عادى بالزبادي
03-28-2012 12:24 PM

ساخر سبيل

عادى بالزبادي

الفاتح يوسف جبرا

ماذا لو أن (المراجع العام) في أحد الدول (الكافرة) أكتشف اثناء مراجعته أن أحد الوزراء لديه حساب بنكى (ملياري) شخصى (يعنى بإسمو) يجنب فيه بعض إيرادات وزارته ويتصرف فيهو (زي البتاعتو) دون وزارة مالية أو يحزنون؟
بالطبع عزيزي القارئ سوف تمتلئ الصحف بمانشتات من شاكلة (وزير يتصرف في أموال الدولة بطريقته) ، (دافعو الضرائب يتمسكون بإقالة الوزير) وربما إتجه عدد من المواطنين إلى مبنى البرلمان في وقفة إحتجاجية على سلوك هذا الوزير وهم يحملون اللافتات التي كتب عليها (إستقيل يا وزير) ، (أعد لنا فلوسنا الآن) !
بالطبع سوف تصبح القضية قضية رأي عام مما يجعل البرلمان يستدعى ذلك الوزير لبحث الأمر ومعرفة حكاية الحسابات (الجمباوية دى) ، وسوف يخرج الوزير من مبنى البرلمان (غير مبتسم) وهو يضع يده على وجهه تفادياً لعدسات المصورين قبل أن يقوم بتقديم إستقالته ونزع الحصانة عنه لمحاكمته وفق القانون بعد أن تتم مراجعة ذلك (الحساب) على داير (البنس) !
طيب ده في الدول (الكفرانية) خلونا نجي نشوف ماذا لو أن (المراجع العام) في أحد الدول (الإسلامية) أكتشف اثناء مراجعته أن أحد الوزراء لديه حساب بنكى (ملياري) شخصى ، سوف يقوم المراجع العام (يقوي قلبو) ويخاطب السيد الوزير طالباً منه إعمالاً لسلطاته الممنوحه له بمراجعة الحساب إلا أن السيد المراجع العام يفاجأ بأن السيد الوزير ح يرفض (مال أبوهو وكده) !
على الرغم من أن هنالك خطوات قانونية يفترض أن يقوم بها (المراجع) تجاه أي جهة ترفض المراجعة إلا إنو في الحتة دى (يعمل رايح) ، يتسرب الخبر فتخرج صحف اليوم التالي وهى تحمل خبراً صغيراً يفيد بان المراجع العام قد إكتشف حساباً خاصاً للوزير (الفلتكاني) بالبنك (الفلاني) مفتوح من السنة (الفلانية) والرصيد فيهو (كم وكمين مليار وألفومية) ويستمر الخبر ليؤكد أن السيد الوزير قد رفض مراجعة الحساب من قبل المرجع العام .
بالطبع عزيزي القارئ سوف يمر هذا الخبر مرور الكرام ، لن يطالب أحد بإقالة الوزير (هو عمل حاجة كعبة) ولن تمتلئ الصحف بمانشتات من شاكلة (بالله مش بالغتا يا سعادتك؟) ، كما ولن يتجه المواطنين إلى مبنى البرلمان يحملون اللافتات أحتجاجاً على هذا (النهب المصلح) والسلوك المشين لأنهم ما فاضيين (وكده) !
ويموت الموضوع ... سنة ... سنتين .. تلاته وما أن يكثر الحديث عن الفساد حتي تمتلئ الصحف بخبر يقول (البرلمان يقرر إغلاق الحسابات المخالفة وإحالتها للعدل) وتصريح آخر يقول (اهتمام البرلمان بجميع القضايا التي أبرزها المراجع العام فيما يتعلق بوجود حسابات مفتوحة بأسماء بعض الوزراء الذين رفضوا إخضاعها للمراجعة ) !
هنا تبرز (سخانة قلب الكفار) في التعامل مع الذين يتعدون على (المال العام)
كما يبرز (القلب الميت) الذي تتعامل به الحكومات (الإسلامية) لمن يتعدى على أموال المسلمين ويضعها في حسابو (الخاص) خارج رقابة الدولة ويعمل فيها العاوزو وكمان يرفض إخضاعها للمراجعة؟
أكثر ما يدعو للدهشة والحيرة معاً هو هذا التعامل (الباااارد) مع هكذا أمر .. هل يا تري لو أن موظفاً صغيراً قام بتجنيب (كم ألف جنيه) من الإيرادات التى يتحصل عليها وقام بوضعها في حسابه الخاص سوف يعامل هذا التعامل (الراقي) الذي إستغرق سنوات ؟ (ولسه على بال ما تتم إحالة المسألة لوزارة العدل وكده) !
بالطبع لا .. سوف يقبض على المسكين ويودع الحراسة ويتم التدقيق في أي (مليم) منذ فتح الحساب وحتي تقديمه (تاني يوم) للمحكمة ونشر صورة الحكم عليه في (أخبار الحوادث) لأنو ببساطه كده مسألة تجنيب موظف لأيرادات الدولة ووضعها في حسابو الخاص دى (جريمة) أما تجنيب وزير لأيرادات الدولة (بالمليارات) ووضعها في حسابو الخاص فده (عااادي بالزبادي) !


كسرة :
الشئ المستغرب ليهو إنو (الكفار ديل) ما عندهم (دين) !

كسرة ثابتة :
وبعدين معاكم؟ خط هيثرو أخبارو شنو؟


تعليقات 40 | إهداء 0 | زيارات 7197

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#319156 [سودانية]
0.00/5 (0 صوت)

03-30-2012 03:01 PM
الكفر درجات ياجبرة ....فى كافر زى عبد المطلب وفى كافر زى ابا جهل وابو لهب ..وعشان احنا حظنا زفت جماعتنا ديل شكلهم كده من نوعية ابوجهل


#318447 [ابو ومضة]
0.00/5 (0 صوت)

03-29-2012 02:46 PM
والله يا جبرة بقينا نخاف عليك ما يعملو ليك حاجة الناس ديل اصلك عذبتم بس هم ما بحسو لانو جلدم بقي تخين


#318413 [خالد]
0.00/5 (0 صوت)

03-29-2012 02:17 PM
مرات الواحد لمن يشوف البعملوهو ناسنا ديل بتجيهو فكرة انو يقلب والله ديل كرهونا الدين زاتو
هسى عليك الله ياجبره فى مسلم بكتل مسلم؟؟ تقول لى ياكل حقو؟
ياخى دى من شدة ماهى بسيطه مافى زول شغال بيها
ما ياهو نحنا شايفين:
ابرج خرسانيه مافى واحد وارثة من ابوهو
نسوان اتنين تلاتة
خليك من البره البلد
وماخفى اسكت ساى
تقول لى دين....................؟؟؟؟؟


#318410 [زول محبط شديد]
0.00/5 (0 صوت)

03-29-2012 02:12 PM
كسرة:والشئ المسثغرب ليهو انو (ناسنا) عندهم (دين)!......


#318260 [ابوالشوش]
0.00/5 (0 صوت)

03-29-2012 11:54 AM
وناسنا ديل قال ليك عندهم دين .. ديل ماعندهم دين عشان كده الفساد عم الحضر والقري


#318156 [beida]
3.00/5 (1 صوت)

03-29-2012 09:12 AM
الفرق يا جبرة انو المسلمين هنا بيحكموا شعب كافر وجاهل عشان كدة المال د بيوظف لخدمة المسلمين بالطريقة الشايفها الحاكم المسلم وانت يا كافر با جاهل ما بتعرف مصلحتك زي ما الوزير المسلم عارف


ردود على beida
Saudi Arabia [مجدي كمال] 03-29-2012 11:16 AM
هذه طبعاً من وجهة نظر الكيزان


#318098 [ابن السودان البار]
4.00/5 (1 صوت)

03-29-2012 01:49 AM
انت يا جبرة شيوعي والا شنو ؟؟؟ اولاً المراجع العام عليه بالظاهر وما مفروض يتجسس علي العباد لأن التجسس ليس من شيمة المسلم الصالح ؟؟؟ وبعدين ما في داعي للفضائح فالسترة واجبة للمسلم ؟؟؟ وأخبار حلم الصادق المهدي شنو ؟؟؟ قالو حلم بأحمد بدير ؟؟ طويل وأصلع ؟؟؟


#318079 [ود الحبيب]
2.00/5 (1 صوت)

03-29-2012 12:44 AM
يا جبرة إذا سرق الوزير تركوه وإذا سرق الضعيف بشعوا به تانياً وين القضاء العادل وين وين الشرطة كلهم حرامية أنت ما شفت ناس المرور ولا ناس الجوازات ولا الجمارك يا سيدي دي حكومة الحرامية والغريبة في بايتهم شعارات لا لدنيا قد عملنا نحن للدين فداء أصبحت للدنيا بدل الدين بعدين هم حريفين جداً في حكاية الجربعة دي خاصة في مواضيع اللجان البتنبثق منها لجان ولجان وكمان في سياسة الوزراء الما ليهم حد وكمان بقوا أجيبوا أخوانهم أخر تقليع يعني بكرة أطلع توب اسموا أخو الوزير أو راجل الوزيرة من نوع المحرم بتاع الست الوزيرة عشان الحق اجربع والما لحق حيبيعوا ليهو المباني علي شارع النيل عشان أضوق شوية من قروش البدون زي ما قال أخونا سيف الدولة واخت ليهو حاجة لليوم الأسود أما قصة المراجع العام هو في الحقيقة المرجعنوا لورا لكن أختصروها في المراجع العام تانياً أستنا شوية في قصة الجربعة أنت أرصدت البشير الفي بريطانيا خبرا شنو وبعدين معاكم لحقتوا نسيتوها بالسرعة دي ومزرعة أبو العفين والقصر البناهو لبتوا والعربية البي متين وحمسين مليون لولدوا محمد زي ما قال البوشي الأخد فيها علقة علي يد جهاز أمن البشير وأقيف النحدثك خبر البذور الفاسدة حصل فيها شنو زي حط مطار هثرو وبعدين ديوان الذكاة الأتجربع كلوا كدي اللحق وأمشي قول محتاج والله تندم علي الصرفتوا وما تنسي مجمع النور بتاع البشير فيهو مجمع التقول في دبي كلوا ماشي وين يعني لو لحقت تسال حتدوش راسك بالكتير وهسع أبو جعبة ده كان العراقيين عملوا فينا خير وسلموهو للمحكمة الجنائية البحصل شنو أكونوا ريحونا منو والباقي اللجقهم في السكة زي ناس أحمد عز وأنس الفقهي وغيرهم من الحرامية الكبار المجربعيين


#318022 [عاشق النامير]
2.00/5 (1 صوت)

03-28-2012 10:25 PM
(هذا التعامل (الباااارد) مع هكذا أمر )

انت ياحاج ما ود عوووضه قال ليكم استعمال كلمة هكذا ده ما محلها قول مع امر كهذا.
1-انا عبارات زى دى بدبرس بى
2-الخال المعجزه بزعل لبهدلة لغة اجداده
3-وبزعل شديد بى شديد لو حلحلها
4-حسه بكره يفتحوا بلاغ اشانة سمعة اللغه العربية
5-و توزع نشره فى المساجد
6-وتصبح شيوعى اللغة العربية
7- ويقوم هادم اللذات و مفرق الجماعات (داك الاسمو شنو شنو)
8- يحلف طلاق لمرتو الاولى (الاكسبيرد) بان تلحق ب زهير السراج
9-و بعدين تبقى قصة خط هيثرو زى طريق( خلوها مستوره)
10- كفايه


#317985 [سودانة]
0.00/5 (0 صوت)

03-28-2012 09:05 PM
للاسف فى ظل هذة الحكومة الما عادى اكل الزباى لانو اغلى من العادى مابشترى الا الوزير البو حساب خاص


#317966 [توفيق الصديق عمر]
3.00/5 (1 صوت)

03-28-2012 08:26 PM
وبعدين معاك يا استاذ جبرة؟
انتا قاعد معانا في بلاد الكفار ولا شنو حكايتك؟
الكلام البتقول فيهو دا ما خيال ولا كدا دا حصل في البلد الانا قاعد فيها دي
وماذا كانت نتيجتو؟ ايوة استقالة الحكومة كوووووولها بتقديم رئيس الوزراء لاستقالتو وكدا.
والحكاية وما فيها لا كان في تجنيب ولا يحزنون كل الشئ الحصل انو وزيرة في مهمة حكومية خارج البلد تخطت الميزانية المسموح لها بالتصرف في حدودها لان دواعي البرتوكولات والضيافة لزوم اداء المهمة المكلفة بها اقتضي ذلك.
والحكاية كانت في حدود عشرة الف دولار او اقل حبتين.
اها شن قولك؟
المصيبة انو في البلد دي جردقة ما عندنا عشان لزوم تقليل الكوفار الناتج من الطمام ينعي نخلي متابعة الحاصل في البلد لغاية ما لربنا يفرجا ويشوف لينا حلل لانه ناس عبد اللازق ابن المثبت ديل الواحد ما عارف يصنفهم من ضمن بلاد المسلمين ولا ياتو بلاد


#317875 [خالد محمود]
3.50/5 (2 صوت)

03-28-2012 04:42 PM
ابو قناية نفسو معه أخو الرئيس طلعو لابعين من الهيئة الزراعية الاف الدولارات فهل شفت حرامي يحاسب حرامي هذا غير أنهم ينظرون الي أن المال مالهم وليس مال الشعب ولانهم مؤتمر وطني فهم الأخيار و كل شيء مباح لهم فالسرقة تعالج بموضوع فقه السترة والمحسوبية بالتقية والتمكين وفقه الضرورة وغيرهاوالاغتصاب هو شرف للنساء ان يتم اغتصابهم من الكيزان كل شيء حلال لهم الكذب حلال والنهب حلال واستغلال المناصب حلال واثارة الفتن حلال والتفريض في وحدة البلاد حلال والتقصير في أداء الواجب نحو الشعب حلال يعني كلو حلال ويختارون من الدين ما يحقق لهم ذلك اما غيرهم فمجرد تناول أي منهم بالحديث فقد كفر ويجب الاقتصاص منه لانه تناول الأطهار الأخيار
لذا فقد كانت العناية الالهية رحيمة بالشعب السوداني وسلطت علي الكيزان الجنائية والدول الغربية بحيث لا يجرؤ احد منهم على إيداع الأموال التي نهبها في سويسرا وأي بلاد في الغرب خوفا من تجميدها فعمدوا الي ماليزيا والصين ودبي واشتروا هناك ولكن الله أكبر وسوف ينصر المظلومين من شعبنا


#317873 [algaak]
0.00/5 (0 صوت)

03-28-2012 04:41 PM
المحيرنى انك طواااااااااالى نازل سلخ فى الحكومة ويوم واحد ما سالوك ولا جابو سيرتك تكون ان من الجماعة وهم عارفنك تكتب وتبرد فى خلق الله . ما انت (عارف)خط هثرو مشى لمنو كما عارف منو الطفا الشمعة . ماتتكلم لينا فى حقيبة الفن مثلا . يا فنااااااااااااان


#317868 [حليم-براغ]
3.00/5 (2 صوت)

03-28-2012 04:38 PM
يا أستاذ جبرا في ظل نظام أخوان الشيطان ...دة بيقولوليهو زبادي بالعسل مش زبادي بالسكر لأنو العسل رباني...


#317845 [SUDANESE]
5.00/5 (1 صوت)

03-28-2012 04:15 PM
يا ود جبرا الناس ديل ناسين الموت ، والله كلامك دا خلق لي حالة استياء كبير ، وبعدين هذا الوزير يزور معسكرات الخدمة الإلزامية والدفاع الشعبي ويكبر ويهلل ويرجع لبيته وهو يردد اليوم غبرت قدمي في سبيل الله ، يا الله انتقم من كل أحد أكل أموال المواطنين وأرنا فيهم يوماً كيوم القذافي وأمثاله من الطغاة


#317835 [ودفارس]
5.00/5 (1 صوت)

03-28-2012 04:02 PM
ياود جبره انت ماتتضايق وتكون متسرع الناس ديل القروش المجنبة ده خاتنها ليك ولينا لليوم الاسود


#317832 [ود الجد]
5.00/5 (1 صوت)

03-28-2012 04:00 PM
ياخي الفساد دا حاجة عااااااااااااااااااااااادية في بلدنا والناس مجت الموضوع دا
اما حكاية خط هيثرو دي فكلنا بانتظارها... واقترح ان توكل محامي لبحث الموضوع مع الجماعة البهمهم الأمر والعاملين طناش او ادراج الحصول علي الاجابة في وصيتك لأحفاد احفادك علهم يحصلون عليها ويشفون غليل احفادناواحفادهم ايضا...
لك كامل وخالص اعجابي بما تكتب ...


#317830 [صادميم]
0.00/5 (0 صوت)

03-28-2012 03:58 PM
(أكثر ما يدعو للدهشة والحيرة معاً هو هذا التعامل (الباااارد) مع هكذا أمر) انت ما قريت عمود صلاح عووضة ولاشنو مش قال ما تعوجوا لسانكم زي اللبنانيين


#317828 [زهجان]
5.00/5 (1 صوت)

03-28-2012 03:52 PM
والله يا أستاذ الجماعة ديل ما بختشو كلو كلو .. هسه بالله ده إسمو كلام ؟


#317788 [ود الحاجة]
5.00/5 (1 صوت)

03-28-2012 02:53 PM
عادي زي أكل الزيادي

المشكلة الكبرى أن يقوم الوزير بدعوة الناس المساكين الى التقشف و شد الاحزمة و أن يكونوا من الزاهدين و المجاهدين.و يتهم معارضيه بالخيانة و العمالة و سوء السلوك


#317784 [المغتاظ]
5.00/5 (2 صوت)

03-28-2012 02:49 PM
(إنك خير من استأجرت القوي الامين) تأصيل اسلامي للموضوع. العنده اثبات ان هذه الاموال تذهب في غير مالا يرضي الله فليأتي ببرهانه. مش الريس قال وروني الفساد وين يعني بالعربي كده تمشي البنك وتعرف نفسك بأنك المواطن الصالح الفاتح بن جبره المولود لعشرة قضين من ذي الحجة سنة ثمانمئة والف بعد الهجرة . وبعد اكرامك من قبل مدير البنك المنشود سيقوم باستدعاء الموظف المسئول عن هذه الحسابات ذات الجنابةالعالية مع مستنداته اللازمة وافهامك( ما تنسى تشيل فهامتك معاك) كل صغيرة وكبيرةلتنصرف وانت تردد قولة الشاعر عادل امام ربنا يخلي لينا الحكومة القوية الامينة.


ردود على المغتاظ
Saudi Arabia [خالد محمود] 03-28-2012 04:22 PM
اذا كان كل من يتحدث عن الفساد يجيب الدليل فما دور الشرطة والامن والاستخبارات والنيابة وغيرها ، يجب على الأجهزة التحقق من التهم وبحث الأدلة والبراهين والعمارات التي يملكها المسئولين بنوها بي شنو
كما ان فتح حساب خاص باسمه وايداع ايرادات الدولة فيه هو في حد ذاته فساد


#317757 [صالح عام]
4.00/5 (3 صوت)

03-28-2012 02:28 PM
الفرق أننا في حياتناالاجتماعية نحترم كبار اللصوص السياسيين ونتفسح لهم في المجالس والمساجدوسرادق العزاء وبيوت الافراح بل حتى في امامة الصلاة وهذا جهل وغباء وسوء معرفة بالدين وكذلك بأمور الدنياوليس طيبة وتسامح،،، والفرق كذلك أن دول الكفار التي اشرت اليها تنتابهم الروح الجماعية حال حدوث انتهاك معنوي او مادي لحقوق اي فرد فيها مهما كان وضعه الاجتماعي لانهاشعوب واعية من خلال تراكم معرفي طويل فيه الديني والمعرفي الانساني، بينما نحن تنتابنا روح الجماعة في مسائل اجتماعية نهب لها هبة رجل واحد ،، ولكن تعود الينا الروح الفردية حال انتهاك الحقوق السياسية والاقتصادية للافراد حيث يصمت الجميع،، ومن الملاحظ بعد أن خلا وفاض أهل الانقاذ من كل شيء يحاولون ممارسة التسامح الاجتماعي السوداني بالمشاركة فيه بينما يحيكون سياسياً كل عمل دنيء ضد نفس الشعب الذي يشاركوه افراحه واتراحه ويسيرون خلف نعوش اناس اماتوهم غيظاً وهم أحياء،،، السراق لا احترام لهم اجتماعياً أو سياسياً في الدول المتقدمة التي ذكرتها،،، ورغم جبال الفساد التي برزت في هذا العهد الكئيب يمكنك أن تلاحظ في اي مناسبةاجتماعية احتفاء الحضور باي مسئول بحجة انه جاء مجاملاً ثم بعد انصرافه ينصرف الناس للحديث عما كنزه وملكه والسيارة التي يركبها وهلم جرا ،،، الوعي هو الحل حتى يصبح الشعب هو المحرك والمخوف للقضاء والسلطات التنفيذية كما في ألدول المتقدمة،،، لا أن ننتظر رئيس سلطة فاسدة محاسبة حاشيته الفاسدة وهو يعوم معهم في أكوام من الفساد ،،،، لا بد من غرس الوعي بالحقوق ووجوب المطالبة بها جماعياًحتى لا ييأس الافراد القلة العاملين على تنوير الناس،،،


#317738 [ابوالجعران]
5.00/5 (2 صوت)

03-28-2012 02:10 PM
اقسم بالله العظيم انني في اكثر من مداخله بل وعشرات المداخلات انني قد ذكرت ان الفساد هو سياسه دوله وليس شيئا مفتعلا وان ابو قنايه والسيد دوسه انما تم تعينهم لغرض تقنين هذه السياسه لان معظم من قالوا هي لله هي لله كاذبون ومنافقون ولعانون وقد ظهرت عندهم القصور والمروج الخضراء والحدائق الفيحاء زاحواض السباحه الحديثه والحور العين مثني وثلاث والعمارات العاليات والسيارات الفارهات وحتي مويه النيل نسوهاوعاشوا في عالم غير العالم الذي اتو منه اذا كان بقدرو يتذكروه وبعضهم اياديه ملطخه بالدماء والعياذ بالله ان هدم الكعبه اهون عند الله من قتل النفس التي حرم الا بالحق والحق اليوم لامام الجامع ليقرر من يصلي في الصفوف خمسه نجوم والصفوف نجمه ونجمتين الحق اليوم للدجال الذي يعالج كل الامراض وعامل لوحه بذلك وعلي عينك ياتاجر بينما الطبيب عاوز سنتين تدريب غير الالزاميه وبراتب مصروف يوم للصغار من ابناء حماعه هي لله هي لله وعادي ياجبره ذي اكل الذبادي المال مال الله وهم خلفاء مال الله والبد بلدهم وهم اسيادها حتي لو بقت الخرطوم وحدها هي السودان لا مانع طالما السلطه والثروه هي لهم وحدهم يتوزعونها تصاريح وتصاديق وعطاءت غير معلنه وازون استيراد وحكر مواد تموينيه وكوتات تمكينيه وهلم جرا واحسن شي تسمعوا كلام الريس وتخلوها مستوره


#317735 [hazharii77]
5.00/5 (2 صوت)

03-28-2012 02:03 PM
يا استاذ جبرا من قال ليك انو دي أموال دولة والله الدولة صارت ملكية من يونيو 1989م والدليل قصة شريان الغرب وامواله التي ذكر ناهبها انه لو في محاكمة ومسألة علي وعلى اعدائي ومنها ترك السودان والآن عائش بأموال مملكة السودان الاسلامية التي كان يراسها الشيخ ومن ثم الحواريين من بعده إذا صح التعبير إذن ياأخ جبرة كما تلاحظ انو اموال مملكة السودان لملاكها من الوزراء واهليهم وزويهم أما باقي الشعب فهم خدم عند مملكة الاسلام السودانية.فمن يسأل إناس ملكوا نفسهم هذا البلد الطيب الذي صار خبيثاُمن عمائل ساسته.


#317725 [مسلم]
5.00/5 (2 صوت)

03-28-2012 01:49 PM
يكفى رد شيخ الاسلام ابن تيمية فى فتاوى الحسبة قوله :
ان الله ينصر الدولة العادلة وان كانت كافرة ولا ينصر الدولة الظالمة وان كانت مؤمنة .


#317722 [صالح عبد الله]
3.25/5 (3 صوت)

03-28-2012 01:48 PM
الم ترى الوكيلة التي طلبت تخصيص سيارة لنفسها لأنها من الكوادر النشطة فهؤلاء الوزراء يعتبرون انفسهم من الكوادر النشطة ومال الدولة مالهم ولهم ان يصرفوه كيف شاؤ لانهم أمنوا العقاب والواحد فيهم أن كثر الكلام عليه فقط نقلوه الي منصب آخر.
كسرة
قضية المستشار مدحت (الأراضي) حصل شنو فيها


#317721 [ابو حازم]
5.00/5 (2 صوت)

03-28-2012 01:44 PM
ولهذا فان غالبية شعوب العالم الإسلامي تتعطش لسياسة تفصل الدين عن الدولة ، ثم يستقل القضاء ، فتجارب كل الدول التي حكمت باسم الإسلام وخلطت العبادة الربانية بالسياسة فشلت فشلا ذريعا ، وتحول ساستها إلى لصوص ينهبون أموال شعوبهم ولا يأبهون للقضاء المسيس ،فوزير العدل عينه رئيس الدولة ، فكيف يتجاسر هذا الوزير لمحاكمة وزراء ذوي صلة مصلحية مع رئيس الدولة ؟؟!!
كسرة :
الشيئ المستغرب ليه ان الشعوب المسلمة ما قادرة تفهم ان فصل الدين عن سياسة الدولة لا يضر بالدين شيئا .
كسرة ثانية :
أموت وافهم ما المقصود بخط هيثرو !!


ردود على ابو حازم
Sudan [سودانير] 03-28-2012 07:06 PM
خط هيثرو يعتبر حق ملكية لطائرات سودانير فى الهبوط بمطار هيثرو البريطانى وتم بيعه بعدما آلت سودانير لشركة عارف الكويتية(47%) والفيحاء السودانية (23%)والمملوكة للشيخ ودبدر وزير الاستثمار الاسبق ورئيس مجلس مشروع الجزيرة المستقيل بينما تؤول (30%) لحكومة السودان .. وبحمد الله فقد عادت العرجاء سودانير لمراحها اخيرا بعد الابتزاز الذى تم على الحكومة السودانية بس ياحسرة بدون خط هيثرو ..

Sudan [عمر جابر] 03-28-2012 05:13 PM
الأخ أبو حازم إليك قصة خط هيثرو باختصار شديد.
في بداية ستينيات القرن الماضي كان الخطوط الجوية السودانية (سودانير) هي شركة الطيران الوحيدة من دول العالم الثالث بما فيها الهند ومصر ومابينهما وشرقهمها وغربهما كان هي الشركة الوحيدة التي تهبط مطار هيثرو بلندن يومياً. هيثرو هو المطار رقم واحد في العالم. الرابط للشرق والغرب ولا بد لجل المسافرين والعابرين من الشرق إلى الغرب أو العكس أن يمروا به. ولهذا تتنافس شركات الطيران للحصول على إذن بالنزول فيه.
ولأنه مطار مزدحم ومدينة لندن بها عدة مطارات أخرى فإن سلطات الطيران المدني توجه شركات الطيران التي تود الهبوط في لندن هيثرو أن تهبط في أحد المطارات التالية: جاتويك- السيتي- لوتون- استانستيد- وهي تقع جنوب وشرق وشمال لندن على التوالي . وطبعاً مطار هيثرو يقع غرب لندن.
القصة أنه عندما تمّ بيع سودانير وبعد حادثة الطائرة المشهورة وما تبعها من تحقيقات في لندن، تقرر إيقاف سودانير من الهبوط في لندن هيثرو حتى إشعار آخر لأسباب الأمن والسلامة. عارف الخواجات ما بلعبوا في حكاية أمن وسلامة الطيران. الجماعة المالكين الجدد ما صدقوا قاموا طوالي باعوا الخط وحق الهبوط في هيثرو لشركة طيران تموت وتدفع ملايين الدولارات لكي تهبط في هيثرو. وعندما إنصلح حال سودانير وقالوا ننزل هيثرو، ناس هيثرو قالوا ليهم يا حليلكم الخط ما بعتوه من زمان لشركة ..... من زمان. وقع ليك ولا أعيدو ليك؟


#317720 [محمد عبده]
3.50/5 (2 صوت)

03-28-2012 01:44 PM
في حالة الوزير يطبق فقه السترة وكدا أما الموظف الصغير فهذا سارق ويجب معاقبة حتى اهله لأنهم لم يربوه كويس ولم يعلموه بأن السرقة من الكيزان حرام وتجب فيها القصاص فوراً دون محاكمة وشهود ومستندات وكدا .


#317718 [شريف عمر]
3.00/5 (2 صوت)

03-28-2012 01:40 PM
السرقة واستغلال المناصب والمنظمات الوهمية اصبحت السمة السائدة في دولة المشروع الحضاري والدولة لا هم لها سواء جلد ضعاف القوم من النساء والرجال بدعوى السكر واللبس الفاضح دون محاكمة ولا إجراءات قضائية


#317716 [ست البنات]
5.00/5 (1 صوت)

03-28-2012 01:37 PM
الله يجازي محنك ياود جبرة................
والله انت الناس ديل شغال ليهم شغل وهم عاملين اضانالحامل طرشة


#317715 [عادل مختار]
5.00/5 (3 صوت)

03-28-2012 01:37 PM
الغريبة رغم ما يتكشف كل يوم من أخبار الفساد الواحد منهم عينو قوية ولسة بيتكلم في الدين والمشروع الحضاري


#317714 [محمد صالح أحمد]
4.75/5 (4 صوت)

03-28-2012 01:35 PM
اذا كانت وزارة مثل وزارة الأوقاف أمينها متهم بتخصيص 1300000 ريال سعودي لحسابه فكيف يكون حال بقية الوزراء لاحظ وزارة الأوقاف يعني حج وعمرة ومساجد وكدا


#317712 [سامي سعيد]
3.00/5 (1 صوت)

03-28-2012 01:33 PM
الكفرة ديل عندهم دين أكثر من الكيزان أصحاب اللحى والجلاليب القصيرة وشنطة تمكنا الملايانة بالدولارات > وشوف بنفسك اصحاب المشروع الحضاري اتصدروا كيف قائمة الفساد في العالم


#317705 [ودالجزيره سكر]
5.00/5 (1 صوت)

03-28-2012 01:28 PM
الاخ جبره حكومه البشير فى فسادها وظلمها وجهويتها كرهت الشعب السودانى فى الدين


ردود على ودالجزيره سكر
Sudan [بت عطبره] 03-28-2012 08:44 PM
بالعكس الشعب السوداني ازداد ايمانو في الله وهو يرفع ايدو صباح ومسا عشان يخلصوا من الوبا دا وتفقه في الدين اكتر ولو ماايمانو القوي كانت الصواني ماشالت الناس


#317701 [ابو عمر]
5.00/5 (2 صوت)

03-28-2012 01:23 PM
اكبر مثال علي عدل الكفار وظلم المسلمين هو محاكمه الرئيس الالماني واجباره علي الاستقاله من منصبه بسبب مبلغ يعتبر **** جدا مقارنه بمايلغفه اصغر مسؤل عندنا هنا


#317695 [صالح عام]
5.00/5 (1 صوت)

03-28-2012 01:15 PM
هؤلاء مكنكشين فى الحكم ليه ما علشان نوعك دا بعدين ما يمرمطهم


#317694 [الزول الكان سمِحْ]
5.00/5 (1 صوت)

03-28-2012 01:15 PM
يا أستاذ

الكفار ياتُمْ؟؟؟!!

غُرزة:

أخبار عائدات الصادر مشت وين؟؟؟


#317685 [بت ملوك النيل]
4.00/5 (1 صوت)

03-28-2012 01:04 PM
كفار مين ياعم جبرة...انت ماسمعت نكتة محمد موسي بتاعت علي الطلاق الكافرة امك دي.


#317678 [مستاء جدا *** روسيا]
5.00/5 (4 صوت)

03-28-2012 12:51 PM
يحكى أن إبراهيم بن هرمة، كان مغرماً بالشراب، وحده عليه جماعة من عمال المدينة؛ فلما ألحوا عليه وضاق ذرعا بهم، دخل إلى المهدي بشعره الذي يقول فيه:
له لحظات عن حفافي سـريره -------إذا كرها فيها عقـاب ونـائل
لهم طينة بيضاء من آل هاشـم-- إذا اسود من لؤم التراب القبائل
إذا ما أتى شيئاً مضى كالذي أتى--- وإن قال إني فاعل فهو فاعـل

فأعجب المهدي بشعره، وقال له: سل حاجتك.
قال: تأمر لي بكتاب إلى عامل المدينة أن لا يحدني على شراب الخمر. فقال له: ويلك، كيف نأمر بذلك؟ لو سألتني عزل عامل المدينة وتوليتك مكانه لفعلت. قال: يا أمير المؤمنين: ولو عزلت عامل المدينة ووليتني مكانه، أما كنت تعزلني أيضاً وتولي غيري؟ قال: بلى. قال: فكنت أرجع إلى سيرتي الأولى.
فقال المهدي لوزراءه: ما تقولون في حاجة ابن هرمة وما عندكم فيها من التلطف؟
قالوا: يا أمير المؤمنين، إنه يطلب مالا سبيل إليه: إسقاط حد من حدود الله.
قال المهدي: إن عندي له حيلةً، إذ أعيتكم الحيل فيه، اكتبوا له إلى عامل المدينة: من أتاك بابن هرمة سكران فيضرب ابن هرمة ثمانين، ويضرب الذي يأتيك به مائة.
فكان ابن هرمة إذا مشى في أزقة المدينة يقول: من يشتري مائه بثمانين؟

قصة إبن هرمة أعلاه حدثت في العهد العباسي و لكن يبدو أن تاريخ الفساد السياسي و فقه السترة و التخريجات الفقهية من علماء السلطان يعيد نفسه ،،، فرغم إنتشار الفساد في بلادي يقول سيادة رئيسنا الهمام من يقول أن في السلطة مفسدون فعليه بالدليل و عندما تخرج الصحافة (عفن المفسدين) ،، يذهبون بهم إلى المحاكم بدعوى إشانة السمعة.
فكم عندنا اليوم في (دولة المشروع الحضاري) من أمثال إبراهيم بن هرمة يفسد في الأرض و يحمل صك براءته في يده؟؟؟؟
الأستاذ جبرة هم مش قالوا خلوها مستورة؟؟؟
خليها مستورة،،،، الناس دي لا عندها دين و لا بتخاف من الله. و تفتح خشمك تنجلد إنت و إبن هرمة برئ براءة الذئب من دم إبن يعقوب.


ردود على مستاء جدا *** روسيا
United Arab Emirates [محجوب عبد المنعم معني] 03-28-2012 10:19 PM
كفيت ووفيت يا رائع روعة جميع ابناء بلدي المغتصب
مع مؤدتي


#317672 [Heron]
5.00/5 (1 صوت)

03-28-2012 12:40 PM
اسلام بالاسم فقط اما تطبيقا" لا يوجد اي تطبيق فعلي على ارض الواقع.جنس لبع هو دا ما لبع عادي ويقولك الازمة الاقتصادية امتحان رباني . ياسلام


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة