المقالات
منوعات
نقريش على طنبور حميد
نقريش على طنبور حميد
04-13-2012 07:45 PM

نقريش على طنبور حميد

د عبدالرحيم عبدالحليم محمد
[email protected]

1
حمّيد رحل
رحل الجمال
رحل البحر
رحل الجبل
رحل الجلال يا نوري
في ساعة عجل
شوف الطنابير كيف بكت
شوف الجناين صوّحت
شوف الزهور البتّقت
شوفوها كيفن ضبلنت
لا نسمة
لاضلية
لا ريحة جروفن خدّرت
النخل واجم
والجروف لبست فرد وأتكندكت.
كل المراعي وراك بكت.
بالحزن داك اتجر تقت
رملاتنا ما لعبو الصغار في سوحا
ما القمرة أضربتْ
حتّ النخل عرجونو
والعيش ريف ضفايرو إتفرتقت
وحاست مياه الجدول
الكان بيكا يا حميد متمسح
وإنمحت
المنقة ديك
في حزنها الداوي انزوت
شوف البراسيم كاوقت
شوف الطيورإتقالدت
تبكيكا يا الفارس الجسور
يا دوب مراكب عازة دابن صوّبن.
2
المنقة شاحبة
وكان بى وجودك
صفقاتا رابّة
بنوتنا بعدك
نسن القراية
ونسن الكتابة
تبكيك شتيلة
يا دوبا شابة
وتبكيكا صفقة
وتبكيك ربابة
تبكيكا ليلية
بى إنجذابا
وتبكيك دموعن
ترويلا غابة
تبكيك كريمة
ومروي ورحابا
يعلن وطناّ
وقف الخطابة
ما سيدا عدا
وشال المعاني
وشال الصبابة
الشعر بعدك
مليان رتابة
ما الواطة بعدك
فقدت ثباتا
وفقدت صوابا.
3
وين رايح؟
يا شادينا يا صادح
وكيفن عاد يكون الحال
بدون طوريي أو منجل
ولا واسوق
ولا جدول
وكيف فرساننا تترجل؟
وكيف يا فارس الفرسان
تخلي الساحة تتبرجلِ؟
وكيف تبقى الصفوف بعدك
بدون مشعل
وكيف عاد النضال يركز
وكت سيف النضال ينصل؟
وكيفن عاد بلاك تاجوج
تسرّح شعرها الأجمل
ومين بعدك يعيد أمجادنا
لى كنداكة في بركل
يخت تاج الكلام فوق راسا
شوف كيف هدّت الرومان
هناك في زحفها الأطول
وشوف كيف راس أغسطس داك
سكن في معبدا الأول
كيفن يا صدى التاريخ
تحرد مننا وتزعل
وتنساب زى نسيمة هناكا
فوق درب الخلود تقدل.
تسافر كيف خيولك يا مهيرة
بعد فوارسك ولوا مابتصهل
وما بينساب نغم جبار
يعيدلك مجدك الأول
يلمع شعرو زى السيف
ويغلي كلامو زى مرجل
يغنيلك على إرزام نحاسك
وفارسك الهلّل
ينساب شعرو زى نسمة
تغسل حزننا الطوّلْ
4
الجدول تخنْقوالعبرة
في همو الطويل سارح
في كل قرانا
يا ممدوحنا ...يا مادح
طفلة تحاحي أحزانا
حالة بيغني عن شارح
والليل إنكتم محزون
بعد كان بالهوى بايح
كيفن عاد تروح يا قبلة المحزون
يا رايعنا ...يا صادح.
تهاتي شِبا
شبّت فيها نيران
حزنها الجارح
وتتمردغ وراك فتنة
يا مفتونا وين رايح؟
بعدك ألمي في نيلنا
صبح مالح
وقلّ التمرة في ساقتنا
يابس ما النخل طارح
وطعم النسمة في بيوضة
بات لافح
هجيرن أصبحت مسّاوي
روق أحزانا متساوي
وعليك نايح
شوفا الباسا قلْ باسا
بعد راح فارسا الكاسح
قريرك قرّ بى حزنو
وركبلك هناك صايح
وكورتي أتكورت آلاما
شوف كيف
نيلا متناوح
وشوف كيفن جلاس جلست
على شط الأسى الكالح
أراك أتركّا في حزنو
وبيك كان الأراك رابح
نوري تحد عليك
ومقل
يقل نوم عينو يا الفالح.
6
يلبس كل وطنّاا حداد
وينسجلك أماني أجداد
فوق دربك بنقبقى عباد
لعازة وعقلها الراجح.


تعليقات 0 | إهداء 0 | زيارات 1168

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




د عبدالرحيم عبدالحليم محمد
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة