ص د ف
03-05-2012 06:46 PM

الفاتح جبرا - ساخر سبيل

ص د ف

سألتني صحفية نابهة كانت قد اجرت معي حواراً بصحيفة (الجريدة) حول إذا كان ما نكتبه يقوم المسئولون بقراءته والتفاعل معه فأجبتها بأن المسالة تعتمد على سماكة وتخانة (جلد) المسئول ولو شئت حينها الدقة لقلت لها بانه من حكم (النادر) أن يجد ما نكتبه صدى ومتابعة من المسئولين وما (كسرتنا الثابتة بإذن الله) إلا مثلاً حياً (لطناش) المسئولين !! هذا الطناش الذي يمكن أن يؤدي إلى كثير من (الإحن) والمآسي ودونكم أعزائي القراء هذا الخبر الذي يقول أن مدير عام وزارة التوجيه والتنمية الاجتماعية بولاية الخرطوم (التجاني الأصم) قد كشف عن دراسات توصلت إلى وجود 140 ألف تلميذ وتلميذة بولاية الخرطوم لا يتناولون وجبة الإفطار !تأمل عزيزي القارئ هذا الرقم جيداً حتى تدرك حجم هذه المأساة وإلى اي مدى وصل بنا الحال المخزي وآل إلينا المآل المحزن إذ يذهب هؤلاء الصغار وهم يرتجفون من زمهرير شتاء (البكور) يتأبطون كتبهم وعند (فسحة الفطور) لا يجدون ما يدخلونه إلى بطونهم الصغيرة الخاوية !
لا تسألني يا صاحبي عن مسئولية الدولة في إطعام هؤلاء الآلاف من التلاميذ الجياع فالدولة يا عزيزي ليست مسئولة عن المواطن ألا تطالع في الصحف المواطنون المرضي وهم يناشدون (ذوى القلوب الرحيمة)؟ كي يمدوا لهم يد العون حتى يبقوا على قيد الحياة ؟ ثم أن الدولة ممثلة في (أمنا الحكومة) مشغولة بمحاربة الفساد الذي اوصلنا إلى هذه الحالة (المزرية)فهاهي تضع خمسة ملفات فساد (كتيره والله) أوليس هذا العدد من ملفات الفساد التي هي حصيلة 23 عاماً من تولي العمل العام مؤشراً لطهارة اليد التى ظهرت نتائجها وبان حصادها في هذه الأجساد الصغيرة التى تحتاج إلى النمو ؟ ألم تسمع يا صاحبي بتلك المقولة التى تنسب إلى سيدنا علي كرم الله وجهه والتي تقول (ما أغتنى غني إلا بفقر فقير) !! وهل هنالك بشاعة أكثر من خواء هذه المصارين الصغيرة من كسرات خبز تقمن أصلابهم النحيفة ؟ نعم يا صاح ها هو الفقر يطل عياناً بياناً في أبشع صوره كما تطل الدراهم بأعناقها (ذات العماد) !
لا تسلنى يا صاح عن المئات من منظمات (البر والشهوة) الخيرية الطوعية لماذا لا تقوم بمساعدة هؤلاء التلاميذ الفقراء ؟ فهذه المنظمات يا صديقى قد قام بإنشائها مواطنون (بررة) من أجل الإستفادة من الإعفاءآت الجمركية وشيكات الدعم (الخليجية) وهم من بعد ذلك يرجون من الله ثواباً !
أما إن سالتني يا صديق عن (الرأسمالية الوطنية) ودورها الذي يجب أن تقوم به من أجل توفير (لقمة) لهؤلاء الصغار فأقول لك رحم الله (الرأسمالية الوطنية) التي كنا نعرفها والتى كانت تقوم بتشييد المستشفيات والمراكز الصحية والمدارس ، رأسماليو اليوم (هم فاضين من تسجيل اللعيبة) !
لا تسألنى يا صاحبي (الحل شنو؟) لانني سوف أقول لك ببساطة (هي يعنى بقت على فطور الأولاد ديل) ؟ ما القصة كوووولها بايظة .. عشان الأولاد ديل يفطروا لازم قروش (كتيره) ترجع وتساهم في حل الأزمة دى .. زى قروش الإنقاذ الغربي ، قروش المدينة الرياضية ، قروش قناة الضحى،قروش الأقطان ،قروش الشنو ما بعرف داك ، القروش دي لازم ترجع عشان الأولاد ديل يفطروا ، هو أصلو (اللبع البدون رحمة ده) هو الأوصلنا للحتة دى !!
لعلك ايضاً تسألنى يا صاح : طيب أفرض (القروش) القلتا عليها دى ما رجعت ، العمل شنو؟ أقول ليك : بسيطة طواااالي نعمل (ص د ف) .. صندوق دعم الفطور .. ما قبل يومين تلاته نادينا بعمل (ص د ق) صندوق دعم القسطرة .. وقبل أيه مش تعرف كده نادينا بعمل (ص د ر) صندوق دعم الرادار ... نحنا تطير عيشتنا ما حياتنا كوووولها بقت عاوزه ليها (صناديق دعم) !!

كسرة :
نسيت .. وقروش الخط كمان ترجع !
كسرة ثابتة :
أخبار خط هيثرو شنو؟


تعليقات 14 | إهداء 0 | زيارات 4679

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#306089 [ود شندي]
0.00/5 (0 صوت)

03-07-2012 01:01 AM
في السعودية كان يطلب من طالبات المدارس خصوصا الذين هم في الفصول الأولي أن يحضرن مع وجبة الفطور فاكهة ولبن أو حليب وتمر ولكن نحن أبنائنا في السودان لا يستطيع الواحد منهم احضار عيشة حافة يشرب عليها موية من الماسورة أين أنت ياعمر من عمر حيث قال لو عثرت بغلة في العراق لسألني الله عنها الله يحرقكم في الدنيا قبل الآخرة يالصوص


#305935 [Heron]
1.00/5 (1 صوت)

03-06-2012 08:29 PM
التحية لك الاستاذ الفاتح جبرا.
الحكاية دي ما بدات الان بل منذ ان جاء الانقاذيون اللصوص واستلموا البلد . بدات المعاناة منذ ذلك الوقت الناس يعانون حتى الاطفال الفي رحم الغيب يعانون من هؤلاء اللصوص.ما سلم منهم شي حتى الارض بثت شكواها الى الله منهم . السودان ما كان كده ولا من المفترض يكون كده .لكن في ناس مستفيدين على حساب غالبية اهل السودان. في شي ما مظبوت . اللبع التحت تحت والارض جو المنظمات والمشاريع وغيرو وغيرو. الايام دي قايمين لينا في دعم المدينة الرياضة ياتو مدينة دي . تاني مدينة رياضية وقصص لبع جديدة واساليب جديدة ما عادت تنطلي علينا.اتمني انو يدعمو الفطور اولى الاطفال المساكين ديل .اتمنى القى حاجة واحدة ماشة مظبوط في السودان .الحاجة الوحيدة الماشة صاح تمام منهجية السرقة والبلع النهب البيمارسوهو تماسيح الانقاذ كبار وصغار. والله الواحد قرب يفقد الامل في انو البلد تتصلح. تماسيح زي النار في الهشيم تقش وتكنس كل شي لا بتخاف من ربا" يحاسبا ولا قبور منتظرة تلمهم. حسبي الله ونعم الوكيل


#305867 [حسن الأفندي]
5.00/5 (1 صوت)

03-06-2012 06:09 PM
الأخ الفاتح جبرا
تحياتي
أول مرة سمعت بيك وأنت بضيافة النيل الأزرق ومعك زميل الدراسة لي طبعا عمك جعفر سيد أحمد وحقيقة أول مرة أقرأ لك .... ليتني ما قرأت .... فقد خرجت بحزن عميق غاص في أعماق الأعماق متخيلا جوع أبناء من التلاميذ ’’’’ أحزنت شاعرا حتى الثمالة .... هاهي دمعة تسيل على خدي وبالرغم مني
لك ولهم ولنا الله , ولو كان الفقر رجلا لقتلته
ولن أمشي السوق لعلمك لخلو جيبي بعد هجرة امتدت لأكثر من ربع قرن فآثرت لزوم بيتي لا أخرج ولا أرى ما يؤلمني
يا فراج الهم والغم يا الله


#305748 [اعز مكان وطنى السودان]
0.00/5 (0 صوت)

03-06-2012 02:19 PM
طبعا حاجة محزنة ومخيفةجدا فى نفس الوقت لانه معروف الدماغ بيعتمد اعتماد كامل على الجلكوز ,,, وهؤلاء الصغار مع مرور الوقت ستتأثر ادمغتهم وسينتج جيل عاجز عن التفكير والابداع وحتى الفهم ,يعنى بعد سنين لا علم لا ابداع ولا حتى اشخاص سوية لك الله يا بلدى ,,,,,


#305568 [عبدالحميد]
5.00/5 (1 صوت)

03-06-2012 10:21 AM
صاحبيالاثير اراه اغرب المخلوقات ! لو عايز تموت من المرض ما بشتغل بيك شغلة ! اول ما متّ (لاقدر الله) يظبطك تظبيط الشماسة لصحن الفول ! دا سيوبر انقاذي ولا شنو ؟ !


#305525 [محسيه]
5.00/5 (1 صوت)

03-06-2012 09:25 AM
ياريت لو الموضوع يقيف علي الجوع اتخيل الام والاب شايفين عيالم ماشين المدرسه بدون فطور حيكون بفكروا في شنو ؟؟؟؟؟؟ يعملوا اي حاجه عشان يوفره يسرق يشحد يقتل اي شئ ممكن يعملوا_ الله ينعل الحكومه مليون مره


#305433 [إبن الجزيره اللامة الناس]
4.00/5 (4 صوت)

03-05-2012 11:50 PM
الفاتح يا أخوى الناس كتر خيرها عملو لينا منظمة حسن الخاتمة وعفونا من رسوم دفن الموتى وده الباب الوحيد اللى ح نمرق بيهو كلنا أنا وإنت والبشير والمتعافن وضار الضار


#305415 [ود البلد]
5.00/5 (3 صوت)

03-05-2012 11:02 PM
يالله تلطف بعبادك انت حتفضل كده استاذ جبرا تكتب ونحن والاخوان نعلق لمتين يعنى
ورونا ياناس الحل شنو عشان ننقذ ماتبقى من الوطن والمواطن.اها المسعولين مابقروا وعاملين اضان الحامل ضرشه نخلى اهلنا ديل يموتوا؟


#305403 [kamal]
4.00/5 (6 صوت)

03-05-2012 10:23 PM
باقى يدخلونا نحن فى صناديق ويبيعونا تجارة اعضاء للدول الغنية مع انو ماحيلاقو اى عضو شغال فينا ويستعيذوا بالله ويقولوا ياربى السودانيين ديل كانواعايشين كيف؟


#305375 [الزول الكان سَمِحْ]
5.00/5 (4 صوت)

03-05-2012 09:37 PM
أخبار سودانلاين شنو؟؟


#305333 [ودامدرمان]
5.00/5 (3 صوت)

03-05-2012 08:31 PM
الاستاذ جبرا
لك التحية كلها ولكلماتك





تخريمة:
داير لي فهامه لانو العندي بقت تشخشخ
بس ماتكون Made in China



تضامن جبرا:
اخبار خط هيثرو شنو؟


#305331 [ودامدرمان]
5.00/5 (2 صوت)

03-05-2012 08:30 PM
الاستاذ جبرا
لك التحية كلها ولكلماتك





تخريمة:
داير لي فهامه لانو العندي بقت تشخشخ
بس ماتكون Made in China



تضامن جبرا:
اخبار خط هيثرو شنو؟


#305317 [عشا البايتات]
5.00/5 (3 صوت)

03-05-2012 07:54 PM
والله الكلام القلتو ده أنا دمعي سال عشانو وما شايف كفاية وياريت تكون في مبادرة بس برة ميادين اللبع المذكورة عشان الناس تساهم في حل المشكلة لأنو كلنا مسئولين أمام الله والوطن والذي تولي كبره من حزب أو فرد فالله وعد بعذابه ووعده الحق... المفروض والله تستقيل حكومة البلد دي لحدي مستوي مدراء الادارات علي الحاصل ده .. وبرضو يقول ليك أنقذونا ياخي كان تخلونا في حالنا بلا انقاذ أخير ... أخي جبرا وأنت لا تعرفني كلامك هذا يلخص أزمة بلد بحالها تتمايع في الأولويات ويضيع أهل الحق...وما لنا غيرك يا الله..


#305299 [كلوكلو]
5.00/5 (2 صوت)

03-05-2012 07:22 PM
لازم ياجبرا نعمل (ص د ح ش) صندوق دعم حياة الشعب.....ولا أيه رايك؟


الفاتح جبرا -
الفاتح جبرا -

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة