المقالات
مكتبة كتاب المقالات والأعمدة
الفاتح يوسف جبرا
طيارون وكده !
طيارون وكده !
02-25-2016 05:47 PM


كنت أتصفح إحدى الجرائد بالأمس حيث وجدت استطلاعاً تم في الأسواق يوضح أسعار السلع الضرورية والتي شهدت ارتفاعاً مخيفا حيث جاء أن سعر كيلو اللحم الضأن 80 ألف جنيه والعجالي 65 ألف جنيه وكيلو الطماطم 20 جنيهاً هذا غير بقية السلع الضرورية الأخرى كالسكر والزيت والبصل والخضروات والرغيف الميكروسكوبي الذي أصبح يباع عيشتين منه بألف جنيه، ده غير أنبوبة الغاز الذي فاق سعرها المائة وعشرين ألف جنيه.
قلت لجاري الذي كان يجلس معي وأنا أناوله الصحيفة :
- بالله هسه المواطن العادي.. والناس الدخلها محدود ديل يعيشوا كيف؟
- والقال ليك يا أستاذ الناس دي عايشة منو؟ يا أستاذ الحالة وصلت مرحلة صعبة خلاس
- كيف يعني؟
- ما عاوزه ليها كيف يا أستاذ ! ما فيش أي علاقة بين (الدخل) والمنصرف..
- والله فعلاً ما فيش أي علاقة
- تعرف يا أستاذ تحت وطأة غلاء أسعار السلع الضرورية والخدمات مع ثبات الأجور والمرتبات و(العطالة) بقت في ظواهر سلوكية (غريبة) مجتمعنا ما كان بيعرفا ولو حكيت ليك عنها ما ح تصدقا
- زي شنو؟
- بتعرف حاجة إسمها (الطيارين) يا أستاذ؟
- مش ديل البيسوقو البوينج والجامبو والحاجات دي؟
- جامبو شنو يا أستاذ.. إنتا المصطلح ده ما مر عليك؟
- لا والله.. معناتو شنو؟
الطيارين ديل البمشوا يفتشوا مكان (البكيات) و(الأعراس) عشان ياكلوا ويشربوا وكده !
- والمشكلة وين يعني؟
- المشكلة إنو المناسبات البمشوها دي ما عندهم بيها أي علاقة وما بعرفوا الناس بتاعنها
لما كنت خالي ذهن وليست لدىَّ أي فكرة عن المسألة فقد طلبت من محدثي أن يمدني بما يعرفه عن هذه الظاهرة حيث إستعدل في جلسته :
- شوف يا أستاذ في نوعين من (الطيارين).. طيارين بتاعين (أفراح) وديل بتكون حالتهم المادية شوية ما بطالة يعني شكلهم فيهو شوية (ترطيب) وكمان بيلبسوا كويس.. يعني عندهم غيار غيارين ما بطالين والواحد أول ما الواطة تمغرب يقوم ياخد ليهو (دش) ويلبس على (سنجة عشرة) ويتظبط تمااام ويا حبذا لو كمان فيها شوية (ريحة) وعلى أقرب صالة أفراح واللا صيوان عرس.. يقوم يضرب ليك (العشاء الفاخر) ويشرب ليهو (كم بارد) ويسمع ليهو (كم أغنية) وإحتمال لمن الحفلة تجوط يدخل جوة (الحلبة) ويقعد (يهز) في البنات ويشيل ليهو (كم شبال)..
- إنتا يا أستاذ ما قاعد تسمع في الأعراس دايماً إنو (العشاء ما كفى الضيوف)؟
- أأي مرات يقولوا ليك أهل العريس لسه ما إتعشوا والعشاء خلص..
- ده ما من الطيارين ديل.. تكون عازم ليك خمسمية نفر يجوك خمسمية طيار !
- (ثم واصل محدثي): أما أصحابنا ناس المآتم والبكيات ديل فهم ماشة معاهم (زي العسل).. الواحد بيكون مجهز (عدة الشغل).. (جلابية تترون) بيضاء نضيفة و(عمة توتال) وشال ومركوب وما يسمع ليهو بي بيت بكاء إلا يقوم (يتلبس) ويمشي يشيل الفاتحة ويقعد قعدة واااحدة.. الشاي.. القهوة.. الموية البااااردة.. الفطور.. الغداء.. العشاء وكمان (الجرائد).. ويقوم يرجع عشان يجي تاني يوم.. لحدت ما البكا (يخلص) ويرفعوا الفراش.. ومرات بعد ما الفراش يترفع والناس تدخل (صالون البيت) الطيار بيكون قاعد.. بس دي عاوزة ليها (طيار عينو قوية شوية)..
- والناس دي ما عندها شغل تمشي ليهو؟
- شغل شنو يا أستاذ مع (الأطايب) دي.. أفرض الطيار ده شغال ح يعمل شنو؟ والله إلا يكون طيار أيربص
حتين يلاقي ليهو وجبات زي دي..
شردت بذهني إلى الوراء مستعرضاً صورة (المواطن) عندما كان عفيفاً مترفعاً عن كل ما يشين سمعته وسلوكه ولم يقطع حالة شرودي هذه إلا صوت محدثي قائلاً :
- وكمان يا أستاذ في (طيارين) نسوان !
-كيف يعني؟
- بي نفس الطريقة.. الواحد مما تشوف ليها بيت بكا وإلا بيت عرس إلا (تتظبط) وتظبط (الشفع) وتمشي..
وده كلو يا أستاذ كوم و(الطيارين المتحدين) كوم تاني
- وديل شركة !
- لا ما شركة.. ديل (أسر) يعني (عوائل) عديل كده.. بيلعبوا ليك (صالات الأفراح) راس.. الطيار ومرتو وأولادو (يطقموا) ليك وكل يوم والتاني على واحدة من صالات الأفراح.. ياكلوا ويشربوا وينبسطوا.. وطبعن ما فيش زول بيشك فيهم !
- (مواصلاً): عرفتا يا أستاذ العشاء بتاع الأعراس قاعد يقصر ليه؟؟ والله يا أستاذ الحالة دي لو استمرت كده الشعب ده كلو بعد شوية يكون (طيارين).

كسرة :
قيل إن أحد (الطيارين المتحدين) قد توجه نحو إحدى صالات الأفراح الفاخرة .. وعندما دخل ومعاهو الأولاد فوجئ بأن الصالة كوووولها (جلاليب) وعمم.. كما فوجئ بعدم وجود (كوشة) أو (فنان) وللخروج من المأزق قام (قطع ليهو اسم من راسو) مخاطباً الأشخاص الذين أمامه :
- يا جماعة ده مش عرس ناس (عوض عثمان)؟
- لا والله دي الجمعية العمومية بتاعت بنك التنمية !!
كسرة:
الحالة بقى سعب خلاس !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و.
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و.

صحيفة أول النهار




تعليقات 7 | إهداء 0 | زيارات 6451

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1420500 [أحمد حسن]
0.00/5 (0 صوت)

02-26-2016 08:01 PM
والله بعد شويه تلقى السودان كلوا طيارين .. والسبب طبعاً إنت عارفوا متى تأتي الفرحة الكبرى ...
والطيارين ديل كويسين ما عندهم مشاكل ديل ناس مسالمين وتلقى فيهم ناس مرحين زي جحا ودنفاش
الكلام السوتوا الإنقاذ في الناس التانين .. عصابات متلفتة جرائم تصم منها الآذان .. اغتصابات أطفال من الخلاوي .. وما خفي أعظم ... غايتوا زي ما قلت ننتظر الفرحة الكبرى متين .. الله أعلم .. مسؤول رقشتوا توزع العرقي والبوزع العرقي .. يطلع منها زي الشعرة من العجين .. مع وقف التنفيذ لأنوا سائق الرقشة حرس خاص للمسؤول ..

[أحمد حسن]

#1420466 [مواطن سودانى]
0.00/5 (0 صوت)

02-26-2016 06:04 PM
تعرف يا جبره زمان كان الواحد بياكل فى المطعم و يغسل ايدو بعدين يمشى الكاشير
مع ظهور الطيارين الاوائل ناس المطاعم قالوا الطلبات بالماركه
الان مع كثافه الطيارين سيكون الدخول بالبطاقه المرسله عن طريق الواتساب بعدين اخوانا الطيارين عمى عوض عثمان ما بيحلهم.... بعدين كل صدقه للمساكين
انت معايا يا جبره كلنا مساكين يعنى الاخوه الطيارين مبادرين و كتر خيرهم رفعوا الحرج من اولياء الامور الذين لم يتفقدوا احوالهم
عايزين رابطه الطيارين عشان العشاء مايقصر 10% للطيارين و مقاعد خاصه للطيارين فى كل صاله و مندوب مناوب لكل صاله و اغنيه خاصه للطيارين حتى لا يزعجوا ناس الحفل تكون
رحله فوق طيات السحاب
يعنى الشغلانه ممكن تغنن و اطار تاصيل الموروثات السودانيه الحلوه

[مواطن سودانى]

#1420457 [حسن]
3.00/5 (1 صوت)

02-26-2016 05:28 PM
واحد طيار دخل احد الصيوانات ،ووجد عدد الناس به قليل ، وقلة عدد الناس كانت اكبر دافع له لولوج الصيوان ، لان قلة العدد تعنى وفرة الطعام ، وفعلا لم يخب ظنه وجلس معه على تربيزة الطعام ثلاثة اشخاص، وشبع لحد التخمة , وجلس في انتظار الشاي حتى يساعد في الهضم ، وكان بجانبه رجل كبير في السن ، وقال له الطيار الجماعة ديل اتاخروا ، فرد عليه الرجل الجماعة منو ، فقال له الطيار ناس العرس ، فقال له الرجل الكبير علاقتك بيهم شنو ، فردالطيار انا ابن عم العريس لزم ، فرد الرجل الكبير ضاحكا ، يا ولدى قوم اركب الظلط الشغلانة سمايه .
ام الطيار في بلدنا المافى داعى لذكر اسمها فهو من يجلب العرقى من اماكنه البعيدة ويبعه لاصحاب المزاج بسعر اعلى ،ويربح فيهم , والطيارين أنواع فاحسن عرقى واغلاه عند طيار الجامبو قبل ان تتحطم ، والان اصبح العرقى نمرة واحد عند طيار الايرباص يليه طيار البوينج ثم الفوكرز ، اما ارخص عرقى واردئ نوع فهو عند طيارى طائرات الرش .

[حسن]

#1420433 [أم الحسن]
3.00/5 (1 صوت)

02-26-2016 03:48 PM
اجماعة بتاعيين الحوار برضو طياريين

[أم الحسن]

ردود على أم الحسن
[صالة المغادرة] 02-28-2016 10:45 AM
والله يا ام الحسن ديل كمان عندهم اتنين برشوت لضمان الهبوط الاضطرارى برشوت حكومة وبرشوت معارضة ناس كمال عمر

[مدرسة يستهبلون (اوضة وبرندة )] 02-27-2016 05:40 PM
فى اتنين من الجماعة اياهم واتلمى معاهم واحد جديد فى القصة وبيقى يمشى معاهم
اها سمعو ليك انو واحد من الكبار توفى الى رحمة الله فالجماعة ما صدقو ومشو من بدرى المقابر وحضرو الدفن وبعداك تفرقو والزول الجديد ركب مارسيدس فخمة واتضح انو صاحب المراسيدس ما راجع بيت البكاء فاتصل على اصحابه لشرح الحاصل فجاطو فيهو وقالو ليه انت عمرك ما حتتعلم ( الشغل ) اذا ما عارف العربية راجعة بيت البكاء فالحل بسيط تمسك فى عنقريب الميت ودا اكيد حيرجع بيت البكاء




فتأمل

[[جنو منو] 02-27-2016 12:39 PM
الله يجازى محنك يا أم الحسن ..ههههههه .!!


#1420351 [الداندورمي .]
0.00/5 (0 صوت)

02-26-2016 10:47 AM
يا،،، أخونا نقيب الطيارين الراقص علوب ومساعده
الطويل وكانت مطاراتهم نادي الضباط والخرطوم والتنس
من سكان الصحافه لسع مواصل الطيران ولا،،،تقاعد للمعاش ؟

[الداندورمي .]

ردود على الداندورمي .
European Union [الداندورمي .] 02-28-2016 06:07 PM
أنا آسف أخي والله لم أقصد الإسائه
للأخ علوب فالرجاء منكم مسامحتي .

[اليوم الأخير] 02-27-2016 09:30 AM
ياراجل عيب عليك ،
علي دهب الشهير بعلوب لم يكن طياراً ، و نفسو كانت مليانة ، كان زول هجيج فقط ، لا يذهب للأفراح من أجل الأكل ، كان يذهب من أجل الرقص و البهجة فقط ، و أتحدى من يقول بأنه رآه جالس في كرسسي يأكل أو يشرب حتى بيبسي كولا ،، كان لا تراهو إلى في صالة الرقص ،


#1420244 [حكم]
4.00/5 (4 صوت)

02-25-2016 10:58 PM
طلبة الجامعات كتير منهم طيارين افراح

[حكم]

ردود على حكم
[صالة المغادرة] 02-28-2016 10:42 AM
لاحول ولاقوة الا بالله ربنا ينتقم من الذين تسببوا فى هذا الوضع الماساوى وعلى راسهم خليفة ابليس فى الارض الملعون الترابى وكل عصابة الرقاص


#1420225 [samer]
5.00/5 (2 صوت)

02-25-2016 10:21 PM
تعرف يا ود جبره حكومتك دى كلها طيارين و نحن نقول دستورين , البرلمان كله طيارين ما الناس رفضت تمشى تصوت و الرئيس ذاتو طيار كبيرررررررررررررررر بس ما لاقى البقلعوا و ناس الدعم السريع حرامية الحمير اكبر طيارين و لبسوهم لبس الجيش اللحق امات طه , عشان كده تركو لينا الاعراس و بيوت البكى و دا تكافل اجتماعى و لكن بصوره قبيحه ما البلد كلها عطاله , و الواحد اطلع من الصباح عشان يوفر لاولاده حق وجبه و اذا ظبتت معاك تكون وجبتين

[samer]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة