واحد من اتنين
03-14-2012 01:03 PM

ساخر سبيل

واحد من اتنين

الفاتح يوسف جبرا

مدخل :

مستشفي العيون الذي تود الحكومة بيعه هو المركز الوحيد لخدمات طوارئ العيون الذي يعمل يومياً دون توقف على مدار الساعة بولاية الخرطوم إذ تستقبل العيادة الخارجية للمستشفي سنوياً (ثمانية وستين ألفاً ومائتين ثلاثة وعشرين) حالة كما أن المستشفي يحتوى على عدد من العيادات التخصصية كعيادة الشبكية ، الحول، الجلكوما والجراحة التجميلية ، كما أن المستشفى يضم وحدة للبصريات تضم في داخلها وحدة لقياس إعتدال ال...بصر وقياس العدسات اللاصقة والموجات الصوتية وتقويم البصر الذى لا يوجد في أى مستشفى عيون آخر ، كما يقوم المستشفى بتدريب طلاب اكثر من عشر جامعات إضافة إلى تدريب النواب والكوادر الطبية المساعدة كما أن للمستشفى دور مقدر في مكافحة والوقاية من كثير من أمراض العيون في كافة ولايات السودان كالتراكوما والجلوموما وعمى الجور والكتراكت ويعمل بالمستشفي حوالى 374 من الأطباء والتقنيين والفنيين والممرضين والموظفين والعمال !
مخرج :
• إذا كانت الحكومة تريد بيع مستشفي العيون فواحد من إتنين يا المستشفى ده ما بيقدم اى خدمة للمرضي ووجودو ذى عدم وجودو وأحسن تبيعو والمواطن يستفيد من قروشو يا كمان بيقدم خدمة للمواطنين .
• إذا كان المستشفى ده ما بيقدم اى خدمة للمرضي ووجودو ذى عدم وجودو مافي مشكلة لكن إذا بيقدم خدمة للمواطنين المرضى (ذى ما ذكرنا فوق) فواحد من إتنين يا الحكومة عندها بديل جاهز للمستشفى والمرضى ما ح (يتجهجهو) وطواااالي ح يلاقو الخدمات في البديل ده أو ما عندها بديل جاهز .
• لو الحكومة عندها بديل جاهز للمستشفى والمرضى طوااالي ح يمشوا يتعالجو فيهو ما مشكلة لكن لو ما عندها بديل جاهز يكون في واحد من إتنين يا الحكومة ح تخصص واطة وتقوم تشيل القروش الباعت بيها المستشفى ده وتعمل بيها مستشفي عيون تاااانى للمواطنين أو كمان القروش دي ح تحصل أمات طه ! (الحصلوا أمات طه شوية؟)
• لو الحكومة ح تخصص واطة وتشيل القروش تعمل بيها مستشفي عيون تاني للمواطنين ما مشكلة (مع أنو ما فيها منطق) لكن إذا القصة فيها أمات طه يبقى في واحد من إتنين يا القصة لحقت المطار الجديد أو كمان حصلت المدينة الرياضية
• لوالقصة لحقت المطار الجديد ما مشكلة (القروش قالو مشت مشاريع) لكن لو حصلت أرض المدينة الرياضية فواحد من إتنين يا الحكومة ح تعمل تحقيق في الموضوع وتعرف الباع الواطه منو وترجع القروش وللا صهينت وعملت أضان الحامل طرشة
• لو الحكومة عملت تحقيق في الموضوع وعرفت الباع الواطه منو ورجعت منو القروش ما مشكلة لكن لو صهينت وعملت أضان الحامل طرشا فواحد من إتنين يا الناس ديل عارفه إنو في قيامة وسؤال وكده يا كمان ما عارفه
• لو الناس دي عارفة إنو في قيامة وسؤال وكده ما مشكلة لكن لو ما عارفين يبقى واحد من إتنين يا نقول الروووب يا كمان ...... (نقول الروووب) !

كسرة : الله يكضب الشينة والكسرة ما تبقى كسرتين .. !

كسرة ثابتة :
أخبار خط هيثرو شنو؟


تعليقات 34 | إهداء 3 | زيارات 6440

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#310257 [زهجان]
4.07/5 (5 صوت)

03-15-2012 04:02 PM
- هو صحيح بايعنوا لي شنو ؟؟!!!

- واللا عايزين اعملوا واحد جديد

- واللا عايزين الناس يكونوا عمي وما في داعي للشوف

- والله حيرتونا يا ناس الحكومة طوالي بيع بيع بيع .


#310224 [ismaill]
4.07/5 (5 صوت)

03-15-2012 03:29 PM
ياود جبرا احسن ليك تمشى لعمر بدوى فى الملازمين
لانو عندو حمام جاكوزى وتعمل ريلاكس وخلى الجماعة ديل يبيعو بيعون


#310214 [IRIS]
4.07/5 (5 صوت)

03-15-2012 03:16 PM
يا عمنا الفاتح الشينا فينا كثرت واصبحت وجبة يومية واصبحت كانها حقيقة والكذب اصبح وسيلة للمواطن كي يحصل على قوت يومه

ومع ذلك نتمنى ربنا يكضب الشينة


#310149 [نادية]
4.19/5 (6 صوت)

03-15-2012 01:47 PM
يا عمي الفاتح انت ما خائف علي قلبك ؟ لو انت ما خائف انا خائفة عليك . اعمل حسابك . الله يشفيك .


#309953 [محمد خليل]
4.19/5 (7 صوت)

03-15-2012 10:03 AM
الحكومة دي يا جبرا لا تتوقف عن اصابتنا بالاحباط كل يوم، الآن عايزة تبيع مستشفى العيون هو هو المركز الوحيد لخدمات طوارئ العيون الذي يعمل يومياً دا معناهو انو الحكومة لا يهمها من أمر الشعب شيئا، و أعضاء الحكومة و أفراد أسرهم لن يعانوا فهم قادرون على تسديد نفقات العلاج سواء داخل البلاد او خارجها من الأموال التى نهبوها من الشعب، و قبل كده قالت انها عايزة تهدم الوزارات الفى شارع النيل و المستفيد الوحيد من كل هذا التخريب لمؤسسات الدولة هم ناس المؤتمر الوطنى كأشخاص لأنهم سيتقاسموا هذه الأراضى فيما بينهم و يحصلوا على مليارات الدولارات من مال السحت و كروشهم لا تمتلئ أبدا، الله يكفينا شرهم و طمعهم، لم يتركوا شئ ما خربوه مثل مشروع الجزيرة العملاق و السكة حديد و أثقلوا كاهل المواطن بالجبايات، لقد تجردوا من الرحمة و الرفق بأفراد الشعب.


#309850 [ود البلد]
4.19/5 (6 صوت)

03-15-2012 04:09 AM
هو التباع شويه يا استاذ الفاتخ اظن نحن ذاتنا معروضيين


#309804 [مفتح]
4.19/5 (7 صوت)

03-15-2012 01:17 AM
الجماعة ديل يكون صدقو انو تحت المشرحة وتحت مستشفى العيون وعنابر الولادة في بترول و دهب ومعادن نفيسة زي ما نجر ليهم واحد من النجارين الكبار نظام انا شغال وكدة واكتشفت ليكم اكتشاف وقالو الا نتأكد انو الكلام دا صح ولا لا.


#309799 [mahala]
4.19/5 (8 صوت)

03-15-2012 12:51 AM
الله يا جماعة البلد دى حلها واحد بس اغتيالات لانو ما ظنيت بعمايل المعارضة المرتشية دى الشارع حيتحرك عشان كدا اسمعوا الفتوى دى مني ( يجوز اغتيال اعضاء النظام و اذياله اينما وجدوا حقنا لدماء الابرياء الطاهرة و صونا لارض الوطن من التمزق و استردادا لكرامة اللاتى تم اغتصابهن من قبل الاجهزة الامنية. و الله المستعان )


ردود على mahala
United Arab Emirates [karlos] 03-15-2012 11:39 AM
متفق معاك الطريقة الوحيدة الكلاش بيقلل النقاش.


#309747 [الروووووووووووووووووب]
4.19/5 (6 صوت)

03-14-2012 10:16 PM
هو لسه ما قلت الروب انت يا جبره اما بخصوص موضوع الكسرة الثابته دي فأخير ليك اقنع ساي يا استاذ لانو بعد شوية عمودك كلو حيبقي عباره عن كسره وكسراااااااات...وحبة كده جهاز الامن يمنع اي مقال فيهو كلمة
كسره


#309728 [عصمتووف]
4.19/5 (7 صوت)

03-14-2012 09:36 PM
حليييييييييييييييييييييييل القام من عنقريبو وطشش بليلو


#309719 [shazali]
4.19/5 (6 صوت)

03-14-2012 09:19 PM
الكسرة ما حتبقى كسرتين ممكن ميتن تلات ميات البسمع منو --المستشفى ح يتباع وح تكتبوا و وااااوك


#309669 [محجوب عبد المنعم معني]
4.19/5 (6 صوت)

03-14-2012 07:43 PM
ابدا مافي مشكلة خليهم يبيعو السودان كله،لكن ورب البيت العتيق بكرة يجيكم واحد راضع لبن امه، سودانية جد ويوريكم التاميم الجد، يااولاد الحرام


ردود على محجوب عبد المنعم معني
Sweden [IRIS] 03-15-2012 03:14 PM
يا اخي محجوب ما تعصب نفسك وتوصخ لسانك في قصص ماليها حل
وثانية البلد ان طال الزمن او قصر لابد من رجوع الحق لاصحابها
والكويس ان النظام الحالي كشف نفسه وظهر مين السيء ومن المواطن الصالح ويوم الحاسب سوف لا يفيد الندم واكيد هذا اليوم سوف يكون قريبا وان كان الف سنة والحرامي ما بنوم مطمئن وان كان !!!!!!!!


#309654 [بت الخرطوم]
4.19/5 (8 صوت)

03-14-2012 07:08 PM
قريشات البيعة حتمشى لواحد من الاتنين يا ماليزيا ولا الصين وفى الحالتين الشعب السودانى ضايع وكمان صايع


#309589 [عنقالى]
4.19/5 (9 صوت)

03-14-2012 05:08 PM
خوفى عليكم اكتشافكم بعد ذهاب الانقاذ بان كل البلد الفضل قد تم بيعه بالدغمسة وانتو قاعدين عنقالة وغفراء فى السهلة ..


#309583 [ود النوبه]
4.19/5 (7 صوت)

03-14-2012 05:03 PM
منذ بداية التسعينات بسأل نفسي سؤال مالاقي جواب وذلك غرار مظاهره صغيره كده في جامعة الخرطوم وكنت خلالها بقطع العيش عشان صحن البوش وفجأه اثناء الجوطه لقيت قدامي واحد منهم شايل عصايه سوداء اللون احسبها مكهربه وفي اللحظه الاخيره قال انا اكهربوا ليشنو ما انتهي منو مره واحده فرفع العصايه وفي نص راسي وكان هدفوا يقتلني نهار جهار لو لا صحن الالمونيم بتاع البوش انا كنت في خبر كان
أنتو الكيزان ديل مسلمين ولا يهود؟


#309572 [بت ام الحسن]
4.19/5 (6 صوت)

03-14-2012 04:51 PM
الرووووووووووب


#309532 [أبو مهند]
4.19/5 (7 صوت)

03-14-2012 03:53 PM
غايتو الكيزان كان الله مدّ في أيامهم حتصحو يوم من الأيام ماتلقوا موية تشربوها..
ماتستغربوا من الإختراح ده ..!!
وما صعب عليهم ..
يعملوا سد جنب كوستي ويبيعوا كل الموية لإسرائيل ..


#309523 [sudani1]
4.18/5 (10 صوت)

03-14-2012 03:47 PM
ما لازم يقفلوا مستشفى العيون عشان الشعب يفضل مغمض على طول هههههههههه
لو الشعب فتح و احد من اتنين يا اسقط النظام و لة انتحر كل الشعب لو اسقط النظام ما مشكلة بس لو انتحر كل الشعب الحاكومة حا تعيش من وين ؟


#309507 [الاحول]
4.19/5 (9 صوت)

03-14-2012 03:23 PM
هو البيع لزومو شنو ؟ انت تبيع حق ابوك عرفناه..بس حق الناس عمره او اتركه لغيرك..
ما هو بعنا حديقة الحيوان وسودانير + خط هثرو وموبيتل وفندق قصر الصداقة والنقل النهرى واراضى المدينة الرياضية..والنتيجة صفر كبير
التنظير التمكينى ده الضيع مشروع الجزيرة وفصل البلد لنصفين..
ومسلسل المآكلة مستمر ..


ردود على الاحول
Saudi Arabia [دكتور نبقي مصدّر] 03-14-2012 06:49 PM
حق ابوك لو ابوك حي أو ما معاك ورثة ما بتقدر تبيعوا الا بموافقتهم


#309506 [الصادق الهواري]
4.19/5 (8 صوت)

03-14-2012 03:23 PM
علينا جاي ’’علينا جاي .. جوامع ,,مستشفيات ,,مشاريع,, مقابر,,حصل ما يفوتك بكرة تندم يا مدمدم ,,,شوارع ,, كباري أي حاجة للبيع .. وعندنا كمان .........حصل طال عمرك


#309496 [ابن السودان البار]
4.19/5 (10 صوت)

03-14-2012 03:03 PM
الأستاذ المحترم الفاتح جبرة الفنان صاحب الأسلوب المبتكر حياك الله الحكومة الفاسدة دي حاتخليك تكتب وتنتقدها لامن تفتر ؟؟؟ فأحسن ليهم يدوك وزارة يسكتوك والا بي نقدقك الكتير دا يوم بتكتل ليك زول ؟؟؟ وانت عارف الزول دا منو ؟؟ حكومتنا الفاسدة دي بدل تستورد ليها 3 قصترات توزعهم علي المستشفيات استوردت بالدولار عدس تركي اصيل ونبق فارسي لذيذ وبصل حبشي جميل ؟؟؟
كسرة: اخبار الدولار شنو ؟؟؟


#309493 [زول محبط شديد]
4.19/5 (6 صوت)

03-14-2012 02:57 PM
دوختنا معاك يا.....مبدع. لك التحية والتقدير.


#309488 [سلك]
4.19/5 (8 صوت)

03-14-2012 02:50 PM
يا جماعه الناس ديل ياتو يوم رجعوا ليهم من بيعه كل شى جاهز البايع والمشترى واللاقف يعنى ياجبره كبر الكسره ساكت من هسع


#309476 [حلمي شيخ ادريس]
4.16/5 (8 صوت)

03-14-2012 02:38 PM
يا جماعه يا اخوانه مافي راجل يوقف الناس ديل


ردود على حلمي شيخ ادريس
[خليفه] 03-14-2012 07:02 PM
دا كلام شنو ياحلمى


#309467 [محمد سر الختم]
4.19/5 (7 صوت)

03-14-2012 02:31 PM
واحد من اتنين: يانمرق الشاع
يانمرق الشارع


ردود على محمد سر الختم
Sudan [عمر] 03-14-2012 10:36 PM
يا تمرق الشارع يا تبقي اشاغة


#309460 [اْحمد دقنة]
4.19/5 (7 صوت)

03-14-2012 02:24 PM
مستشفى بتاع عيون كمان عشان تشوفوا اي حاجة يا جماعة نحن مادارين واحد يشوف حاجة فاهمين


#309458 [ابو عفراء]
4.19/5 (7 صوت)

03-14-2012 02:24 PM
ما ممكن يعملو بنك للعيون؟؟ يعنى يجيبوا عدسات من اللى مات حديثا ويبيعوا والريع للحكومة لزوم انعاش الجنيه السودانى امام الدولار الجزمة واللى بحاول يستفز عملتنا


#309452 [abutarboosh]
4.19/5 (7 صوت)

03-14-2012 02:17 PM
واحد من اثنين اما السودانين نظرهم اصبح 6على6 او اصبح كل السودانيين عمى واذا اصبح 6 على 6 مامشكلة واذا اصبحوا عمى فالرماد كال حماد مرتين يم 30 يونيوويو بيع المستشفى


#309447 [zahi]
4.19/5 (7 صوت)

03-14-2012 02:05 PM
و الله يا استاذ جبرا نحن الفهامه بتاعتنا الاديتا لينا باظت لعدم استيعابها اسئلتنا ... يبقي واحد من الاتنين يا تدينا واحده جديده لنج والمانيه كمان يا تبطل كتابه .............


#309438 [nasereddin]
4.19/5 (7 صوت)

03-14-2012 01:53 PM
الأخ الفاتح والله ما بتقصر بي خيالك المجنح فوق السماء...المستشفي أصبح monument، تلك هي الاَثار الغير منقولة ..اذا رجعنا لتعريف اليونسكو للتراث الثقافي الذي يمنع البيع لمبني -كما هو الحال لمستشفي العيون- الاَ اذا كان المشتري سيقوم بنفس الغرض في خدمة التراث الثقافي ، بمعني أن يصبح متحف خاص أو دار للمقتنيات الثقافية من كتب نادرة ومخطوطات وتحف وغيرها...يا جماعة ما سمعتو القول :(العين بي حسين؟).عند ما تتجاوز النظرة حدود ما هو سائد من اداب!!!! ألم يكن هو د.حسين المعني ، وهو أول اداري لهذا المستشفي الذي نقل المعدات الخاصة بقسم العيون من مستشفي الخرطوم الحالي الي مستشفي العيون علي نفقته الخاصة بعدأن صدقت جهات الاختصاص له بذلك ، هذه المفردة العين بي حسين يجب أن يدافع عنها أهل الاثنوغرافيا كثقافة شفهية يجب الحفاظ عليها -كما يجب علي جهات الاختصاص -الاَثاريين -تقديم دفوعاتهم وأن لا يصمت الشعب عن حقه ...دمتم


#309439 [الزول الكان سمِحْ]
4.19/5 (6 صوت)

03-14-2012 01:53 PM
يا أستاذ جبرا

هى واحد من إتنين يا( تنتن ) يا ( تنتن ) زى ما قال عادل إمام


#309433 [جدى]
4.19/5 (8 صوت)

03-14-2012 01:44 PM
على وزن الاسد لو لحقك مابياكلك ولو اكلك ان شاء الله ماتنفعو


#309429 [ودامدرمان]
4.19/5 (6 صوت)

03-14-2012 01:39 PM
الاستاذ جبرا
تحية طيبة
_لو الكسره بقت واحده مامشكله بس لو بقت كسرتين







حاتكمل لي ناس الراكوبا الحبر البتكتب بيهو الكسره لانو كل مرا حاتزيد





تضامن جبرا:
اخبار خط هيثرو شنو


ردود على ودامدرمان
Saudi Arabia [abubakr] 03-14-2012 03:27 PM
وهذه كسرة مني أن: المرق المتافي شنو؟ ما تقول لي صلاحه وزهده كما قال بعض المتنطعين


#309416 [ابوكرنك]
4.19/5 (9 صوت)

03-14-2012 01:21 PM
يا المستشفي يا بيت ابوي


ردود على ابوكرنك
Sudan [عمر صالح] 03-15-2012 07:44 PM
حييييييييلوة وملعوبه

بس عندى سؤال انت ياجبره امات طه ديل البايعين ليهم المستشفى ما يبقن امات طه بتاع القصر والبقولوا عليه النايب الاول شكلها كده قروش البيعه لاحقه امات طه عشان كدى الجماعه مصرين عليها


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة