المقالات
السياسة
ارشيف مقالات سياسية
حاج بله و زعيم قبيلة المحاميد (عرس السرور)
حاج بله و زعيم قبيلة المحاميد (عرس السرور)
01-31-2012 08:48 AM


حاج بله و زعيم قبيلة المحاميد (عرس السرور)

طارق حامد خليفة
[email protected]

طال غياب حاج بله عن مكانه المعهود وجلوسه يوميا امام منزله وفقده جميع اهل الحي وخاصة عمران فهو بالنسبة له رفيق درب ومصدر بهجة له بحوارته الدمها خفيف ولما طال غياب حاج بله قرر عمران الذهاب الى حاج بله والسؤال عنه ولمعرفة سرغيابه طول هذه المدة .
ذهب عمران لمنزل حاج بله وطرق الباب فتحت حاجة السرة الباب
حاجة السرة: حبابك يا عمران .
عمران: السلام عليكم اخبارك يا حاجة ان شاء تمام .
حاجة السرة : (بصوت منخفض) تمام وين يا عمران مع صاحبك الدخل في حالة نفسية قربنا نوديه مستشفي التجاني الماحي .
(يضحك عمران من طريقة كلام حاجة السرة خوفاً من يسمعها حاج بله فلا تسلم من لسانه الطويل)
عمران : كيفن الكلام ده مالوه الوصلوه للحالة دي شنو ؟ وسببه شنو ؟
يسمع حاج بله صوت عمران وينادي على حاجة السرة
حاج بله : انت يا خرابة قاعدة تطنطن كده بتقول في شنو ؟ و موجه كلامه لعمران وانت وين لك زمن ما قاعد تجئ يا رويتر ؟
عمران : هههههه تقولي شنو يا حاجة السرة والله زولك ده بودينا نحن كلنا محل قلت ده وهو ما بحصل ليه اي حاجة .
حاجة السرة : هوي يا عمران امشي لصاحبك ده ساي ولا ما بنخلص من لسانه الطويل ده .
حاج بله : انتي لسع قاعدة تطنطني يلا امشي سوي لينا قهوة وبطل الحنك ..
عمران : السلام عليكم ورحمة الله وبركاته
حاج بله : وعليكم السلام الليلة القش ليك الدرب منو ؟
عمران : شنو يا عمك خير وسيلة للدفاع الهجوم !!!
حاج بله : اها يا مورينيو !!!
عمران : ههههههههه كمان بتعرف السبيشل ون .
حاج بله : كان جبت ليك الامية الجوه دي بتقول ليك اسمه لقايت جده السابع عشر !!!
عمران : منكم خوف ...
حاج بله : تخاف من خيالك ان شاء الله .
عمران : يا اخي ما تخفف لسانك ده مننا شوية . ان جائي اسال عنك وعن الغيبة الطويلة وانت تنتف في ريشنا !!!!
حاج بله : خلاص خليتك ..
عمران : كدي ما تاخدني في دوكة وكلمني الحاصل شنو ومالك معتكف في البيت ؟
حاج بله : والله يا عمران اخوك قرب يبقي جنانيتر ..
عمران : ههههههه يعني كلام حاجة السرة طلع جدّ ...
حاج بله : قالت شنو السجم دي ؟
عمران : خليك منها وقول لي الحاصل ليك شنو ؟
حاج بله : يازول باريت ليك الجزيرة والعربية قربت اركب التونسية ...
عمران : ههههههههه ليه الحاصل شنو؟
حاج بله : كانوا ظريفين زنقة زنقة والواحد قاعد متين القذافي يجئ يلقي ليه خطاب عشان يضحك وفجاءة الفلم الكوميدي اتقلب لاكشن ضرب وقتل ودم وموت مناظر فظيعة.
عمران : والله كلامك صاح فجاءة الاحداث تغييرات بطريقة غريبة
حاج بله : غريبة وبس ونهاية الفلم ما كانت حلوة خالص والله ياعمران روح الانسان بقت رخيصة بشكل .
عمران : للاسف ده حتى الان بحصل في اليمن وفي سوريا ونفس السيناريو بطبق في سوريا ربك يستر علينا بس.
حاج بله : يا زول ولا يمن ولا سوريا تاني زاتو البقعد يشوف الحاجات دي منو احسن الواحد يرجع للمسلسلات التركية و يشوف ناس لميس و فتون ...
عمران : هههههههه والله احسن ليك يا عمك نحن ما بنقدر على قصة النفسيات دي
حاج بله : نفسيات في عينك انت و الحاقدة الجوه ديه ، كدي خلينا من الكلام ده وقول لينا اخبار الدنيا شنو ؟
عمران : ادريس ديبي !!!
حاج بله : مالو سجلوه في القمة يا زول هوي مش قلنا ما عايزين كلام في الخرابة السياسية دي مش ده رئيس تشاد؟
عمران : انا ما بتكلم عن الرئيس بتكلم عن العريس !!!
حاج بله : اسع المفروض يمشي التجاني الماحي منو ؟
عمران : ههههههههه يا زول ما تروق عشان افسر ليك.
حاج بله : اها فسر يا بروفسير الطيب عبدالله .
عمران : كمان عملتني مرحوم الله يرحمنا دنيا واخرة
حاج بله :مالك يا زول بقيت زي الشحاتين كدي قول ادريس ديبي مالو وعريس دي شنو؟
عمران : الرجل داير يعرس !!!
حاج بله : طيب ما يعرس ونحن مالنا ومالو !!!
عمران : مالك ونص الراجل ح يبقي نسيبكم .
حاج بله : كيف يعني الكلام ده !!! جاي يشيل الخرابة الجوى دي ويريحني .
عمران : ههههههههه والله انت دودتك دي كان ما دخلتها في اي موضوع ما بترتاح .
حاج بله : ياها شبه الدوود .
عمران : ههههه يا اخي حرام عليك ياخي المراة دي ما ترحمها شوية من لسانك الطويل ده .
حاج بله : لسانك ولسانها ان شاء الله بالقطع .
عمران : غايتو انت ما بتقدر .
حاج بله : كدي خليك من قُدرتي وقول لي ادريس ديبي عايز يبقي نسيبنا كيف ؟
عمران : بتعرف موسى هلال؟
حاج بله : كيفين ما بعرفه ده مش زعيم الجنجويد ؟
عمران : عليك نور بس ياهو زاتوه هو متهم بانه مزعم الجنجويد.
حاج بله : طيب مالوه ده وعلاقة شنو بادريس دبي ؟
عمران : يا سيدي الرئيس ادريس دبي هو العريس وموسي هلال هو ابو العروسة .
حاج بله : يا زول شنو الكلام ده ؟ شن لمّة فلان مع فلانة ؟
عمران : إدريس دبي طلب بنت موسى هلال على سنة الله ورسوله
حاج بله : سنة الله ورسوله ما عنده عليها اعتراض بس نحن بنسال شّن لمّه الشامي مع المغربي ؟
عمران : 26 مليون دولار !!!
حاج بلة : الكترابة طيارة وله شنو؟
عمران : والله زي ما بقول ليك المهر 26 مليون دولار
حاج بله : هيييييييع والله ديل الرجال كدي اصبر لي اقعد ليك كويس وقعيد لي الكلام بشويش .
عمران : مهر العروسة 26 مليون والعرس كان في افخم فندق في الخرطوم السلام روتانا .
حاج بله : لكن ياعمران رئيس تشاد ده عمر كبير هو ما ازوج لحدي الان ؟
عمران : 13 !!!
حاج بله : والله فحل 13 دي شنو هو ما مسلم ؟
عمران مسلم على ذمته الان 3 وعروستنا رقم 4 !!!
حاج بله : يعني الراجل كل ما تعُجب واحدة بزوجها وبطلق واحدة يعني الراجل طالع مأكل نازل ما مأكل ليك الله يا حاج بله عايش بفرامالة .
عمران : ههههههههههه يا اخي انت رئيس دولة ؟
حاج بله : لو ما الظروف الصعبة ما كان الواحد بقي رئيس دولة يعني هو القروش البعرس بيها دي وراثه من ابوه ؟
عمران : اها قمنا نلخبط !!!
حاج بله : خلاص قمت ترجف زي قالب الجلي يا جبان ...
عمران : يا حاج لو سمحت خلينا في موضوعنا وخليني احكي حكاية العرس الحدث .
حاج بله : طيب كمل في حدث اكثر من القلت ده ؟
عمران : الزواج زي ما قلت ليك في فندق السلام روتانا واحيط باجراءات امنية غير مسبوقة وانتشرت حوله منذ الصباح الباكر فرق امنية بلباس مدنى كما جرى تامين المكان بافراد من الشرطة العسكرية يزيد عددهم عن المائة وعشرات الكلاب البوليسية

حاج بله : عرس بكلاب بوليسية ده ما سمعنا بيه ده عرس ولا مسلسل في ام بي سي أكشن .
عمران : ههههه اكمل ليك ترتيبات العرس وتواجدت فى داخل الفندق فرق امنية محترفة لحراسة البهو الداخلي.
ومنع نزلاء الفندق الفخيم من الاقتراب من منطقة \"حوض السباحة\" التى شهدت مراسم الحفل بعد انتهاء عقد القران الذى كان فيه الرئيس عمر البشير وكيلا عن العروس بينما اوكل ديبى شخصا من عائلته يدعى عبدالله بانقى ، وكان لافتا تولى احد شيوخ الطريقة التجانية من الجزائر مراسم إتمام عقد القران.
وتأخر الزواج الذي تم التحضير له بسرية تامة عن الموعد المحدد له في العاشر من الشهر الجاري بسبب سفر الرئيس عمر البشير إلى خارج البلاد وارتباط الرئيس التشادي بأحد المؤتمرات التي عقدت مؤخراً.
حاج بله : ارايتوه ده عرسي ان شاء الله
عمران : ههههه وتردد ان الفندق حجز للعروسين جناحا خاصة فى الطابق الرابع ويحوى غرفة نوم فاخرة ملحقة بحمام صمم من الرخام الأبيض وغرفة للملابس, فضلاً عن صالون فخم ووثير يتسع لأكثر من (30) شخصاً، إضافة إلى طاولة طعام تضم (8) كراسي قاعدتها من الخشب وسطحها من الرخام، ومطبخ يحتوي كل الأساسيات، إضافة إلى حمام خارجي يرتبط بصالة الضيوف ومخرج للطوارئ ...... كما ان الجناح مرفق بغرف أمامية للحراسة ويطل مباشرة على حوض السباحة بالفندق وتم حجز (30) غرفة ملاصقة له.
حاج بله : عظمة والله .
عمران : واقتصر حضور المراسم على (400) شخص من كبار الشخصيات دخلوا موقع الاحتفال في الحديقة الشمالية الشرقية للفندق ....حيث انتشر مجموعة من افراد الأمن والكلاب البوليسية ، وظهر المطربان الشابان احمد الصادق وشكرالله عز الدين للغناء فى الحفل بينما وصلت المطربة انصاف مدنى الى الفندق وصدحت باغنية نظمت كلماتها خصيصا للرئيس ديبى ووالد العروس موسى هلال.
حاج بله : انصاف مدني دي مش العنده مشكلة مع طه سليمان في اغنية السمح ولدي .
عمران : والله لقيتك مواكب اها يا سيدي قالوا وكانت تقارير صحفية ذكرت أن ديبي دفع مهراً قدره (26) مليون دولار لكريمة هلال، بواقع 25 مليون دولار لوالد العروس، ومليون دولار للعروس في صورة ذهب ومجوهرات ثمينة ومقتنيات أخرى للعروس إلا أن ذلك لم يؤكد من أي من الطرفين.
حاج بله : هيييييييييع العرس كدي يا بلاش لكن يا عمران 25 مليون لابو العروسة ده ما بيع عديل !!!
عمران : حترد ليك العروسة براها على الكلام ده .
حاج بله : قالت شنو ؟
عمران : العروسة قالت : لم يجبرني أحد على هذه الزيجة، فلسنا في العصر الحجري ..أنا فتاة جامعية ومتعلمة وواعية وأعلم جيداً ما يدور حولي ..قالوا أجبروني ، وقالوا إني حاولت الانتحار ، وقالوا وقالوا وقالوا ولسه هيقولوا \".
وعن تفاصيل لقائها الأول بالرئيس التشادي، قالت : \"زارنا الرئيس ديبي في منزل والدي وجلست معه برفقة والدتي وتحدثت إليه بعدها استخرت الله مرة أخرى حتى أبلغت والدي بالموافقة ولا أظن أن والدي بحاجة لأموال لكي يقوم ببيعي كما يقولون.\"
وأضافت \"فأنا لست سلعة لأباع وأشترى بل إنسانة واعية بالقدر الذي يجعلني أفهم أبعاداً كثيرة عن عادات وتقاليد أهلي والمصاهرة والتداخل بين القبائل ونبذ القبلية والتواصل والامتداد كما أنه زواج على سنة الله ورسوله وليس صفقة يفترض أن يتربح منها أحد من الأطراف كما يقولون من لا يعقلون ويتدخلون في شؤوننا الخاصة \".
حاج بله : البت نضامه جنس نضمي لازام تقول كده الموضوع ما فيه 26 مليون دولار هو زاتو العريس دقي فيها حجر دغش ما مال المساكين العايشين اسوء ظروف معيشية .
عمران : يازول ما تبطل الحركات دي .
حاج بله : انت خائف من شنو ؟ انا بتكلم عن رئيس دولة تانية !!!
عمران : انت عارف وكيل العروس كان منو؟
حاج بله : طبعا ابوها !!!
عمران وكيل العروس كان السيد الرئيس بجلالة قدره !!!
حاج بله : لا يا خي !
عمران : ههههه اها نبقي لكده وكمان معاه وزير الدفاع ومدير جهاز الأمن والمخابرات السودانية
حاج بله : سمحة العظمة بت السرور دي العرسها بحضروه الجماعة ديل وتغني فيه انصاف مدني وتقطع ليها اغنية مخصوصة لادريس دبي .
عمران : وما شفته كمان المازون مستورد !!!
حاج بله : يا راجل معقولة ؟
عمران : يا سيدي المازون جابوه من الجزائر فهو احد شيوخ الطريقة التجانية .
حاج بله : ماذون حلتنا المسكين ده راكب ليه عجلة لليلة ما كان يجيبو ويقطع فيه 10 الف دولار كان فصل ليه 10 جلايب وعباتين واشتر ليه اكسنت كده يمشي بيها حالوه ..
عمران : ههههههههه يا زول زولك ابو عجلة ده يدخل السلام روتانا يجيوه كلسترول ...
حاج بله : يا اخي ده عصاية تسعيف تقول لي كليسترول !!!
كدي نسالك يا عمران البت بستاهل كل الكلام ده ؟
عمران : دي صورته في الجريدة شوفها ...
حاج بله : بلالالالالالالالا لكن ما زولك ليه حق يكبو الدولارات كده .
عمران : ههههههههه السلام عليكم ورحمة الله وبركاته
حاج بله : شنو يا رويتر ما بدري .
عمران : خلاص تاني شوف واحد يجئ يؤنسك ...
حاج بله : انت زعلت يا دكتور ؟
عمران : هههههههه السلام عليكم
حاج بله : وعليك السلام و رحمة الله وبركاته .


تعليقات 3 | إهداء 0 | زيارات 1968

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#285583 [طرنقاش]
0.00/5 (0 صوت)

01-31-2012 06:47 PM
صدقنى انت راجل فنان ياطارق ... مافى اخراج أحلى من كده


#285307 [محمد احمد فضل]
0.00/5 (0 صوت)

01-31-2012 11:55 AM
ظريف ياهذا !


#285283 [واحد كان معاهم]
0.00/5 (0 صوت)

01-31-2012 11:25 AM





ما كان يعرسا واحد من الحاضرين من بلدنا ويكون زيتنا في بيتناهههههههههههههههه.


طارق حامد خليفة
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة