ويلتهمون الشعيرية باللبن ..!!
03-06-2012 09:53 PM

إليكم ....

ويلتهمون الشعيرية باللبن ..!!

الطاهر ساتي
[email protected]

** أحد أعمامي، عليه رحمة الله، كان يحب الشعيرية باللبن، ويحرص عليها في وجبتي الإفطار والعشاء، ويغضب حين لايجدها على المائدة .. وفي اليوم الأول، من رمضان ما، جهزت له زوجته وجبته المفضلة بحيث تكون وجبة إسحار، ونبهته :( يا عبد الكريم صحيني في السحور، خلاص جهزت ليك شعيرية باللبن)، ثم غادرته الى حيث غرفة أطفالهما.. بعد ساعة فقط، سمعت النداء : ( يازينب خلاص وقت السحور جا، قومي جيبي الشعيرية)، وكان التنبيه قبل أوانه ، فنبهته : ( السحور وقتو لسة ياعبد الكريم، نحن لسة ما نمنا، قول بسم الله )..وبعد ساعة أخرى، تكرر ذات النداء وذات التنبيه..ثم بعد نصف ساعة، وبعد ساعة أيضاً..فانزعج أصغر الأطفال، وصاح في والدته : ( يا أمي أبوي دا لو ما أكل الشعيرية دي ما بيرتاح، ولا بيخلينا ننوم، قومي وديها ليهو) ..!!
** وهكذا تقريبا غرام الحكومة وهيامها بالتخلص من مشافي وسط الخرطوم، بالبيع .. وحالياً لن ترتاح الحكومة، ولن تدعنا ننام، ما لم تتخلص من مستشفى العيون، وكذلك مستشفى الخرطوم..نعم هذا المرفق المقابل النيل، ثم ذاك المقابل كبري المسلمية، بمثابة شعيرية شهية تحرص الحكومة على إلتهامها عاجلا، أي قبل الأوان .. ونعني بأوان الأوان ( تجهيز البدائل ).. وإعلاناً بانتباهة البارحة أدهشني جدا .. إذ قراءته بحاجة الى مجهر، تم نشره في الركن الأسفل بالصفحة التاسعة، ويقول بالنص : يعلن السيد رئيس اللجنة المشرفة على إجراءات بيع مستشفى العيون بالخرطوم عن عطاء بيع المستشفى، ويمكن الحصول على كراسة العطاء من الإدارة العامة للعقارات الحكومية، وآخر موعد لتقديم العطاء الثلاثاء 27 مارس 2012.. والله المستعان ( دي من عندي)، اذ لم ترد في نص العطاء، ولاحول ولاقوة إلا بالله ( د ي كمان من عندي)، وإنا لله وإنا اليه راجعون ( دي كمان برضو من عندي)، وكان على رئيس اللجنة أن يختم بها نص إعلان المزاد، إذ ليس من العدل أن يقرأ القارئ اعلان بيع مرافق كهذه بلا (تحوقل )..!!
** ونسأل سادة الدلالة بمنتهى الشك والريبة : لماذا حجم اعلانكم قزم بحيث يكاد ألا يرى بالعين المجردة؟..ليه مايكون بحجم صفحة كاملة ؟ وفي كل الجرائد؟..عندكم مشكلة قروش مثلا ؟..بالتأكيد، لو ماعندكم مشكلة قروش تبيعو مستشفى بي حالو؟..ثم لماذا زمن العطاء بكل هذا الضيق الذي لاتتجاوز فترته أسبوعاً وآخر؟..يمكن زول في بلاد الواغ واغ عندو الرغبة يشتري، وقروشو كتيرة، يجيكم كيف خلال أسبوعين؟..مالكم مستعجلين كدة؟، ولا الواحد فيكم ما بيقدر ينوم لو ما أكل الشعيرية باللبن زي عمي داك؟..المهم، هذا عن شكل إعلان بيع مستشفى العيون، وهو شكل يوحي بأن العطاء ليس بشفيف ولامريح، هذا ما لم يكن عطاءً بمثابة (تحصيل حاصل)..وبالمناسبة، حكومة ولاية الخرطوم لم تعلن حتى يومنا هذا عن البديل المناسب، بحيث يكون (مستشفى عيون)..نعم اللجان لم تجد المكان المناسب، ولاتزال في مرحلة (اللف والدوران)..وبيع هذا المرفق الحيوي قبل تأهيل آخر حديث - كما ينص القرار الرئاسي - محفوف بالمخاطر يا والي الخرطوم..شيدوا البديل الحديث - بمواصفة مواكبة - ياعالم، ثم بعد ذلك ( أكلوا الشعيرية باللبن)، وما تشتهون ..!!
** أما مستشفى الخرطوم، لقد نفى والي الخرطوم رغبة التجفيف.. ولكن الواقع لاينفي تلك الرغبة.. لقد تم صدر قرار تجفيف قسم النساء والتوليد منذ أسبوع ونيف .. خير و بركة، إذ ليس من العقل أن تتمخض المرأة في جبل أولياء ثم تقطع كل هذه المسافة لتلد في مستشفى الخرطوم..وأقساما كهذه يجب توزيعها وتأهيلها في مشافي المحليات والولايات، بحيث تكون مجاورة لمساكن الناس ومخاض زوجاتهم، وإذا نجحت خارطة الحكومة الصحية في توزيع عادل كهذا، فلن يجد تجفيف قسم النساء والتوليد عن مستشفى الخرطوم باكياً.. وكذلك صدر قرار ترحيل المشرحة الى مستشفى بشائر، وهذا الرحيل أيضا خير وبركة..فالتزاحم أمام مشرحة الخرطوم كان مزعجاً ومعيقاً للمارة والسيارة، ثم مشرحة الخرطوم ذاتها - ناهيك عن جثامينها- بحاجة الى مشرحة، إذ رائحتها تملأ فضاءات حولها..المهم، كل المستشفى، وليس قسماً أو أقساماً، يجب أن يرحل الى الناس في ولاياتهم ومحلياتهم ومدائنهم وأريافهم..نعم كل الولايات والمحليات بحاجة الى تأهيل مشافيها بالعدة والعتاد، بحيث لايتكبد المريض ومرافقه مشاق الرحيل الي وسط الخرطوم بحثا عن العلاج..وإذا تم تأهيل كل المشافي الطرفية كمايجب، بحيث يرضي الناس ويرفع عن كاهلهم مشاق إفتراش الأرض تحت أشجار مستشفى الخرطوم، فأن التجفيف سوف يحدث تلقائياً، وبلا ( قومة نفس)..خارطة البلاد الصحية بحاجة الى توزيع عادل للمشافي، ولكن سادة التخطيط في بلادي لايتقنون من كل أنواع التخطيط غير إلتهام ( الشعيرية باللبن ) ...!!
............
نقلا عن السوداني


تعليقات 11 | إهداء 0 | زيارات 3656

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#306570 [atif]
0.00/5 (0 صوت)

03-07-2012 09:20 PM
اسبو واخر بس ؟ المشترى جاهز ولا ايه


#306376 [الزول الكان سمِحْ]
0.00/5 (0 صوت)

03-07-2012 01:59 PM
وأيضاً الرز بالكاستر ...ياطأأأأهر


#306323 [hajabbakar]
0.00/5 (0 صوت)

03-07-2012 12:48 PM
مستشفى العيون تم بيعه مند زمن طويل والجماعة قبضو قبضتن
تجار الدين لايخافون الله وكل همهم الاكتناز وليس المواطن الدى ينتظر تطبيق النسخة الثانية من شرع الله المستهدف
الادارة الامريكية كانت تنفى مرارا وتكرارا نيتهافى تقسيم السودان ابان محادثات خازوق نيفاشا ومن يومين نفى مسئول اميريكى نيتهم فى تقسيم السودان واقتطاع جنوب كردفان والنيل الازرق ودارفور
وساستنا ينفون كما الادارة الاميريكية ولكنهم سيلتهمون الشعيرية باللبن وفى النهاية سنجد انفسنا بلامستشفيات والمستشفيات الخاصة على قفا من يشيل
تخلف البلاد تعرفه من كثرة العيادات الخاصة والتى صارت اشبه بالبقالات وفى كل البلاد الغير متخلفة تجد المستشفيات المؤهلة والمجهزة دون حاجة للمواطن التعيس بالتوجة الى بقالات اومولات العلاج
تجار الدين يبيعون كل شئ يدر مالا واخوان الشيطان يسيل لعابهم لكل شئ ياتى بالمال ولوكان الشرف ناهيك عن المستشفيات الملاد الوحيدللاغلبية المطحونة بالغلاء والفقر المدقع


#306295 [kamal]
0.00/5 (0 صوت)

03-07-2012 12:09 PM
مقالك خطيركالعادة ولكن ليك وللقراء الاعزاء انك جبت المفيد فى اخر المقال وهو اكل الشعيرية بس ولو انا جانى عليهم ورينى اى حاجة باعوها قبل كده كان قبلها فى تجفيف ولا هى اصلا فكرة التجفيف بدور فى عقولهم اما بتوع التخطيط والاستراتيجية ديلا كمان اسكت ساكت دكتور ماعارف اسموالاصم ودكتورتانى برضو ايه كده الترابى كان منظر فى حرب العراق لو فاكرينو عايزين منهم بس يخططوا يعملوا استراتيجيات ذى ماهم عايزين بس يرجعوا لينا سودانا وخرطومنا الزمان ديك ؟ اى قبل 89 يوم سرقوها ضحى؟


#306257 [سند]
0.00/5 (0 صوت)

03-07-2012 11:18 AM
اقتباس؛..يمكن زول في بلاد الواغ واغ عندو الرغبة يشتري، وقروشو كتيرة، يجيكم كيف خلال أسبوعين؟..مالكم مستعجلين كدة؟،انتهي . طبعاً ياطاهر ذي ماقلت ليك قبل كدة نحن حنساعدك ونبرد بطنك بالكلام المباشر جماعتك مستعجليين لانهم علي يقين بان شمسهم قد مالت تماماً للمغيب فصاروا اكثر سعراً لنهش ماتبقي من مال عام، نهش شنو هم خلوا حاجة ينهشوها، والله ديل شغالين قرمشه عديل كدة يعني حالفين حتي عضامنا يقرموشها والذي لا اله الا هو لنرجعكم حفاة عراة كما كنتم و يا وداد بابكر حنرجعك للحتة الخلاك فيها ابراهيم شمس الدين ولو ما فاكرة افكرك ايام بيت حي المطار ،ايام الشحفوفة، والاختشوا ماتوا يا.....سيدة السودان الاولي . .


#306151 [سند]
0.00/5 (0 صوت)

03-07-2012 07:17 AM
يا ناس ياهوو ياشباب يا سودانيين المال مالكم والمستشفي حقتكم لماذا تفرطوا في حقوقكم لهؤلاء الاوقاد المرتزقة (فمن لم يزدد عن حوضه بسلاحه يفرة)لماذا البيع من اصلو ولماذا يكون بهذه الضبابية .بالله عليكم يا شعب السودان الناس ديل عماليين يمرحوا ويبيعوا ويشتروا في البلد و نحن نردح ذي الحريم امام اجهزة الكمبيوتر. اقسم بالله العظيم لو لم اكن خارج البلاد لقدت اعتصام داخل المستشفي احتجاجاً علي هذه الدغمسة والضبابية والفساد شوية عِرر ذي ديل يخموا البلد ونحن نتفرج .يا سادة عدم الشفافية هذا يدل علي سوء النية وفساد الذمم وهذا كفيل باعتصامكم داخل مستشفاكم.والله يااخوة الواحد بيكرج في سنونو غضباً.اخي الطاهر الكلام دة ليك انت ابتداءً فماذا انت فاعل .


#306115 [Sudani]
0.00/5 (0 صوت)

03-07-2012 02:26 AM
Shortly , we will read an advertisement for selling the whole Sudan . No surprise as long as the Sudanese investments in Malaysia around thirteen billion dollars , did you know why the public utilities of Khartoum being sold in public auction . Don"t worry people will get back these utilities when Al-ingaz gang held captives in the hand of revolutionaries


#306104 [جنوبي]
0.00/5 (0 صوت)

03-07-2012 02:00 AM
الطاهر الشعيريه القاسيه دي !! ياخي ديل لاقنها زي حلاوة قطن ونحنا نعجب نشيل و نحلف فوقم الرسول تاكلوا تاني .


#306091 [ود شندي]
0.00/5 (0 صوت)

03-07-2012 01:07 AM
جزاك الله خير ياساتي أنا من زمان محتار كل واحد دخل الحكومة سريعا كرشوا تكبر التقول حامل بتيمان تاريهو من لغف الشعيرية باللبن


#306056 [هلوسة]
5.00/5 (1 صوت)

03-07-2012 12:01 AM
انى اشتم رائحة المآكلة ..
ولماذا البيع من اصله ؟؟ سلموا الامانة كاملة للاجيال القادمة..
بعنا موبيتل
بعنا المدبغة الحكومية
بعناالنقل النهرى
بعنا النقل الميكانيكى
بعنااراضى جامعة الخرطوم بالسلمة والحلفايا
بعنا بواخر سودانلاين
بعنا سودانير + خط هيثرو
بعنا الجنوب بحاله ..

حرام عليكم كلوا شعيريتكم ولا تفرطوا فى اصول واملاك الشعب السودانى..

عمروا ولا تهدموا.. انقذوا ما يمكن انقاذه


ردود على هلوسة
Netherlands [ابو ابراهيم] 03-07-2012 08:09 AM
صدقت يا اخي

Netherlands [المجروس] 03-07-2012 04:19 AM
و بعنا فندق قصر الصداقة
وبعنا الفندق الكبير
وبعنا حديقة الحيوان (للقذافى)

وللاسف المحصلة صفر كبير

بل ارتفعت الديون الخارجية ل 39 مليار دولار


#306052 [Naser]
5.00/5 (1 صوت)

03-06-2012 11:49 PM
والله يالطاهر كتر خيرك قدمت للحكومه كل المبررات البتغليها مش تبيع المستشفى بل تحاكم المعترضين على البيع. تجفيف الولاده تجفيف المشرحه فيك الخير تاني شنوا فضل ما المبررات رقده قفا لتجفيف بقيه الاقسام.
شفتوا دس السم في العسل و تخبيش وعي الناس بتم كيف؟؟؟؟؟ يعني بيع مستشفى العيون كل عواروا انوا الاعلان والزمن. اها الاعلان للناس البشتروا وهم معروفين وبتصلوا ليهم بالتلفونات والزمن ما الحكومه مستعجله تخلص على الباقي من الوطن قبل طيارتهم ما تقوم. وسمعننا تحت تحت انوا القصر الجمهوري ذاتوا مرهون لشركه ماليزيه يعني الحكومه الجايه الا تشوف ليها شجره لبغه تدير بيها شئون البلد. هو شنوا الماباعوا وحولوا عائدوا لكوالالالامبببووور. ولا شنوا يا عووضه


ردود على Naser
Netherlands [هالا] 03-07-2012 06:59 AM
لايك يا ناصر


الطاهر ساتي
الطاهر ساتي

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة