مساج وتدليك؟ الآن فهمتكم..!ا
03-18-2012 03:06 PM

بالمنطق

مساج وتدليك؟ الآن فهمتكم..!!!

صلاح الدين عووضة
[email protected]


* يا لغبائي أنا كاتب هذه السطور...
* ويا لـ (طرارتي!!) وأنا أسخر من محاولة الإنقاذيين تذاكيهم علينا بحسباننا نُسخاً من (عوير) بلدتنا (علي طريرة)..
* ويا لطول (قمبوري) المتمائل فوق رأسي ونحن الذين كنا نسائل قادة الإنقاذ مستنكرين : (انتو فاكرين نحنا عندنا قنابير؟!)..
* ويا لكثرة (ريالتي) السائلة من جانبيِّ فمي ونحن الذين كنا نكثر من عبارة : (نحن مفتحون ولسنا سذجاً بريالة)..
* فقد (طلعنا) أولئك كلهم ليجتمع في شخصنا (العوير) و (الطيب) و ( أبو ريالة) و (علي طريرة)..
* سنوات عدة ونحن نريق من مدادنا ما نحاسب به الإنقاذيين على مفارقة من جانبهم لشعارات الإسلام التي يرفعونها لنكتشف الآن أننا كنا (نهدف خارج المرمى!!)..
* فقد كنا نظن أننا نحسن صنعاً حين نحاكم الإنقاذيين هؤلاء بأحكام الشريعة نفسها التي هددوا بأن تُراق دونها (كل الدماء!!)..
* ولم نستمع - بسبب الظن هذا - لنصائح الناصحين؛ كفاحاً، وأثيرياً، وإلكترونياً، وعبر مواقع الشبكة العنكبوتية..
* وأكثر الناصحين هؤلاء صراخاً - عبر موقع "الراكوبة" هو مدحت عروة الذي قال في آخر مداخلة له : (إنت يا ود عووضه ما عاوز تفهم يعني إنو الحاصل دا ما ليه علاقة بالإسلام أصلاً؟!)..
* ولكني أقول لهؤلاء جميعاً اليوم : (الآن فهمتكم!!!)..
* فهمتكم بعد أن اكتشفت أن بعاصمة دولتنا (الإسلامية!!) محالاً (يُمارس!!) فيها (المساج!!) بأيادي (مُدلِّكات!!) أجنبيات..
* فهمتكم بعد أن علمت أن (الممارسة!!) هذه أنواع ؛ كل واحد منه بـ (ثمنه!!)..
* فهمتكم بعد أن عرفت أن المحال هذه تباشر عملها علناً و (على عينك يا حكومة يا إسلامية!!)..
* فهمتكم بعد أن سمعت من (ثُقاة) حقيقة ما يحدث داخل الغرف الصغيرة عندما يُغلق بابها على (المدلكات!!) و (وطالبي التدليك!!)..
* وفهمتكم أكثر حين تذكرت أن هذا (الضرب!!) من (الممارسة!!) لم يكن معروفاً في مجتمعنا السوداني خلال الحقب السياسية كافة منذ الاستقلال..
* الحقب هذه التي ينظر اليها الإنقاذيون على أنها كانت بعيدة عن (رسالة الإسلام!!)..
* وفهمت - تبعاً لذلك - لِمَ يكثر (اللقطاء!!) في زمان الإنقاذ هذا..
* ولِمَ يُعثر كل يوم على طفل مجهول الأبوين..
* وِلمَ صارت (دار المايقوما!!) ضيفة دائمة على صفحات الصحف..
* ولِمَ كثرت شقق (اللذة الحرام!!) المفروشة..
* ولِمَ يُضبط - بين حين وآخر - (مسؤول!!) وبمعيته فتاة...... أو (فتاتان!!!)..
* ولِمَ تصير خريجة كلية (شريعة!!) - في زماننا هذا - (قوادة!!) وهي القيِّمة على داخلية بنات..
* ولِمَ استشرى الفساد الى حد (السفه!!!)..
* ولِمَ بلغت نسبة (الحصانات!!) - خلال العهد (الرسالي!!) هذا -(25%) بين العاملين في الدولة..
* ولِمَ صار إطلاق الرصاص الحي تجاه المواطنين في (سهولة!!) إطلاق شعارات (هي لله!!!)..
* فهل هذا هو المجتمع (القرآني!!) الذي تبشرنا به الإنقاذ؟!!..
* الآن (فهمتكم) أيها الناصحون (المفتِّحون!!)..
* فهمتكم تماماً..!!!!!


تعليقات 35 | إهداء 0 | زيارات 7558

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#312598 [سابل]
1.00/5 (1 صوت)

03-20-2012 01:32 AM
عليك الله ده لوما كنت عارفهما تاني ماتكتب عشان ماتفقع مرارتنا وتورم فشفاشنا !!!


#312463 [kalifa]
1.00/5 (1 صوت)

03-19-2012 06:13 PM
تفكيك جزئي للمقال : العوير هو رئيسنا تيس حوش بانقا....الطيب..دلوكة المعقد العنصري..أبو ريالة..وزير دفاعنا المحتفظ بحق الرد دوما باني العمارات المنهارة...علي طرورة دقست فيهو ده علي مقرزة وبطفح مرات والباقي بيكون غاطس ولابت


#312397 [habbani]
1.00/5 (1 صوت)

03-19-2012 03:08 PM
ياخ إنت لسع مافهمت يا ود عووضة!!! لو فهمت قول لى ماذا كان يقصد الطيب صالح ول كنت عاوزه إعمل ليك كتاب زى واحد من كتبه ؟؟؟ ما قاله الطيب صالح كان كتاب وليس عبارة ..كانت قصة ولم تكن رواية
رحمه الله فقد كان فقد كانت زفرته حكاية بلا نهاية لأنها تشكيلية سرمدية


#312334 [الامير]
1.00/5 (1 صوت)

03-19-2012 01:34 PM
ولد ده فهام والله


#312277 [مصطفي]
0.00/5 (0 صوت)

03-19-2012 12:00 PM
ياود عووووضة محلات المساج هذه لها اعلانات مبوبه علي قناة النيل الازرق وكن بصوره تخفي ورائها رائحة الفساد


#312229 [بقا ري]
0.00/5 (0 صوت)

03-19-2012 10:43 AM
قالو في منطقة ابو قوتة ...اتى المعتمد مخاطبا ناس المنطقة وبسالهم عن احوالهم وحالهم وهل ناقصهم شئ ..فرد عليه احدهم قائلا ...والله اي حاجة الحمد لله متوفرة بس ناقصنا التفاح ..والكمثرة ..فما كان من المعتمد الا وان ركب سيارته متجها الى مدني ...وبيكون برضو يا دوب فهم


#312223 [حمدان]
0.00/5 (0 صوت)

03-19-2012 10:30 AM
في اربعين مليون شاهد عدل
فاطمئنو
المهم يا عووضة حمدا لله على السلامة
و كفى


#312218 [مدحت عروة]
5.00/5 (2 صوت)

03-19-2012 10:22 AM
اها يا ود عووضة دى واحدة التانية ما تبحث لينا فى اصل هذه الجماعة من زمن مؤسسها حسن البنا و الذى كتب عنه الصحفى عادل درويش المصرى البريطانى ان الانجليز انشاؤوا هذه الجماعة لضرب الليبراليين المصريين الذين كانوا ينادوا بالاستقلال و محاربة الانجليز و اقامة دولة مدنية مصرية متطورة و دايما كانوا واقفين مع الملك فاروق و قتلهم للنقراشى باشا و الخ الخ!!! والله انا الجماعة ديل شاكى فيهم شك شديد!!! انت ما شايفهم اشد فتكا بالمواطنين و يتجنبوا المواجهة مع المصريين و الاحباش فى ما يخص اراضى الوطن اما ناس بنى قريظة و العم سام فاذا عرفوا ان الضبانة تبعهم ما يرشوا عليها بف باف من رعبهم منهم!!!! و دايما يسمعوا كلام الخواجات و الاجانب اكثر من سمعهم لنصايح بنى وطنهم من العقلاء و الحكماء!!! انت ما شايف اكبر انجاز ليهم انهم قعدوا فى الحكم 23 سنة و انهم يفتخروا بفرتقة الاحزاب و اضعاف المعارضة والخ الخ!! هم عندهم ذهابهم من الحكم خط احمر اما اى شىء غير ذلك يحصل للوطن و المواطن فهو خط اخضر شديد الخضرة!!! هى الخيانة و العمالة دى كيفنها؟؟؟ ياخى حريقة فى الحركة الاسلاموية من المحيط الى الخليج و فى العالم كله و حريقة فى ايران و حماس و حزب الله انهم العمالة و الخيانة تمشى على قدمين!!!!!! الما بيحترم اهله الغبش مسلمين او مسيحيين او لا دينيين و يحترم الاجانب و يحب نفسه اكثر منهم لا يستحق الاحترام بل يستحق الاحتقار و بجدارة!!! السودان اولا و ثانيا وللمرة المليون و الما عاجبه الكلام ده اليمشى يقعد مع جماعته بره السودان و نحنا ما حقل تجارب لحركات الاسلام السياسى عليها لعنة الله و الملائكة و الناس اجمعين و برطوش اى مواطن سودانى اطهر من اى واحد فيهم ولا نامت اعين الجبناء ولا يصح الا الصحيح!!!!


ردود على مدحت عروة
Malaysia [sudanihar] 03-19-2012 06:31 PM
يا مدحت عروة...الناس دي ما بتقدر تغادر الكراسي القاعدة عليها دي ...ايوة انا بقول ليك...لانو المغادرة بتعني لالالالالا هاي هاي هاي ...يعني برد و كندشة شديدة....عشان كدا لازم يعملو اي حاجة عشان يفضلو قاعدين علي صدر هذا الشعب الفضل....و شكرا


#312191 [الزول الكان سمِحْ]
5.00/5 (2 صوت)

03-19-2012 09:46 AM
ياود عووضة

* فقد (طلعنا) أولئك كلهم ليجتمع في شخصنا (العوير) و (الطيب) و ( أبو ريالة) و (علي طريرة)..

نسيت واحد..( أبو هِريشة)

ولِمَ تصير خريجة كلية (شريعة!!) - في زماننا هذا - (قوادة!!) وهي القيِّمة على داخلية بنات

الأخوان الماعارفين معنى ( قوادة ) هى التى تقودإلى.....يعنى بلهجتنا ( معَرًصة )

عوووضة ولد دددددده!!!


ردود على الزول الكان سمِحْ
Sudan [ابوخطاب الابنوسى] 03-19-2012 02:11 PM
الزول الكان سمح سلااااااااااااااااااااااااااااام


#312160 [محمد حامد شاكر]
0.00/5 (0 صوت)

03-19-2012 08:29 AM
زي ما قال وردي: بعد إيه؟


#312143 [ود السماني]
3.50/5 (2 صوت)

03-19-2012 07:22 AM
تعريف الاسلام الانقازي:

الأفك..آكل مال اليتيم ..قتل النفس التي حرم الله بدون حق..الربا ..الزنا
قول الزور والعمل به ..تضيع الصلاة..التبزير والاسراف في آكل المال العام...ياخي عندي سؤال خطر في بالي أسي ..انتا الدين الاسمو الاسلام ده قبل سنة 89 كان بدعو لي شنو لاني والله راح لي الدرب في المويه


#312079 [عاصم حسن]
0.00/5 (0 صوت)

03-19-2012 12:14 AM
معقوله يا صلاح يا عووضه اصله انت بقيت زين العابدين بن على تفهم فى الوقت الضائع.اظنه خبر التدليك والمساج وما وراءه جاءك مؤخرا.وطبعا نحن فاهمين انك ما عوير وما عندك قنبور ولا ريالتك ماشه.نعرف منذ ان كنت تكتب فى الراى الاخر بتاعة تيتاوى الذى انفنس مؤخرا.منذ ذلك الوقت وانت تعرف انه هذه عصابة منحرفة ما شافت البحر فهجمتها (الترعة)والسلطة والمال والجاه ولعلك تذكر ايامهم الاولى عاملين فيها زاهدين ومقولة موظف مجلس الوزراء الكبير,خليهم يرطبوا شويه وتضربهم المكيفات دى حينقلبوا خاسرين وصدق الرجل الذى دفع ثمن قوله هذا فقد شردوا به.


#312066 [ابراهيم]
0.00/5 (0 صوت)

03-18-2012 11:42 PM
احتمال انو تكون دي اول مره اعلق علي مقالاتك مع اني بقراها دائما ...احتمال لاني ما بعلق علي مقال الا يستفذني شيد... المهم.... المقال ده كاتبو انت ياعوضة ... ولا اهكرت.... مشكلتك شنو مع المساج باعتبار انو الدوله كما تحب وتريد وتنشد وتكتب وتقراء ؟؟؟؟؟؟؟؟؟؟؟؟


#312018 [الصادق]
0.00/5 (0 صوت)

03-18-2012 09:46 PM
ما قلتو الحرية..يلا خدوا الحرية براحتكم ومسجوا جسمكم بكل ارتياح وتانى عايزين شنو؟؟


#312014 [جن]
3.00/5 (2 صوت)

03-18-2012 09:40 PM
مش يمكن يكون دا هو المشروع الحضاري زاتو القاصدنو !‏!‏
هههههه غايتو ياود عووضة عصرته على ناس الـ"الدسك" ومشاكل الظهر الواحد تاني يطلع من جلسة المساج يحس عينو مكسورة قدام الناس الواقفين برة المحل


#311980 [عبد المغيث ابو شيخة]
0.00/5 (0 صوت)

03-18-2012 08:22 PM
يادووووووووووبك فهمت - ونحن زمان شن قلنا ؟ مش قلنا الطير باكلنا!!!!


#311943 [ود أبرق]
1.50/5 (2 صوت)

03-18-2012 07:11 PM
ياخ مالك,طالما العملية بى كندوم, خلاص, والممارسة عندها فوائدها

الصحية والنفسية, بعدين الكتمة هى البتجيب الايدز واولاد المايقوما

وركوب الشفع.
بعدين الشغلانة دى مابتقيف ماتقول لى توجة حضارى او

شريعة حتى فى زمن الرسول(ص) الزنا لم يتوقف , هناك ثلاث حلول

إما ان يهدى اللة الشخص فيمتنع عن الزنا او

يكون الزواج وتبعاتة من سكن وقفة فى متناول كل شخص بالغ أو

الحكاية تنظم فى شكل مساج أو غيرة مع إستعمال الواقى لمنع الامراض

والحمل السفاحى. زمان كان فى أماكن للتنفيس ديوم بحرى , سبعة بيوت

ألخ ...فلم يكن هناك مايقوما.

ود أبرق


ردود على ود أبرق
Saudi Arabia [الزول الكان سَمِحْ] 03-19-2012 04:55 PM
والله ودأبرق ده كام مشى هناك.....إلا يعشش قبلو..هههه65

Ireland [Koze Kaddab] 03-19-2012 12:54 AM
يا ود ابرق يقولو ليك بنات صينيات حلوات وانت تقول لينا كوندوم!!!
يعنى كيف الواحد يأكل الموزة بقشرتها؟ والكندوم ذاته حرام!!

Sudan [دقنة] 03-18-2012 11:19 PM
ما شاء الله ما شاء الله ,,, ده هو البعلموهو ليكم الخواجات يا مان !!! طيب ,, أذكرك بي كلام ربنا قال شنو في سورة النور ,,,, بسم الله الرحمن الرحيم( إن الذين يحبون أن تشيع الفاحشة في الذين آمنوا لهم عذاب أليم في الدنيا والآخرة والله يعلم وأنتم لا تعلمون ( 19 ) ) ,,, أرجع لي أصلك وفصلك ودينك ,, نحنا مع الحرية نعم, لكن ما حرية الخواجات ,,, والخمج أصلو ما حينفع معانا أبدآ ,,, ربنا يهديك ويبعدك عن أولادنا وبناتنا يارب


#311921 [عبدالحميد]
5.00/5 (1 صوت)

03-18-2012 06:41 PM
للمعلومية هابي اند معناها نهاية حلوة وسعيدة وطراوة ! وبرضو العياذ يالله ! الغريبة ان الاخ الصنديد عووضة اصبح مسجونا حتي دون ان يري الزنزانة ! اذا نزل في فندق فان اول مايفعله وقبل ان يفتح حقيبة السفر هو البحث عن الممنوعات ! ويسكي في التلاجة او بنقو تحت المخدة او عسولة من اللواتي تلاقت قمم من امهرا وقلب اثينا لانجابها تحفة تسر الناظرين وتخدم الابالسة وتوقع بالمساكين الذين لاحول لهم ولاقوة ! لكم اصبحت حياتك كئيبة يا اخا الكنداكات لا لانك ترغب في هذه الاشياء ولا تجدها ولكن للسجن المعنوي الرهيب ! في ميزان حسناتك باذن الله واليس الصبح بقريب !


#311920 [kamal]
5.00/5 (1 صوت)

03-18-2012 06:41 PM
الاستاذ عووضة لما طلعنا من البلد مع بواكير الانقاذ نعتونا بالشيوعيين ونحن ناس لانريد تطبيق شرع الله وووووو لدرجة الواحد بدأ يشكك فى اسلامو وقلنا الله الكبير بيننا واهو كل يوم الكيزان يبعدون ملايين السنين الضوئية من الله سبحانه وتعالى وكل يوم يقترب من كالوا له التهم جزافا واخيرا يا استاذ عوضة ماتنسى فى اى مناسبة اجتماعية تردد هى لله هى لله لا للسلطة ولا للجاه ..........وشكرا لانى فعلا اول مرة اعرف بانو فى حاجة ذى دى فى البلد


#311895 [حامد]
1.00/5 (1 صوت)

03-18-2012 05:41 PM
مسج نفسك وقش خشمك ساكت وخلى الناس تستمتع


#311891 [Shah]
1.00/5 (1 صوت)

03-18-2012 05:31 PM
يا أستاذ عووضة كلامك ده لو ماعندك معاه أربعة شهود عدل واطاتك أصبحت.


#311885 [عادل متوكل]
3.00/5 (2 صوت)

03-18-2012 05:13 PM
ولِمَ صار إطلاق الرصاص الحي تجاه المواطنين في (سهولة!!) إطلاق شعارات (هي لله!!!)..


#311883 [بت الخرطوم]
3.00/5 (2 صوت)

03-18-2012 05:08 PM
ادفع كل عمرى الباقى واعرف فهمت كيف ومتى واين ومنو الفهمك بعد كل هذا العمر البلغ اربعة وعشرون سنة الاثلاثة شهور يا الود دة


#311874 [hamid]
0.00/5 (0 صوت)

03-18-2012 04:54 PM
يا عووضة الموضوع ده كتب عنه البروف زين العابدين في الصحافة قبل سنين و لم يرد عليه أحد و (
الجمل (الحيوان) ماشي


#311859 [asabangi]
3.00/5 (2 صوت)

03-18-2012 04:40 PM
يا زول إنت زوجتك كان قالت ليك كلام ( المساج) دا جبتو من وين؟
حتقول ليها إكتشفت وعلمت وعرفت وسمعت
طيب إكتشفت وعرفت دى حتحلها كيف؟؟
أمانة ما وقع راجل؟
يا ود عووضة البدخلك فى الشبك دى شنو ؟ مش كان أحسن ليك أبو قناية!!
بعدين ياخى إنت زول طويل عريض وكمان لسانك طويل..يا دوب عرفت الشوية ديل.
أنا لو ما خايف من الزرزرة كنت أزيدك من الشعر ديوان.


#311858 [Ayyoub]
1.00/5 (1 صوت)

03-18-2012 04:40 PM
(العوير) و (الطيب) و ( أبو ريالة) و (علي طريرة)..

الله يجازي محنك يا ود عووضة

بس اعمل حسابك ما تبقى ابو العفين


#311852 [مغمض]
0.00/5 (0 صوت)

03-18-2012 04:28 PM
بالله وصفوا لينا الخير دا كلوا ويين واحنا الصدقنا تبنا!!!!!!!!!!!!!!!


#311849 [خالد]
0.00/5 (0 صوت)

03-18-2012 04:25 PM
قلتاالمساج مكانو وين ضهرى دا ماعارفو مالوومايمشى فكركن كدولاكدههاهههههههههههههههههههههههههاى


#311848 [مجنون ليلى]
0.00/5 (0 صوت)

03-18-2012 04:25 PM
الاخ المحترم ود عووضه

مع تقديرنا لمجودك الجبار في مادة الفهم ولكن لا يسعني إلا منحك 20 من 100 وبالتالى الرسوب في المادة ( اسلامية الانقاذ ) وعليك باعادة محاولة الفهم والاعتراف( اقصد الامتحان ) مرة اخري ..

تحياتي لك وللاخوان عماد وضياء

مجنون ليلى والهلال


#311842 [دقنة]
5.00/5 (1 صوت)

03-18-2012 04:12 PM
نصحني أحد أصدقائي بالذهاب لتلك الدور وقال لي بأن فيها الدواء لكل داء !!! خصوصآ الصينية منها لأنها تتمتع بحصانة من الدولة الرسالية الانبطاحية ,,, ولقد كان ,,, فتاة صينية في مقتبل العمر لا تجيد من العربية سوى ( سلام أليكم ) ولا تعلم من الانجليزية سوى ( هالف أور فل بودي مسساج ,,, دو يو وانت أ هابي ايند !!! وما أدراك ما الهابي ايند والعياذ بالله ) حسبي الله ونعم الوكيل عليكم يا كيزان السوء والدمار والخراب ,, وانا لله وانا اليه راجعون


#311830 [Koze Kaddab]
4.00/5 (2 صوت)

03-18-2012 04:00 PM
يا سلاه اووده عويسنتوت
الاهى اكى دبرو
ياخى نحن ما صدقنا انه جابو لينا مساج وبنات حلوات
، فليه عايز تقطع رزقنا. انت ما سمعت بالتوجه الحضارى
ولا عاوز ترجعنا لصفوف ابو صليب والسيلان والزهرى.
الواحد ما صدق انه بقينا ناس أيدز وانت عاوز ترجعنا للسفلِس.


ردود على Koze Kaddab
Norway [مجنون ليلى] 03-18-2012 08:59 PM
مرساج ، أر إِســـايدِري؟؟؟؟


#311825 [abayzeed]
5.00/5 (2 صوت)

03-18-2012 03:52 PM
طيب انت الصحفي الكبير والاستاذالنحرير يادوب فهمت نحن ناس قريعتي راحت ديل البفهمنا منو؟ أقسم بالله العظيم وكتابه الكريم انني قرأت (menu) لائحة الطعام الخاصة بفندق قصر الصداقة بالخرطوم بحري وذلك في حوالي النصف الثاني من التسعينات حيث يقدم مطعم الفندق ضمن وجباته لحم الخنزير هكذا بكل وضوح ولا اذكر والشهادة لله ان كان محمرا او سلات او شية جمر . كما لا اذكر ان كان معه صحن مرارة بالشطة والليمون والعتي . بالله فهمنا


#311820 [Alczeeky]
0.00/5 (0 صوت)

03-18-2012 03:49 PM
الحمد لله واخيرا فهمت وان تفهم متاخرا افضل من ان لاتفهم ابدا وبعد دا الدور على مجرمى الانقاذ انو يفهمو بانهم مجرمون وسفله ولادين لهم ولا اخلاق وسيقفون بين يوم الحشر وكل يحمل اوزاره حيث لاينفع مال ولابنون الا من اتي الله بقلب سليم . لم اكن اتوقع بانه سوف ياتي يوم ونتحسر علي الدكتاتور نميري لكن مافعله سفله الانقاذ لم يسبقهم عليه احد في العالمين ولا حتى مافعله هتلر فى اليهود.


#311805 [جادون]
5.00/5 (1 صوت)

03-18-2012 03:30 PM
تصحيح ! الحصانه يتمتع بها 25% من شعب السودان الفضل .؟!!


#311802 [عاشق النامير]
5.00/5 (1 صوت)

03-18-2012 03:28 PM
الاعتراف فضيله وا حلاتى ياود عووضه و خط هثرو المايقوما خبرو شنو؟


صلاح الدين عووضة
صلاح الدين عووضة

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة