المقالات
ثقافة وآداب، وفنون
عبد العزيز بركة ساكن
عريس..
عريس..
09-11-2010 02:37 PM

عريس..

عبد العزيز بركة ساكن

صلينا صلاة العشاء في جماعة، ونحن لسع في البرش قال ليّ اخوي آدم، يا موسي، عليك الله، تخلي قلة ادبك وتبقي ود ناس، وامور الحرمنة والشفتنة دى تسيبها ولو مرة واحدة في حياتك، بس عشان خاطر امك المسكينة المشلولة دى، القاعدة في بيت احسن منه الكوشة، وكل يوم الحكومة (مكسراوْ)، عليك الله شوف قدامك ووراك وابقي زول! تنفع نفسك وتنفعنا معاك.. باب التوبة مفتوح يا.. موسي..؟
قلت ليو.. ربنا يهديني ويسترني مع الناس ديل..الزمن دا الشغل مابيتلقي بالساهل..
2
جاء المأزون، قرأ قرآن كتير، ودعي ادعية كتيرة، صلينا وراه ركعتين لله، بعد داك عقد لينا كلنا العشرين في وكت واحد، بصراحة انا كنت ملاوز، ولكن اتذكرت كلام ادم اخوى: ياموسي الملاوز مابيكسب.. خت الرحمان في قلبك. لكن الشي الاقنعني اكتر لما شفت عروستي، كانت اجمل واحدة في العشرين عروس، لونها ذي اللبن، وصغيرة طويلة، وعندها شعر نازل حتي جعباتها، سمينة ولينة، وعيونها صغار ولكنهم لعينات ومغريات تقول عيون بت ابليس، كل مرة كانت تقول لي بدلع:
ـ انت.. محظوظ ود كلب..
كنت بسكت ساكت، بعاين ليها وبتوعدا في سري، بامور عجيبة حا تعرفها في وقتها لمن نصل الفندق.
انا مندهش من نفسي وروحي وحظي، الحافلة الكبيرة اللموزين المليانة باربعين من العرسان كانت بتجري بسرعة رهيبة علي الزلط المكسر في اتجاه (الجراندفيلتش)، بدأت الغناء عروس صوتها جميل، وكلنا عرفناها لما بدات اول مقطع من غنيتها.. وصرخنا في صوت واحد:
ـ زهور القضارف.. زهور القضارف..
حتي عريسها نفسه اندهش، انا متزوج من اشهر فنانة شباب في السودان، وماعارف!
قعدنا نبشر ونشيل وراها وننتشي، والعروسات يزغردن ويرقصن في مقاعدن، وفي عرسان شالتهم الهاشمية وباسوا عروساتم عديل في الحافلة وقدام الناس، بشرنا نحن عليهم وقلنا ليهم:
ـ مبروك..
قلنا للسواق عليك الله يااوسطي ودينا جناين امتداد ناصر، نهيص شوية ونعمل حِتٍّة بارطي علي الاقل نتعرف علي بعضنا اكتر وبعدين نمشي الفندق.. قال لينا:
ـ انا والله ملتزم بزمن لو ماكدا كنت وديتكم،
ـ نزلنا كويس هناك ونحن نأجر لينا حافلة تانية عشان ترجعنا بطريقتنا الخاصة.
الحفلة حفلة تاريخية.. الناس الكانو في رحل قدامنا خلوا
فنانيهم وجو يحضروا حفلتنا، كشف شديد.. حت شديد، تجدع شديد..الم شديد، وصوت زهور القضارف بدون مايكرفون وبدون ساوند سيستم، بدون آورقن وايقاع، كان براهو اروكسترا، ولمان تقول ليك:

جياشا.. جياشا.. ووب عليا انا،
جياشا.. والجيش نقلو فتاشة،
كّر علي،
لو كنت زول صالح وتقي عديل زي ادم اخوي او المأزون العقد لينا زاتو، حتنمسخ.
3
جاء البوليس، بوليس النظام العام، سأل:
ـ وين التسريح يا جماعة ؟
قالت ليو زهور القضارف، بعدما لمت توبا وجدعت يدينا الملآنات بالغواييش في الهوا ولوت شفتينا الكبيرات لويتين رايعات وصفقت:
ـ تسريح شنو ياجنابو ؟
ـ تسريح الحفلة دى ؟
ـ سجمي ياجنابو.. انت مابتعرف القانون ولاشنو.. الحفلة العايزة تسريح الفيها ساوند سيستم او مايكرفون او مسجل عندو سماعات وصوتو عالي او اورقن او آلات موسيقية فيها سماعات.. ولكن دى حفلة بالخشم ساكت دى مافيها تسريح حسب قانون النظام العام لولاية الخرطوم 1999م المعدل في 2001م،
ودوي التصفيق والصفير والكشف وهتف الناس بصوت واحد:
ـ دا الكلام .. دا العلم!
قال العسكري:
ـ انا حآوريكم القانون.. و اوريكم الكلام الما بتعرفوه والعلم الما سمعتو بيهو. ومشي عشان يجيب قوة اضافية، ونحن أخذنا الحافلة ومشينا الفندق.
4
لمان جينا الخرطوم ونزلنا من اللوري، قابلنا ادم اخوي ومعاهو صحبانو، وقسمونا..انت تنفع تبيع موية.. وانت تبقي مداح.. ابراهيم، انت تنفع تبقي فنان شبابي.. بس احفظ شوية اغاني حقيبة.. انت تنفع امام جامع..
انت ياموسي تنفع عريس،
ـ لكن انا مابعرف امثل..
رد لي سيد الوكالة مبتسم:
ـ الحكاية ما تمثيل عرس جد.. جد .. بمأزون.. وقسيمة وكل شيء.. حتي شهر العسل.. تمشي تقضي شهر العسل حسب حظك في السعودية او الكويت او ابوظبي بس في شي واحد تعملو وهو المهم.. لمان تجي من شهر العسل تجي براك.. تخلي العروس هناك عشان الوكالة تاني تعرس ليك.


تعليقات 8 | إهداء 2 | زيارات 5324

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#41990 [سايق البوباي]
4.10/5 (9 صوت)

11-01-2010 12:20 PM
التحية والتجلة والامتنان لك ايها الساكن في نخاخيش الروح،، احييك واهنئك على هذا الابداع وهذا الامتاع لهذا اليراع،،
_________

الى صاحب الرد (مايهمك) \"ليس المؤمن بالطعان، ولا اللعان، ولا الفاحش، ولا البذيء\".


#23263 [ود العوض]
4.13/5 (11 صوت)

09-14-2010 09:15 AM
مبدع مبدع مبدع.


#23211 [احمد تاج ]
4.09/5 (8 صوت)

09-13-2010 09:26 PM
القصة التى تعكس الواقع على حقيقته تتطلب شجاعة نادرة وصدق في الكتابة،،، يندر ان يظهر في مجتمعنا من يمتلك هذه الشجاعة التى تحكى بها بصور واقعة،، وقد سبقك الطيب صالح في ذلك ،،،نرجو منك المزيد لنكتشف حقائق مجتمعنا وتفاعلاته بصورة مميزة وذكية ،،، ولتكن قصصك دائما كما عودتنا هي مرآة لنا لنرى فيها اهلنا بكامل انواعهم من الصغير إلى الكبير ومن الغنى إلى الفقير،،، فأنت اروع من يكتب عنها


#23120 [MOHAMED]
4.07/5 (6 صوت)

09-13-2010 12:19 PM
keep up the good work ya Berka , walahy zekrtna Elteeb Salah GOD REST HIS SOUL , VERY TOUCHING STORIES , VERY HIGH LEVEL OF WRITING ART , TO ONEST IDIDN\'T IMAGINE THAT THERE WILL SOME ONE WILL WRITE SUCH GOOD NOVEL AFTER THE DEATH OF ELTEEB SALAH ELAH YERHAMO ,

ITHOUGH I AM READING TO NAGGEB MAHFOOZ OR YOUSEPH ELSOBABI , BUT YOURS IS EVEN BETTER ! , THE A UNIVERSAL LEVEL STORY ESPECIALLY THAT STORY , MOSEIGA ELAZEM VERY VERY VERY GOOD


#22964 [مابهمك]
4.14/5 (8 صوت)

09-12-2010 10:33 AM
الفاظك زى وشك ياقبيح (؟)


#22958 [عبدو منصور]
4.15/5 (8 صوت)

09-12-2010 09:49 AM
اخوى المدهش ودبركة
عالمك سحرى تقودنا الحكاية بتسلسل ممتع وندخل مع شخوصك نعيش هذا الابداع حتي الثمالة .


#22939 [zola]
4.10/5 (7 صوت)

09-12-2010 07:38 AM
أي كلآم والسلآم !!!!!


#22900 [adam]
4.08/5 (7 صوت)

09-11-2010 06:57 PM
:o


عبد العزيز بركة ساكن
عبد العزيز بركة ساكن

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة