إشمعنى الشيشة ؟ا
08-28-2010 01:02 PM

ساخر سبيل

إشمعنى الشيشة ؟

الفاتح يوسف جبرا

على الرغم من أننى من قدامى المدخنين الذين لم يستطيعوا الإقلاع عن هذه العادة المهلكة السخيفة حتى بعد إجراء دعامتين فى القلب لتوسيع بعض الشرايين إلا أننى سوف أسعد تماماً لو أن (سلطات ولايتنا) إستشعاراً منها تجاه دورها ومسئوليتها فى الحفاظ على صحة المواطن أن قامت بمنع وحظر إستيراد السجائر والتبغ بأنواعه و(قفل) مصانعها التى تعمل بالبلاد وتحويلها إلى أى مصانع مفيده يستفيد من منتجاتها المواطن البسيط.
كما أننى أكون أكثر سعادة لو أن (سلطات الولاية) قد أراحت مدمنى (التمباك) بحظر الإتجار والتعامل فيه أسوة بالتبغ وذلك لتسببه فى كثير من الأمراض الخطيرة التى أهمها سرطان اللثة.
* لكن والى ولايتنا ومعاونيه (مشغولين حبتين) بقضايا أخطر تهم المواطنين وتمس صميم حياتهم المعيشية مثل مراقبة أسعار السلع الضرورية وجعلها فى متناول يد المواطن البسيط كاللحم الذى لم يتجاوز سعر كيلو الضان منه 24 ألف (أيه يعنى) والطماطم الذى ثبت سعر الكيلو منه فى حوالى 15 الف ( بس) والويكة (الواااحده دى) التى لم يتجاوز سعر الربع منها (حتى كتابة هذه السطور) أكثر من 40 جنيهاً وكذلك بقية السلع كالزيت والبصل والدقيق إلخ والتى هى فى متناول كل مواطن..
* ووالى ولايتنا ومعاونوه مهمومون بنظافة المدينة وجعلها تخلو تماماً من أكياس الأوساخ والنفايات الموضوعة أمام المنازل والمحلات والتى تشكل بيئة مثلى لتوالد البعوض والذباب وبقية الحشرات علاوة على الروائح المنتنة التى تنبعث منها .
* كما أن والى ولايتنا ومعاونوه مهمومون بالتحضير لفصل الخريف القادم حتى لا يأتى فجأتن (الخريف ده خلاص موضوعو إنتهى) وذلك عن طريق إنشاء المصارف الخرسانية المستديمة وردم الحفر والمستنقعات .
* كما أنهم مهمومون بتنقية مياه الشرب التى أضحت ذات لون وطعم ورائحة وكمان (حاجات قاعدة تمشى فيها) !
* كما أنهم مهمومون بصيانة المدارس وإستعدال جدران (الفصول المايلة) وتوفير المعلم (المتدرب) والكتاب وتصليح الاثاث (المكسر) والمكتبات والمعامل (المنعدمة) وكافة التجهيزات الضرورية لخلق بيئة دراسية سليمة ومعافاة .
* كما أنهم مشغولون بتوفير مستشفيات (خالية من الكدايس) ومعامل مليئة بالأجهزة المتطورة وصيدليات يتوافر فيها الدواء لكافة شرائح المواطنين وجعل كل المنظومة الصحية على مستوى من النظافة والتجهيزات التى تمكن المواطن من تلقى علاج يفضى به إلى الشفاء وليس إلى (الشقاء) بعد أن يبيع جميع مدخراته (ويقعد على الحديده) من أجل السفر للعلاج بالخارج.
والدليل على إنشغال ولاة أمورنا بالأمور والمشكلات الجسام التى تهم مواطنيهم هو أنهم لم يشغلوا أنفسهم بحظر إستيراد وتصنيع (السجائر) و (التبغ) وورق (البرنسيس) والإتجار فى (التمباك) .. ولكنهم لسبب يعلمه الله (تفرغوا) لإصدار قرارا بمنع تناول الشيشة فى الأماكن العامة ! حفاظاً على (الأماكن العامة) وليس حفاظاً على صحة المواطن الذى تستورد له الدولة السجائر بمختلف أنواعه والتبغ ويباع أمام أعينها التمباك من نوعية (لو ما فاطر ما تخاطر) .
مناسبة هذا المقال أن بريدى الأليكترونى قد حمل لى رسالة تحتوى على عدد من الصور التى توضح عددا من رجال الشرطة بملابسهم الرسمية وهم يقومون بتحطيم وتكسير المئات من (أدوات الشيشة) التى تمت مصادرتها من بعض المحال والأفراد إثر القرار الذى صدر مؤخراً بحظر تناولها ، وبعيداً عن مشغوليات (مسئولينا) وأهتمامهم بحالنا الذى صار يغنى عن سؤالنا دعونا نسأل عن الحكمة من منع (الشيشة) وإباحة (السجائر) والتبغ والتمباك ؟ لو القصة قصة (صحة) وإنها من الأشياء (المهلكة) .. وأن (المؤمن القوي خير وأحب الى الله من المؤمن الضعيف) كما جاء فى الحديث الشريف ... فأوقفوا وأحظروا إستيراد وبيع (بقية المهلكات) يعنى إشمعنى الشيشة بس- وإذا القصة حاجه تانية (وأكيد) فأعلموا أن هذه القرار بشكله (المنفرد هذا) قرار خاطئ وغير مقنع و(ناقص) ويعطى مساحة (للتأويل) و(القال والقيل) ، شخصياً لا أندهش من مثل هذه القرارات الناقصة (الما بتخش فى الراس ) فقد عودنا مسئولونا إنهم (دائمن) يجيبوا (الخطأ) وبعدين يركبوا عليهو (القرار) ... أو كما قال أحدهم !!
كسرة :
كان يمكن تصدير الأعداد الهائلة من الشيشة (الكسروها دى) وبيعها أومقايضتها بمواد لتنقية الشرب لتنقية (الطين) القاعدين نشرب فيهو ده !

الرأي العام


تعليقات 16 | إهداء 6 | زيارات 4087

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#21758 [Salah eldin]
0.00/5 (0 صوت)

09-06-2010 01:55 PM
المشكلة ان الشرطة شالت الشيش الباقية قسمتها للاخوان و الاصحاب ومسكين الشعب السودانى الفضل مع تحياتى لك استازى


#19825 [abdu]
0.00/5 (0 صوت)

08-30-2010 02:40 PM
من اين لكم بمظاهر مدنية وتحضر ومسؤلين ليس لهم استعداد للتطور والتحضر


#19683 [زول]
0.00/5 (0 صوت)

08-30-2010 06:38 AM
لعلمكم التمباك والصعوط الحكومة فكرة تمنعهم اول ماجاء الانقلاب سنة 1989 لكن غيرو رايهم والسبب ان اى لورى يدخل امدرمان حامل تمباك من المزارع الى امدرمان بدفع رسوم وجبايات احسن من اى حموله ولعلمكم ان التمباك عليه زكاة تخذ من مزارعه وياريت واحد من المزارعين يشرح لنا باستفاضة اكثر الموضوع ده


#19607 [عاطف]
0.00/5 (0 صوت)

08-29-2010 11:59 PM
لك التحية استاذنا جبرا
بس فى هناك فرق بين الشيشة والسجارة السجارة الواحد ممكن ياخذها وهو ماشى عكس الشيشة ال عايزليها قعدة وجمرة ولمة وحديث فى السياسة ومعارضة وحرب اشاعات وكدة


#19585 [ياسر - الملز]
0.00/5 (0 صوت)

08-29-2010 09:41 PM
مع الاحترام لجميع التعليقات ..
لكن أرى أن مسألة الشيشة والسجائر دي مسألة شخصية ..
يعني واحد بشيش وواحد بدخن وواحد بسف تمباك .. ايه أم اللي دخل الحكومة ياخي إنشاء أموت بكرة انتو دخلكم ايه .. حاتمرضوا معاي ولا حادتفعوا لي حق العلاج ..
وبعدين الشيشة في السعودية اللي أطهر مكان في العالم واللي عمر السودان ما يحصلها ما منوعة بل بالعكس منظمة وبطريقة فنانة في مقاهي خارج الأحياء السكنية .. اللي عاوز يشيش يروح واللي ما عاوز ماحد غاصبوا ..
يجو الحرامية ديل وقال ايه ممنوع الشيشة ..
خلاص وقفت على الشيشة ..
بس إنشاء الله يورينا فيهم يوم ..
ملاحظة صغيرة :
ما ملاحظين أنو الجماعة بيموتوا موتة سييئة اللي تنحرق بيهو الطيارة واللي تنقلب بيهو السيارة .. دي من عمايلهم .. ولا شماتة ..


#19422 [mohsen]
0.00/5 (0 صوت)

08-29-2010 12:56 PM


الشيشه حرام والسيجارة برضه حرام
دى بتتلف المخ والقلب وده بيتلف المخ والقلب
السيجارة مش ممنوعة والشيشة ممنوعه
طب اشمعنا االشيشة ممنوعه والسيجارة مش ممنوعة
يمكن عشان الدخان بندفع عليه جمارك؟
طب يوفروا لناالشيشة وندفع عليها جمارك وضرائب كمان.......!!!
-مع الاعتذار - (لفيلم ثرثرة فوق النيل


#19411 [حذيفة عمر]
0.00/5 (0 صوت)

08-29-2010 12:41 PM
قالوا ابليس قدم استقالتو وقال تاني السودان ده ما بشتغل فيه حتى لو يتوب ما برجع قاموا كبار الابالسه والشياطين عملوا اجتماع طارئ واستدعوا ابليس عشان يعرفوا الحاصل شنو . يوم الاجتماع الجماعة سألوا ابليس : كيف تقدم استقالتك طيب تاني البغوي الناس ديل منو ؟
ابليس : يا جماعة انتوا والله مفروض تمشوا تاخدوا خبرات من ناس الانقاذ ديل . والله الناس ديل خلوني طاشي شبكة . انا والله تاني ما بمشي هناك .
كبير الابالسة : مالك في شنو يا ابليسوا الحاصل شنو ؟
ابليس : ياخي ديل والله الواحد منهم يسرق اموال الناس من غير وجه حق وبعد كده يقوم يكتب ليك هذا من فضل ربي واللهديل مفروض يكونوا معانا في الطرد من رحمة ربنا والله ديل ما خلوا لينا شغلة نشتغلها معاهم
ضج المكان بالضحك العالي ثم تحدث كبيرهم : خلاص يا اخوانا نحنا نمشي نعمل اتفاقية مع الناس ديل انو نحنا نلهى ليهم الشعب بالفارغة والمقدودة مقابل انهم يدربوا لينا بعض الشباب بتاعيننا ديل .......................................................


#19398 [safaragafa]
0.00/5 (0 صوت)

08-29-2010 12:30 PM
عايزين تشيشوا كمان؟ ماكفاية المتعة الانتو فيها ... وبعدين عايزين تكبروا ال G وتروقوا ال D ؟


#19336 [ياسر]
0.00/5 (0 صوت)

08-29-2010 06:09 AM
الوالي جاب البصات ومنع الشيشه يكون في واحد كم الجماعه بعمل في كافتريا اسمها (يشيشون) القرار لصالحه طبعا توجه حضاري عاااااادي


ردود على ياسر
Sudan [ليم دوناتو مانوان] 08-29-2010 12:56 PM
استاذى الجليل/جبرا

انها عقلية غريبة جدا وانا اقسم بالله العظيم بحسب معرفتى بعقلية الكيزان....انها فكرة من ام بنات احد الاصدقاء فى الشلة.وداير يقوموا يعملوا من الموضوع برنامج لزوم رمضان وكدا....رمضان وكدا يا استاذى لزوم الظهور قدام الجماعة....
دوامة فى فنجان سااااااااااااااااااااااااااى شوف بعد العيد بى شويه الموضوع بطلع (مرقه فى شمار سااااااااااااااااااااااااااااااااااى) ديل ناس بتعاع (بوبااااااااااااااااااااار ونفاق ).


#19308 [ام الحسن ]
0.00/5 (0 صوت)

08-29-2010 02:48 AM
اول مره ناس الإنقاذ يعملوا حاجة كويسة ،،، نعم تصدقوا دى اول مره اسمع انهم عملوا حاجة كويسة.
لان ساعة شيشه تساوى 20 سجارة عادية حسب ما سمعنا من الإعلام ،، الا يستحق ذلك منعها بالإضافة إلى ذلك نجد ان الشيشة أتت بممارسات مشبوهه وهناك حديث عن إستخدام المخدرات فيها واشياء اخرى
وعموما الشيشة ممارسه غير صحية ولتكن البداية بالشيشه ونتمنى ان نسمع بحظر التدخين في داخل المباني الحكومية والخاصة ،،،والأماكن العامة اسوة بالدول المتحضرة
من اجل صحة المواطن


#19298 [الحقانى]
0.00/5 (0 صوت)

08-29-2010 01:50 AM
الموجعنى واقفين للحاجات الفارغة فى حلقا الشيشة ومساككة الفتوات الما لابسات كويس وستات الشاى و....و,,,, .معقولة دى الحاجات الناقصانا


#19154 [وحيد]
0.00/5 (0 صوت)

08-28-2010 03:27 PM
المسالة فيها ماكلة و جبايات في الطريق. ناس الانقاذ ديل لجوهم الصهاينة و اليهود و مستحيل يعملوا حاجة كده لوجه الله و مصلحة المواطن!


#19138 [عمر شيخ الدين]
0.00/5 (0 صوت)

08-28-2010 02:38 PM
فجأتن دي شنو!!!!!!!


#19133 [طارق الطاهر]
0.00/5 (0 صوت)

08-28-2010 02:25 PM
فعلا الغلبتو حماتو يربي جارتو
أهو يا ودجبره الجماعة شغالين يعني لازم تعليم ومستشفى ونظافة ماهو الشيشة برضو دليل على انهم شغالين
زي في كسلا اللي بقت مدينة أشباح ماهي كسلا الوريفة ولا التي حبيت عشانك كسلا ولا جنة العشاق ، ولاة أمرنا هناك أول ما بدأوا شالوا ستات الشاي والبياعين في البرندات خلاص يعني ظبتوا كل شيء وديل بس المشوهين وجه المدينة
زمن عجايب


#19130 [Khalid Salih]
0.00/5 (0 صوت)

08-28-2010 02:22 PM
قد اسمعت اذ ناديت حيأ
ولكن (للاسف) لا حياة (لا حياء) لمن تنادى


#19122 [انا]
0.00/5 (0 صوت)

08-28-2010 01:57 PM
القحه ولا صمة الخشم


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة