المقالات
مكتبة كتاب المقالات والأعمدة
الفاتح يوسف جبرا
وصلتني هذه الرسالة عبر الإيميل تعالوا نقرأها معا ً
وصلتني هذه الرسالة عبر الإيميل تعالوا نقرأها معا ً
02-15-2012 12:38 PM

ساخر سبيل

الفاتح جبرا -

وصلتني هذه الرسالة عبر الإيميل تعالوا نقرأها معا ً :

الأستاذ الفاتح جبرا

السلام عليك ورحمة الله تعالى وبركاته

بداية أشكرك على كتاباتك التى تضحكنا وتبكينا في آن واحد وعلى مقالاتك التى تمس صميم معاناة المواطن وعلى ذكر المعاناة دعنى أستاذى العزيز أحكى لك مشكلتي هذه والتى آمل تتناولها في أحدى مقالاتك
أنا طبيبة سودانية تخرجت من جامعة (جوبا) ثم سافرت إلى الولايات المتحدة الأمريكية وبعد عمل شاق ومضني إستطعت أن أجد مكاناً في أحدى المستشفيات هنا ، جلست لعدد من إمتحانات مزاولة المهنة والحمدلله لقد أجتزتها جميعاً والأن أقضى فترة تدريبية وقد طلبوا منى كواحدة من متطلبات هذه الوظيفة (التدريبية) أن أحضر لهم خطاباً من جامعة (جوبا) يفيد بأننى درست فيها وأننى كنت طالبة حسنة السير والسلوك (يعني شهادة حسن سير وسلوك) وهنا أستاذي بدأت المشكلة ..
قمت بالإتصال بأحد زملائي الذين كانوا معي بالجامعة وكانت هذه إجابته بالحرف الواحد (الجامعة ماعندها ختم لأنه الأختام القديمة موقوفة..والتعامل فى جامعة جوبا - فى جوبا- الآن بلإمضاء فقط..الأختام موقوفة حتى تصميم شعار جديد بدل الخرتيت..ثم ختم جديد..بعد ما يتعمل الختم دا فى مكتب الجامعة بجوبا ح يتفتح فى الخرطوم مكتب للجامعة هو البقوم بمسالة الختم وإستخراج الشهادات..ودا طبعا ح يأخد زمن ومرتبط بالوضع السياسي..لكن غالبا ح يتعمل..ويحل مشاكل الناس)
لم أكتف يا أستاذي بحديث زميلي فأرسلت أخى إلى جامعة (بحري) وهى الجامعة التى من المفترض أن تحل محل الجامعات الجنوبية وقد أجابوه عليه بالآتي : (ما عندنا الختم بتاع جامعة جوبا وما عندنا أى سجلات للطلبة الخريجين لأنو أخواننا الجنوبين شالو معاهم كل السجلات بناعت الطلبة ودوها الجنوب )
طيب السؤال البطرح نفسو يا أستاذ هو : منو المسئول من سجلات الطلاب والخريجين ديل؟ ما لازم يكون في زول مسئول من الحكاية دى ؟ يعنى هسه أعمل شنو انا؟ أسافر أمشي مدينة جوبا وأقابل ناس الجامعه هناك وأقول ليهم أنا إتخرجت من الجامعة دى وعاوزه ليا شهادة حسن سير وسلوك ؟ وهل حكومتنا بتسمح بي حاجة زى دى؟ هسه أنا تحت رحمة منو والله ما عارفة؟ وين وزارة التعليم العالي ؟ ووين المسئولين؟ ولماذا تقوم الجامعة بتغيير ختمها وشعارها الذى من المفترض أن يمثل تاريخاً لها والذى يجب ألا يكون عرضة لمثل هذه المكايدات السياسية .
لقد ذهبت قبل قليل للمستشفى التى أعمل بها وقصصت عليهم قصة الإنفصال وأخبرتهم أن جامعتي قد ذهبت إلى الدولة الجديدة لكنهم أبدوا إندهاشهم وقالوا لي : (ليه ناس التعليم العالي عندكم خلو الحاجة دى تحصل؟ مفروض

قبل الإنفصال كان يختوا بيانات الطلاب وسجلاتهم في مكان آمن أو حتي يعملو منها نسخة)
أستاذي العزيز
والله العظيم أنا محبطة وحزينة وما عارفه أعمل أو أقول شنو؟ آخر يوم ليا لتسليم الشهادة دى هو يوم 31 مارس 2012 وأنا غير متفائلة بأننى سوف أستطيع الحصول عليها أمام هذه التعقيدات التى سردتها لك

أرجوك أستاذي ساعدني في فتح حوار عن مستقبل خريجي جامعة جوبا الذين يحتاجون إلى خطاب أو شهادة من الجامعة تحمل توقيع وختم المدير .. هل يحس أحد بمدى معاناة وضياع هؤلاء الخريجين؟
كلي أمل في ذلك ودمت

إبنتك
سلمى

كسرة :

- بالله ده اسمو كلام؟ ؟ رأي المسئولين في التعليم العالي شنو في الشئ الحاصل ده !!


كسرة ثابتة :

أخبار خط هيثرو شنو؟


تعليقات 30 | إهداء 1 | زيارات 8506

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#296987 [wahied]
0.00/5 (0 صوت)

02-17-2012 08:48 AM
مع تدمير الخدمة المدنية ضاع كل شيىء مع قدوم هؤلاء الرويبضة لسدة السلطة ضاع كل شيىء ومشكلة هذه الطبيبة وغيرها نتيجة هذه السياسة الغير رشيدة . كيف يتم تسليم ووثائق مهمة لصرح علمى كهذا لحكومة الجنوب دون ان يكون هنالك مستندات ومراجع تحفظ حق ابناءنا الشماليين الذين درسوا بهذه الجامعة !!!!!!!؟؟ من المسئول ؟ ومن المحاسب فى مثل هذه الجرائم ؟ الا تدل مثل هذه المشاكل على ضياع الوطن وبنيه ؟ حكومة الفساد عصابة الظلم والاحتكار ضيعتم الوطن والمواطنين . حسبنا الله ونعمة الوكيل . هل هؤلاء بشر ؟ من اين اتى هـــؤلاء القوم ؟؟


#296975 [الولهان]
0.00/5 (0 صوت)

02-17-2012 06:27 AM
الاخت سلمي لك التحية حقيقة موضوعك اتالمت لة لكن اقول لكي حاجة
صدقيني الختم بتاع جامعة جوبا بكون موجود وكل الوثائق بتكون موجودة تعملي كالاتي


السودان كلو بقي واسطة شوفي ليك واسطة وموضوعك بيتحل في اقل من 24ساعة
واذا لم تجدي اي طريقة راسليني عل الاميل وانا سوف اخلص ليك الموضوع او اقول ليك حاجة
لو عندك اي زول في مصر بخلص ليك الموضوع مع امنياتي لك بالتوفيق
[email protected]


ردود على الولهان
Sudan [احمدالدابي] 02-26-2012 07:06 PM
كلامك حقيقه بس الاخت سلمي واصليني بالرقم 0913615566 وانشاء الل ه اساعدك لاني مستقر في جوبا


#296786 [سودانى]
0.00/5 (0 صوت)

02-16-2012 06:13 PM
اوعى تكونى مشيتى سفارتنا فى واشنطن ووجدتى الموظفين مافى اثناء ساعات العمل الرسمية وكان فى لابيحلو ولابيربطو ومعاملة زفت وعدم احترام للزمن والورق الرسمى والله مشيت 4مرات خلال العام السابق وكلها لتاشيرات لدخول السودان والله يوم واحد ماخلصنا الفيزاء واجراتها باخوى واخوك لابد من مشوارين وبارك الله فى عاطف بدرىواتصلى به وله معارف من اخواننا سفارة الجنوب واتصلى به وهو نعم السودانى اما باقى موظفين السفارة الله لاحوجك لهم وهم ناس تمكين ومن وجوههم تعرفى انهم ناس مافيهم خير وتحسى انك معهم فى دار المؤتمر الوطنى وليس سفارة بلدك


#296391 [استاذ في جامعة بحري]
0.00/5 (0 صوت)

02-16-2012 09:17 AM
لجامعة بحري سجل كامل للطلاب ولكن لا صلاحية باصدار شهادات تحمل اختام الجامعات الام الامر يحتاج الي تقدم في الامور السياسية


#296251 [WANDER]
0.00/5 (0 صوت)

02-16-2012 01:05 AM
ITS A REALY JOKE!!!HOW COME THEY DONT KEEP RECORDS OF OLD GRADUATED STUDENT!!! AND WHY THEY GOT THE CERTIFCATE ,DOCUMENTES OF ALL STUDENT EVEN THE NORTHERN!!WHAT THE PERSONAL AND REGISTRATION OFFICE DOING WHEN UNIVERSITY HEADED SOUTH???GIVING TEARS AND KISSES!!!OUR GOVERMENT GOT SURPRISED OF WHAT HAPPEN !!ITS OKEY CAUSE THEIR ASTONISHMENT SINCE THEY CAME!!BUT DIOD THEY REGISTRATION OFFICE AND STAFF RESPOSIBLE ALSO GET SHOCHED!! SO NOBODY IN THIS DIZZY LAND KNOWS OR PREDICT WHAT WILL HAPPEN AND ACT RESONABLY!!! IT APPEAR THAT OUR MESS OR DISASTER IS EVERY WHERE NOT UP IN THE DANCING HEAD


#296228 [sudania]
0.00/5 (0 صوت)

02-16-2012 12:19 AM
I am so sorry dr.salma, I really feel you because me also is a juba university graduate and I have even worse problems since the separation, I have a cousin also was in a situation just like yours, she came here and I dont know if she managed to fix this issue or not, I dont know how I ll manage to hook u both. if u can put any contact details!


#296219 [سامي]
0.00/5 (0 صوت)

02-15-2012 11:59 PM
والله في عهد الانقاذ اي حاجة واردة ؟ انا عندي موقف داير اعلق بيه علي الاخ الاستغرب من شهادة حسن السير والسلوك انا بعرف طالب في طب الاسلامية في هذا العام الطلاب اضربوا لمدة يوم لسبب ما فاذا بادارة الكلية تطلب من الطلاب احضار اولياء الامور . تخيل طلاب علي وشك التخرج يطلب منهم احضار اولياء الامور .


#296155 [ودالدكيم]
0.00/5 (0 صوت)

02-15-2012 10:01 PM
الرؤية اتضحت تماماً الأخت الدكتورة سلمي غير منتمية للحزب اليهودي السوداني الحاكم والله يادكتورة لوكنتي منتمية لهذا الحزب الشيطاني كانت الأمور تسير بالطريقة التي تريدينها وعمك أستاذ جبرا معزور الود بينه والحزب الحاكم مفقوداً


#296144 [القوس]
0.00/5 (0 صوت)

02-15-2012 09:33 PM
يا أخت ما تكبري الحكاية - بسيطة – كل شي في السوادن للبيع خاصة الدرجات العلمية حتى الوزارات ما في مانع ،- بدل شهادة بكالوريوس من جوبا - نديك شهادة أخصائي في اي تخصص في الطب وكمان من جامعة الخرطوم ومعتمدة وموثقة ومع شهادة خبرة ، وعلى عنوانك فقط اتصلي بالجماعة في السفارة عندكم وتقولي ليهم الله اكبر والله يعينكم وكدا وتشريحي ليهم من الآخر ، او لو عندك واحد تفتيحة هنا ممكن يقوم بالشغل دا ، طبعا انت ست العارفين عارفة حالنا مع الدولار -


#296135 [ملعون ابوكي بلد]
0.00/5 (0 صوت)

02-15-2012 08:49 PM
شهادة حسن سير وسلوك ... والله دي جديدة لنج

تكون دي الاجراءات الجديدة بعد فك التمكين ولا شنو

يعني هسة الاخت دي قرت قرابة الستة سنوات وتحصلت علي شهادة معترف بيها من وزارة التربية والتعليم وموثقة في الوزارة و الخارجية يقومو يقولو ليها جيبي شهادة حسسن سير وسلوك ...

(؟)


#296114 [عوض محمد احمد الحسين]
5.00/5 (1 صوت)

02-15-2012 08:05 PM
شوفى يابت العم ماتضيعى وقتك ساكت عليك تشيلى ليك يافطه وتمشى على البيت الابيض وتقابلى ود عمك اوباما وتوريه الحاصل هو حايرفع السماعه على ابن عمتو سلفاكير والموضوع حايتحلى بثوانى - وادا مالقيتى طريقه تقالبى ولد عمت سالفاكير اوبما اختفى كلراعك على الامم المتحده وتقابلى رايس وتحكى ليه ماساتك وهى مابتقصر بترفع السماعه على الحبيب سلفاكير ويتدكرو بلبوسه على الهواء فى والتانيه فى نيويورك وبعدين تكلموا بماساتك وتاكدى ان مابردود ليها طلب يمكن جامعة جوبا داتها يحول ليك فى امريكا - وان ده كل مانفع عليك الاعتصام امام الكونقرس يمكن باقان او الور يجو مارين بهناك لان جزء من حريمهم فاعدات فى امريكا ويمكن يدخلوا مشكلتك دى ضمن محادثات اديس ابابا ويمكن يدخل فيها امبيكى وما تقولى الجو اليومين ديل فى اديس ابابا جميل عشان كده الوفدان لم يصلوا الى اتفاق وما اظنهم يصلوا خلى مشكلتك دى من ضمن المشاكل المعلقه ادا اتحلت مشكلة البترول يمكن تتحل مشكلة خطابك والختم - اما حل مشكلة شهادة حسن السير والسلوك انك تلقيها من جماعتنا فى الخرطوم دى ماظن حاتلقيه الا ادا رجعوا ناس الاقطان القروش النهبوها وما اظن حاترجع دى سكنت جبل على اله يعينك وعليك بى ودعمك اوباما


#296097 [alitaha]
0.00/5 (0 صوت)

02-15-2012 07:41 PM
استاذ جبرة

خليني من ده كلو

انا عندي ليك اقتراح تكسب من وراهو دهب...

ايه رايك تجمع اقوال السيد القائد في كتاب...
حرام الدرر دي تروح من غير تدوين...
صدقني العائد اكبر من قيمة الخط..ويمكن يحل مشكلة جامعة جوبا والضعين كمان
ما تنساني.. من الكمشمش تلفوني.00249 123 66666
وزير اقيلمي سابق


#296066 [Anti-NCP]
0.00/5 (0 صوت)

02-15-2012 06:15 PM
ونحن بدورنا نحيلك إلي الباش مهندس الطيب مصطفي ليفتي لكي في هذه المشكله ..


#296045 [جدى]
0.00/5 (0 صوت)

02-15-2012 05:31 PM
هوى ياعالم اى زول عندو شهاده فى ولايه يتناولا بدرى بدرى
مايجى يوم نقول ياريت


#296031 [omers]
0.00/5 (0 صوت)

02-15-2012 04:59 PM
والله نصيحه للاخت المنكوبه ولكل من يواجه مثل المشكله مافى حل غير تشوف ناس الكسرات والرشوات بوين والله لو داير وسام النيلين من القصر الحمهورى زاتو بعملو ليك وبما الاخت دى على حق وما دايره تاكل حق زول فى الحاله دى الصرف ده ما فيهو اى شى لانها حضيع ليها فرصه عمر وما بتتكرر تانى ..... اتوكلى يابتنا وشوفى ناس الكسرات بوين يحلوها ليك فى ثوانى والختم القالو موقوف ده برجع بشتغل من تانى .. والله من وراء القصد..;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;) ;)


#295992 [salah]
0.00/5 (0 صوت)

02-15-2012 03:55 PM
اليك تلفون محامي في جوبا يمكن يجد لك حل اسمه محمد ادم 0955028758 ما عليك الا البحث عن مفتاح جوبا -- اظنه 0021 الا اني غير متاكد - وبالتوفيق ان شاء الله


#295968 [ابو جلمبو]
0.00/5 (0 صوت)

02-15-2012 03:21 PM
سلام للجميع والله الموضوع يحير الواحد ولكن نصيحتي للاخت سلمي

أن توكل احد اقاربا للذهاب للمحكمة لاستخراج شهاده حسن سير وسلوك (هذا اقصر طريق بدل الجهجهة و التلتلة) بعد اداء اليمين ودفع الرسوم ويمكن بعد ذلك ترجمتها في مركز الترجمة بجامعة الخرطوم. ولكن قبل هذه الخطوة وري الجماعة الامريكان هل من المحكمة مقبولة.....ودعائي لك يا بنتي أنو يوفقك ويسهل ليك كل امر قاسي


#295952 [ابن الحاجة]
0.00/5 (0 صوت)

02-15-2012 02:57 PM
ذكر أحد المعلقين أن بعض الامور مثل السكة حديد و غيرها من الاشياء المشتركة تبدو أمور تافهة ,و لكن هذه الامور ليست تافهة أو هامشية بل الذين لم يفكروا فيها هم من يتصفون بالتفاهة.
فمن المعروف أنه عندما ينقل موظف من موقعه الى موقع اخر تكون هناك عملية تسليم يتم بموجبها نقل كل المستندات والعهد من الشخص المغادر الى الشخص المستلم فكيف عندما نتحدث عن جامعة أو هيئة و ما شابه ذلك؟

متى نصحو ونعيش كما يعيش البشر؟

أعتقد أن أحد أكبر العوامل في انتشار الفساد في السودان هو جهل أو تساهل الكثير من الناس حتى بعض الموظفين بالحقوق و الواجبات في مجال العمل الرسمي


#295926 [محمد سند]
0.00/5 (0 صوت)

02-15-2012 02:26 PM

والله لو الباعو الخط لواييق انت السلسيون ذاتو
غايتو أنا لو كنت معنى بحكاية الخط ده كنت جيت سقتك وديتك جنب البحر ورميت وربطت كراعي في حجر ووقعت عشان ترتاح


#295922 [زيزو]
0.00/5 (0 صوت)

02-15-2012 02:19 PM
ودي ح تلحق خط هيثرو برضو..


وخلينا نستبدل أغنية عقد الجلاد الجميلة..

الناس في بلدي يصنعون (الفوضى)..

كلامهم.. (اختام).. ولحنهم .. (أوهام)..


.. ومن أين أتى هؤلاء.. !!؟؟؟؟

كنا قايلين بلدنا ما عندها مركز (دراسات) كما يقول إسحاق..

لكن الأهم.. إنو ما عندها (وجيع)..

وآآآآه .. يا وجع قلبي عليك يا بلدي..


#295919 [أحمد عبد الباري]
5.00/5 (1 صوت)

02-15-2012 02:12 PM
هناك أشياء يظنها البعض هامشية أو لا يتذكرونها لتفاهتها عند حلول المصائب الكبرى. شاهدت فيلماً تسجيلياً لعملية إجلاء مرضى من أحد المدن الأمريكية بعد كارثة الفيضانات الشهيرة. كان الإجلاء معجزة بحق، إذ تم إجلاء بعض المرضى وابر أكياس الدربات مغروسة بأيديهم!! من منا يفكر في إجلاء مرضى في مستشفى في مثل هذه الحالات؟ والله أنا المسكين دا، قلت يا جماعة الخير، يجب مناقشة مصير جامعة جوبا والسكك الحديدية وغيرها من الأمور المشتركة و التي تبدو تافهة لأول وهلة، حتى إذا وقع الانفصال تتم عملية الفرز بكل يسر وسهولة. أول ما انطباع يتولد لمن يقرأ هذه الشكوى، هو أن سلمى فتاة سودانية من الزمن الطيب وأنها فعلاً طبيبة وإنسانة وإلا فسوف تحتاج إلى كتابة هذه الشكوى و من ثم تتصور ولو للحظة انها في ورطة، لماذا؟ فالاجابة كما يلي: بسيطة اتصلى على سمسار من إياهم فسوف تصلك شهادة حسن سيرة وسلوك ممهورة بتوقيع عميد كلية الطب جامعة جوبا ومختومة بالختم البارز أبو خترتين للكلية وليس خرتيت واحد، فقط ادفعي مبلغ 200 دولار أمريكي أي ما يساوي عندكم ثمن 10 سندوتشات بيرجر فقط لا غير. اختي سلمى: قيل أن بعض الفتيات قمن بزيارة لقريب لهن بالسجن فنادى أحد السجناء على إحداهن قائلاً: وين يا تتي، فردت عليه قائلة: (سجمي انت مسجون من زمن تتي). أظنك هاجرت منذ أيام الزمن الجميل ولم تعرفي ماذا حدث للسودان من بعدك في عهدهم الميمون هذا. أو كما قال:


#295917 [راونا]
0.00/5 (0 صوت)

02-15-2012 02:12 PM
بالله شوف


#295909 [حسن مواسير وبترول]
5.00/5 (1 صوت)

02-15-2012 01:58 PM
;(

معقول مستقبلها يقيف على ورقة بيضاء وختم

طيب يا اختي الكريمة هاك شهادة مؤقتة مننا

جامعة جوبا
جمهورية جنوب السودان
وزارة التعليم العالي

الموضوع / شهادة حسن سير وسلوك

تشهد إدارة الجامعة المنتقلة حديثا من العاصمة الخرطوم بأن/ الطالب/ة ...............
قد إلتحق بالجامعة في الفترة ما قبل الانفصال وكان متسماً بحسن السير والسلوك وانه مغلوب على أمره ، وان ما يحدث له من تشتت وضياع في المستقبل مسئولية الحكومتين في شمال وجنوب السودان . وقد اعطى هذه الشهادة بناءّ على رغبته ونحن نشهد بذلك .

التوقيع التوقيع/
مدير جامعة جوبا قبل الانفصال مدير جامعة جوبا بعد الانفصال

الختم موقف مؤقتاً


#295904 [عبدالمنعم ]
0.00/5 (0 صوت)

02-15-2012 01:51 PM
لمن الدولة تمكن البدريين واهل الولاء بدون كفاءات تكون دي النتائج

هذه الطالبة وامثالها كثر ، وحقوقهم في رقبة كل مسئول في بلادنا

الله يفرج همهما ويزيل عنها هذا الغبن ويسهل لها امرها


قولوا امييييييييييييييييييييييييييييييييييييييييييييييييييييييييييييييييييييين

لو ... اقول لو ردوا عليك ناس التعليم العالي ما حتطلع بنتيجة منهم وربما يرتفع ضغطك وينفجر فيك عرق


اما المرارة اصلها زماااااااااااااااااااااااااااااااااااااااااااااااان اتفقعت فأحسن ما يردوا عليك !!!




#295888 [ودجمعه]
0.00/5 (0 صوت)

02-15-2012 01:41 PM
إنتي تحت رحمة الله يا ..... .....؟
قالت طبيبه ...وطيب الناس الاميين إقولو شنو...


#295886 [سامر المدنى]
5.00/5 (1 صوت)

02-15-2012 01:40 PM

سافر جوبااا زى ماقال النور الجيلانى بتاع كدراوية

كسرة ثابتة :

أخبار خط هيثرو شنو؟
دفع مقدم


#295882 [محمد]
0.00/5 (0 صوت)

02-15-2012 01:39 PM
Plan B

يظهر أن من جلس للحوار واتخاذ القرار كان حمارررر

أنظر اليوم الي جامعة جوبا سابقا و بحري حاليا..... هنالك إرهاصات باعتصام لأن الطلبة وبالذات الذين علي أعتاب التخرج يوليو 2012 الآن يدقون علي أبواب العمادة وهم في قمة الحيرة كيف سيتم تخريجهم وما هو مسمي الجامعة التي سيتم تخرجهم منها علما بأن جامعة بحري غير معتمدة رسميا حتي الآن و بروتوكول التخرج بعد نصف المدة بمسمي جامعة جوبا ذهب مع البترول فشووش. مما أكد أن حسابات الإنفصال لم تكن مدروسة اطلاقا والسلم الذي دفعنا نصف البلد ثمنا له أضحي أبعد من الثريا - والحرب بشر بها بشيرنا لا سمح الله والمرة ستكون واسعة لأنها ضد دولة لها تحالفاتها

و لاحول ولا قوة إلا بالله



#295876 [ابوياسر]
0.00/5 (0 صوت)

02-15-2012 01:30 PM
مأساة ,,, وحتستمر لانو حتى الطلاب في السنوات الاخيرة لن يستطيعو الحصول على تفاصيلهم للسنوات الاولى ولايمكن الاقرار بانهم قد درسو 6سنوات في بحرى وهم فعليا لم يدرسو الاسنة او سنتين
نرجو ان ترفع المسائلة للتعليم العالى ونائب الرئيس اي واحد من ال15مستشار اهو يعملو حاجه بدل قعاد ساي ومايدخلوها مع ملف البترول وابيي

كسرة :

ملفات الطلاب مشت وين؟؟
البيجيبها منو؟؟


#295875 [A. Rahman]
0.00/5 (0 صوت)

02-15-2012 01:29 PM
أنا اقترح على الإبنة سلمى الآتي:

1- تستخرج شهادة حسن السير و السلوك العادية من وزارة الداخلية ( و ممكن عن طريق السفارة على ما أظن\\\\\"

2- تستخرج من وزارة التعليم العالي توثيقاً لشهادتها الجامعية إن أمكن

هذا مجرد أمل في أن تقبل الجهات الأمريكية ذلك الحل.

أما إذا انتظرت حلول أخرى فقد تفقد فرصتها الحالية. انتي ما عارفة إنه جماعتنا يرفعون شعار إن لم تصلح فضُر

أمنياتي لها بالتوفيق


#295866 [صالح عام]
5.00/5 (1 صوت)

02-15-2012 01:17 PM
استاذ جبره نسيت الكسره الثانيه اخبار الخمسين الف دولار الدفعها ديوان الذكاه للقناه الفضائيه الوهميه شنو


ردود على صالح عام
Saudi Arabia [ود حديد] 02-15-2012 06:42 PM
ده الكلام والله ينصر دينك وكترو من الكسرات و كده ...

وبتنا سلمي ربنا يقضي ليك حاجتك و يسهل ليك امورك ...



الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة