04-04-2012 11:42 AM

ساخر سبيل

تشليح محلي

الفاتح يوسف جبرا

كتبنا من قبل منبهين إلى خطورة لجوء بعض المواطنين إلى بيع أعضائهم وبخاصة (الكلى) وقد رأيت بعينى كيف ان هذه التجارة تزدهر منذ سنوات في (القاهرة) بل لقد أصبح لها مقاهى بعينها يرتادها البائعون والمشترون والوسطاء وهنالك من القصص المحزنة في هذا ا...لأمر ما يقطع نياط القلب (لو فضل فيها نياط) !
قلنا وقتها أن (أمنا الحكومة) يعني ح تعمل شنو عشان توقف عمليات التشليح دي ؟ فالجريمة تتم خارج الحدود ، أما أن تنتقل (القصة) ويكون عندنا (تشليح محلي) تحت بصر المسئولين بل أن هذا التشليخ يتم في مستشفي يمتلكه وزير الصحة الولائي (ذاااتو) وأمنا الحكومة تسد دى بي طينة ودى بي عجينة (وتعمل رايحة) وكأنو (مافي حاجة) فهذا والله لم نسمع به في الأمم الغابرة !
فقد اوردت الزميلة (الوطن) في عددها الصادر بتاريخ 2 أبريل 2012م انها قد تحصلت على معلومات خطيرة حول عملية نقل وزراعة كلية طرفها شاب سوداني والطرف الآخر أجنبي حيث تمت العملية بمستشفى الزيتونة بالخرطوم التي تتبع ملكيته إلى الدكتور مأمون حميدة وزير الصحة الولائي وتحت إشراف أحد أشهر الجراحين في مجال نقل وزراعة الكلى وقد تسللت (الصحيفة) إلى المستشفى المذكور وتحدثت إلى الشاب (البائع) الذي أفاد فيما أفاد بأنه لا صلة ولا رابط بينه وبين الأجنبي المتبرع له،بل انه حتى لايعرف حتى اسم الطرف الثاني في العملية مضيفاً بأن المسألة برمتها عملية «بيع وشراء» حيث تم الشراء بمبلغ «50 1 مليون» جنيه بالقديم
توقع العبدلله أن هذا الخبر سوف (يقوم الدنيا) وسوف يهب علماء (السفر) بإصدار فتوى وبيان حول هذه الجريمة غير الإنسانية وان السلطات سوف تباشر إجراءآتها وتحرياتها حول الواقعة وسوف يسارع السيد وزير الصحة و(مالك الزيتونة) بإصدار بيان للناس يوضح فيه ملابسات الخبر وينفي فيه علم المستشفي التى تمت فيها العملية بهذه (البيعة) !
ولكن أياً من هذا لم يحدث ومرت المسألة مرور الكرام مما يفيد شرعية وقانونية (الموضوع) إذن لا تتعجب عزيزي القارئ إذا تعدت عملية البيع والشرأء (الكلي) إلى كامل بقية الأعضاء وإمتلأت الصحف الإعلانية بأسماء وعناوين ومستشفيات الشركات المتخصصة قي بيع الأعضاء فهذه شركة (يا سارية) لشراء وبيع (ألاضنين) .. عضان (كومبليت) .. إذن خارجية بس .. أذن وسطى.. طبلة .. ! شنو يعني لو مواطن باع ليهو أضان بي كم مليون وخلا التانية يعني ح يحصل ليهو شنو؟ اقل حاجة يستريح من سماع تصريحات المسئولين وسماع الغناء الهابط والإزعاج بتاع اليومين ده!
أما شركة (الحلقوم) فقد تخصصت في شراء وبيع (الحبال الصوتية) هو ذاااتو المتكلمين ليها شنو؟ ما أهو قاعدين نتكلم ونسال (خط هيثرو أخبارو شنو) ومافيش زول قاعد يهببوا لينا .. بلا (حبال) بلا كلام فارغ .. إنتا قايل نفسك (هاني شاكر) يعنى حبالك دى لو خليتا ح تدفع ليك متأخرات الإيجار وللا رسوم الجامعات وللا الأكل والشراب البقى غالي ده !
أما شركة (تبصرون) فهى متخصصة في شراء (أسبيرات العيون) وبيعها لمن يعانون .. كل أنواع الشبكيات والقرنيات والعدسات الملونة والعادية .. أيها المواطنون يا افراد لشعب السوداني الفضل الشايفين ليها شنو؟ من لا يملك (قرنيته) لا يملك قراره .. أهو تاخد ليك مية ميتين مليون وتستريح من قراية الجرايد الكلها بقت فضائح دى !
أما شركة (شريان الحياة) فقد تخصصت في شراء (الشرايين) والاوردة وبيعها لمرضي القلب والجلطات (المرطبين) العاوزين يعملوا غمليات (بايباص) .. يعني ح يحصل ليك شنو لو بعتا ليك ياردة ياردتين من شريان (كراعك الشمال) وحليت مشاكلك؟ شريان كراع ايه اللي إنتا جاي تقول عليه ؟ إنتا قايل نفسك (رولاندو) وللا (ميسي)؟

كسرة :
بالطبع لن تكون هنالك شركات (مخ واعصاب) لأنو الشعب كلو مخو بقى تالف وأعصابو بايظة وبيكلم في روحو وكده ... بالطبع لن تكون هنالك شركات لشراء وبيع المرارة عشان مرارتنا إتفقعت من زمااااااااااان

كسرة ثابتة :
أخبار خط هيثرو شنو؟



تعليقات 42 | إهداء 2 | زيارات 5807

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#324561 [ود عويضة]
0.00/5 (0 صوت)

04-05-2012 11:59 AM
أنا عندي فكرة واقتراح - لناس مستشفي الزيتونة - يمشوا (جنوب كردفان ) ويعملوا صفقة مع احمد هارون - ويراجعوه في سياسة (امسح - أكسح - قشو- سلمنا نضيف -ما تجيبو حي....) ويتفقوا معه على شراء كلى الأسرى مقابل إيوائهم - وغسل دماغهم - حتى يتحولوا إلى الدفاع الشعبي وحماية تلودي
كسرة
اتوقع تصريح لوزير المالية يؤكد فيه ان عوائد شركات الأعضاء البشرية (سارية واخواتها ) – بفضل الله قد غطت عوائد البترول


#324530 [ود عويضة]
0.00/5 (0 صوت)

04-05-2012 11:26 AM
هل تعلم يا الفاتح ان أموال بيع الأعضاء البشيرية - محظورة دوليا- تدخل ضمن عمليات تبييض الأموال كالمخدرات والأسلحة - وبما ان السودان فالت - وليس له نظام مالي ولا عملة محترمة - ويحتل مركز متقدم في الفساد العالمي – بفضل عصابة محترفة مطلوبة للعدالة الدولية - يفعلون السبعة وذمتها ولكن باسم الدين
كسرة :
أعرب الكلمات ( امسح ، اكسح )


#324316 [ود الجد]
0.00/5 (0 صوت)

04-05-2012 08:54 AM
والله يا استاذ ضحكتني وانا زعلان ,لكن في شركة مهمة انت نسسيتها شركة تذكرون لبيع ال...علشان الجماعة يتزوجوا مثني وثلاث ورباع اصلوا ناس امنا الحكومة معظمهم مواسير
حلوة دي يالفارس بس شنو مواسير دي
آمل ارسالها لمعجم مصطلحات بني الجنيد


#324181 [لتسالن]
0.00/5 (0 صوت)

04-05-2012 05:19 AM
اجبرتني علي الضحك يا جبرا رغم شر البلية.


#324132 [تفتيحة]
0.00/5 (0 صوت)

04-05-2012 01:31 AM
اقترح على مستشفى الزيتونة تخصيص طابق كامل لانشاء بنك لقرنيات العيون وزراعتها ..وتصديرها ..

اهو كلو مكسب .. وعين واحدة كفاية مع الملايين دى وعيشة السواد ..


#324095 [ابن السودان حافى]
0.00/5 (0 صوت)

04-05-2012 12:17 AM
يا استاذ جبره موضوعك ده حاصل حاصل حاصل وعلى الطبيعه وفى ارض السودان وهنالك تجاره اعضاء فى السوق الاسوده وموجوده فى عاصمة السودان الخرطوم والمستشفيات الكبرى وفى عيادات بعض الدكاتره عديمى الضمير وانا عندى الدليل واقولها عندى الدليل الف مره عزيزى الاستاذ جبره تم اختطاف بنت من قريتنا وتم نشر قصتها فى الجريده وفى صحفه كامله .
الحمدالله تم تحريرها بقدر قادر وبمعاونة اهل القرية كلها حيث كانت نفره سريعه جدا فى كل الاتجاهات وكان التركيز على ولاية الخرطوم وبحمدالله تم تحريرها قبل الوصول الى تفيش سوبا بالسلامه وحينما تم سؤالها عن من اختطفوك اشارت الى ان رئيس العصابه بيتكلم بلهجه شاميه ومن ضمنها (بدى مصارى) يعنى يكون فلسطينى او سورى واو لبنانى وانا ارجح بأنه فلسطينى لان الفلسطينيين حينما أتى بهم نميرى بمنطقة شندى عملوا بلاوى حتى تم توطينهم فى منظقة البحر الاحمر .
بنتنا قالت مختطف معها طفل وحينما تتذكر موفق وحالة الطفل تصاب بحالة اغماء وهى الان مصابه انهيار عصبى منذ ذلك الوقت كما قالت بأن معهم سودانيين وأمرأه واحده وكان الشامى هذا يتكلم بالجوال مع شبكته عن المختطفين (وين نوديهم البيت ولا المستشفى) يعنى معنى هذا الكلام ان هناك مستشفى ودكاتره وشبكه كبيره جدا جدا كمان ان ظاهرة اختطاف الاطفال هذه تم الاشارة والتنبيه اليها فى معظم الجرائد ولكن لا حياة لمن تنادى هذه الظاهره موجوده حتى الآن لكن لا أدرى لماذا الحكومه قاضه طرف نظرها عن هذه الظاهره لذلك يااستاذ جبره ارجو ان تخصص اسبوع بالكتابه فى عمودك الاسبوعى بالراكوبه عن هذه الظاهره حتى ولو تكون فى كلمتين (ذى خط هيتروا اخباروا شنو) يكون (ثلاجه تشليح اعضاء بشريه فى السوق مش السوده عديل تشتريها ذى اللحمه من الجزاره) ارجو للمره الثانية من الالستاذ جبره ان يكتب لنا لان قلمه وكتاباته تعتبر جريده لحالها لك التحيه والتقدير وربنا يطول فى عمرك .


#324063 [ودحماد]
0.00/5 (0 صوت)

04-04-2012 11:24 PM
وانت اخبارك ايه ياحسين


#324060 [نادر]
0.00/5 (0 صوت)

04-04-2012 11:15 PM
علماء السفر.
بالغت فيها يا استاذ جبرا
. علماء السفر ناس ( الي لاهاي منقلبون)
الله يديك العافية


#324059 [كوكادام]
0.00/5 (0 صوت)

04-04-2012 11:08 PM
الاخطر من كده هناك عصابات وشبكات عمت كل الاقاليم... والدليل سنار شدت 3 محاولات ونجحت 1 وفشلت 2 وماخفي اعظم.


#324042 [الزمن الأغبر]
4.50/5 (2 صوت)

04-04-2012 10:32 PM
طيب أهو المشكلة أتحلت كلية زايد قرنيه دي براها 400 مليون


#324040 [wedhamid]
0.00/5 (0 صوت)

04-04-2012 10:27 PM
الاستاذ جبره...تحيه ...المره دى أنا مختلف معاك و أتفق تماما مع المعلق المحترم عبد الرحيم.....لازم تعرف يا أستاذ أن هناك فئة من المواطنين الأعزاء إبتلاهم الله بداء الفشل الكلوى (الإثنين) و المرض ده بلا و شفاؤه مستحيل و الطب بإجتهادوا قالوا يساعدوا المرضى بالغسيل و ده شئ مضنى و مكلف جدا وحياة المريض تكون قصيره ..... و فى العقدين الماضيين تم استخدام زراعة الكلى كخلاص من شقاء المرض اللعين ده و آمن للمتبرع لأنو ربنا خلق جوز كلاوى للشخص و يمكن دا حكمتو لشيلها للمحتاج كفضل الظهر و الكلوه الفاضله بتكفيهو بأمر الله ....و قد تكون مكلفه أبضا و لكن الحياة بعد الزراعه بتكون أطول و المعاناة قليله و لذا لا بد من عمليات الزراعة هذه لأنها ضرورة و ليست بالجريمة غير الإنسانية كما سميتها...وهذا الأمر يتطلب متبرع أيا كان بس الشرط أن يكون متوافقا و مناسبا للمريض و يفضل ذوى القربى طبعا للمجانيه ... و لاحظ أن أول عملية زراعه كلى لسودانى كانت للبروفيسور الطبيب عمر بليل رحمة الله عليه و المتبرع شقيقه صديق و تمت فى لندن و توفى بعد عمر طويل أكثر مما تحدد و بمرض تانى.... و تصور العمليه دى بقت تجرى بشكل روتينى فى بعض البلدان منها الهند و الباكستان و تركيا و مصر ذاتها و المرضى بيسافروا بأعداد كبيره ( بالله أمشى قنصليات البلدان دى و أسأل عن أعداد طالبى تأشيرات الدخول ليهاو كلهم مرضى فشل كلوى و قارنا مع السنوات الماضيه)و أكيد مابصحبتهم متبرع من الاقارب و هم هناك بيلقوا البائع إذا جازت التسميه...و أما عن تبرع المواطن دا فقد دفعتو الحاجه الملحه و و الله المبلغ فعلا مغرىو يثير الحسد يا صاحبى و المريض صاحب حاجه ملحه وفى مقدرته الشراء راضيا بحر إرادته فليه عايز تسلط الحكومه و المفتيينبتاعين السلطان المفترين ديل عليهو ؟؟؟


#324033 [sabra150]
1.00/5 (1 صوت)

04-04-2012 10:12 PM
ياجبرا عاوز ابيع البتاع ،
موصفاتة
الحاله وسط
بيقوم يشمة
السعر 200مليون بالجديد


#323968 [الفارس]
0.00/5 (0 صوت)

04-04-2012 08:26 PM
والله يا استاذ ضحكتني وانا زعلان ,لكن في شركة مهمة انت نسسيتها شركة تذكرون لبيع ال...علشان الجماعة يتزوجوا مثني وثلاث ورباع اصلوا ناس امنا الحكومة معظمهم مواسير


#323946 [azrag sharfa]
0.00/5 (0 صوت)

04-04-2012 07:42 PM
والله الكسرة الثانية دي انا براي عملت لي هاجس في قرايتها عليك الله اعمل ليها تبديلات فنية يعني مرة كدي تقول هيثروا اخبار الخط شنو
ومرة شنو خط هيثروا احبارو
ومرة هيثروا اخبار خطو شنو
ومرة خط اخبار هيثروا شنو
انا ماعارف الناس المسعولين ديل بقروا الكسرة الثابتة دي ومرارتهم ما بتنفع ذي مراراتنا اللحقت امات طه


#323917 [عبدالحميد]
5.00/5 (1 صوت)

04-04-2012 06:32 PM
زمان قالوا لمحمد توفيق الواو الكارب دا بتجيبو من وين ؟ رد : بذمتكم الحالة العلينا دي ما اقوي من اي واو ؟ بعدين جبرا وصلاح عووضة ديل سجناء دون زنزانات ! كل خطوة بحساب ! والما بسطل شنو والله قفة الملاح بقت هيروين عديل .


#323905 [حسن]
4.25/5 (4 صوت)

04-04-2012 06:16 PM
الاستاذ الفاتح

لك التحايا
أجمل ما أعجبني (نياط القلب) بالله جبتها من وين دي!!!!!!!!!!!
وبهذا الفهم عايزين شركة لبيع (نياط) القلب عشان الجماعة الذين تم قطع
نياطهم يستطيعون الحصول علي نياط سكند هاند

وأخبار الخط ( القطع نياط قلبا) شنو!!!!!


#323873 [ayman]
5.00/5 (1 صوت)

04-04-2012 05:35 PM
اهم حااااجه الجماعه اياهم الزول ده الذكاة ولا لأ


#323865 [الزول الكان سَمِحْ]
5.00/5 (2 صوت)

04-04-2012 05:27 PM
يا استاذ

اليومين ديل الظاهر التجليات دى..من الصنف البيصادروه ( النظاميين ) ويعملوا بي نايمين


#323752 [ابو مبارك]
5.00/5 (2 صوت)

04-04-2012 03:24 PM
ايه رايك ياجبرا مع كل كسرة هيثراوية جديدة تضيف ليك واو في كلمة شنوو ؟
نحسب بيها عدد الكسرات الهثراوية


#323750 [سودانية]
4.50/5 (4 صوت)

04-04-2012 03:22 PM
انا ماعارفة انت ليه مصر تدعو الحكومة ب(امنا الحكومة)...ياخى حتى لو بتستهزأ كلامك ده فيهو اساءة للامومة كمعنى وللامهات بشكل عام ...ياخى تانى يااستاذ قول امناالغولة عشان يبقى اسم على مسمى


#323748 [كلوكلو]
5.00/5 (1 صوت)

04-04-2012 03:20 PM
سلام ياجبرا سامعني سلام سلام سلاااااااااااااااااام ... الليلة دي قوية ياجبرا جبتها من وين؟ أخوك ممكون يا جبرا ألحقنا ولو بنفس.


#323705 [مهاب الفاتح]
5.00/5 (1 صوت)

04-04-2012 02:43 PM
بعد التحية والسلام استاذى والله البلد دى بقت زى اليس فى بلاد العجائب المشكلة كل يوم تلاقى دراما شكل نمرق من الفتاوى الشرطيه نخش فى يامسافر وناسى هواك مرتباتنا وحوافزنا معاك ننسى شوية يجى المحترم الفساد ناطى لاكن دا كلوا كوم وبقت الشغلانة تجارة اعضاء يبقى اى حد يخلى بالوا من لغاليقوا انا مش مسئول وبالمناسبة اذا عرفت حاجة عن خط هيثرو ادينى خبر رغم انوا ما اظن يحصل بس الواحد يكون عارف وكده


#323686 [محمد عادل]
5.00/5 (1 صوت)

04-04-2012 02:26 PM
كلامك صاح ....
خط هيثرو البتسآًل عنه دا اتباع من زمان و ما حيرجع تأنى ، ومافى داعى تتعب نفسك وتسآل عنه
اصلو سودانير كانت موقوفة عن الهبوط فى اى مطار بريطانى قبل بيعها لشركة عارف باكثر من سنتين!!! و ذلك بسبب مديونتها لشركة مطار هيثرو بما يذيد عن ثمانين الف جنية استرليني عبارة عن غرامة تاخير ومناولة وغيره، ومافى داعى للف والدوران لانه حتى لو عاد الخط لسودانير فلن تسطيع الهبوط!!!

اضافة الى حظر كل الطائرات المسجلة في السودان من التحليق في الأجواء الاوربية بموجب قرار المفوضية الاوربية الصادر فى مارس 2010م ، بسبب فشل الطيران المدني من تحقيق ادني نسب السلامة الجوية المطلوبة فى اصدار التراخيص لصلاحية الطائرات المسجلة لديهم.....
ومافي داعي تنفخ في قربة مقدودة......*


#323684 [ابو دعد]
5.00/5 (1 صوت)

04-04-2012 02:25 PM
رغم ما تحمله مقالاتك من روعة وفش غبينة إلا أننا كونا لجنة أنصار الكسرة الثابتة ونسألكم الثبات وعدم الرخرخة وأن تبقى كسرتنا الحبيبة حتى آخر رمق (رمقنا نحن ما رمقك انت عشان تتطمن)


#323683 [جن]
5.00/5 (1 صوت)

04-04-2012 02:24 PM
طيب وكت الجماعة راغبين في عمل الخير ما يشوفو لينا شركة يتناسلون .. يوجد عريس جديد .. وضعية غيار الحركة مزرقنه في الـ N ..‏!‏‏!‏


#323679 [ود الحاجة]
5.00/5 (2 صوت)

04-04-2012 02:20 PM
شكرا لكاتب المقال بحق هذا المقال هادف

اقترح أن تسمي عمودك ساهر سبيل فيبدو أنك من الساهرين على مصالح الناس


#323627 [abdelrahim]
0.00/5 (0 صوت)

04-04-2012 01:47 PM
مشكلة الشعب السودانى ومعظم الشعوب لا تسمح بنقل الكلى إلا من الاقارب وهذه جهل وعدم معرفة فعلاج الفشل الكلوى الزراعة ، اذن لا بد من متبرع حى يرزق (المتبرع الميت لا يوجد فى السودان) من أين يجد صاحب الفشل الكلوى المتبرع اذا لم يجد بين أقاربه من يتبرع له او من مطابق له ، اذن لابد من ايجاد وسيلة أخرى والوسيلة الاخرى هى وجود متبرع أخر ولكى لا تكون العملية بيع وشراء يجب تقنين ذلك ، اود ان اسأل هنا سؤال هل الدية ثمن المتوفى او التأمين بالطبع لا ولكن على سبيل التعويض ، عندما تصاب فى العمل ويتم تعويضك عن الجزء المصاب هل هذا ثمنه بالطبع لا ، اذن عندما يتبرع شخص بكلية مثلا يجب ان ينال تعويض على ذلك وان تكون هنالك جهة ترعى المتبرع ، وهذا ما سوف اسعى له بتكوين جمعية خيرية للقيام بهذا العمل لحل مشكلة زراعة الكلى ، ولى تجربة شخصية فى هذا المجال ، حيث اجريت لى عملية زراعة كلى ،ولدى الكثير من الافكار وقد وضعت الخطط واللمسات الاولية وان شاء الله بدعمك ترى النور قريبا ، وكل من لديه افكار نيرة لدعم الفكرة ارجو ان يتواصل معى على بريدى
arahim62@hotmail.com


#323620 [مغبون]
5.00/5 (2 صوت)

04-04-2012 01:37 PM
نتيجة طبيعية ومنطقية لسياسات الدولة الرسالية وفسادها ..وضع بائس وسوداوى وعبثى نحن نعيشه؟؟؟بالتاكيد هذا الشاب (مكره لا بطل)!!يضحى من أجل حاجات اجبرته على ذلك ولا شك ؟؟أن وراء ذلك الاضطرار قصص حزينة ...نتمنى أن نعرف أكثر عن الدوافع وكيف تم الامر من مصدر قريب له ..لا بد أن هناك حقائق مذهلة واسرار خطيره وكبيره ..هى لله ..هى لله ..وليعد للدين مجده


#323602 [Abu Hadi]
5.00/5 (1 صوت)

04-04-2012 01:20 PM
بيع اعضاء واين؟؟ في مستفشى وزير الصحة الولائي الذي قال سيعمل على راحة المواطن؟؟ (يا دوب فهمت كلامه انو عايز يريح البلد من الشعب الفضل !!! ويركب ماكينات وفلاتر ومصافي سودانية لاجانب والمخ اصلي لانه اذا فكر في المخ يكون ما عمل شيء ..

شوف يا عمنا الناس بتفكر في شنو وانت بتسأل عن خط في الهواء الطلق لا يرى بالعين المجردة؟؟؟ فرق

يعني الصناعة (جاك بلاء) محلات تشليح بشرية والحكومة نائمة والشعب يعيط


#323600 [عثمان]
5.00/5 (1 صوت)

04-04-2012 01:19 PM
الاستاذ جبرة

تعليق صغير مع كل الاحترام
حقو توقف الكسرة الثابتة شوية.. لأنو الجماعة كدة جلدهم تخن

لك الود والتقدير


#323595 [hla]
5.00/5 (1 صوت)

04-04-2012 01:14 PM
we need to sell our soul if you find agent tell us because we are ready


#323589 [اوطان]
5.00/5 (1 صوت)

04-04-2012 01:11 PM
والله ياجبرا كل شى كتبت فيهو وحذرت منو هسى حصل قبل مانطلع من موضوع التشليح المحلى ده نط لينا موضوع المدينه الرياضيه كمان يعنى التشليح المره دى بالقانون زاااااااتو حق البلد


#323582 [محمد النيل]
5.00/5 (1 صوت)

04-04-2012 01:07 PM
المائه وخمسين مليون دى ياجبرة بعد شويه بدل الكليه حتجيب ليها نص دسته زولات بالوضع الحاصل ده وبدل إضنين وكلى وكمونيات وتشليح وتلتله قارغه يبيعوهو ليك كامل وإنت امشى شلحوه بطريقتك وحتظهر ليك إعلانات زى(اشترى إثنين وخدالثالث مجاناً) او (خدمة التوصيل لكل الدول مجانا) وربك يستر ما يجى يوم الراجل يسأل من واحد من اولاده تقوم المرة تقول ليه (بدلناه بخلاطه)


ردود على محمد النيل
Spain [كلام صاح] 04-04-2012 08:32 PM
نعم اخونا محمد النيل
انت قايل الشفع البسرقوهم ديل بودوهم وين؟؟
تجارة البشر رائجة فى كل العالم
بس اقرأ المقال التالى للبروفيسور معز عمر بخيت

http://www.alnilin.com/articles-action-show-id-4968.htm

نسأل الله اللطف


#323566 [ابو الهول]
5.00/5 (2 صوت)

04-04-2012 12:54 PM
..وشركة (تتضاربون)لبيع الايدي ..يعني شنو الايدين ..ما ايد واحدة كفاية ..والقون صفاية ...عايز تضارب بيها منو ؟؟تجيب ليك مشاكل سايت ..
وشركة (تلحسون ليمتد)ودي اعضاء غالية شوية ..اللسان ..بيعوا ياخي وارتاح ..ماكفاية القلتو لحدي حسي ..في زول سمع كلامك ..هسي خط هيثرو ده في زول بقول وراك ؟؟؟بيعوا واشتغل اشارات ..احسن وفي قطع لسان سيوبر ...وجميع الانواع (ثرثار..قوال..غناي..شماراتي..سياسي...)ملاحظة :الشركة ليس لها علاقة بلحس الكوع وما عارف ايه..
وايضا شركة.... (تتناسلون..) ويعني شنو يعني يا دكتور دي دايرة شرح ...كفاية كدة المهم عندنا كلو قطع الاسبيرات الاصلي ..والتجاري ...الخ


#323565 [النصيحه حارة]
5.00/5 (1 صوت)

04-04-2012 12:54 PM
يا استاذ لو لقيت لى زبون انا عندى كليه ونص كبده وعين واضان بى اختصار اى حاجه ممكن تتباع انا مستعد بس البيع بالدولار او مايعادله بسعر السوق الاسود ههههههههههههههههه


#323558 [مجنون ليلى]
5.00/5 (5 صوت)

04-04-2012 12:48 PM
هههههههههههههههههههههاااااااااااي

والله يا شيخنا الليلة قطعت مصارينا من الضحك

وبالمناسبة دي في شركة اسمها (تمصرون) متخصصة في بيع وشراء المصارين ،يعني حيحصل شنو لو بعت ليك متر مترين من مصارينك الاصلن فاضية طول اليوم ، اهو ترتاح من كواريك بطنك طول الليل ( من الجوع ) وترتاح من هم الوجبة (الواحدة) وتستغنى من حاجة اسمها اكل وتمشى حالك بالطاقة الشمسية الحارقانا طول اليوم بدون فائدة خصوصن لو كنت مصلع عشان الصلعة مستفبل جيد للطاقة الشمسية وفي الحالة دي تقدر تستغنى من لفة المصارين بالكامل وانت مرتاح ...




مجنون ليلى والهلال


#323547 [أبو أواب]
5.00/5 (1 صوت)

04-04-2012 12:40 PM
والله يا ود جبرا

الكيزان ديل لو إضطريت تبع روحك ذاتها ما بهببو ليك خليك من إسبرات وقمع غيار


#323541 [زووول]
5.00/5 (1 صوت)

04-04-2012 12:37 PM
أهاهاههههههااااااهههه والله ياجبرة انت مابراك ياخى أنا شغال أقرا واتفتفت من الضحك لمن مرارتى زاتا إتفقعت وانت السبب يعنى كدا أنت حتكون ضيعت على 200 مليون وعندى كمان وريد انقطع ودا براه 100 يعنى دى 300 مليون ودرتها على ياخى بعد كدا الشغالين ليها شنو ومودرين عمرنا فى السفر وجهاز مغتربين خلاص نجى نعرض لينا كم إعلان كدا فى شركاتكم دى يمكن العطاء يظبط وهو زاااتو نحن عندنا كم عمر مش واحد خلاص نقضى باقى عمرنا دا فى نعيم بالملايين دى ونبرد اضانا ...


#323539 [صالح عام]
5.00/5 (2 صوت)

04-04-2012 12:32 PM
هسى الشاب ده جبتو ليهو مشكله مع ناس الضرائب وناس الزكاه حيجو يشيلو حقهم


#323527 [محمد سكر]
0.00/5 (0 صوت)

04-04-2012 12:21 PM
يادكتور وزير الصحه مامون قبل يومين وفى احد القنوات قال بيديه قاعد ليكم يكون شغال تشليح فى اعضاء هذا الشعب المغلوب على امرهوحسيى الله على الكيزان الفاسدين


#323522 [عمر حسن]
5.00/5 (2 صوت)

04-04-2012 12:18 PM
(يا سارية) لشراء وبيع (ألاضنين) .. عضان (كومبليت)

هاهاهاهاهاه دي قوية والله
عجيب شوية النهار ده يا جبرة


#323507 [ابو احمد]
0.00/5 (0 صوت)

04-04-2012 12:05 PM
بالله عليكم الله ده كلام ده ؟؟؟
بعدين موضوع بيع الأعضاء ده شيء عادي أنا شايفو !!
الحكومة دي هي قادرة توفر شيء للمواطن عشان هو مايقدر يبيع أعضاءه وكل البحصل ده غضب إلهي !!
كدي بس نلقي نظرة على قنواتنا التلفزيونية ونشوفها قعد تبث لينا شنو غير الغنا والخلاعة والمذيعات المتبرجات تبرج الجاهلية !! والمسئولين الشايلين عصايتم ويعرضوا مع البنات ويرقصوا بالله كدي قولوا لي كيف الرحمة تنزل وولاة الأمر ده حالهم (لايغير الله مابقوم حتى يغيروا مابأنفسهم ) ...
وطبعا شعبنا المغلوب على أمره في غفلة من أمره الحكومة تلهي فيهم بالمهرجانات الغنائية والليالي الغنائية والشيء العجيب إنو الحكومة تقول إنو ليها (مشروع حضاري إسلامي ) ومن عام 1989م وحتى الأن هل ياجماعة شوفتوا ليكم زول طبقو فيهو حد ولا شريعة ... غايتو أنا بقول الله يستر والبلد ماشة في طريق مظلم وشائك ...
والسلام ....


ردود على ابو احمد
Saudi Arabia [ابن السودان حافى] 04-05-2012 12:27 AM
مين قالك بيع الاعضاء البشريه عندنا عادى ياابواحمد الاستاذ جبره يدق نافوس الخطر وان لم يذكر ان هنالك عصابات دوليه موجوده من ضمن الاجانب الدخلوا البلد الهامله دى بعد 1989 تحت عبائة استثمار الواحد يفتح ليهوا مطعم ويقول عندى استثمار وهو زعيم عصابه لاختطاف الاطفال وتشليح أعضائهم وبيعها فى السوق الدوليه وهنالك دلائل كثيره جدا اعتقد ان بعض مسشولى حكومتنا ضالعين فيها وربنا يكذب الشينه .


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة