لجنة الإحتيار
03-31-2012 02:12 PM

ساخر سبيل

لجنة الإحتيار

أستاذي الجليل : الفاتح جبرا

السلام عليكم ورحمة الله تعالى وبركاته

أنا ابنتك (س) تخرجت من إحدى الجامعات المرموقه دفعة 2002 التخصص اقتصاد ، الدرجة جيد جداً مرتبة الشرف التانية القسم الاول ، قامت مفوضية لجنة الإختيار الإتحادية بالإعلان عن فرص وظيفية بديوان الضرائب (على الدرجة التاسعة)
وقد إنطبقت كل شروط التقديم على شخصي الضعيف ، قمت بتقديم أوراقي ومتابعة الأمر حتى أعلم متى تبدأ المعاينات ، إنتظرت بفارق الصبر وعلى الرغم من مستواي الأكاديمي الجيد الذي يعززه تقديري إلا أننى عكفت على مراجعة كتب الإقتصاد من جديد لإنعاش الذاكرة إذ مرت عشر سنوات قبل أن أترك مقاعد الدراسة
عندما علمت أن المعاينات سوف تبدأ في 19 من الشهر الجاري كدت أطير من الفرح ، وبعد تحديد الكشوفات وجدت اسمي في (اليوم الفلاني) ، صدقني يا أستاذي لم يعرف النوم طريقه لعيني تلك الليلة ، وفي الصباح الباكر تحركت من المنزل ترافقنى دعوات كل ناس البيت
وأنا في المواصلات التى وجدتها بعد صعوبة كنت أطوف بخيالي مسترجعة كل المقررات التى درسناها وأسائل نفسي كيف سيكون شكل المعاينة ؟ في أى المواضيع الإقتصادية سوف يتم سؤالي؟ وهل سوف تكون مثل تلك المعاينات التى خضتها من قبل والتى كانت شكلية ساكت وتحصيل حاصل !
وجاءت ساعة الصفر .. دخلت إلى اللجنة .. حجرة مكيفة يتوسطها مكتب خشبي طويل خلفه رجل في العقد الخامس وإمرأة في العقد الرابع .. تربيزة صغيرة عليها صينية بها عدد من كبابي الشاي يتوسطهم سيرميس .. طلبا منى الجلوس على كرسى امامهما ثم طلبا مني اصل الشهادات وبطاقة تسجيل لجنة الاختيار ففعلت
بدأ الرجل بالأسئلة :
- اى صلوات تقصر فى السفر؟ وهل تقصر صلاة المغرب؟
- كم هى عدة المرأة المطلق والمتوفى زوجها؟
- من هى السيدة عائشة؟ وما لقبها؟ اذكر حديثا عنها؟ الفقه الذى كان فى احاديثها ماهى نوعيته؟
- ما الحكمه من الفرق بين عدة المرأة المطلقة والارملة؟
- أدينا جملة مبنية للمجهول؟
- ماهى حروف الجزم؟
- ان لما تدخل على الجملة ماذا تفعل؟
- من هم ابناء السيدة عائشة؟
طبعا يا أستاذى انا (إتهجمتا) وقلتا إحتمال أكون دخلتا لجنة غلط .. وزارة الأوقاف تكون عاوزة دعاة مثلاً ... لكنني أفقت من هجمتي بعد أن قامت المرأة بطرح سؤالين فقط لهم علاقة بتخصصي ولم تستغرق كل المعاينة أكثر من عشرة دقائق 7 دقائق (دينية) و3 دقايق (دنيوية) يعنى أقصد في تخصصي !
أستاذي : الأسئلة الدينية دى ما كنتا عامله حسابا ؟ تفتكر ح يشيلوني؟
الرد :
ابنتي العزيزة (س) لعلك لم تقرئي قصة ابن أخي (بدرالدين) خريج الهندسة الكهربائية والذي تخصص في (أبراج الضغط العالي) وكان كلما يدخل إلى معاينة يتم سؤاله عن الغزوات والمعارك الإسلامية .. أين كانت ومتى؟ كم عدد المسلمين؟ لمن كانت الغلبه؟ قائد المسلمين ؟ قائد الكفار ؟ فأنكب (بدرالدين) على قراءة كتب السيرة والغزوات والمعارك ولم يترك صغيرة ولا كبيرة إلا قام بتسجيلها وحفظها .. مساحة وإحداثيات أرض المعركة .. عدد وأنواع الأسلحة المستخدمة .. تاريخ ومكان ميلاد القادة من الطرفين .. عدد الخيول والبغال والحصين المستخدمة .. عدد القتلى والجرحى من الطرفين ، نوع التكتيك القتالي المستخدم بداية المعركة والمده التي أستغرقتها (بتوقيت قريش) !
وعندما دخل (بدرالدين) المعاينة أذهل اللجنة بردوده الدقيقة الحاسمة مما جعل رئيس اللجنة يقوم بسؤاله شؤالاً في تخصصه عن خطوات الأمان التي يجب على المهندس إتخاذها عندما يعتلي أحد أبراج الضغط العالي ، فأجابه (بدرالدين) بثقة بكل الخطوات التي يجب إتباعها .. وهنا قال له رئيس اللجنة:
- افرض في مهندس ما عمل حاجات الأمان دي وضربتو كهرباء ومات .. أدينا حديثين صحيحين وآية تبين إنو المهندس ده مات شهيد !
كسرة :
طبعاً يا إبنتي ما ح يشيلوك لأنو الجماعة ديل عاوزين ناس (عارفين الدين) وإنتي معلوماتك (الدينية ضعيفة) خاصة ونحنا مقبلين على مرحلة تطبيق الشريعة بالنص .
كسرة ثابتة :
أخبار خط هيثرو شنووو؟



تعليقات 41 | إهداء 2 | زيارات 13219

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#321178 [نادر]
1.00/5 (1 صوت)

04-01-2012 11:56 PM
الاستاذ الساحر جبرا
الله يخليك لينا
بالغت في الشريعة بالنص و توقيت قريش ديل
واصل حماك الله
نسمه بارده في وسط جهنم الابالسة


#321042 [حليم-براغ]
1.00/5 (1 صوت)

04-01-2012 08:14 PM
والله يا أستاذ جبرا الظاهر بنتك مشكلتها كبيرة جداً خريجة 2002 ولغاية دلوقت بتقدم لمعاينات يعني 10 سنين نضال...نصيحتي لبنتك أحسن حاجة تمشي تدخل خلوة قدح الدم في العباسيية بمدرمان وله خلوة حي فريق عماية لكن أفضل أحسن ليها تمشي ناس الصائم ديمه وبعلموها كمان ذكر ومديح ...ناس قدح الدم وفريق عماية عندهم دراسة عملية بيمشوه بيوت البكيات بقروه قران وبياكلوه الصدقة...بعدها بعد 5 سنوات بتمشي مطمئينة الإمتحان وقطع شك بتنجح بإذن الله ...بس المشكلة اللجنة المرة الجاية تكون اتغيرت وجات لجنة جديدة وبنتك تكون كل وقتها مركزه لمعرفة أبناء السيدة عائيشة رضي الله عنهاوفقه النسوان ...وتكون نست الإقتصاد الدرستوه ويكون حقها راح وطلعت من المولد من دون حلاوة حمصية. مع تحياتي لك و إبنتك .


#320821 [الزول الكان سمِحْ]
3.00/5 (2 صوت)

04-01-2012 03:11 PM
والله يا أستاذ جبرا

الموضوع ده..ظبط تماماً مع إستغراب أخونا عبد الواحد ..الطوالى مستغرب..له التحية..

إجراء المقابلات ده عِلم تخصصى نادر وفى الدول المهتمة بإنسانهاهناك كوادر م}هلة من حملة الشهادات العليا فى هذا المجال( مش الشهادات القعدين نقرأ ) عنها فى اليومين ديل)

علم إجراء المقابلات له مهارات لايمكن أن يطبقها من ليس له دراية ( ناس ضربو رماه ) وهى مسؤلية قسم تنميةالموارد البشرية فى المؤسسات ..يعنى مثلاً زى بتاعين ديوان الزكاة فرضاً ولو هو جامعى ودارس علوم فقهية أو دينية ..كيف يجرى مقابلة مع متقدم لوظيفة وهو خريج إقتصاد؟؟
يا أخى البلد دى أحسن حاجة يبيعوها ويدوا كل زول حقو يشوف ليهو بلدا تانية يعيش فيها


#320797 [الزول الكان سمِحْ]
1.00/5 (1 صوت)

04-01-2012 02:46 PM
والله يا أستاذ جبرا

الموضوع ده..ظبط تماماً مع إستغراب أخونا عبد الواحد ..الطوالى مستغرب..له التحية..

إجراء المقابلات ده عِلم تخصصى نادر وفى الدول المهتمة بإنسانهاهناك كوادر م}هلة من حملة الشهادات العليا فى هذا المجال( مش الشهادات القعدين نقرأ 9 عنها فى اليومين ديل)

علم إجراء المقابلات له مهارات لايمكن أن يطبقها من ليس له دراية ( ناس ضربو رماه ) وهى مسؤلية قسم تنميةالموارد البشرية فى المؤسسات ..يعنى مثلاً زى بتاعين ديوان الزكاة فرضاً ولو هو جامعى ودارس علوم فقهية أو دينية ..كيف يجرى مقابلة مه متقدم لوظيفة وهو خريج إقتصاد؟؟
يا أخى البلد دى أحسن حاجة يبيعوها ويدوا كل زول حقو يشوف ليهو بلدا تانية يعيش فيها


#320720 [الامير]
5.00/5 (1 صوت)

04-01-2012 01:39 PM
واحد صاحبنا دخل معاينة قالوا ليه نفس الاسئلة قام طوالى شال شنطتو وقال ليهم انا خريج اقتصاد ما همشكوريب

والله محن يا جبرة


#320571 [mohame tai]
5.00/5 (2 صوت)

04-01-2012 11:36 AM
من القصص التي سمعتها عن لجنة الاختيار ان خريجا من كلية الطب ذهب للجنة الاختيار لمعاينةوكان يعتقد ان المعاينة ستكون في مجال الطب .. ولكن سألوه عن العشرة المبشرون بالجنة فاجاب بالآتي:-(ان ما بعرفهم لكن الشئ البعرفوا انتو ما منهم) وخرج من المكتب غاضبا.


ردود على mohame tai
Sudan [نادر] 04-01-2012 11:41 PM
ممتاز يا اخ محمد والله طبيب فشي شوية من غبينتنا الله ونصرة و يوفقوا ماشي صاح. اللهم العن بني إبليس أينا حلوا بالذات لجان التيار الاحتكار الحقااار


#320562 [الما عنده ضهر يموت قهر]
0.00/5 (0 صوت)

04-01-2012 11:29 AM
المعاينة المفروض تتركز على اشياء اساسية ما كلها اسئلة

المظهر ما شرط الوجاهة المهم يكون انيق ولو بملابس بسيطة
طريقه التفكير في الاجابة
وعن اذا اشتغل قبل كدا لانه في ناس قلقة ما بتستقر في عمل واحد ، وناس في العمل جداد .
كم سنة قعد بين كونه طالب واشتغل حتى يهئا اولاً اذا طالت فترة التخريج والانتظار .

وقدرته على استخدام التقنيات كمبيوتر فاكس ماكنية مستندات .
القدره على إستيعاب اي طارئ في العمل تحديثات جديده لنظام الشركة اضافة فرع او قسم يكون له علاقه مع مجاله .

ده غير الاسئلة والمعلومات العامة

هذه الاسس والمعايير التي يجب ان يتم بها الاختيار ...


تذكرت سؤال في الفيزياء زمااااااااااااان
رجل بين جبلين ويمسك بيده بندقية وقام بإطلاقة رصاصة فاتجهت إلى ناحية الجبل بسرعـة كدا ضوئية وصورت بتردد كذا هيرز وطارت الطلقة بعد ما اصطدمت بالخصره تنحت جهة شنو ما عارف ثم استقرت على الارض وحفرت حفره عمقها كذا سنت .. وما اصابت اي شخص الحمد لله ( مسالة فلم كاوبوي وكدا ) المهم بعد المشهد الدرامي الارهابي ده
السؤال كم يبلغ طولة ماسورة البندقية ..؟؟؟
ونصف قطر فوهة البندقية ..؟؟

البجاوب يبقى كاوبوي قصد شاطر

الما عنده ضهر يموت قهر


#320388 [بت ام الحسن]
4.75/5 (3 صوت)

04-01-2012 08:19 AM
يا ختى ديوان الضرائب ما بوظفو فيهوالناس الزيك 000بوظفو فيهو الفاقد التربوى لانهم دايرين ليهم ناس وشها مكشوف لزوم القلع والابتزاز ولوى اليد000 وشغل زى ده اولاد الناس مابقدرو عليهو


#320331 [شكلى ناسى حاجة]
5.00/5 (1 صوت)

04-01-2012 02:46 AM
كســـرة ثابتة! الرئيس ذكر ان مزرعته بتجيب ليهو قروش اكتر من ماهبة الرئاسة طيب ما يستقيل ولماذا يجمع رئيس البلد وظيفتين وهو الذى اتى بوظيفة واحدة للرئاسة عسكرى فقط وليس اقطاعى صاحب اطيان واملاك وبعد دة كلو حارمين عامة الشعب ياكل باقى فتات موائدهم العمرانة


#320318 [مجنون ليلى]
5.00/5 (5 صوت)

04-01-2012 02:21 AM
لو كنت مكان (س) كانت اجاباتي تكون كالاتي >>

- اى صلوات تقصر فى السفر؟ وهل تقصر صلاة المغرب؟

الاجابة- الله يقصر ايامكم وسفرة بلا عودة ان شاءالله.
- كم هى عدة المرأة المطلق والمتوفى زوجها؟

الاجابة- عدةالمطلقة حلل وكبابي والتانية عدتها قصور بقبابي (جمع قبة)
- من هى السيدة عائشة؟ وما لقبها؟ اذكر حديثا عنها؟ الفقه الذى كان فى احاديثها ماهى نوعيته؟

الاجابة - تطير عشيتكم زي ما طيرتو خط هيثرو واللقب (سودان طير) والفقه فقه السترة.
- ما الحكمه من الفرق بين عدة المرأة المطلقة والارملة؟

الاجابة - تحريض الرجال على الجهاد .

- أدينا جملة مبنية للمجهول؟

الاجابة- دار المايقوما لا توجد شواغر يرجى التخلص من الهم في اقرب كوشه.

- ماهى حروف الجزم؟

الاجابة - الجزام ال يقرضكم ما يفضل منكم كوز.

- ان لما تدخل على الجملة ماذا تفعل؟

الاجابة- ان شاءالله يعضيكم كلب سعران .


استغفر الله العظيم واتوب اليه (والله المقصة كاتلانا لكن نعمل شنو)


ردود على مجنون ليلى
Sudan [نادر] 04-01-2012 11:44 PM
انت أعقل مجنون والله
خففت من مغصتنا الله يكتر من جنك المبدع ده


#320294 [Malek Chol]
5.00/5 (1 صوت)

04-01-2012 01:19 AM
Hahahahahahaha.............


#320279 [برضو]
0.00/5 (0 صوت)

04-01-2012 12:50 AM
سبحان الله , انا خريج كليه طب , ومشيت معاينه الاسئله كانت كالاتي :
1- اقراء سوره الفاتحه ؟ سوره الفاتحه فيها كم ايه ؟ وهل بسم الله الرحمن الرحيم ايه ولا ما ايه ؟
2- اذا جيت ماري بي ناس وقلت ليهم السلام عليكم وما ردو عليك عقابهم يوم القيامه شنو ؟
3- ماهو مناخ البحر الاحمر ؟
4- تفتكر مشكله دارفور دي سببها شنو؟
5- ممكن تقول لينا سيرتك المهنيه باللغه العربيه الفصحي ؟ طبعا غلطت وقلت تخرجت (من) والصاح (في) جامعه ..... اول مره اعرف المعلومه دي
6- لو جاك زول فاقد وعيو بتعمل ليهو شنو ؟


#320267 [ابن البادية]
5.00/5 (1 صوت)

04-01-2012 12:08 AM
انتو عارفين مدير الامدادات في وزارة الكهرباء خريج شنو خريج كلية التربية قسم لغة عربية جامعة السوادان عام 1997 و لو ما مصدقني امشو وزارة الكهرباء و اسالو منو


#320228 [عبد الواحد المستغرب اشد الاستغراب!!]
0.00/5 (0 صوت)

03-31-2012 10:53 PM
ياجبرا زمان ما قلنا ليكم الشيخ ساب الجماعه ديل (معلقين ذى بورى العربيه ) حتى الورثوه باتوا مشغولين بأمور أهم بكثير من أمر الشريعه وشعار (هى لله00لا00للسلطه ولا للجاه) عاد عليهم بنتائج إيجابيه واتى أكله فى حينه!! وطبعا هم كانوا عايزين الموضوع من الاخر وجاهم (ضغلا) يتلولح00وهل تعلم ياجبرا الجماعه البيعملوا المعاينات ديل موظفوا خدمه مدنيه قدام ولا علاقة لهم بأصل الجماعه؟!!00 لكن لزوم آكل العيش وسبل كسب العيش فى هذا الزمن الصعب بفعل فاعل تضطرهم لمسايرة (التوجهات المنسيه من قبل مشرعيها )00 مساكين لانهم لسه ما أكتشفوا أن المشروع الحضارى شبع موتا ولا يعنيهم فى شىء والشطار منهم مشغولون بالميراث والنص نص منهم مشغولين بسكسكة مواد البناء والبقيه الباقيه مشغولون بهاجس (اوكامبو) وإذا( إسمو مكتوب!!)0


ردود على عبد الواحد المستغرب اشد الاستغراب!!
Norway [مجنون ليلى] 04-01-2012 02:38 AM
الاخ عبدالواحد كيفنك علك بخير وسلام وامان


انا المستغربني انت انت لسه بتستغرب؟؟؟؟؟

انا زمااااان كنت زيك كده ، كنت بندهش لمن اسمع خبر زي ده وشوية شوية الاندهاش تحول لاستغراب والاستغراب تحول لحيرة،وهسه بقيت كويس وكل شيء عادي بالذبادي يا مان....

ف ياخوي عبدو لا تندهش ولا تستغرب ولا تحتار ،ما خلاص خط هيثرو طار ، خليك طبيعي...........


تقبل تحياتي وفي امان الله



مجنون ليلى والهلال


#320210 [عبداللطيف]
0.00/5 (0 صوت)

03-31-2012 10:15 PM
يعني يا الناس الدخلتوا المعاينة ما كان احسن توفروا قروش المواصلات والفطور لاخوانكم الصغار امكن ربنا يعدل الحال لما اكبروا وتجيهم حكومة تعمل ليهم معاينات جد جد .


#320206 [Heron]
3.25/5 (3 صوت)

03-31-2012 10:10 PM
والله عمر البلد ما حتتصلح طالما هؤلاء الضلاليون جاثمين عل صدر هذا البلد.نشوف فيكم يوم بس .


#320202 [عبد الله ادروب]
0.00/5 (0 صوت)

03-31-2012 10:05 PM
المسألة ما في الدين. معقولة الكيزان كلهم اتخطو معاينتم دي يا استاذ.
طيب انا خريج كلية التربية بشهادة جيد جدآ في ال 2004 وللآن عاطل. في سنة 2007 كان في وظائف للمعلمين
نزلنا معاينة 5000 من الخريجين جزء من المقدمين من كليات تانية اقتصاد\ آداب \ شريعة \قانون
المهم ناس كتيرة اتخرجت وعاطلة دايرة محل ينشغل بيهو عشان كلام الناس بقولو اها دا ما اتخرج عمل شنو ما قاعد ساااي
نزلنا المعاية المرة الاول الحمد لله مرينا منها 500 فرد. قسمو العدد دا للمحليات انا في امبدة محلية البقعة
جابونا 30. انا تخصصي جغرافية تاريخ ودايرين واحد استاذ جغرافية وال 30 واحد ما في زول متخصص جغرافية.
كل الحسابات تأكد اني واحد من المختارين لكن حسابات المؤتمر الوطني بشوف بطيقة تانية
عشان كدة نحن ما عارفين الشادات و الكفأة هي المعيار ولا (ان تكون مؤتمرجيآ) هي المعيار


#320180 [عمر]
1.00/5 (1 صوت)

03-31-2012 09:23 PM
اكاد اجزم ان القصتين ملفقتين وقرأت شبيها لهما ومنك انت من قبل وعلي كل لن تجدي محاولاتك شيئا شوف غيرا


ردود على عمر
Sudan [حلفاوية] 04-01-2012 01:05 AM
يا ابوحميد ، القصة ما ملفقة انادخلت معاينة سنة 95 لضرائب حلفا الجديدة وماعرفت احل اي حاجة لاني كنت ما ناقشة اي حاجة ، واخدوني لاني عندي واسطة ، بس ما اشتغلت علشان ربنا رحم الوطن باني اتجوزت ( بلاء اخف من بلاء ) بالنسبة للوطن طبعا ،

Sudan [غواصة] 03-31-2012 11:59 PM
يظهر عليك غواصة تحت التدشين ياعمر ..
اها هاك دى :
قريبى خريج بكلاريوس هندسة كهرباء واجتاز كل المعاينات وبقى ليهم فى رقبتهم ..
الى ان تصدى له احدهم وقال بالواضح سيبوه لى ثم سال قريبى :

اذكر من هم العشرة المبشرين بالجنة ما عدا الخلفاء الراشدين ؟؟
وما يزال حبيبنا يرزح تحت بند العطالة ..

عيب كمان تبقى ملكى اكثر من الملك.. وسعادة الريس ينعى الخدمة المدنية لقيامها على آفة التمكين .


#320175 [احمد]
3.50/5 (3 صوت)

03-31-2012 09:06 PM
يحكى ان شخصين ذهبا لمعاينة توظيف وكان اسم احدهما عبد الرحمن اما الاخر فيدعى طه دخل عبد الرحمن اولا فسئل عن اسمه فاجاب (عبد الرحمن) عندئذ طلب منه ان يقرا سورة الرحمن التى لم يكن حافظا لها فانهيت المقابلة عند ذلك ولما خرج اخبر صديقه طه بالامر ولما دخل طه ابتدره احدهم بالسؤال عن اسمه فرد قائلا والله الحقيقة ياجماعة انا اسمى طه لكن منذ صغرى يدلنونى باسم كوثر


ردود على احمد
Sudan [Teafa] 04-01-2012 03:45 PM
ههههه والله دي إتقطت فيها

United Arab Emirates [محجوب عبد المنعم معني] 03-31-2012 11:54 PM
هههههههههههههههه، الله يجازيك والله تعرف عندي قحة ليها كم يوم، من الضحك قربته اموت،ههههههههههههههه، وقربته‘‘‘‘ في هدومي، عاد ده كلام ده الله والله محن


#320173 [طشاش]
0.00/5 (0 صوت)

03-31-2012 08:59 PM
وعندما دخل (بدرالدين) المعاينة أذهل اللجنة بردوده الدقيقة الحاسمة مما جعل رئيس اللجنة يقوم بسؤاله شؤالاً في تخصصه عن خطوات الأمان التي يجب على المهندس إتخاذها عندما يعتلي أحد أبراج الضغط العالي


والله ان كنت متوقع ما حايجاوب لانو اكيد بكون مسح كل القراهو في الهندسة


#320162 [مستغرب]
4.00/5 (4 صوت)

03-31-2012 08:46 PM
تعرف ليه ياسيد جبره الاسئله الدينيه فى مجال علمى لانهم خريجى معاهد دينيه اى ان نسبة نجاحهم كانت لا توهلهم لدخول المدارس الثانويه ومن دخل منهم المدارس الثانويه او حتى الجامعه ماتخدعك القاب دكتور او بروفسير
شهاداتهم كلها على مستوى ماجستير فى الوضوء ودكتواه فى غسل الجنابه وبروفسير فى شرعيةالزواج العرفى وحقيقى هم لا يعرفون حتى صياغة الاسئله العلميه , كل القصه انه يتم اختيارهم خدمه لهم لنيل بدلات اللجنه ولهف القروش وما يجرى فى اللجنه فهو شكلي والاختيار تام قبل انعقاد اللجنه وهم فقط صور وطبعا صوره قبيحه.
ومايثبت كلامى الشهادات المزوره فى كل الدنيا من سودان الانقاذ وخاص ما اثير عنها اخيرا فى برطانيا والاردن
والله عيب عليكم ياكيزان البحصل لكن حظكم اكثر حاجه نجحتوا فيها غرس الكراهيه ليكم وسوف نثار حتى من ابنائكم لانهم حاصدى كل حقوق السودانيين من حق دراسه واعاشه وعلاج وعمل ثم غيبتم القانون ومثلتم اسوا نموذج لاستغلال السلطه غايتو فى النهايه نقول ربنا ينصر عليكم مقاتلى النيل الازرق عشان نشوف الجرى.
ومن الان انبه لحاجه مهمه جدا وهى معرفة وتحديد المفسدين والحاقدين بالاسم حتى يكون القصاص ومانظلم زول ونبقى زيهم وانبه الشباب انه كندا فيهه فرص هجره للدراسه واباها سهل اجراءات الدراسه فى امريكا بس حركوا الماوس وربنا يفرجها عليكم ويزيل الحكم الظالم عن البلد حسبى الله وهو نعم الكيل


#320153 [سامي سعيد]
5.00/5 (1 صوت)

03-31-2012 08:32 PM
لذلك ماتت الخدمة المدنية


#320098 [على]
0.00/5 (0 صوت)

03-31-2012 07:09 PM
الاستاذ الفاتح جبره السلام عليكم
و التحية للاخت الصابرة (س)
انا على سودانى مقيم بالخارج
خريج هندسة ميكانيكا ( امتياز)
اولا تخرجت 2003 و لم اجد عمل
اخر معاينة دخلتها للجنة الاختيار الاتحادية كانت 2010 بعدها قنعت من خيرا فيها وسافرت خارج السودان
المعاينة كانت لهيئة المواصفات و المقاييس و قالو عاوزين مهندسين ميكانيكين
والله لم اسال مجرد سؤال فى الهندسة او الكمبيوتر او اللغات (اتحدث ثلاث لغات بطلاقة)
كانت الاسألة: اذكر بنات الرسول صلى الله عليه وسلم من الاكبر للاصغر
اذكر اولاد الرسول صلى الله عليه وسلم من الاكبر للاصغر
اركان الحج ؟
اركان العمرة ؟
ان واخواتها ؟
مثال لجملة من غعل وفاعل
مثال لجملة من مبتدأ وخبر
و بعدها قالو لى شكرا وتابع النتيجة فى البورت و على النت
القريبة انو بتوفيق من الله اجبت كل الاسألة دى لانى دخلت ليهم كم معاينة عارف دا اسلوبهم فى تطفيش و ازلال المساكين الذينا ديل
بس لا شهاداتى اشفعن لى و لا الاجابات الصحيحة


#320085 [بارود]
5.00/5 (1 صوت)

03-31-2012 06:50 PM
لجنتهم ماظريفة واسئلتهم جبانة-- نعمل شنو تراهو الحال . ربنا يصلح الحال


#320068 [عمر جابر]
0.00/5 (0 صوت)

03-31-2012 06:33 PM
بنتنا العزيزة (س) والله إنت محظوظة وما قالوا ليك لينا سورة سبأ لأن اسمك يبدأ بحرف السين. وعشان ما تقولي ظلموك كان حيدوك خيارات. فأقرب حرف للسين هو الشين وعليه سيعطوك ثلاث خيارات من السور لتقرئي من تعجبك وهي سور: سبأ والشعراء والشورى.
تقولي لي لجنة الإختيار ظالمة. دي إنتِ غلطانة. الوداك تقري الجامعة شنو؟ وكمان اقتصاد. كان المفروض يسألوك عن تاريخ وساعة إسلام خالد بن الوليد؟ (نملة ولا خاتي خاتي بنى لي في بيتو).


ردود على عمر جابر
Sudan [نادر] 04-01-2012 11:51 PM
بدل سورة سبا كان تجئ من الاخر و تكشف عن ساقيها
اصلهم بتاعين نسوان
لكنها طبعا مربيه كويس تربيه زمان
ما تربية المشروخ الحضاري


#320060 [أنا المظلوم]
0.00/5 (0 صوت)

03-31-2012 06:21 PM
علي زكر المعاينات واحد سألوة عن عدد شعرات دقن عثمان دقنه.............


#320046 [ود الحاجة]
2.00/5 (1 صوت)

03-31-2012 06:00 PM
هذه اللجان أشبه بقصص جحا حيث أنه حتى أسئلتهم الدينية هي كل ما يعرفون عن الدين بحيث لو سألت أحدهم عن صلاة الجنازة مثلا لما استطاع أن يجيبك .


#320045 [ابوالشوش]
2.00/5 (1 صوت)

03-31-2012 05:59 PM
و (س) دي جاده كده خشت المعاينة ! الوظيفة الدخلت ليها المعاينة ناسا زمااااان شالوهم دي وهمة منهم ساكت عشان يقولو الحكومة قاعدة توظف الناس ..


#320037 [Hamad]
0.00/5 (0 صوت)

03-31-2012 05:46 PM
بسيطة ..
ما البلد حقتهم ..
ماهو اللى معاه قرش محيرو .. يجيب حمام و يطيرو..!!
يا ربى فضل منو تانى ما حكمنا .. و جرب فينا .. و اغتنى من ورانا ..
و من خيرات بلدنا وا رضنا .. و ارضى محاسيبو و جماعتو .. و قبيلتو .. و ناسو .. و قرايبو ..
يا ربى الحا يجو بعدهم برضو حيكونوا زيهم كده وللا كيف ..؟؟
يا حليلك يا .. بلدنا ..!!
لك الله .. لك الله ..
و حسبنا الله و نعم الوكيل ..


ردود على Hamad
Saudi Arabia [ود معتوق] 04-01-2012 12:36 AM
حايكونى اسوا منهم وربنا يكزب الشينه


#320020 [ودالدكيم]
5.00/5 (1 صوت)

03-31-2012 05:19 PM
أستاذنا جبرا لك التحية القضية أصبحت واضحة وضوح الشمس أختنا الكريمة وأبن أخ أستاذنا جبراالاثنان لاينتميان للحزب اليهودي الصهيوني الحاكم منسوبي هذا الحزب الشيطاني عندما يتقدمون لوظيفة ليس بالضرورة أن يكون مؤهلاً ولايخضع لمعاينات ولايحزنون الشرط الأساسي والأهم أن يكون منتمياً لهذا النبت الشيطاني وحكاية الصالح العام الغرض منها سياسة التمكين


#320016 [اب زرد]
5.00/5 (1 صوت)

03-31-2012 05:05 PM
طبعا ما ح يشيلوكى...لكن على العموم بقان اموم بهناك فش ليك غبينتك


#320013 [سودانية]
4.00/5 (2 صوت)

03-31-2012 05:00 PM
انت ما كان تبقى اشد منهم وتقولى ليهم مافى حاجة فى الدولة الاسلامية اسمها ضرائب فى زكاة بس.. الضرائب فى الدول العلمانيةبس ...وتقولى ليهم ادونى اية او حديث تحث على جمع الضرائب وعمل ديوان ليها كمان...وكان ماادوكى اية او حديث لانهم ما ح يلقو ..تمرقى رافعة راسك وتقولى ليهم (وانت جنب الباب) ديوانكم ده نهب مقنن لاموال المسلمين عشان كده انا مابقدر اسرق..اقصد اشتغل معاكم فيهو اعفونى واشطبو اسمى من المعاينة دى


#320006 [ودالوالي]
3.50/5 (2 صوت)

03-31-2012 04:51 PM
اكبر جرم ارتكبتية في حق نفسك كونك تمشي المعاينة
يوم من الايام عندنا واحد مشي المعاينة اول سؤال طرحو علية
قال لية ماهي اول شايقية تم تشليخها وما هي المراءةالتي قامت بالتشليخ


ردود على ودالوالي
Saudi Arabia [احمد عبدالرجمن بابكر] 03-31-2012 06:37 PM
لا تبالغ هذا اولا: ثانيا: ليس هناك داعي لزج بالشايقية ولو على سبيل المزاح.حليك موضوعي.


#319996 [عاشق النامير]
0.00/5 (0 صوت)

03-31-2012 04:36 PM
كونى قويه


#319987 [محتار]
5.00/5 (2 صوت)

03-31-2012 04:24 PM
اما المرضى عنهم فالاسئلة كما يلى :
اهلا وسهلا تفضل اجلس .. السكر ملعقتين ام ثلاث ؟
ما هى عاصمة السودان الشمالى بعد الانفصال ؟
كم عدد ركعات صلاة الوتر ؟
كم عدد نواب السيد رئيس الجمهورية ؟
كم ساعة تنوم فى اليوم ؟
اقرا سورة الفاتحة ..
آميييين .. مبروك.. اتفضل خلاص وسلم على الجماعة ..


#319986 [الشايل المنقة]
5.00/5 (2 صوت)

03-31-2012 04:23 PM
... اخطأت يا جبرا,, بنتنا دى ح يشيلوها ..لكن ,,,حا يشيلوها بره..!!


#319980 [ابو محمد]
5.00/5 (1 صوت)

03-31-2012 04:17 PM
راثع كعادتك


#319972 [امدرماني من الركابية]
4.50/5 (2 صوت)

03-31-2012 04:02 PM
لجان اختيار تافهة . ماذا كان يحدث لو اجبتي علي كل الاسئلة الدينية بامتياز ورديتي علي اسئلة تخصصك بدرجة ضعيفة نوعا ما . افتكر كان ممكن يقبلوك وطظ في التخصصات والجامعات علشان كدة لابد من ازالة هذا النظام البليد الارعن ولنبحث سويا الي دولة مدنية لا دينية ولا عسكرية دولة المساواة والعدل والديموقراطية. وبلاش من دولة طالبان جديدة كلها تخلف وجهل بالله شوفوا الدول المتحررة كل يوم تشرق فيهوا الشمس يفوتونا بمئات السنين ونحن في محلك سر.....اه يا وطن


#319949 [جن]
0.00/5 (0 صوت)

03-31-2012 03:33 PM
والله يا استاذ جبرة و بعد 23 سنة شريعة اسلامية يعني هو حاجة في الإتنين يا المشكلة في الاسلام يا المشكلة في عقلية المتأسلمين..يعني هسة مثلآ زول قاري خلوة وعارف الاجوبة يخش طوالي على وظيفة الإقتصاد بتاعت بتنا دي ؟؟؟‏ أها طيب و مع جنس العمل دا و لسه قاعد بتسأل عن خط هيثرو ياخ قول خط امبدة خط ابروف خط الكلاكلة ما مرة وحدة ناطي لي هيثرو ياخ ماتبالغ يا استاذنا الله يرضى عليك


#319945 [ابو فياض]
5.00/5 (1 صوت)

03-31-2012 03:27 PM
غلطانه هي عشان تاني تمشي معاينات
هو اي زول بمشي المعاينات
اتكلي علي الله واشتغلي 000000000


#319935 [nader]
0.00/5 (0 صوت)

03-31-2012 03:08 PM
المده التى استقرقتها بتوقيت ( قدو قدو ) المهندس شهيد والان بستمتع ببنات الحور


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة