دخلت الجينات وكده !
04-25-2012 01:17 PM

ساخر سبيل

دخلت الجينات وكده !

الفاتح يوسف جبرا

عزيزي المواطن قم بفتح مطعم .. كافتيريا .. جزارة .. أي محل لبيع الأطعمة .. من (قولة تيت) ستجد أمامك جيشا من المتحصلين الذين لن تنقطع زياراتهم عنك ..شي متحصلين بتاعين ضرائب وشي بتاعين الزكاة وشي بتاعين نفايات وشي بتاعين رخص ومحلية وشي شنو ما بعرف .. الشخص الوحيد الذي سوف تفتقده ولن يأتي لزيارتك هو الشخص المسؤول عن تفتيش المحل وفحص ما يقدمه من أغذية ومدى صلاحيتها للإستهلاك الآدمي .
وإن أردت عزيزى القارئ التأكد من هذه الحقيقة (المرة) فما عليك إلا الدخول إلى أحد المطاعم الشعبية بأسواق (العاصمة الحضارية) حيث رداءة العرض للمأكولات وقذارة الأواني وإستخدام الزيوت (غير المعروفة) ذات اللون الداكن من كثرة الإستخدام مع التواجد الكثيف للذباب هذا غير ملابس العمال المتسخة حد الغثيان وأياديهم التى تتقطر عرقاً من سخونة المكان وإنعدام التهوية .
للأسف الشديد عزيزي المواطن لا توجد جهة (على أرض الواقع) تقوم بالرقابة على الأغذية وعمل زيارات دورية ومفاجئة للمطاعم والكافتيريات والأسواق ومحلات بيع اللحوم والعاملين بها (ده في العاصمة) ناهيك عن الأقاليم؟ السبب كما إعتقد بسيط وما عاوز ليهو (درس عصر) وهو إنو حتى تقوم السلطات بمثل هذه المهمة فهي تحتاج إلى عربات وبنزين وسواقين وموظفين واجهزة فحص وخلافه وطالما القصة فيها (صرف) على المواطن (ودوشة دماغ) وميزانيات (يجيبو ليكم قروش من وين؟) إن شاء الله تاكلوا لحم (كلاب)، (لحم حمير) أو حتي (كدايس) !
العبد لله لم ولن يتعجب أو يندهش على الإطلاق لمثل الخبر الذي اوردته الصحف مؤخراً والذي يفيد بإلقاء الشرطة القبض على جزار بمنطقة انقولا بمايو أثناء محاولته عرض لحم (كلب) للبيع بعد أن قام بذبحه وتقطيعه و(توضيبو) وتجميع لحمه في شكل أكوام بغرض بيعه للمواطنين !
بل العبدلله يعتقد جازماً أنه في ظل ما نشهده من غياب أي نوع من أنواع الرقابة (الحكومية) على الأسواق والمطاعم والمأكولات فإن لحوم الكثير من الحيوانات الأليفة وغير الأليفة ، (النافقة) والمذبوحة ، الراجلة والزاحفة قد تسريت إلى بطون المواطنين منذ عدة سنوات في شكل (لحمة مفرومة) وسجق وشاورما و(أقاشى) وشيش كباب وكفتة وخلافه !
بالطبع لم يكن جزمي هذا من فراغ إذ ان استمراراالحالة غير المسبوقة التي يمر بها (الشعب السوداني الفضل) من غلاء لكافة متطلبات الحياة (بما في ذلك اللحوم التي وصل سعر العجالي منها 32 الف جنيه) تجعل الكثيرين من ضعاف الأنفس يتجهون للغش بكافة انواعه ولك عزيزي القارئ أن تعلم أن مسالة القبض على هذا الجزار (بتاع الكلاب) ليست هي الأولى من هذا النوع لأنو في واحد قبلو (بتاع حمير) وده كان قبل سنوات حيث كتبت حينها مقالًا أنبه فيه لخطورة هذا الأمر (الذي أوردته حينها صحيفة حكايات) وذلك بعد أن عثر سكان مربع (12) بالمايقوما (حي المزدلفة بالحاج يوسف) بالخرطوم بحري على مخلفات ذبيحة ضحيتها (حمار) عُثر على (رأسه) وجلده المسلوخ (بحرفية عالية) إضافة إلى (الضلافين) ، فيما هرب الذابح بلحمه إلى جهة غير معلومة (لي وين ؟ ده السؤال) !
إن هذا الوضع الذى نعيشه والذى تنعدم فيه الرقابة على الأطعمة و(اللحوم خاصة) يغرى ضعاف النفوس بذبح (أى حاجه) وبيعها (للمواطن) المغلوب على أمره (شوفوا حمار واااحد بيعمل كم ساندوتش شاورما)!
وما حالات (الرفس) ? عزيزي القارئ- التى نشاهدها من لاعبينا فى ما يسمى (مجازاً) بمباريات كرة القدم و(النهيق) الذى يشنف به آذاننا فنانو هذه الأيام و(الفنجطة) التي تشهدها الساحة السياسية إلا مؤشرا بإن القصة دخلت (الجينات) وكده !
كسرة : لن يستقيم الأمر إلا بعد أن تكون عين المسؤولين على (صحة) المواطن بدلاً عن (جيبه)!
كسرة ثابتة : أخبار خط هيثرو شنوووو؟



تعليقات 31 | إهداء 2 | زيارات 6552

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#347563 [ابوعبدا]
0.00/5 (0 صوت)

04-26-2012 08:03 PM
الله يكون فى عونا


#347367 [ttbahar]
0.00/5 (0 صوت)

04-26-2012 03:38 PM
يعني شنو الناس كان رفست ولانهقت


#347353 [IRIS]
0.00/5 (0 صوت)

04-26-2012 03:28 PM
يا عمنا الفاتح جبرا الله يجبر بخاطرك وما تعاكس الناس في رزقها
اهم شيء يكون الاكل موجود بس بزيت فرامل او زيل خروع مش مشكلة
وبعدين الحكومة والمفتشيين مشغوليين بتحرير هجليج انت شكلك ناوي تشتت افكارهم
وتشغلهم باشياء هامشية مثل مراقبة المطاعم ومنع بيع لحم الحمير والكلاب التي اصبحت عملة نادرة وسعرها ارتفع بجاءة والزبائن افتكروا ان سعرها ارتفع مع شح البنزين ومش عارفين ان لحمها دخل سوق المطاعم والكوارع بتاعتها سعرها مغري ولو حصل يوم مشيت اي مشوار وما تعبت اتاكد انك اكلت ليك كباب لحم حمار
ولو يوم سكاك حرامي ومالحقت اتاكد انك اتعشيت بلحمة كلب ابن كلب كلب الله ايام السواها فينا وعمل نائم


#346807 [على الطيب]
0.00/5 (0 صوت)

04-26-2012 09:32 AM
وما حيقدروا يعملوا ليهو حاجة
حيطلع براءة
لانه من زباينه اسيويين ياكلون هذه اللحوم
ودقى يا مزيكة


ردود على على الطيب
United States [IRIS] 04-26-2012 03:29 PM
يعني بعدين الواحد لمن يدخل المطعم يسال او يعرف نفسه بانه مش اسيوي؟


#346719 [زول كدا]
0.00/5 (0 صوت)

04-26-2012 06:37 AM
اليوم القاك ياوطني لقاء الاوفياء
والله الجماعه ديل بالطريقه دي حيموتونا مقسه ساي ، الجماعه ديل ما كفاهم بعد دا


ردود على زول كدا
United States [IRIS] 04-26-2012 08:51 PM
احسن شيء الواحد يكو ن معاه أندوي في جيبه لو جاع يضربها في اقرب ظل شجرة ويتخارج


#346640 [ود الجد]
0.00/5 (0 صوت)

04-25-2012 11:09 PM
اكتب مرة ثانبة وثالثة و................................. عن مطعم ميناء سواكن طالما المناسبة طعام واكل........... أصلو المطعم دا عمل لي طمام لم يفارقني حتي الآن ... والظاهر مدير ميناء سواكن ساكن في الخرطوم


#346614 [Heron]
0.00/5 (0 صوت)

04-25-2012 10:24 PM
العواصم الحضارية عاصمتنا البنعرفا دي مااا بتصل لمستوى تكون حضارية، زي عرس ابو الدرداق للقمرة...مهمة مستحيلة. عليك الله خلينا من اكل المطاعم وورينا الناس الفضلت قاعدة تاكل شنو في بيوتا. لك التحية استاذ خبرا


#346604 [يوسف الناعم البزعى]
5.00/5 (1 صوت)

04-25-2012 10:17 PM
لك الشكر الاستاذ الجليل على الافادات الواضحة
انشاء الله بعد دا نبقى نباتيين (عشيببن)هذا هو الحال دون الذى وصل له الضمير السودانى .
وبعد دا كلو يجى ابن كلب يقول الشعب السودان الشعب السودانى فعلتو وتركتو
هذا اخر ما توصل له ضمير الشعب السودانى بعد اهتمت الحكومة بالجبايات والامور الاخرى
لك الشكر على الطرح يا سيدا
الناعم


#346584 [اوطان]
5.00/5 (1 صوت)

04-25-2012 09:46 PM
ياجماعه الحكايه ببساطه الناس زهجانه من الحمير دى وبقوا ياكلوها لانو الفكر والعقليه الحاكمانه فى السودان ده حماريه ميه ميه, عشان كده قدر ماالواحد يشوف ليهو كوز اقصد حمار يفتكرو كوز يمسكو يضبحو


#346560 [abu afra]
5.00/5 (2 صوت)

04-25-2012 09:19 PM
واحد من بلدياتنا كان فاتح كشك فى السبيعينيات فى بورتسودان وكان بصطاد السكارى وكان عنده قدر كبير بتاع فول واى واحد يجى يطلب فول بالبيض او كبدة او لحمة او فول بالطعمية او فول مصلح او كباب كان بغرف من نفس القدرة المهم جاهو واحد قريبه من البلد وكان قاعد جنبه وبلاحظ كل الامور وفى النهاية وبعد ما احتار فى امر الراجل قام ساله.. انت يا ابن عمى القدر بتاعك دا عنده رفوف بجوا والا ايه؟؟فقام قال ليهو يا خى ديل سكارى وبياكلوا اى حاجة...فلذا المواطنين بقوا سكارى وممكن ياكلوا كدايس وفئران وكدا...... وبالهنا والشفا


#346553 [ود عويضة]
5.00/5 (1 صوت)

04-25-2012 09:06 PM
يا اخوانا - وصول مثل هذه اللحوم لهذه المطاعم أمر طبيعي لانعدام الرقيب والضمير ، نحن عايشين في زمن يصدق فيها الكاذب ويكذب فيها الصادق ويأمن فيها الخائن ويخون فيها الأمين ويحكم فيها الرويبضة
عموما 90% من أفراد الشعب السوداني يعيشوا تحت خط الفقر وبعضهم معدم تماما ومضطرون أن يأكلوا الميتة والمنخنقة والموقوذة والمتردية والنطيحة وما أكل السبع وهؤلاء يذبحون الحمير والكلاب وغيرها – وغير مستبعد في ظل الحاجة والوضع الاقتصادي المأساوي أن تصل هذه اللحوم لسوق كيري أو حتى مطابخ المنعمين وعلينا ان لا نلومهم (من يده في النار ليس كمن يده في الماء)
كسرة
رماه في اليم مكتوفاً وقال له إياك إياك أن تبتل بالماءِ


#346532 [DERBS]
5.00/5 (3 صوت)

04-25-2012 08:36 PM
كسرة غير ثابته

مسعولين من الخير اخبار موضوع شركة الاقطان شنوووووووووووووووووو؟؟؟؟؟؟؟؟؟؟؟؟؟؟؟؟؟


#346520 [الشاذلى عبدالرحيم محمد]
5.00/5 (1 صوت)

04-25-2012 08:11 PM
لك التحية يا استاذى الجليل الفاتح نعم ماقلتهو واللة حق
نحنا نرفع وكيلنا على اللة ماعندنا اى حكومة وما عندنا اى
صحة .... لكين من هنا انو الناس تعمل حظر ..تسلم كتتتتتتير
يااستاذنا متعك اللة بصحة والعافية .


#346475 [Heron]
5.00/5 (1 صوت)

04-25-2012 07:06 PM
لك التحية استاذ جبرا.اكاد اجزم ان هذه البلد عمرها مااا حتستقيم ... فوضى في كل شيء.كيف بستقيم الظل والعود اعوج. دي عوجة كبيييييييييييييييييييييييييييييرة.


#346464 [عوض]
5.00/5 (1 صوت)

04-25-2012 06:58 PM
دائما مبدع يا جبرة لكنى فوجئت ببعض اصحابنا بياكلوا طير ابو السعن ومدنو اسم دلع ( الاستاذ ) قاصدين المحامى عشان السعن بتاعو بشبه الكرفته والله يا جبره دى حقيقه ما نكته والجماهة ديل ناس من الطبقة الوسطى......... قاتل الله القرم


#346440 [عبدالله ادروب]
5.00/5 (1 صوت)

04-25-2012 06:37 PM
استاذي جبرا تحية طيبة
الواحد احيانآ بشك في انو السودان دا ما دولة ودا كل من المؤتمر البقول انو هو وطني
مع انو كرهونا الوطن ذاتو انا ما لقيت شعب من الصباح الواحد بسب للسودان .يا استاذ انت بتقول الجهات المسؤلة.ما في جهات مسؤلة في جهات بتخم خيرات البلد.في جهات امنية بتكتل الشعب والبلد في جهات بتلحسنا كوووووعنا وكراااااعنا .

والله يا استاذ لو بقي في لحم الحمير دي كويسةانا خايف يوم بأكلونا زوووووووووول عدييييل كدا


#346400 [السفير]
5.00/5 (3 صوت)

04-25-2012 05:57 PM
أنا دلوقت بس عرفت السبب...بعد ماقريت مقالك ده ياجبرا!!!!
كنت كل ما أجى اجازة السودان..وأنا لازم كل سنة أجى..كل سنة بنزل مع عمى فى الكلاكلة...وكنت أكتر حاجة بتعب منها وحامياتى النوم هوهوة الكلاب...من ماتمغرب لمن الشمس تشرق...الكلاب...هو..هو...هو...!!!!
قبل شهرين جيت فى اخر اجازة يازول الحتة هادية وأنا نايم الليل كلو..أنا طبعا يعنى راجل حسب نياتى قلت ماشاء الله ..يعنى الكلاب بقت مؤدبة..أو يكون ناس الصحة منعو الكلاب المطلوقة فى الشارع...بس كل يوم نسمع بي بيت فلان نط فيهو حرامى...جارنا علان جاهم الحرامى؟؟؟أتارى الجزارين شغالين فى الناس لحم كلاب ساى!!!
لكن برضو كل حركة فيها بركة...أول حاجة لحم الكلاب نسبة الكولسترول الفيهو أقل من العجالى...قول واحد!!
أنا لفيت فى جنوب شرق اسيا كتير..تعرف ياجبرا..الكوريين والفلبينيين والصينيين بحبو لحم الكلاب أكتر من اى لحم تانى...ولانومافيهو دسم كتير عشان كده كلهم حجمهم قليل ورشيقين وحركتهم خفيفة..ماشفتهم فى دورة الألعاب الأولمبية حصدو الذهبيات كلها!!!ده كلو من أكل الكلاب!!!
وبعدين انت هسى كل شى جاى من الصين وكوريا..الكريز..الهايس...الهيونداى..التلاجات..الغسالات..الكبابى ..بس بقت على الكلاب الصينية!!!
وياخى أحسن تخلى الناس ياكلو لحم الكلاب عشان يمكن يحركهم شوية ويخليهم يهوهوو على الحكومة...طول الليل يهوهو بشة...برشلونة...شيلسى...ياريت الكلاب اللى ياكلوها دى تكون سعرانة كمان!!!


#346361 [الرباطي]
5.00/5 (3 صوت)

04-25-2012 05:19 PM
تاكلو ضان انتوا قايلين نفسكم مصريين ولا شنو


#346349 [مازن]
5.00/5 (1 صوت)

04-25-2012 05:14 PM
عادي يا أستاذ ، زمان واحد جزار قال لي غايتو يا أخوي ربنا يغفر لينا ساكت ،الشعب ده يا ما ضبحنا ليهو حاجات وحاجات.


#346338 [الثور الاسود]
5.00/5 (1 صوت)

04-25-2012 05:04 PM
وانت شفته حاجة ؟؟
ناس جيناتها ثعلبية تلعب بالبيضة والحجر ..
وناس جيناتها حمارية تنهق صباح مساء ولحست كوارعها
وناس جيناتها ثورية عاثت فسادا فى الخزف ..
وناس جيناتها كلبية ومازالت على الوفاء للعربة الرئاسية
وناس جيناتها تمساحية ولم تشبع بعد من ولائمها..


#346315 [الزول الكان سَمِحْ]
5.00/5 (1 صوت)

04-25-2012 04:39 PM
وى وى وى وى

أأآآآآآآآآآآآآ

دى الليلة لقيتا وين ياجبرا...

وما حالات (الرفس) ? عزيزي القارئ- التى نشاهدها من لاعبينا فى ما يسمى (مجازاً) بمباريات كرة القدم و(النهيق) الذى يشنف به آذاننا فنانو هذه الأيام و(الفنجطة) التي تشهدها الساحة السياسية إلا مؤشرا بإن القصة دخلت (الجينات) وكده !

ههههها...دى عينة من السعينيات والله أعلم


#346305 [hamid]
5.00/5 (1 صوت)

04-25-2012 04:31 PM
ده كلو من المطرب عثمان اليمني هو الروج لموضوع البتاع ده. ممكن إقتراح يا جبرا؟
أخبار السوفت وير شنو؟


#346290 [جن]
5.00/5 (1 صوت)

04-25-2012 04:15 PM
حمير من حمير بتفرق بالمناسبه انت القاصدهم ديل يا استاذنا عندهم رقم وطني و لا الماعندهم تاني حاجة الحمار هو الإنضبح بالقوة و لا الحمار البياكل من سكات و بمزاج و كأنو ما في حاجه.. الظاهر تعرف السرج خلاص لحم مع العظم و حبيبنا الحمار و مع طول الزمن استحلا الحكايه


#346259 [محمد ابولكاز]
5.00/5 (1 صوت)

04-25-2012 03:52 PM
نعمل شنو لحم الضان بقي ما بنهبش والا يكتبوا ليك دكتور


#346233 [الحقيقة]
5.00/5 (1 صوت)

04-25-2012 03:25 PM
لا اعلم كيف تصدق السلطات الصحية لمحل ماكولات او عصائر لا يكون فيه ( ماسورة ) موية؟؟
ماسورة والله ناس الصحة ديل


#346211 [محمد ابولكاز]
5.00/5 (1 صوت)

04-25-2012 03:10 PM
الموضوع جد حساس ومهم استاذي الفاتح المفروض الواحد لو راي اي شي مخالف يتم تنبيه السلطات ولكن حتي الاخوة المسؤلون بولون الادبار ولهم دراية كاملة بما يحدث نرجو ان تكون هنالك رقابة من المواطنين لانهم هم المتضررين من هذه الفوضه


ردود على محمد ابولكاز
United States [تبـْتـِبا .. تبـْتـِبـا .. تبْتـِبّ] 04-25-2012 07:17 PM
يا ابولكاز
بالله عليك اين هي هذه السلطات ....!؟
ياخي الفاضي ليك منو؟


#346202 [kasr]
5.00/5 (2 صوت)

04-25-2012 03:01 PM
دا صينينة الشعب السوداني


#346178 [مستاء]
5.00/5 (1 صوت)

04-25-2012 02:43 PM
قلت كده احسن استاذنا خليت طريق هييييثرو يا استاذ الشعب ده اكل كل شئ من 23 سنة بياكل نيم بقت علي لحم حمير ومش عارف ما هي مباحة عند امم اخري وفي فقه تواصل الامم ممكن نتواصل بالطعام بتاع غيرنا وبكده يكون الاحساس بالامم الاخري اليوم جنحت للسلم بعيد وما فشيت الغل اكل الشعب ده ما مهم لانو ولله الحمد من الله علينا باللالوب من شجرة الهجليج مدرار ولله المنة والفضل وكمان رويان بترول ممكن نمصه ونعصره زيت وممكن نعلف بيه حيواناتنا الداجنة ونتعلف معاها بيه .
خلينا اليوم في خبر متحرك حماده والسيدة الوزيرة اليوم وصلتنا اول الصور حقيقة تشرف علي شان الامم الاخري تعرف انو رجالة بتاعة رئيسنا ديك حقيقة ونحن حاربنا الجماعة بنسوانا وشفعنا ما ودينا ليهم جنودنا الاشاوس وكمان خبر حفلة ندي القلعة . من يدير امر رفع الروح المعنوية اصبح يخرب فيها بهذه الامور ان جيشنا اكبر من كل هذه المهازل التي تدار علي انها نصرة جيشنا معلوم في الداخل والخارج وقد شارك في حروب كثيرة (الخليج - حرب اكتوبر ........ ممدنا دمئنا في الكثير من الحروب ) ولو اننا اصبحنا نحارب بعضنا برضك توصل باسنا وقوتنا .
كل ما يدور اليومين ديل من تطبيل لرفع الروح المعنوية للجيش لا يخدم او يدار بصورة خاطئة اللهم الا اذا كان جيشنا نزل الصالح العام وتم استبداله بجيش اخر . ان من يزايد في جيشنا (الذي نعرفه) خاسر اديروا الدفة لرفع الروح جيدا كتي لا تكسروها ....

كسرة بكسرة وزيرنا الهمام ........... مش اللالوب ارخص من لحم الحمير والمش عارف ؟؟


#346159 [الطعميه]
5.00/5 (1 صوت)

04-25-2012 02:31 PM
لكن اكل الطعميه عمل لي يابوسه لكن اليابوسه احسن من شاورمه الحمير والكلاب


#346119 [3Atel]
5.00/5 (1 صوت)

04-25-2012 02:07 PM
شى طبيعى انو الناس تاكل لحم حمير لانو الحمار ارخص بى كتير من الخروف و احمدو الله انو عندكم حمير صالحة للاكل ,اسى الصادرات المغربية لى اوروبامن الحمير نقصت كتير لانو الحمير بتاعتم اصابا مرض خطير نقص اعدادا .


الفاتح يوسف جبرا
الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة