بدون لساتك
04-09-2012 12:32 PM

ساخر سبيل

بدون لساتك

الفاتح يوسف جبرا

لم يكن العبدلله يعلم بان هنالك جانباً مشرقاً للإخفاق إلا في عهد (وريتنا جديد) هذا الذي نعيشة فما أن تقع واقعة (سوداء) متلتلة إلا وبحث الباحثون وفلفل (المفلفلون) حتى يجدوا شيئاً يبعد الناس عن عمق المأساة ويليهم عن قساوتها وذلك بتوجيه الضوء ل...جزئية تبرز الجانب المشرق للإخفاق !
والأمثلة على قفا من يشيل ففي مطلع أكتوبر من العام الماضي نجا «45» شخصاً من كارثة جوية بسبب عطل فني أصاب الإطار الأيسر لطائرة ركاب صغيرة تتبع لشركة )سودانير( مما أدى لعدم أخذ وضعه الطبيعي في مرحلة الهبوط. احتشد عدد كبير من المواطنين شرق المطار وغربه بعد سماع نبأ العطب الذي أصاب الطائرة وهم يتضرعون إلى الله بالدعاء أن تهبط بسلام وقد تقبل الله دعواتهم ونجت تلك الأرواح من ميتة بشعة !
طيب حصل أيه؟ هل إمتلأت الصحف بالمقالات التى تطالب بمعاقبة الجهات المسؤولة عن صيانة هذه الطائرة والتأكد من جاهزيتها للإقلاع؟ هل إمتلأت الإذاعات والفضائيات بتصريحات المسؤولين التى تؤكد أن المسألة لن تمر بسلام وأن التحقيق سوف يشمل كل من له دخل (في إنو اللستك ما نزل؟) .. بالطبع لا .. فحسب نظرية الجانب المشرق للإخفاق فقد إمتلأت الصحف والإذاعات والفضائيات بالأحاديث والمقالات والتصريحات والمقابلات التى تشيد بقائد الطائرة ومعاونيه وتأكد على كفاءة الطيارين السودانيين (لأنو ممكن ينزلو الطيارة بدون لساتك) ولم ينس (جماعة الجانب المشرق للإخفاق) أن يسلطوا الضوء على فعالية إجراءات السلامة والطوارئ بالمطار، ولك عزيزي القارئ أن تعلم أن السيد وزير النقل لم ينظر إلى الجانب المظلم للإخفاق فيقدم إستقالته بوصفه مسؤولاً عن (خمسين روح كانت ح تروح) بل نظر إلى الجانب المشرق للإخفاق فأصدر قرارًا بترقية كابتن الطائرة ولسان حاله يقول (هسه لو ما دربنا الطيار ده كويس كان نزلا بدون لساتك) !
لعل أبرز مثال لنظرية الجانب المشرق للإخفاق هو تقديم السيد وزير الصناعة عبدالوهاب عثمان لإستقالته بعد الإخفاق الذي صاحب تأجيل إفتتاح مصنع سكر النيل الأبيض فالرجل بعد أن إمتلأت الصحف وكل وسائل الإعلام بالإعلانات التي تشير إلى تاريخ موعد الإفتتاح ورغم أن الرجل يعلم تمام العلم بان المصنع لم يمر بفترة تجريبية (إن شاء الله يوم واحد) إلا أنه قد إكتشف (فجأتن) إنو مسالة الإفتتاح دي لسه بدري عليها وفي (الثواني الأخيرة) قام سيادته بتقديم إستقالته !
على الرغم من أن الفشل في تعثر إفتتاح وتسليم (المصنع) في موعده أو الفترة الزمنية المحددة لتنفيذه يعد إخفاقاً يشير إلى عدم التخطيط الجيد والمتابعة اللصيقة للسيد الوزير ومن ثم (المنطق) يقول أن يتم قبول إستقالته والتحقيق معه حول هذا الإخفاق ! إلا أن جماعة (الجانب المشرق من الإخفاق) قد تركوا مسالة التعثر والتأخير وعدم الجاهزية والإلتزام بالموعد المحدد لبدء التشغيل فإمتلات الصحف بشكر الرجل لأرسائه (أدب الإستقالة) وأخذت تكيل له المدح والثناء وضاعت مسالة الإخفاق وسط عبارات الشكر والإستحسان كما ضاعت قصة (اللستك الما نزل) وسط زحمة التكريم والإشادة بشجاعة الطيار .

كسرة :
يعني شنو؟ نعتبر الوزير ده نزل الطيارة بدون لساتك !

كسرة ثابتة :
أخبار خط هيثرو شنووووو؟


تعليقات 38 | إهداء 0 | زيارات 6860

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#329698 [هيثم علي جمال]
0.00/5 (0 صوت)

04-10-2012 08:55 PM
الاستاذ الجليل متعك الله بصحة والعافية


#329289 [أبو أحمد]
0.00/5 (0 صوت)

04-10-2012 02:46 PM
لك التحية الأخ الفاتح
وشكرا لك على كتاباتك الرائعة والتى نجعلها إستراحة نتكئ فيها من هموم وغموم هذا الزمن الأغبر
فالإنفاذ قد جعلت الراحة أندلا من لبن الدبور فى بلد المليون ميل وقسمته إلى أشلاء لم يعرف عددها
حتى الآن ولكنك تكتب إلى شعب من المساطيل وعذرا إن تطاولت على بنى وطنى ولكن هذا ما نحسه ونشعر به إذ لا يستقيم عقلا ان يمر السودان بكل هذه المصائب ونجدهم يملأون الساحات ويتوافدون من كل فج عميق ليسمعوا
الكذب البواح والرغاء والهذيان ورفع الأصوات بالتكبير والتهليل تضليلا ونفاقا وهم عراة وجوعى , كيف نفهم ذلك والدولار على أعتاب ال 6000 ويتحدثون على نمو الإقتصاد والمشاريع التنموية دون حياء أو خجل ... لك الله يا وطنى


#329257 [محمد شاكر]
0.00/5 (0 صوت)

04-10-2012 02:21 PM
ستظل تسأل عن خط هيثرو حتى تقضي نحبك .. لأنو ببساطة يا جبرا مفيش حاجة اسمها خط هيثرو ولا هباب..


#329162 [ود الجد]
0.00/5 (0 صوت)

04-10-2012 01:10 PM
استاذنا الكريم جبرا
آمل اضافة كسرة الي كسراتك لعلها تجد الاجابة عند اهل الأجابة وهي
لماذا جمبع شوارع مدينة ودمدني مظلمة ليلا بالرغم أن الكهرباء ليست ملكا لحزب المؤتمر الوطني
وانما تركها لنا الانجليز مجانا نظير استعماره لنا


#328831 [ود عويضـة]
3.50/5 (2 صوت)

04-10-2012 09:52 AM
يا ود جبرا دى نظرية الطشاش في بلد العمي شوف - لكن المهم لدينا علماء لا ينظرون إلى حكاية التبرير فهم تجاري - تريد فتوى - موجودة بكل المواصفات والمقاسات – داير حور عين ، داير لبن طير ، داير تشوف بيتك في الجنة ، داير تصلي في ...داير تصلي داير ترقص داير تتزوج وتنبسط ، داير نحلل ليك فوائد البنوك ، بسيطة نعمل للبنك يافطة نكتب عليها البنك السوداني الاسلامي - وبس وبالتالي كل معاملاته حلال -- وهناك كثير من القواعد الفقية يمكن الاخذ بها مثل فقه السترة (دي للحرامية الكبار) وفقه الضرورة يسمح بان نبيح كل المحظورات وهذا يتم تصميمه لجماعة (امسح وأكسح) وفقه جواز السفر للوزيرات صغيرات السن وتحريمه على الرجل كبير السن اذا خافوا عليه ان يصلي في لاهاي
وحتى لا تظلم علماؤنا الاجلاء ومجلس شورى التنظيم عندك اموال الزكاة اخذنا من المرتبات قمنا بجمعها ولم نوزعها بل قمنا باستثمارها في ماليزيا ودبي –
كسرة : دا كله من بركات التمكين الذي سينزل بردا وسلاما على المساكين (لا تقول امين) دا (بدون لساتك) من كلام الابالسة والشياطين


#328696 [الجـعـلى البعـدى يـومـو خنـق]
5.00/5 (1 صوت)

04-10-2012 06:12 AM
بسم ألله الرحمن الرحـيم

* للكاتب الجرىء المحترم الفاتح جبرا
* وللمكرم دوماً د. عزالدين على محمد عبدالفتاح (أبوريان وسى أحمد) وألست احـلام ألصايغ ..

السلام عليكم ورحمة ألله ..

عرفت ألكاتب (جبرا) بواسطة أخى ألحبيب (عزالدين) فالرجل لديه إدراك جيد لرسالة الصحافة.. ومن يومها عرفتُ أن لجبرا أسلوبه المتميز وهو بلا شك واحد من الكتاب المرموقين وله مقالاته المتميزة.. فكلما قرأت له أو إستمعت إليه فى أىّ برنامج يستضيفه يُعجبك إسلوبه المحترم فى الحوار ودفاعه المستميت عن الحق والحرية فهو رجل محترم فى عصر يقل فيه وجود الرجال المحترمين .. لقد اختار أن يقدم للقارئ مقالات تنبض بالعربى الفصيح.. وغالبا بالعربى الصريح.. وأحيانا بالعربى الجريح ..

أثار كاتبنا الموقر الكثير من المعارك والقضايا فى حياته المهنية وحقق العديد من النجاحات فلا نتعجب اخوة (الراكوبه) عندما يقول محبّوه عنه أنه كاتب يكتب بقلبه وقلمه معاً.. فلا تقرأوه بعيونكم فقط إنما بعيونكم وقلوبكم معا.. هكذا يمكن أن تفهمّوه جيدا..

لم يترك (جبرا) كبيرة أو صغيرة إلا وكانت ضمن قائمة مقالاته التى يستلهمها من قلب الشارع لتخرج كلماته (الرصاصية) المتميزة والهادئة.. فهو صاحب الموقف المتزن.. ولم يكن منشغلاً فى أى حال من الأحوال بهجوم المعارضين لخطه واضعاً (هموم) الشارع فى مقدمة أولوياته وكأنه كان يستقى حروف كلماته لتعكس كل منها نبضة من نبضات الشارع السودانى ..

وربما تكون الصحافة لم تستفد من (جبرا) بالشكل الذى يتناسب مع إمكانياته وقدراته ..فلا يستطيع أحد أن يُنكر موهبته الكبيرة وأفكاره الواضحة وتحليلاته التى تكشف عن متابعة دقيقة تنطلق من رؤية وطنية..
وهو على كل حال من أفضل الكُتاب (الساخرين) الموجودين فى المهنة ..

* شُـكـراً لعزالدين الخلوق المهّذب وتعظيم سلام لكل اخوتنا فى المهاجر والمنافى والشتات السودانى ..


* الجـعـلى البعـدى يـومـو خنـق ..

من مدينة ودمـدنى السٌُــنى ..


#328651 [عمر جابر]
5.00/5 (1 صوت)

04-10-2012 01:43 AM
الأستاذ جبرا ولا الصحافة.. المهم اتصلت بخط هيثرو وسألته عن أخباره فرد قائلاً: هو جاهز لاستقبال طائرتكم عندما تركِّبوا لها لساتك بتنزل. وتلقوا سوفتوير لسكر كنانة الجديد (الوايت نايل شوقر فاكتوري).


#328610 [عابر سبيل]
5.00/5 (1 صوت)

04-10-2012 12:25 AM
ياجبرا خلينا من المصنع ده ومواسير الجماعه ديل ركز لينا في الخط ده قبل مايحصل المصنع


#328594 [بت أمدرمان]
5.00/5 (2 صوت)

04-10-2012 12:00 AM
عارفين يا جماعة أحلى حاجة الليلة فى مقال عمنا جبرة شنو؟ انه اتفاعل مع آراءنا و أضاف ووووو للكسرة بتاعتو و بقت الكسرة أخبار خط هيثرو شنووووو


#328576 [Heron]
3.00/5 (2 صوت)

04-09-2012 11:37 PM
البشير وجماعتو دائما" ينظرون الى الجانب المشرق من المسالة .طوال ال23 سنة الماضية وهم يفعلون ذلك .تمر الكوارث كارثة كارثة على البلد والمواطن وهم يبتسمون ويقولون المسالة كلها ابتلاء رباني .ايمانيات وتقوى تقيلة.استاذ جبرا الخطوط المحتاج تسال منها كتيييييييييييييرة فتش بس وانت حتجد ما خفي كان اعظم واقبح وافدح.مع تحياتي


#328575 [نيام]
3.00/5 (1 صوت)

04-09-2012 11:37 PM
والله البلد دي زاتا دايره ليها طيار ينزلها بدون لساتك...
كسره:
انتو خط هثرو دايرين تمشو ليهو بدون لساتك برضو


#328564 [محمد العوض]
0.00/5 (0 صوت)

04-09-2012 11:22 PM
الشئ الغريب انو اللسستك ينزل بسرعة او الطائرة تصل بالسلامة.......


#328556 [عبد الواحد المستغرب اشد الاستغراب!!]
5.00/5 (1 صوت)

04-09-2012 11:10 PM
ياعم جبرا نحن عارفين إنك رجل زكى ولماح !! ويبدو إن داء الدغمسه المت بك وانت ما زلت فى مقتبل العمر (والشر بره وبعيد عنك) وقد تحتاج لواحد وعشرين حقنه تحت الصره مباشرة!! والقصه وما فيها أنو جماعتك يحاولون تغطية الفشل المتعمد بشوية أحاجى من نوع حجيتك وما بجيتك التى خصصوا لها أخوكم فى الله اولا ودنيا الصحافه ثانيا (ع/م) طبعا المقصود واضح ومن إختصار الاسم لان الدنيا ما معروفه!!ويمكن تدور الارض دورتها وترميك يوما ما فى صحيفتو ويكون رئيسك المباشر!! المهم الجماعه ديل بالتضامن والانفراد أكلوا قروش الدراويش العرب وعاوزين يعملوا فيها ( مجانين)!!وطبعا انت فهمة قصدى وارجو ان تركزوا فى الحته دى بالذات وفوتوا عليهم (الدغمسه وشغل الاستهبال والاونطه) وانا لا اجد تفسيرا للذى حدث غير الذى أشهد به ، ومثلا عندما تقول احدى (حريمات المؤتمر الوطنى) ان المتعافى نجى من الهلاك لانه قارىء لكتاب الله فكأنها فى إفكها الواضح قصدة أن تقول الذين قضوا فى الحادث لم يكونوا يقرأون (الحمدو) حتى كما نقول باللهجه الدارجه وبمثل هذه التصرفات اللا عقلانيه يؤكدون لنا أنهم مصممون وماضون فى (أن يورونا جديد ما كان على البال) او كما قال الشاعر، وبعد ده أنا أعتقد ان الغلط ليس من جانبهم انما من جانب فهمنا للامور بشكل غير صحيح!! وانت ياصحبى خليك فى (خط هيثرو) حتى (يبين ليك صاحب) ونحن حنسك موضوع مؤسسة الاقطان وأخيرا وليس أخرا موضوع سكر النيل الابيض ومولانا سيف الدوله يكون (شابط) فى وزيرات الزمن الاجرب ) على حد قول الكاتب الكبير شوقى البدرى0


#328535 [كلوكلو]
3.00/5 (2 صوت)

04-09-2012 10:28 PM
الليلة دي ما قوية لكن مابطالة


#328430 [الاستاذ]
5.00/5 (1 صوت)

04-09-2012 07:50 PM
اها يا جبرة انت بالظبط داير شنو باين عليك مغرود في اللستك ده
الوزير لسه قاعد في كرسيهو. وسجم خشمنا
المدير لسة قاعد في كرسيهو وسجم خشمنا
السكر ما حيطلع. يا مساخة شاينا وخشمنا



كسرة خفيفة

الطيارة الوقعت دي ما عندها سيد يسال عليها
الخمسن نفر ديل مش من حقهم يقاضوا سودان اير

السرق خط هثرو مش احسن ليهو يرجعوا قبل ما ينفضح وبعدين يا جبرة خط هثرو ده انشاء الله كان كتلني التقول خط قرينتش

كسره مع اشارة

بيتك لو من قزاز سدو واستريح


#328419 [اللمبك]
0.00/5 (0 صوت)

04-09-2012 07:36 PM
ياأبوجبرة حيكومتنا حيكومة جميييييلة ترى الوردة وتغض الطرف عن شوكها..وترى فى الكوب جزءه المليان..يديهم العافية ودامو للجوانب المشرقة ذخرا"..واحنا...احنا انشاالله نطير لأننا بنكد عليهم..؟؟؟


#328414 [حسن]
3.00/5 (1 صوت)

04-09-2012 07:30 PM
الاستاذ الفاتح جبرا

نحن السودانيين ما بتعجبنا اي حاجة
يعني انزال الطائرة بدون لستك مش انجاز من انجازات الحكومة
وعدم تشغيل المصنع في موعده برضو انجاز من انجازات الحكومة
وعدم قبول الاستقالة برضو انجاز... ليه يقدم استقالتو هو علي كيفو
اول شئ يشغل لينا المصنع انشاء الله (دفر)
وموت المرضي في هظار مدير المستشفي انجاز كبير.. ما لازم نهظر
وبيع مستشفي العيون اكبر الانجازات ... عايزين نصلح ليكم شارع النيل
يعن انتو ما عاجبكم اي حاجة تنجزها الحكومة

وأخبار خط هيثرو( القطع نياط قلوبنا) شنو؟؟؟؟؟؟؟؟؟؟؟؟؟؟


#328378 [شكلى ناسى حاجة]
3.00/5 (1 صوت)

04-09-2012 06:33 PM
انت شكلك مرطب يا استاذ لانك بتتكلم عن اللساتك والناس ماشة على عجل الجديد ليها سنين لمن امنت


#328324 [ابو عبود]
0.00/5 (0 صوت)

04-09-2012 05:39 PM
كسرة غير ثابته
اخبار مدير المستشفى القتل الناس بالهظار شنو ؟؟؟؟؟؟


#328312 [االلاحس كوعه]
0.00/5 (0 صوت)

04-09-2012 05:29 PM
وانت الصادق ده نزل اللساتك بدون طيارة


#328303 [وحيد]
0.00/5 (0 صوت)

04-09-2012 05:16 PM
و انفصل ثلث الوطن و مواطنيه و ذهب البترول الى غير رجعة و هلل الجماعة و ذبحوا الثيران باعتبار ان ذلك فتحا مبينالا الباقي 98 % مسلمين لتطبيق الشريعة غير المدغمسة...
شباب ضائع يقيم احتفالات و مغني و مسيرات بالعلم السوداني لصرف الانظار لانه في الوقت نفسه كان رقيص البلد اقصد رئيس البلد ينزل العلم عن ثلث مساحة السودان و يضعه تحت اباطه و يستجدي امريكا لفك عزلته! الخيابة و الفشل دي كيفنها؟!


#328283 [omer]
0.00/5 (0 صوت)

04-09-2012 04:59 PM
يا عم جبره انتو السبب لانه لو ما استقال الوزير كنتو وجعتو راسنا لماذا لم يستقل الوزير اهو استقال خمو وصرو


#328270 [ام الحسن]
5.00/5 (2 صوت)

04-09-2012 04:46 PM
الجانب المشرق فى عودة حرب الجنوب ...هو عودة فى ساحات الفداء وعرس الشهيد والزغاريد والهجيج والزفة للحور بالبخور

الجانب المشرق للاخفاق فى التعليم العام والعالى...هوشوية العيال اللهلوبات عباقرة زمانهم الكل مرة جارين بيهم لماليزيا قال مسابقات اليوثى ماس والشنو مابعرفو داك

الجانب المشرق للاخفاق فى النقل والمواصلات ....هو صناعة الطائرات صافات1و2و3 وانشاء الله فى القريب العاجل ح يملكو كل صاحب رقشة او امجاد او هايس واحدة من الصافات ديل ونبقى نتنقل بالجو تانى

الجانب المشرق للاخفاق فى الصحة...هو كترة الدكاترة(_النص كم) والقاعدين فى ضل الشجروالبقو اكتر من ستات الشاى يعنى الناس تانى ماحتتعب وتمشى المستشفيات لانو فى اقرب ضل شجرة لبيتك ح تلقى البعالجك

الجانب المشرق للاخفاق فى الزراعة هو....تقسيم وتوزيع ماتبقى من اراضى البلد للسعوديين والمصريين والقطريين وكل من هب ودب منيحة سااااكت لوجة الله حتى يعلم الناس مدى كرم السودانيين وذلك تحت شعار(_وحتى الطير يجيها جعان من اطراف تقيها شبع)


#328207 [TIGERSHARK]
3.00/5 (2 صوت)

04-09-2012 03:29 PM
Hopefully, one day good news come out from our country Sudan....just a hope


#328205 [Sudannow]
4.50/5 (3 صوت)

04-09-2012 03:29 PM
ده زي ما بيحصل في المظاهرات. تلقى الحكومة تترصد القيادات وبعد ما تعتقلهم يكون هم المتظاهرين هو كيف يطلعوا جماعتهم المسكوهم ديل. وبعد محاولات تقوم الحكومة تفكهم ومن هنا يفرح التظهارون ويهللوا عشان قدروا يطللعوا جماعتهم من مقبضة الحكومة وينسوا الموضوع الأساسي اللي من أجله تظاهروا.


#328194 [عوض محمد احمد]
5.00/5 (4 صوت)

04-09-2012 03:21 PM
اخى الفاتح اسعد الله اوقاتك والقراء الكرام - يعنى المساله بقت على الطياره اللستك مانزل والا المصنع المتفتح فى مواعيده لان الوزير كان محتار يلبس ياتو بدله عشان الافتتاح ونسى يسال ساكت ادا كانت الاجراءات مكتمله للافتتاح او لا - وا\ا جينا على موضوع الطيارات فحدث ولا حرج واحده تنزل على شجره وهى قادمه من بورتسودان واحده واقعه فى مطار الخرطوم والنار قائمه فيها ، يعنى مستنى وزير يستقيل انت شفت عندنا وزير غير وزارته قبل مايبنى اقلهه عمارتين تلاته وبعدين يغيره لى وزاره تانيه اكثر انتاجيه- ام موضوع خط هيثرو ده فحمده فى بطن اللهفوه وممكن استرلينياتو اتحولت الى عمارات وشقق بالقرب من السفارة فى بلاد الضباب
الاخفاق يالفاتح ياخوى الكارثى كان فى اتفاقية نيفاشا التخمينا فيها ولا يوم الليله مافى زول فهم الشعب المغلوب على امره كيف سلمت الجنوب على طبق من الدهب (كما يقولون) بدون مقابل قالوا السلام السلام وينو - ياحليله- الحرب كانت فى الجنوب حرب عصابات وانتقلت الحرب الى الشمال وليس ضد عصلابا انما ضد جيش مدرب ودوله ولدت من العدم بدون اب شرعى غير اعتراف بالابوه من جانب ولد عمهم اوباما وبت خالتهم رايس الواقعه بوس فى سلفاكير - اريته تقيف على البوس- اما الكارثه فى الاتفاقيه ان الشعب المغلوب على امره اكتشف ان جماعتنا اتمقلبوا فى موضوع البترول الاكتشف وطلعو وصدرو الشمال ولم يكتب ليه فى الوصيه - الاتفاقيه- ان من حق الشمال ان يكون له النصف لمدة 20 سنه على اقل تقدير والا ينفصل الجنوب قبل ان تحل مشاكل الحدود وحل مشكلة النيل الازرق وجنوب كردفان وحل مليشيات العتاله بتاعين قرنق وبالمناسبه ناس قرنق كانوا مستعدين يعملوا اى حاجه لاستلام الجنوب ولكنهم كانو اكثر زكاءا من جماعتنا فى اخفاق اكتر من كده لك تحياتلى وبرضو ماهى اخبار خط هيثرو ؟؟؟؟


#328173 [راجل المرا]
5.00/5 (2 صوت)

04-09-2012 02:55 PM
بس ما وريتنا الجانب المشرق فى وقعة عمارة الرباط
وما وريتنا الجانب المشرق لعابدين ومحى الدين بالعى القطن
وما وريتنا الجانب المشرق لعدد الوزراء الذى فاق عدد لاعبى الدورة الممتاز


ردود على راجل المرا
Sudan [kabo] 04-09-2012 10:20 PM
يا اخ ده سؤال
الجانب المشرق فى الرباط انه مافى زول مات لانه لو ماما مهم يموتوا الناس ولا يعيشواوذى واحده من استثمارات الوزير انه بقدم خدماته للشعب
الجانب بتاع الجوز ده انهم ناس اتقياء انقياء شافو القطن ده موضه قديمه عايزنكم تواكبو العالم فى الخيوط والاقمشه المصنعه من البترول مش نحن اخدنا عضويه الاوبك
اما بالنسبه للوزراء توفير فرص عمل لعدد من العطاله ولا عشان بقو وزراء ما عجباكم فرص عملهم التى توفرت دى
كسره اخبار سياحى ود الخضر شنو


#328171 [حسون]
0.00/5 (0 صوت)

04-09-2012 02:53 PM
الشعب السوداني بطبيعته شعب سازج وشعب متسامح في اشياء لاتقبل مثل هذا التعامل ... في مسألة الاعطاب في الطائرات التابعة للخطوط السودانية اصبحت ظاهرة شاذه ومتكررة والوحد عديل كده لمن يركب ليه طيارة سودانية " يجهز كفنو قبل مايركب " يعني بصراحة كده "خطوط ماسورة".. وبقصة الوزير في البلد دي عندنا الاخفاق هو قمة النجاح والابداع , يعني عادي يقولو ليك سد مروي حينهي مشلكة النقص في الامداد الكهربائي نهائيا" وحيجيب لينا عملة صعبة لمن نبيع الفائض من الكهربة لي الدول المجاورة ... ويقولو ليك ظاهرة الفساد سيتم التعامل معها بكل صرامة مع اي جهة كانت واو اي انسان مسؤول في مركز معين وفي النهاية تلقي كلام شعارات وكلام خطب جماهيرية "وكلام كيزان ساكت" ...


#328168 [zoal saii]
5.00/5 (2 صوت)

04-09-2012 02:51 PM
غرق مجندى الخدمة الوطنية وضعت المشكله فى العباره صغيره ومن ماتو فى استاد المريخ فترك جذور المشاكل وحلها هذا ديدنهم


#328154 [ود الحاجة]
0.00/5 (0 صوت)

04-09-2012 02:41 PM
الوضع اصبح أشبه بقاطع الطريق الذي يأخذ من الضحية كل القروش التي معه و يقول له: حظك كويس أننا تركناك تمشي برجليك

و بعدين البشير رفض الاستقالة و لم يحقق في الموضوع ما معنى هذا ؟ التفسير الوحيد هو أنهم طبخوها مع بعض و هكذا يضحكون على الشعب المسكين!!


#328130 [خالد وداعة]
4.00/5 (1 صوت)

04-09-2012 02:22 PM
مساء الخير استاذ الفاتح لك الود. من زمان اى من زمن حضور الانقاذ دى زمان بتاعتنا ما شفنا ولا اظنو نشوف الحا ل المائل بنعدل كان الاخفاق والفشل اصبح متلازم الانقاذ او اهلها واظن وليس كل الظن اثم انو مافى زول من ناس الانقاذ برضى بالموقعين الحصل فيهم الحادسين الذكرتهم الم يكن هنالك مساول قبل عبد الوهاب هذا (الجاز) كان بسوى فى شنو ولماذ انصرف الى البترول . ولماذا الصرار على اشخاص بعينهم الا يوجد اكفاء فى ملايين البشر السودانيين اح


#328127 [زووول]
0.00/5 (0 صوت)

04-09-2012 02:20 PM
أهاهاهههههههاااااههه وشر البلية مايضحك !!!


#328112 [ابو السباع]
0.00/5 (0 صوت)

04-09-2012 02:10 PM
الحس كوعه لو افتتح المصنع


#328057 [ود اقرع]
5.00/5 (1 صوت)

04-09-2012 01:16 PM
ويعنى شنو نكافئ وزير بابقائه على كرسيه بعد تفريطه على الاقل فى تاجيل الافتتاح ( لو كان مدركا لعطل ماكيناته ) و من ثم التسبب بفضيحة امام مستثمرين من خمسين دولة ..


#328054 [ابوخطاب الابنوسى]
5.00/5 (1 صوت)

04-09-2012 01:14 PM
ديل اصحاب الوجة المقرف وليس الوجة المشرق


#328050 [ودامدرمان]
5.00/5 (1 صوت)

04-09-2012 01:09 PM
الاستاذ جبرا
تحية طيبة
لو كان الوزير شغل المصنع بدون سوفت وير يبقي يتكرم زي ما اتكرم الطيار النزل الطياره بدون لستك






تخريمة:
ادب الاستقالة ورانا ليهو الوزير
بعدين في بنوريهم ادب المدايح





تضامن جبرا:
اخبار خط هيثرو شنو؟؟


#328041 [عبد الرحمن]
0.00/5 (0 صوت)

04-09-2012 01:03 PM
لدي علاج يا أستاذ الفاتح لأقوال أي واحد من المؤتمر الوطني ليتني استطيع أن أجعل الآخرين يعملون به و هو أني أعاهد نفسي عهداً جازماً بأن لا أصدق كلمة، لا، بل حرفاً، مما سيقوله المؤتمرجي قبل أن أستمع إليه، و ليس بعد أن أستمع إليه.


#328035 [الزول الكان سَمِحْ]
4.74/5 (7 صوت)

04-09-2012 12:58 PM
يا أستاذ جبرا

يا أخى ماهو الكابتن لو سمع كلام مدير المراقبة الجوية ( ودقا بيها الواطة) كان الخمسين نفر ديك لحقو( أمات طه) على قولك..

طيب الفنيين بتاعين مصنع سكر النيل الأبيض ديل...ما فيهم واحد يشغل مخو شوية عشان تفادي الإخفاق ويجيب ليهو ( مَنَفِلة) عشان يشغل بيها المكنة دي... يمكن السكر كان إنبهل...هههه

بالمناسبة:

الدورية المصرية الرايحة..لقوها..وللا لسع؟؟


ردود على الزول الكان سَمِحْ
United Kingdom [مامون] 04-10-2012 12:23 AM
الدوريه دى والله انا مهتم بيها أوى قبل عشره ايام خبر فى جريدة الاهرام بأن الجيش المصرى كثف البحث عنها جوا وبحرا وبرا .
البعيد شنو يكونوا بينقبوا فى الدهب داخل السودان !


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة