قرد الطلح..!!!
04-07-2012 04:50 PM

بالمنطق

قرد الطلح..!!!

صلاح الدين عوضة
[email protected]

* وإذ يُذكرنا مهندس سياسة البكور بـ(فعلته التي فعلها) - خلال حواره مع "الجريدة" قبل أيام - فإننا نُذكره كذلك ببعض الذي كتبنا في هذا الصدد ..
* فإن كان الفيلسوف الألماني (كانط) قد قال أن شيئين يملآن نفسه بالإعجاب ؛ (السماء المرصعة بالنجوم والقانون الخُلقي في نفسه) ، فإن شيئين يملآن نفس عصام هذا بالإعجاب كذلك ؛ (سياسة البكور وصمغ الطلح) ..
* فليت الدكتور عصام صديق يُريح أدمغتنا (شوية) من حكاية الصمغ العربي (دي) ويبحث لنا عن حل- أولاً - لورطة البكور التي سواها وما خاف عقباها..
* صحيح أنّ ابن صديق حلف برب البيت أنه لم يتخذ قرار إخراجنا من (شبكة!!) التوقيت العالمي لنضحي (مشاترين!!) حتّى في الزمن، بيد أنه لم ينفِ أنّ له أصبعاً في مسألة (البعبصة!!) بعقارب الساعة..
* أوعلى الأقل هو لا يستطيع أن ينفي أنه (دوشنا) حيناً- إبّان استوزاره- بقضية البكور بمثلما (يدوشنا) بقضية الصمغ العربي هذه الأيام ..
* وما نحمد الله عليه - في هذا الخصوص - أن الدكتور عصام ليس مستوزراً الآن وإلا لخشينا أن يُصدر قراراً رسمياً بفرض (كعكولين) صمغ عربي على المواطن قبل (الفول!!) وبعده حتى (يلزق) بالمعدة فلا ينهضم طوال اليوم ترشيداً للانفاق الغذائي..
* وأخونا عصام هذا الذي نعرفه يمكن أن يفعلها لأنّه (ما بهزّرش) ..
* ويكفي مثالاً على ذلك - بخلاف اللعب بعقارب الساعة - أنّه يسعى جاهداً لاقناعنا بأنّ شجر الطلح الذي أشار إليه القرآن بقوله: (وطلح منضود) يمكن لصمغه أن يشفي الإنسان من السكري والقاوت والضغط والأرق والفتور و(العجز!!) ..
* ولكن ما لم تتضمنه روشتة الدكتور عصام الصمغية هذه حالة مرضية يعاني منها غالبية أبناء الشعب السوداني اسمها (الإكتئاب!!)..
* وربما تتفتق عبقريته هنا عن علاج للحالة المشار إليها لن يبحث عنه بعيداً عن شجرة الطلح بالتأكيد..
* علاج يتمثل في (قرد الطلح!!) بما عُرف عن فصيلة القرود هذه من قدرة على الإضحاك..
* وقبل أن يتلقف أخونا عصام هذه الفكرة ويضيفها إلى دراساته المطوّلة عن صمغ الطلح نقول له إن جانباً من حالات الاكتئاب هذه لدى الشعب سببها البكور..
* فالشعب (اتلخبط) زمنه بمثلما أنّ أحواله الأخرى هي (متلخبطة) أصلاً ..
* فإذا ما أُلغي البكور فإنّ (التايم!!) الخاص به سوف (ينضبط) تماماً مثلما يقول الـ(ميكانيكية) عن السيارة التي (تايمها)- أي زمنها- (مُفوِّت)..
* أفلا يكفي الشعب أن يكون (خارج الشبكة) سياسياً واقتصادياً وإعلامياً و(تمكينياً!!) حتى يضحى خارج الشبكة زمنياً أيضاً؟!..
* فالسودان هو البلد الوحيد الآن من بين بلدان العام الذي له توقيت زمني (مشاتر!!) عن ذاك الدولي المتعارف عليه..
* ثم إنّ الحكمة من البكور لم تتحقق لأنّ الحكومة نفسها هي أكبر مهدد (زمني!!) له بما تفرض على الناس من عطلات و(احتشاديات!!) و(مسيرات!!) من شاكلة التي شعارها ( أم ضريوة تحذر أمريكا تحذيراً أخيراً !!) ..
* أمريكا هذه التي ( حجبت!!) عنا شفرةً - قبل أيام - فتم ( حجب!!) مصنع سكر بحاله ..
* أو على الأقل ؛ تم ( حجب!!) الإحتفال الخاص بافتتاحه ..
* فيا أخي عصام صديق: نستحلفك بالله أن تدع الصمغ العربي و(الشأن العربي!!) وكل ما هو عربي، وتعمل على اقناع (جماعتك!!) هؤلاء بأنّ البكور كان مجرد (هوجة) من (هوجات) الاستوزار الأولى من منطلق (الجديد شديد!!)..
* نستحلفك بالله الذي تسعى إلى دخول جنته لتنال- ضمن ما تنال- من (طلحها!!) المنضود أن تترك الطلح، وصمغه، وعوده، وقرده، وتركّز (معانا شوية) في مسألة (الشتارة) الزمنية هذه التي تزيد من حيرة العالم تجاهنا..
* نستحلفك بالله (الشافي) يا دكتور أن (تشفنا) أولاً من داء الإحساس بعدم الانتماء الزماني ثم تعود مرة أخرى إلى ما تخشى علينا منه من قاوت وسكري ومصران و(عجز!!)..
* فـ(العجز!!) الحقيقي هو (العجز!!) عن تصحيح الأخطاء..
* فإن فعلت؛ فإننا نعدك أنّ كلاً منّا سوف يُسمي نفسه (طلحة!!!!).



تعليقات 30 | إهداء 0 | زيارات 5611

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#327323 [الغضنفر]
1.00/5 (1 صوت)

04-08-2012 04:25 PM
سلام يا ابن عووضه

كنت أعتق أن الطلح المنضود المذكور في القرآن هو شجرة الموز. تاريه عندو معنى تاني عند جماعة المؤتمر الوطني


#327194 [عيسي]
1.00/5 (1 صوت)

04-08-2012 02:19 PM
هو قال الصمغ يعني المن والسلوى وبيشفي من الامساك.. وعندما سألوهو كيف عرفت ان المن والسلوى هي الصمغ قال لأن القران ذكر ذلك..


#326958 [لسوداني]
1.00/5 (1 صوت)

04-08-2012 10:36 AM
الدكتور الماسورة مش عارف معني الطلح المنضود اول شي خلي يعرف
المعني المقصود في الايه الكريمه بعد داك خليهو يتفصح علي كيفو
قال دكتور قال ياخي دا فعلا ديك وتور

الولد البخاف القبيلة تلومو / دامر المجذوب / نهر النيل


#326821 [كركد كبير]
1.00/5 (1 صوت)

04-08-2012 04:51 AM
يا ( انداندي ) بتنفخ في قربه مقدوده من كم حته كده ما من حته واحده !!!!! يعترف شنو دا قال انو امريكا زاتا غيرت التوقيت زي السودان !!! اتخيل وتحياتي ,,,,


#326813 [واحد]
0.00/5 (0 صوت)

04-08-2012 04:11 AM
اوجعته واضحكتنا


#326795 [mohamed hassan]
0.00/5 (0 صوت)

04-08-2012 02:48 AM
Dear Salah , the tree which brings Arabic gum Called ( Acacia tree) , but it doesn't mean what has been mentioned in qu-ra'nic verse . In Qu-ran it means banana , if Isam has understood the meaning as Arabic gum tree , then he was wrong and need to read more


#326770 [الياس قرني]
4.00/5 (2 صوت)

04-08-2012 01:43 AM
طلح منضود معناها الموز


#326755 [صلاح يوسف]
4.00/5 (1 صوت)

04-08-2012 01:25 AM
كلام في الصميم يا استاذ صلاح ولعل كلمة الشتارة التي وصفت بها حالنا الزمني تعبر تماما عن الواقع المخالف للتوقيت الدولي الذي لا اعلم السبب في التمسك به اللهم إلا إذا كنا نود أن نضع أنفسنا في خانة خالف تذكر مع مخالفاتنا التي تصلح لتذكرنا كثيرة وفايتة الحد


#326734 [مدحت عروة]
3.50/5 (3 صوت)

04-08-2012 12:53 AM
الطلح المذكور فى سورة الواقعة هو شجر الموز او مثله و اذا كان عصام صديق قال انه الصمغ يكون بالغ لكن ما تستغربوا الكيزان او الاسلامويون من اجهل الناس بالاسلام و الشرع الصحيح لكنهم شطار جدا فى تفسير الشرع لصالح تمكينهم السياسى فى الحكم و هم ابرع الناس فى الكذب بدون ما يرمشوا!! يا جماعة الناس ديل ما عندهم اى علاقة بالاسلام لا من بعيد ولا من قريب بس لقوه تجارة رابحة للتمكن السلطوى و المادى ما اهم قدامكم هنا فى السودان و الموضوع واضح وما داير ليه درس عصر!!! اخطر شىء على الاسلام هو هذه الجماعة بنى قريظة و الغرب معروفين وما ناكرين انهم اعداء للاسلام لكن المشكلة فى العواليق ديل و انشاءالله ياخذهم رب العالمين اخذ عزيز مقتدر بس انتو ادعو عليهم فى كل صلاة و سجدة!!!!!


#326724 [عاشق النامير]
5.00/5 (1 صوت)

04-08-2012 12:40 AM
طبعا يا ود عووضه الطلح عندو فوائد شايف الزول ده ما ذكرها
1- بشيل الرطوبه عند استعماله فى حفرة الدخان
2- وللنساء مهم و خاصة بتاع ابو روف
3- والرجال طبعا بعرفوا النوع الجيد اكثر من النساء
4- ليه؟؟؟؟ عشان اصلو بسوهوا للرجال
5- عشان كده اقترح للرجال الذهاب لشرائه
6- وهن بتموا الباقى
7- واتخيل انت جاى من الدوام التانى و من الشارع شايف الدخاخين زى بتاعت الهنود الحمر!!!!!!!!!!!!
8- امانه ما وقع راجل!!!!!!!!!!
9- وتعال شوفوا الاعتذارات
كل المقدمه ياناس ان (العمليه التنمويه) ما بتم فى ظرف اقتصادى الزول بكابس فيهو من الصباح للمساء وهووووى يانسوان الغبش رفقا بالرجال المضطهده اقتصاديا ونفسيا اما انتن يا الرجالكم مرطبين ما تقوموا منها وما بتجيكم رطوبه يا نسوان المرطبين والله يزيدكم رطوبه


#326714 [abumohyah]
4.00/5 (1 صوت)

04-08-2012 12:28 AM
أصلو الجماعة مصابين بعقدة ( التغييرات النميرية) فمثلماغير نميري العلم وشعار السودان و السلم التعليمي و اتجاه حركة المرور و زي القوات النظامية إلى آخره من التغييرات ، فهم ليسوا بأقل منه فكان لا بد لهم من فعل مثل هذه التغييرات أو أحسن منها فكانت النتيجة هذه التغييرات المشاترة في التوقيت (الذي هو محكوم بالموقع الجغرافي و خطوط الطول)و في السلم التعليمي و غير ذلك من التغييرات التي فعلوها خلال 22 عاماً و كان آخرها و أعظمها أن جعلوا من خريطة السودان شئ أشبة بالشلتوت الممزق...


#326712 [سفروت]
4.50/5 (2 صوت)

04-08-2012 12:24 AM
خليها مستورة يا ود عووضة .. يا ريت لو بقت على محن البكور بس ..
محن الدولار من 13 الى 5000 جنيه ..
محن التحرير الاقتصادى وافقار 95% من الشعب ..
محن الافساد الحضارى ..
محن بيع اراضى شارع النيل ..
محن سودانير و الحكومة الالكترونية مع شركة هاواى الصينية..
والامثلة تطول ..
فكل ينظر على هواه ولا بواكى على البلد ..


#326694 [شلاقة]
5.00/5 (2 صوت)

04-08-2012 12:01 AM
ما يثير الدهشة فى د. عصام هو توغله فى دروب شائكة خارج نطاق تخصصه العلمى ( نبات + طب + جغرافيا) وان كان يحمد له هذه الثقافة العالية .. وعن البكور فقد افتى وارغى اهل الشان بانتقاد تنظيره الخاطئ.. ولكن لا حياة لمن تنادى وكما قيل فنصف رايك عند اخيك .. واسالوا اهل العلم ان كنتم لا تعلمون الى جانب حكمتنا الشعبية ( دع العيش لخبازه ولو ياكل نصفه )..
لكن ما حيلتنا مع اولى الامر الذين ابتلانا الله بجهلهم ووصايتهم على خلق الله بالحق والباطل .. والمشكلة انهم بعد التجريب المتواصل والفاشل فى معظم الاحيان لا يثوبون لرشدهم لاصلاح ما افسده الدهر بايديهم كما فزورة التمكين القاتلة التى اقروا بفشلها بعد 23 عاما ..


#326688 [اسحاق خليل]
5.00/5 (1 صوت)

04-07-2012 11:53 PM
( أم ضريوة تحذر أمريكا تحذيراً أخيراً !!) ..دي الفيها مقابر ام ضريوة اعانك الله الله تخطي الازمات


#326618 [محمد]
0.00/5 (0 صوت)

04-07-2012 09:19 PM
محمد طلحة


#326603 [جادون]
4.00/5 (1 صوت)

04-07-2012 08:59 PM
هؤلاء الانقاذيون المواهيم افسدو كل شيء الزمن التعليم والعمله الاقتصاد المجتمع السياسة الخدمه الجيش الشرطه ال............................................................الخ.
قطر والامارات كل له توقيته الخاص حسب الوضع الجغرافي وخلافه فحشرونا بينهم حشرا رغم البعد الجغرافي المهول وهو الفيصل في عامل تحديد التوقيت وليس التدليس والنفاق.


#326563 [ود نيالا]
5.00/5 (3 صوت)

04-07-2012 08:10 PM
شديد يا ود عووضه في المليان الناس ديل جرو الزمن وجرونا نحن خمسين زاتو


ردود على ود نيالا
Sudan [كوكاب مشرشر] 04-08-2012 02:26 PM
والله ضحكت لامن اتفنقلت


#326557 [جنوبي]
5.00/5 (2 صوت)

04-07-2012 07:59 PM
زماااااان الفنان محمد سلام كان بقول : اريت يا زمن اكون عراف واشوف يوم بكره المابنشاف ..!! الزول بتاع البكور ده ورانا يوم بكرة بدون ما نبقي عرافين ...ونحمد الله بقينا نشوف بكره الليلة !!!
هسع لو كان خلوا الزمن زي ما هو وقدموا لينا وكت الشغل ساعة كنا قلنا ليهم لا ؟؟ لكن ما ياها عادتم لازم اللولوه ..


#326551 [ود الحاج يوسف]
3.00/5 (1 صوت)

04-07-2012 07:54 PM
اخى صلاح عووضة لك التحية ،،، الطلح المنضود المذكور فى القران ليس المقصود به الطلح بتاعنا بتاع ( الدخان ) ولكن طلح منضود مقصود انه منضود مثل الموز ( كما جاء فى كتب التفاسير انه الموز ) ،،، والله اعلم


ردود على ود الحاج يوسف
Saudi Arabia [واحد] 04-08-2012 04:17 AM
يا زول الموز ده العربان ما شافو ولا بعرفو


#326548 [IBN ASUDAN]
4.00/5 (1 صوت)

04-07-2012 07:51 PM
رائع،،، حقيقة البكور من محن الانقاذ،،،


#326545 [ابن النيل]
5.00/5 (2 صوت)

04-07-2012 07:48 PM
الاستاذ الفاضل عووضة
لك خالص التحايا والاحترام
اولاًفي قولك(...أنّه يسعى جاهداً لاقناعنا بأنّ شجر الطلح الذي أشار إليه القرآن بقوله: (وطلح منضود) يمكن لصمغه أن يشفي الإنسان من...)أحب أن اوضح لك بأن شجر الطلح المذكور في القران المقصود به شجر الموز أو ماهو مثله.والله تعالي أعلم.
ثانياً استاذي الفاضل هؤلاءال.... أفسدوا علينا ديننا ودنيانا... جهجهونا بتغييرهم للوقت والعملة من جنيه دينار إلي جنيه وبكرة مامعروف شنو؟؟؟ ياخي ديل غيروا البني آدم السوداني تاني في شنو؟؟!!عشان كده ياخوي ماتتعب نفسك ساكت مع قرد الطلح ده وأنا طوووالي بقول : وجه الدهشة أن يدهشني خلل في وطني المختل !!!! (أللهم عليك بهم فإنهم لايعجزونك)


#326536 [Shah Humaidah]
4.00/5 (1 صوت)

04-07-2012 07:25 PM
ما علاقة الصمغ العربى بالآية التى تورد "طلح منضود"؟ إن المقصود بالطلح هو الموز كما كان يعرف فى اليمن. قال ابن أبي حاتم : حدثنا أبو سعيد الأشج ، حدثنا أبو معاوية ، عن إدريس ، عن جعفر بن إياس ، عن أبي نضرة ، عن أبي سعيد : ( وطلح منضود ) قال : الموز . قال : وروي عن ابن عباس ، وأبي هريرة ، والحسن ، وعكرمة ، وقسامة بن زهير ، وقتادة ، وأبي حزرة ، مثل ذلك ، وبه قال مجاهد وابن زيد - وزاد فقال : أهل اليمن يسمون الموز الطلح . ولم يحك ابن جرير غير هذا القول.
هل هذا هو فهم علمائنا الذين يحتكرون المعرفة؟


#326521 [شخلول]
5.00/5 (2 صوت)

04-07-2012 07:04 PM
ياود عوضة خلينا من قصة الساعة اصلو فوتت من زمان كدا ورينا خبر المعتمد البفتش فى الكنز تحت بيوت الناس لقاه وله لسه شقال تكسير الحقوه بفلوس قبل يهدم حلفا ويهجركم تانى


#326520 [الزول الكان سَمِحْ]
4.00/5 (1 صوت)

04-07-2012 07:03 PM
الله ياود عووضة ...عوقتنى ( لكن العين مابتعلى على الحاجب)

لكن معليش ..الشاطر مرات يقع...الطلح المنضود فى سورة الواقعة المراد به ( الموز ) موز الجنة.

وعندنا يسموها ( سبيطة الموز )

وياجماعة القرد البقصدو أخونا عووضة ( قرد الطلح ) من أميز أنواع القرود لأنه يقفز فوق وبين أشجار الطلح دون أن يشاك بشوكة..وهو يمتاز بغزو أعشاش الطيور التى تبنيها على نهايات أغصان شجرة الطلح ليقتات ببيضها وفراخها...ويمكن عووضة شايف وجه شبه بين قرد الطلح و ( البكور )

بالمناسبة:

الدورية المصرية لقوها وللا لسع!!!


#326517 [بت الخرطوم]
5.00/5 (1 صوت)

04-07-2012 07:02 PM
ولا حياة لمن تنادى يا ود عووضة اراك اليوم خارج الشبكة بعد كل هذة السنوات عايز مهندس البكور يعترف بفشله فى دى بالغت ارى ان تناشد الحيكومة ومراكز الابحاث الا يسمعون ولا ينظرون لابحاثه لانو النتيجة معروفة سلفا يكفى خازوق واحد جعلنا اضحكوكة فى العالم


#326511 [adel]
5.00/5 (1 صوت)

04-07-2012 06:53 PM
فعلا موضع التوقيت هذا يسبب لي قلقا شديد عند اجازتي في السودان وخصوصا وقت الصلاة فانا اصلي الظهر بالرياض حوالي الساعة 12.20 وشتاء ينزل الوقت الى الساعة 12 ظهرا واما في السودان تفاجا بأن الاذان في الواحدة والنصف والصلاة في الثانية وخصوصا يوم الجمعة الذي يتعدى فيها الوقت الثانية ظهرا وذلك يسبب للشخص نوع من الارباك والقلق النفسي ودائما ما يحاول ان يتناسى هذه الساعة الزائدة ولكنها من ناحية رسمية لا يمكن تجاهلها ولذلك نتمنى ان يتم التراجع عن هذا التوقيت المزعج للناس والعودة لتوقيتنا الطبيعي.


#326508 [عبد الله]
0.00/5 (0 صوت)

04-07-2012 06:52 PM
ننوه للأخ عوضه بأن المقصود بالطلح المنضود هو شجر الموز والمنضود منه كالعقدعلى ما كتبه المفسرون والله أعلم


#326498 [ahmed]
5.00/5 (3 صوت)

04-07-2012 06:31 PM
اخر قرارت الحكومه تغيير اسم الصمغ العربى الى الصمغ الافريقى لانها اكتشفت بان الصمغ العربى هو الاخ غير الشقيف للربيع العربى


#326488 [TINGARI]
0.00/5 (0 صوت)

04-07-2012 06:09 PM
الطلح المذكور فى القران الكريم هو الموز(والله ورسوله اعلم)


#326475 [رومانسى]
0.00/5 (0 صوت)

04-07-2012 05:59 PM
جاء رجل خياط الى سفيان الثورى فقال :إنى رجل أخيط ثياب السلطان هل انا من أعوان الظلمة ؟؟فقال سفيان :أنت من الظلمة أنفسهم ولكن أعوان الظلمة يبيع لك الابرة والخيط


#326470 [hla]
0.00/5 (0 صوت)

04-07-2012 05:53 PM
thanks wooda(talha) am smiling for first time today you are right 100%


#326464 [سادومبا]
0.00/5 (0 صوت)

04-07-2012 05:48 PM
والله الانقاذ دي كلها غلط في غلط إلا في الحكاية بتاعت البكور .. هذه كأنها بيضة ديك ... لم يأتوا بمثلها ..
أعتقد أن القرار كان صحيحاً مية بالمية .. لأنه من غير الممكن أن شمسنا الحارقة هذه في نص السماء وتكون الساعة لسه سبعة .. أكيد في غلط كان ...
الأستاذ عوووضة ... قبل الانقاذ كان هناك من يطالب بمثل هذا الوقت .. وكانوا كلهم من غير الانقاذيين .. وقد صدقوا لأن لكل بلد خصائصها وأمورها العملية والبيئية هي التي تتحكم في مثل هذه الأمور ...مع شكري


#326446 [صالح عام]
0.00/5 (0 صوت)

04-07-2012 05:16 PM
استاذ عووضه قصة البكور دى من ثوابت الانقاذ وهؤلاء الغلط دائما ثوابت لايمكن تغييره الا بتغييرهم وعصام وشاكلته هم سبب مصائب السودان


صلاح الدين عوضة
صلاح الدين عوضة

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة