المقالات
السياسة
الما عاجبو ياكل الزلط !!
الما عاجبو ياكل الزلط !!
12-17-2015 01:20 AM

* أقترح انشاء ولاية خاصة لمهرجانات السياحة والتسوق فى السودان وتعيين السيد (ايلا) واليا عليها طول العمر، فهذا الرجل يعشق المهرجانات بشكل غريب وكأنه ولد فى (دبى)، ويبذل كل جهده من اجل عيونها، ويرهق كاهل الشركات ورجال الاعمال بالتبرع لها، ويصرف صرف من لا يخشى الفقر عليها، لدرجة ان بعض الحاقدين أعداء النجاح يزعمون أنه ترك ولاية البحر الاحمر مدينة (مديونة) بأكثر من تريليون جنيه سودانى (بالقديم)، يعنى مليار بالجديد بسبب مهرجانات السياحة والتسوق، وهو طبعا مبلغ خرافى لا يصدقه عقل ولا يسنده منطق، ومجرد حكايات فيس بوك وواتساب ساكت (لقيتو التكنولوجيا دى يا حاقدين وقعدتو للاشاعات والشمارات والأكاذيب، بس حتمشوا من الله وين، ولو المرض خلاكم، الموت ما بخليكم ومنكر ونكير راجينكم وين تمشوا منهم، وخلوا الواتساب ينفعكم)!!

* صحيح ان إيلا عندما كان واليا على البحر الاحمر حرم أصحاب المعاشات من حقوقهم من اجل عيون السياحة والتسوق(ما قلت ليكم عاشق)، ورفض بإباء وشمم تحويل الاستقطاعات الى الصندوق القومى، وترك آلاف المعاشيين والارامل والأيتام يتسولون حقوقهم فى دواوين الحكومة، ولكننى لا يمكن أن اصدق أنه ترك الولاية غارقة فى تريليون وسبعمائة وخمسين مليون جنيه (قديم) ديون ــ يا ناس تريليون شنو، هى ميزانية السودان كله ما تريليون، عليكم الله سيبوا ايلا يظبّط لينا السياحة والتسوق، البلد دى ما أصلا بلد سياحة من ما الله خلقها، من كترة الآثار والانهار، تانى دايرين شنو، وما مشكلة يعنى لو (السد السد الرد الرد) أغرق جزءا لا يستهان به من حضارة وآثار الشمالية، فى غيرها كثير ما تشيلوا هم، ما بتقروا كل يوم فى الجرايد انو الحرامية مولعين فيها، يعنى لو السد انتهى منها، حرامية الاثار ديل كان حيلقوا وين آثار يسرقوها، وكمان يا اخوانا الكهربة مهمة ولا شنو، الآثار براها ما بتعمل ليها بلد، وبالله الحاقدين يمتنعوا، ما كل ما نجيب سيرة حاجة يفتحوا خشومهم الكبيرة دى ويقعدوا ينقنقوا، الشتا وصل ولسة القطوعات شغالة تش، ياخى ما لازم القطوعات تكون شغالة ما دام انتو شعب كسلان وعاطل، يعنى الحكومة تجيب ليكم من وين وانتو قاعدين ليها زى قلتكم؟!

* نرجع لملك المهرجانات أخونا ايلا، وهو فى قمة السخانة هذه الايام، رغم برودة الطقس، بسبب مهرجان السياحة والتسوق الاول فى ولاية الجزيرة، وهو عمل عظيم بدون شك، فهو على الأقل سيشيع البهجة والفرح فى نفوس أهل الجزيرة المكتولين كمد من الشوق الى التسوق والطرب الأصيل، وليس كما يزعم الحاقدون انهم حزانى لما آل إليه حال المشروع العظيم الذى كان المزار الأول لكل ضيوف السودان لكونه اكبر مشروع زراعى يروى بالرى الانسيابى فى العالم، وتحول فى غفلة من الزمان الى حائط المبكى الرسمى لجمهورية واهل السودان !!

* هذا كله حقد أيها (الاخوان)، وسيخرج غدا من يقول سياحة شنو وتسوق شنو والجزيرة جيعانة وعطشانة ومرضانة، والقمح ما اتزرع، والترع مقفولة والقطن المحور ضربو البق، ونص ماكينات الغسيل الكلوى معطلة واجهزة الاشعة فى مركز القلب ما شغالة، والسرطان مبهدل الناس بسب المبيدات المسرطنة، وكلام فارغ من النوع ده !!

* كيف سياحة شنو وتسوق شنو يا حاسدين، أمال الحكومة الماشة كلها مدنى دى شنو، دى موش سياحة، ولا مفتكرنها هيافة، والحاجة الباردة وحلاوة حربة المالية الخيم والصيوانات ما مالية عينكم، ده ما تسوق، ولا قايلنو شنو يعنى، والله المهرجان قايم قايم فى روسينكم، والما عاجبو ياكل الزلط العملو إيلا، انتو كنتو لاقينو؟!




الجريدة
[email protected]


تعليقات 5 | إهداء 0 | زيارات 3755

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1386768 [الحلومر]
3.00/5 (1 صوت)

12-17-2015 02:52 PM
هو الزلط علي الحاج فضل فيه حاجة عشان نأكله يا فردة ... نأكل نيم ونشرب هواء ... الموية ذاته الحبش حبسوها بسد النهضة

[الحلومر]

#1386711 [adam]
5.00/5 (1 صوت)

12-17-2015 01:14 PM
الجزيرة ما محتاجة مهرجان سياحة
محتاجة مهرجان زراعة بصل يجيب ايرادات أكتر من السياحة دا كان في اوليات طبعا
وبعدين شابكننا مهرجان تسوق هي وين قروش التسوق دي
ما اشترينا بيها البصل

[adam]

#1386690 [الحلومر]
3.00/5 (1 صوت)

12-17-2015 12:47 PM
هو في زلط عشان ياكلوه ...الزلط اتأكل من زمان ... الزول الأكل الزلط يتجدع في المانيا ... وحياتك انت الدراب دخل السوق الاسود

[الحلومر]

#1386680 [ودالفاضل]
5.00/5 (1 صوت)

12-17-2015 12:26 PM
الناس في شنو !!!! وناس ايلا في شنو !!!!!!

[ودالفاضل]

#1386614 [ابو سحر]
4.50/5 (2 صوت)

12-17-2015 10:40 AM
ما تاكلوا زلط ولا تاكلوا حاجة
اصلا في 4 مليون سوداني في مصر
و3 مليون سوداني في السعودية
و2 مليون سوداني في قطر
و2 مليون سوداني في الامارات
خلوا الباقين يتموا العدد دا الثلاث مليون في كل من امريكا و استراليا ونيوزيلندا والمانيا
يبقي في السودان البشير و ناس الموتمر الوطني
وناس الحج والعمرة في سنار
وناس العدل وتور الدية
وناس نافع و اخوانه في شندي
وناس الترابي وكمال في الحوار الوطني
وناس مصطفي عثمان في الاستثمار

واخر واحد يطفي معاه النور بالله
عشان البشير ما يخسر كهرباء في الفاضي

[ابو سحر]

ردود على ابو سحر
[الحلومر] 12-17-2015 02:55 PM
يا أبو سحر وبقية الشعب الفضل يصدروه لجنوب السودان .... فكرتك دي مجنونة بتعجب الكيزان


زهير السراج
زهير السراج

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة