المقالات
منوعات
حاج بله (الاعلانات التلفزيونية والايحاءات الجنسية)
حاج بله (الاعلانات التلفزيونية والايحاءات الجنسية)
04-14-2012 04:35 PM

الاعلانات التلفزيونية والايحاءات الجنسية

طارق حامد خليفة
[email protected]



عاد حاج بله الي طبيعته صاحب مزاج عالي ونفسيات سليمة بعد الاحباطات التي حدثت له من جراء الربيع العربي الذي كانت بداياته تدعو للتفاؤل ونهاياته درامية وحزينة فما يحدث في مصر وحتى الان يدعو للاسف والتحسر وكذلك ما يحدث في ليبيا لا يختلف كثيرا وما يحدث في سوريا يذهب في نفس الاتجاه .
ما يهم ان حاج بله اعلن مقاطعته لكل مايسمى بالربيع حتى خالدة سيد خليفة يا ربيع الحب التي كان يرددها دائما توقف عن تريدها حتى جارهم ربيع اصبح لا يطيقه واصلاُ البينهم ما عامرة من زمان .
وعاد حاج بله لعادته قبل الربيع العربي والذي جعله يتركها فقد كان لا يستطيع مفارقة كرسيه متسمر امام الجزيرة طول يومه وهذا جعله يتوقف من الجلوس امام منزله عاد الان ليخرج ويجلس في مكان المعهود .
وفي صباح جميل ونفسيات جميلة لحاج بله خرج من منزله ليجلس في مكانه المعهود وطبعا قبل خروجه لم تسلم حاجة السرة من سلاطة لسانه طالباً منها ارسال القهوة اليه بالخارج .
خرج بله من منزله واحدث في الشارع ضجة بخروجه بعد فترة طويلة من الغياب ليبادره صاحب الدكان مقبول باستقباله بحفاوة :
وينك يا راجل واحشنا ؟
حاج بله : ما تشوف وحش عشمنا في الربيع طلع لينا فلم رعب !!!
مقبول : يا زول انت براك سويتها في نفسك .
حاج بله : التسوي بايدك يغلب اجاويدك !!!
مقبول : صحي والله يازول حمدلاك بالسلامة .
كان هيثم سعيد جدا بخروج حاج بله اليوم ويريد هذا الحوار ان يتوقف حتى يبداء حواره معه .
هيثم : يا حجوج انا قاليك اتلحسته !!!
حاج بله : ان شاء الله تلحسك بقرة يا منحوس ...
هيثم : هههههه لي شايفني عندي صلعة ، يا حجوج والله مشتاقين .
حاج بله : يا مسنوح والله بالاكثر ، اخبار البهجة و الحزب شنو؟
هيثم : ما قلنا ليك نضمك معنا وانت ما قبلان
حاج بله : ينضموك سبحة ان شاء الله كان يروح جنك ده ، شن بلمني معاكم انا يا ناس الهواء .
هيثم : يا فردة انت ما عضو شمام بس ما عايز تعترف ههههه
حاج بله : يشمك الكلب ان شاء الله احسن تخطاني بجنك ده ما عندي ليك بال كفاية العملو فينا الربيع العربي !!
هيثم : ههههه اي سمعت بيك قال قربته تتلحس ويودك التجاني الماحي .
حاج بله : التجاني الماحي ياهو مصيرك يا مسنوح من الهباب البتشربه ده ...
هيثم : انت نفسك فيه بس ملاوز .
حاج بله : ان شاء نفسك مقفولة خرابكم ده لا بحبه ولا بقربه .
هيثم : تعرف يا حجوج بدمك الخفيف لو اخذت ليك نفسين بس كان بدعته .
حاج بله : ان شاء الله البلاعة التبلعك قال نفسين قال ، انت ياهثيم بعد من الجنوب بقي دولة منفصلة الهباب ده بتلقوا وين ؟
هيثم : يا عمك موجود بكثرة ، مش قلت ليك انت نفسك فيه بس ملاوز...
حاج بله : هوووي يا مسنحوح احسن تخطاني نفسك بالسد ان شاء الله
هيثم : السد ولا الريان مع السلامة يا حجوج نشوفك بعدين .
حاج بله : نشوفك بعدين تقول مدير بنك اديني عرض اكتافك عارفك مستعجل لاحق شنو.
هيثم : مع السلامة شم كويس ههههههه
حاج بله: الله يسلمك اعمل حسابك من ناس النظام العام يلحسوك ...
يذهب هيثم ويترك حاج وهو يطنطن بكلام غير مفهوم وحاج بله رغم مشاغبة هيثم معه ولكن هو يحبه ويسعد بالحوار معه .
ويظهر عمران من بعيد ويسعد بوجود حاج بله وهو يجلس في مكانه المعهود
عمران : السلام عليكم يا حاج ايوه كده ياخي رجع لينا الايام الجميلة .
حاج بله : حبابك يا عمران اتغشينا يا صديقي قلنا الربيع جاءنا لقيناه امطار وسيول وكوارث .
عمران : يا حاج تعرف انا السياسة دي مكجنها وما بحبها .
حاج بله : يا زول القصة كانت لذيدة الرجل الوراء عمر سليمان و زنقة زنقة واسع القصة قلبت دراما.
عمران : يازول ده بقي فلم رعب عديل .
حاج بله : كلامك صحي والله ده افلام مصاصي الدم بس.
عمران : كدي خلينا من الكلام البجيب الغم ده قول لينا شنو الجديد ؟
حاج بله : والله يا عمران في حاجة بقت محيراني !!!
عمران : شنو المحيرك يازول ؟
حاج بله : الاعلانات التلفزيونيه !!!
عمران : مالها دي كمان يا حاج ؟
حاج بله : شفت دعاية النسكافي البجيبوها في شبكة التلفزيون العربي الكبير ديك ؟
عمران : مالك كلامك بقي الغاز ؟!!!
حاج بله : مالك عايز تبقي لي زي الاميه الجوي دي ؟!!!
عمران : خلاص قمنا للحركات ياخي المره دي ما كرهتها حياتها .
حاج بله : يا زول المر ان شاء الله ليك وليها .
عمران : اسع في داعي لي ده كدي خلينا في قصة الاعلانات التلفزيونيه !!!
حاج بله : يا ما مثقف قانونياً ان لوجبت اسم القناة ح اجيب لنفسي الهواء فهمت يا مسطح ؟
عمران : ههههههههه والله لكن لقيتك مفتح .
حاج بله : لا قايلني زيك وزي (بويا) الجوه دي .
عمران : هههههههههه خلاص خليت علاء الدين جبريل ؟
حاج بله : اديناه المعاش ...
عمران : هههههه طيب كمل كلامك الاعلانات التلفزيونية مالها القصة دي بقت علم بدروسه وعايزة ناس خيالهم واسع .
حاج بله : يعني زي ناس هيثم كده؟
عمران : هههههه حاجة قريبة من كده لانه ناس الاعلانات ديل ناس مبتكرين و متجددين .
حاج بله : وقليلين أدب .
عمران : ههههههه كيف يعني قليلين أدب ؟
حاج بله : انت يا عمران شفته دعاية النسكافي ولا دعاية الويز ؟
عمران : اي شفتهم فيهم شنو ؟
حاج بله : سبحان الله الرسول صل الله عليه وسلم قال (ياتي زمان القابض على دينه كالقابض على الجمر)
عمران : صدق رسول الله صل الله عليه وسلم ، لكن مالك قلبت لينا الحصة من اعلانات حصة تربية اسلامية ؟
حاج بله : ما ياهو ده بيت القصيد .
عمران كيف يعني ؟!!!
حاج بله : الايحاءات الجنسية !!!
عمران : الليلة جنس نطيط يا زول الحاصل شنو ؟!!!
حاج بله : مش قلت ليك بقيت زي الماحيه الجوه دي .
عمران : والله غايتو يا حاج الماحي ههههههه اقصد يا حاج بله بتستغل الفرص بطريقة عجيبة !!!
حاج بله : ليه انا (بشه)؟
عمران : هههههه لا انت عراضه كدي خلينا من الموضوع ده و كمل الموضوع.
حاج بله : يا عمران يا اخوي الاعلانات التلفزيونيه بقت تخجل عديل تكون قاعد في امان الله فجاءة تجيك دعاية الويز وتقول ليك كبير وعنده جناحين تساعد على امتصاص البلل ولا واحد لابسة بنطلون ابيض وتخلف رجلها عشان توريك ان البلل ما بحصل وتقوم تدور ليك عشان تشوف مافي بلل وزي كّانو الحاجة دي عادية !!!
عمران : ههههههههه والله انت بتلاحظ ليك في جنس حاجات !!!
حاج بله : يازول الاحظ شنو انا مافاضل لي الا الارض تبلعني المشكلة يكون الاولاد كلهم قاعدين حولك وبتفرجوا معاك .
عمران : فعلا موقف محرج جداً .
حاج بله : محرج شنو ده بكتل عديل !!!
عمران : اها وتاني شنو ؟
حاج بله : وله دعاية النسكافي يا زول دي فيها خلاعة واشياء تخجل بس ده كله عشان يوروك الرغوة في النسكافي ولا دعاية معجون (كلوس اب) خلاعة ايحاءات جنسية بطريقة عجيبة .
عمران : كلامك صحيح والله يا حاج زمان كان في شئ اسمها الرقابة كانت بتقطع اي مشاهد خادشة للذوق العام من الافلام والمسلسلات وكانت تلفزيوناتنا خالية من اي شئ لا يسمح بيه الشرع.
حاج بله : زمان كان الحاجات دي بس في الافلام الاجنبية وفي السينما يعني ما بتدخل البيوت اسع المصيبة تجيك لحدي سريرك !!!!
عمران : صحي كلامك والله القصة بقت ما عندها حدود وما تقدر تسيطر عليها في بيتك يعني ح تمنعك اولادك من انهم بشوف التلفزيون ؟!!!!
حاج بله : ما دي المصيبة ذاتها والمشكلة الكبيرة القناة المزعومة يمتلكها بلد الاسلام ومهبط الوحي وخلاص ما تودينا في دهية !!!!
عمران : ههههههه ما تخاف يا راجل كلامك كله حقيقة لكن انت يا حاج ما تكلم لينا عن دعاية التلفزيون السوداني !!!
حاج بله : يا اخي عليك الله انساني يازول ده ما معدود مع التلفزيونات دعاياتهم ابيض واسود .
عمران : هههههههه كيف يعني ؟
حاج بله : ياخي ناس يا رز الوابل يا بيت ابوي دي انساني منهم التقول لا بعرفوا الاتش دي و لا بعرف ثري دي اعلاناتهم زي من الماضي .
عمران : هههههه بس ؟!!!
حاج بله : ولا التاني داك سواق الدفار وزيوت ناشونال يجيهو واحد ساق تركتر يديه زيت ناشول يكبه في عربيته تقوم العربية تطير يأخي نحن هنود الاعلان ده بقي علم قائم بذاته وعايز ناس بتعرف تبدع مش العوارة البعمل لينا فيها دي .
عمران : ههههههههههه صدقته يا حاج بله .
حاج بله : ولا كمان اعلان العدس و الزولة الشبكانا نيفر نيفر كدي اعرفوا العربي بعدين اتكلموا لينا انجليزي غايتو جنس فلسفة !!!
عمران : ههههههههههه السلام عليكم
حاج بله : وعليكم السلام و رحمة الله وبركاته.





تعليقات 0 | إهداء 0 | زيارات 2699

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




طارق حامد خليفة
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة