المقالات
السياسة
ارشيف مقالات سياسية
رسائل إلى السيد الرئيس .. بالدارجي المريح (5)
رسائل إلى السيد الرئيس .. بالدارجي المريح (5)
03-31-2012 01:44 PM



رسائل إلى السيد الرئيس .. بالدارجي المريح (5)

طارق عبدالرحيم قولي
tarig-gole@hotmail.com

صباح الخير يا ريس .. و أنت بتقرأ الكلام دا أكيد سألت نفسك .. إني بكتب ليك الرسائل دي داير أصل لى شنو ؟ يا ريس داير أصل للمثل البيقولوهو أهلنا : القُحة و لا صمة الخشم .. يمكن أوصل صوت الناس الحتى ما قادرين يقحوا .. في حين أنهم مصابين بى وجع صدر البلد المغبون .. المغبون من ناس (يهتدون) و ناس (يستبشرون) و المغبونين من ناس أمشي تعال بعد شهر و الخزينة قفلت تعال بكرة .. و المغبونين المشوا ديوان الذكاة شايلين معاهم تقارير طبية لى عمليات يقوم الديوان يصرف ليهم شوال فتريتة (ذرة) .. و برضو المغبونين من مرضى الكلى الكان و قفوا ليهم الغسيل و لقوا نفسهم مشرورين في الشمس و الظلط قدام مستشفى الخرطوم (بقت عليهم إتنين .. الغسيل و الشر)
يا ريس في وزير قال : مافي ناس ما لاقية تأكل .. أكيد السيد الوزير دا عايش في كوكب ( بُن بُن ) .. معقولة يكون ما شايف الناس في الأطراف حالا كيف .. والمتشردين الفي قلب الخرطوم بياكلو من براميل الزبالة .. و في ناس مش ما لآقين ياكلو.. في ناس حتى ما لآقين يشربوا .. يا ريس قبل فترة مدينة الأبيض خمسة يوم مافيها موية .. جوز الموية (جركانتين) بى جنية و نص من كارو موية .. طبعاً الجنية و نص دا تمن علبة بيبسي بيشربا الوزير ..
يا ريس مش من الغريب إنو الناس البتنادي بالحرية و المساواة أصواتها بيتم كتمها .. بينما أصوات العنصرية و القبلية بيرفعوا صوتها و بيكون عندها (منابر) .. و بيضبحوا ليها تور و ما بعيد في يوم يضبحونا نحن ذاتنا ..

يا ريس .. خالتنا أمنة بت الأمين إمام جامع حلتنا بتقوليك :- عليك الله ما تخلي الرئاسة في ألفين و خمسطاشر و لو في طريقة أعمل إنتخابات شهرية و هم حيصوتوا ليك علشان يتحصلوا على المية جنية حافز تصويت من اللجنة الشعبية ..
يا ريس بلدنا المُصنقرا في قيزان الرملة في أقصى الشمال بعد ما مشى الجنوب للإنفصال و بلف البترول إتقفل و مشرع الجزيرة قعد في الصقيعة رافع إيدينو في السماء و قدامو كورة يابسة ... وليدات الحلة شليلهم راح و أكلو التُمساح بقوا يلعبوا ( البترول وينو ؟ أكلو الدودو )

وزي با بيقول الدوش :-
تهْتَ ومشيت
ما ضَلّمَتْ
ما بْتَعْرِف الزول البِجِيك
ولا البِجيكَ بيعْرِفَك
حتى الشبابيك
والزوايا الكان بِتَجْمَع
في حنايا الشكوك

ضلّمتْ
أغْشاكِ يا نفسي الغريبَهْ
من همومي اطلِّعِك
القاكِ واقْفَهْ على الطريق
أحزان بِتفْرح وتشْتبِك
أفراح بِتحْزَن وترْتَبِك
لمّنْ رحلتَ مع الغُنا
عِز الأماني و ضلّمت


صحيفة الجريدة




تعليقات 5 | إهداء 0 | زيارات 1976

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#320419 [جريف حمد الله]
5.00/5 (1 صوت)

04-01-2012 09:17 AM
الناس ما لاقيا تأكل والوزير بيقول ما في جوع ،،،،،،،،،، محن يا بلد .. الحكومة ما فاضية من الحروب وكل يوم مطاردة هنا وهناك .. عجب يا بلد وأشكرك الأخ العزيز طارق عبد الرحيم المتحدث باسم الثكالى والغلابة والأرامل


#320305 [أناكوندا]
0.00/5 (0 صوت)

04-01-2012 01:48 AM
ما عندك موضوع


#320197 [السمؤل]
0.00/5 (0 صوت)

03-31-2012 09:56 PM
والله لو كنت محل هذا الريس لبكيت دم بدل الدموع ولكن تقل الدم الذايدعن الحد نعمل معاه شنو


#320012 [ودالوالي]
0.00/5 (0 صوت)

03-31-2012 05:00 PM
في الابيض الموية ذي الماهية ينتظروهامن شهر لشهر
لدرجة انوجركانةالموية حصلت جنية انا بستغرب ناس الابيض
ديل الصبر القدر دة بجيبو من وين


#320002 [mo]
0.00/5 (0 صوت)

03-31-2012 04:42 PM
انت ماعندك موضوع نصيحة شنو انت بتقولها ركاكة كلام مامفهوم بالدارجي والخارجي ياناس الراكوبة ما كل زول بقول معارض فاتحين له جبهة


ردود على mo
Saudi Arabia [احمد] 03-31-2012 08:11 PM
ياريت الواحد لو يكون معارض بموضوعيه


#319967 [ابو فياض]
0.00/5 (0 صوت)

03-31-2012 03:56 PM
قلت لي خمسه ايام مافي مويه والجوز بالف وخمسميه ؟
تعال بورتسودان يا ولدنا انا عمري خمسه واربعين سنه
ومويتنا جوزها بالف وخمسميه 0
خمسه واربعين سنه فيها كم خمسه يوم ؟
جلي الموضوع يا ولدنا 0


ردود على ابو فياض
Sudan [ود الحرطوم] 03-31-2012 08:46 PM
انتو ماشين بعيد ليه شوفوا جزيرة توتى فى نص المويه ومافى مويه فى المنازل والميه مشت وين !!!


طارق عبدالرحيم قولي
طارق عبدالرحيم قولي

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة