وبعد ما تكملوها؟
04-23-2012 12:37 PM

ساخر سبيل

وبعد ما تكملوها؟


لو أنك كنت تسير في داخل غابة ورأيت من على البعد أسداً يقترب من غزالة فهتفت (الأسد ح ياكل الغزالة) لما جئت بجديد ولما كان تصرفك هذا يقع في خانة التنبؤ لأنك عارف الأسد حيوان مفترس وآكل للحوم وما عندو (قشة مرة) يعني بيفترس أي (لحمة قدامو) وكده !
العبدلله قد كتب سيناريو عام 2006م أي قبل ستة أعوام عن منح (المحاسيب وذوي القربى) شهادات بحث للميادين التى في الأحياء للإستفادة منها .. فلل .. عمارات .. مستشفيات خاصة .. مدارس خاصة إلخ .. السيناريو الذي كتبته كان إسمه (المارد والأسطوانة) وهذا جزء منه أقراه عزيزي القارئ عشان أوريك ليه أنا جبت قصة الأسد !
(كان كل شيء في ذلك الحي يسير بصورة طبيعية الي ان عاد الصغار من مدارسهم.. والكبار من أماكن عملهم فى ذلك اليوم ليجدوا أن هنالك كميات مهولة من مواد البناء من خرسانة وسيخ وطوب ورمل قد تم انزالها في وسط الميدان.
- تكون الحكومة عاوزة تعمل لينا مصاطب للميدان؟
- مصاطب شنويا زول؟ معقول السيخ التخين ده يكون بتاع مصاطب؟؟
- طيب تفتكر عاوزين يعملو لينا شنو أحسن من الميدان؟ الميدان ده قاعدين نعمل فيهو مناسباتنا والأولاد قاعدين يلعبوا فيهو الكورة وهو المتنفس الوحيد فى الحى يعنى ح يعملوا لينا شنو أحسن منو؟؟؟
- (فى تهكم) يعنى تفتكر ح يعملوا ليك فيهو عيادات مجانية؟؟
- لا يعنى بتفتكر (الجماعة) ديل ح عملوا فيهو شنو؟
- دى عايزة ليها (درس عصر) ما ح يكون أدوهو لواحد منهم يعملو (فيلا) أو (مدرسة خاصة او (مستوصف إستثمارى)
- ونحنا مصلحتنا شنو؟
- (فى تهكم) مصلحتنا ؟؟ هو هسع شايف ليك زول من (الجماعة) ديل بعاين غير (مصلحتو)؟؟؟
تفأجا جميع سكان الحي بتلك (المواد) التى تم إنزالها فى منتصف (الميدان) .. وكانت مفاجأتهم أكبر فى اليوم التالي عندما عادوا من العمل ووجدوا بأن (الميدان) قد تم تسويره بالسلك الشائك ثم بالآليات الضخمة تزحم المكان والعمال يعملون في جد وأجتهاد)
عزيزي القارئ :
لم أكن أتنبأ حينما قمت بكتابة ذلك السيناريو فكما الأسد (ما عندو قشة مرة) كذلك أخواننا في الإسلام (المسئولين) برضو (ما عندهم قشه مرة) ويفترسون الميادين افتراساً فكان ما كتبناه قبل ستة أعوام عن قصة التغول على ميدان الحي الذي يمثل الرئة التى يتنفس من خلالها سكانه وتمليكها لأحد المحاسيب لإقامة مشروع إستثماري عليها الآن تحدث (القصة ذااااتا بي ضبانتا) في محلية شرق النيل وتحديداً بالحاج يوسف دار السلام مربع 6 أو اسم الدلع ( شرق النيل الفيحاء مربع 6 ) حيث تفاجأ السكان قبل 4 أشهر بآليات ومهندسين بالميدان الرئيسي للحى والذي يقع أمام المسجد والذي تقام عليه صلاة العيد والمناسبات إضافة للمناشط الرياضية ، قام المواطنون بسؤال الزوار عن سبب الزيارة فأجابوهم بأنهم شركة مقاولات اتت للشروع فى انشاء مدرسة خاصة (لاحظ خاصة) .
طلب السكان من الزوار ان يبرزوا اى أوراق تجعلهم يستوعبون الأمر فقام الزوار بإبراز شهادة بحث بملكية الميدان وتصريح مبانى (يعنى القصة متكتكة) وبى أوراقا وكده .
إزاء هذه (التكتكة) توجه وفد من سكان الحي (كما يقولون) الى السيد رئيس اللجنة الشعبيية للاستقصاء ولدهشتهم أنكر الرجل معرفتة بالأمر بل أكد بأن هذا ميدان خدمات ولايجوز لأى جهة نزعة وأبدى استعداده للتحرك الفورى ومعالجة الأمر .
إزاء هذه التحركات الدؤوبة من سكان الحي أمر السيد معتمد شرق النيل بإيقاف العمل حتى انجلاء الموقف إلا أن المواطنين قد تفاجأوا الاسبوع الماضى ببداية العمل وعندما توجهوا بالسؤال إلى رئيس اللجنة الشعبية بالحي عما يجري أفادهم بان المعتمد قال له (خليهم يبنوا وبعد ما المحكمة تحكم ليكم ح نكسر المدرسة) !
شفتو (الكلام ده كيف؟) المهم .. بعد صلاة الجمعة قبل الفائتة تجمع السكان (في الميدان ذاتو) للتشاور في أمر هذا الإعتداء حيث إتفقوا على تصعيد الأمر والعمل على توصيل شكواهم وتضررهم لأعلى المستويات وما أن هموا بمغادرة الميدان حتى تفاجأوا بعدد 2 دفار شرطة كامل العدة والعتاد (خراطيش +عصى +بمبان +سلاح عديل) وبوكس شرطة (ده بتاع الضابط طبعا) و2 بوكس أمن (جديد كرت) وعربة (اكسنت) ترجل منها اربعة شباب كل يحمل فى يده سلاح كلاش (وبعد شويه يقولو ليك فك مجموعة في الهواء وما عارف شنو داك) ، قام المواطنون بسؤال الضابط عن سبب حضورهم (المكثف هذا) فأفادهم بان لديهم بلاغ بالتجمهر واثارة الشغب بالحى ! ولما لم تجد (هذه الكتيبه المدججة بالسلاح) أعمال شغب ولا يحزنون قامت بأخذ 2 من سكان الحي (للتحري وكده) ! والآن البناء يجري على قدم وساق !
عموماً العبدلله وسكان الحي لا يطمعون أن يقوم أي مسئول كان بإيقاف هذه (الإستباحة الظااااهرة) لأنو القصة أصبحت (على المفتشر) والماعاجبو (الفساد ده) يلحس كوعو لأنو الظاهر مافيش زول خايف من حساب الدنيا !
كسرة : أها وبعد ما الميادين دي تكملوها ؟
كسرة ثابته :
أخبار خط هيثرو شنوووو؟ (4 واوات لأنو الكسره ليها 4 شهور وتاني كل شهر واو والفورة مليون) !



تعليقات 42 | إهداء 2 | زيارات 7460

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#345548 [ود الجزيره]
0.00/5 (0 صوت)

04-25-2012 01:55 AM
غايتو انا عاااااارف الشال الارض منو!! بدايتو بالشين ونهايتو اااااااايقى. فى زول عرفو؟؟!!!


#345475 [lollipop]
0.00/5 (0 صوت)

04-24-2012 10:46 PM
يا عمو جبرة أنا ما حأرتاح إللللللا أعرف حنة الشمس المشرقة، قصدى سيد المدرسة منو ، و حأتلحك أنا كمان بواوات متلتلة و أقول ليك أها سيد المدرسة طلع منووووووووووووووو؟


#345345 [حليم-براغ]
0.00/5 (0 صوت)

04-24-2012 08:09 PM
الأستاذ جبرا تقبل تحياتي
عندي ليك سؤال ما لاقي ليه اجابة؟ ناس البشير ديل من سنة 1989 زعلانين وفي كل خطبة بهددوا بتنظيف البلد من أعداء الوطن والدين ؟؟؟ هم منو ديل أعداء الوطن والدين ؟
أنا بفتكر كلامهم ماصاح لأانو ما في زول بيكون عدو وطنة ممكن يكون معارض لنظامهم بس مش عدو الأعداء ممكن تقول إسرائيل أمريكا وكل الدول الغير مسلمة...في السودان ما أظن في أعداء دين ...
أعداْء الدين كانوا زمان ناس أبولهب وكفار قريش وديل حتي ما كانوا سودانيين ... المهم إذا إنت
عندك رد لسؤالي أرجو أن ترد علي وتوريني أعداء الوطن والدين في السودان هم منو ؟ ممكن نكون واحد منهم وماعرف ...وله إذا ناس البشير عندهم كشف باسماء أعدا الوطن والدين خليهم يذيعوها للناس في نشرة العاشرة مساء بعد صلاة العشاء ...مع جزيل شكري


#345224 [AMEIR]
0.00/5 (0 صوت)

04-24-2012 05:43 PM
الفوره 6-0


#344999 [سودانى]
0.00/5 (0 صوت)

04-24-2012 02:51 PM
يأستاذى ازيدك من الشعر بيت هل تعلم بأن معتمد شرق النيل قال لورثة الميدان أيام العزاء بأن المدرسة ستقوم تخليدا لزكراهم .......وهل تعلم ياأستاذى بأن هذا الميدان هو الوحيد فى الحى وهل تعلم بأن أصحاب المدرسة الخاصة منحوا ارض بديلة للهذا المكان فرفضوا رفضا قاطعا وأصروا على هذا المكان تحديدا والماعجبو يشرب من المحيط


#344894 [مغبون]
5.00/5 (1 صوت)

04-24-2012 01:53 PM
والله كلما اقرأ هذه الاخبار المؤسفه اعطي الحق كل من يحمل السلاح ضد الحكومة،سموهم طابور خامس..خونة برضو رجال..الحاصل ده اضطهاد عديل ونهب مسلح،خليهم يبنو المدرسة واحرقوها بمولتوف ده الرد الوحيد البفهمو الحرامية ديل


#344656 [JAMAL]
0.00/5 (0 صوت)

04-24-2012 11:31 AM
انت ياخى ما سمعت الريس فى هجليج يقول (لا لدنيا قد عملنا نحن للدين فداء)وبرضو تصدق اخونك....
هى لله لا للسلطة ولا للجاه و انا مصدق ......


#344646 [jac]
0.00/5 (0 صوت)

04-24-2012 11:28 AM
كسرة مرتده (زي كورة مرتدة وكده )

الخطوط الجوية السودانية اخبارا شنو؟؟


#344603 [jac]
0.00/5 (0 صوت)

04-24-2012 11:00 AM
كسره مرتدة (زي كورة مرتده وكده )

اخبار الخطوط الجوية السودانية شنو وكده؟؟


#344543 [وجَعـــــــه]
0.00/5 (0 صوت)

04-24-2012 10:22 AM
ياحليل كنا وياحليلوو ميدان واسع كان بيلملمنا....مات الشعب مات الشعب


#344532 [ود عويضة]
5.00/5 (2 صوت)

04-24-2012 10:14 AM
والله هذا الميدان هو هجليج ناس حي الفيحاء - ومحل لإبراز وطنيتهم - ولهم الحق كل الحق في الثورة لكرامتهم - طالما تعرض الميدان للاغتصاب والاستباحة – ولابد من قناعة لديهم ان ما اخذ بالقوة لا يسترد الا بالقوة – وحتى تتوفر هذه القوة ، لابد من ابتكار أساليب جديدة لإخراج المعتدين الظالمين والغزاة المتجبرين - فكروا في سياسة الاعتصام طالبوا بحضور الوالي - او حتى الأمم المتحدة والاتحاد الإفريقي ؟ او ابعثوا برسائل نصية ومناشدات ومذكرات للمسؤولين الرئيس ونوابه و مستشارين ومساعديه والوزراء ووزراء الدولة والجيش والدفاع الشعبي والشرطة واجهزة الأمن والقوات النظامية الأخرى ومجلس الولايات و.رؤساء الصحف الموقوفة وغير الموقوفة..- - نادوا النساء ، البنات ، الأولاد الصغار ونهتف الشعب يريد الميدان يسقط الفساد وأهل الفساد لماذا لا نفكر في حرق الآليات التي وصلت الميدان أو حتى اللساتك عشان الدخان يبعد عنكم خطر الحشرات - ومادراك ما الحشرات !!!!!!!
كسرة
لا يغير الله ما بقوم حتى يغيروا ما بأنفسهم


#344380 [لَتُسْأََلُنَّ]
0.00/5 (0 صوت)

04-24-2012 08:05 AM
يا أستاذ جبرا
سمعنا في جماعة (تتحرش عدائيا) بإحدي الدول
خايف يستغلوا كسرتك (كل شهر واو) سيناريو
و ينفذوه بواسطة معارضة تلك الدولة و يبدوا
بإسقاط المدن ابتداء من (واو) زنقة زنقة ... و تكون
جنيت علي جيرانا إذا جاز القول:{السيناريست الملهم لعمل الشر كمخرجه}.
استنتاجا من الحديث النبوي: (الدال علي الخير كفاعله) !
التحية (لك) و قوود (لك).


#344346 [Ahmad Adallah Ali]
5.00/5 (1 صوت)

04-24-2012 05:37 AM
حزر فزر من هو صاحب هذه المدرصة الخااااااصة؟


#344298 [شكلى ناسى حاجة]
5.00/5 (1 صوت)

04-24-2012 01:28 AM
من اسبوع كتبت نشوف لينا ارض فاضية نجتمع فيها وقلت ليك اتلفت يمين شمال فى حلتكم لو لقبت مبدان فاضى نجنمع فيهو وقلت ليك الناس ديل باعوا خط هيثرو الفى السما يعنى حيدقسوا من الواطة احسن الفيسبوك اها شد حيلك جبت الهوا لناس حلتكم ابقى مارق يا الاخو


#344258 [mo ageb]
5.00/5 (1 صوت)

04-24-2012 12:18 AM
وينك يا استاذ
عليك الله اكتب لينا رقم موبايلك بعد الكسرة عشان نطمن عليك لما تغيب مننا
اجمل شئ في المقال الفورة قلت الفورة كم ؟


#344194 [ودفارس]
5.00/5 (1 صوت)

04-23-2012 10:52 PM
كات ده الحال والله الفورة مليون تجيك وانت فييييييييي عز شبابك


#344127 [البعير]
5.00/5 (1 صوت)

04-23-2012 09:02 PM
الاستاذ جبره تحية طيبة
اولا نشكرك علي طرح هذا الموضوع الحيوى والهام جدا وانا في راى ان هذه العصابة التي استولت علي الحكم في السودان منذ 23 عاما وجدت الشعب السوداني مسكين لا بهش ولا بنش لذلك طبقت فيه كل نظريات النهب والسلب والفساد ولا خلت ساحة ولا ميدان ولا مال عام ولا خاص والشعب 23 عاما معصور وجعان وغلبان وفي نظر العصابة الحاكمة ان الشعب السوداني تم دفنه بالحياء وانتهي العزاء بانتهاء الدفن ، فصلوا السودان والشعب ما تحرك واشعلوا الحروب في كل انحاء الوطن والشعب ما تحرك والغلاء الطاحن في كل السلع والدولار وصل 7 الف جنيه ( لو لا ثورة الانقاذ كان الدولار وصل 20 جنيه قال هذا الكلام صلاح كرار كان وزير في هذه العصابة ، يالها من مفارقات )واخيرا لا حولة ولا قوة الا بالله وكان الله في عون السودان0


#344126 [اللمبك]
5.00/5 (1 صوت)

04-23-2012 09:01 PM
ابو الجا...اذا الناس ديل باعو خط هيثرو (زى مانت عارف واناعارف وهم عاااارفيييين ) خط فى الهوا باعوه...مايبيعو ميدان شايفنو عدييييل بالعين المجردة..؟؟وبعد يكملو الميادين حيدورو فى اسطح البيوت والراجل يطلع معاهم الخلا...هه..سلام ع لجنة محاربة الفساد...؟؟؟ وتانى هه.


#344116 [الرباطي]
5.00/5 (1 صوت)

04-23-2012 08:52 PM
كان ركبنا في ضهر الاسد بياكلنا وكان نزلنا منو برضو بياكلنا


#344076 [نوف محمد]
4.00/5 (3 صوت)

04-23-2012 07:59 PM
تعرف يا استاذ اكبر سرقة في تاريخ السودان حصلت برضه في ميدان كبير امام بيت سعود البرير وقريبة لمنزل الطيب عبدالله رئيس نادي الهلال عليه رحمة الله في المنشية، هي عبارة عن قطعة كبيرة جد كانت تابعة للكنيسة، اها الجماعة ضموها لحاجة اظن اسمها الضمان الاجتماعي او حاجة ليها علاقة بالمعاشات ما متأكد، المهم باعو القطعة من 150 الف دولار الى 200 الف دولار، وبعرف كم واحد اشترى منها،حوالي مئة قطعة، تقول لي برضة ميدان في شنو ما عارف، الله يرحم حبوبتي ام ابوي، كان عندها مثل كارب كانت بتقول الواحد يمنعو من شراب المريسة يقوم يشد العرقي،ههههههههههههههه، اها ده بس حال الكيزان في السودان


#344063 [بت الخرطوم]
5.00/5 (2 صوت)

04-23-2012 07:45 PM
اول مرة اعرف سكان مربع 6 بالحاج يوسف اقوى من القوات الجنوبية الاحتلت هجليج يا جبرا ما بالغ هجليج استردوها باستخدام الايدى وليس بالسلاح حسب ما صرح به قائد ملحمة الملاكمة اليدوية الواء كمال معروف ياراجل معقولة 2 دفار شرطة كامل العدة والعتاد وبوكس شرطة و2 بوكس امن وعربة اكسنت كلو دا لسكان عزل خارجين من المسجد بعد اداء فريضة ظهر الجمعة والله ناس الشرطة ديل مساكين مش كان افضل ليهم استعينو بصاحب نظرية الاقتحام بالايدى وكفى الله المؤميين شر القتال


#344004 [مستاء]
5.00/5 (4 صوت)

04-23-2012 06:04 PM
يا استاذ وينك طولت الغيبة ولا متحركم كان بيمشط بعد التحرير ووكلت ليه مهام اخري .
نجي لسيرة الميادين شوف الميادين دي برضك زي بترول هجليج للكيزان وازيدك من الشعر بيت كل الاراضي المقام فيها الكنائس سيتم سحبها لصالح الكبار وانت بقيت من الكبار وسجلت في متحرك حماده لف وشوف ليك ارض ترضيك .... وكلم دفعتك بس علي طول تتسجل باسمك ....... انت خلاص خليت خط هثرو كده هديت اللعب كويس . عقبال ما تخلي الفورة و الواوات الاربعة دي . تعال نكون لجنة مفاوضات لتهدئة اهل الحي ونخبرهم ان المدرسة ستعلم ابنائهم بعد ما تمص جيبوبهم يعني وكمان ستكون منارة علمية شامخه تدخل الحي في موسوعة قنس للارقام القياسية عن فقدان الحرية والارادة الوطنية وممكن تتسجل في اليونسيف علي انها رمز للقهر والاستبداد والاستعباد ويشتهر الحي في ارجاء المعمورة ............. انت فكر في بقية الصورة وبكده نكون هدينا اهل الحي وكفيناهم شر سيل الدماء اليومين ديل كافي البلاء الجماعة نافشين ريش اللالوب بقت اقل حاجة نار علي طول ما الريس ومساعده ختوها واضحة عصااااااااااااااااااء وهلااااااااااااك بس للاعداء في الداخل ما كلنا اعداء في الداخل كان جنوبين ولا شعب فضل .
اصبحت السخرية لا تخرجنا من ما نحن فيه ورينا علاج تاني (اوعاك يكون الكي _ القلب انكوي كتير)

كسرة بكسرة وزيرنا الهمام ........ جبت لينا معاك لالوب من هجليج ؟


#343991 [انور]
4.50/5 (4 صوت)

04-23-2012 05:48 PM
استسلمنا خلاس استسلمنا ليكم يا كيزان
انتو الاسياد واحنا العبيد
انتو البف باف واحنا الحشرات
دينا قديتو
بلدنا ضيعتو
الله فى ؟ الله فى ؟
السؤال ده ليكم
الله فى؟


#343956 [عبد الواحد المستغرب اشد الاستغراب!!]
5.00/5 (5 صوت)

04-23-2012 05:10 PM
الله عليك ياجبرا000(الدؤؤبه)00ياسلاااام الله يرحمك يا محمد إبراهيم نقد، والله ياجبرا كلمة (الدؤؤبه) دى تسمعها من الزملاء طالعه من خشمم ذى العسل!! ويكفيهم شرفا إنهم كانوا ومازالوا لكن على خفيف!! يناضلون من آجل إقتلاع الحقوق من الاقطاع عينة جماعتك (ماركة سرب الجراد) الذين إعتادوا على بلع وهضم أى شىء يجدوه أمامهم حتى ينعم بها المواطنين وليس العكس، وعزائنا أن الميادين لامكان لها فى الاكفان، ومن أجل القضاء المبكر او الحد منها على الاقل رجونا مولانا سيف الدوله ورفاقه المهمومين الاسراع فى تكوين مجلس وطنى إنتقالى يكون اولى مهامه إصدار قوانين يصادق عليها كافة المعارضاة الموجوده الان والاتحادات والروابط وتضمينها بنود تقضى ببطلان مثل هذه الاستحوازات الجائره وحتى لايتمكن الذين تملكوا مثل هذه القطع من بيعها وتهريب الاموال للخارج00ولايمكن ياجبرا أن نقف هكذا مكتوفى الايدى ونبحلق فى تصرفات النظام ونفاجاء يوما بعدد من المستثمرين (أبيين عقالات) وهم يقومون (بجسنا) ومعهم أقفاص تمهيدا لنقلنا فيها بحجة انهم إتفقوا خلاص مع الحكومه وأشترونا منها ويومها لن يعترض احد لان (القوات ستتقدم)بالطريقه التى شاهدتموها بأم أعينكم ولم تحكى لكم!! وكما تعلم ويعلم احبائك القراء ان النظام باع كل شىء حتى ذممهم باعوها لاسواء مشترى ألا وهو (الشيطان) ولم يتبقى غير المواطن!!0


#343909 [حامد]
5.00/5 (5 صوت)

04-23-2012 04:20 PM
الفوره مليون ! زهجت ولا شنو يا جبرا!


#343906 [محمد كامل عبدالرحمن]
0.00/5 (0 صوت)

04-23-2012 04:18 PM
الجوس بالكلمات / بقلم محمد كامل عبدالرحمن
[email protected]
تطورات خطيرة في الفيحاء
اعتصم امس عقب صلاة الجمعة العشرات من سكان حي الفيحاء مربع 6 - الحاج يوسف - احتجاجاً علي نزع معتمد محلية شرق النيل للصيوان الذي نصبته اللجنة الشعبية كوسيلة سلمية للإعتراض علي قيام مدرسة خاصة في الميدان الوحيد للحي وهو الساحة التي يقيمون فيها صلاة العيدين ويستخدمها شباب الحي في انشطتهم الرياضية ، ورغم ان الاعتصام كان سلمياً حيث خرج السكان من المسجد للميدان لتنفيذ وقفة احتجاجية عادية الا انهم فوجئوا بوصول عدد من عربات السلطات الامنية اعقبها وصول عدد كبير من رجال الشرطة تتبعهم عربتان صغيرتان لضباط الشرطة وبدا المشهد وكأن السلطات في شرق النيل تريد حشد قوتها لمهاجمة المعتدين علي ( هجليج ) وليس مواطنون مدنيون عاديون لا يحملون اي نوع من انواع السلاح ثم انه سرعان ما تزايدت وتيرة الاحداث حينما اقتادت السلطات الامنية اعضاء اللجنة الشعبية للحي للتحقيق معهم في مباني الجهاز بحي القادسية بمحلية شرق النيل وقالت الاستاذة سناء حامد خالد المحامية وعضو اللجنة الشعبية ان القانون يمنح اعضاء اللجان الشعبية حصانة من الاعتقال والاحتجاز وما لم يتم رفع هذه الحصانة فإن اعتقالهم واحتجازهم يكون مخالفاً للقانون والدستور ومن المهم الحد من حالات الانتهاك المستمر للقانون والدستور من قبل الجهات المفترض فيها حماية الدستور والقانون وحماية المواطنين .
وبحسب اضطلاعي علي اصل الازمة فهي تتمحور في ميدان حي الفيحاء وهي السبب الرئيسي في إثارة غضب السكان فإن سلطات محلية شرق النيل تعاملت مع المشكلة بانفعال أمني مفرط فسره المراقبون بأنه راجع لتقديرات وتوجيهات عليا تقف مع الجهة الخاصة صاحبة المصلحة في تشييد استثمار خاص داخل ميدان الحي ، وحتي تقف السلطات الولائية التي يهمها الامر علي حقيقة المسألة يتوجب علي السيد والي ولاية الخرطوم الاجابة علي السؤال التالي هل لدي السلطات العليا في الولاية مصلحة في تأزيم الوضع في ميدان حي الفيحاء ؟ ولماذا كل هذا الوجود الامني والشرطي داخل الميدان ومتي كانت مقدرات الولاية وقوتها الشرطية تستخدم لحماية القرارات الخاصة بالتغول علي الميادين والساحات ؟ واذا كانت اللجان الشعبية هي سلطة سكان الاحياء المنتخبة فبأي قانون يتم سلب صلاحيات هذه اللجان وتعريض اعضاءها للاعتقالات ورفع الحصانات ؟.
ان رئيس لجنة الامن بالمحلية والذي هو معتمد محلية شرق النيل أفاد بعض اعضاء اللجنة الشعبية بأنه لم يصدر اي قرار برفع الحصانة عن اعضاء اللجنة الشعبية لحي الفيحاء ولكن الوقائع علي الارض تقول ان الحصانة اما مرفوعة او لا يؤبه لها وهو الامر الذي خلق ازمة واتجاهاً للتصعيد القانوني ضد كل المتورطين في عمليات الاحتجاز غير القانوني لعضوية اللجنة الشعبية للحي ممن قالوا بصريح العبارة انهم تلقوا (اوامر عليا) تري من هي هذه الجهات التي تصدر اوامر عليا تعلم تماماً انها مخالفة للقانون والدستور والاعراف وماهي مصلحتها من كل هذه الفوضي ؟ ان قضية ميدان حي الفيحاء ليست هي القضية الوحيدة التي تشكل تهديداً للسلم والامن والاستقرار للسكان والمواطنين في المقام الاول قبل السلطات الولائية ، ان التغول علي الميادين والساحات العامة اصبحت تؤرق مضاجع السكان في العديد من احياء الولاية ومن الواضح انها ترتبط بملف التلاعب في الاراضي الذي فاحت روائحه في كل مكان وهو ما ستكشف عن جوانب كبيرة منه محكمة الطعون الادارية بام درمان والتي تنظر في قضية مماثلة بين سكان الثورة الحارة الثالثة واحدي الجهات الخاصة التي شيدت مباني داخل ميدان الحي ، ان قضايا الميادين ترتبط بالفساد في ملف الاراضي لان تخصيص ومنح الميادين والساحات يجئ مخالفاً لنص القرار الذي اصدرته رئاسة الجمهورية في هذا الخصوص والقاضي بمنع التصرف في الساحات والميادين العامة .
نحن نتوقع حينما تستوي هذه الازمة وتأخذ حجمها الحقيقي ان توقف عملية التغول علي ميدان حي الفيحاء وان تطيح بمعتمد شرق النيل لانه لم يحسن تقدير الامور وفشل في لملمة المسألة حتي خرجت عن السيطرة وتحولت الي عملية اعلان حرب بين السكان المدنيين والقوات النظامية المدججة ولانه ببساطة يحارب ( صيوانات القماش ) كما توهم من قبل دوت كيشوت في حربه المزعومة علي طواحين الهواء. ولنا عودة .


#343893 [الزول الكان سَمِحْ]
5.00/5 (4 صوت)

04-23-2012 04:03 PM
يا أستاذ

إنتا بديت لينا الموضوع...بالغابة... والأسد... واللحمة ويعدين لفيت بينا بى كوستى وربك والقطينة وسوبا لحد ماجبتنا بالخط الدائرى..وانتهيت بينا فى الحاج يوسف مربع ستة..

الغابة الدخلا الأسد عشان ياكل الغزالة!!! فيها (لالوب)..؟؟؟

الفاتح جبرا..شِفِتْ دددددده


#343889 [bahi]
5.00/5 (2 صوت)

04-23-2012 04:00 PM
ليتها وقفت على ساحات الاحياء وبس .. دا شارع النيل بحاله دخل مزاد التمكين ..
والبداية بمستشفى العيون و مكتب الوالى(ما هو وارثو من ابوه)..


#343876 [سامر المدنى]
5.00/5 (1 صوت)

04-23-2012 03:48 PM
ياسلام عليك ياود جيرة .. بالظلط والا بالنص ؟
كلامك ده انا قريته قبل كده ومعقول ليهو ستة سنوات ؟ الظاهر الميادين بتجرى بينا بسرعة .. تحياتى ليك يارائع وخليك مع الزمن


#343866 [كتكوت]
5.00/5 (1 صوت)

04-23-2012 03:36 PM
انت عارف ياجبرا بعد دا حيقبلوا على البيوت القديمة بحجة انتهاء الحكر وكدا ... وان الحكومة ما عاوزة تجدده للحوجة الماسة وسوف تسعى لتعويضهم


ردود على كتكوت
United States [sudani-online] 04-23-2012 05:20 PM
ياكتكوت ياأخى مالك مذكر الناس ديل حكاية الحكر وكدة .....والله دى مصيبة وجايانا ربنا يستر...............

United States [دا كلام ما صاح] 04-23-2012 04:26 PM
يااخى انت معانا واللا مع الخيانة؟؟
بكرة حيتبنوا افكارك دى ونبقى فى الأعتصامات..
الله يكضب الشينة بس


#343854 [هيثم علي جمال نمر]
0.00/5 (0 صوت)

04-23-2012 03:24 PM
لك كل الاحترام و التقدير استاذي الجلال جبرا


#343838 [المعلم عاشور]
5.00/5 (3 صوت)

04-23-2012 03:12 PM
المصيبة يا سي جبرا أن الناس الكانت تهجج و تعرض مع البشير فى الساحة الخضراء مؤكد فيهم ناس كتار من أهالى الفيحاء مربع سته , يعنى معادلة أنشتاين ما يحلها , على العموم أنا شايف الشعب السودانى مخه إتلحس و جن و فقد المحنة عشان كدا تلقاه مبارى تجمهرات الكيزان يكبر و يهلل و يعرض و يزغرد و هو عايش تحت خط الفقر جيعان و مرضان و عاطل عن العمل .


ردود على المعلم عاشور
United States [3Atel] 04-24-2012 01:00 PM
والله دة المحيرنا ذاتو لكن الكلب بريد خانقو


#343777 [واحد تانى]
0.00/5 (0 صوت)

04-23-2012 02:33 PM
هولاء الذين يحكمون هم جهله....!!


#343751 [sudani]
0.00/5 (0 صوت)

04-23-2012 02:16 PM
و الله يا جيرة الليلة الكسرة احتاجت منك كم كرت ؟ انا بقول 3 كروت
بالرجوع لموضوع الميادين و تغول المتسلقين الطفيليين الكيزانيين او كما ورد فى فقه التمكين صفحة مافى السطر قبل الاخير
فى التسعينيات كانت هنالك فرق تتبع لوزارة الاسكان ومقرها الدار الاستشارية فى عهد بانقا مهمتها تفتيش الاحياء السكنية لمعرفة المساحات الخالية او الميادين التي تصلج لات تباع او تملك لاحد النافذين وقد عايشت احدي هذه القصص


#343720 [samisaeed]
5.00/5 (2 صوت)

04-23-2012 01:58 PM
المشكلة بعد كلوا يقولم متمسكين بالمشروع الحضاري والشريعة وغيرها من المصطلحات انما ما عارف كان ما كانوا متمسكين بالشريعة كانوا حيسوى شنو


#343708 [azoz]
4.75/5 (3 صوت)

04-23-2012 01:51 PM
عجبتني الفورة مليون دي بس خليك عارف الناس ديل نفسم طويل يعني لو الفورة مليارين ما عندهم مشكلة


#343701 [ود البلد]
5.00/5 (6 صوت)

04-23-2012 01:48 PM
الله المستعان تقول لى برضوا حررنا هجليج اخى الفاتح القصه ما هجليج ولابترول دى قصص مفتعله عشان يدمروا ما تبقى من السودان وكسب عطف وتاييد هذا الشعب الضعيف.لكن التحرر الاكبر اات لا محال.نرجع بازن الله كل ما سلب من الشعب مش خط هثروا بس.


#343684 [ساتى]
5.00/5 (7 صوت)

04-23-2012 01:37 PM
يا اخى ديل شالوا حياء وكرامة وابتسامة وعزة وجلسة العصريه وشاى المغربيه وحتى ونسة الرجل مع اولاده بالامسسيات وما يشيلوا قطعة ارض؟؟؟؟؟؟؟؟؟؟؟؟؟؟؟؟؟؟؟؟؟ظ


#343655 [Mohamed Omer]
4.75/5 (3 صوت)

04-23-2012 01:18 PM
والفورة مليون000ياخ بشبش شاله تت تو ما سمعتو في خطاب تحرير هجليج قال ليك 00"الناس ديل عصرناهم عديل" الناس ديل ما نحن وكدا!!!!!!!!


#343637 [azoz]
5.00/5 (2 صوت)

04-23-2012 01:06 PM
عجبتني الفورة مليون دي بس خليك عارف الناس ديل نفسم طويل يعني لو الفورة مليارين ما عندهم مشكلة


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة