فى كلام تااانى
09-04-2010 02:07 PM

ساخر سبيل

فى كلام تااانى

الفاتح يوسف جبرا

تَوقّفَت طويلاً عزيزي القارئ قبل أن أهدأ شوية و«أروق» لأبدأ في كتابة هذا المقال )غير الساخر).. اليوم هو الأربعاء الأول من شهر سبتمبر.. الساعة الآن التاسعة والنصف مساءً.. قبل قليل (في حوالي الساعة التاسعة)، كُنت ماراً بشارع «الحرية» بالخرطوم حيث طلب منى أطفالي التوقف عند مشاهدتهم لمحل لبيع الآيسكريم، بالفعل توقفت أمام المحل الذي يفتح على الشارع العام، لكنني وحرصاً مني على ألاّ أقف في (الظلط) فقد قمت بإيقاف العربة فى طرف الشارع الجانبي حتى يكون الأطفال تحت ناظري.
نزل الأطفال لشراء الآيسكريم وبقيت أنا وزوجتي في انتظارهما وفي هذه اللحظة حاولت إحدى العربات أن تمر، غير أن عربة في الإتجاه المعاكس لم تسمح لها (لوجود عربتي) فقمت على الفور بالتوغل قليلاً داخل الشارع مفسحاً الطريق، غير اننى فوجئت بعد ان توقفت تماماً بالعربة التي خلفي تقف حذائي مباشرةً وهي عربة بيضاء (نقل) عليها السائق وشخص آخر يجلس بالمقعد الأمامي، حيث تبينت بعد مسافة من الوقت أنهما يرتديان زي الشرطة، فصرخ فيّ الذي من ناحيتي قائلاً:
- أنزل يا زول وجيب رخصتك..؟
وفي هذه الأثناء قفز السائق (قفزة مظلية) من المركبة (العالية) ووقف على بُعد أمتار أمام عربتي في مُواجهتي (على طريقة أنزل وخت إيديك في رأسك).. وهو يشير لي في عصبية ويأمرني في حدة:
- أنزل يا زول بسرعة وجيب رخصتك..
لوهلة ظننت أنني أشاهد أحد أفلام (الآكشن)، أخذت رخصتي من درج العربة ونزلت مُتجهاً (للزول النزل ليّا)، غير أنّه خاطبني وهو يُشير لي للشخص الذي لا يزال في العربة.
- سلِّمها لي جنابو هناك! وامشي ورانا القسم!
بالطبع عزيزى القارئ لا يمكن لأي عاقل بالغ رشيد إلا أن يسأل روحو في هذه اللحظة عن (الجريمة) النكراء التي اقترفها، لوهلة اعتقدت بأن (الناس ديل) مشبهين عليّا وأن هنالك مجرماً هارباً (يشبِّهني) أو أنّ لوحة عربته قريبة من لوحة عربتي، فكان أن توجّهت بالسؤال (لجنابو):
- لو سمحت ممكن بس أعرف أنا عملتَ شنو..؟
- (في إزدراء): يعني ما عارف..؟
- واللّه ما عارف!
- لمن تمشي معانا القسم ح تعرف!
- جميل.. أنا ح أمشي معاكم القسم بس ممكن توروني الحاصل شنو..؟
- الحاصل إنك واقف ما تمام!
- الحقيقة الأولاد نزلوا يشتروا آيسكريم من المحل ده وأنا ما عاوز أقيف بعيد عشان يكونوا قدام عيني وبعدين أنا ما قافل الشارع والشارع فااااضي وممكن براحة إنتو تمروا
- (سؤال مفاجئ): إنتا جنسك شنو..؟
على الرغم من أنني لم أعرف المغزى من هذا السؤال إلا أنني أجبته في استغرابٍ:
- سوداني!
هنا ناولني (رخصة قيادتي)، في ذات الوقت الذي إعتلى فيه (السائق) مقعده وأنا ما زلت في تلك الحالة من الإندهاش الذي جعلني أخاطبه قائلاً:
- أنا ما شايف يا ابني الحاجة العملتوها دي بتتناسب والشئ الحصل، الزول المعاك ده (أقصد السائق) يتلب من العربية (زي الكوماندوز) ويتعارض ليّا بعيد قدام عربيتي (زي العامل ساتر) ويكورك فيني (أنزل ... أنزل) وأنت بي جايي برضك (أنزل يا زول وامشي ورانا القسم).. وكمان المسألة جابت ليها (جنسك شنو)!
- (جنابو والسائق في نبرة واحدة): والله إنتَ لو ما زول كبير كان ممكن يكون في كلام تاني!
ثم انطلقت رقم (39082) شر طة وتركتني و(أبنائي) في ذهول وتوتر نحاول أن نجد تفسيراً لما حدث!
عزيزي السيد مدير عام الشرطة:
حتى ترون بأنفسكم أن ما حدث من (ترويع) و(إذلال) و(إرهاب) لا يتناسب مع المخالفة (إن وجدت)، وأن الموضوع ما بيستاهل الكلام العملوهو (أولادنا ديل)، فإنّني على أتم إستعداد لتمثيل (الجريمة) في موقعها!!
كسرة:
ده كلو طبعاً كوم وحكايَة (إنتَ جنسك شنو) دي كوم تاني!! أكون (صيني) ومش واخد بالي..؟

الرأي العام


تعليقات 19 | إهداء 0 | زيارات 3925

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#23953 [السوداني ]
2.98/5 (8 صوت)

09-16-2010 03:21 PM
نزلت اجازة فيى رمضان الفات ، وفي المطار لقيت واحد كانو موصينو لي اصر يشيل معاي الشنط حتى الفى يدي واخدني للجمارك وبسهولة شديدة خرج بي للصالة الخارجية وفي اللحظة العايز اسأله عن سبب مساعدته لى وهو موظف بالمطار وعلى كتفو بطاقة من زهولى ما فكرت اقرئها حتى ، اسمع ليك حمداً لله على السلامة وحلاوه الوصول زهلت اكثر وقدام الجميع طلعت المحفظة واديتو الفيها النصيب
ياجبرا الناس ديل كانو عايزين حق العشاء وحقدو عليك في موضوع الايسكريم دا


#22018 [محمد]
2.69/5 (5 صوت)

09-07-2010 12:33 PM
والله ياستاذ الفاتح اجمل حاجه عملتها انك كتبت رقم عربة هذا الحرامي خلي الباقي لمدير المرور اذا كان هو نزيه.
اي دور علماء السودان من هؤلاء بدل الافتاء علي برنامج اغاني واغاني


#21569 [ هاشم المقهور]
3.19/5 (5 صوت)

09-05-2010 10:03 PM
تحياتي ورمضان كرئم ايها الصابر المحتسب
والله العظيم شتان بين الشرطه هنا في دولة الامارات العربية وبين الذين هم حرامية الشعب السوداني المسكين الذي لاحوله ولاقوة لة
والله العظيم واقول كلامي هذا والله على شهيد بانك تحس هنا بان الشرطه هي من تخدمك وتسهر لراحتك ويفعلون الغالي والرخيص لراحة الوافدين قبل المواطنين في بلد زايد الخير الا في حالة انك تطاول على القانون لانه لا يوجد كبير عليه
اما في وطن كان يسمي السودان فساد الهرج والمرج وتفشت الرشاوي والقبلية والواسطات وساد قانون الغاب فالقوي ياكل الضعيف واصبح ارض المليون ميل أرض للفساد والجور والظلم بشتي انواعه ومسمياته.
لذلك نسال الواحد الاحد الفرد الصمد ان ينجي السودان من كل ظالم وكل مستكبر وكل جبار في اي منصب حكومي.


#21558 [أبويوسف]
3.69/5 (5 صوت)

09-05-2010 07:47 PM
فى كلام تانى ياستاذ قايلين معاك الجكاسى ودايرين يطلعوا منك بحق الملاح قصة نمشى القسم دى حرشة يكبروا بيها الكوم بوظت عليهم الشغلانة بالاطفال والايسكريم


#21534 [عبدالمنعم ]
3.69/5 (5 صوت)

09-05-2010 05:46 PM


والله يا استاذ جبرة مافي كلام تاني خالص !!!! قلنا الرووووووووووووووووووووووووب

يعني الواحد يطلع من بيتو وجاهز للكسر واللبع والترهيب ولو في طريقة يشيل معاهو البندول وحبوب السكري والضغط ويكتب وصيتو ويودع الناس قبل ما يطلع من البيت !!! الشرطة في خدمة الشعب والشعب ما لاقي البخدمو !!! الشعب ما لاقي البوقف منو ارهاب البخدمو !!! الشعب خايف لانو شايف !!! وسيعلم الظالم بظلمه !!!! خدمة الشعب قال !!!!


#21506 [طارق الطاهر]
2.63/5 (5 صوت)

09-05-2010 04:05 PM
تصور كيف يكون الحال يا\"جبره\" لو ما كنت سوداني


#21489 [قبطي سوداني]
3.38/5 (5 صوت)

09-05-2010 03:28 PM
انت جنسك شنو - المفصود واضح ومفهوم لديك ولدأ السادة القراء - فانت لونك فاتح وزوجتك من اصل قبطي والشرطي افترض انك من اصول قبطية يمنية عربية أي حاجة فكانت فرصة لممارسة التمييز والعنصرية والاحقاد منهم - انت جنسك شنو هذا سؤال السمج نسمعة يوميا من طائفة هولاء سوء اكانوا مرور او ائ نوع من القوات النظامية
فاذا احسيت بالغبن او الاهانة في لحظات فهاذا ما نحسه من سنين من هولاء
ما يعزينا هم الشعب السوداني الراقي الاصيل الذي يرفض تصرفاتهم ويحترم كل الثقافات والاديان والالوان ويرفض ممارسة التمييز علي اساس اللون

انا شخصيا اتعرض لذلك كلما خرجت مع اسرتي اجد شرطي مرور يوقفني او عربة ما تتبع لاحدي الوحدات النظامية واملك مئات القصص من ابتزاز واهانات من هولاء المخلوقات المسعورة


#21417 [أبواحمد]
3.32/5 (5 صوت)

09-05-2010 11:38 AM
ديل أسمهم حراميها فى زى حاميها ، أكلهم من جحيم وشربهم من حميم وزيهم ناس الضرائب والزكاة والعوائد قروش الشعب ماشه جيوبهم سواء بالرشوة أو بالحوافز والبدلات وربك مطلع
بس بعدين لما الإنقاذ تمشى ما تتباكو عليها وتجرو تدفنو ناسا زى النميرى


#21409 [كتكوت]
3.57/5 (5 صوت)

09-05-2010 11:05 AM
يعنى داير تقنعنا انو فرقة الكماندوز دى خلتك كدا ساااااى من غير ماتزبلبن !!!


#21366 [زول]
2.94/5 (5 صوت)

09-05-2010 02:12 AM
مشكلة ناس الشرطة انهم شايفين ان اغلب الناس بتنظر لهم كحرامية وناس رشوة ودى طبعا الحقيقة فى اغلبهم والقليل منهم شرفاء والشرفاء ديل مطهدين وناس مكاتب
كما ان الشرطة بترى ان ناس الجيش والامن الوطنى باقسامه لهم رواتب وامتيازات اعلى من الشرطة ىعنى المشكلة فى الشرطة نفسيا مرضاء وفاقد تربوى وبقت مهنة من لا مهنة له


#21342 [معتز]
2.94/5 (5 صوت)

09-04-2010 11:49 PM
بصراحه السودان في عهد البشير بقي جربنديه في اي شئ حتي الشرطه فقدت هيبتها وفيها فساد شديد وناس مامؤهلين ضباط كانوا ام جنود طبعا ما الكل لكن الغالبيه ناس شوفوني واختلطت الصلاحيات تلقي واحد تابع للشرطه المجتمعيه يعمل ليك فيها بتاع مرور والعكس 00وايضا عدم الثقه في المواطن واعتباره مذنب لمجرد شك ده بخلي هناك فجوه وعدم احترام بين الشرطي والمواطن00 الله يشيل البشير وعصابتو0


#21329 [dgash]
3.13/5 (5 صوت)

09-04-2010 10:49 PM
يا استاذ هذا قليل من كثير بحصل لعامة الناس و باستفزاز شديد و انت احترموك لانك زول كبير !! لكن شوف الاهانات لبعض الناس لمّ يسألون انت جنسك شنو !! و يكون جنسو ما ملائم معاهم تشيل شيلتك قمع و ضرب و سب و اهانة لانه جنسو كدا اما لو جنسو زى جنس الاستاذ جبرا شوية ( بنهرشو منو ) هنا لا اقصد سودانى اقصد قبيلة مع احترامى لكل القبائل فى السودان عامة هناك قبائل امورهم مقضية على مستوى السودان اما البعض حدث ولا حرج خايتو الله يكون فى العون يا استاذ كيفن يكون الحال لو ما كنت ------------ !!!!!! ؟؟؟ شنو داك ماعارف






















#21289 [العربى]
3.94/5 (5 صوت)

09-04-2010 06:40 PM
الجهاز الشرطى فى السودان جهاز فاسد كغيره من الاجهزة الخدمية وبختارو ليهو ناس ماعندهم علاقة بخدمة المجتمع اصلا هو دخل عشان يمارس كل انواع الرزيلة عبر بوابة الشرطة جهاز فاسد تماما وكل يوم بتمر عليك عشرات المواقف المخجلة ومابتشرف رجل شرطة فى الدول الاخرى جهاز مبنى على الرشاوى والوساطات ان صلح كان حال البلد انصلح لكن من اين له ان ينصلح ؟؟؟;( ;( ;( ;( ;( ;( ;( ;( ;( ;( ;( ;( ;(


#21261 [abdelmonem musa]
3.94/5 (5 صوت)

09-04-2010 04:55 PM
هذا التعامل من رجال الشرطة هو البخلي المواطن يكره الشرطة ورجال الشرطة لان العلاقة بين الاثنيين قائمة علي عدم الثقة،أين تطبيق شعار الشرطة في خدمة الشعب كان بحصل شنو لو سألو رجال الشرطة بكل أدب عن سبب الوقوف ولكن صيغة السؤال تدل علي عدم التدريب الكأفي لرجال الشرطة


#21259 [حامدابوعبدالمجيد]
3.25/5 (5 صوت)

09-04-2010 04:52 PM
جبرا سلام وماعاش الى يرهبك لكن بينى وبينك الابداع الايسكريم مابطلعوا بطلعو لينا الارهاب بس يكون على خفيف
وبخصوص جنسك شنو جعفر عباس قال ليك المليونيره السعوديه فى انتظارك منها تاخد القروش والايسكريم يجيك لحدى البيت ديلفرى وزى النوع ده يكونوا فى حمايتك فى البيت ويفتح ليك الباب كمان
ياربى تهدى ناس الكاكى فى السودان ونشوف اليوم يقوليك فيهو العسكرى من حقك ان لاتتحدث عن شئ وتطلب محاميك قادر ياكريم

.......تصبحوا على وطن


#21253 [abuosama]
2.44/5 (5 صوت)

09-04-2010 04:30 PM
للاسف الشديد ناس الشرطة ديل ما عارفين حدود صلاحيتهم ولا المواطن عارف حقوقو وحتي لو عارف حقوقو مابقدر يقول بغم والحالات الذي دي كتيرة شديد نتمني انو رسالتك دي تلقي الاستجابة من السيد مدير عام الشرطة ويكون في حل جزري ....وكل سنة وانتو طيبين والسودان بخير


#21225 [محمدعبدالمجيد-الرياض]
2.94/5 (5 صوت)

09-04-2010 03:26 PM
يا أخي امكن مشبهنك على ناس خليل ..!!
ولا كمان أمكن مشبهنك على واحد اريتيري من جماعة اللاجئين...!!
(دي ممكن تحصل فعلا: لأنك شكلك كدى أريتيري هربان من حكومتو وقاعد مروّق في عاصمة خليجية:
آآآي بعرفك: مش كنا مساهرين معاك امبارح في \"الخيمة\")


#21223 [طارق الطاهر]
2.57/5 (5 صوت)

09-04-2010 03:18 PM
أول مرة أدرك ميزة كونو الواحد يكون سوداني
وأول مرة أفهم كلام المرحوم سماعين ود حسن رحمه الله :
تخيل كيف يكون الحال لو ما كنت سوداني وأهل الحارة ما أهلي;)


#21221 [abohalla]
3.19/5 (5 صوت)

09-04-2010 03:08 PM
الاستاذ الرائع جنسك شنوالاجابة على هذا السؤال هو الذى يحدد ما اذا أنت من القبائل المجرمة مسبقا ام من اهل السطوة والسلطان......ما يعقد لسانى دهشة هو ان تواجه بهذا السؤال لاول مرة ....السؤال هذايحدد حتى حقنا فىان نحلم (كسرة ...ابن اختى يبعد من التقانة العسكرية لانه زغاوى ......وهو مستوفى لكل الشروط الاخرى الا شروط القبيلة


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة