03-17-2012 01:06 PM

ساخر سبيل

القال كده منو؟

الفاتح يوسف جبرا

أموت وأعرف اسم الكوكب الذي يعيش فيه السيد وزير المالية ؟ فالرجل (قطع شك) ما قاعد معانا في (السخانة) والرهق والغلاء و(الفلس) والتعب النحنا فيهو ده وهذا واضح وظاهر وجلي في التصريحات التى يطلقها بين الفينة والأخرى .. فقد صرح سيادته يوماً ذلك التصريح الذى سار به الركبان وتداولته المجالس والأسافير ذلك التصريح الذى دعا فيه أفراد الشعب السوداني (الفضل) إلى التقشف وذلك بالعودة لـ (الكسرة) و(العواسة) !
وق...د طالبنا حينها من (الشعب الفضل) الإمتثال لدعوة السيد الوزير وترك أكل (الأجبان الدنماركية) و (المربات الفرنسية) و(الألبان الهولندية) والفواكه المستوردة و (الطواجن) واللحوم (الضانى) المشوية والمقليه والمتبلة والمهرية والسلطات والمكرونات (الحلزونية) والإكتفاء بأكل (الكسرة) الذي لا يعلم الوزير (ويعلم كيف وهو في كوكب تاني) بأنها أغلي سعراً من (المايكروعيش) الذى تنتجه المخابز !
لم يمر على تصريح السيد الوزير وقت قصير حتى صرح لنا (من كوكبه) تصريحاً (يقول لبتاع الكسرة شنو) إذ قال (بأن توظيف الخريجين أصبح عبئاً على الدولة وأن الدولة لن تستفيد منهم إذ ليس لديهم شغلة أو فكرة عن أى حاجة!) ! السيد الوزير لا فض فوه ينعت ويصف الخريجين بأنهم (ما عندهم فكرة عن أى حاجة) .. يعنى بالعربي كده (ما ناقشين حاجه ومستواهم تعبان) ؟ العبد لله يعتقد بأن هذا التصريح قد أراد من خلاله السيد الوزير بأن يرسل رسالة للمجتمع تقول بأن فرص التوظيف موجودة (وهى بالطبع غير كذلك ) رامياً باللوم على الخريجين وضعف مستواهم ولسان حاله يقول (لو كنتو شطار كان شغلناكم) ! لكن القصة طبعن ما كده ! فبتصريحه هذا إنما يعلن صراحة عن تردى مؤسسات التعليم العالى وفشل ما يسمى (بثورة التعليم العالى)وعدم قدرتها على تخريج طلاب مؤهلين تستفيد منهم الدولة لا أن يكونوا عبئاً عليها .
بعد هذين التصريحين إعتقد العبدلله أن السيد الوزير سوف (يوزن تصريحاتو) قبل أن يدلي بها لكن عادت حليمة لعادتها القديمة وها هو يتساءل مستنكراً في تصريح له أدلى به قبل أيام (منو القال في ضائقة مالية؟) ثم أضاف (كيف يعني الناس ما قادرة تاكل؟!) والسيد الوزير في دى عندو حق فجميع سكان الكوكب الذي يعيش فيه يأكلون (ما لذ وطاب) ويسكنون (ناطحات السحاب) ويتعلمون في مدارس وجامعات (مش زى حقتنا الهباب) ثم يجدون الوظيفة في الإنتظار دون الدخول في لجان الإختيار ! ليقبضو ما شاء لهم الله من مرتبات ومخصصات ويمتطوا فاره الجياد من العربات ثم يتزوجون ما طاب لهم من النساء !
نعم للسيد الوزير الف حق في أن يوصينا بترك أكل (الأطايب) والإتجاه للعواسة و(أكل) الكسرة ثم له ألفين حق بأن يتساءل مستنكراً (كيف يعني الناس ما قادرة تاكل) فالسيد الوزير يعيش في كوكب (المسئولين) الذى يدور في فلك (الترطيب) والذي يبعد عن كوكب (الشعب الفضل) ستين مليون سنة ضوئية !
كسرة:
في حوار السيد الرئيس التلفزيوني الأخير وفي سؤال عن المخرج من الأزمة الإقتصادية الآن؟
أجاب سيادتة (في الدقيقة 29 و40 ثانية من اللقاء) مقراً بوجودها : الأرزاق بيد الله !
أها يا سعادة (وزير ماليتنا) .. إن شاء الله تكون عرفتا القال (كده) منو؟
كسرة ثابتة :
أخبار خط هيثرو شنو؟


تعليقات 31 | إهداء 1 | زيارات 5830

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#312067 [kalifa]
0.00/5 (0 صوت)

03-18-2012 10:45 PM
وزيرك للمالية من الجماعة الدخلوا الخرطوم وعايزين يخلو صقيره يحوم!! حليل شنط الصفيح والترفلنق باق (رحلة سعيد) فأصحابها اليوم في قصور مشيدة وحمامات سباحة ومثني وثالث من كل الأشكال والألوان والتحلية بالرابعة (باسطة ركن) شرط تكون عاصميه وياحبذا لو كانت أحفاديه...
كسرة : ياهداك الله دحين عرفت لينا حاجة عن خط هيثرو الراح في مولد سيدي عارف الكويتي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#311904 [abu afra]
0.00/5 (0 صوت)

03-18-2012 04:53 PM
سؤال برئ...المسؤولين بشتروا من نفس البكان اللى نحن بنشترى منه؟؟ يعنى السوق الشعبى والصيدليات والمخبز؟؟


#311730 [IRIS]
0.00/5 (0 صوت)

03-18-2012 12:33 PM
يا عمنا الفاتح جبرا مش وزير الخارجية براه كل المسؤلين السودانيين كانهم عائيشين في عالم آخر اي بيحكونا بالريموت كنترول او باللاسلكي لانهم بيتكلموا كثيرة وبنسمع الاخبار في التلفزيون وبنشاهد مشاريع وافتتاح مباني جديدة بس لمن نطلع في الشارع ما بنشاهد اي تقرير

وكل النشرات الاخبارية تشمل قرارات جمهورية صارمة وقوانين بمافيه قانون مكافحة الفساد وتطلع الشارع اول واحد يلاقي الفساد لافي برجلينه وماشي مطمئن لابس رسمي واقف في الشارع بيقبض من طرف او تشوف الفساد متمثل في شخصية كرتونية ارسها كبير وكانه لديه راس احتياطي عشان لو وقعت بيه طيارة يطلع براس على الاقل وواحد متمثل في رجل بيشرب في بيئر جاز وبيضح كانه في مقهة هندي ومعاه مهراجا

بس الكويس يا فتوحة الحياة ماشية وان شاء الله يجي الوزراء ينزلوا يعيشوا معانا ويفهموا ان السودان بلد كبير وعظيم


#311531 [مخير]
5.00/5 (1 صوت)

03-18-2012 07:54 AM
والله انتو جنكم معارضه ..عليكم الله اسي الشعب السوداني دا لو كللللللللو قاعد ياكل ... المسئولين ديل ياكل شنو ؟ ويقدرو بشتغلو كيف ؟ ما تشوفو ليكم اي حاجة تملو بيها خشمكم دا وتسكتو ... ان شاء الله فطير بلبن ..... شنو كل يوم وزير مالية .. وخط هيثرو .... وشنو ماعارف ..... يعني ناس الحكومة ديل يجوعو ليكم واللا شنو ؟ يا جبرا اكل كمونية ...


ردود على مخير
United Arab Emirates [alkalas] 03-18-2012 10:28 AM
DEAR - JABRA

YOUR TEXT .. IS 3D.


#311528 [ابو ابراهيم]
0.00/5 (0 صوت)

03-18-2012 07:48 AM
لله درك يا جبرا


#311518 [mohd]
5.00/5 (1 صوت)

03-18-2012 07:17 AM
انت عارف يا الفاتح (وزير المالية اب خزناً فاضية دا) ذكرني بالاميرة الفرنسية ايام الثورة الفرنسية الفتحت الشباك وشافت المظاهرات وقالت ديل مالهم قالوا ليها عاملين احتجاجات وقالوا دقيق الخبز معدوم قالت ليهم طيب ما ياكلوا باسطة
بس ياهو وزيرنا المفلس دا والما مكفيه ايراداته شركاته الخاصة دا


#311510 [moonshussien]
0.00/5 (0 صوت)

03-18-2012 04:51 AM
سليل البوربون المتوضئين ده ما فضل ليه الا يقول كماري انطوانيت " دعوهم يأكلوا كيك" اذا كان الشعب جعان------ويحلو بالنبق طبعأ ان وجد فائض لزوم التصدير الجائر وكدة


#311495 [شبعان ديمة]
5.00/5 (1 صوت)

03-18-2012 02:15 AM
سعادة الوزير بدو يرفع معنوياتك حتى لا تصاب بانيميا منجلية حادة وتتفقع مرارتك ويتهرى فشفاشك..
اهو الارزاق بيد الله.. والشعب كله واكل ومبسوط وشبعان..


#311483 [محمد صالح أحمد]
5.00/5 (1 صوت)

03-18-2012 12:59 AM
للاسف لا الرئيس ولا الوزراء ولا البرلمانين يحترمون المناصب التي يتولونها ويثبتون لنا انهم جهلاء ولا يستحقون اي منصب فتارة يصدرون تصريحات واحاديث لا تصدر من جاهل وتارة تراهم يلهثون وراء اي شخص خليجي وحتى وان كان مفلس يسبقون عليه صفة مستثمر ويستفيدون من ورائه ويشتغلون باسمه ويتقاسمون معه الموال التي نهبوها من خيرات البلاد ولم يعد أمر فسادهم خافي على احد لا داخليا ولا خارجيا


#311460 [حسن]
4.00/5 (3 صوت)

03-17-2012 11:37 PM
الاستاذ جببرا
بالله أترك الزول الوزير دا ابو تصريحات غريبة وعجيبة وشوف لينا قصة الخط
الوزير دا بعد شوية حا يقول لينا ... لو رغيف مافي ما تأكلو جاتوه
وبالفعل انطبق عليه قول الشاعر ( يا عايش في دنيا من أوهام خيالك


#311420 [ود العوض]
4.00/5 (1 صوت)

03-17-2012 08:46 PM
يا ود جبرا ما تظلم الراجل –الراجل قال بدفع (100) ألف لدولار لحوالي (20) صرافة بواقع (2) مليون دولار في اليوم لمواجهة الطلب على العملة في مجال الدراسة والعلاج في الخارج ، أي (60) مليون في الشهر بما يعادل أكثر من (7) مليار في العام من وين والله اعلم .
لكن الوزير كان واقعي عندما قدر عائدات القطن والتي ستحل محل ايرادات البترول بحوالي (150) مليون دولار وسكت عن نصيب شركة الاقطان من هذه الاموال التي ستفرج الضائقة المعيشية
الوزير قال الناس الدولار تعمل بيه ايه بعد ان اكد ان لديه اعتمادات كافية لاستيراد السلع الثمانية التي حددها البرنامج الثلاثي مؤكدا في نفس الوقت أن استيراد السلع يتم بالآجل - إلى متى الله ورسوله اعلم
الراجل مدى فهمه تجلى عندما قال ان أموال المرتبات التي تدفع للولايات هي الأموال المرصودة للتنمية وذلك في معرض رده على ولاة المؤتمر المتذمرين من عدم تلقي اموال المرصودة للتنمية من المالية - وهو تفسير متقدم على من فسر الماء بالماء
كسرة :
اللهم لا تؤاخذنا بما فعل السفهاء منا


#311417 [ود العوض]
5.00/5 (1 صوت)

03-17-2012 08:36 PM
يا ود جبرا ما تظلم الراجل –الراجل قال بدفع (100) ألف لدولار لحوالي (20) صرافة بواقع (2) مليون دولار في اليوم لمواجهة الطلب على العملة في مجال الدراسة والعلاج في الخارج ، أي (60) مليون في الشهر بما يعادل أكثر من (7) مليار في العام من وين والله اعلم (الارزاق بيد الله ).
لكن الوزير كان واقعي عندما قدر عائدات القطن والتي ستحل محل ايرادات البترول بحوالي (150) مليون دولار وسكت عن نصيب شركة الاقطان من هذه الاموال التي ستفرج الضائقة المعيشية
الوزير قال الناس الدولار تعمل بيه ايه بعد ان اكد ان لديه اعتمادات كافية لاستيراد السلع الثمانية التي حددها البرنامج الثلاثي مؤكدا في نفس الوقت أن استيراد السلع يتم بالآجل - إلى متى الله ورسوله اعلم
الراجل مدى فهمه تجلى عندما قال ان أموال المرتبات التي تدفع للولايات هي الأموال المرصودة للتنمية وذلك في معرض رده على ولاة المؤتمر المتذمرين من عدم تلقي اموال المرصودة للتنمية من المالية - وهو تفسير متقدم على من فسر الماء بالماء
كسرة:
اللهم لاتؤاخذنا بما فعل السفهاء منا


ردود على ود العوض
Saudi Arabia [ابو ومضة] 03-18-2012 04:46 PM
ود العوض يابليد نوعك دا الخلي الوزير يقول كدا

[من بعيييييد] 03-18-2012 02:32 PM
[عوجة ود ديقم] بيعترض على الـ280مليون الفرقية في حسبة ود العوض بإجمالي الـ12شهر..
ياخ يا أخ [عوجة].. انت ما عملتاحساب لي رمضان والعيدين ولا شنو؟

Sudan [عوجة ود ديقم] 03-17-2012 09:57 PM
انت ياودالعوض من نوع الخريجين الذين يقصدهم الوزير بعدم الناقشية والسبب60 مليون دولار شهرياً × مجموع شهور السنة (12) شهر +720 مليون دولار يعني أقل من مليار ب280 مليون !!!! ان شاء الله الوزير ما يقرأ تعليقك دا لأن يدك في الماء البارد وانت مغترب بالسعودية نحن تطير عيشتنا مع ناس علي غير محمود


#311395 [عبدالحميد]
5.00/5 (1 صوت)

03-17-2012 07:31 PM
تمام يا عمي جبرة الارزاق بيد الله ! بس يخلونا لي الله دا نحن راضين بي حكمو ! يعني الكراسي القاعدين فيهادي ما حقتو ؟ ابوك الوكلو الله عليك تقول ليه عايز حق الفطور يقول ليك الله كريم ! !


#311392 [سامي سعيد]
4.88/5 (4 صوت)

03-17-2012 07:27 PM
اذا كان الرئيس نفسو لا يحترم المنصب الذي يشغله ويصرح يتصريحات عجيبة ويرقص كالهبل فلا غرابة ان يفعل وزير الماليه نفس الشيء


#311372 [انا]
5.00/5 (4 صوت)

03-17-2012 06:55 PM
وزير بره الشبكة


#311281 [بت ام الحسن]
0.00/5 (0 صوت)

03-17-2012 03:34 PM
الشينة منكورة يااونكل جبرا


#311278 [طارق]
1.00/5 (1 صوت)

03-17-2012 03:31 PM
لماذا تتضجر انت ووزير المالية من اكل الكسرة مع علمكم التام بانها الغزاء الرئيسى لمعظم سكان السودان عليه فانت يا استاذ جبرة من نفس الكوكب المخملى الذى يقطنه سعادة السيبد الوزير


ردود على طارق
Saudi Arabia [ابو ومضة] 03-18-2012 04:47 PM
ياغبي لو ما بتفهم القراية تاني ما تعلق علي موضوع

Saudi Arabia [فلانة] 03-18-2012 07:19 AM
اظنك ياطارق اتدقست وشتريت فهامتك من النوع البفرشو الفراشة على الرصيف 000فهامتك مضروبة غيرها وتانى عليك الله ما تسترخص

United Arab Emirates [عماد] 03-17-2012 08:24 PM
يا خوى انت انت سارح فى ياتوجيه.
ما فهمت الكلام و لا شنو

Saudi Arabia [A.nasir] 03-17-2012 07:53 PM
اقرا المقال تاني يا طارق لتتبين اذا ما كان جبرا يتضجر ام غير ذلك
لك التحية

Saudi Arabia [أبو الشباب] 03-17-2012 07:09 PM
مرحب يا طارق

بالله فتح مداركك وو سع مخك عندما تقرأ لأستاذنا لأنو يكتب في البعد الثالث - عشان تعليقك يطلع في المليان

مع تقديري

Sudan [لنا على دهب] 03-17-2012 05:28 PM
لعلمك يا حضرة المحترم طارق جبرة لحدى هسه ما قادر يتم رسوم اولاده ناجى ونشوى في مدرسة فى بيت المال و اللعلى ما اقول شهيد


#311276 [الاقرع النزهى]
0.00/5 (0 صوت)

03-17-2012 03:27 PM
اكيد دا قاعد فى المريخ .........والله يمكن عائش فى بلوتووووووووووووووووو


#311265 [ام الحسن]
4.50/5 (2 صوت)

03-17-2012 03:14 PM
يا استاذ نصيحتى ليك ماتركز فى تصريحات المسؤولين ديل كتير...لانو مرارتك ح تنفقع وراسك ح يصلب ومابعيد تجن ونلقاك واقف تهضرب فى واحدة من الصوانى ..وماتغرك الفهامة الانت مركبها حتى لوكانت ميد ان جابان واللا صانعنها الامريكان


#311264 [Nader]
5.00/5 (2 صوت)

03-17-2012 03:13 PM
لكن يا شيخ جبرا ما غسلته وكويته ،،،،،،،،،،، كسره: اخبار الدولارات السفاها من البنات اليتيمات بتاعة نيجيريا شنو


#311242 [جن]
5.00/5 (3 صوت)

03-17-2012 02:37 PM
مارى انطوانيت ومقولتها الشهيرة في بداية الثورة الفرنسية : أذا كان الجياع لا يجدون خبزآ لماذا لا يأكلون الجاتوه؟‏!‏ كانت تعني ما ذهب اليه رصيفها في المنطق وزير المالية حين قال : كيف يعني الناس ما قادرة تاكل؟‏!‏ ياخي شعلو مخكم دا حبه يعني مثلآ كدا لو (جاتوه)‏ رشوة ياكلها ولو‏‏ (جاتوه)‏ عمولة ياكلها و لو (جاتوه)‏ مال عام ياكلو و هكذا ياصديق عرفتا؟؟ ..الان وبعد تفسير إبن جن و الشيطان ألا يحق لوزير المالية هذا ان يسأل كيف يعني الناس ماقادرة تاكل و المال العام سايب و الفساد عم البر البحر !! عجبي


#311235 [مصطفي]
5.00/5 (2 صوت)

03-17-2012 02:14 PM
اعزيالشعبالسوداني في اقتصاده وماليته وحكومتة وابنائهوبناته ونيله وبتروله
وانا لله وانا اليه راجعون
انتهي العزاء من بدري وما في داعي للجيه


#311232 [sami]
4.00/5 (1 صوت)

03-17-2012 02:05 PM
Dear Jabra
you seem fed up of reclaiming (Hithro Line).


#311228 [وضح.. أبن... أفصح]
5.00/5 (1 صوت)

03-17-2012 02:01 PM
بالمناسبة،،،
وقت نسيتها إنتا النقولها ليك.

كسرة:
ربنا لا تسلط علينا بذنوبنا من لا يخافك ولا يحرمنا.

كسرة ثابتة:
أخبار خط هيثرو شنو؟.


#311225 [وضح.. أبن... أفصح]
2.75/5 (3 صوت)

03-17-2012 01:58 PM
وما تنسى يا ود جبرا تصريحو في واحد من الاجتماعات الأذاعها التلفزيون قبل كم يوم كده، قال فيها في معرض حديثو عن الذرة الرفيعة وقال: (بأنها علف للحيوانات... وكمان هي علف للناس ذاتهم)، بالله عليك في إنسان عاقل بيقول جنس الكلام ده؟، والحضور في الندوة أو الاجتماع ده قعدوا يضحكوا على الكفوة القالها دي، وهو كأنو ما قال شيء، واصل في كلامو (ولم يرف له جفن)، ما عايزين ننبذ الراجل وننقص من حسناتنا ساكت، لكن الكرسي القاعد فوقو ده هو ما قدرو، ومن الأفضل يغيروهو لينا بي واحداً (بيعرف)، بس ما يمشو يجيبو لينا واحد (ما بيعرفش) يقعد يجرب فينا زي ما جرب هو فينا (حجوة أم ضبيبينة). في الحالة دي أحسن يخلوهو لينا في مكانو دي، وحجتنا إنو قطع شوط كبير في التجربة وما عايزين واحد يبدأ لينا من أول وجديد.


#311215 [بلدى ياحبوب]
5.00/5 (1 صوت)

03-17-2012 01:46 PM
الليله ياجبره شده زعلتك من وزير العواسه والكسره نستك الكسره


#311212 [عبد الرحمن]
3.00/5 (3 صوت)

03-17-2012 01:43 PM
انت يا الفاتح جبرا حاسد واللا بغران، و اللا بس راكب راسك ما عايز تفهم كلام الوزير. يعني هو عرّّس تلات نسوان ليه؟ ما عشان ما يجلّّي ليه أكلة، إذا ما لقى عند دي يلقى عند ديك، انتو الوزير دا يقعد يشوف شغله و اللا يقعد يفهّمكم؟ عجائب.


#311209 [ابوالشوش]
2.00/5 (1 صوت)

03-17-2012 01:42 PM
ياأستاذ جبرة الوزير قاعد يقول الكلام ده وهو مخروش ......


#311208 [asabangi]
5.00/5 (2 صوت)

03-17-2012 01:39 PM
جيوبنا ملانة قروش والرغيفة الواحدة وزنها نص كيلووكل حاجة راقدة ومالية الواطة...بس ياخى نحنا ماقادرين ناكل لأنو عندنا طمام مزمن (Chronic Nausea)..سببو الوزير الخطير بتاع رويال كير وجماعته المكنكشين فىها وقافلنها بالطبلة والجنزير.


#311200 [واحد]
5.00/5 (2 صوت)

03-17-2012 01:24 PM
%100 يا جبرا


#311199 [Abu Hadi]
5.00/5 (1 صوت)

03-17-2012 01:24 PM
والله الواحد ما عارف يقول شنو؟؟


ردود على Abu Hadi
Greece [عزوز] 03-17-2012 02:46 PM
قول حسبي الله ونعم الوكيل


#311191 [الزول الكان سمِحْ]
0.00/5 (0 صوت)

03-17-2012 01:18 PM
يا أستاذ

وين الكسرات الليلة؟؟ وخط هيثرو لقوهو وللا شتو؟؟


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة