أنا والكاشف اخوي
02-08-2012 11:24 PM

أنا والكاشف اخوي

أسماء الجنيد
[email protected]

سلام للجميع واريتكم طيبين ,,,

أنا والكاشف اخوي
ـــــــــــــــــــــــــــــــــــ

المثل السوداني المعبر ده إنطبق عليهم تماما
حين قال شيخهم الترابي \"لو البشير ترك الحكم بى اخوي وأخوك كما نصحته عن طريق احد أفراد أسرته سوف نعفو عنه أنا والشعب !!!!!!\"
والله يا أخواني حقارة وعينها حمراء وشرارة ,,,,,,,
كدي النسأل شيخنا فى الأول .. إنت بتطالب الريس يترك الحكم لأنو البلد خربت في زمانو وإلا عشان اتخلى عنك؟

الإجابة على سؤالي في الحالة التانية أظنها واضحة ومعروفة ، لكن في الحالة الأولى انت ما كنت شريك ليهو في الحصل لما كنت في السلطة!!!

ـ البلاوى ما حلت بالبلد إلا بسبب مشروعك الحضاري الاسلامى العاوز تمدو لحدى شمال إفريقيا ، وبيه جريت لينا عداوات مع الجيران نحن فى غنى عنها لحدى ما طلعونا ارهابيين وبقينا منبوذين من كل دول العالم وجوازنا الاخدر بقى وصمة في جبين السوداني...

ـ الأطفال اتيتمو والنسوان اترملوا بسبب حربك الجهادية في الجنوب ضد مواطنين سودانيين ليهم حق العيش زى ما ليك الحق ،، وقمت تضاري سوءات الحرب دى ابتدعت عرس الشهيد بى كل مافيهو من خزعبلات لتكسب بيهو قلوب امهات نياتهم زى بياض اللبن اتفتفتت على موت أبناءها فى الحرب الفاهمين أنها ضد كفار قريش ...

ـ منو الحلل فرض الزكاة إجباريا على مواطن ما بفضل من مرتبو قرش فى آخر الشهر ،، كأن التشريع الاسلامى فى القرآن والسنة الخاص بموضوع الزكاة دا ما سمعنا بيهو ولا بنعرفو

ـ منو الفرض الاوتاوات والضرائب والجزاءات على المواطن الغلبان الفارش يسترزق في سوق الله اكبر لحدي ما بقى على باب الله

نحن يا شيخنا معروفين أطيب شعب واكتر شعب مسامح في الدنيا والدليل كل رؤساء الحكومات السابقين الشالهم الشعب من الكرسي عاشوا معززين مكرمين ولا فى زول سألهم عشان كدا البجى كلو بياكل ويقُش في طرف الشعب ،،،

ولكن ... زى ما بقولوا احذر غضب الحليم !!! إذا انت بتعفو عن الريس فأنت حر إتكلم بلسانك وعبر عن نفسك بس، أما الشعب فعندو لسان حينطق لما تجى اللحظة المناسبة,,, الله من فوق يجيبها وينتصر الحق على الباطل
يمهل ولا يهمل

متاوقة :
ــــــــــــــــ
قالوا رئيس جزر المالديف محمد ناشيد استقال من منصبه يوم الثلاثاء الفاتت ، بعد أسابيع من احتجاجات المعارضة ، وقال في بيان مقتضب في تلفزيون المالديف : \"استقلت لأنني لست الشخص الذي يرغب في الحكم باستخدام القوة\". وأوضح انه اختار الاستقالة لأن البقاء في السلطة سيتطلّب منه استخدام القوة وهو ما سيشكل خطراً على البلاد\".
النبي فيكم شوفوا نوع الحكام والرؤساء , نوع ديل نلقاهم وين ؟؟؟
ودعتكم الله


تعليقات 8 | إهداء 2 | زيارات 2652

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#292477 [حتو]
0.00/5 (0 صوت)

02-10-2012 06:43 PM
الاخت اسماء الجنيد والمعلقين اريد ان انبهكم انا واخوي الكاشف هذا ليس مثلا سودانيا ارجو انت تبحثي عن المناسبة التي قيل من اجلها اذا كان مثل او القصة.


#292050 [ABO YOUSIF]
0.00/5 (0 صوت)

02-09-2012 09:44 PM
حبابك بت الجنيد ما تطولى الغيبه
موضوعك ده نقطة فى بحر من العملو الترابى كدى شوفى لينا البحصل شنو لاحمد هارون انا خايف الجماعة ديل باعوهوا هناك فى تلودى و بعدين الزول صحى كده ليه ساب كادوقلى ؟ ومشى تلودى ده مش سؤال محير


#291804 [حسان]
0.00/5 (0 صوت)

02-09-2012 02:26 PM
يا جماعة الخير الشغلانه كلها ما بدت بكضبة علينا كلنا ( أذهب الى القصر رئيسا وساذهب الى السجن حبيسا) فما حكو تهتموا كتيرا بتصريحات شيخهم . الشعب الان واعى وفاهم كويس بس زى مابيقولوا اخواتنا المصرين ( متنح شوية) . والله معانا .


#291712 [Zingar]
0.00/5 (0 صوت)

02-09-2012 12:32 PM
سيبك من حديث الونسه وافيدينا فى المساحه التى تركت لك.

يا محمد حدد لينا اولا ماهو المفيد أللى عايزها تكتب عنه..ولا يعنى عايزها تدخل جوه راسك وتطلع لينا منه المفيد....ياأخى ليه ما تختصر لينا السكه وتوضح إنت بنفسك المفيد بدل تعليق المشاطات بتاعك ده أللى لايبرح مكانه.
أين التطاول على الله فى هذا المقال يا هشام بن عبدالملك...وكمان عايز الناس تصبر عليهم لأنها إرادة الله ياإختشى من نفسك.


#291636 [محمد]
0.00/5 (0 صوت)

02-09-2012 11:17 AM
ونسة مشاط لا تحتوى على المفيد فالترابى يسامح كما يحلو له وانت اغضبى كما يحلو لك والشعب الذى تتحدثون عنه لازال متيقنا بانه الان افضل مما كان وما سيكون اذا كان الحكم الذى تتحدثون عنه هو الحل .
واذا انتم منتظرين اراده الله فلماذا التطاول على الله وهو الذى مكنهم من الحكم فاصبروا حتى يزيل الله ملكهم لانه لا يزول الا بارادته هو تبارك وتعالى .
سيبك من حديث الونسه وافيدينا فى المساحه التى تركت لك .


#291581 [محمد صالح العميد]
0.00/5 (0 صوت)

02-09-2012 10:11 AM
استعطاف واستطلاف الرفقاء. ويا رفيق ما تخاف من الجنائية نحن نحميك ونسامحك لما تترك الحكم بدون مشاكل. وطبعا يا بت الجنيد اليومين دي الناس لها إتصالات بأمريكا من أجل أن تكتمل الدائرة الأخوانية في الوطن العربي.
من المعروف أن حكومة البشير لا تمثل الأخوان في السودان لذلك الرئيس بقي زي التور الهائج عايز يولعها مع الجنوب ومرة يهدد عن طريق ابو حرقوص ضار علي ضار بأنهم يعلمون عن إتصالات المعارضة بالجهات الخارجية.
لذا كانت المبادرة من الشيخ بأنهم لا يتخلون عنه إذا تخلى عن تهوره وترك السلطة واتخارج. وربما مثل هذه الضمانات أعطاه الشيخ من تحت تحت أو مغطغطة لبعض النافذين في الحكم من أمثال على طه ومصطفي عثمان.
أختي بت الجنيد لا تنسي المذكرات من الجيش والمذكرات من أعضاء الحركة الإسلامية كل هذه المذكرات هي إعداد للجاي بعد دنت المركب للغرق. بس الناس تكون مفتحة عيونها تمام حتى لا تقع في المحظور للمرة الثانية.
أشكرك عزيزتي على المقال يجب الناس أن تنتبه الوضع خطير ليس مجرد كلام عفو أبدا هناك طبخة كبيرة ليستعدلوا في الجلسة وعلى ظهورنا سنين عددا. لكن لن نركن لهم للمرة الثانية.


#291385 [اسامه التكينة]
0.00/5 (0 صوت)

02-08-2012 11:36 PM
يا بت الجنيد خلي الحساده بتاعتك دي الترابي لما يسامح البشير معناها البشير نال صكوك غفران والترابي ح يشوفو في وؤية منامية مع الحور العين.
نحن شعب جبان ما طيب ولا حاجه عشان كده ربنا سلط علينا الكيزان وقالوا . . . . . . . تقع في عدوك


#291383 [ali]
0.00/5 (0 صوت)

02-08-2012 11:33 PM
تانى ما تطولى مشتاقين لكتاباتك


ردود على ali
Saudi Arabia [عبدالعزيز just ] 02-09-2012 05:19 AM
والله كتابتك جد شيقة وشجاعة وكلامك البتقوليهو في ناس كتتتتير في سرهم ما بقدروا يقولوا


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة