الحسكنيت
03-04-2012 09:41 PM

الحسكنيت

أسماء الجنيد

طبعا أكيد بتعرفوه هو عبارة عن ثمرة نوع من الاشجار الصغيرة الحجم فى شكل مدور تكسوها مجموعة كبيرة من الاشواك الرفيعة يعنى لو اتلصق بالغلط في أي حاجة ما بخارج منو إلا النار بس.
الشرح المبسط ده، للناس البجوا يقولوا ما بفهموا لغتي الدارجية .
وبإختصار شديد انا قاصدة إني اكتب بالدارجية الموغلة في العامية المحببة لي نفسي ولي كتيرين من من يعشقون لغتنا البسيطة البتذكرنا بي النفس الجميل والزمن السمح القبيل.
فبالله عليكم ما تحرمونا حتى من الإحساس بي زمن ولى وفات بي خيره الكتير وعفويته الكانت ماليانة رضا وقناعة وراحة بال ، رغم حياة التغشف الكانوا عايشنها اهلنا زمان ...
اها نجي لي الحسكنيت القاعد لينا في روسينا من 22 خريف، حسكنيت العدو على قول حبوباتنا ، ما يحلنا منه إلا الله من فوق.
الحسكنيت طبعا بجي يتلصق فيك برا سبة وسبب، وغير يضر ما بنفع ابدا ،قاعد للناس للأزية, يطعن ويجرح ،ويخربش، ويخرب البجي قريب وحتى البعيد ، خدارنا البقوم في الواطة دي وبي مطر الله بنغز وسطه الحسكنيت ،وبحرق حشاهو وينشفو واقف طولو ، قدر ما تحاول تقلعه وترتاح منه مافي فايده . في النهاية المزارع البسيط بيضطر يحرق المنطقة الفيها الحسكنيت عشان يرتاح منو كلو كلو . حتى ولو يحرق نص زراعته...
اها ده حالنامع الإنقاذ. ملصقين ومتلصقين وغير الضرر ما منهم فايده . ويتلصقوا في البخصهم والما بخصهم, نشفوا البلد وحتو صفقها الأخضر وخلوها متل الحراز وقت الخريف , غبشة وتصاصي مع الريح, مهمتهم الجو داخلين بيها البلد هي الدمار والخراب,
فكوهم فينا زي النارفي الهشيم،وكأنهم طالبين الشعب مغايس كتيرة، قدر ما يرفع الشعب راسو يدوه عكاز . ويقصوا في رقاب البلد ، هدوا كل المبني وهدموا كل القيم والأصالة,العمارالبنوه القبالهم لتعليم الاجيال ، كلو انتهوا منه ، المتعلمين والفيهم الفايدة في كل التخصصات من ابناء الوطن الواعد, فروامن البلد وقنعوا من خيرا فيها,وهم لسه ملصقين يطعنوا في الفضل من الغلابة , يتاتوا في المرض ويتكلوا فيه لامن يوصلوه خشم البيوت ويمشوا يخلوهو يقرض الغلابة الفضلوا ديل، قفلوا كل المستشفيات وحرموا الغلابة من العلاج، العندوا ملايين يتعالج في مستشفيات وزير صحتهم ، والمعلم الله، يجهز كفنو ويرجي يومو. كتيرين بتمنواالموت من حالةالوجع والألم والبهدلة الحاصلة عليهم ،والناس الحسكنيت ما هاميهم ،وكمان دايرين يكتلوا الفضل عشان فهمهم إنه البلد دي حقتهم براااااهم ولا في زول بقدر يقول ليهم بغم ...
حتى حرية التعبير وقولة الحق قفلوها في الحلوق ، أي زول ما عاجبو الوضع وقدر يفرفر ويقول كلمة يبلعوها ليه ناشفة، صارفين قروش البلد لي عذاب الناس وإذلالهم!
القروش البصرفوهاعلى الما يتسمى الأمن براها ميزانية ، ممكن تستفيدوا منها في التعليم الحارمين منه الناس الما قادرة على رسومكم الخيالية!
البخالفكم الرأي كلو بتلحقوه أمات طه،وبعدده وقدر القروش الفضلت جنتدوا ليها ناس مختصين يهجموا على المواقع الألكترونية والصحف المحليه، عشان فضحوا فسادكم الريحتوا فاحت وزكمت أنوف كل العباد ، داخل وخارج البلاد.
تحاربوا في الصحف المحلية والمواقع الألكترونية برا خجلة! عشان تضاروا فضائحكم الما بتتغطى ولا بتضارا، همكم كلو تسرقوا وتموتوا بي سرقتهم ، لا من شاف لا من درى!!
هسه القروش البتصرفوا فيها لمحاربة المواقع (الراكوبة مثال ) مش اولى بيها المرضى الما لاقين علاج ؟
لو صرفتوها على المستشفيات وعلى المرضى المشتتين قدام المستشفيات راجين من يرحمهم ،
خاصة مرضي الكلي الحالتهم تحنن الطير في السماء مش كان أرحم بدل مبارين المواقع والجرائد كل يوم قافلين مكتب صحيفة وكل يوم معتمين على موقع من المواقع الألكترونية
الكلام عنكم زاتو كمل، وما زال فسادكم مشرور في السهلةللغاشي والماشي، تضاروا شنو وتخلوا شنو؟ الأصبع الواحد ما بغطي الوش !!
غايتو يا الحسكنيت يشيلك مننا اليوم البخيت ،،،،،،

متاوقة
ــــــــ
نرجع ونقول مهما حاولت تتخلص من الحسكنيت بطعنك !!!
يمهل ولا يهمل
ودعتكم الله


تعليقات 3 | إهداء 4 | زيارات 2391

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#305559 [ود الجد]
1.00/5 (1 صوت)

03-06-2012 10:10 AM
وماذا عن القراد والمرقوت وغيرها ..
املين ان تجدي لها متشابهات
لك الود


#305505 [موطن غيور]
1.00/5 (1 صوت)

03-06-2012 07:56 AM
باين عليك بنت ترابلة وفلاحين لكن اتحداك لو تعرفى ( البرم والخريم والعليف )


#305188 [زول]
1.00/5 (1 صوت)

03-05-2012 03:30 PM
- شي تك دهـ قنعانا من البلد طب .

- الله كريم يا بت الناس .


#305102 [ود امدر]
1.00/5 (1 صوت)

03-04-2012 11:56 PM
حمدالله على السلامة ياسوما


ردود على ود امدر
Netherlands [ثائر ضد الفساد (حبذا)] 03-05-2012 04:20 PM
بنت الجنيد كتاباتها رهيبة وفي الصميم غايتو يا بنت الجنيد انت ما براك
اما تكوني
عبقرية
او فلتة من فلتات الزمان
او عندك اندراوة

لكن في كل الحالات انت فاكهة الراكوبة


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة