المقالات
السياسة
هل تسرق الشرطة؟
هل تسرق الشرطة؟
02-28-2016 06:38 PM


بسم اللله الرحمن الرحيم


الحمد لله كأني اسمعكم تقولون: معقولة يا أخي ونحن نأمن الشرطة على أنفسنا وأموالنا وانضباط شارعنا أي نأمنها على أخلاقنا كمان أي نأمنها على عروضنا أيضاً. تجيء تسأل وتقول: هل تسرق الشرطة؟.
أسألك أخي إذا أوقفت سيارتك وأنت لا تعلم هل هذا الموقف مباح أو ممنوع. وطبعاً الخرطوم من أكثر المدن التي لم يخطط لأين تقف السيارات فيها (ربما أن السيارات انهمرت بأكثر مما كان يتوقع المهندسون). الخرطوم الآن سيارات بلا مواقف.
إذا أوقفت سيارتك ودخلت محلاً ليكن مطعماً وأفطرت أو تغديت وعدت إلى المكان الذي أوقفت سيارتك فيه ولم تجدها، ما أول خاطر يخطر لك؟ قطعاً ستقول إنها سُرقت.
دعوا أحد أقاربي يسرد لكم ما حدث له يوم السبت الماضي. (ص) في شارع الموردة أوقف سيارته البوكس شرق مطعم عوضية للأسماك أمد الله في عمر عوضية ومتعها بالصحة والعافية وكلما ذكرت عوضية ذكرت بخير.
دخل (ص) المطعم وخرج منه ليجد مكان سيارته قاعاً صفصفاً. أظلمت الدنيا في عينيه وكاد يصاب بجلطة لهول المفاجأة وما خطر له إلا أن البوكس سُرق.
تمالك نفسه وجلس على الأرض يتحوقل ويذكر الله إلى أن جاء من يعينه على التفكير. يا حاج أمشي افتح بلاغ. ذهب لمركز الشرطة يقول إنه فقد سيارته قيل له مثل هذه البلاغات مكانها النيابة. جر رجله وخرج. لحق به شرطي شاب: يا حاج أمشي حوش تجاني الماحي. يا ابني ألست في عمر أبيك تقول لي أمشي التجاني الماحي ليه؟ رد الشرطي الشاب: يا حاج لا تفهمني غلط هناك حوش للشرطة شرق مستشفى التجاني الماحي تضع فيه السيارات التي تسحبها الشرطة.
ذهب (ص) إلى الحوش ومن الباب وجد البوكس شامخاً وسط الحوش. عليك مخالفة الوقوف الخطأ ادفع 101 جنيه دفع الرجل وفي نفسه يقول: قدر أخف من قدر. طيب سلموني سيارتي، عليك أن تذهب للقسم وذهب للقسم طلبوا منه ما يثبت أنها سيارته من استمارة وإثبات شخصية وفعل. طيب أدفع 30 جنيها (هذه المرة بدون دمغة شفتو الرحمة دي كيف؟) وذهب لاستلام سيارته وسأل لماذا لا تكون كل الإجراءات في مكان واحد؟
عند الاستلام أخذوا منه كل الايصالات وسلموه سيارته البوكس بعد أن ضاع يومه كله وعلا ضغط دمه وهبط عدة مرات. وجاء يسأل ألا توجد
طريقة غير سحب السيارة بهذه الصورة؟ الونش (أو حنفي كما يقول المصريون) به جهاز صوت أما كان يمكن التنبيه قبل السحب: صاحب السيارة رقم كذا عليه الحضور أو سنضطر لسحبها. عندها سيترك السمك ويهرول جارياً. طريقة أخرى لماذا لا تكلبش السيارة في مكانها بالكلابش الأصفر الذي كان سائداً قبل فترة. أم يريدون من ونشات شركة الوكيل دخلاً إضافياً (يا أخوانا شركة الوكيل دي نسوي معاها شنو؟ فحص محتكر وأوناش محتكرة وأسعار مفروضة يحلها الشربكا).
أليس هناك معلومات كاملة عن صاحب السيارة؟ لماذا لا تدخل الشرطة إلى سجل السيارة وتتصل على مالكها وتقول له سيارتك بحوزتنا أملأ جيبك قروش وتعال.
الشرطة لا تسرق. ولكن!

الصيحة
[email protected]


تعليقات 15 | إهداء 0 | زيارات 3157

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1427606 [ابومجاهد]
0.00/5 (0 صوت)

03-13-2016 12:09 PM
المنظومه مربوكه كلها وكل مايتم من اجراأت في الايام ديه خلفه مصالح ماديه و متفق عليها لان الشرطه في كل بقع العالم هي للارشاد و التوجيه وليس الجبايه و البلطجه لكن امرنا لله الواحد الاحد الفرد الصمد وبسم الله ايه لكل ظالم نهايه

[ابومجاهد]

#1422672 [hamad]
0.00/5 (0 صوت)

03-02-2016 03:01 PM
شهدت منظر مشابه في شارع الحرية عند حي السجانة مقابل سوبر ماركت نجوم الخرطوم قبل ثلاثة ايام ... عربة شرطة مرور انتشر عساكرها ( بمفكاتهم و زردياتهم ) لفك لوحات المرور الخاصة بالعربات الواقفة يمين الشارع و اكثرها ( دفارات ). ومن ضمنها كانت تقف عربة ملاكي تم فك لوحة المرور الخاصة بها. والذي كان متواجدا او انتبه لما يجري وقام بدفع الغرامة اعيدت اللوحة لعربته.
طيب ... من باب اولى ان تكون هناك لوحات ارشادية تمنع او تنظم الوقوف في تلك المنطقةو يكون عندهم حق. وللاسف لاتوجد ....او دورية بعربة او موتر او عسكري بصفارة.

[hamad]

#1421837 [وحيد]
0.00/5 (0 صوت)

02-29-2016 03:27 PM
يا زول حكومة المجاهدين دي كلها بتسرق من اكبر راس لي اصغر مداس

[وحيد]

#1421769 [شهادة الميلاد و سجل البلاوي]
5.00/5 (1 صوت)

02-29-2016 01:06 PM
شهادة الميلاد كانت في المستشفي و مسافة ملء بيانات فقط حالياً قالوا السجل المدني (يعني منو؟؟؟؟ الشرطة ما أسوأها من وجهة، بقت شهادة الميلاد دايرة ليها شهرين و أكتر دا لو ما أوراقك راحت في أدراج الرعاع ديل.

و أتمني من الصحفي المخضرم دا يمش سنار شرطة الجوازات قريب من الخزان و شوف العمايل و البلاوي في السجل المدني السئ البغيض وجوه كلها غير مرغوبة لأنها لا تحترم مواطن و لا تقدر عميل و لا تقدر الواجب الذي تقوم به و الرقم الوطني عبارة عن مساحة لجمع أموال المواطنين لزوم تسهيل الخدمة

يا ودالمصطفي لو تكرمت زور المركز بتاع سنار دا و أكشف لينا محن السجل المدني في سنار

مافيهم وجه واحد محبوب و نقول اللهم لا تحوجنا لخدمة منهم و اصرف وجوهنا عن لقياهم و تقول لي الشرطة!!!!!!!!!!!!!!!!!!!!!!!!!!!

[شهادة الميلاد و سجل البلاوي]

#1421738 [اللهم ولي علينا المصلحين أهل التقوي و الورع]
0.00/5 (0 صوت)

02-29-2016 11:47 AM
أي خدمة عند الشرطة تعني الإنتحار و تعني إنك ماش علي وجوه غير مرغوب رؤيتها و غير مستبشر بها ما تقول لي دا القانون لا لا لا لا الشرطة دي كابوس كبير. لكن بتكون مرتاح من الرشاوي و فظاظة التعامل و الروح الفي النخرة في بعض الحالات:
- إنك كوز كبير و ما مقدود يعني لسه مع الإجرام و بطش البشر.
- إنت أو قريبك ضابط (شرطة أمن جيش) المهم
- قريبك دستوري
- جارك بالحيطة جنابو و تعاملك معاو كويس جداً
- دفعت مبلغ محترم لجنابو نافذ و عندو وجود في المركز غير كدا قروشك و راحت (و عارفين حكم الرشوة)

[اللهم ولي علينا المصلحين أهل التقوي و الورع]

#1421729 [في أذي و تعب غير الشرطة]
0.00/5 (0 صوت)

02-29-2016 11:25 AM
الشرطة أي حاجة متوقعة منها غطرسة و قلة أدب و عدم إحترام للمواطن أو العميل. و يا ريت تعمل ليك إستبيان بين المجتمع و شوف كم في المائة ضد الشرطة و أفعالهم، و هم أول من يخالف القانون، ليس من خدمة واحدة ممتازة تقدمها الشرطة. و أي مستند يسل روحك سل.

و في تقديري و خبرتي المحدودة فإن أسوأ شرطة هي شرطة ولاية سنار و إن شاء الله ربنا ما يحوجك لمستند فيها. تليها في السوء و السفة و قلة الأدب و ضيق الأخلاق و جمع المال بإيصال أو بدون إيصال كل الخيارات متاحة هي شرطة المرور (نظام خارج نفسك).

شرطة سنار مرة تانية: إكتظاظ و تكدس مواطنين في مراكز إستخراج الوثائق الثبوتية و سوء أخلاق و إنفعالات الأفراد ما هي إلا عبارة عن مجموعة رباطة و فاقد تربوي ضباط علي جنود كلهم في الهوا سوا و الأفراد هم المصيبة الأكبر. الناس طاشة في المركز كأنهم لاجئين

إستخراج الجنسية في سنار يحتاج ماشي و جاي أسبوع معاك ضباط واسطة أو جيبك كويس يوم يومين، تمش مدني نهار واحد و تبقي مارق. يا أخوانا غيرو لينا شرطة سنار سفروهم عمليات أو الحدود خلي يتعلموا الأدب يا بقو ...........

[في أذي و تعب غير الشرطة]

#1421712 [الحلومر/خريج الابتدائية]
5.00/5 (1 صوت)

02-29-2016 11:00 AM
بصراحة كل موظفي الدوائر الحكومية بالسودان محتاجين لدورات مكثفة بدولة الامارات التي سبقتنا بمئات السنين الضؤئية في المجالات
وهنا بدولة اللإمارات العربية مستحيل الشرطة تسحب سيارتك قبل الاتصال بك ويطلب منك بكل أدب وذوق ان تحرك سيارتك وفتح الطريق وتمنح الوقت الكافي لتحريك سيارتك

[الحلومر/خريج الابتدائية]

#1421695 [محمدوردي محمدالامين]
0.00/5 (0 صوت)

02-29-2016 10:35 AM
اخوي الاستاذ احمد المصطفي سلام

عندي طلب بسيط خارج موضوع الفساد الشرطي هذا الا وهو ان صورة حضرتك المنشوره مع مقالاتك الهادفه في الراكوبه ؛ تشبه لحد بعيد صورة الصحفي الارزقي الواطي الدنئ اسق فضل الله فنرجوا منك سرعة الاستجابه و الابتعاد عن الشبهات

[محمدوردي محمدالامين]

#1421661 [alrshid slih Alnoor]
0.00/5 (0 صوت)

02-29-2016 09:36 AM
نعم الشرطة السودانيه تسرق مدير الجمارك ومدير مكتبو خبر قريشاتنا قالو شنو!!!! نعم تسرق وتسرق وتنهب وتقتل يا عمك خلي الحنك البيش دا

[alrshid slih Alnoor]

#1421565 [اسد الصحراء]
0.00/5 (0 صوت)

02-29-2016 06:50 AM
توضع مخالفة ويدفع عن التجديد وكفي الله المؤمنين شر القتالا.. يا اخي اتصل بالمرور وخد رقم هاتفه واتصل وقول ليهو شيل سيارتك والا نخالفك

[اسد الصحراء]

#1421539 [SUDANESE]
0.00/5 (0 صوت)

02-29-2016 01:21 AM
والله الشرطة اكبر حرامي ..تقول لي الشرطة مابتسرق؟
امال ال٣٠ جنية بدون دمغة دي ايه؟؟؟؟
الامن ، الشرطة و الجيش (القوات الغير نظامية) والقضاء الذي يخاف الله هي نكبة السودان.

[SUDANESE]

#1421501 [ام مهند]
0.00/5 (0 صوت)

02-28-2016 10:27 PM
اولا كصحفي ماعندك اي موضوع ماكل واحد تحصل لقريبه مشكله يدوشنا بيها.
ثانيا:في اي بلد متحضر بحترم القانون اي عربيه تقيف غلط بسحبوها شفت الكلام ده في اكتر من مدينه عالميه ولينا تجربه شخصيه اجرنا تاكسي عشان نستلم عربيتنا ودغعنا الغرامه ومعاها اعتذار.
ثالثا :سحب العربه عقاب عشان الواحد يفكر الف مره قبل مايدخل ياكل سمك وين يوقف عربيتو
رابعا:كصحفي مهمتك تنوير الناس اعرف القانون واحترمو
خامساواخيرا مصيبة السودان في كتاب بعتبرو نفسهم صحفيين الواحد فيهم ماعندو قضيه يكتب عنها.

[ام مهند]

ردود على ام مهند
[سوداني أصيل و الشرطة لسه عليها بدري] 02-29-2016 11:38 AM
اولا كصحفي ماعندك اي موضوع ماكل واحد تحصل لقريبه مشكله يدوشنا بيها.

ما دي عمايل الشرطة إنتي دايرة الأمثلة تكون من وين؟؟ (دا الواقع)

ثانيا:في اي بلد متحضر بحترم القانون اي عربيه تقيف غلط بسحبوها شفت الكلام ده في اكتر من مدينه عالميه ولينا تجربه شخصيه اجرنا تاكسي عشان نستلم عربيتنا ودغعنا الغرامه ومعاها اعتذار.

بلد متحضر مظبوط وين الحضارة هنا و ال 30 جنية بدون إيصال ماشة وين؟؟؟ و شايلين بقية أوراق الرسوم المدفوعة عشان شنو؟؟

ثالثا :سحب العربه عقاب عشان الواحد يفكر الف مره قبل مايدخل ياكل سمك وين يوقف عربيتو

الشرطة ما عندها راس؟؟؟ إعملوا توعية مرورية و حددو أماكن ال parking بتوزيع مناشير إرشادية لمدة كافية لإعلام المواطن

رابعا:كصحفي مهمتك تنوير الناس اعرف القانون واحترمو

الصحفي دا عكس واقع سلوكي يحذر فيه المواطن من بلوي و نهب ذي دا

خامساواخيرا مصيبة السودان في كتاب بعتبرو نفسهم صحفيين الواحد فيهم ماعندو قضيه يكتب عنها.

إنتي عندك راتب من الشرطة أو عندك قريب معاهم و إذا كان الأمر كذلك بتكوني ما واجهتك أي مشلكة كل مستنداتك و بقية القضايا تمام التمام... عشان كدا

[kawda] 02-29-2016 09:42 AM
ام مهند قسيتي على الرجل ، الصحفي كبير السن ومحترم وبيتناول مواضيع حية وكلها تمس معاش المواطن العادي ، انا لدي تجربة مع سحب السيارة بالونش ، كنت واقفا فى مكان قالو ممنوع الوقوف فيهووتم سحب السيارة نوقبل ان تصل حوش الركن لحقتها فانزلوها لي بعد عشرة امتار من سحبها وذلك فى قسم بحي ، وضابط الونش السحاب اسمه مدثر ، ولم يكن معي حينها اي قروش ، انزل سيارتي وطالبني بدفع 101 جنيه غرامة وحمل رخصتي نمعه ، بحث عن معين فى سوق بحري ليسلفني والساعه حينها 4 عصرا ، وبعد عودتي الى القسم لم لادفع لم اجد رخصتي والتي كان يحتفظ بها الملازم مدثر فى جيبه وذهب بها الىة بيته ، فحملت حالي وعدت فى الغد لاسدد واستلم رخصتي ، بالله عليكم في استهتار بحق المواطتن اكتر من كدا ، الملازم مثر بقسم بحري يحمل رخصتي ويذهب بها الى بيته ، اين الانضباط


#1421496 [الهلباوي]
0.00/5 (0 صوت)

02-28-2016 10:19 PM
الوكيل هذه شركة استثمارية تتبع للادارة العامة للتحصيل اقصد(المرور) واستاجرت منزل اللواء م صلاح المدير العام الاسبق للمرور ملاصق من الناحية الشرقية لمبني صحيفة قوون السابق ،، والوكيل هذه مسؤولة عن الفحص الالي وهي نموزج حي لفساد الشرطة.
بعدين ناس الوكيل يجرو العربية لو واقفة صاح او غلط.. دور شرطة المرور في السودان انتهي واصبحت شرطة تحصيل يقودها لواء تحصيل ومعه لواءات وعمدا وفدا ومقدمين ورواد ونقباء وملازمين تحصيل .. نقترح ان تتبع شرطة المرور لوزارة المالية حتي تكون احدي اقسام التحصيل بالوزارة لان دورها الذي انشات من اجله للارشاد والتوعية والتثقيف والتنظيم تحولت الي ادارة تحصيل يطلب منها ربط يومي يجب تحصيله .

[الهلباوي]

#1421473 [tango]
0.00/5 (0 صوت)

02-28-2016 09:30 PM
سحب السيارات اليومين دول موضة .المحيرنى كرين المرور يكون شايفك وانت توقف سيارتك لغرض فى العادة لا يستغرق منك مدة طويلة اقترح بان ينزر بواسطة السارينا لمدة ثانية واحدة

[tango]

#1421435 [عصمتووف]
0.00/5 (0 صوت)

02-28-2016 07:48 PM
نائب البشير : المشاكل التي يمر بها السودان هي ابتلاءات من الله، على الشعب السوداني التضرع إلى الله،

طالب المجتمع بتغيير سلوكه حتى يكون أكثر تحضراً.
بدون تعليق ي باشا

[عصمتووف]

احمد المصطفى ابراهيم
احمد المصطفى ابراهيم

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة