المقالات
السياسة
ارشيف مقالات سياسية
رسالة للسيد رئيس الجمهورية (بالدارجي المُريح)اا
رسالة للسيد رئيس الجمهورية (بالدارجي المُريح)اا
02-12-2012 07:56 PM

مداد الذاكرة

رسالة للسيد رئيس الجمهورية (بالدارجي المُريح)

طارق عبد الرحيم (قولي)
[email protected]

السيد الرئيس ..

إذا جاءك كتابي هذا فأعلم أنني مواطن سوداني أو قول باقي مواطن لأنو معظم السودانين بقو باقي مواطنين .. والدليل بسيط لحدي وكت قريب كنا بناكل تلاتة وجبات (فطور ،غدا ،عشا) وكان الواحد بعد العشا بيشرب لبن .. هسي أصبحوا وجبتين فطور (أكيد فتة فول) و عشا (فول أو ملاح ليهو أسبوع )
يا ريس بس من حتة (كلكم راع وكلكم مسؤل عن رعيته) لو قمت من الصباح كدة وإتلثمت شلت قفتك ودخلت السوق وعليك أمان الله أول حاجة أسأل من أسعار اللحم والطماطم حتلقى كيلو اللحمة بى عشرين جنية وتلاتة حبات طماطم بى تلاتة جنيه يعني الطماطمة بى جنيه وكتها بس حتعرف ليه صواني الأكل ماسكا جفاف من حيث السلطة (بفتح السين).
يوم إفتتاح كبري الحلفايا الحتانة ياريس الناس هللت وكبرت .. لكن كان في راجل عجوز كدة واقف عاين للكبري وعاين ليك كدااااااااااااا .. وقال : أها الكبري إتعمل نان نقطعوا كداري؟؟ .. وعمنا الكبير دا حق المواصلات ما أظن عندو ولو قطع الكبري دا حيتوفى لأنو نفسو حيكون قطع ..
و الله بنشهد ليك بى ثورة الكباري .. بس في حاجتين محيراتننا شديد .. الحاجة الأولى نفق عفراء الغرق في موية المطرة .. وشارع برمودا .. أقصد شارع مدني البقى زي مثلث برمودا .. ياريت تلحقوا الشارع دا قبل ما يكمل ليكم الناس ..
ياريس أنا عارف مشغولياتك كبيرة بمتطلبات الجمهورية التانية و سلام دارفور .. لكن نحن همومنا الكبيرة كمواطنين هي البكتب فيها دي .. أكل عيش ، تعليم ، صحة .. وبى مناسبة الصحة دي ياريس في واحد من خطاباتك دعيت للعمل على الحد من العلاج بالخارج والدعوة للعلاج داخل أرض الوطن .. دا كلام سمح .. لكن ياريس في ناس غالبا تتعالج داخل السودان تقابل أخصائي بالشيئ الفلاني ولو مشيت مستشفى حكومي تدخل بى مرض واحد بتطلع بى تلاتة أمراض المرض الدخلتا بيهو أصلاً و مرض تاني بالإضافة للمرض النفسي البيصيب المريض بسبب المعاملة الماكويسة في المستشفى وعدم النظافة ..ياريس عندنا صديقنا والدو كان مرقدنو في مستشفى الذرة تعرف قبل كل جرعة كيماوي بياخدو مبلغ قروش كأمنية وبعد دا كلو حالتو أصبحت أسوأ من أول وسفروهو القاهرة وهناك إكتشفو إنو أدوهو جرعات ذايدة بنسبة تسعين في المية .. دا شكل المستشفيات بتاعتنا .
عندي كلام كتيييير .. لكن داير أحكي ليك عن حجة خديجة أيوة حجة خديجة دي مرة بى أرجل زول في البلد دي وهي ولية كبيرة ست شاي ما بعيدة منك فركة رجل من مكتبك بتاع القصر الجمهوري ..بتقعد جنب دكاكين الفلكلور بتقاطع القصر مع شارع الجمهورية .. حجة خديجة ربعت أولادها من بيع الشاي .. و واحد من اولادها عرس قريب .. ياريس حجة خديجة دي تمشي تشرب عندها شاي داير تدفع قروش تدفع ولوما عندك تشرب وما بتسألك .. ولو معاك كم زول ضيوف.. بتجيك براااها تجيب الشاي و تقوليك : أنا عازماك الشاي دا إنت و أصحابك .. تعرف يا ريس حجة خديجة دي تستحق يختو صورتها في الجنيه البيندفع لى كباية الشاي ..

التوقيع:طارق عبدالرحيم
مواطن سوداني
هذا المقال هو بداية لمشروع كتابة بالدارجي بعنوان:
ألف رسالة ورسالة للسيد الرئيس
وستكون كل الرسائل الألف و واحد رسالة (بالدارجي) .. الهدف منها مس أوجاع السودا الأعظم من أهلنا في خلال سعيهم وراء لقمة العيش .. وإيصال أصواتهم التي أصبحت لاتغادر حناجرهم المُصابة بالجفاف.

صحيفة الجريدة

https://www.facebook.com/pages/%D9%85%D9%90%D8%AF%D8%A7%D8%AF-%D8%A7%D9%84%D8%B0%D8%A7%D9%83%D8%B1%D8%A9/166259040058574


تعليقات 10 | إهداء 1 | زيارات 4234

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#295123 [محمد حجازى عبد اللطيف ]
1.00/5 (1 صوت)

02-14-2012 02:05 PM
ابننا طارق ---لك الود
من المؤكد سوف تصل رسالتك لكن عن طريق الاجهزه المختصه او كما قال السيد المشير البشير الرئيس فى لقائه التلفزيونى الاخير ---ولكن كلام العقل يسمعه العقل والعقل لدى العقلاء ---فهل الجماعه من العقلاء --يا طارق ----دمت ذخرا للوطن


ردود على محمد حجازى عبد اللطيف
Sudan [طارق عبدالرحيم] 02-25-2012 12:35 PM
الوالد الحبيب محمد حجازي

لنكن جميعاً في صف و احد لصالح هذا الوطن


#294934 [Iالقبطان]
1.00/5 (1 صوت)

02-14-2012 10:31 AM
دعوه الي اصلاح النفس و الذات ولا تعيبوا الزمان وولاه بل العيب فينا وكما تكونوا يولي عليكم ...
* استغلال الوظيفه والموقع
* الرشوه
* اكل مال الغير
* حرمه المال العام
* الخلاص/الموده/التكافل/التراحم/المحسوبيه/الرياء/الكذب
* استفلال الغير/الضعيف/المظلوم
* استغلال النساء/الاطفال/الفتيات
* الوطنيه / حب الوطن / التفاني / الخلاص / الوفاء
* الامانه / الرفق
* التدين / الالتزام
* عدم نصره اخوانا و اخواتنا / الزنا / زنا المحارم
* علي كل واحد منا ان يكون امين اولا مع نفسه واين موقعه مما تقدم ويجب ان لا نعيب الزمان لان ولاه امرنا هم افراز هذه الارض وهم الاخ والخال والعم و الاب و الجار و الصديق والاخ في الدين والوطن
* الشرف الامانه / احترام الغير / مش احترام الكاكي ...
( مش قوم لف اورنيك 15 بتاع فنيلتك ) والسلام ختام ....


#293926 [samia]
1.00/5 (1 صوت)

02-13-2012 01:22 AM
والله ياطارق اخوى لو قلت بالدارحى ولا بالهيروغلوفى ... ساى اذان فى مالطا .. لا بسمعك لابجيب خبرك.. وزى ماقال البطل بوشى كونوا نجيك ونتكلم معاك عارفين ماحتسوى حاجه وكلام فارغ.. اها يارجال اخير ليكم اقتنعوا وامرقول لا بره .. ومكتوب الجبين لابد تشوفوا العين .. وانا شايفه كل البتسووو فوقوا دا خوف ساى ...... وانتوا عارفين ونحنا عارفين وهم عافين والله عاااااااااااارف ...


#293870 [اسامه التكينة]
1.00/5 (1 صوت)

02-12-2012 10:46 PM
تفتكر يا طارق الريس المشغول شدييييد ده بيكون بيعرف الراكوبة ؟
انا بفتكر لو يوم واحد دخل الراكوبة ح يعرف وزنه الحقيقي وح يعرف إنو الشعب السوداني الفضل بيحبه قدر شنو .
وبعدين الريس مالو ومال الاسعار ؟ كل شئ بيجيهو بالمجان وزي ما قال عادل إمام ده حتى بيركب بالمجان
لك الله يا شعب بلادي


#293849 [عصمت محمد مختار]
0.00/5 (0 صوت)

02-12-2012 09:43 PM
حبابك عشرة يا قولي و النصيحة ياها النصيحة كان بقت بالعربي و لا بالأفرنجي لكن زولك ا ما عايز يسمع نهار كله يا بيرغي أو يرقص غايتو الله يعينك و يعينو و يعينا


#293840 [واحد]
0.00/5 (0 صوت)

02-12-2012 09:25 PM
يا جنا يا ال اسمك طارق عبدالحميد الرئيس ما بسمع ما سمعتنا بنصرخ بي علو حسنا
صحو الرئيس صحو


#293839 [sabra150]
0.00/5 (0 صوت)

02-12-2012 09:23 PM
تسلم طارق يكون كويس الكتابة بالدارجي شباب جامعات أبراهيم أحمد عمر ديل ما عارفين اي حاجة


#293836 [wahied]
0.00/5 (0 صوت)

02-12-2012 09:17 PM
كلامك جميل وواقعى ومن عمق المجتمع لكن بكل أسف اراك تخاطب ثورا ميتا لكن خطابك جميل واصل رسائلك خلينا نقراها نحن الفقراء المساكين نجد فيها سلوى ورواح ولك التحية قولى ..


#293831 [سودان حقانى ]
0.00/5 (0 صوت)

02-12-2012 09:08 PM



عارف يا طارق احسن حاجة فى الراكوبة دى الهواء البارد دا

عشان كدا لو تكتب رطانة يمكن الريس و باقى الجوقة تسمع ليك !!!

عارف ايام صفيحة الطماطم بى 50 قرش - نسايبنا فى شرق النيل ما كان بياخدو من السوق غير السكروالشاى والزيت و البن و من التعاون و كل الباقى كان مزروع فى البيت حتى البصل
و العيش من الطابونة - ومع كدا كانوا يقولوا يانميرى ما دخلتنا فى ( الكستبانة )


#293786 [ودامدرمان]
0.00/5 (0 صوت)

02-12-2012 08:22 PM
الا خ الكريم (قولي)
لك التحية
واتمني ان تصل الرسائل مع انو ماااااااااااااااااااظنيت











تخريمة:
طارق يا خوي حاجة خديجة دي ما جبتليها الهوي كدا


ردود على ودامدرمان
Sudan [طارق عبدالرحيم] 02-25-2012 12:37 PM
ود أمدرمان..

الرسائل دي الهدف الرئيسي منها ليس الرئيس .. و إنما رسالة لكل سوداني فحواها أنه يمكن أنيعلي صوتو ويطالب بى حقوقو


طارق عبد الرحيم قولي
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة