أرجوكم .. فكروا معي !ا
01-15-2012 05:24 PM

حديث المدينة

أرجوكم .. فكروا معي !!

عثمان ميرغني

لدى فكرة أعتقد أنها تصلح أساساً للخروج من نفق الأزمة السياسية.. أعرني عقلك لأشرحها لك.. نجري تعديلاً طفيفاً للغاية في الدستور الحالي.. بموجب هذا التعديل نعيد تصميم الدورة البرلمانية.. نستحدث أسلوب (التجديد النصفي) للبرلمان.. عملية (التجديد النصفي) تعني أن ينتخب الشعب نصف البرلمان كل عامين.. بدلاً من الأسلوب الساري منذ الاستقلال وهو انتخاب كامل البرلمان بعد نهاية كل دورة برلمانية.. أسلوب التجديد النصفي له فوائد كثيرة.. أهمها أنه يحافظ على خلطة (برلمانية) من نواب لهم خبرة عامين في الدورة السابقة مع نواب يدخلون البرلمان لأول مرة.. مما يسمح بالاحتكاك واكتساب الخبرة بالتعايش بين دفعتين من النواب الجدد والقدامى. لكن الأهم.. أن التجديد النصفي (الآن!!* يفتح الباب لتعديل الأوزان السياسية النيابية داخل البرلمان.. فحزب المؤتمر الوطني صاحب أغلبية كاسحة.. بل ربما إجماع.. ولا وجود حقيقي للأحزاب الأخرى (سوى قلة من الشعبي أفلتت بأعجوبة).. فإذا وافق حزب المؤتمر الوطني على إسقاط نصف عضوية البرلمان (اختياراً بالاستقالة منعاً لإحراج النواب).. وإذا تمددت موافقة المؤتمر الوطني إلى الامتناع عن دخول انتخابات التجديد النصفي القادمة.. فإن الأحزاب ستتنافس على نصف مقاعد البرلمان بمنتهى الحرية.. بغياب المؤتمر الوطني عن المنافسة الحقيقية.. هذا الوضع يسمح باستيعاب الأحزاب داخل البرلمان بسلاسة دون إلغاء نتيجة الانتخابات السابقة. بل هي عملية تطوير للتجربة الانتخابية.. ثم يتولى البرلمان الجديد بتركيبته الجديدة صياغة دستور دائم للبلاد.. بهذا المقترح نضرب أكثر من عصفور بحجر واحد.. نقوي من البرلمان بفكرة التجديد النصفي.. ونفرغ الانتخابات البرلمانية من الحساسيات العالية الناتجة من انتخاب برلمان كامل في كل دورة.. الذي بسببه تتناحر الأحزاب للحصول على أغلبية.. ثم إن التجديد النصفي يجعل الحكومة (أي حكومة) في حاجة لتجديد أو تنشيط تفويضها الجماهيري كل عامين بدلاً من كل أربعة أعوام كما هو الحال الآن.. ومثل هذا التفويض الشعبي أشبه (بشحن الرصيد) يقوي من عزم الحكومة (أي حكومة) ويرفع درجة المشاركة الشعبية في الحكم.. يفرض على الحكومة أن تحس دائماً أنها بحاجة لإرضاء الشعب.. بدلاً من التناحر السياسي القائم الآن.. الأجدر أن نفكر بكل هدوء في المستقبل و(ننسى الماضي وأحزانه).. بدلاً من التفكير في الإطاحة بالحكومة الأجدر تطوير مؤسسات الحكم وإعادة هيكلة الدولة.. فلنبدأ الآن.. نعقد مؤتمر مائدة مستديرة للمكونات السياسية والأخرى الفاعلة.. نعدل الدستور بما يسمح بالتجديد النصفي للبرلمان.. نجري انتخابات نصفية يتعهد المؤتمر الوطني بعدم المنافسة فيها أو على الأقل أن تقتصر منافسته على عدد محدود للغاية من الدوائر.. تتنافس الأحزاب على بقية المقاعد .. ويتكون برلمان جديد بتمثيل حزبي كبير.. يعهد إليه إعداد الدستور الدائم.. أتمنى أن تتحمس القوى السياسية لهذا المقترح.. الزمن يمضي بسرعة والهاوية آتية لا محالة إن استمر التناحر السياسي على هذه الوتيرة.. ويومها سنندم جميعاً.. ونبكي كالنساء على وطن لم نحافظ عليه كالرجال.. بدلاً من أربع سنوات ببرلمان

التيار


تعليقات 27 | إهداء 0 | زيارات 3895

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#276590 [زعلان من جعفر]
0.00/5 (0 صوت)

01-17-2012 01:22 PM
يا عثمان عملت لينا شنو في الموضوع بتاع فساد لاند؟


#276224 [المفكر ]
0.00/5 (0 صوت)

01-17-2012 12:50 AM
الحكومة القائمة ليست حكومة حزب المؤتمر الوطني . هي حكومة شراكة بين العسكريين و مجموعة من أصحاب المصالح ليس لهم رؤية سياسية معينة لادارة كنتين . لذا حل الأزمة في السودان سيكون قريبا للنموذج الليبي و السوري .


#275856 [نصر الدين محمد ]
0.00/5 (0 صوت)

01-16-2012 02:04 PM
الأخ عثمان ميرغني ، لو راجعت كتاباتك السابقة، ما كان فكرت في كتابة مقال كهذا ، يعني لو أتفقنا معاك اليوم ، بكرة سوف تأتي برأي مغاير . هناك حالة زهايمر- ولو مفتعل ، لدي الانقاذيين ، -ربما ينسحب رذاذ من ذلك علي الصحافة، يسند قولي هذا كتاباتك السابقة ، منتقدا تناقضات وزراء الانقاذ في أقوالهم وأفعالهم...وأظن حنينك لي جماعتك لايزال مستوطنك ولو بدرجة أقل حماسة عند فترة حياتك السياسية معهم والان تقول لهم ;(لا بدورك ولا بحمل براك).


#275827 [ودالجزيره]
0.00/5 (0 صوت)

01-16-2012 01:25 PM
يا عثمان ميرغنى .....انت يادوب داير تفكر ...بعد ما الحكايه استوت والبلد مرشحه للانقسام الى اربعه دول اخرى ....ياعم وفر افكارك دى عشان تطرحها بعدين فى البرلمان بتاع دولتكم ان كنت ستتبع وقتها لاى من الدول الاربعه .وشكر


#275773 [Ayyoub]
0.00/5 (0 صوت)

01-16-2012 11:55 AM
لكن ما تقول لي دي غايتو فكرة حاجة يمكن إنه .. يعني .. ما .. زي ما تقول يعني .. حاجة ولا غايتو .. فكرة .. معناها إنه .. ياخي شفت .. زي ما تقول .. ولا يمكن .. حاجة بين كدة ...فكرة .. أقول ليك شنو ... زي لكن ما تقول لي دي غايتو فكرة حاجة يمكن إنه .. يعني .. ما .. زي ما تقول يعني .. حاجة ولا غايتو .. فكرة .. معناها إنه .. ياخي شفت .. زي ما تقول .. ولا يمكن .. حاجة بين كدة ...فكرة .. أقول ليك شنو ... زي لكن ما تقول لي دي غايتو فكرة حاجة يمكن إنه .. يعني .. ما .. زي ما تقول يعني .. حاجة ولا غايتو .. فكرة .. معناها إنه .. ياخي شفت .. زي ما تقول .. ولا يمكن .. حاجة بين كدة ...فكرة .. أقول ليك شنو ... زي


#275749 [العجب]
0.00/5 (0 صوت)

01-16-2012 11:26 AM
يا عثمان ميرغني - اظن قرصوك وادوك العين الحمرا - قبل ايام قربنا نحكم عليك بال ........ اليوم جيت تكسر في التلج - يا اخي سيبنا في حالنا ولم مقترحك عليك - والرهيفة تنقد !!!!


#275602 [جنى الخليلة]
0.00/5 (0 صوت)

01-16-2012 03:29 AM
الامام الصادق قبل يومين يطالب بعدم اسقاط النظام امام شباب الحزب !! وانت الان تطالبنا بعدم التفكير فى الاطاحة بالحكومة !! على الاقل الامام حاز على وظيفة مساعد ريس بالوكالة داخل القصر .. تكون انت مدير المكتب الصحفى ونحن ما عارفين ؟؟؟


ردود على جنى الخليلة
Saudi Arabia [الصادق] 01-16-2012 11:31 AM
انت يا عثمان ميرغني
في فمك حكومة
ولا حساسية لك تجاه الوطن

احسن تسكت كما سكت المال في جيبك


#275600 [خلف الله]
0.00/5 (0 صوت)

01-16-2012 03:10 AM
ىا خلف الله عذبتنا.. يظهر عليك منظراتى كبير و كمان بتنسى نظرياتك .. فقبل اسبوعين طلبت من الشعب الفضل بان يصبر على الحكومة الى حين قيام انتخابات مبكرة .. والان جيت تكحلها عميتها بان تترك نصف اليرلمان (رواب) وتخلق مشكلة للنصف الاخر ومن سوف يغادر الكندشة ويفك الملايين السايبة؟؟ .. انا بدورى اثنى ترشيحك لرئاسة اللجنة البرلمانية (النصفية) القادمة للشئون الهندسية عسى ولعل تنجح فى منع تسرب ( مياه الصرف الصحى) بالبرلمان الى مجرى النيل ..


#275599 [واحد تانى]
0.00/5 (0 صوت)

01-16-2012 03:08 AM
يا جماعة الزول الاسمو عثمان ميرغنى دا ما تدوه اعتبار خلوه ياذن فى مالطا.....


#275573 [المواطن علي حسن سلوكه]
0.00/5 (0 صوت)

01-16-2012 01:23 AM
العروب الاصل على وزن حزب سيدى الاصل قالو لا يستقيم الظل والعود اعوج واخواننا الفراعنه قالو ديل الكلب عمره ما يدعدلش ونهايته يا شيخنا شغلتك دى زي شغلة زول دخل لاندايه وطلب من الجمهور الكريم ان يستقيمو لاداء صلاة الضهر
و زى ما قال احدهم بعد ما لبنت ما ممكن نديها الطير وطبعا بعد 23 سنه سلطة وجاه وترطيبه على الاخر تفتكر الناس دى ح تحن بالساهل كده وتدى ناس سيدى ابو ناعم وامامننا الحبيب وجدنا المتوك المتشعشع الاممى كوتة نواب عشان يضربهم همبريب ملتقى النيليين باروقة المجلس الوطنى ب البلوشى ساكت
شيوخنا ديل تعبو فى الشغله دى شديد وحرسو السلطة دى بالشديد القوى وصرفو فى تثبيتها كل موارد البلد وكمان نفط الجنوبيين وكل واحد منهم هب كده على وش الدنيا ويا دوب مسك راس الخيط وبقى يهز ويرز وعرف سكة العز معقول زول زى ده تانى بيفهم لك حاجه خرافيه اسمها تداول سلمى للسلطه
الرئيس القائد زمان قال ما فى زول يقدر يشيلنى
بن علي قال الان فهمت بالضبط زى ما فرعون قال امنت برب هارون وموسي
مبارك قال لم انتوي ترشيح نفسي لولايه اخرى وما جاب سيره لشغلة التوريث
والقذافى قال انا ثائر من الصحراء ولو عندى سلطة للوحت بالاستقالة على وجوهكم
واليمنى والسوري ..............................................وعيك
الشئ المشترك كلهم طشمانين تماما بسكرة السلطة وعشان يفيقو خالص وتتنسم شعوبهم نسائم الحريه كان لابد من تضحيات كبيره وكان حتميا ان يهتف الجميع
الشعب يريد اسقاط النظام


#275570 [الفاروق]
0.00/5 (0 صوت)

01-16-2012 01:13 AM
الان بيقتوا تفتشوا لليفكر معاكم ؟؟؟ وايام اللغف والنهب ديك ليه ما خليتوا الناس تفكر معاكم ؟؟ بعدين القال ليك منو نحن دايرنكم تخرجوا منها ؟؟؟ هو دخول الحمام زي خروجو ؟؟ وما براكم سويتوها في نفسكم ... والتسويها كريت ..طبعا عارف الباقي ..
نحن دايرنكم لما تقعوا على قدومكم ونخرتكم الرافعنها دي .. وبعد داك نقعد نقزقز بيكم زي لما الكديسة يقع في يدها فار ...




واخيرا تصدق بي موضوع تجديدك النصفي دة عملت لينا (صداع نصفي)


#275558 [النرجسي]
0.00/5 (0 صوت)

01-16-2012 12:32 AM
وين ياعثمان ظرف المرة دى شكلها ثمينة دآيرهم يعملو فيك شنو اكثر من العملو فيك فى الانتخابات .


#275555 [ود عرب]
0.00/5 (0 صوت)

01-16-2012 12:24 AM
عثمان ميرغنى انت الكيزان ديل اشتروك خلاص بقيت تهنق ليهم ... والله والله مافى زول عندو وطنيه فى البلد دى يا اشتروهو يا خوفوهو...


#275553 [جراب الراي]
0.00/5 (0 صوت)

01-16-2012 12:14 AM
اقتباس

لدى فكرة أعتقد أنها تصلح أساساً للخروج من نفق الأزمة السياسية.. أعرني عقلك لأشرحها لك.. نجري تعديلاً طفيفاً للغاية في الدستور الحالي

**************
************

يبدو ان عثمان ميرغي من بين المشاركين في إعداد المذكره التصحيحه


#275545 [جهينة]
0.00/5 (0 صوت)

01-15-2012 11:56 PM


رجعنا تــــــــــــــــــــــــــــــانى لل ( شخيت )

خليك واضح يا ابو شخيــــــــــــــــــــــــــــت


#275538 [wedhamid]
0.00/5 (0 صوت)

01-15-2012 11:38 PM

يا عثمان ......ليه ما داير تريّحنا من ترهاتك وسخافاتك دى ؟؟؟؟

هل فى النظم النيابيه فى كل الدنيا سمعت بينتخبو ا نص البرلمان كل سنتين ؟؟؟؟النظام دا يعمل به فى إنتخاب لجان خيريه و مجالس أمناء الجمعيات يافالح!!!...و بعدين ناسك ديل المحترفين الخج البيمنعم شنو ما يخجو تانى ؟؟؟ خجاك قطر ....قول آمين .........


#275530 [عصتووف]
0.00/5 (0 صوت)

01-15-2012 11:32 PM
افلست سيد عثمان ميرغني لاحظ سيد دي للاسف بالجانب الاخر من شاطئ الشرق الاوسط يوجد عثمان ميرغني وشتان بين العثمانين لذا فكا للارتباط اخلع لنفسك لقب والخليله ولا الفكي هاشم عثمان خليلة او عثمان الفكي هاشم او عثمان فيلا او صاحب الوالي بالمناسبه عمل شنو لصاحب الكشك المصادر الناس ما نست



افكارك ممله وتنظير في تنظير عاوز النظام بتاع اليانكي يبدو لي
اترك الكتابه وتفرق لمهنه اخري تنفعك وتنفع اهلك

وبس
ولا ما كده يا قنبله


#275528 [ودامدرمان]
0.00/5 (0 صوت)

01-15-2012 11:30 PM
فكرتك دي بتمرقك انت والذيك بي ظرف فيهو كم الف
وفكرتك مردوده عليك
و(ننسى الماضي وأحزانه)
امش قول لي كل الارامل والايتام والمقتصبات المفجوعات بي موت ابناءهم او اخوانهم
ولي كل اللذين احيلوا للصالح العام وكل الواقفين في صفوف صرف المعاش
ولي كل المهاجرين والمهجرين خارج ديارهم وطالبي اللجؤ خارج الوطن او ماتبقي من الوطن
ولي كل العطاله والخريجين والمحرومين من ابسط حقوق الانسان


#275519 [سوداني]
0.00/5 (0 صوت)

01-15-2012 11:12 PM
التحية إليك م / عثمان ميرغني
نؤيد ما ذهبت إليه بخصوص موضوع الانتخابات البرلمانية لأن المطلوب في هذه المرحلة الحرجة التي تمر بها البلاد أن يضع قادة المؤتمر الوطني المصلحة العليا للبلاد. فالانتخابات المبكرة هي آلية متبعة في كافة بقاع العالم وبالأخص في الديمقراطيات الراسخة لحل الأزمات.
البلاد الآن تمر بأزمات غير مسبوقة (سياسية واقتصادية واجتماعية). حالياً الحكومة تبحث عن مخرج للأزمة الاقتصادية ولكن مفتاح الحل للأزمة الاقتصادية هو حل القضايا السياسية أولاً ثم بعد ذلك ننظر في كيفية تطبيق البرنامج الثلاثي وغيره من البرامج ، ولقد وضعت الانقاذ الاستراتيجيات والبرامج (الاستراتيجية القومية الشاملة في العام 1992 لمدة عشر سنوات وأذكر من ضمن الشعارات في تلك الفترة أنه بحلول العام 2002م أن السودان سوف يكون دولة عظمى ، وكذلك الخطة الخمسية والنهضة الزراعية وحاليا وضعت الانقاذ البرنامج الثلاثي لحل الأزمة الاقتصادية) ، هذه الاستراتيجيات والخطط لم يكتب لها النجاح وسوف لن يكتب النجاح للبرنامج الثلاثي وغيره من البرامج ما لم تحل القضايا السياسية المتمثلة في : (الدستور الدائم ، العلاقة مع دولة الجنوب ، مشكلة دارفور والنيل الازرق وجنوب كردفان) ، فيجب أن تصدق النوايا لحل القضايا السياسية أولاً فلا يعقل وبعد مرور (56) عاماً من الاستقلال أن لا يكون هناك دستور دائم متفق عليه من كافة الأطراف. فمثلاً النظام الرئاسي الذي هندسه قادة الانقاذ هو في رأي الكثيرين هو ليس مناسباً لحكم السودان فالبعض يقترح نظام برلماني والبعض الآخر يقترح نظام مختلط (برلماني رئاسي) .... الخ ، وأنا شخصيا أرى أن النظام الرئاسي الذي هندسه قادة الانقاذ هو سلطة مطلقة لتنفيذ أجندتهم فلا يوجد برلمان فاعل يراقب السلطة التنفيذية.
إذا صدقت النوايا وتم تغليب المصلحة العليا للبلاد بدلا من المصلحة الحزبية فإنه من المفترض أن يوافق المؤتمر الوطني على الجلوس مع كافة القوى السياسية دون عزل لأحد لعقد مؤتمر جامع تناقش فيه جميع قضايا البلاد (السياسية والاقتصادية والاجتماعية .. الخ) ، وحتى لا نقع في نفس جدل انتخابات 2010 م فيجب أن تشكل حكومة انتقالية رشيقة تكون مهامها : تهيئة البلاد لإجراء انتخابات مبكرة ولتكن كما ذكر م / عثمان أن تكون برلمانية مبكرة يكون هدفها الرئيسي كما أسلفنا هو انتخاب برلمان حقيقي يجيز الدستور الدائم ، هذا سوف يمهد الطريق ويجعل الحل سهلاً للقضايا الأخرى (مشكلة دارفور والنيل الأزرق وجنوب كردفان والعلاقة مع دولة الجنوب). وسوف نجد تلقائياً أن الازمة الاقتصادية قد حلت لأن السياسة والاقتصاد وجهان لعملة واحدة وعندنا في السودان وبقية دول العالم الثالث أن السياسة تقود الاقتصاد.
تكلفة عدم حل القضايا السياسية باهظة وباهظة جداً فزهقت آلاف الأرواح وزادت معدلات الفقر والأمراض والبطالة والمظاهر الاجتماعية السالبة وغيرها من المؤشرات التي لا تخطئها العين فيجب انقاذ ما يمكن انقاذه قبل فوات الأوان.
وإذا لم يوافق المؤتمر الوطني على ذلك فيجب التحرك وذلك عبر حشد الدعم الشعبي لهذه القضايا الملحة أحد هذه الآليات فإني اقترح عليك م / عثمان أن تطرح استفتاء في جريدتكم على الموقع الالكتروني يصوت فيه الشعب السوداني هل هو مع فكرة اجراء انتخابات مبكرة أم لا هذه آلية لقياس الرأي ، وكذلك يجب أن تتحرك قوى الاجماع الوطني في حشد الشخصيات القومية والتي لديها قبول للشعب السوداني مثل الدكتور الجزولي دفع الله الذي دعا في برنامج المحطى الوسطى للاتفاق على القضايا الكلية ، فيكون هناك منبر من الاحزاب والشخصيات القومية المقبولة والطرق الصوفية والطلاب والنقابات ومنظمات المجتمع المدني ... الخ فيجب على قادة المعارضة أن يتركوا مكاتبهم وخطبهم وأن يقوموا بفتح حوار جاد وعميق مع هذه الشخصيات القومية والنقابات والطرق الصوفية ومنظمات المجتمع المدني والطلاب لإقناعهم بالمشروع الوطني فمن أهم أسباب ضعف المعارضة هو عدم تحركها عبر هذه الآلية وترك هذه القطاعات الفاعلة للمؤتمر الوطني يؤثر فيها ويستخدمها لخدمة أجندته ، هذا المنبر تكون مهمته هو حشد التأييد للقضايا الوطنية التي نحن في أمس الحوجة لحلها الآن عاجلاً وليس آجلاً.
والله ولي التوفيق ،،،


#275513 [أبوعلى]
0.00/5 (0 صوت)

01-15-2012 10:59 PM
..(بدلا من التفكير فى الاطاحة بالحكومة .. الاجدر تطوير مؤسسات الحكم واعادة هيكلة الدولة..) .. انت تكرر ما ذهبت اليه مذكرة الانتباهة (مجهولة الهوية).. وللاسف حتى لو طبقت نظريتك فالاغلبية الميكانيكية للوطنى.. وبعدين مين قالك الشعب سوف يوافق على النصف القديم ؟


#275484 [عبدالواحد00 ]
0.00/5 (0 صوت)

01-15-2012 10:08 PM
إختشى على دمك!!الراكوبه توفقت لانها جابت صورة البنت الصبيه دى وهى بتضحك عليك وعلى كلامك وعلى رأى الاستاذ/محمد سليمان نقول ليك (ياراجل!!) طبعا فى نفس السياق الذى قاله عندما سأل ضيوفه عن الرئيس الافريقى الذى يقرض الشعر فأجاب الضيف الذى هو من عاينة اخونا ) ان الرئيس الافريقى المعنى هو (جعفر نميرى) ولفائدة القراء كان الرئيس الشاعر هو (سنقور) وكما هو معروف ان الراحل نميرى كان يطلق عليه (طيش حنتوب!!) وبالتالى ما كان له أن يقرض شعرا او ادبا والجاهل هو الذى لا يعرف أنه جاهل ودى مصيبة البلد دى0


#275461 [المتجهجه بسبب الإنفصال]
0.00/5 (0 صوت)

01-15-2012 09:03 PM
الزمن يمضي بسرعة والهاوية آتية لا محالة إن استمر التناحر السياسي على هذه الوتيرة.

ولماذا لا تبدي الحكومة نوعا من الوطنية والخوف على البلد ولو مرة واحدة وتقبل بتشكيل حكومة إنتقالية تتم بعدها إنتخابات أصيلة غير مدغمسة وتكون بمثابة توبة دنيوية لما اجترحوه في حق هذا الشعب ،،،، الحل في يد حكومة السجم والرماد،، وحتى لو فكرنا نحن وجبنا لبن الطير بدل بترول الجنوب وصدرناه الى العالم بسعر لتر يفوق سعر برميل نفط الجنوب المنهوب مؤخراً فان تفكيرنا لا حا يودي لا يجيب،،، ثم أود في هذه العجالة أن الفت إلى الاساليب الالتفافية التي جبل عليها الاسلاموماليين مثال المذكرة التي نجروها بين ليلة وضحاها وسموها تصحيحية بعد أن شعروا أن الامور في كافة السودان تتجه الى حالة زنقة زنقة بدلاً من دانة دانة طلقة طلقة،، أستاذ عثمان لا بد من الديمقراطية وان طال السفر كما يقول الاستاذ فتحي الضو،،، فهي النظام الوحيد الذي يتم فيه تحول السلطة دون دم ولا يأتي بالاغبياء ليحكموا البلاد كما حدث عندنا،،، وهل هذا برلمان الذي يقول رئيسه ليس هناك فساد ،،،، بينما تقرير الرقابة المالية يؤكد كل عام وكذلك الصحف ما يؤكد أن هذا البرلمان يتحدى خيارات الشعب على لسان رئيسه حتى في مجرد مساءلة الفاسدين،،،، إن وجهة نظري المغايرة لك ليست انتخابات لنصف البرلمان وانما ضرب البرلمان بالدبابات واعضاءه بالداخل كما فعل ستالين بمبنى الدوما الروسي،،،،


#275447 [وحيد]
0.00/5 (0 صوت)

01-15-2012 08:31 PM
فكرة جيدة للحفاظ على حكومة الانقاذ الفاشلة و تجنيبها محاسبة الشعب و الحفاظ على اغلبيتها البرلمانية المزورة
و ستعمل منذ الان على تزوير نتائج الانتخابات النصفية و ادخال احزاب المؤلفة جيوبهم
ثم السؤال من من البرلمان سيستقيل ليخلي نصف المقاعد


#275409 [اسامه ]
0.00/5 (0 صوت)

01-15-2012 07:22 PM
انت كل يوم تقول لينا نبدأ الان !!!!! يازول انت شايف في يدنا حاجة كلامك ده قولو للبشير ولا لي ود الخضر ( الذي لا يظلم ها ها ) ......... واالله ياعثمان اظنك انت شغال مخدر مع الجماعة ديل ..... قال نبدا من الان ..... فضل فيها آن بعد 23 سنه !!!


#275402 [ابو احمد]
0.00/5 (0 صوت)

01-15-2012 06:48 PM
ما هكذا تورد الابل يا عثمان ....
نعم الهاوية آتية عليك وعلى مؤتمرك اللاوطني الذي تبحث له عن مخرج من مأذقة الذي ما مخرج له منه الا الهاوية تنتظره .... هل ترى يا عثمان هناك من يقبل هذه الفكرة الشيطانية ....قال 50% قال للمؤتمر الوطني والباقي تتنافس عليه الاحزاب الاخرى كدي وزع لينا الباقي طبعا حتدي السلام العادل 20% والاتحادي الاصل 5% واحزاب كترونية ومنشقة تحت سطان المؤتمر الوطني 10%و الباقي لبقية الاحزاب ..... هههههههههههه يعني برضو في الاخر الحال يا هو الحال
اقتراحك يا عثمان لا يساوي المداد الذي كتب به


#275394 [الغاضبة]
0.00/5 (0 صوت)

01-15-2012 06:23 PM
يا جماعة وين انتو عثمان ميرغني دا ما قال ليكم فكروا معاهو، وجاب ليكم افكار جهنمية.... كتر الف خيرك ومزيدا من الافكار الجهنمية...


#275390 [ابوالسيد]
0.00/5 (0 صوت)

01-15-2012 06:21 PM
طيب اللف والدوران دا لزومو شنو ؟ ما نطلب من البشير أن يقيل نصف البرلمان بقرار جمهوري ويلتزم بانتخابات نزيهة لإنتخاب نصف البرلمان المقال ومافي مانع يشارك فيه المؤتمر الوطني ولو انتخبهم الشعب وأشك في ذلك فحلال عليهم . طبعاً سوف لن يرضي المؤتمر الوطني أن يذوب النصف الآخر بذات العملية الانتخابية النزيهة عشان كدا نرضي نحن بتعيين النصف الأخر بعد سنتين علي شرط ما يكونوا أعضاء سابقين ... وحكاية .....يفرض على الحكومة أن تحس دائماً أنها بحاجة لإرضاء الشعب..... دي خلينا منها لأن أحمد إبراهيم الطاهر ما حيقبل .. وبرضو كل حركة فيها بركة !!!


ردود على ابوالسيد
Sudan [ودالرحال] 01-16-2012 11:30 AM
شكلك يااستاذ مالقيت موضوع تكتب فيهو نعزرك اما لوكنت مطبلاتى فتلك مصيبة كبرى


عثمان ميرغني
عثمان ميرغني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة