المقالات
السياسة
ارشيف مقالات سياسية
مالها الانقاذ؟ كده عيبوها لي
مالها الانقاذ؟ كده عيبوها لي
03-25-2012 04:42 PM

مالها الإنقاذ.. عيبوها لية

عمر الفاروق عبد الله
[email protected]

وزير سابق للخارجية ومستشار حالي بالقصر الرئاسي .. وصف الشعب السوداني في رد غاضب له علي سؤال احد السائلين في احدي سفارات السودان بالخارج بأنه قبل الإنقاذ لم يك شيئاً مذكورا بل كان مجموعة من الشحاتين والآن الحكومة تشحد بالنيابة عن الشعب السود اني في شكل زيارات خارجية غطائها البحث في سبل الإستثمار في السودان ولكن حقيقتها هي الشحدة بعينها يقوم بها نفس المستشار الرئاسي وبقية من متنفذي حكومته الفتية.. حكومة تشحد من احل الشعب في حب يا اخوانا احسن من كدة؟
الجنوب ده من سنة 55 وعلي حد قول احد الانقائيين "مدخلنا في جحر ضب" حروب ومشاكل اقتصادية وطيب ما الانقاذ لقيت ليكم الحل بعد 55 سنة اخري في فصله وبتره عن جسد الوطن الأم زي مريض السكر المالقوا ليه علاج غير بتر رجله! ولسه البتر حيتواصل طالما المرض ده سيستشري في بقية الجسد مافي مانع من قطع كراع تانية وايدين والخوف بعدين يبقي جتة من غير راس!! يعني دارفور والشرق وجبال النوبة وكل حتة عاملة ازعاج نبترها الي ان تتحقق مقولة نافع علي نافع "حنكمكم من توتي" وبعدين ناس امدرمان يطالبوا بحكم ذاتي اقليمي في اطار توتي الموحدة ويكون عاصمتها حي العرب .
مالها الإنقاذ كده عيبوها لي؟ مش ريحت كتير من الاسر بتغريب معظم عائليها ليصرفوا عليها من الخارج أي أنه هنالك اكتر من من مغترب في الاسرة الواحدة يصرف علي الحكومة في شكل ضرايب وزكاة ومساهمات وعلي اسرهم المعاهم في الغربة ولو فضل شي يصرفوه علي الباقين في السودان. ده غير الهاجروا للستيت وكندا واستراليا والصين وحتي اسرائيل وبعد ماطلعوا هؤلاء المهاجرين تبقي في السودان الانصار المناصرون للمؤتمر والإنقاذ نفعياً وجهادا مالياً .. يواجهون مشكلة الجنوب الجديد في جبال النوبة وابيي ودارفور والشرق ويعدون لهم ما استطاعوا من رباط الخيل وعندها سيصلي نافع العصر في ابي قريظة ويطلق البشير عقيرته صائحاً من دخل المؤتمر الوطني فهو أمن ومن صالح الانقاذ فهو آمن ومن دخل استاد المريخ فهو آمن ومن دخل دار أبوهاشم فهو آمن.
مالها الإنقاذ عيبوها لي: فهي التي شالت عنكم عناء القيام بثورة شعبية في الربيع ولا الصيف ماهو فارق.. فحولت الشباب من الفيسبوك لمعسكرات التجنيد استعداداً للحرب المحتملة ..وحولت بناته من التغني بحقوق المرأة الي مغنيات في نجوم الغد ومداحات في ساهور!! وحولت البقية الكادحة للمزيد من الكدح منشغلين بلقمة العيش وجقمة الموية وفتة البوش وحق الدوا والنفايات والعودة آخر الليل متهالكين منهوكين حتي لا يصبح فيهم حيل للثورة!! وكما قال البشير فان الانقاذ هي اول ثورة ربيع عربي بل هي ثورة نيولوك ثورة غير .. فإن كانت الجموع قد خرجت لتقول للحاكم ارحل ليحكم بدلاً عنه الكيزان في ليبيا ومصر وتونس واليمن وسوريا بعد ما يلقوها باردة ويروح فيها شباب الفيسبوك فالإنقاذ قد قصرت الخطي والمشوار فهو اول حكم كيزاني في الوطن العربي قام بثورة شبابية عسكرية قوامها الدبابات بدلا عن مجموعات الفيسبوك يستولي علي الحكم بدلاً ان يكلف الشعب عناء ذلك كما فعلوا في دول ثورات الربيع العربي.
وكما قلنا في اول الحديث بان ثورة انقاذ السودان ثورة نيولوك فهي التي قالت للشعب ارحل فرحل وماتبقي وفضل في السودان لا خوف منه كما هم يحسبون. ومن عجائب الصدف بأن معظم مبدعي الشعب السوداني رحلوا للدار الآخرة في عهد الانقاذ العجيب.
وبعدين يا ناس الانقاذ دي زي ادروب ولوفة خلاص يعني شنو 24 سنة ما تخلوهم يتموا مدتهم شنو الجفا ده وبعدين يعني شنو البديل وحيعمل شنو البديل اكتر من العملتوا الانقاذ حكم!





تعليقات 4 | إهداء 0 | زيارات 2117

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#316395 [خالد]
0.00/5 (0 صوت)

03-26-2012 10:17 AM
ياناس شفتو حرامى طبق شريعه ولاشفتو زانى بطبق شريعه


#316203 [سلوكة]
5.00/5 (1 صوت)

03-25-2012 08:18 PM
اكيد نحن عايشين فى هناء وما جايبين خبر ..
وزراءنا مهمومين بى معيشتنا وما عندهم استثمارات ولا يتطاولون فى البنيان ..
وزراعتنا عال العال وكمان نصدر فائض القمح والفول والخضروات والمواشى ..
العلاج مجانى والتعليم كذلك.. وناكل 3وجبات خالية من البوش والدكوة والكول


#316179 [بت الخرطوم]
0.00/5 (0 صوت)

03-25-2012 07:28 PM
لو ما الانقاذ انقذتكم ولحقتكم كان الدولار بقى بعشرين جينة مال الانقاذ عيبوها لعمر الفاروق كان ما الانقاذ كيلو الضان بقى بتلاتين ولا كيلو الطمام يصل العشرين مال الانقاذ عيبوها للفاروق


#316144 [بشير الحاج البشير]
0.00/5 (0 صوت)

03-25-2012 06:18 PM
ما أكثر عيوبها ولا أقول غير هذه العباره إتسـع الخــــــــرق علي الراتق فمهماحاول المنتفعون منها ومن نظامها تجميلها نحن لا نقول في طرحها ونعيب ما تدعي أنها جاءت من أجله ولكن نقول في الدجالين وسراق الشعوب الذين يتدثرون بوشاحها سراق البترول وبائعي المشاريع القوميه والفاسدون في أنفسهم والمفسدون لغيرهم قاتلهم الله أني يؤفكونز


#316129 [السر عبد الرحمن]
0.00/5 (0 صوت)

03-25-2012 06:02 PM
اعتقد اى سودانى بحس بالوجع مبسوط بفصل الجنوب واقصد هنا السودانى الاصيل اب دم حار واللى ما غير جنسية بلده باللجوء والاستهبال


ردود على السر عبد الرحمن
Australia [ahmed] 03-26-2012 02:26 AM
السر عد الرحمن
في السفر سبعة فوائد
وانت قابع لا تستطيع حتي الوقوف فما بالك باللجؤ السائد
نحن احرار وانت تأكل فتات الموائد
نحن الذين سنحول الكيزان الي عهد بائد
اذا كان لجوئنا يزعجك فماذا اذا قالوا لك إني عائد

Sudan [sudani] 03-25-2012 10:35 PM
هوالسودانبن منو غير الجنوبيين


عمر الفاروق عبد الله
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة