فشل كلوي (مقال ساخر)
03-18-2012 09:33 AM

فشل كلوي

د.حامد موسى بشير
[email protected]

( لقد أصيب السودان بالفشل الكلوي يا سادة ... )
هكذا أعلنها صديقي المتشائم ، المستاء والحانق دوما... فقلت له :
- ما للدرجة دي .. ما تبالغ ياخ
قال لي :
- إنت مش دكتور ؟ عليك الله قول لي أسباب الفشل الكلوي
فكرت قليلا وأجبته :
- أولا إرتفاع الضغط
- بس.. عليك الله الضغط الفينا ده شوية ؟ نلقاها من وين ولا من وين ؟ ياخ نحن مضغوطين من أي حتة ومن أي حاجة والله الضغط العلينا ده لو في جبل كان انفجر .. أها وتاني ؟
- مرض السكري وإرتفاع السكر لفترة طويلة
- بس... عليك الله السكر ده ليهو كم سنة بيرتفع ؟ السكر براهو ؟ دي أي حاجة في البلد مرتفعة .. وأي حاجة بترتفع في البلد دي ما بتنزل تاني إلا الطيارات ، وديل ذاتم بقو يقعو.. أها وتاني ؟
- الجفاف الشديد
- عليك الله نحن ما مجففين ؟ عندنا أطول نهر في العالم ونص البلد عطشانا .. ها تاني؟
- زيادة المواد الفاسدة في الدم
- ههههههههه عليك الله فساد زي العندنا ده لاقاك في حتة في العالم ؟ .. قول قول تاني ؟
- إنسداد الشريان الكلوي أو مجرى البول .. يعني تكون مقفلة من كل الجهات :
- عليك الله ما شايفة مقفلة كيف في وشنا ؟ أها وتاني
- المناعة الذاتية
- يعني شنو مناعة ذاتية ؟ معليش أخوك حمار
- يعني قوات الجسم تجن وتبدأ تهاجم في الجسم ذاتو
تلفت حوله بتوتر ، ثم همس :
- خلينا من دي ... أها وتاني؟
- نقص الأوكسجين الحاد
- هههههههه عادي .. عادي .. شوف غيرها
- الإنحلال الدموي الحاد
- عليك الله إنحلال زي الفي دولتنا دي في الدنمارك لاقاك ؟
- أنا ما مشيت الدنمارك قبل كده
قال لي منتصرا :
- قلت ليك ده فشل كلوي عدييييل
- أها طيب نعمل ليهو شنو ؟
قال لي :
- تعال معاي نشيلو نوديهو للغسيل
وهكذا حملنا وطننا الفاشل كلويا وذهبنا به لمركز الغسيل الكلوي وللأسف وجدناه مغلقا لأن الماكينات معطلة والعمال مضربين لعدم صرف مستحقاتهم ، فقلت لصديقي مذعورا وأنا أنظر للسودان الشاحب المريض الذي هزل جسده ، وأرتفعت درجة حرارته :
- البلد دي حتضيع ، الحل شنو ؟
قال لي صديقي وهو يبصق السفة :
- إنت الدكتور ، إقترح لينا الحل ما دام ماف غسيل
قلت له بدون تفكير :
- تاني ما بتنفعو إلا الزراعة
إنفجر يضحك بهستريا من كلامي .. يضحك ويضحك حتى دمعت عيناه وهو يهتف :
- هههههههه ما قلنا كده من زمان لكنهم ماسكين لينا بترول بترول .. يلا خلي البترول ينفعو


تعليقات 4 | إهداء 1 | زيارات 1967

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#312020 [الصادق]
0.00/5 (0 صوت)

03-18-2012 09:48 PM
والله فعلا عقول نيرة وديل اللى حيخلوا وطنا فى مقدمة الدول الصناعية والعظمى كمان


#311914 [الامين]
0.00/5 (0 صوت)

03-18-2012 06:23 PM
بالله عندنا عقول زى دى ونحن ضايعين؟؟


#311799 [ود موسى]
0.00/5 (0 صوت)

03-18-2012 03:25 PM
الحل يا دكتور بذهاب هذه العصابة الحاكمة الى مزبلة التاريخ وصدقني كل شتى سيكون بخير ؛بس الناس ديل يقطعو وشهم مننا


#311658 [عبدون]
0.00/5 (0 صوت)

03-18-2012 12:05 PM
و الله فعلا الزراعة هي الحل ....ابدعت يا دكتور و وصلت المعلومة


#311636 [جن]
0.00/5 (0 صوت)

03-18-2012 11:39 AM
يادكتور لو نظرت لجميع اعراض ومسببات الأمراض لوجدتها تنطبق على حالنا اليوم ربما ما يعني اننا الآن نعيش في ال ICU تحت رحمة الله ومن بعده الاجهزه الصناعية ويبقى الوطن في حالة إحتضار و انتظار المستحيل


د. حامد موسى بشير
د. حامد موسى بشير

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة