المقالات
مكتبة كتاب المقالات والأعمدة
الفاتح يوسف جبرا
جبرا في لندن (2)
جبرا في لندن (2)
03-02-2016 09:30 PM


عند كاونتر البلاغات كان هنالك صول ضخم الجثة متورد الجضوم يجلس على كرسي جلدي دوار ويضع أمامه دفتر البلاغات، وقفت أمامه وألقيت عليه التحية:
- صباح الخير
- صباح النور.. هل من خدمة أؤديها لك!
- بالحيل يا خواجة
- أنا عاوز أفتح بلاغ
- عن ماذا تود التبليغ
- اتسرق لينا خط
- What do you mean? A line?..... هل تعني (لاين)؟
- لا لا يا خواجة ما (لاين).. ما لاين
- إذا لم يكن (لاين) فما هو إذن؟
وأسقط في يدي، إذ يبدو أن حضرة الصول الخواجة يحتاج إلى أن أشرح له القصة برمتها، ليته كان يفهم اللغة العربية كان طوالي فتحتا ليهو مداخلتي مع الشريف (بدر) رئيس مجلس إدارة سودانير عند بيع الخط، ففيها حكينا كل الحكاية وهي موجودة في عدد من مواقع الإنترنت.
قطع حبل تفكيري حضرة الصول وهو يقول لي:
- دعنا نقوم بفتح البلاغ وسوف نعلم لاحقاً القضيىة،
ثم قام بفتح الدفتر الضخم بعد أن أخذ رشفة من كوب الشاي الذي أمامه وخاطبني:
- الاسم؟
- الفاتح جبرا
- ما أن سمع حضرة الصول الاسم حتى أخذ في الضحك حتى اهتزت كرشه الضخمة وخاطبني قائلاً:
- أخبار خط هيثرو شنووووووووو؟
- الله لا كسبك يا خواجه برضو إنتا متابع الحكاية دي وعارف؟
- كيف لا أعلم يا ساخر سبيل؟
- وبرضك عارف اسم العمود؟
- وهل هنالك أحد في العالم لا يعرف واوات هيثرو؟ (مواصلاً) كم بلغ عدد الواوات الآن؟
- والله يا خواجة أنا لمن جيت خليت الكسرة الأصلية (واواتا) ذي سبعين كده وكسرة (توجيهات الرئيس) زي أربعين شهر يعني (واو) كده!
- كم عمرك مستر جبرا؟
- 58 سنة لكن لمن الخط اتسرق كان عمري 49!
- ومنذ ذلك الزمن لم تعثروا عليه؟ وما عارفين الشالو منو؟
- ما ده الجابنا ليكم ذااااتو... أي مسؤول تسألوا يقول ليك... التحقيق لسه ما اكتمل والملف حولوهو وين... والشنو ما عارف
- هل لديكم نائب عام ورئيس قضاء ووزير عدل وبرلمان؟
- كوووولهم قاعدين يقروا في الواوات دي.. بس ناس البرلمان ديل أنحنا خاتنهم (للصفقة)!
- لماذا يا سيد جبرا اخترت قسم الشرطة هذا تحديداً؟
- شوف يا خواجة نحنا علمونا في السودان لمن تمشي تفتح بلاغ يقولو ليك إلا في (دائرة الاختصاص) محل السرقة حصلت.. يعني كان إتسرقتا في (بيت المال) إنتا تابع للقسم الشمالي وكان اتسرقتا في (الملازمين) إنتا تابع للقسم (الأوسط) مع إنو بيفرقهم شارع واحد.. أها أنا قلتا أجي القسم ده عشان أقرب حاجة لمطار هيثرو محل (السرقة) حصلت!
- تمام... تمام (يمسك بالقلم): ما هي مهنتك مستر جبرا؟
- والله في الحقيقة أنا محاضر بتاع IT وكاتب صحفي لكن هسه (محقق متفرغ)!
- العنوان؟
- هنا وللا هناك؟ كان هنا قول (بيت السودان) عشان عاوزين بعد ما نخلص من قصة الخط دي نشوف حكايتو كمان هي شنووووو بالمرة!
بعد أن قام حضرة الصول بكتابة البيانات على دفتر البلاغات الذي أمامه، طلب مني أن أعطيه جواز السفر لتسجيل بياناته... وما أن نظر إلى ختم الدخول حتى عقد حاجبيه مندهشاً:
- مستر جبرا أنت لم يمضِ على وصولك ساعتان!
- أيوة يا حضرة الصول... ما عاوزين نضيع أي دقيقة... القصة دي طولت يااااخ وعايزين نحسما
أعاد لي حضرة الصول جواز السفر ومعه ورقة عليها رقم البلاغ وبياناته، وأشار إليّ بالذهاب إلى مكتب الضابط المناوب لتصديقه!!
- ما أن دلفت إلى مكتب الضابط المناوب وقمت بإعطائه ورقة البلاغ حتى وقف يصافحني قائلاً:
- أخبار خط هيثرو شنووووو (بالإنجليزي طبعن)
- بالله هي القصة دي أتاري أي زول في الدنيا عارفا إلا المسؤولين عندنا.. والله حكمتو بالغة!
- (وهو يمسك بالقلم الأحمر ويوقع): شوف مستر جبرا خلاس البلاغ بتاعك اتصدق تجينا بكرة الساعة عشرة صباحاً عشان نديك (الشاويش حسنين) يحقق في القضية دي..
- لكن يا سعادتك تدوني شاويش وكمان حسنين!
- مستر جبرا القضية ده مش محتاج ضابط وما عاوز خواجة ذاااتو... ده قضية بسيطة.. وكيل عريف ممكن يشتغلو!

- كسرة:
في حلقة غدٍ نشوف الحصل شنوووووو... أبقوا معنا... الفاتح جبرا .. من داخل مبنى القسم الأوسط... شرطة لندن غرب... العاصمة البريطانية).
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و
صحيفة أول النهار


تعليقات 10 | إهداء 1 | زيارات 7083

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1423476 [الراجل]
0.00/5 (0 صوت)

03-04-2016 03:48 PM
طالما الخواجات ادوك الشاويش حسنين خلاس استعد من حسع لى حق الفطور وحق السجاير وتعال لينا بكرة وجيب معاك امجاد عشان يمشى معاك مطار هيثرو بالمناسبة لندن فيها امجادات

[الراجل]

#1423473 [الاختشوا ماتو]
5.00/5 (1 صوت)

03-04-2016 03:35 PM
يا جبرة الكلام دخل اللحم الحى وانصحك بالمرة ضم ملف بيت السودان وخلى عينك قوية وارفع عريضة منفصلة باسم مزارعى مشروع الجزيرة والمناقل وعشان تقنع الضابط المناوب بالقسم الاوسط لندن قول ليهو مشروع الجزيرة ده حقكم انتو الخواجات وجدودكم هم الذين قاموا بانشاءه وخسروا دم قلبهم فى عملية التاسيس عشان مصانع لانكشير تدور يالقطن السودانى طويل التيلة الما خمج وقاموا جماعة هى لله بتدمير المشروع نكاية فيكم وده طبعا بيعتبر تخريب للاقتصاد الوطنى الانجليزى عشان كده تكلم الضابط المناوب يمشى معاك بنفسو الحجل بالرجل لمكتب نيابة الجرائم الموجهة ضد الدولة الواقعة بمنطقة كارديف جنوب قيادة قوات الدفاع الشعبى بكارديف وشرق شرطة النظام العام وعندما تدخل لوكيل النيابة طوالى تمسك المنديل وتقش دموعك من البكاء وكان سالك وكيل النيابة الخواجة تقول ليهو والله انا ما بكيت عشان حط هيثرو او بيت السودان بلندن او مشروع الجزيرة انا بكيت عشان جدودكم اهل العدل والاستقامه والنزاهة اتخارجوا من السودان سنة1956 وخلوا البلد صاغ سليم بالرغم من انهم لم يرفعوا شعارات هى لله هى لله او لالدنيا قد عملنا اوغيرها من شعارات الزيف والتضليل والمتاجرة باسم الدين وبعد ما الخواجة يقول ليك استغفر يا جبرة وربنا موجود ولاهاى قريبة من لندن تقوم طوالى تخش فى موضوع اللجوء السياسى او ابرنامج الحماية ومن ديك وعيك وممكن تمشى على طول محكمة لندن الشرعية تغير اسمكوتقول انا الفاتح هيثرو والى اللقاء فى الحلقة رقم ثلاثة

[الاختشوا ماتو]

#1423238 [julgam]
0.00/5 (0 صوت)

03-03-2016 07:08 PM
بالله يا ود جبرا خلص بسرعه واطلع من القسم بتاع بادينقنتون دا وشايف الزول اللابس كاب ولافي شال احمر دا ياهو انا. .والله ناوى افسحك. .بعدما تروح معاى البيت تريح شويه..بس ناوى اوديك لبعشر بتاع الخواجات عشان يطلع ليك واوات هيثرو دى من راسك. .يعنى انت قايل الابالسه ديل بهمهم لو فتحت فيهم دشيليون بلاغ أو اشتكيتهم لرب السماء
.ماهو كبيرهم مطلوب فى لاهاي ..ومطلوب يوم القيامه وماهاميه. .المهم انت ياحنين ما تركب صينية الطرف الأخر أو واترلوو. .ونحن خايفين ليك الغربه والبرد..

[julgam]

#1423190 [شاكرين]
0.00/5 (0 صوت)

03-03-2016 05:16 PM
جبرا فى خط هيثرا
هههههههههههههههههههه

[شاكرين]

#1422987 [وحيد]
0.00/5 (0 صوت)

03-03-2016 10:15 AM
و الله واوات اخبار توجيهات التيس اقصد الرئيس واجعانا اكتر من واوات اخبار الخط ... الزول المتيس و مريس دا ما بزعل لمن يوجه و زول يشاغل بيهو مافي؟!

[وحيد]

#1422953 [الولايات المتحدة السودانية]
5.00/5 (1 صوت)

03-03-2016 08:58 AM
منذ الإستقلال والحال من سيء إلى أسوأ ,, أزهي وأنضر سنين السودان كانت عند وجود الخواجة الإنجليزي !! عندما غادر هذه البلاد تركها جنة ,, وعندما حكمها بنوها صارت جهنم ,, عاثوا فيها فساداً (سرقة ونهب وبيع وكل أنواع العفن)!!!
رجاءً مستر جبرا حنس الخواجات ديل إجوا راجعين ..
قول ليهم المجنون في ذمة العاقل !!
خسمهم بالمسيح وبالإنسانية وبالجودية وبالجودلية وبكل الكتب السماوية !!!
قول ليهم السودانيين أكعب من السوريين ومن ميانمار زاتا .

[الولايات المتحدة السودانية]

#1422949 [ابن السودان البار ***]
4.00/5 (1 صوت)

03-03-2016 08:54 AM
من سابع المستحيلات يتعرف منو الدخل كونتينر المخدرات ؟ ومن سابع المستحيلات تتعرف تفقصة خط هيثروا لو تووو لي الصباح يا جبرا ؟؟؟ ومن سابع المستحيلات ان يتحصل كل طفل في السودان علي وجبة فطور وكوب حليب ؟؟؟

[ابن السودان البار ***]

#1422931 [ابو اشرف]
0.00/5 (0 صوت)

03-03-2016 08:27 AM
الشريف بدر ده بدا ببيع اراضي المزارعين في القضارف حد سالوا مافي جاء الجزيرة عمل شنو؟ مامعروف !! مشروع الجزيرة وشركات روينا وعطشنا حد سالو مافي !!! استثمار في استثمار حد سالوا مافي !!! جايي انت تسالوا من حاجة في بلد الخواجات يقطعوا ليها بحور ؟؟؟؟؟

[ابو اشرف]

#1422876 [ود الشريف]
5.00/5 (1 صوت)

03-03-2016 06:39 AM
كده انت ضيعت الخط (نوهائي ) .. جماعتك ديل تاني تسألهم حيقولو ليك امشي للخواجة بتاعك .. تضيع حقنا بأفكارك المهببة زي الما عارف الكيزان .

[ود الشريف]

#1422820 [أبو أحمد ود احمد]
2.88/5 (4 صوت)

03-03-2016 12:04 AM
الخط واضح في كروشهم
اكرشهم لوري شاحن شوك سدر

[أبو أحمد ود احمد]

ردود على أبو أحمد ود احمد
[ودالعمدة] 03-03-2016 08:17 AM
ان شاء الله تصدمهم تركة شاحنة حجر مسنن الرؤوس يا رب.

United States [عمدة] 03-03-2016 03:34 AM
صدقت يا ابواحمد.
وازيدلك عليها وراه لورى جارى سلك شايك ومصدى كمان


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة