المقالات
السياسة
ارشيف مقالات سياسية
رسائل إلى السيد الرئيس .. بالدارجي المُريح (4)
رسائل إلى السيد الرئيس .. بالدارجي المُريح (4)
03-17-2012 01:56 PM

رسائل إلى السيد الرئيس .. بالدارجي المُريح (4)

طارق عبد الرحيم
[email protected]

يا ريس الليلة تمسك لي و أقطع ليك .. أمسك لي الصبر و أقطع ليك باقي العمر الفضل .. في تصريحك قبل فترة قلت إنك ماداير تبقى رئيس بعد ألفين و خمسطاشر .. معقولة يا ريس بعد ربع قرن زهجتا مننا خلاص ؟ مابدري نحنا شعبك الطيب ما كتيرة علينا تدينا ربع قرن تاني من عمرك الغالي ..

أعمامنا الكبار و أبهاتنا بيقولوا علينا (أولاد الإنقاذ) يعنى قمنا من نوم الجهال و لقينا كوم حكومة الإنقاذ قدامنا .. ود الإنقاذ لموظف الحكومة بتعني إنك تشتغل في مؤسسة حكومية(دا لو لقيت شغل أصلاً) وتصرف مُرتب أربعمية جنية وتأجر بيت بى أربعمية جنية ولو سألوك بتأكل شنو ؟؟ أكيد بتكون بتاكل سيد الإيجار .. ود الإنقاذ للزول العندو سلطة (بضم السين) يستخدما لى تحقيق مصالحو الخاصة .. ود الإنقاذ للطلبة بتعني إنك تاكل فتة فول (بوش) و تساكك في المواصلات ، و تقيف في صفوف دفع الرسوم .. و لو ما دفعت يطلعوا ليك مرسوم بمنعك عن الإمتحان .. و لو خلوك تمتحن يقوموا يحجبوا نتيجتك .. و لو وروك نتيجتك و طلعت ناجح ما تفرح كتير لأنو حتطلع الشارع و تقعد عاطل لأنو ماعندك (ضهر) .. لأنو (ضهرك) ضهر أبوك المزارع المحنية ضهرو على الأرض (و يا أرض أحفظي ما عليك .. لى ناس بيملاها الفقر)
يا ريس على حسب الأخبار الإتداولت في الصحف إنو بعض أساتذة جامعة بحري لأول مرة طبقوا نظام الجلد في مرحلة الجامعة على الطلبة الإعتصموا و إحتجوا على عدم تخريجهم بشهادات جامعاتهم الأم و هي الجامعات الإتجهت للجنوب بفعل فاعل الإنفصال .. شكلهم الأساتذة ديل دايرين يصلوا للسلطة لأنو أقصر طريق للسلطة في بلدنا المغبونة و مغلوبة على أمرها إنك ترفع سلاح و شكلهم كده دايرين يمشوا في طريق مأمون حميدة الفي يوم من الأيام طلع مسدسوا لى طلبة جامعة الخرطوم و الليلة وزير صحة يشيل ويبيع في المستشفيات (ما عرفناهو وزير ولا بتاع دلالة) وممكن عادي إذا الأطباء إعتصموا يجي و يرفع ليهم مُسدس .. ماهو متعود ..

داير أكتب ليك عن المقررات المدرسية .. المقررات الما بتسمن من جوع علم .. طالب الأساس بقى عبارة عن (عتالي) شايل ليهو شوال كتب في ضهرو (شنطة مليانة كُتب) (شيئ ملبسنا .. وشيئ مسكننا) .. مقررات كمية وليست نوعية .. مقررات بتدخل الطالب دحش و تطلعو حُماااار .. ويدخلوا الجامعات ويتخرجوا منهم كتااااار ما بيعرفوا (الزعيم إسماعيل الأزهري) وبالتأكيد حيجي يوم وكتااااار ما حيعرفوك إنك كنت الرئيس .. السلم التعليمي زمان كان بيطلع لى فوق لكن هسي بقى ينزل لى تحت ... ( هو عليك الله الناس تاكل ولا تتعلم ؟؟؟)


جريدة الجريدة



تعليقات 1 | إهداء 0 | زيارات 1982

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#311705 [خالد]
0.00/5 (0 صوت)

03-18-2012 01:02 PM
لوداير تقر فى هذا الزمن اقر حسب واصتتك يعنى ابومحاسب اقر محاسبه وكد وماتقول اناشاطر اقر هندسه والله الا تهندس العطال


طارق عبد الرحيم
طارق عبد الرحيم

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة