ضنب الككو
01-21-2012 01:05 PM

بشفافية

«ضنب الككو»

حيدر المكاشفي

من ثراء وغناء أمثالنا الشعبية انها حتى ذيل القرد ألحقته بقاموسها، فإذا قال لك أحدهم «مسكوك ضنب الككو». فذلك يعني أن من جعلك تمسك ذيل القرد قد نجح في إلهائك بشئ لا فائدة فيه ولا تستطيع السيطرة عليه تماماً كما لا تستطيع أن تفلته من يدك وإنما ستظل هكذا ممسكاً به تدور مع «الككو» أينما دار. فتبقى «محلك سر» تمارس الدوران داخل حلقة دائرية، بدا لي أن هذا الحال، حال من أمسكوه «ضنب الككو» هو ما عليه حال البلاد والعباد الآن، ولكن قبل ان نحاول إثبات صحة هذه الفرضية دعوني أحكي لكم غلوتية هي بمثابة «ضنب الككو» تنسون معها تناول إفطاركم من شدة تلهيكم بها واستغراقكم في حلها، والغلوتية تقول ان ثلاثة أصدقاء دخلوا أحد المطاعم وتناولوا فيه وجبة العشاء وبعد أن فرغوا من الطعام نادوا على النادل وسألوه عن الحساب، قال لهم حسابكم ثلاثين جنيها، أخرج كل منهم «الشيرنق» عشرة جنيهات وذهبوا إلى الكاشير «المحاسب» ليدفعوا ثمن الوجبة، على طريقة التاجر الحاذق لاطفهم الكاشير ومازحهم حين أدرك انهم رواد جدد ثم قال لهم انه قد خصهم بخصم خمسة جنيهات وليدفعوا الخمسة وعشرين. شكروا الرجل واستلموا الجنيهات الخمسة المتبقية من مبلغ الثلاثين، اعطوا منها النادل جنيهين بقشيش، وتقاسموا الثلاثة الباقية بواقع جنيه لكل منهم، وعند بوابة الخروج من المطعم فجأة صاح أحدهم «دقيقة دقيقة يا جماعة»، وقفوا يستطلعون الخبر، قال «يا اخوانا كل واحد فينا طلع عشرة جنيهات وفي النهاية رجع ليهو جنيه، يعني كدا كل واحد مننا دفع تسعة جنيهات، طيب تلاتة في تسعة تساوي سبعة وعشرين واذا اضفنا ليها الاثنين جنيه الاديناها للنادل يصبح المجموع تسعة وعشرين ونحنا طلعنا تلاتين جنيه، اذن أين ذهب الجنيه المكمل للتلاتين جنيه التي اخرجناها، اين ذهب الجنيه، ويللا حلوا كلكم، انا شخصيا لا اعرف الحل، ما اعرفه فقط في هذه المسألة انكم ستمسكون «ضنب الككو» لا محالة..
الآن، البلاد والعباد مستغرقون في حكاية مذكرة ما مذكرة. وإصلاح وما إصلاح، وفتات فساد وما فساد، والآلية وما أدراك ما الآلية، و«عيال صغيرين بتعمل حاجات عجيبة وتجري»، ونسوان تزغرد ورجالة تقول الله أكبر، واربطوا الحزام، اربطوا الحزام، ثم فجأة «فكوا الحزام» «عوجة واحدة ما بتجيكم» ونضمي وورجقة في كل شئ وبلا شئ، مع أن أي شئ لا يحتاج لكل هذه الزيطة والزمبريطة، وانما فقط إلى قناعة فعلية أولا ثم إرادة وعزيمة لا يصح معها إلا الصحيح هذا هو المخرج الواضح والصريح وما عداه ما هو إلا «ضنب ككو» نخشى أن يتدافع الناس للإمساك به....

الصحافة


تعليقات 9 | إهداء 0 | زيارات 3293

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#279512 [joker]
0.00/5 (0 صوت)

01-22-2012 12:45 AM
ههههههههههه معظم المعلقين مسكوا في ضنب الككو وسابو القصد من الفزورة :D :D :D :D


#279346 [محمد احمد دافع الضرايب]
0.00/5 (0 صوت)

01-21-2012 07:35 PM
مقالك عميق يااستاذ. في التنك. على فكرة انت عارف الككو بنقبض كيف؟ اظنك فاهم هسه البحلنا شنو!


#279305 [سوزي]
0.00/5 (0 صوت)

01-21-2012 06:31 PM
الغلوتية ممكن تتحل لكن مشكلة السودان.............
حل الغلوتية
نعم كل واحد دفع 9 جنية وهي كالاتي
8.33 =كاشير
0.67 =نادل
المجموع =9
الجنيه الراجع لصاحبه=10
يعني 1 9 =10
10 *3 =30
ايه رايكم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بطريقة اسهل
يعني 9 جنيهات شاملة حق الكاشروالنادل
9*3=27
3جنيهات الراجعةلاصحابها =30
27 3 30
اظن فكينا ضنب الككو؟؟؟؟؟؟؟؟؟ عقبال مانفك........................


#279279 [مهاجر في بلاد الله]
0.00/5 (0 صوت)

01-21-2012 05:52 PM
يا المكاشفي براااك بتكوس للشبك , اصلا ما في سبب يخليك تحسب بالطريقة الغريبة دي !!!
قال شنو اي واحد دفع 9 و بعدين ؟ جيت خربتها باضافة الاتنين بتاعت الجرسون !!
استلفتهم من وين ديل ما هم اصلا من ضمن المدفوع ,اصلا الجماعة مفروض يحسبوا جملة المدفوع = 30 و جملة المصروف = 27 و بالتالي الباقي 3 اي جنيه لكل واحد


#279262 [ذول ساكت]
0.00/5 (0 صوت)

01-21-2012 05:31 PM
شوفوا ياخوانه الحكمة صحيحة وبتنطبق على ناس الحومة والاشاعات وفتاوى ائمة اخر الزمان طيب لكن نحن مابنمسك ضنب الكوكو يا مكاشفى اى ولو اديتك الاجابه للغلوتيه دى بكون فعلا ماسك الضنب غلوتيتيك دى مابتاخد زمن فينا لانو كل زول دفع 8 جنيه و300 قرش وفى قرش اتقسم بناتم شايف كيف وزايد2 البقشيش تمت ال30 يعنى الجنيه دافعنو هم كسور شان تعمل وتتم ال25 بيناتم

شايف كيف والضنب ده ماسكنو دراوبش جيلكم ماجيلنا قال كوكو قال شوف موضوع تانى


#279164 [شيخ تلب]
0.00/5 (0 صوت)

01-21-2012 03:06 PM
ههههههههههههههههههههههههههههههههههههه والله برافو عليك ودالمكاشفى طلعتنى من الدبرسة والقرف وحال البلد المائل

وانا بدورى بسأل هل الامام الحبيب ودالمهدى مسك علماء السلطان ضنب الككو بفتواة الاخير بجواز صلاة المرأة مع الرجل فى صف واحد وحضورها عقدان القران ؟
انا اعتقد ذلك وربما يكون راقد ليه فوق رأى ولابد ليهم بالدو


#279163 [زول ]
0.00/5 (0 صوت)

01-21-2012 03:03 PM

- والله أي من الالغاز المذكورة تسبب الصداع، غايتو الله كريم .


#279159 [Freud]
0.00/5 (0 صوت)

01-21-2012 02:56 PM
أول حاجة دا رأي سليم وان شاء الله كل الناس الماسكين ضنب الككو دة يفكّوهوا ويقتنعوا بالخدعة اللي هم عاشوها ويسمعوا كلامك الحكيم دة

ثانياً : السبعة وعشرين داخل فيها جنيهين الجرسون البقشيش وكل واحد من الثلاثة شايل جنيه تكملة الثلاثين ... أكيد بتهظر .. مش كدة ؟


#279124 [Izzeldin]
0.00/5 (0 صوت)

01-21-2012 02:17 PM
هنالك خطا حسابي متعمد وهو ان حاصل ضرب تلاتة في تسعة تساوي سبعة وعشرون وهي مجموع البقشيش و الحساب بتاع الكاشير يعني 25 2
و بالتالي لا يمكن ان نضيف البقشيش مرة اخري بل نضيف الثلاثة جنيهات المخصومة من التلاتين !!!


حيدر المكاشفي
حيدر المكاشفي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة