

رئيسنا محتاج يربّطوه

شريفة شرف الدين
[email protected]

طبعا مافي حاجة بتضايق الواحد زي لمن تمشي زيارة لبيت الجيران و يقوم وليدك يهبش ده و يشيل داك و يدخل هنا و يدفق داك .. لكن ناس البيت بيواسوكي بكلام زي ( يا اختي ده ما شافع .. بكرة يكبر و يخليه) و ياهو الكلام الزي ده الخلا البشير يكبر و ما يخلي عادات الطفولة .. يمشيى يزور الجيران و لأسباب معروفة إما شحدة و إما جعلنة ساي عشان الناس تقول إنو هو بتحدى في المجتمع الدولي .. انحنا ديل أضانا خلاص أتبرمجت على الكلام الخارم بارم بتاعو الما موزون و مهما يكون برضو نقول زيتنا في بيتنا و ما بننشر غسيلنا لكن زولنا العوقة ده البسترو شنو؟

نفس الشلاليت و الكلام بتاع القعدات الما بيشبه الرؤساء عايز يتونس بيهو للناس بره .. قال شنو؟ قال أنا مستعد أمشي في شوارع مدن ليبيا بدون أي حرس!!! يا رئيس يا ما فاهم حقو تفهم إنو في شيتا بسموهو البروتكول .. يعني مش الجكاية أمسك لي و أقطع ليك و محل ما تمشي تجيب عجاجة للناس البتمشي ليهم .. حسع بزيارتك لليبيا جبت ليهم الهوا لأنو المجتمع الأوربي انتقد الزيارة و حكومة ليبيا ما حيقدروا يقول ليك عليك الله ما تجينا.
عجبنا الراجل الليبي الوقور في ردو على سؤال ما ذا تعني لكم زيارة البشير؟

قال بقول رواقة إنو البشير نسخة أخرى من ديكتاتورية القذافي و شعبه في السودان يعاني الأمرين من نتاج سياساتو .. و الله الراجل عجبني و سر بالي بكلامو المختصر ده.

البشير قال شنو .. قال القذافي هو السبب في إنفصال الجنوب!! و الله ما ذكرني إلا بالنشال القبضوه و يدو جوة جيب الزول و حالف و ناكر إنو دا ما يدو!! و قال شنو قال إنو هو مستعد لبناء الجيش الليبي!! خلاص يا بتاع قواعد عسكرية .. عليك الله أعمل لينا قاعدة عسكرية في كوبا عشان تخوف أمريكا!!

طبعا السبب في زيارة البشير لليبيا إنو منشن على بترول ليبيا بعدما فرط في بترول بلدو .. لكن ده بعدك .. هو الشعب الليبي ذاتو مادي يدو للمساعدات ..
أحسن حل هو أن نحبس البشير من الطلوع بره السودان و حتى بالداخل يكون حبيس القصر الجمهوري .. يعنى بالمعنى الصريح يكون مربط و إنتو عارفين الناس بتربط منو من الناس و بتين!!


تعليقات 16 | إهداء 0 | زيارات 2345

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#273568 [ساميه]
0.00/5 (0 صوت)

01-12-2012 08:22 PM
احسن حاجه يربطوه زى الكلب .. لانه كلب .. وكلب سعران كمان .. لكى الحب اختى شريفه لانك اوجزت وامتعت لكى منا الشكر


#272724 [abusafarouq]
0.00/5 (0 صوت)

01-11-2012 08:34 AM
البنت شريفة والله كلامك صح الزول الشقى لا يتأدب إلا بتوقيفو قبل ما يعادى الناس بمرض الشقاوة وأحسن مكان لحبسه وتربيته هو سجن لاهاى - طه بعشر كان زمان فى السودان لأمثاله والشلاقة الشديدة وإدخال أنفه فى كل مكان لازم يجد من يلدقه ..الرئيس يذكرنا بمجموعة القردة الحرامية الذين يسرقون الموز من الباعة فى مدن الهند وتيلاند وينططو من سلك لسلك ومن سقف لسقف ورئيسنا القعدة فى البيت بقت عليه صعبة عايز يشم الهواء
لو بأحراج الاخرين بضيافته الثقيلة الغير المرغوب فيه ..


#272667 [مدحت عروة]
0.00/5 (0 صوت)

01-11-2012 02:33 AM
انتو مش اول زيارة لقائد الانقاذ كانت لليبيا القذافى؟؟؟ و مش ناس الانقاذ كانوا معجبين بنظام المؤتمرات الشعبية بتاعة القذافى عندما عملوا المؤتمر بتاع كيف يحكم السودان طبعا عملوه براهم و كانوا ماسكين الدركسون!!! طبعا ناس مصطفى
فى عبد الجليل ديل ناس طاشين ساكت او انهم اسلامويين تبع الجماعة!!!!


#272589 [طارق]
0.00/5 (0 صوت)

01-10-2012 11:20 PM
الاخوة المعلقين الكرام لا تظنو ان مثل شتائمكم ومهاتراتكم فى التعليق تغضب الحكومة بل انها دافع لهم واطمئنان بانكم تسبحون فى عالم اخر وتتركوا القضية التى من اجلها تعارضون
تحركوا فى انشطة جادة عشان تحس الحكومة بخطورة التوجه والجدية


#272528 [شيخ تلب]
0.00/5 (0 صوت)

01-10-2012 09:48 PM
ودعباس القال ليك هو ولى امر المسلمين منو ؟ الولاه منو ؟ امشى اعرف شروط ولى امر المسلمين وبعدين تعال اكتب ياوهم . قال ولى امر قال . جاتك داهية


#272523 [الجمولابي]
0.00/5 (0 صوت)

01-10-2012 09:41 PM
البربطو إما يكون مجنون أو يكون دايرين يضبحو يا ترى من منهم الزول بتاعنا ؟


#272515 [ممغوص]
0.00/5 (0 صوت)

01-10-2012 09:30 PM
يا ود عباس إنت للآن عاديهو أمير المسلمين إتقي الله في نفسك وخليك بتفهم ما تخلي راسك فاخورة فاضية ولما أنت تقي خالص كدا وبتخاف الله مالك ما بتناصح الحاكم بأمر الله؟ كلكم أمنجية مؤتمرجية مأجورين ومساديد وفاقد تربوي الله يأخذكم أخذ عزيز مقتدر... نحن مظلومين وندعو عليكم ودعوة المظلوم ليس بينها وبين الله حجاب الله ينتقم لينا منكم.


#272442 [شقى ومجنون]
0.00/5 (0 صوت)

01-10-2012 07:35 PM

يا ود عباس

كل إناء بالذى فيه ينضح..!!!!!!

روح إتعلم اللغة العربية وبعدين تعال قل أدبك ( قلة أدب ) هى تكتب هكذا

ياود ترباس


#272429 [alitaha]
0.00/5 (0 صوت)

01-10-2012 07:10 PM
استاذة شريفة..
انا اتفق تماما مع ود عباس..لا يصح لك ان تتكلمي عن ريئس السودان هكذا.....




لكن



ارجوك تفي عليه ان اتيح لك
والعنيه من كل قلبك كما نفعل وهذا اضعف الايمان..
احترامي لك ولكتاباتك ارجوك واصلي..


#272391 [Nagi]
0.00/5 (0 صوت)

01-10-2012 05:57 PM
حلوه حلوه ها ها ها

الشيخ الطيب طوالى


#272376 [عمر الفنان]
0.00/5 (0 صوت)

01-10-2012 05:32 PM
استاذه شريفة بالله يربطوا منو والا يفكو منو ؟ انا بفتكر حقو يربطو الشعب السوداني كلو ويخلو البقرة العويرة دي تبرطع زي ماعاوزه لحد مايلقاها واحد مجنون والباقي اخلليهو لشطارة ......القراء الكرام


#272365 [الفاروق]
0.00/5 (0 صوت)

01-10-2012 05:18 PM
و إنتو عارفين الناس بتربط منو من الناس و بتين!!
--------------------------------------------------------------------------------------------------------


والله غايتو البربطوهم اتنين

\"الكلب والقرد \" وخليه يختار


#272358 [واحد صريح شويه]
0.00/5 (0 صوت)

01-10-2012 05:10 PM
قال أنا مستعد أمشي في شوارع مدن ليبيا بدون أي حرس

طيب عليك الله كدي ورينا شطارتك دي و جرب امشي بدون حرس في قلب العاصمة الخرطوم عشان الجماعة راجينك لسه ما رفعوا الفراش ؟


#272298 [ود عباس]
0.00/5 (0 صوت)

01-10-2012 04:08 PM
يا شريفه لا يصح أن تتكلمي عن ولي أمر المسلمين بهذا الكلام حتي وإن ثبت ظلمه للناس هذه قلت أدب وقلت حياء وعدم إحترام لولاة الأمر ومهما كانت معادتك لإنسان عادي خلي كمان يكون رئيس جمهوريه وولي أمر المسلمين لايصح منك أن تقولي هذا الكلام ومن أدب الإسلام لايجوز شتم الناس والإساءه اليهم لأن صفة العز والذل هي لله وحده ومن أنت لتقولي هذا الكلام ؟؟؟؟؟


ردود على ود عباس
Saudi Arabia [hajabbakar] 01-10-2012 10:01 PM
ومن الدى ولاه امر المسلمين؟
كلامك ياخى الكريم من الافضل ان توجهه الى المدعو ولى امر المسلمين والدى وصف مواطنيه بالحشرات فى صلاة عيد الاضحى بالكرمك

United Arab Emirates [sa] 01-10-2012 06:54 PM
واحنا ما مسلمين لما بقول لينا الحسو كوعكم والباقى انت عارفو ولما قال لى عقار تور ده كلو بقه ما نبذ العين بالعين والبأدئ اظلم, وبعدين مسلمين شنو فى زول قا ليك هو من الصحابة ده رئيس جابتو الظروف والحمدلله بلاء ان شاء الله وربنا حيرفعو عنا قريب


#272294 [الزول الكان سمح]
0.00/5 (0 صوت)

01-10-2012 04:01 PM

طبعاً بعد ما تنتهى الزيارة ..يقوموا ناس البيت بى سلخ الأم ...( بالله دى تربية دي....يخسي على قلة الطبع...والله ده كان جناى كان كتلتو...هى فاضية من الحوامة...والله كان ده جناى مابمرق..بيهو...هو الواحدة لو ما قادرة على التربية؟ والدة ليه!!!!


#272243 [قلووز]
0.00/5 (0 صوت)

01-10-2012 03:18 PM
مصيرو الربط .. السواهو فينا شوية ......؟
لكن ربط جن مو ربط عدم مروق ...!


شريفة شرف الدين
شريفة شرف الدين

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة