المقالات
السياسة
ارشيف مقالات سياسية
أنا خصيمتك أمام الله يوم القيامة يا البشير
أنا خصيمتك أمام الله يوم القيامة يا البشير
01-16-2012 08:38 AM


أنا خصيمتك أمام الله يوم القيامة يا البشير

شريفة شرف الدين
[email protected]

في ذمتك يا البشير بتعرف تنوم و مرتاح؟ في ذمتك البتاكلو في بطنك دي حلال و طيب؟ ياخي فكر بس شوية في الحال الوصّلت ليها البلد و الناس .. إنت فاكر إنو أمور كل الناس متسهلة زي ما هي أمورك و أمور جماعتك .. أصلو مستشارنك ديل ما قالوا ليك إنو في حديث للرسول الكريم بقول كلكم راع و كلكم مسؤول عن رعيته؟ أصلو ما ذكروك بعقوبة الإمام الجائر!!حتقول لربنا شنو لمن تلقاه؟ أوعاك تكون معتمد في لقاء الله على الحصانة المدنها ليك دي؟ أوعك تكون راكن على حرسك و أمنك ديل؟

إنت عارف ولا عامل سادي أضانك بطينة و عينك بعجينة إنو سياساتك خلقت فتنة في طول البلد و عرضو .. و نتيجة الفتنة دي ماتوا الآلاف و كلهم على رقبتك دي و كمان عامل فيها بترقص يا رئيس الهنا و قائد السرور!! بالله خلي التقارير المزيفة البجيبوها ليك و أتنكر يوم واحد عشان تسمع و تشوف الناس في شنو و إنتو في شنو؟

تتبجح كل يوم تقول لينا الشعب جابك و إنك بتمثل إرادتو .. بتتبجح كل يوم بالسيادة الوطنية و الأمن الوطني .. عليك الله بتغش في منو؟ الرئيس نميري بكل عمايلو و الله أحسن منك بمليون مرة .. ياخي ده لمن البعثيين قتلو طالب سوداني في العراق بعد صلاة المغرب أمر بعودة الطلاب السودانيين فورا و صلوا فجر اليوم التاني في الخرطوم و رفض ببقاء حتى العاملين ليهو عملية بواسير و قال لو يموت في الطيارة أحسن ليهو من إنو يحيا بذل في بلد الغربة!! تقول لي أرادة الشعب و عزة مواطن .. وين السيادة الوطنية البتمثلها إنت يا رئيس الغفلة؟ بذمتك ما مرمطها و بشتنت حالها؟ في رئيس واحد في العالم منبوذ و مكروه و مطارد زيك؟ وين الأمن القومي و البلاد محروقة و الحارقها إنت ده بعنترياتك و سياساتك المهببة دي .. وين حلايب و مالك ما قادر تقول بغم بخصوصها؟ وين الجنوب؟

أكيد سمعت بالكلام القوي القالو البوشي لمساعدك نافع .. و الله ما هو إلا ناطق بحال أغلبية الشعب و لو لقينا فيك إنت فرصة و الله نسمعك أكتر من السمعتو حتى لو عملت لينا فيها أضانك طرشا ..

البتعمل فيهو ده كله ما بحلك .. البحلك شيتن واحد .. حل حكومة السجم بتاعتك دي و اعترف للناس بفشلكم و ردوا الحقوق النهبتوها و خلو العدالة تقول كلمتها .. و إذا ما عملتو بكده و الله راجيكم غضب لا شفتو و لا سمعتو بيهو .. أنا شخصيا خصيمتك أمام الله يوم القيامة .. الله العادل القوي المنتقم الجبار.


تعليقات 13 | إهداء 0 | زيارات 3955

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#276455 [حمدالنيل]
0.00/5 (0 صوت)

01-17-2012 10:39 AM
هووووي يا شريفة.. عووووووك، أعمل حسابك يا بنية لا يجيك ضغط أو جلطة من احساسك المغبون هذا. إنتي فاكرة الناس ديل بحسوا وبيشعرو زي باقي البشر.!؟ لا يا عزيزتي هؤلاء هم الخشب المسندة. هؤلاء هم الذين أمات الله قلوبهم قبل أن يميتهم وهم أحياء، وأعمى بصائرهم قبل أن تعمى أبصارهم، وفي آسماعهم وقر.
ديل يا ستي كالأنعام .. بل هم أضل.
وكلامك المر ده والله ولا يودي ولا يجيب معاهم ولا حاسين بيه. وما تحرقي اعصابك وتفوري دمك ودمنا ساكت.
أتعبتينا .. الله لا يوريك تعب أكتر من الفيك ده.
سلام


#276219 [جعفر فقط]
0.00/5 (0 صوت)

01-17-2012 12:29 AM
والله ياأختنا شريفة كلامك ده قلناه زمان((ولا حياة لمن تنادي))


#276184 [wahied]
0.00/5 (0 صوت)

01-16-2012 11:15 PM
كل الشعب خصيم هذا الرجل الشرير وفى مقدمتهم المرحوم الشاب مجدى ووالدته المكلومة والاخ الشاب الطيار جرجس واسرته المفجوعة ويليهم ثلة ال 28 ضابطا ( شهداء رمضان ) الذين اعدموا غيلا وغدر وبجانبهم امهاتهم وزوجاتهم واولادهم الذين ذرفوا الدموع والحسرة ورفعوا الاكف بالدعاء على الظالمين الطغاة ومنهم من لقى حتفه فى ظروف غامضة فى الدنيا علم بها كل الشعب السودانى ومنهم من لا زال يمارس فى ظغيانه وظلمه . الويل والويل لك ايها البشير عندما تقبر فى تلك الظلمة فلن تجد الا عملك السىء الذى يرافقك ولا ينفع الندم آنذاك .


#276167 [abusafarouq]
0.00/5 (0 صوت)

01-16-2012 10:34 PM
والله عفارم عليك يا الاخت شريفة والله كل الشعب السودانى الكان 40 مليون خصم على البشير يوم القيامة وفعلا هو ما ينوم الليل ابدا لأن أرواح الناس القتلهم تعرض عليه كل ليلة وشر بلية البشير لاذال يصر على القتل والارهاب للمواطنين لم يشبع قتلا ولا أرهابا ختم الله على قلبه وبصره وسمعه غشاوة وقساوة وتحجر لا علاج إلا تحل كارثة يقضى عليه أو حبل المشنقة فى ميدان ابو جنزيرأو محكمة لاهاى ليقضى باقى ايامه مع زوجته الحرامية القتلت راجلها وتزوجت البشير الخصى الظالم .. حكمة الله فى الارض الظالمين لم يرزقو بذريات صالحة ابدا يعلم الله أن يكونو اذية للعباد من بعدهم والمرء على دين خليله ...


#276096 [حظيلمة القرمندلي ]
0.00/5 (0 صوت)

01-16-2012 08:09 PM
يا شريفه شرف الدين .. ارجو ان اطمئنك .. بان الشعب السوداني شماله وجنوبه .. جميعهم خصماء للبشير وابالسته يوم القيامة .. فيا شريفة .. فات عليك ان تذكري البشير ابو كرشا زير .. بالذين قطعت ارزاقهم .. بعد ان تم التخلص منهم عبر الخصخصة والهيكله والصالح العام والغاء الوظائف .. فيا شريفة .. عمك البشير .. كل همه في هذه الذايله .. بطنو وفرجو .. وبيني وبينك فرقو من الحمار شنو ؟؟ وبرضو الشعب السوداني احمد الله كثيرا .. ان مثل هذا البشير الحمار .. ربنا حرمو من الخلفه .. لكن الخوف علي ابناء المرحوم .. ابراهيم شمس الدين .. لان امهم وداد اصبح كل همها .. نهب اموال شعب السوداني .. وخلت الرباية علي الطرطور البشير .. القتل ابوهم وعرس امهم ..


#275997 [motaz]
0.00/5 (0 صوت)

01-16-2012 05:01 PM
تسلم يدك--اللهم دمر الكيزان فانهم اهانونا وشردونا وهدموا ترابط اهلنا الاجتماعى يااااارب-


#275847 [ودامدرمان]
0.00/5 (0 صوت)

01-16-2012 01:54 PM
اقتباس :
أنا شخصيا خصيمتك أمام الله يوم القيامة .. الله العادل القوي المنتقم الجبار.
والله لو قيلت هذه الكلمه لسيدنا عمر بن الخطاب لوقع من طوله وبكا الدهر كله


#275775 [أحمد]
0.00/5 (0 صوت)

01-16-2012 12:00 PM
صح لسانك أيتها الأبنة الكريمة والله ما قلت الا الحق لكن هذا الراقص أنسته الابهة ان

هنالك رب حرم الظلم على نفسه يراقب مايجري وهو يمهل ولا يهمل .

بالله عليك الانسان بعيش كم سنة؟


60 سنة قولي 100 آخرها أيه؟

كوم تراب وقبر مظلم و............................................................ الله يسترنا .


#275774 [ABO YOUSIF]
0.00/5 (0 صوت)

01-16-2012 11:57 AM
يا بت شرف الدين ما تحرقى اعصابك -- الناس ديل حدهم قريب و هم حاليا خلى بالك ورطانين لحدى اضنينهم عايزين يلبسوا جللابيتهم دى لاى زول بس الشعب السودانى طلع زكى و صبور و احترمه و اقدره على ذلك و ح نصبر شويه لحدى ما الراجل ده يستف شنطته و يمشى براهو لاهاى اسمعى كلامى ده انا اتمتى يستمر الشعب فى صبره و الله يصبره تاكدى كم شهر كده تسمعى الفتنه دبت داخل الحزب الحاكم و بفوح الشمار قريب انت عارفة اكتر منى نحن ما عايزين نسوى ليهم سبب عايزنهم يمشوا براهم حيث لا رجعة الى الابد لكل الكيزان و يحى الوطن الباقى بدون كيزان


#275760 [الجدى]
0.00/5 (0 صوت)

01-16-2012 11:42 AM
لك التحية والتقدير استاذة شريفة اقف عند كرامة المواطن السوداني والله كرامة السوداني مسحو بيها الارض وخاصة في الدول العربية والله شيئ لا يصدق وشخصيا تعرضت لموقف وضياع لحقى ويممت وجهي سفارة بلادي لمساعدتي في رد حقوقي قابلت القنصل وطرحت له المشكلة تدرى ماذا قال ;(نحن ما بنقدر نتدخل في الموضوع)
وهنالك من الامور ما يعجز اللسان عن طرحه هذا حالنا مع رئيس السجم وحكومة الرماد التي لاتتجراء الا علي شعبها الاعزل :
مع خالص ودى وتقديرى


#275745 [الرشيد عبد الرحمن]
0.00/5 (0 صوت)

01-16-2012 11:19 AM
بسم الله الرحمن الرحيم
لا فض الله فاك أختي الكريمة وأنا معك خصيماً له امام الله فقد أهلك الحرث والنسل ونخشى ان يكون قد انطبق علىه وزمرته قول الله تعالى (ومن الناس من يعجبك قوله في الحياة الدنيا ويشهد الله على ما في قلبه وهو ألد الخصام * وإذا تولى سعى في الأرض ليفسد فيها ويهلك الحرث والنسل والله لا يحب الفساد) الغريب أنهم يتحدثون عن الشريعة التي لا توجد الا في مخيلتهم ففي عهدهم انتشر الفساد بكل انواعه بشكل لم يسبق له مثيل ولا أكبر من قتل النفس التي حرم الله وقد ورد في الأثر (لزوال الدنيا أهون عند الله من قتل مسلم بغير وجه حق) فعاثوا في الناس قتلاً في كل مكان فكيف يردون على أسئلة عشرة الاف نفس مسلمة من أهل دارفور إذا سألوهم يوم القيامة لماذا قتلتمونا؟ هل سيكون ردهم لأنكم زرقة؟ فمن خلق الزرقة يا اهل البعث الحضاري ؟ في الحديث الذي يرويه ابوهريرة رضي الله عنه(قال رسول الله - صلى الله عليه وسلم : يخرج في آخر الزمان قوم يختلون الدنيا بالدين ، ويلبسون للناس مسوك الضأن من اللين ، ألسنتهم أحلى من السكر ، وقلوبهم قلوب الذئاب ، يقول الله عز وجل : أبي يغترون ؟ وعلي يجترئون ؟ فبي حلفت ، لأبعثن أولئك فتنة تدع الحليم فيها حيران . ) فهؤلاء القوم جاءوا للناس بشئ لا يستطيعون ردهم به وهو الدين ليبنوا القصور الفارهات والمزارع الفسيحة بالسحت ناسين انها لو دامت لهم فلن تدم طويلا وسرعان ما يمضي بهم العمر ولكن لن يحاسب نفسه بذا الا من كان له قلب وعقل وخشي الله فليسعدوا بها هنا قليلا وليشقوا بها في الاخرة كثيرا
وأشد من ذلك وأنكى أنهم لم يكتفوا بكل ذلك بل تعدوا ليفرقوا بين الناس فقسموهم لعرب وغير العرب كأنهم هم من نسل النبي صلى الله عليه وسلم فحقد الناس بعضهم على بعض وهذه فتنة نسأل الله أن يعافي منها الناس وان يأخذ هؤلاء أخذ عزيز مقتدر كما فعل باشياعهم من قبل في تونس ومصر وليبيا ويكفي السودان مآلات السوء.


#275724 [orass]
0.00/5 (0 صوت)

01-16-2012 11:01 AM
لو كنتي بتأذني في مالطا كان سمعوكي .. لكن هؤلاء لا يسمعون.

قال تعالى :
وَلَقَدْ ذَرَأْنَا لِجَهَنَّمَ كَثِيرًا مِنَ الْجِنِّ وَالإِنسِ لَهُمْ قُلُوبٌ لا يَفْقَهُونَ بِهَا وَلَهُمْ أَعْيُنٌ لا يُبْصِرُونَ بِهَا وَلَهُمْ آذَانٌ لا يَسْمَعُونَ بِهَا أُوْلَئِكَ كَالأَنْعَامِ بَلْ هُمْ أَضَلُّ أُوْلَئِكَ هُمُ الْغَافِلُونَ



#275700 [ابوعبدا]
5.00/5 (1 صوت)

01-16-2012 10:26 AM
قال صلى الله عليه وسلم ( من ولى من امر امتى شيئا فشق عليهم اللهم فاشقق عليه)


شريفة شرف الدين
شريفة شرف الدين

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة