صمت العاجزين عن التفكير...!!
04-17-2012 04:03 PM


إليكم

الطاهر ساتي
[email protected]

صمت العاجزين عن التفكير...!!

** لقد أحسنت الحكومة عملاً برفضها لمقترح مصر لإنهاء قضية هجليج بالتفاوض..تلك أرض سودانية، أخذتها قوات دولة الجنوب بالقوة ويجب أن تستردها قوات دولة السودان بذات القوة..ثم مصر ذاتها غير مؤهلة للعب دور كهذا في قضية كهذه، إذ حلايب السودانية لم - ولن - تسقط من وجدان و ذاكرة أهل السودان..وإن كانت حكومة ما بعد مبارك بمصر بارعة في التفاوض حول قضايا الحدود، فلتفاوض السودان حول هوية حلايب..فالحكومة السودانية الحالية - آجلاً أو عاجلاً - سوف تذهب، ولكن أرض حلايب لن تغادر ماضي أجدادنا ولامستقبل أحفادنا، وحل قضية تلك الأرض - بالانسحاب منها - يجب أن يشغل بال ساسة مصر، وليس قضية أرض هجليج التي يستبسل في إستردادها شرفاء بلادي وأبرارها..وكأنها كانت تنتظر فرجاً، تلهفت حكومة دولة الجنوب نحو المبادرة المصرية ووافقت عليها بشروط منها ( وقف الإعتداء ونشر قوات دولية)، وهذه لعبة مكشوفة للإنسحاب بلاخسائر بعد أن ضربت القوات المسلحة سياجاً من الفرسان حول غزاتهم..ولكن لا، إذ خروج الأنذال من هجليج يجب ألا يكون بذات بساط دخولهم ، حتى ولو حولت راجمات الجيش وطائراته كل حقول المنطقة ومنشآتها ثمنا لمحرقة (غزاة سلفاكير) ..!!
** ولعبة الخروج من المأزق - السياسي والعسكري - بلاخسائر لم تقف عند قبولهم بالمبادرة المصرية، بل يتسترون بالأسرى أيضاً..نعم هم بعض شباب السودان العامل بمستشفى هجليج، وبصفتهم هذه عرضتهم حكومة دولة الجنوب للفضائيات بلسان حال قائل ( ديل الأسرى ونحن بنعاملهم معاملة كويسة).. وهتف البعض الساذج لحسن المعاملة دون أن يسأل ذاته ( هم أصلاً ليهو بقو أسرى؟) ..في معركة حق تم أسرهم أم معركة غزو باطل؟.. لقد تم أسرهم وهو يؤدون واجبهم في ديارهم وليس في ديار سلفاكير..وهذا ما يجب أن يبقى في ذاكرة الناس حين تحدق عيونهم في لعبة (حسن المعاملة) المراد بها ارسال خطاب ساذج للشارع السوداني، فحواه : (نحن غزوناكم برفق)..خطاب سياسي ليس إلا، لإستدرار عطف المشاعر، ولتنسى العقول أن هناك (هجليجاً محتلة)، وتم احتلالها بالغدر..فالمواثيق الدولية التي تنص على حسن معاملة الأسرى، هي ذات المواثيق الدولية التي تمنعك عن احتلال أرض الآخرين يا وزير اعلام دولة الجنوب، ولكن حكومتك تنتقي نصوص تلك المواثيق، بحيث تنتهك بعضها و تتجمل بالبعض الآخر، وكأن رؤوس أهل السودان خلت من العقول وصارت مجرد ( كسكتة)..ومع ذلك، نأمل أن تلتزم الدولة السودانية وقواتها المسلحة بأخلاق الحرب، بحيث لاتهين أسيراً ولا تعذب جريحاً، بل ولاتعرضهم في الفضائيات كما فعل بلهاء دولة الجنوب..فالأكرم إعادة أسرى دولة الجنوب وجرحاها الى ديارهم، فهذا من مكارم الأخلاق، ثم لتحدثهم أنفسهم لاحقاً بأن أرض السودان عصية على (الأنذال الأجانب)..!!
** ثم التحيات للحزب الشيوعي وهو يعلن بكل وضوح (نرفض احتلال هجليج جملة وتفصيلاً)، ولزعماء الإتحادي الديمقراطي وهم يعلنون بكل وضوح (ندين احتلال هجليج و ندعم قواتنا المسلحة)، ولكل قوى المعارضة المسؤولة التي استنكرت عدوان دولة الجنوب ولم تغفل عن المطالبة بالديمقراطية والحرية والتغيير في دولة السودان..وللإمام الصادق المهدي، وهو يتجاوز بموقفه الوطني المسؤول محطة إدانة عدوان دولة الجنوب ودعم قوات الدولة السودانية الى محطة تفقد جرحى معارك هجليج بالسلاح الطبي مؤازراً بسالتهم وشاكراً تضحياتهم..وهكذا الإمام كما العهد به دائماً يميز - بحسن بصيرته وصدق مواقفه - ما هو للوطن عما هو للحزب، حاكماً كان أو معارضاً..وعندما وصفت موقف الإمام الصادق في قضية إحتلال هجليج ب ( الكبير دائما كبير)، كنت أعى ما أقول..فالغاية العظمى من السياسة وكل تفاصيلها - متوافقة كانت أو متناحرة - هي ( الوطن )..يتفقدهم الإمام ويؤانسهم ويؤازرهم، ليس بصفة مسؤول في السلطة أو نافذ في حزبها، بل بصفة أسمى من هذا وذاك بكثير، وهي صفة ( ود البلد )..وتلك صفة لايحظى بها إلا ذو حظ عظيم في سوح العمل العام ...!!
** و لايزال البعض يلتزم (الصمت الخجول).. لقد عجزت أفكارهم وتجاربهم وشعاراتهم عن تشكيل موقف حول (غزو هجليج السودانية)..وهم الذين كانوا يدفعون بشباب السودان الى الجنوب قبل المفاصلة، ويعدونهم ببنات الحور وتحرير القدس، أوهكذا كانت الخدعة في سبيل الحفاظ على السلطة التي هم خرجوا منها مكرهين..واليوم يلتزمون الصمت حين تتعرض أرض الوطن الى الإعتداء الجنوبي، وعجزوا عن التعبير بالرفض أو بالقبول..فالسلطة كانت - ولاتزال - عندهم أغلى من أرض هجليج، بل أغلى من كل أرض البلد، ولذلك تدثروا بالصمت الخجول أمام عدوان أجنبي كهذا..على كل حال، ناصروا قوات بلادكم أيها الأفاضل، فالإرادة الوطنية التي تحمي أرض البلد لن تعجز عن تغيير حكومة البلد، أما الحيارى - الذين يتخبطون في مواقفهم الفكرية والسياسية، بل والوطنية أيضاً - فليناصروا ( غزاة سلفا كير)...!!




تعليقات 50 | إهداء 0 | زيارات 4930

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#337991 [أهل العوض]
5.00/5 (1 صوت)

04-18-2012 09:57 PM
يالطاهر ساتي انت تدافع عن حكومة (شايقستان) حكومة (التحالف النيلي العنصري) لأنك دنقلاوي والسلطة والثروة الآن وفي كل الأنظمة السابقة محصورة في الشوايقة والدناقلة والجعليين.لهذا تجد أي صحفي منتم لهذه القبائل الثلاث ينبح كالكلب المسعور ودونك مقالات كمال حسن بخيت في الرأي العام ودفاعه المستميت عن نظام التحالف العنصري النيلي وهو قبل هذا النظام كان يساريا بعثيا واصبح يطبل الآن لهذا النظام الذي مكن للتحالف النيلي العنصري واغرقهم في المناصب والثروات.نحن ناس الجزيرة نؤكد تضامننا مع كل حركات الهامش التي تناضل لاحقاق الحق والتوزيع العادل للسلطة والثروة بالسودان الذي يسع الجميع لولا أنانية ناس الشمالية وعنجهيتهم.
يا ناس المؤتمر الوطني انتو قايلين الشعب السوداني في رأسو قنابير الشعب مبسوووووط 24 قيراط لأي هزيمة تلحق بنظام دولة (شايقستان) المجرمة ولو الشعب ما مبسوط لهزائمكم كان خرج في مسيرات عفوية وملأ شوراع الخرطوم وباقي المدن السودانية وبعدين جيشكم ومليشياتكم المخصصين ليها 80 % من ميزانية البلد بتعمل في شنو عشان يجي الشعب الذي حاصرتموه بالجوع والمرض والجهل يقاتل لحماية نظامكم الفاسد أذهبوا انتم واولادكم قاتلوا إنا هاهنا قاعدوووووووون.


#337840 [محمد ايدام]
0.00/5 (0 صوت)

04-18-2012 08:14 PM
والله يا ساتى حيرتنا :اتضح تماما ان كتاباتك عن الفساد ما هى الا تكامل ادوار وهؤلاء الشرزمة : الزين تطالبهم بادانة العدوان نعم انهم مجاهدون ولكن هم الان فى غياهب السجون اما بمحاكمات هزلية اواعتفال بودن محاكمة : القائمة طويلة يا ساتى ولا داعى لزكرها : المهم اطلقوا سراحهم وارحلو من الحكومة بعدها سترى ناجى عبدالله واخوانه ومشية الخيلاء التى يحبها الله فى هزه المقام


#337347 [النور العاجب]
0.00/5 (0 صوت)

04-18-2012 02:08 PM
يا الطاهر مافى حاجه تمنع ناس الجنوب انهم يعملوا سلاح طيران ماتقعد تحمس فى المديده وانت عارف طيرانا من النوع القديم وديل كان جابوا بيجيبوا من اسرائيل وامريكا -الحل سياسى واول حاجه مافى عهد بينا وبين ناس البشير يعنى ممكن يفوتوا وحكومه محترفه لمده طويله شويه تهيئ البلاد للحكم المتداول - طبعا لو مشوا ديل الجنوب ماعندو مشكله معانا-


#337294 [abu alsurra]
0.00/5 (0 صوت)

04-18-2012 09:13 AM
كل المصائب ده جاي من خال الرئيس. حسي لو خلا ود أختو ده مشي جوبا كان دا كلو ماحصل. حسي
1- كم زول مات خلال الثلاثه أسابيع ديل
2- كم عربيه او اله عسكريه إدمرت
3- الطائره والطيار
4- والفضيحه الكبيره والشماته الجابو للجيش ده (هم بقولو إنسحبوا واخرين بقولوا فزو الاتنين كارثه)
5- والهوي الجابو لوزير الدفاع خلاهوا يتملتش من ناس البرلمان ومن الشارع ومن العساكر لمن قرب يمشي الشارع

خايتو حقو
1- عقلا المؤتمر الوطني (كان في عقلاء) يمسكوا خال الريس ده ويدو علقه في راسوا الكبير ده
2- ناس الجيش يقوموا بدفعوه ديه عن اي عسكري مات
3- واي جريح يديهو جرحه صغيره بموووووس
4- ويغرموه قيمة العربات والطياره الراحوا في امات طه

(لعن الله من أيقظ الفتنه)


#337240 [wedhamid]
0.00/5 (0 صوت)

04-18-2012 07:44 AM
يا الطاهر...أراك لاتزال تنافق و تمارى و تكابر و أنا محتار ما ثمن هذا العمل التى تقوم به بشكل صار يوميا( مع أن كل القضايا الخاصة بفساد عصبجية الإنقاذ ما كانت تستمر ليومين ثلاثه!!!) ما معقول إنت حيرت الكانوا معجبين بكتاباتك بموقفك الجديد دا ....سبحان الله إنت و سيدك نافع الغبيان داك بقيتو آباء للوطنيه .....و تتخيلوا إنو الآخرين ممن لم يجاروكم أو لم يتماشوا مع الإنقاذيين ديل رؤوسم مجرد (كسكته) ولكن أنت و النافع بتاعك دا الرؤوسكم مش كسكته بل (طرطور)هل تعرف شنو الطرطور ؟؟؟ بالتأكيد إنت نسيت إنو رئيسكم عمر البشير هو الذى نادى بالعدوان و دشن هذا العدوان يوم زيارته لبابانوسه و خاطب الجماهير فى نشوة رعناء و أعطى الضو الأخضر لقياداته العسكرية بالهجوم و تصفية الحركه ...هل نسيت ذلك ؟؟؟ و نائب الرئيس (الرجل الذى كان قبل مده قليلة خائنا للوطن و مطلوب للعدالة و فجأة أصبح فى ظل نفس النظام نائبا لرئيس الجمهوريه!!!) توعد الجنوبيين بإحتلال جوبا ذاتها .....إذن من دعى للحرب .... ودق طبولها ؟؟؟ دى مش ضربنى و بكا ...و سبقنى إشتكى ؟؟؟؟و بعدين يا الطاهر ...دايرنى أظاهر منو ؟؟ جنس الذى يقول عن من يظاهره ما يسئ إليه ؟؟؟إقرأ الآتى ثم أحكم .... ((إلى ذلك، حَملَ د. نافع على حزبي المؤتمر الشعبي والشيوعي، وكشف عن تفاصيل العلاقة الوثيقة التي تجمعهما مع الحركة الشعبية وحركات دارفور. واتهمهما بالاستخبار لصالح جوبا، ووصف د. نافع إدانة الشيوعي لهجوم الجنوب بالمتأخرة، وفرفرة المذبوح لاستغفال أهل السودان، وأوضح أن الشيوعي بكوادره جزء أصيل من الحركة الشعبية ومتمردي جنوب كردفان ودارفور)) و ((وفي الصدد انتقد ما وصفه بعودة حزب الأمة القومي إلى خلط الأوراق ومحاولات استرضاء الناس، وقال: (الأمة رِجِل في المركب ورِجِل في القيف)، وزاد: (رَكّاب سرجين وقّيع).)).... و دا فى حق من قلت عنه بالأمس -الكبير كبير- و أنقل إليك أحد الأبواق السابقين للإنقاذ و الذى ندم أشد الندم وتاب عن ماضيه الإنقاذى... الصحفى خالد ابو احمد فقد قال.......((أن هناك غالبية حتى داخل الحكم ترفض ما تقوم به الحكومة من تحشييد وتجييش، وأن غالبية الذين أعرفهم ممن كانوا مقاتلين أشاويس وأصحاب خبرة في العمل العسكري الميداني وحرب العصابات في جنوب السودان قد أبعدوا أنفسهم عن هذه المعمعة ليس هروباً أو تخاذلاً بل انهم أدركوا تمام الإدراك بأن العصبة تدفع بهم للمحارق لكي تبقى هي في الحُكم، وأن الكثيرون من هؤلاء الذين يعرفهم عمر البشير وكبار قادة الجيش قد أدركوا بأن الاصطفاف في صف الحكومة إنما هو دفاع عن الفساد الذي أزكم الأنوف، وليس له أي علاقة بالدفاع عن الإسلام الذي هو برئ منهم براءة الذئب من دم سيدنا يوسف..!!.)) فهلا إستوعبت هذا و إهتديت الى الصواب ....


#337187 [عبد الرحمن]
0.00/5 (0 صوت)

04-18-2012 06:33 AM
الطاهر ساتي، الفيك اتعرفت، بس ما قلت لينا رتبتك شنو؟


#337048 [هارون]
0.00/5 (0 صوت)

04-18-2012 03:53 AM
قعادك ياامير بيزيدك ذل على الذل اللى انت فيه
ودا الفرق بينك وبينك الباحثين عن الكرامة


#337001 [amir]
5.00/5 (2 صوت)

04-18-2012 03:04 AM
اذهب انت وهولا فقاتلوا إنا هاهنا قاعدون......


#336862 [Amin]
5.00/5 (1 صوت)

04-18-2012 12:34 AM
كنا في بلد واحد
قسموه اتنين.. و إتحاربوا الاتنين
بكرة يبقى أربعة وبرضو حنتحارب
فشل ...

ياخوانا الفشل دة بس كيفنه

كان الناس دي كلها حاربت
والدماء سالت وملت الوديان
والحال المايل قائم ..ونفس الناس يسوسوا الناس
مافي فايدة ..
ماكو فايدة
ماااااافي فائدة


#336824 [mohy]
5.00/5 (1 صوت)

04-18-2012 12:06 AM
كووووووووووووووووووووزززززززززززززززززززززززززز


ردود على mohy
United States [هدية] 04-18-2012 05:06 AM
لكن سوداني ياجنوبي


#336815 [علاء]
5.00/5 (3 صوت)

04-18-2012 12:03 AM
يوم موقعة (العلمين) فى مصر ايام الحرب العالمية التانية كان الجيش الالمانى والجيش الانجليزى بيحاربوا حرب ضروس و لكن(البدو) اصحاب البلاد كانوا قاعدين فوق الرمل و بيتفرجوا بى قمة الانتشاء,و لو كان عندهم (فشار) الزمن داك كان اكلوه و شربوا بيبسى بعديهو, لانه بالنسبة ليهم كان جيش احتلال بيحارب جيش احتلال, معنى كده ما فضل غير الاكشن الممتع, يالله , ده هو احساسنا زاتو, جيش احتلال بيحارب جيش احتلال,عشان كده احنا مبسوطين , عشان كده احنا ما بيهمنا منو البفوز و منو البيخسر وعشان كده الموضوع كله بالنسبة لينا فلم اكشن عنيف و ممتع من بطولة (فان ديزل) , عشان اذا هجليج رجعت للشمال ما فى تغيير حيحصل علينا ولو الجنوب احتلا الخرطوم زاتا ما فى تغيير حيحصل علينا , عشان كده اكتب ذى ما انت داير يا ساتى مهما كتبتا ما حيتفاعل معاك الا المستفيدين من الناس ديل-الناس العندهم حاجة يخسروها- اما حلايب كلنا مستعدين نحارب فيها لكن ماعشان حلايب زاتا فارقة معانا لكن عشان احنا ما بنحب المصريين ودايرين لينا سبب معاهم.
وقع ليك


ردود على علاء
United States [فوز] 04-18-2012 03:38 PM
You made my day

United States [ود الجزيره] 04-18-2012 02:32 AM
والله عبرت عن موقفنا تماما يلا ببسى ههههههههههههههههههههه والله انا مبوسوط شديييييييييييد فخار يلاقى فخار


#336778 [walid]
0.00/5 (0 صوت)

04-17-2012 11:40 PM
100% يا الطاهر ساتي

مصر المحتلة تتدخل ؟

لعن الله المصريين وزادهم سوء علي سوء بعد الثورة بتاعتهم دي !
!


#336624 [Alrufai]
5.00/5 (1 صوت)

04-17-2012 09:36 PM
يالطاهر انت راجل عظيم ولا اشك في وطنيتك ولكن اترك الحديث عن حلاليب الان وما بيننا وبين مصر عمار ياخي


ردود على Alrufai
United States [ود الجزيره] 04-18-2012 05:41 AM
السيد الرفاعى !! لو كنت فعلال رفاعى (رفاعيين) بجد تكون دى كارثه. الطاهر ساتى دنقلاوى عنصرى متعفن .عبد الرحيم وبكرى ومصطفى عثمان وكبار ضباط الجيش والامن والبنوك هم اهلوا !! ولو الامور مشت معاهم لاقدر الله والله ليبيع اهلك الرفاعيين فى سوق النخاسه. ماتشكر الراكوبه فى الخريف.. كعرب جزيره ونيل ابيض وبطانه افضل لينا الف مره الغرباوه والنوبه وحتى الاسرائليين من هؤلاء العنصريين العلوج عبده السلطه.. نعم لدخول الشيطان ذاتو للخرطوم

United States [walid] 04-17-2012 11:49 PM
الاخ الرفاعي

ليس بيننا وبين المصريين الا احلامهم باعادة استعمارنا

.


#336593 [kabashor]
0.00/5 (0 صوت)

04-17-2012 09:20 PM
ياخي قوم يا ساتي عليك الله الحقيقة الوحيده انو جيشنا قاعد ساكت , ما تشبكنا غدر وما غدر, الجماعة ديل دخلوا مره ودحرتوهم كما تقولون مفروض تكونوا عاملين حسابكم انو ممكن يعيدوا الكرة مره اخرى.لكن مادام جيش رئيسه ابخشم المليان بزاق ده ترجى منو شنو؟!!!!!


#336576 [zahi]
0.00/5 (0 صوت)

04-17-2012 09:09 PM
. (( ومع ذلك، نأمل أن تلتزم الدولة السودانية وقواتها المسلحة بأخلاق الحرب، بحيث لاتهين أسيراً ولا تعذب جريحاً، بل ولاتعرضهم في الفضائيات كما فعل بلهاء دولة الجنوب..فالأكرم إعادة أسرى دولة الجنوب وجرحاها الى ديارهم، فهذا من مكارم الأخلاق، ثم لتحدثهم أنفسهم لاحقاً بأن أرض السودان عصية على (الأنذال الأجانب)..!!)) عن اي اخلاق تتحدث اخلاق نافع ام احمد هارون ( قشو اكسح امسح اكلو ني ماتجيبو حي ) اامل علي كيفك.......


#336532 [ادم عبد الحق]
3.00/5 (3 صوت)

04-17-2012 08:47 PM
عفارم عليك يا ود ساتي
(على كل حال، ناصروا قوات بلادكم أيها الأفاضل، فالإرادة الوطنية التي تحمي أرض البلد لن تعجز عن تغيير حكومة البلد، أما الحيارى - الذين يتخبطون في مواقفهم الفكرية والسياسية، بل والوطنية أيضاً - فليناصروا ( غزاة سلفا كير)...!!)
دي زبدة المقال لكن وين العقول البتفهم ؟؟؟؟؟؟؟
وماعندي شك بانو المعلقين ديل اكثرهم جنوبيين باسماء سودانية ودي برضو لعبة مكشوفة !!!!!!!!!!
واصل نضالك ضد العدوان الاجنبي يازول ولاتأخذك في الحق لائم
بعد تحرير هجليج ارجع لعفن الكيزان وناضل زى ما كنت بتعمل ونحن حافظين ليك نضالك ضد اعداء بلدك ونضالك ضد الفاسدين وعندنا عقول بتعرف الصالح من الغلط
حياك الله وحفظك


ردود على ادم عبد الحق
United States [omer] 04-18-2012 05:00 AM
بعد تحرير هجليج ارجع لعفن الكيزان طيب ما الكيزان ديل هم الماسكين الكلاشات في الخطوط الاماميه اها بعد التحرير عندك نفس تتكلم والا حتخلي الرجال يتكلمو


#336527 [الارباب]
5.00/5 (1 صوت)

04-17-2012 08:45 PM
ان شاء الله ستعود لحضن الوطن ولا عزاء للمبطحين والخونة


#336448 [حسكنيت]
5.00/5 (1 صوت)

04-17-2012 07:51 PM
إقرأ مقال أحمد المصطفى إبراهيم ( ميزانية حرب بلا حياء) الموجود اليوم تحت مقالك بقليل..وخلينا نشوفك كان تقدر تتفاصح تانى


ردود على حسكنيت
United States [ود البلد] 04-18-2012 02:16 AM
ياحسكنيت احمد المصطفي وين هو قاعد في السودان دا ولا في الفنادق والهوتيلات بالدول الغربية
ثانيا الارقام البكتب فيها دي جابا من وين يعني بالبلدي كدا (مصدرو شنو الجاب منو ميزانية حرب بلا حياء) هل وزير الدفاع كلمو ولا الرئيس , ماكلها احلام اليغظة وياريت لو الواحد بيصحا علي طبق من ذهب .
شدو الهمة وارفعو المعنويات .

United States [جلال اسماعيل] 04-17-2012 09:18 PM
ساتي مشهود ليه بالكتابات القوية ياحسكنيت واحمد شنو البتهددو بيه ؟
اضرب اوغاد الجنوب بيد من حديد حتى تحرير هجليج


#336444 [كايل تود]
0.00/5 (0 صوت)

04-17-2012 07:50 PM
هجليج سودانية وستعود سودانية

ولا نامت أعين الجبناء !!!


#336424 [ود فضل]
3.50/5 (2 صوت)

04-17-2012 07:35 PM
مالك يا ود ساتي فارقتك الحكمة وتتحدث إلينا بلسان إنقاذي . . أي ساذج كان يعرف أن هنالك أجواء حرب في الأفق يشعل أوارها هؤلاء العابثون بمقدرات البلاد وأمنها وهل كنت تتوقع في ظل كل هذه المعطيات أن يعم السلام السودانيين قديمه وحديثه. . لم نسمع ولم نرى طيلة حياتنا دولة تؤجج للحرب وهي غير مستعدة لذلك لدرجة أن تُحتل مدينة استراتيجية في هذا الوقت الوجيز الأولى أن تطالب أنت وغيرك إن كانت لك الشجاعة الكافية بمحاكمة هؤلاء المقصرين من وزير دفاع ورئيس جهاز مخابرات والعمل لاسقاط هذه الحكومة التي سقتنا الهوان ولن تكون هجليج هي الأخيرة ان استمر نفس النهج ولماذا ترفض التفاوض في هجليج وتقبله في حلايب . . وبصراحة نحن حتى الآن ما استطعنا أن هؤلاء الذين تدعو لهلاكهم جزءُ منا فكيف استطعت أنت أن تخرجهم من وجدانك خلال هذه الفترة القصيرة جداً ما لم تكن تكمن لهم العداوة مسبقاً وتتمني الانفصال فوقع الانفصال على قلبك برداً وسلاماً الا أنك إستحيت أن تذبح ثوراً أبيض كما فعل صاحبكم صاحب منبر الخراب العاجل .


#336381 [zool]
5.00/5 (1 صوت)

04-17-2012 07:05 PM
الطاهر ساتي
بانت لبتك ، والاحزاب الوطنية تعرف جيدا الفرق بين المواقف الوطنية والمواقف المنبطحة ، ومحاولتك لتشويش الراي العام واظهار ان الموقف الوطني هو (تناسى ) السبب الاول والاخير في اشعال الحروب في كل مكان والقتل والتعزيب والتنكيل بابناء ، فانك واهم يا ايها (المنبطح) .
الشعب يعرف تمام منو القاتل ومنو المقتول واكبر دليل علي ذلك هو فشل النظام في تحويل الحرب الي زرعية للفت انظار الشعب عن مخازيه وهاهو يخرج آخر ما عنده من ادوات للتشويش وهي المدعين والمدعيات للاخلاق وتسجيل المواقف الزائفه امثالكم.
الي مزلة والي خزي والي عار إن شاء الله كل من ظلم واهان هذا الشعب الكريم.


#336376 [بيكو]
0.00/5 (0 صوت)

04-17-2012 07:02 PM
الطاهر ساتى انت وطنى اكتر من الناس كلها لية ما اتكلمت عن حلايب والفقشة ؟ خلاص وقفت على هجيج انت صخفى غير محترم خالص


ردود على بيكو
United States [توفيق] 04-17-2012 08:49 PM
اتكلم عن حلايب فى السطر الاول لكن انت بتقرا بكرعينك


#336357 [TIGERSHARK]
3.50/5 (2 صوت)

04-17-2012 06:45 PM
انا ماحا التزم "الصمت الخجول", واقولها بصوت عالي, ...انت واحد دجال وكذاب كمان يالطاهر ساتي....بدل ماقاعد تهوهيو في المكاتب المكندشه, قوم اتحرك وجاهد في هجليج وغيرها, ..يعني حسي قايل نفسك خلاص كتبت مقال كارب حايحمس الناس اشان يمشو يموتو ليكم يابني كوز !!! زمنكم فات وغنايكم مات يامغول العصر...داهيه تاخدكم من اولكم لاخركم وتسلم البلد من شروركم.


#336351 [سودانى جدا]
4.75/5 (3 صوت)

04-17-2012 06:43 PM
اولا اتعاطف مع شباب بلدى الاسير والعن من كان السبب فى جعلهم منز عشرون عاما وقودا لهزائمه! الطاهر ساتى يتناسى فى غمرة اندفاعه ان الاولى بالنصح فى معاملة الاسرى هو نظام البشير الزى قدم له الراحل قرنق اكثر من ثلاثمائة اسير بعد اتفاقية السلام وفى المقابل لم تقدم الحكومة اى اسير جنوبى لانها تعمل بمقولة احمد هارون اكسح امسح ماتجيبوا حى! ثانيا الم يشاهد العالم كله اسرى حركة العدل والمساواة وهم يعرضون بدون اى حياء ومراعاة للقوانين التى تتشدق بها يالطاهر؟ الم يرى العالم اطفال حركة العدل والمساواة وهم ينكل بهم رغم انهم قصر؟ هزا النظام لايحق له التكلم عن القانون الدولى وحسن معاملة الاسرى اطلاقاويالطاهر ساتى فلتقل خيرا او لتصمت!


#336322 [اصلي ما اتغشيت فك]
0.00/5 (0 صوت)

04-17-2012 06:24 PM
اقتباس: "وإن كانت حكومة ما بعد مبارك بمصر بارعة في التفاوض حول قضايا الحدود، فلتفاوض السودان حول هوية حلايب."

يا الطاهر ساتي ياخي انت تحفة.. عايز مصر تفاوضك على حلايب وحكومتك قافلة خشمها يطبية تراي سيركل؟ بالله مستنى الحكومة المصرية الجديدة تقول للحكومة السودانية ياخي تعالي شيلي حلايب بتاعتك دي مننا؟ علما بان طعم لحم الخرفان والتيران والسمسم والهبر التاني المدسوس لهسع طازج في حلوق المصريين. ياخي والله انا اصلي ما اتغشيت فيك ولا يوم.. تعرف الدور بتاع الوطني المحارب للفساد ديك كانت مرحلة انكشف عنها ورق التوت يا بتاع كيمان كيري الوطنية.. ارجع الى قواعدك سالما، فإن هجليج محتاجة لدبابين.. المرة الجاية كان جاهدت في الخرطوم ما بنصدقك.. قوم لف


#336306 [king]
5.00/5 (1 صوت)

04-17-2012 06:11 PM
لعن الله الكيزان وصحافتهم


#336302 [ياسر عبد الصمد عبد الله]
0.00/5 (0 صوت)

04-17-2012 06:08 PM
العزيز الطاهر ساتي الم تسمع كلام العميد معاش محمد الامين خليفة ؟


#336297 [الصليحابي]
5.00/5 (2 صوت)

04-17-2012 06:06 PM
يا ساتي يا كضاب إقرأ هذا المقطع من كلام الأستاذ معاذ :
( كما يقول المثل , عند حلول النكبة بالسجن , فلن يدافع المساجين عن السجن ولا عن السجان. هكذا كان الحال مع العراق وقت الغزو الامريكي الفرنسي البريطاني , وكذلك كان الحال مع بول بوت سفاح كمبوديا ابان اجتياح الجيش الفيتنامي لبلاده وتخليص شعبه من بطشه , وقريبا جدا ذهاب القذافي علي ايدي الثوار يدعمهم الناتو ,ومن قبله كثير ذهبوا الي مزبلة التاريخ من الطغاة العتاة السفاحين الباطشين بشعوبهم.
وهكذا واقع الامر الان مع نظام المؤتمر الوطني الباطش الذي يريد من ضحاياه مساعدته ساعة زنقته. اذ ليس من المعقول ولا من المنطق بمكان ان تقتلني وتُنكل بي وباهلي وعشيرتي ردحا من الزمن ثم تاتي وتستنفرني لاعينك واقف معك في وجه كائن من كان اراد بك سوءا . لا يفعل ذلك الامن به مس من الجنون او غباء مستحكم.
فعصابة المؤتمر الوطني فعلت الافاعيل باهل دارفور والشرق والوسط والمناصير , بل وحتي اهل العاصمة لم يسلموا من شرورها وبطشها من عسكر ومدنيين ممن قٌتل ظلما وغدرا في السجون او علي قارعة الطريق غيلة , ثم تاتي الان وتناديهم ليهبوا الي نجدتها مرددين كذبتهم باسلامية مبادئهم وهم الذين لم يتركوا محرما في الاسلام الا وارتكبوها
)


#336291 [المعلم]
5.00/5 (1 صوت)

04-17-2012 06:04 PM
اقتباس ..

( ..ثم مصر ذاتها غير مؤهلة للعب دور كهذا في قضية كهذه، إذ حلايب السودانية لم - ولن - تسقط من وجدان و ذاكرة أهل السودان..وإن كانت حكومة ما بعد مبارك بمصر بارعة في التفاوض حول قضايا الحدود، فلتفاوض السودان حول هوية حلايب..فالحكومة السودانية الحالية - آجلاً أو عاجلاً - سوف تذهب، ولكن أرض حلايب لن تغادر ماضي أجدادنا ولامستقبل أحفادنا، وحل قضية تلك الأرض - بالانسحاب منها - يجب أن يشغل بال ساسة مصر، وليس قضية أرض هجليج التي يستبسل في إستردادها شرفاء بلادي وأبرارها)

دي حسي جملة ليك !! .. هل من المفترض ان المصرين هم الذين يفتحوا ملف حلايب ؟؟؟
يا الطاهر طلعت عنصري بشكل .. لانو مافي فرق ما بين اخذ حلايب من المصرين و هجليج من قبل الحركة الشعبية .. و ليس هنالك ثمة فرق ما بين اي احتلال سواء كان بالالة العسكرية ام بالمكر السياسي ..
عموما الحركة الشعبية ليس لها رغبة في احتلال هجليج للابد .. و لكن احتلالها الان يقع من ضمن خطه هدفها تمرير اجنده تتعلق بالحريات الاربعة و حسم قضية ابيي ....... و عندما تنتهي ازمة هجليج .. اتمني ان يكون الطاهر ساتي كما الان قمة في الوطنية المتمثله في المبالغ المسداه تحت الطربيزه .. ربما .. او ان الطاهر الذي كان يدعي انه اسد الصحافة و كاشف الفساد الان يخشي من ان يصنفه نافع الذي خرج بتعريف جديد للوطنية

تبا لكم جميعا ايها الارزقية


#336273 [عصبنجى]
5.00/5 (3 صوت)

04-17-2012 05:57 PM
1- حكومتنا لا تحتفظ بالأسرى حتى تطالبهم بعدم عرضهم فى التلفزيون..لو عندك أى شك فى الكلام دا أسال البشير وأحمد هارون وموسى هلال.
2- لقد صمت يالطاهر 16 سنة عن حلايب ولم تخطر على بالك الفشقة..واليوم كل يوم مقال عن هجليج..يعنى يا دوب النار ولعت ؟
3- هجليج سودانية وستعود سودانية ، لكن يجب أن يذهب الذين يرضعون من ثديها الآن ويتبولون علينا..ذهابهم عنا له الأولوية على عودة هجليج وبقية المحتلات.
4- كنا نقرأ لك لنساندك والآن نقرأ لك لنرد عليك
إنتهى


#336257 [شمالي]
4.63/5 (4 صوت)

04-17-2012 05:51 PM
خلي عندك شجاعة وقارن بين تصرف أحمد هارون أمسحو اكسحو قشو ما تجيبوا حي
وبين موقف الحركة الشعبية المشرف مع أسرى القوات المشلحة
أيهما أقرب لروح الدين ؟!

مليتنا تفاف ساااااااي

مقالك شيلو وديهو لستات الفول والتسالي خليهم يعملوا منو قراطيس
أهو برضو أفيد من هراءك

أيوااا
قبال أنسى عملت شنو في موضوع حلايب؟ منتظرينك لي الحول
هل لازال من المحظورات الصحفية بقانون مجلس العبيد مروح؟
هاهاهاهاهاها


#336252 [أبو فاطمه]
5.00/5 (1 صوت)

04-17-2012 05:48 PM
استاذنا الكبير الطاهر ساتي

مع اعجابي الكامل لكتاباتك ومسئوليتها وانحيازها للمواطن الا انك لم توفق في مثل هكذا رؤيه .. علي العموم يبدو انك تاثرت بالحملة الاعلامية القوية لحزب المؤتمر الوطني او انك تحاول توفق اما انك خائف من تهمة الخيانة التي توزع من قبل المؤتمر الوطني لمن تشاء دون قيود ... دعنا لا ننساق ولا نهاب من مواجهة هذا التيار فحكومة المؤتمر الوطني هي من فرط اولاً في الجنوب كله وهي ايضا بعد ذلك من ادخل الدولتين في هكذا نفق وهي وحدها عليهارد هجليج .. والموضوع بسيط والتفاوض ليس ضعفا ... وفي النهاية زيتنا في بيتنا . والوضع مؤقت ليس الا فكلهم سودانيين ومؤقتا دعهم يسمون شمال وجنوب ...لكن ابناء السودان قادمون من جنوب وشمال لملمة الوطن من جديد.

هذه المرحلة تحتاج اقلامكم ان تكون اكثر جره وان لا تهادن .

لك التحية والتقدير ونعتبرها هفوة كبير ....


#336251 [شهاب ثاقب]
2.00/5 (1 صوت)

04-17-2012 05:48 PM
كلنا سودانيين كلنا مع القوات المسلحة لاسترداد هجليج نعم كلنا جنودولكن لابدمن محاسبة وزير الدفاع بل وإقالته لابد من تيحي رئيس جهاز الأمن نعم الوقت الآن وقت تكاتف الصفوف ولكن لم أجدصحفيا واحدا يدعو لللمحاسبة عما حدث حتى الإعلام شوف النيل الأزرق هجليج والناس بتقول وتغني أغاني حماسية لازلت أشعر أننا في مملكة غرناطة والذي يحكمنا هو أبوعبدالله الصغير


#336241 [القاضي]
3.00/5 (2 صوت)

04-17-2012 05:43 PM
المشكلة يا الطاهر التعلقيات كلها من أمريكيا وأنا عندي شك أنهم جنوبيون يتجملون .... حا تسمع عينة من الكلام أنك كوز وبنت على حقيقتك ومش عارف شنو ... حتى الما دعموك عينة الأسماهم في نهايتها أسماء قبايل شمال السودان عندي شك فيهم .... فاليذهبو للحجيم ... وليذهب للجحيم معهم من شاكلهم من الرعاع من ناسنا ... وحتى ناس موقع الراكوبة بقو ما واضحين ولا واضح تعاملهم ... نحن عارفين أنو نحن بشكل غير مباشر بندعم حكومة الخرطوم وبنقوي موقفها والكيزان الفاسدين حايستفيدو من ده في المستقبل ..لكن ده كلو يهون في سبيل بلدنا وسبيل الأرواح الراحت سداً وسبيل المواطن البيسطلي بنار دولار كل يوم زائد


ردود على القاضي
United States [مامون حسين] 04-17-2012 07:55 PM
الاخو برضو كاتب من امريكا ونعرفك كيف شمالي ولا جنوبي ذي ما انت حصيف وبتدعي انك بتعرف الناس من كتاباتهم؟ اخير كلام جنوبي يتجمل بحسن الاخلاق والقيم من شمالي لا جمل له ولا ناقة.

United States [الزول الكان سَمِحْ] 04-17-2012 07:53 PM
أخى القاضى

عفواً هناك عطل فى عرض البلدان التى تصدر منها التعليقات ..وأنا أكتب ردى إليك وأنا فى جدة..ولا يظهر عندك سوى علم أميريكا فأنوه بالإخوة الشرفين تعديل ذلك..


#336239 [ابو الهول]
0.00/5 (0 صوت)

04-17-2012 05:42 PM
"هذه لعبة مكشوفة للإنسحاب بلاخسائر بعد أن ضربت القوات المسلحة سياجاً من الفرسان حول غزاتهم..ولكن لا، إذ خروج الأنذال من هجليج يجب ألا يكون بذات بساط دخولهم ، حتى ولو حولت راجمات الجيش وطائراته كل حقول المنطقة ومنشآتها ثمنا لمحرقة (غزاة سلفاكير) ..!!"
اعلاه اقتباس :..... ان الحماس الفارغ وعدم الالمام بجوانب الاعمال العسكرية والتكتيكات الحربية هو نفس منطق تدخل الاداريين في اندية الكرة في اختيار المنتخب وتوزيع الخانات وهو ما يجري حتى في منتخبنا القومي ..وما في داعي المزايدات "طيب فرقك شنو من ..قش وامسح ما تجيبوا حي ...وناكلو ني ...الخ" وكأنك تقول :احرقوهم واحرقوا كل هجليج الفروخ اولاد ال...بلغة اخرى ...
" ثم التحيات للحزب الشيوعي وهو يعلن بكل وضوح (نرفض احتلال هجليج جملة وتفصيلاً)، ولزعماء الإتحادي الديمقراطي وهم يعلنون بكل وضوح (ندين احتلال هجليج و ندعم قواتنا المسلحة)، ولكل قوى المعارضة المسؤولة التي استنكرت عدوان دولة الجنوب.....الخ" هذه احزاب وطنية شامخة لا تنتظر شهادات وطنية من امثالكم ايها المستصحف الكوز +شوية موية....


#336237 [عصام الخواض]
0.00/5 (0 صوت)

04-17-2012 05:41 PM
الحور العين والمفاصله والاسرى وكلو ده ما الموضوع الموضوع خشً فيهو عديل او اسكت الموضوع كيف احتلت هجيلج اصلا وكيف لم يتخيل قريبك وزير الدفاع او يجول بى خاطره انو ممكن يحصل هجوم تانى على هجليج التى احتلت قبل اسبوع من سقوطها واعلن ذالك رئيس دوله الجنوب فى مجلس حكمه وانت كتبت وهللت لخروج القوات الجنوبيه يومها راجع ارشيفك ...احتلال هجليج لو حدث المرة الاولى لوجدنا لهم عذر المباغته ....احتلال هجليج بعد اسبوع من الهجوم عليها فهذا قمة عدم الوعى من وزيره دفاع تفنن فى بناء الابراج وسقوطها وسقوط ام درمان فى عهده كان كفيلا ان يطرد خارج التاريخ لو طلع راس الدوله واعفى وزير الدفاع الذى تسبب فى موت الكثيرين ولو اعترف وزير الدفاع بتقصيره ومسؤليته عن موت جنوده لوجدتم دعم شعبى كامل ولكنكم لا تعرفون ابسط قواعد اخلاق المهنه واخلاق الحكم اعوذبى الله كما يقول صديقى يا صديقى *


#336228 [الكارب]
3.50/5 (2 صوت)

04-17-2012 05:38 PM
والله يا الطويهر حيرتنا شنو الوطنية الفايتة الحر الدبت فيك فجاة مالك كنت ابكم لما جماعتك تسببوا في ضياعع الارض من الجنوب بالكامل في وطن تسلموه حدادي مدادي والله الاختشوا ماتوا و في علمك نحنا مازلنا نعتبر الجنوبيين سودانيين بس كده حرروا لينا حلايب الاول من الاجانب الباينين


#336195 [مقهووووووووووووووووووور]
4.50/5 (3 صوت)

04-17-2012 05:19 PM
والله الحكومة دي حيرتنا
جونا قالوا عشان الوطن
لا ابقوا الجنوب ولا دافعوا عن حلايب
لا حرروا الفشقة ولا خلونا في حالنا


#336186 [عصام الخواض]
5.00/5 (1 صوت)

04-17-2012 05:15 PM
الحور العين والمفاصله والاسرى وكلو ده ما الموضوع الموضوع خشً فيهو عديل او اسكت الموضوع كيف احتلت هجيلج اصلا وكيف لم يتخيل قريبك وزير الدفاع او يجول بى خاطره انو ممكن يحصل هجوم تانى على هجليج التى احتلت قبل اسبوع من سقوطها واعلن ذالك رئيس دوله الجنوب فى مجلس حكمه وانت كتبت وهللت لخروج القوات الجنوبيه يومها راجع ارشيفك ...احتلال هجليج لو حدث المرة الاولى لوجدنا لهم عذر المباغته او احتلال هجليج بعد اسبوع من الهجوم عليها فهذا قمة عدم الوعى من وزيره دفاع تفنن فى بناء الابراج وسقوطها وسقوط ام درمان فى عهده كان كفيلا ان يطرد خارج التاريخ


#336127 [مغبون]
5.00/5 (3 صوت)

04-17-2012 04:52 PM
الطاهر سلامات
ما اللذى يجعل هجليج أعزّ من حلايب؟؟؟ولماذا تستميت الطغمه فى معركة هجليج وتعمل أضان الحامل طرشا فى موضوع حلايب وغيرو؟؟ ياخى تراب الوطن تستوى قيمته هنا وهناك لو الموضوع أصلاً موضوع تراب وطنى ..لكن مصالح المؤتمر الوطنى الانيه لا تحتمل التفريط فى هجليج حتى لا تجف (النقّاطه)...
للمرّه المليون نحن مع الوطن وضد الانقاذ ... فليذهب الاحتلال الانقاذى (اللذى أهلك الحرث فى مشرع الجزيره,وأهلك النسل فى صراعات المصالح بين أخوة الوطن)و بعداك هجليج وحلايب هينات برجعن...
الشردن خلّهن ...أقرع الواقفات


#336126 [فجر]
5.00/5 (2 صوت)

04-17-2012 04:52 PM
منذ ثلاثة ايام قلت ان اعلان تحرير هجليج وليس تحريرها بات مسألة وقت ليس الا مايعني ان هجليج قد تحررت ولكن الواقع يقول ان قواتنا المسلحة مازالت تتلقى الهزائم وهي على بعد 30 كلم شمال هجليج بدل من توزيع صكوك الوطنية والتخوين اذهب لتساهم في تحريرها من ارض المعركة الواقع بدلا عن دفع شباب الجامعات وصغار السن لمحرقة هجليج وتظلون انتم في مكاتبكم المكندشة وتكتفو بالجهاد الالكتروني
الواقع ان معظم الشعب السوداني لاتعنيه هذه المعركة الخاسرة بل ومبسوط من هزائمكم الثقيلة ليس لانه يهيم عشقاً بدولة الجنوب بل بل تشفياً فيكم وفي مافعلتوه فيه طوال ربع قرن من قتل وتشريد وافقار وتفريط في الوحدة وفي االسيادة الوطنية في الاخير اقول لك ان هجليج وغيرها من المناطق التي تحت الاحتلا جنوبا وشمالا وشرقا نحن قادرون علي استردادها ولكن ليس تحت راية هذه الحكومة


#336124 [ممكون]
0.00/5 (0 صوت)

04-17-2012 04:50 PM
سبحان الله, كيف لمصر أن تتدخل فى هذا الشأن و هى بالمثل تحتل جزء من أراضى ما تبقى من السودان (مثلث حلايب)!!!
أحفاد الفراعنه هؤلاء لا يفهمون إلا لغة المصالح و لو لم يكن لهم مصلحه (إسرائيل تقيم سدود مائيه بالجنوب) فى وقف الحرب و لعودة الأمور لمربع اللا حرب و اللا سلم لما إجتهدوا فى التدخل
الكل يعلم و يشاهد حجم العماله المصريه بالسودان و بما أن مصر لم تعد قادره على إستيعاب من أنجبت لما إجتهدت فى محاوله الحفاظ على الامن بالسودان


ردود على ممكون
United States [غازي] 04-17-2012 08:54 PM
المقال دا بيبدا بحلايب ياممكون
اعد


#336122 [BEDR]
5.00/5 (1 صوت)

04-17-2012 04:49 PM
يا الطاهر تحرير حلايب من اولاد بمبه قبل هجليج


#336117 [مها الطيب]
5.00/5 (3 صوت)

04-17-2012 04:46 PM
طيب يالطاهر ساتي ان كان هؤلاء الاسرى يعملون في المستشفي

وين الجيش والدفاع الشعبي هل فكوا البيرق بمعنى شردوا عديل
اليس هم من المفترض ان يموتوا دفاعا عن ارض الوطن او الشهادة ولقاء الحور العين وكدا ؟


#336112 [M. Ayyoub]
4.50/5 (6 صوت)

04-17-2012 04:42 PM
الصادق المهدي (كبير) في زيارته جرحى هجليج وإدانة العدوان عليها ....
غير أنه (صغير) ولا يمكن رؤيته بالعين المجردة في جهاده المدني وانسحابه من الانتخابات المخجوجة...
وهو (صغير) من قبل هذا في ضياعه وقت البلاد في كثرة الكلام..
أيها (الوطني) الطاهر ساتي .. تحدث ما طاب لك الكلام في أشيائكم التي لا تعنينا .. تحدث ما طاب لك الكلام عن (وطنيتك) و(وطنية) (الوطنيين) و(الشرفاء) من أمثالك والتي لا تعنينا في قليل أو كثير .. أما وطنية السيد الصادق فهي ليست للمزايدة .. ونعلم عنها أكثر منك (انتهى)


ردود على M. Ayyoub
United States [ح نبنيه] 04-17-2012 06:58 PM
سبحان الله أصبح الناس في بلدي من الغباء بمكان حتى إستباحوا جلد الذات وإحتقار النفس في الإساءة المستمر لكبارهم وترديد العبارات الجوفاء بلا فهم. ليتكم إستمعتم لما يقول علكم نلتم بعض فضل علمه وأدبه, لكن يأيها ألإمام فعلا إعتبر فمرمي الله لو جيت ترفعه بتقع معاه وهذا بالضبط ا حدث لك جراء حب أهلك ومحاولتك إكرامهم, أنتم فعلا تشبهون من ولي عليكم وأدعو الله أن يغير مابكم أولا!


#336091 [عاشق النامير]
5.00/5 (4 صوت)

04-17-2012 04:32 PM
لقد ارتقيت مرقا صعبا يا رويعى الصحافه .

تأدب عندما تخاطب الكبار لانك كنت جزأء منهم

الاقلام المأجوره حتى الاصدقاء لايحترموها ناهيك عن الاعداء


ردود على عاشق النامير
United States [مسيري] 04-17-2012 08:59 PM
الاقلام الماجورة هي البتدافع عن دولة الجنوب الاجنبية
ولو الدفاع عن هجليج السودانية اجرا فليفتخر الطاهر ساتى بانه ماجور
انت من دينكا بور ولا شنو يا عاشق النامير ؟

United States [قرعوب] 04-17-2012 06:58 PM
يعني أنت زعلان من الطاهر عشان وصف الترابي بالخسه والنذالة وموت الضمير !!!؟؟؟ خليك من الطاهر إنت قولك شنو في الترابي؟؟؟؟ فهو مجرد كدوبه في أنف الزمن


#336056 [Nzaria]
5.00/5 (2 صوت)

04-17-2012 04:19 PM
يا ساتى.. هجليج دى سودانية والفيها ديل سودانيين ولوفى نفرة لحلايب او الفشقة حتلقان رامين قدام ولكن الصمت الخجول اخير ليك انت برضو يا (اب صفارة)...


الطاهر ساتي
 الطاهر ساتي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة