حكم وأمثال وتعليق
08-23-2010 01:24 PM

ساخر سبيل
حكم وأمثال وتعليق

الفاتح يوسف جبرا

* لا يَفُلُّ الحديد إلا الحديد ... المغالطنى يمشى شارع الخرطوم - مدنى
* المرء بأصغريه : قلبه ولسانه ... أهم شئ ما قالوهو ... و(جيبه) !!
* إذا حضر الماء بطل التيمم .. ده إذا (الموية) جات !
* الدراهم مراهم ... مراهم بس؟ دى مراهم .. ومضادات حيوية .. ودربات .. والأكسجين زاااتو.
* كل ما تشتهي والبس ما يشتهي الناس ... كدى أدونا (المراهم) وبعدين ناكل ما يشتهى الناس زااتم.
* إذا تخاصم اللصان ظهر المسروق ... فى الزمن ده 60 لص يتخاصموا المسروق ما يظهر.
* حبل الكذب قصير ... ده كان زمااان هسه بقى طويل جنس طول.
* حرامي بلا بَيِّنةٍ شريف ... إذن ما أكثر الشرفاء فى بلادى.
* إذا عُرِفَ السبب بطل العجب ... ناس الموية قالو ليكم المواد المنقية للمياة (قطعت) منهم عشان كده المويه عكرانة.
* اطلبوا العلم ولو في الصين ... ليه الصين البعيده دى؟ ده كان قبل ثورة التعليم العالى هسه تجيب 50% تقرأ طب ... هندسة .. ذرة .. الكلية البتعجبك.
* إذا تم العقل نقص الكلام ... وأقول المذيعين والمذيعات ديل نضامين كده ليه ؟
* لكل جَوَادٍ كَبْوَةٌ ... ولكل مسئول أكثر من ذلك ... وبعد داك (ترقية) كمان.
* لا يضيع حق وراءه مطالب ... هذا يعتمد على سرعة التقاضى وهل القاضى. نقلوهو وإلا قاعد ؟ والإستئناف ح يرجع من المحكمة الفوق بعد كم؟
* في التأني السلامة وفي العجلة الندامة ... شعار القائمين على أمر طريق الإنقاذ الغربى.
* إذا كان الكلام من فضة فالسكوت من ذهب ... شعار (نوام الشعب) فى البرلمانات منذ الإستقلال.
* عصفور في اليد خير من عشرة على الشجرة ... أعتقد أن المسألة تعتمد على نوع الشجرة.
لا يلدغ المؤمن من جحر مرتين ... إن لم يكن داخل الجحر شرطى مرور.
* الصديق وقت الضيق ... الأيام دى الصديق زاااتو متضايق.
ليس في مقدور المرء أن يخدم سيدين ... بالعربى كده ما ممكن الزول يكون مع السيدين ويكون (أنصارى) و (ختمى) فى أن واحد (لكن فى ناس بيعملوها).
* من كثر كلامه قل فعله ... المثل ده بالذات (قطعوهو) فى المسئولين.
* لا تضع كل البيض في سلة واحدة ... هو البيض وينو؟ الطبق بقى بالشئ الفلاني.
من كان بيته من زجاج لا يرشق الناس بالحجارة ... لو القزاز (مظلل) ممكن
* ما خاب من استشار ... مثل ما (شغال معانا) بدليل إنوعندنا 77 مستشار.
* الوقاية خير من العلاج ... طيب لمن الإتنين يكونوا مافيشين؟
* لا تبدل القادة في منتصف المعركة ... يعنى أبدلهم بعد المعركة ما تخلص؟
* كل لتعيش ولا تعش لتأكل ... جيبوا الأكل فى الأول وبعدين نتفاهم.
* الصانع الرديء يلقي اللوم على أدواته ... وناس الموية يلقون اللوم على (الطمى)
*لمن تشكو إذا كان خصمك القاضي!؟ ... الأمم المتحدة طبعن!
من تأنى نال ما تمنى ... ما طواااالى.
كسرة :
المصائب لا تأتى فرادى ... واحد عمل حادث ورخصتو منتهية والعربية ما مرخصة وقزازو مظلل ومبسوط (حبتين) والدنيا (رمضان) !

الصحافة


تعليقات 12 | إهداء 3 | زيارات 3924

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#18045 [abdu]
0.00/5 (0 صوت)

08-24-2010 12:29 PM
مستوره ياجماعة الخير من الوطنى ولا الشعبى


#18035 [safaragafa]
0.00/5 (0 صوت)

08-24-2010 11:55 AM
الجاتك في مالك سامحتك..... ( الله يستر علي الشعب السوداني)


#17994 [ود التوم ]
0.00/5 (0 صوت)

08-24-2010 09:27 AM
وانا بقول ليك المثل // اذا قلبك سد ها وسع قدها //ودا الحاصل للحكومة مع تقرير المصير


#17973 [ابو هاشم ]
0.00/5 (0 صوت)

08-24-2010 12:55 AM
المصيبة ياجبراء التعليم الواطي بعد عشرة سنوات مافي زول بيطلع منو فاهم حاجة عشان كدة احسن الناس تخاي القراية البقت (ابة دق) وليس ام دق ولارايك شنو احسن نخليهاء بعدين دايرين فيها (استفتاء)؟


#17918 [زول]
0.00/5 (0 صوت)

08-23-2010 07:08 PM
انت قاصد ياتو شجرة شجرة ماحى بك ام المؤتمر الوطنى وياتو عصفور ودابرق ام البشير


#17915 [سودانية]
0.00/5 (0 صوت)

08-23-2010 07:00 PM
ياتو شجرة شجرة ماحى بك ام شجرة البشير والعصفور ده ياتو انت قاصد ودابرق ام البشير


#17914 [حامدابوعبدالمجيد]
0.00/5 (0 صوت)

08-23-2010 07:00 PM
المعتق جبرا سقيت من الكوثر ورمضان كريم

اوعه من ملوك الريحه ودهن العود وماتتدخل يدك في الجحور ساكت بيطلع ليك منها جني فى شكل شرطئ مرور



#17911 [المهندس]
0.00/5 (0 صوت)

08-23-2010 06:46 PM
انا عامل حادث والرخصة مافي والعربية ما مرخصة والدنيا رمضان والقزاز مكسور ومبسوط حبة ونص


#17876 [ابو محمد 2]
0.00/5 (0 صوت)

08-23-2010 04:10 PM
الاخ جبرا.تحياتى. لكن الاخ البعد الكسرة دا وقع وقعة سودة في يد البوليس.(؟) (؟) (؟)


#17857 [samir ali almadani]
0.00/5 (0 صوت)

08-23-2010 03:11 PM
ياود جبرا

(( المصائب لا تأتى فرادى ... واحد عمل حادث ورخصتو منتهية والعربية ما مرخصة وقزازو مظلل ومبسوط (حبتين) والدنيا (رمضان) !))

ومركب معاهو واحدة ماعلى عصمته - دىبراها مجموعة مشاكل;)


#17853 [طارق الطاهر]
0.00/5 (0 صوت)

08-23-2010 02:56 PM
أستاذي الفاتح
نشكرك جزيلا على كمية التنفيس التي تعطيها لهذا الشعب الفضل
لكن ألفت نظرك إلى شيء مهم وهو ضرورة التحقق مما تورده
مما أوردت في مقالك اعلاه\"لا يلدغ المؤمن من جحر مرتين\" هذا يا أخي حديث شريف صحيح، فلا ينبغي الاستدراك على قول رسولنا الكريم الذي لا ينطق عن الهوى.
تحياتي لك مجددا


#17833 [كتكوت]
0.00/5 (0 صوت)

08-23-2010 02:02 PM
انا تخاصم اللصان ظهر المسروق

طيب ما هو الحكومة كلها فى حالة خصومة وما ظهرت حاجة !!!!

الافضل يكون اذا انفصل اللصان ظهر المسروق

كسرة :

احتمال تظهر بعد الانفصال !!!


ردود على كتكوت
Sudan [wahid] 08-23-2010 10:22 PM
ديل خالنها مستوووورة .


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة