حنة الخريج
03-31-2012 05:24 PM

حنة الخريج

أسماء الجنيد
[email protected]
ـــــــــــ
دي واحدة من محن الزمن الجديد ، يطرشنا ويفرطق اضانا ما سمعنا بي بدع(بكسر الباء ) جيل الشباب
إلا في زمن الممحوقين ديل !أي شيء متوقع في زمنهم الدخيل علينا ده.
قريت قبل مدة في موقع سودانيز اون لاين من احد الإخوة الزملاء هذا الخبر التحفة, والبقول:
إنه وأجاركم الله لما يتخرج شاب ولا شابة في زمنا ده وقبل التخرج بيوم ، لازما ولا بد يسولوا حنة !
آي نعم حنة عديل والله، وبكترولها المحلبية كمان عشان تشيل، وبي جرتقها وحريرتها .
يعني الشباب بقوا يتحننوا برا عرس! , يا ربي عشان الشباب ديل الإنقاذ ضيقت عليهم فرص العرس بي ضيق الحال ! وبقوا دايرين يضوقوا الحنة والجرتق الما بقدروا عليها مع العيشة المرة دي ولا شن فهمهم!!
اخونا ده اتصل يبارك لي اخوه التخريج ، لقى الهيلمانة والزغاريت واقفة ألف أحمر في بيتهم,
قال قلت يمكن حفل التخريج الليلة , ولما سأل اخوه يا زول إنت تخريجك الليلة ولا بكرة؟
قال لي لا.. بكرة ، اها سمح الجوطة شنو عندكم في البيت ؟ قال لي ما الليلة حنتي ياخ !!!
حنتك؟ حنة شنو يا زول ؟ إنت عريس ولا الحاصل شنو انا ما فاهم ؟
قال لي لا ياخ إنتو يا المغتربين دكة قديمة خلاس, يعني شنو ما سمعت بي حنة الخريج ؟؟
بعدا بي كم يوم تحققت من صحة الخبر عن طريق واحدة اختنا رجعت من السودان قريب.
قالت لي والله يا بت امي مشينا نبارك لي ود خالتي التخريج ، القاه ليك محنن والحريرة في إيدو .
اجي يا بنات امي فلان عرسو وتخريجوا الليلة ولا شنو ؟؟؟ قرررررر ضحكوا فيها القاعدين.
اها سمح في شنو .؟ فهموني الحاصل ، وإتكررت نفس الرواية، وحكوا ليها العرف الجديد بالنسبة للخريج في عهد بنو جكة الدايرين يمسكوا الناس ضنب الككو بأيتها طريقة ويشغلوهم بتفاهات الإمور
خاصة جيلهم الربوه حسب هواهم ، وشغالين يشكلوا فيه برضو زي ما دايرين والما عاجبوا يلحس كوعو وضهرو كمان !!!
يا اخوانا رغم الجوع والفقر والمرض وقلة الحاجة، إلا إنه حنة الخريج لها طقوس لا تقل عن حنة العريس ،أو القيدومة . خرفان وضبايح واللذي منه وعزومة كبيرة وآخر قشرات حسب الموضات للأولاد والبنات !!!.
وبعض الحنن لي بعض الخريجين اولاد الباشوات من أصحاب الجاه والمال الما طاقيهم فيه حجر دغش
ديل حنتهم بتكون حنة خاصة خمسة نجوم في عين العدو الشوم، في قاعات مكندشة ومعتبرة وبالشيء الفلاني, والعشا اشكال والوان زي ما تدور، والفاتورة من عرق الترابلة والمهمشين والمطحونيين !!!
حنة الخريج دي ذكرتني (عرس الشهيد ) بدعة شيخهم الضلالي الداير يفك البريق بعدما عاس عواسته وخرب سوبا والباقير وخلا ريحة اهلنا طير طير ,,!!!
ما عارفين البلد ده ماشي على وين ؟؟ معقول إتهدمت كل القيم السمحة الزمان المعروف بيها أهل السودان؟ وبقينا شعب فارغ ماشي في الوحل والعوج وبرضو مباري الفارغة ومقدودة وما هاميه الحاصل للبلد واهله المطحونين؟ معقول كل قيمنا راحت في خبر كان وحلت بدلها بدع ومحن الإنقاذ وجيلو الجديد؟ ولا دي إحدى سياسات الحكومة تشغل الشباب الطاشي شبكة ديل بإمور فارغة تلهيهم عن البلد المدحرج نحو الهاوية بسرعة الصاروخ؟
اها كان قلنا الشباب طائش وطافش ، وينهم كبارنا ناس الشورة ؟ وليه الناس دي بتقطع لحمها الحي عشان تباري المحن دي؟ولا نقول منه السلام وعليه السلام؟
متاوقة
ــــــ
هسه الشباب ديل زاتهم المتحننين ليها شنو ؟ الإتخرجوا قبالهم لاقين شغل ؟ما قاعدين بالصفوف والألوف من سنة 89
يمهل ولا يهمل



تعليقات 0 | إهداء 2 | زيارات 3417

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#320947 [ابوكرنك]
0.00/5 (0 صوت)

04-01-2012 05:29 PM
عجب عجب


#320898 [محمد س]
0.00/5 (0 صوت)

04-01-2012 04:22 PM
نحن شعب بوبارى من الدرجة الأولى من نشم ريحة أباطنا نسوى البدع والعجائب ، من ظهرت الطبقة المرفهة بعرق الغلابة ظهرت الحاجات دى نتيجة لجريان المال فى اليد وبلا حدود ، والدليل على بوبارنا فطور العريس بالدفارات والعريس البهدى خواتم وسلاسل الدهب للنسوان البجيبن الفطور ، وصالات الاعراس الغالية ، ياخى خلى الناس الجامعات الكبار ديل وشوفى شفع الروضة تخريجهم بكلف كم هل يعقل يتم تخريج اطفال فى سن خمس سنوات فى صالات خمس نجوم وبتصوير فيديو ومشروبات ومأكولات وحفلات ، شئ عجيب يابلد ، الله يكون فى اولاد الغبش المساكين عقولهم وقدراتهم راحت ساى تدمرت عشان جيبهم خالى ويدهم قصيرة ، زمان ناس القروش ديل ما بلقوا فرصة مع الغبش الأذكياء بالفطرة مش بالاستاذة الخاصة والمدرسة الخاصة والترحيل المكيف والفصول المكيفة والبيت فى شكل فيلا ، ديلك فللهم راكبة ولا قطية وسطها لمبة (حبوبة ونسينى ) وفى احسن الحالات فانوس صغير ، بدخلوا الجامعات بقدراتهم وعقولهم مش بالمعسكرات الأكاديمية والرحلات الى ماليزيا ومصر والامارات . البلد بقت ماشة بضنبها ورأسها موجوع فى الريف هناك ، وانشاءالله تصل حدها قريب ، والله ما برضى الظلم وظلم الناس ديل خلوا المساكين لافين صينية واولاد الراحات ديل يبدعوا فى حنة الخريج يارب ترحمنا وتتوب علينا ولا تؤاخذنا بما فعل السفهاء منا فى اموال السودان .


#320695 [جمال]
0.00/5 (0 صوت)

04-01-2012 01:09 PM
موضوع مهم خاصة وأن لدي ابن سيتخرخ في هذا العام وانا مهموم شديد لهذا اليوم بدل ما اكون فرحان. الحنة براها يا بت الناس هل تعلمين ان الحفل الذي يقيمه الخريجون يتم فيه (( ان يندهوا)) الخريج او المتخرج على انغام الاغاني ومعظمها هابطة وبعضها غير سودانية. الكبوة كبيرة في التعليم العالي وما شفتي الطلبة والطالبات على الطرقات من الجامعة حتى الميس حاجة تخجل لكن نحن نستاهل


#320546 [محمد دفع الله]
0.00/5 (0 صوت)

04-01-2012 11:15 AM
نسال الله السلامة والله دا الخايفين منو ذاتو حصل العالم الفارغة دى بالله ديل ناس عايزيين يقودوا السودان يا اخى نحن تخريجنا ما حضرناالتخريج لانو كنا جاريين وراء الشغل عشان تعيش امك وابوك واخواتك واخوانك الصغار . وانا اوؤكد ان معظم هؤلاء الذين يعملون حنة التخريج ديل عالم فارغة والقروش البعملوا بيها الحاجة الفارغة دى لو داقيهم فيها حجر دغش والله ما يعمل بيها البعملوا فيه دا .بصراحة اصبحنا نحن امة بلا هدف . ما يجئ واحد ناطى يقول لى انت دقة قديمة والاجيال تغيرت والانسان هو الانسان يتعامل مع ماهو منطقى وعقلانى على مر الدهور و الاجيال ولكن لايركن ابدا الى سفاسف الامور. لايسعنى الا ان اذكركم بقول شوقى :
انما الامم الاخلاق ما بقيت فأن هم ذهبت اخلاقهم ذهبوا.

د. محمد


#320545 [مجاهد]
5.00/5 (1 صوت)

04-01-2012 11:14 AM


اكتبي عن كيفية تغيير الواقع الاقتصادي في السودان ودعك من سفاسف الامور .
انها افكارنا وليست افكار الحكومة التي تجعلنا نتحنن او ان نرقص على انغام الدفوف انها ارادتنا ولم يأتي يوما والي من الولاة ويحضر معه الحنه ويوزعها على الجامعات بمناسبة التخريج .
عشان كدة وعشان عندنا صحفيين لا يفقهون شيئا فلن ولن تتغير الحكومة ولا الواقع المرير الذي يعيش فيه السودانيين الآن .


#320523 [مجاهد]
5.00/5 (1 صوت)

04-01-2012 10:54 AM
(ما عارفين البلد ده ماشي على وين ؟؟ معقول إتهدمت كل القيم السمحة الزمان المعروف بيها أهل السودان؟ وبقينا شعب فارغ ماشي في الوحل والعوج وبرضو مباري الفارغة ومقدودة وما هاميه الحاصل للبلد واهله المطحونين؟ معقول كل قيمنا راحت في خبر كان وحلت بدلها بدع ومحن الإنقاذ وجيلو الجديد؟ ولا دي إحدى سياسات الحكومة تشغل الشباب الطاشي شبكة ديل بإمور فارغة تلهيهم عن البلد المدحرج نحو الهاوية بسرعة الصاروخ؟
اها كان قلنا الشباب طائش وطافش ، وينهم كبارنا ناس الشورة ؟ وليه الناس دي بتقطع لحمها الحي عشان تباري المحن دي؟ولا نقول منه السلام وعليه السلام؟)

الاخت اسماء اسمحي لشخصي الضعيف ان يقتبس شئ من يسير من مقالك .
اختي الم يجعل الله لنا في رؤسنا عقل حتي نميز ماابتدعته الحكومة او ابتدعناه يااختي بالله عليك هذه افعال من وحي خيالنا وليس الحكومة التي اوحت لشبابنا ان يتحننوووووووا .
متاوقة :
يا ربي بكره لو في واحد نام في الشارع برضوا بتقولوا الحكومة العملت كده .


#320334 [Sudani]
0.00/5 (0 صوت)

04-01-2012 02:57 AM
الاستاذة الفاضلة
احيك لطرقك هذا الموضوع الدخيل على عاداتنا وتقالدينا .. وهنالك موضوع آخر مرتبط بموضوع الحنة وهو تغيير شكل حفل التخرج .. في الماضي كان رئيس الدولة أو وزير التربية والتعليم يقوم بستليم الخريجيين شهاداتهم وهم يمرون أمام الرئيس أو الوزير بكل احترام .. اما الآن فقد تغير الحال وسمعنا أن الأغنية المفضلة لكل خريج تبث عند اذاعة اسم الخريج وله مطلق الحرية في الرقص على أنغام الأغنية .. فهل هناك مهزلة أكثر من ذلك ..


#320181 [ترم ترم]
5.00/5 (2 صوت)

03-31-2012 09:26 PM
لا أدري ولا يهمني كثيراً معرفة الجيل الذي نتمين إليه. لكن والحق يقال أن مفهوم (مناسبة اللامناسبة) بدأت قبل مجيء الانقاذ ومنذ قرب نهاية نظام مايو. ليس ذلك فحسب، بل أن المغتربين وخصوصاً بالسعودية التي أقيم بها ذهبوا في تطبيق مبدأ مناسبة اللامناسبة مذاهب شتى فاقت كل حدود المعقول. أشهد الله، الذي يسألني يوم القيامة أنني شهدت حفلاً -مجرد حفل- بأحد استراحات الرياض، وكان كل همي وهدفي هو التغيير وقطع الرتابةوالملل. كانت الصالة ممتلئة عن آخرها بالحاضرين والحاضرات في كامل أناقتهم. كنت وزميلي بخارج القاعة نشاهد الرقص المحتدم بالداخل. وقف قبالتي أحد الشبان الغاضبين، وكان يشير بيده اليمنى لواحدة من النساء يطلب منها الخروج من القاعة، فقال لي أن هذه زوجتي وقد انتصف الليل ولابد من الذهاب، وأضاف أن كل رجل يسمع كلام النساء هو رجل غير عاقل!! فقلت له مستفسرا: لماذا؟ فأجاب قائلاً: (والله لو عرفت مناسبة هذا الحفل لحكمت علي بالجنون)!! فقلت له دعني أخمن سبب الحفل. فقال لي: هيا خمن. فقلت: المناسبة، هي تخرج؟ فقال: لا؟ أهي ختان؟ فقال لا، أهي زواج؟ فقال: لا، أهي ترقية وظيفية؟ فقال: لا، أهي إنجاب طفل ذكر أم أنثى؟ فقال: لا، فقلت متعجباً: إذاً ما هذه المناسبة الضخمة واللمة الكبيرة والرقص الخليع؟ فقال: تصور أن زوجة صاحب المناسبة حبُلت (حملت) بكسر الحاء لأول مرة بعدزواجها منذ ثمان سنوات. وأن تلك الشابة فائقةالجمال ذات الثوب الفلاني التي ترقص بجنون هي نفسها زوجة صاحب الحفل. مادت الأرض تحت قدمي ولم أحر جواباً وعرفت كم أنني ساذج ومغفل لأنني أبحث عن الترفيه في مثل تلك الأماكن دون أن أكون مدعوا ودون أن أعرف سبب الدعوة وصاحب الدعوة.
أها قولك شنو الانقاذ دي لحقت الناس في غربتهم وغير من عاداتهم أم أن الناس تغيروا وتوحشوا من شدة الضغط الواقع علي أهلهم وبالتالي عليهم لذا شملتهم لعنات الانقاذ الشيطانية؟ اعتقد أنه لا هذا ولا ذاك فقط نحن شعب نصف متدين ونصف متحضر ونصف متعلم، ونصف عربي- ونصف أفريقي، نحن نمارس الحياة بنصف مفهوم ونصف وعي أماالنصف الآخر فلا أحد يستطيع أن يجزم أن الإنقاذ هي التي سرقته. نحنا من زمان كده فقط زدنا لكاكة وطيانة.


#320148 [ودالبلد]
0.00/5 (0 صوت)

03-31-2012 08:24 PM
حنة حته واحده حسبى الله ونعم الوكيل!!!!!


#320093 [فطومه]
0.00/5 (0 صوت)

03-31-2012 07:04 PM
يا بت الجنيد كيفنك عساك طيبه طبعا فى ظل حيكومه الفقر والضلال دى الشباب قالو ياخدوها من قصيره طبعا اى زول بعد التخريج بفكر فى الشغل وبعد الشغل الزواج ولانه عارف بعد التخريج حينتظر كتير بالتسبه للشباب حبقولوا لقد هرمنا وبرضو حيكونوا عطاله وبالنسبه للشابات جيقضوا منتظرين الخريج ده يشتغل لحدى ما يمشطو البيضاء بالسوداء ( يسرحو بدل يمشطوا) عشان كده قالو يجربو الحنه قبل مايفوتهم القطار لانه بعدين الكبر وقار وما بتجوز فيه الحنه


#320057 [النجمي]
0.00/5 (0 صوت)

03-31-2012 06:13 PM
استاذة اسماء بعد التحية اجدك قد قدحتي في زم جيل الشباب الحالي بجرم ابتداع الحنة اثناء حفل التخرج .. مسكين هذا الجيل يا اخت اسماء فقد ظلم كثيرا حتي فقد بوصلته الدالة على الهوية والوطنية ليس ذنبهم ولكن الخلل فيما وصل اليه السودان من تضارب في سياسات عقيمة سياسية كانت او اقتصادية .. مع الاسف انتي تنشدين ان يكون الشباب مهموم بقضيته ومتشبع بالارث والثقافة السودانية التي اكتسبها من الجدود ولكن اليس للاعلام دور في هذا اين الاعلام منهم ومن همومه انظري لحال اعلامنا ستجدي ندي القلعة حاجزة مكانها في كل عدد صادر من صحيفة الدار ندي القلعة الشريف مبسوط منها .. ستجديها في كل عيد سعيد تطل علينا .. هذا في مجال الثقافة اما الترفيه فهو محرم عليهم وربنا يخلي ليهم مركز عفراء مول البرقصو فيهو وبتنفسو ..يا ستي الجيال ده لديه امكانيات مهولة ولكن لم يتم اكتشافها بعد هو مهموم باهله اما الوطن فلم يوفر لهم الا المر والمستقبل المظلم نحن جيل قراء مجانا واتنعمنا بالباسطة واللبن البجي من المزارع للمستهلك مباشرة ولما نقرف ونكون دايرين نغير بناكل عدس من باب الترفيه الان قارني ما بين جيلنا وهذا الجيل .. يا ستي الحبر ده كترت ما موجود لما بنرسم بيهو ما مجاني ....خليهم يتنحننو مافيها حاجة على الاقل بتشيل ليهم السخانة الفي الرجلين من كترت اللف والخلط


#320054 [جن]
4.00/5 (1 صوت)

03-31-2012 06:12 PM
والله يا بت الجنيد الشباب قالو وكت ما لامين في العرس اليلمو في حنتو (بكسر الحاء‏)‏ زي المرا وكت تعدم اللحمة بتلقيها تعافر تفتش لمكعب الماجي و دا اصطلاحآ بسمى بـ (ضواقه و عدم شوف‏)‏



ـــــــــــــــــــــــــ


بالله هسي يا سومة الشفقه ليهم شنو ياخ نحنا كايسين للتخارجنا وما لاقين.. والله صحي


ردود على جن
Saudi Arabia [ابوبكر] 04-01-2012 04:36 PM
كدي يا جن اكتب لينا اسمك بالكامل عشان قصة والله صحي دي .. كان ما لقيتم لابدين ليك وراء الباب بالمفراكة


أسماء الجنيد
 أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة