أهو كلو تعاون ..!ا
02-29-2012 01:47 PM

ساخر سبيل

أهو كلو تعاون !

الفاتح يوسف جبرا

لو أن صمويل بيكيت رائد مسرح العبث واللا معقول الأيرلندى الأصل (1906-1989) يعيش بين ظهرانينا الآن لأحنى هامته لنا من فرط العروض المسرحية العبثية واللامعقولة التى أصبحنا نشاهدها على مسرح حياتنا البائس ! والمضحك المبكي أن يمارس معظم هذا العبث باسم الدين وياتو دين؟ الإسلام الذي إذا إبتغي أحد دينا غيره فلن يقبل منه وهو في الآخرة من الخاسرين !
في خطوة غير مسبوقة (في العالم كلو) قامت الأستاذة إشراقة سيد محمود - وزيرة التعاون الدولي ? بتعيين شقيقها (مجدي) مديراً لمكتبها وتقول الصحيفة التى أوردت الخبر بأن المعلومات التى توافرت لديها إن وجود (شقيق إشراقة) معها بالمكتب يعود لقرار أسري على سبيل وجود المحرم ! (لا خلااس إقتنعنا) !!
ويقول الخبر أيضاً ان (مجدي ) ظل يتنقل مع (إشراقة) مع كل منصب فقد كان معها عند توليها منصب وزارة الرعاية الاجتماعية بالولاية الشمالية ثم إنتقل معها حينماأصبحت وزيرة في الحكومة ثم إنتقل معها حينما أختيرت معتمداً للرئاسة بولاية الخرطوم والآن (حط معها الرحال) بوزارة التعاون الدولي!
عليكم الله في عبث أكتر من كده؟ ولا أيه ؟ وعشان أى (فعل غير رشيد) في الزمن الأغبر ده لابد أن يتم تبريره بالقرآن والآيات وكده (على الرغم من أنو الآيات منها براء) تعالوا نقرأ تبرير (الست الوزيرة) لهذه (الجريرة) بس قبل كده (العندو ضغط يبلع حبتو) : لقد بررت الست الوزيرة مسألة التعيين هذه بقصة سيدنا موسى حينما طلب من الله تعالى أن يجعل له من أخيه هارون نصيراً فخاطبه الله جل وعلا مستجيباً لطلبه قائلاً : { سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا فَلَا يَصِلُونَ إِلَيْكُمَا بِآيَاتِنَا أَنتُمَا وَمَنِ اتَّبَعَكُمَا الْغَالِبُونَ } .
العبد لله (ركَّب الفهامة في راسو) حاول أن يعرف أوجه الشبه بين (سيدنا موسى) و (الست إشراقة) وبين (هارون) والسيد (مجدي) وبين (وزارة التعاون الدولي) و(الوادي المقدس) لكنه فشل فشلاً ذريعاً !
فالمسألة ليست لها علاقة بالدين (من أساسو) ولو كان لها علاقة فهى (الإفساد في الأرض) أوليس تعيين الأقارب هكذا ودون منافسة (فساد) في بلد يعاني آلاف الخريجين (الأكفاء المؤهلين) فيه من العطالة والبطالة؟
وعلى ذكر (التأهيل) ، ناس (ذي) ديل مؤهلاتهم شنو؟ وتعيينهم بيتم كيف؟ وعلى أى أساس ؟ يعني أى (موسي) يجيب أخوهو (هارون) والسلام وللا الحكاية خاضعة لمؤهلات تناسب الوظيفة؟ !
طالما ان هذا الأمر طبيعي ولم يعترض عليه أحد (إلا نحنا ديل) فالعبدلله يقترح علي القائمين بأمر الخدمة المدنية (الما شايفين المسألة دى غلط) وضع لوائح خاصة لتنظييم عمل وتعيين (المحارم) إذ أن الأمر لن يقتصر على هذه الوزيرة وأخيها فهنالك الكثير من النساء العاملات بالخدمة المدنية اللواتي لديهن (مدراء مكاتب) وسوف يستفدن من هذه السابقة (غير المسبوقة) وكل واحدة سوف تطالب بـ(اخوها) نصيراً لها ! (ينصر في شنو أنا ما عارف؟)!
على كل السيدة الوزيرة يجب ألا تلام على اصدارهذا القرار المشار اليه فهى تدرك وتؤمن ايمانا راسخا بأن (الأقربون أولى بالمعروف) وطالما أنو (الحكاية كده) والأمر كذلك والمسألة كووولها (تعاون) فالعبدلله يقترح عليها انتداب كافة أفراد العائلة الكريمة وتعينهم فى مناصب تتناسب ومؤهلاتهم فى وزارة (التعاون) الدولي التى تجلس على قمتها ولن يعجزها التبرير والإستدلال حينها بالآية الكريمة من سورة المائدة: {وَتَعَاوَنُوا عَلَى الْبِرِّ وَالتَّقْوَى وَلا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ} !! وأهو كلو تعاون على بر الأقربين !!
كسرة :
ما عارف ليه في مثل هذه الأمور بتذكر قول الشاعر المايوي (وريتنا جديد ما كان على بال) !!
كسرة ثابتة :
أخبار خط هيثرو شنو؟



تعليقات 31 | إهداء 3 | زيارات 4847

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#304117 [Hasco mdani]
0.00/5 (0 صوت)

03-01-2012 07:35 PM
انتو شركة سودابوست دي لاسمعنا ليها اعلان وظائف لامعينات بس طوالي موظفين لازم تستفسرو عن الموضوع ده


#304094 [وحيد]
0.00/5 (0 صوت)

03-01-2012 06:09 PM
ممتاز ... سعادة الوزيرة الاسلاموية و بفهمها المصلحي للدين و استدلالها بالقرآن - دليل اسلامويتها - غير الموفق لا في الموضوع و لا في الحدث، فتحت بابا آخر من ابواب الاجتهاد الفقهي و باب جديد في الفقه... بعد ان سبقها آخرون في " فقه السترة"... الآن بات على كل مدير اسلاموي ان يستفيد من فقه الوزيرة و يقوم بتعيين زوجته او ابنته سكرتيرة له، او ان يفعل كما يحبون هم ان يتزوج سكرتيرته - عرفيا او مسياريا - تماشيا مع فقه الشيخة الوزيرة، و حق لكل مسئول تعيين بناته و اولاده و قد سبقهم الشيخ كرته بتعيين احدى حريمه سفيرا... بس سؤالنا: حرم الوزير السفيرة في بلاد الكفار هل عين لها محارم؟؟؟


#303974 [ود البلد]
0.00/5 (0 صوت)

03-01-2012 01:24 PM
هاهاهاه لا دى قويه يااستاذ جبره والله الكلام البتقول فيهوا ده انا بديت اشك انوا من نسج خيالك الخصب لانوا ياابو الفهامه ده طبعا امر لايصدق كيف يعنى كدى بس ورينا نحن عايشبن وين اصلوا يعنى وصل بينا الحال لهذه الدرجه اذن يامااان ياسودان عليك الامان.

واذا ثوره ثوره وبيت بيت وزنقه زنقه وحاره حاره لطهر البلاد وتخلص العباد من هولاء الجرزان.


تخريمه:

ونرجع الخط


ردود على ود البلد
Sudan [عمر جابر] 03-01-2012 06:51 PM
يا الفاتح جبرا من فضلك راعي قواعد اللغة قبل أن تنتقد الوزراء
1- (أخوها) من الأسماء الخمسة يجر بالياء.
2- إن وأخواتها تنصب المبتدأ وترفع الخبر وذلك عكس كان وإخواتها
وأنت ممن درسوا في وزارة المعارف من زمن زيادة أرباب فما تحرجنا يا دفعة وخلي بت الناس تعيِّن زي ما عايزة بقت عليها بس؟ تحياتي.


#303960 [عبد الواحد المستغرب اشد الاستغراب!!]
0.00/5 (0 صوت)

03-01-2012 12:39 PM
الحساده العليك شنو ياجبره ؟ وكسره قبل الدخول فى الموضوع :قال خبيث المدينه على شرف ما شاع بأن (اللورد) كان برفقة (سيده السودان الاولى الثانيه00دى يقولوها كيف ياجبره عشان تلفق ؟) المهم سيدتنا جميعناكان بقت اولى ولا عاشره شاء من شاء وأبا من أبا !! يقال والعهده على الراوى أن المشار اليها ارضعت اللورد (خمسه رضعات شامله كامله لمن طرش!! فبل الجولات الاوربيه بحثا عن ملاذ آمن للمنهوبات !! وعفارم عليه فالمحرم ما قصر وحلحل كل مشاكلها و(قرط على حكاية مشاكلها دى بالذات) !! اها00 ياجبره عندك إعتراض0 نجى لموضوع الوزيره (فأنا أقترح أن يدعو رئيس المجلس الوطنى لاجتماع إستثنائى والبحث فى هذا الموضوع وأن يصدروا قرارا يقضى بتوجيه مجلس الوزراء لاجراء التعديلات التى تمكنهم من تسمية اى وزيره برفقة محرمها كشرط أساسى لتولى المنصب فى القرار الذى سيصدره رئيس الجمهوريه!! وطبعا الرئيس هيعجبك وهو يصدر قراره الخطيرهذا !! كسره ثانيه :والكلام موجه لزوجات الوزراء (مين ضمنكم أن ازواجكم بيمشوا وزاراتهم عدل ؟ ومين ضمنكم إنهم ما مطبقين عليكن ؟) وليه ما بتطالبوا بوظائف سكرتيرات لازواجكم ؟ 00ولا 00 هى جات على زوج الوزيره (الحمش) الذى إشترط أخوها كمحرم لزوجته فى خانة(محرم مدير مكتب) عشان يوافق على تعينها 00كسره أخيره: أهى دى الرجاله ولا بلاش !!!!0


ردود على عبد الواحد المستغرب اشد الاستغراب!!
Sudan [الجنى] 03-01-2012 08:43 PM
يا عبد الواحد ياخى بالعربى كدا وضح لانو هنا الدار امان وبعدين التوم الشفافية حتى نكون اكثر تحضرا ووعيا من الجماعة علية نطالبك بكشف المستور ومغطى حتى تعم الفائدة وبدون ما يركب عمك جبرة الفهامة فنرجو فقط الوضوح


#303864 [حرامي دجاج سابق]
0.00/5 (0 صوت)

03-01-2012 08:57 AM
يا عمك ديل سرقوا (آبار بترول ) عديل كده ، يعني شنو لو (هارون) سيد محمود سرق كرسي .


#303805 [كلوكلو]
0.00/5 (0 صوت)

03-01-2012 01:18 AM
نحن ماعايزين الأكفاء ولا بنستاهلهم بيعينوا لينا الأكفاء (بكسر الكاف)


#303775 [محمد]
0.00/5 (0 صوت)

02-29-2012 11:20 PM
تحياتى لك يا بروف


#303769 [ود الأبنوس]
4.00/5 (1 صوت)

02-29-2012 11:05 PM
حمدلله علي السلامة يا جبرة

قربنا نعمل كسرة ثابتة زي بتاعة الخط ونكتب فيها أخبار جبرا شنو


#303762 [Heron]
3.00/5 (2 صوت)

02-29-2012 10:48 PM
Alis In Wonder Land اليس في بلاد السودان بلد العجايب والغرائب . الناس تاكل الحرام وعاداااااااادي وتقول كمان وهل من مزيد


#303759 [محجوب عبد المنعم معني]
5.00/5 (1 صوت)

02-29-2012 10:38 PM
مش في شيخ مصري قال الموظفة ترضع زميلها،اهو كده تكون حلت حكاية المحرم وفي نفس الوقت تخلي صاحب الوظيفة الاصلي يكون موجودعلى راس عمله وتكون وفرت على الدولة نفقات تعيين اخوها هارون


ردود على محجوب عبد المنعم معني
Sudan [عمر جابر] 03-01-2012 06:55 PM
وإذا كانت غير متزوجة وغير والدة فمن أين لها اللبن لترضعه للموظف زميلها؟ ولا الرضاعة الساكت بتحل المشكلة؟
دا شيخ مصري من بتوع الفتاوى التيك أوي.


#303757 [المحتار]
3.00/5 (2 صوت)

02-29-2012 10:36 PM
استاذ جبرة لك التحية ولقلمك الرشيق ياخي المسالة كلها ماشية كدا انت دابك عرفت ولاشنو لوكان راجل يجيب زوجته وغالبا محظيته مديرة مكتبه ولو ست تجيب اخوها يحرسها من المرافعين المفترسين المرفعين بعرف جعار اخوة كسرة انت مشيت السوق ولاماشي السوق


#303750 [الزول الكان سَمِحْ]
4.00/5 (2 صوت)

02-29-2012 10:23 PM
يا أستاذ

كحلتك أمبارح فى قناة النيل الأزرق كاشخ بالبدلة الماخمج والكرفتة الموف عاملة عمايل...أتاريهاالعمة كان تحتها ( رأس )والبتاعة الفى علبة السجاير الفى الظرف..الخلتك تهترش دى يظهر إنك من اليوم داك وعِيك

كسرة متحركة:

أنا عايزأعرف باقى العلبة حصل ليها شنو؟؟؟وتقول لى البتاعة ما خدرا


#303726 [ود العوض]
3.00/5 (2 صوت)

02-29-2012 09:09 PM
هذا زمن المهازل يا جبرا ، موسى مكلف برسالة لفرعون وطلب مؤازرة أخيه في هذه المهمة ، لا وجه للمقارنة وهذا دليل على فهمها في امور الدين - ففي المشروع الحضاري ظهرت هذه النكرات - وقد شنت هذه الشافعة هجوم على ابو هاشم مستنكرة احترامه سواء بتقبيل يديه او خلع الحذاء لكن معذورة (الحق ) على من جاء بها لهذا المنصب - نعم من الحب ما قتل !!!
انا ما عارف الشعبية التي تتمتع بها هذه الوزيرة وسط الاتحاديين حتى تتدرج في كل هذه المناصب
كسرة
لن يفلح قوم ولوا أمرهم امرأة


ردود على ود العوض
Sudan [عمر جابر] 03-01-2012 06:59 PM
إشراقة سيد محمود مثل إمرأة فرعون التي قالت: (ربي أبن لي عندك بيتاً في الجنة). محقة ألف مرة في طلب تعيين محرم معها. تريدهي الإسلام الصحيح وتطبيق الشريعة وتأبون يا دعاة الديمقراطية والحرية والإنطلاقة.
إشراقة هي هارون مرسل لفرعون السودان ليريه الشريعة الحقيقية مش شريعة الفتاوى الجاهزة ومعلبة لطلب الطيب مصطفى وأقرانه. تحياتي.

Switzerland [سودانية] 03-01-2012 12:33 PM
السيد ود العوض
لك التحية

و للمعلومية - سياسة اعتبار ان المراة مخلوق من الدرجة التانية سياسة الرجل/ المجتمع الخائف من التطور الانساني و ما يترتب عليه من ان تكون للمراة الريادة و القيادة في المجتمع. اقرا التاريخ القديم و الحديث سوف تري ان الامم المتقدمة هي الامم التي تحترم و ترفع شان المراة.

امثلة
1- هيلاري كلنتون فلح قومهاالامريكان
2- انجيلا ميركل فلح قومها الالمان
3- تاتشر فلح قومها الانجليز
4- سوزان رايس - امريكان برضو.................. الخ

توضيح:-

لا اتفق مع سلوك الوزيرة في ما عرض بواسطة الاستاذ جبرا. وانا ما بعرفا هي زاتها منو و لكن لا ارضي ان يكون الرد عليها من منطلق التعالي النوعي و لعب الادار المرسومة للمراة مسبقا في العقل المجتمعي الرجعي.

التحية للاستاذ جبرا و للمتداخلين


#303716 [kamal]
3.00/5 (2 صوت)

02-29-2012 08:44 PM
ياهودا السودان العصرى بعدسنة1989 والعاجبو يقعد معانا والماعاجبو يورينا عجاج رجليهو ولاشنو ياجبرا ماوزير خارجيتك معين مرتو سفيرة ورئيسك معين اخوانو كلهم ومش عارف مين معين عديلو بس جات لى دى ماتعدهم كلهم


#303663 [lصاد ميم]
5.00/5 (1 صوت)

02-29-2012 07:30 PM
تفتكر احسن ترضع الوزارة كلها عشان تحرم عليهم بناء على فتوى ارضاع الكبير ولا تعين اخوها يبقى ليها محرم


#303657 [محمد حمد النيل]
3.00/5 (2 صوت)

02-29-2012 07:22 PM
و هى الاخت لما عارفة قرآن قدر دة ما إتذكرت قوله تعالى ( و قرن فى بيوتكن )) لييييه ،
و قال رسول الله صلى الله عليه و سلم ( ما ولى احدكم على امر المؤمنين فأقام عليهم والياً محاباة إلا لعنة الله عليه و لا يقبل منه صرفاص و لا عدلاً حتى يدخله جهنم ))
أو فيما معناه

نحن بس لينا الله دة ، الحكومة دى قنعنا منها عديييييييييييل كدة ، امرنا سلمناهو لى خالقنا ، قنعنا من الناس ديل رسمييييى ، ديل بقوا يشيلو البنفع معاهم من الدين و القرآن و يجيبوهو لينا أدلة و ينسوا الباقى و برضو يقولولك ( إسلاميون ) ((دة إنتو طلعتو أى كلام))


#303635 [امين الشريف]
5.00/5 (1 صوت)

02-29-2012 06:25 PM
يا جماعة انتو الوزيرة متزوجة ولى لا ؟؟؟ انا شايف شكلها كده زي المطلقة ..
يا جبرة ما تخدمنا وتشوف لينا الحكاية دي لو مامتزوجة عشان تتقدم لينا وكده

اهو برضو تدخل في زمرة المتعاونين على البر والتقوى ومنها نتوظف ونشوف ليك وظيفة


#303631 [حسن]
5.00/5 (1 صوت)

02-29-2012 06:21 PM
الاستاذ جبرا

من المفترض تخصيص كل وزارة لعائلة معينة... وأهو كلو بر وتقوي
وأي خريج ينتظر الي أن يتم تعين اخته وزيرة
تلاعب باسم الدين من أجل دنيا فانية

نسيت
أخبار الخـــــــــــــط شنــــو؟؟؟؟!


#303573 [ادروب]
5.00/5 (1 صوت)

02-29-2012 04:12 PM
واي وزير يعين نسوانوا الاربعة عشان عينوا ماتزوغ ويكون ارتكب اثم وكدا


عشان يجي نقي يوم القيامة وكدا


#303572 [ود المقابلى]
5.00/5 (1 صوت)

02-29-2012 04:07 PM
بس كمان ما تنسى سبحانه كريم وقدير اذ يقول جلت قدرته فى امثالهم ( تلك الدار الآخرة نجعلها للذين لا يريدون علوا فى الارض والعاقبة للمتقين ) ..
خليهم يسرحوا ويمرحوا فى دنيا التمكين لحين .. لانه هناك خاب مسعاهم ..
عرفنا فى عهدهم فتاوى عدم وجود عذاب الفبر وزواج المسلمة من الكتابى ..
بس حكاية تقمص الانبياء واخوانهم بغرض التمكين .. دى بدعة لم يسبقهم عليها انس ولا جان..وخوفى ان يخرج علينا غدا الطيب مصطفى الذى صرح منذ فترة بفشل المؤتمر الوطنى وان البديل الانسب للحكم هو منبر السلام.. يخرج ويتقمص قصة سيدنا ايوب عليه السلام ويقول مستشهدا بالقرآن ( واتيناه اهله ومثلهم معهم رحمة من عندنا وذكرى للعابدين )..
سبحان الله عشنا وشفنا قصص وآيات القرآن الكريم يستدل بها لتزييف الحق جريا وراء مكاسب دنيوية زائلة..
( قل اؤنبئكم بالاخسرين اعمالا الذين ضل سعيهم فى الحياة الدنيا وهم يحسبون انهم يحسنون صنعا )..صدق الله العظيم


#303570 [علياء]
5.00/5 (2 صوت)

02-29-2012 04:02 PM
قلت لي قالت محرم وينصرها كمان .... والله الجماعة ديل فاتوا الوراهم والقدامهم .... يعني عندهم رد لاى ش ... غايتوا ما بغلبوا حيلة

طيب بالمناسبة دي أنا باقترح فتوى انه اي زميل يعرس زميلته خصوصا لو معاه في نفس المكتب عشان يكون مسععععععول عنها وينصرها على كل الجماعة الطيبين ... كدة يكون التعاون جد جد... يعني بصراحة اشراقة الوزيرة حينصرها مجدي ... طيب فلانة وفلانة وفلانة وكل الفلانات العاملات والموظفات والطبيبات والمهندسات وهلم جرا ينصرهم ويحرسهم منو....

غايتو يا اشراقة يا موضوعك ده فتح على الفلانات فتحا مبينا ... يا غطسنا ولحقنا امات طه

كسرة:

قال لي قال لي يا جنا

قال لي مجدي احسن لي يا جنا


#303560 [sesa]
5.00/5 (1 صوت)

02-29-2012 03:46 PM
اها دا محرم!!!! ووزير الاعلام عبد الله مسار العين مرتو مديرة مكتبو وسكرتيرتو في وزارة الاغلام يقولوا عليهو شنو عليكم الله يقولوا عليهو شنو!!! دي حكومة فاسدة بقيادة المؤتمر الوطني واحزاب المنفعة المشاركة معاهو في الحكومة دي عصابة ضيعت الشعب السوداني الفضل وخلتو مدور لا عارف راسو من قعرو...
حسبي الله ونعم الوكيل ويا رب الخلاص.


ردود على sesa
Sudan [أنا أخو الوزيرة] 02-29-2012 08:58 PM
وما تنسى كرتي عين زوجته سفيرة


#303552 [ابن الحاجة]
5.00/5 (1 صوت)

02-29-2012 03:37 PM
اذا الحكاية كده بكرة حتعين أبوها رئيس وزراء


#303520 [مواطن مخلص]
2.00/5 (3 صوت)

02-29-2012 02:59 PM
بسم الله
فليسمح لي استاذنا الكبير جبره ان اناقضه الرأي هذه المره ليس في المضمون ان الامر فساد فهو فساد ولكنه فساد في الدول المتحضره والغنيه
ولكننا في السودان دعونا لا ننشغل بمثل هذه الامور فالسودان فساده اكبر من كده بكتيييييييييييييييييييير والامور الصغيره نخليها بعد ما تنتهى ازمه البلاد الحبيبه وخروجنا من سطوة الاستعمار الكيزاني الغاشم الذي لم يترك لنا اثرا نسعد به ونباهى بأننا سودانيين بل مازال يدمر في مكتسبات البلاد ويدمر في المجتمع السوداني الذي كنا نفاخر به امام العرب وماادراك ماالمواطن السوداني الذي كان مثل اعلى في الاخلاص والتفاني في العمل والاتقان هاهم اليوم بفعل تدميرهم للاقتصاد اصبح السوداني مثله مثل المصري شحاد حرامي لايؤتمن على اى شئ الا لعنة الله على الكيزان واعوانهم ونسأل الله ان يدمرهم ويخرجنا سالمين يارب


#303513 [asabangi]
2.00/5 (3 صوت)

02-29-2012 02:50 PM
يا أستاذ جبرة..فهامة شنو؟
أول حاجة دى ما وزارات دى بيوت عرس (فيها مالذ وطاب)
إنت أسه بتخلى بتك تمشى بيت العرس براها؟
طيب ياخى مالك على الناس ..سيبهم فى حالهم
كسرة
يا أخوانا عايزين لينا قناة تلفزيونية نسقط بيها الحكومة.


#303497 [Mohamed Omer]
2.88/5 (7 صوت)

02-29-2012 02:31 PM
لو أن صمويل بيكيت رائد مسرح العبث واللا معقول الأيرلندى الأصل (1906-1989) يعيش بين ظهرانينا الآن لأحنى هامته لنا من فرط العروض المسرحية العبثية واللامعقولة التى أصبحنا نشاهدها على مسرح حياتنا البائس.ما ملاحظ انو صمويل بيكيت غادر الدنيا في نفس السنة الجات فيها الانقاذ لانو ما كان ح يقدر يشتغل مع الجماعة ديل في منافسة غير شريفة مسرحو دا كان ابلو وبشرب مويتو


#303496 [sudani-online]
2.00/5 (3 صوت)

02-29-2012 02:30 PM
والست اشراقة دى ذاتها مؤهلاتها شنو؟؟؟؟؟ماسكة وزيرة 20سنة ؟؟؟؟ياربى من أخوات" نسيبة"؟؟؟؟؟؟؟؟؟؟


ردود على sudani-online
Saudi Arabia [دارفوري حزين] 02-29-2012 08:31 PM
اشراقة هذه اتحادية من جماعة زين العابدين الهندي كانت كانت كادر خطابي بجامعة الخرطوم ، اوصلتها سياسه شراء الذمم وتوزيع الكوتات التي ينتهجها المؤتمر الوطني مع المعارضة الي هذه المناصب فبدلت جلدها وصارت تفتي وتبرر مثل الجماعة لزوم الاستمرار في المنصب وكده؟؟؟؟؟ لك الله ياوطني


#303490 [ابو ابراهيم]
4.00/5 (3 صوت)

02-29-2012 02:25 PM
انا خايف عليك يا استاذ جبرا يصير عليك زي الصار علي سيبويه( ولا مش عارف منو) مات وفي نفسه شئ من حتيانا خايف عليك تموت وفي نفسك شئ من(خط هيثرو)


#303483 [nasereddin]
2.50/5 (4 صوت)

02-29-2012 02:17 PM
وما عينوه وما وظفوه ولكن الله شاء...
وعندما أتي الصالح العام برروه بأن الله شاء..
وعندما يغتني الفرد منهم من مال(السحت و السفح واللفح يقولون): الله شاء ...انتو حاسدين الناس ديل مالكم.
وعند الزواج بأربعة يقولون القسمة والله شاء.
وعلي رأي الدكتور بشري الفاضل عندما سمع من زميل لهم فصل بالصالح الخاص الانقاذي يتبعه مبرر انقاذي من جهة الأختصاص :(ان الله شاء).نصح الدكتور بشري الفاضل ذاك الزميل وقال له :(اذهب الي مقر عمل وقل لهم: وما فصلوه ولكن شبه لهم)... وريتنا جديد ما كان علي بال يا انقاذي ... يا انقاذي...


#303477 [zahi]
2.00/5 (3 صوت)

02-29-2012 02:08 PM
تعرف يا ابو جبرا ( صومويل بيكيت ) ده ذااااتو مات سنة 1989 بعد ما اتاكد انو سلم الرايه لي جماعتنا ديل .......... والله يزيل الغمه ...........


#303471 [على ابو الفضل]
3.00/5 (2 صوت)

02-29-2012 01:57 PM
هههههههههههههههها يا بروف....طيب اذا اى وزيرة والا مسؤولة تعين اخوها فبالطريقة دى خريجنا ما حيلقوا وظائف ولا بعد 30 سنة!!!!!!


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة