الفقوس
03-27-2012 08:38 AM


الفقوس

أسماء الجنيد
[email protected]

سلاما حزينا لكل الأهل في كل بقعة من بلادي وخارجها
سلاما حزينا بعمق فقدنا الشال خيارنا ,
رحلوا تباعا , كان رحيل الموسيقار وردي الذي لفح قلوبنا بحزن لن تغسله مياه انهارنا الإتنين
ولم يجف دمعنابعد على الهرم وردي ،فجعنا برحيل الأخ الصديق شاعر الغلابة والكادحين حميد بحر المودة والحنين
وبالأمس رحل لاحقا بهم المناضل العفيف الشريف نقد , رحلوا جميعا مهمومين بالوطن الما زالت جراحه نازفة بغزارة!!
لهم الرحمة جميعا ولنا الصبر ، ونسأل الله الرحمه والخلاص من القوم الظالمين ,, اللهم آمين يا رب العالمين ..

الشعب الفقوس
ــــــــــــ
المثل او المقولة بتقول خيار وفقوس ,, لكن للأسف نحن في نظر اولي الأمر وفي نظر القاعدين في سدة الحكم إننا نحن شعب فقوس ، جت علينا من طرف، ما مننا ايتها منفعة ولا فايدة , لا مؤآخذة البهيمة عندهم لو قارنوها بي اي مواطن البهيمة هي الخيار والمواطن التعيس هو الفقوس , آي والله لأنه البهيمة دي هو بستفيد منها يا اكلها يا شرب لبنها يا هداها للمصاروة ببلاش ، والأخيرة اهم وافيد لأنها بترفع اسهمه مع اولي نعمته في بلاد الجوار بدون حوار، الحوار هنا الهدايا من اللحم الحي ومن دم الغلابة وعرقهم , يجوع الفقوس ده ويعطش ويتجدع قدام المستشفيات ينداس عليه بالمداس ويموت ويخموا ويدفنوه بالكوريق ، شنو يعني مافي النهاية فقوس ما معاه ولا خيارة واحدة !!! حتى لوبقي جزء مننا خيار برضو بقدروا عليهو ويخللوه ويحنطوه ويبيعوه ويستفيدوا من القروش. الجماعة ديل جايين فجعانيين قروش بس، لا في اهداف ولا مباديء جايين عشان ملي الكروش ، عشان كده يا جماعة ما نلومهم تب ، جربوا خطتهم ونجحت بعد تهليل الفقوس لكل الرؤوس، عاسوا عواستهم قدام كل الناس برا مدسة ، نهب وفساد وقتل وفتنة ، ما قصروا كلو كلو في الخراب ورفعوا شعارهم المعروف ورددوا لينا وفات اضانا وقالوا لينا الزارعنا غير الله يجي يقلعنا هللنا وكبرنا ليهم، وهم سائرين ونحن مرضانين وجعانين ونصنا ميتين والباقي الحيين نعسانيين ونايميييييين ، برضو جونا بي شعار تاني ملحن وبي رقيصو ونفض كيسو , نحن جينا وكية للمابينا ، برضو هللنا ورجعنا نمنا , طلعوا في راس البيت وقصوا الرقاب وفرقوا الصحاب وطردوا الأحباب وقسمونا نصين ، وبرضو مصرين يرددوا في شعاراتهم الما عاجبوا يلحس كوعو ، ولسة يا الفقوس راسك مدسوس ، سوينا سواة النعامة الدفنت رأسها في الرملة ،
اها نحن مش شعب داقس ومدقوس وكمان فقوس ؟؟؟
متاوقة
ــــــــــــ
النصيحة حااارة يا الفقوس... وطول ما إنت يا شعبنا صامت وممغوس وفي بطن البيت مدسوس ياكا في نظرهم الفقوس الديمة رأسك مطأطأ ومديوس!!!!
يحلنا منهم ال لا نام لا أكل الطعام ,,
النبي قولوا آمين
يمهل ولا يهمل


تعليقات 9 | إهداء 2 | زيارات 2740

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#317614 [Kantoosha Khamis]
0.00/5 (0 صوت)

03-28-2012 11:21 AM
انشاء الله يا استازة الفقوس ليهو يوم, بس عايزين من كل الفقوسات الماشاء الله فروا من النصائب ديل و بقوا نافعين فى اى مكان من ارض الله الواسعة, يسيبوا اى حاجة و يرجعوا البلد فى الذمن المناسب, لاننا محتاجين جد لكل الفقاقيس لسوداننا الحنسوى بعذم الفقوس, و الانشاء الله ما حيكون بعد دال ذول فقوس.


#317385 [core]
0.00/5 (0 صوت)

03-27-2012 10:49 PM
اظنك انت طيبة حبة هو بالاساس لايوجد شعب
-=خيارولا فقوس الدليل 23 سنة حكم جائر لدرجة محاكم لاهاى وتحدى الكبار تحت جزمة المشير الف رحمة ونورللشعب السودانى المات معليش يا بنتى انت بعدك صغيرة بس طول كرعين


#317345 [مدرس ماكلين حقو الشويّة داك]
0.00/5 (0 صوت)

03-27-2012 08:48 PM
القذافي بعد الكتل جابت ليها عود غلييييد( نظام خازوق )
ونقول للبشكير الكضاب أبو حلقوم كبييير خازوقك انت وجماعتك راجيكم وكمان جعباتكم كباااار من حق الحرام


#317122 [بابكر]
0.00/5 (0 صوت)

03-27-2012 01:02 PM
نعم شعب فقوس لانو بعض الغتربين او بمعني اصح المهجرين يقوليك مافي بديل او لو البشكير جانا واحد غيرو بكون برضو كارثه متل ديل محتاجين توعيه وفهم جديد


#317111 [mohammed nurain]
0.00/5 (0 صوت)

03-27-2012 12:44 PM
آمين ومن خشمك لربنا وإنشاء الله ربنا حايستجيب لانه مشى الكثير وباقى القليل . ونحن كشعب سودانى ترتيبنا بالنسبة لحكومة الانقاذ مابعد الفقوس لان الفقوس بحتل المرتبة الثانية ونحن تحت الصفر.


#317046 [تتو]
0.00/5 (0 صوت)

03-27-2012 11:25 AM
آميــــــــــــــــــــــن


#317023 [ام رحى]
0.00/5 (0 صوت)

03-27-2012 10:56 AM
اميييييييييييييييين مصيبة تاخدهم يارب العالمين


#317017 [مدحت عروة]
3.00/5 (1 صوت)

03-27-2012 10:53 AM
آآآآآآآمييييين يا رب العالمين!!!!


#316951 [ميسر جبوره]
0.00/5 (0 صوت)

03-27-2012 09:45 AM
ديل ما دافنين راسهم بس في الرملة دافنين وقابطين ثمن دفن الراس في الرملة


#316935 [اب جاكومة]
0.00/5 (0 صوت)

03-27-2012 09:27 AM
يا بت الجنيد عودا حميدا بعد انقطاع ، والله كلامك ياهو اصبحنا مثل الفقوس وامكن الفقوس احسن ، يموتوا الناس السمحين والطيبين متل نقد ووردى وحميد ويقعدو ناس نافع ومندور وغندور وطرطور ولا نملك الا ان نقول الحمد لله وهذة حكمته سبحانه وتعالى ، ماذالت دمائنا تنذف وفقرنا يذداد وبلادنا اصبحت فى الهاوية ولسه العصابة متكبرة ومتجبرة لا تريد سوى ان تدفن وتقبر السودان واهله، لقد حانت لحظة الثورة واكتملت حلقاتها ولابد مما ليس منه بد


ردود على اب جاكومة
Sudan [Abu Rawan] 03-27-2012 12:23 PM
يا ابو جاكوما انحنا ما فقوس لكن عندنا بيات شتوى........ لكن نحن عايزين نغربل الامور شوية عشان يطلعوا منهاناس عمك الصادق والترابى وغيره عشان الامور تتغير صاح .... بس الجماعة دول ما يخشوا معانا.... زمان قلنا الليبيين شعب فقوس لكن زى ما شفتوا غيروا الطاغية وكمان كتلوه عدييييييييييييييييل....


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة