نبلغ لمنو يعني؟
05-06-2012 09:18 PM


نبلغ لمنو يعني؟

الفاتح جبرا
[email protected]

عزيزى القارئ : بتاريخ 23 يناير 2010م كتبت مقالاً بعنوان (بدون أورنيك ذاتو) تحدثت فيه عن توجه ولدنا (عبدو) إلى أحد مراكز السجل المدنى لإستخراج شهادة (بدل قيد) إذ يعتزم إستخراج شهادة تسنين للتقديم بها إلى وظيفة بعد أن جلس على (دكة العطالة) لسنوات طوال منذ تخرجه ، لاحظ (عبدو) وهو لا يزال فى الصف ينتظر دفع الرسوم (المكتوبة على الإيصال) والبالغ قدرها (عشرون جنيهاً) أن (الناس بتدفع) ثلاثين جنيهاً وقد رفض (عبدو) أن يقوم بدفع الثلاثين ما لم يتم إعطاؤه أيصال بثلاثين جنيه وعندما أحس (جنابو) بأن (عبدو زول حقانى) طلب منه الدخول (لى جوة) حيث أفهموه بأن (العشرة جنيه الزيادة) دى تعتبر (دعم) ولابد من دفعها كما درج بقية المواطنين على دفعها (بالتى هى أحسن) وأحسن ليهو يدفعا (وما يعمل فيها تفتيحة) عشان أمورو تمشى وكده !!
بعد نشر المقال إتصل بي بى الأخ المقدم (محمد زين) من قوات الشرطة طالباً (الدليل) فبعثت له ببطل القصة والشاهد العيان (ولدنا عبدو) الذى تم التحرى معه وذكرلهم كل صغيرة وكبيرة تتعلق بصحة الأمر فعاد الأخ المقدم للإتصال بى موضحاً بأن هنالك تحقيقاً سوف يجرى فى المسالة وسوف يتم إخطارى بما يسفر عنه … ولما تأخرت نتيجة التحقيق قمت بكتابة مقال آخر حول الموضوع بعنوان (نسال منو تاني) نستفسر فيه عن نتيجة التحقيق .. ولكن لا حياة لمن تنادى ولم يحرك إخواننا في الشرطة ساكنا ليعلمونا بالنتيجة !
لأن العبد لله (زول على نياتو) إعتقد بإنو (الشرطة) لما عرف عنها من (ضبط وربط) قد قامت بإيقاف تلك التجاوزات ومحاسبة من يقوم بها لكن إتضح مؤخراً وبالصدفة أنو القصة ماشة عال العال وفل الفل .. القروش البتدفعا حاجة والبكتبوها ليك على الإيصال حاجة تانية (ناقصة طبعن) ! ولا زالت هذه الممارسات غير القانونية تمارس عيني عينك (ما شرطة وكده) ! وهاكم الدليل (تااااني)
المكان : مكتب جوازات بحري
الزمان : قبل عدة أيام
المعاملة : تجديد جواز مواطن
الرسوم المكتوبة على الإعلان : 96 جنيه
الرسوم التى طلبها المحاسب : 98 جنيه
المواطن : طيب الإتين جنيه الإضافية دي شنو؟
الموظف : دي دمغات
المواطن : طيب ليه ما تكتبوها في الإيصال !
الموظف : دي رسوم براها !
(بعد تسلم الإيصال يتضح للمواطن بأن قيمته ليست 96 جنيها ولكن 84 جنيهاً فيعود ليسأل الموظف)…!!!
المواطن : طيب الجنيهين بتاعين الدمغة خليناهم .. هسه القروش الأديتك ليها دي ناقصة 12 جنيه تاني
الموظف : في رسوم عشرة ألف بتاعت غلاف ودمغة تاااني 2 جنيه
المواطن : طيب انا الغلاف ده ما عاوزو
الموظف : أي معاملة بدون غلاف لا ينظر فيها
المواطن : طيب ليه ما إتضمنت قروش الغلاف والدمغات دي في الإيصال ؟
الموظف : دي رسوم براها !

السيد مدير عام الشرطة :
إذا كنا نعول على (الشرطة) أن تحمى المواطن من أى (جبايات) غير قانونية (معقول) تقوم (الشرطة ذااااتا) بهذا التحصيل غير القانونى لهذه الأموال والتى من الواضح أنها لا تورد في خزينة الدولة (ح تورد كيف و إذاى يعنى؟ وبواسطة ياتو مستندات ؟)
لقد ساءني جداً كمواطن أن أنبه إخواننا في قيادة الشرطة (قبل عامين ونص) إلى هذه التجاوزات فيتم الرد بان هنالك تحقيق في الأمر لأفاجأ بأن (القصة مستمرة) وإنو المسألة (ماشة) رغم عدم قانونيتها ومخالفتها للقواعد المالية !
عزيزي القارئ :
• تري لماذا تمادت الشرطة في ممارسة هذا السلوك الغير قانوني على الرغم من تنبيهنا السابق لها؟
• ما هي نتيجة التحقيق في قصة (ولدنا عبدو) التي اشرنا إليها قبل حوالى عامين ونصف ؟
• ما سر هذه الرسوم التي تتحصل دون إيصال؟ وأين تذهب؟
• لمن تتبع هذه الدمغات وهذا (الغلاف الإجباري) أبو عشرة(ألف) !
كل هذه الأسئلة سوف يقوم بالرد عليها أخواننا في (المكتب الصحفي للشرطة) قبل أن تصبح (كسرة ثابتة) وكده !
كسرة :
إذا كان تحصيل أي مبالغ من المواطنين بأي اورنيك غير أورنيك 15 يعد جنحة يجب ابلاغ الشرطة عن مرتكبها .. أها هسه في الحالة دي نحنا نبلغ لي منو يعنى ؟
كسرة ثابتة :
أخبار خط هيثرو شنو(ووووو) ؟


تعليقات 38 | إهداء 0 | زيارات 7327

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#358445 [محمد النيل]
0.00/5 (0 صوت)

05-08-2012 07:07 PM
الزول القال شيرين ما تجى تغنى داك و هيئة (عملاء) السودان القالوا سجود اللاعبين (غير مستحب ) ديل يعنى نفهم إنكم شغالين بالفارغة و المقدودة و سايبين المواطن دة روحو تمرق و لا عشان بقسموا ليكم من مال السرقة .... و يا رئيس البلد يا عمر البشير إنت لا بتسمع لا بتشوف ... عليك الله حصل بنوع الغلط جاتك فكرة تسأل المواطن تقول ليهو إنت عايش كيف .... الله ينتقم منك ياخ .. الله ينتقم منكم كلكم ... الله يدمركم زى ما دمرتوا البلد و المواطن .... الله يعذبكم دنيا و آخرة


#358166 [Mohd]
0.00/5 (0 صوت)

05-08-2012 02:29 PM
أرجى بلة يا جبرة

انا حرد ليك بالنيابة عن مدير الشرطة ووزيرهاالداخلية ذاته اللا يوم الليلة ما جاب خبر قاتل عوضية وداسيهو ،، المهم حنشكل لجنة تحري ونبلغك بنتيجة التحقيق (ومني ليك ارجى بلة)
انت عارف يا جبرة الحكومة دي وضح تماماً انه مافيها زول نزيه ابداً ومافيها زول يقدر يحاسب الثاني لسبب واحد انهم كلهم عن بكرة ابيهم ولغوا في الفساد وبتقلهم كمان
يعني الا تشتكيهم لله ديل وكان راجي لك نتيجة من زول زي ما قلت لك ارجى بلة بجيبها ليك


#357952 [جمال]
0.00/5 (0 صوت)

05-08-2012 11:13 AM
ياجبرة لو فتحت الملف دا للشعب السوداني تلقاهوا كلو منهوب ومسروق ع الآخر .. وأي زول بشوف الكلام دا كذب جيبوا أقرب مكتب لتحصيل الرسوم ولا بحتاج لبرهان ودليل وذي ما قال احد المعلقين ناس البرلمان ديل ما قاعدين يدفعوا رسوم حاجاتهم ولا مستثنيين من الدفع:


#357918 [الممغوس]
0.00/5 (0 صوت)

05-08-2012 10:32 AM
المسألة غويطة وغرييييقة ... حتى رياض الأطفال فيها شئ يحيرك ويمخولك ... المسئولة عن الروضة دايرة 5 جنيه عن كل طفل لعمل فطور في كل خميس من نهاية كل شهر ولو في أطفال خرجوهم تقوم تشيل من الأطفال كلهم حتى الفي مرحلة البراعم ... نهب علني


#357563 [ام الحاج]
0.00/5 (0 صوت)

05-07-2012 10:45 PM
تحياتي استاذ جبرة مرة مشيت اوثق شهادات اولادي من احد المحليات كان ذلك منذ عشرة سنوات تقريبا الموظفة قالت ان الرسوم 100جنية طبعا مبلغ كبير في ذاك الوقت لما كنت علي عجلة فقد دفعت المبلغ وفي المساء قابلت خالي وكان ضابط باحدي المحليات التي تمت لتك المحلية بصلة فقلت له لماذا هذاالمبغ الكبيروقد فاجئني ان الشهادات اصلا ليس عليها رسوم وسألني هل اعطتك الموظفة ايصال فقلت لا .فما كان مني الا ان ذهبت لها في اليوم الثاني طالبة الايصال طبعا في البداية وقبل الطلب قالبتلني باتسامة عريضة ولما عرفت طلبي علت صوتها وقالت لن اعطيك اي ايصال وسمع رئيسها في العمل الاصوات وجاء لحل المشكلة وقال للموظفة لماذا اخذت المبلغ قالت ليه دي اولادها بيقروا في اغلي مدرسة في المنطقة ومسافرة خارج البلد يعني شنو لو اتبرعت بمبلغ 100جنيه فسألها هل قلت لها ان تتبرع فقالت لا .هؤلا هم الموطفون يا استاذي جبرة والتجاوزات علي قفا من يشيل كلها مبررة.


#357541 [غصبا عنك]
3.00/5 (1 صوت)

05-07-2012 10:07 PM
السفاره السودنيه في الدوحه بتأخذ 5 ريالات رسوم ملف لكل معامله وطبعا أكيد بدون ايصال مالي


#357484 [حسن]
0.00/5 (0 صوت)

05-07-2012 08:33 PM
الاستاذ/جبره

أحسن يعملو أورنيك 15 للرسمي وأورنيك 51 للبلع!!!!!!!!!!!!!!
تبلغ للحي الذي لا يموت .....
لو كان الجماعة باعت الخط .... يعني شنو دفع فوق المقرر؟؟؟؟

وأخبار الخط شنـــــــو؟؟؟؟؟؟؟


#357447 [abdo]
0.00/5 (0 صوت)

05-07-2012 07:26 PM
kjfsfdkfjdsjsdkdkfskfks


#357329 [ubedallawd]
5.00/5 (2 صوت)

05-07-2012 04:55 PM
الشكية للة وحدة
حرام عليكم ياالبتهدو الكنائس حرام عليكم يابتريقو دم اخوانكم في الدين حرام عليكم يااصحاب
شعار يد امينة وعين ساااااااااااهرة
حرام يا اكلي الدمغات
حرام يامهندسي النفرات
حرام يا خلوهاااااااا مستورة
حرام ياالطغاة الجيتو حفاة
حرام يا القسمتو الوطن
حرام يا 999
(اعوذباللة)


#357323 [tambera]
0.00/5 (0 صوت)

05-07-2012 04:50 PM
استاذنا الفاتح اذا كان التحصيل بغير اورنيك 15 جنحة فما رايك فى اورنيك مالى (بدون) مافى رقم من ناس النفايات والشوارع وسخانه


#357312 [abdo don]
0.00/5 (0 صوت)

05-07-2012 04:38 PM
ملحوظ للتأكيد فقط:
انا كنت في ادارة الخدمة الوطنية (الخرطوم شارع الواحد وستين )بغرض استخراج ازن سفر وكانت الرسوم المكتوبة في الايصال 85 ج ودفعت 95 ج بالاضافة الى 5ج رسوم ملف والمعروف بره الملف ب واحد ج ليس الا . قمة الاستغلال للمواطن المقلوب علي امرة .اما ان لنا ان نوقف هذا السرطان ؟


#357293 [abdo don]
0.00/5 (0 صوت)

05-07-2012 04:29 PM
الفساد المالي والاداري


#357154 [امين الشريف]
5.00/5 (1 صوت)

05-07-2012 02:08 PM
يا جبرة مساء الخير
الكلام الزي ده والسرقة اللي على عينك يا تاجر دي راقدة
وعلى قفا من يشيل واي مؤسسة بتاعت حكومة السجم دي تلقى فيها الاصناف دي
والشرقة اصبحت سنة سائدة في الدولة ومجتمعها كالسرطان فهل له علاج غير الاستئصال؟؟؟
قبل سنتين وشوية كنت في السودان في اجازة وقبل نهايتها بايام مشيت جهاز العفن بتاع الحرامية الكبار
اللي اسمو شئون المغتربين طبعا نفس امور السرقة اللي ذكرتها ونفس الناس رسوم اورنيك ورسوم شنو ما بعرف والكلام ده كلو بدون ايصال وممكن تحتج وتدق جرس لي بكره لكن ما بجيب نتيجة لان الشبكة المفسدة مسيطرة على اي حاجة يعني في النهاية عينك في راسك تدفع وبس !!!!!! المفاجاءة انو جوازي باقي فيه فترة خمسة شهور وحاجة قامت واحدة من الموظفات بتاعات الشرطة الفنية تقريبا قالت لي لازم تجدد جوازك ده
قلت ليها شنو؟؟؟؟؟
قالت الجواز اللي فيهو اقل من ستة شهور لازم يتجدد
طيب يا بت الناس لمن تقولي يتجدد يعني صلاحيته منتهية وانا جوازي ساري المفعول
قالت لي والله ده العندي لو عندك اي اعتراض امشي قابل المدير
طبعا مكتب المدير عشان توصلو حاجة مقرفة جدا تلتلة وعذاب
المهم قبل ما ادخل فكرت وقلت هوي يا ولد الناس ديل دكتوراة في السرقة والتعطيل واللف
وقلة الادب احسن حاجة اكون عاقل واخلي كلام المنطق داك والقانون فاتصلت على واحد من اخوانا
ضابط شرطة وحكيت ليهو الموقف قال لي امشي للمدير اسمه زيد بن عبيد وقول ليهو جاييك من طرف
فلان بن علان وفعلا خمسة دقائق وخلصت اموري اتخيلو ولو دخلت مع الاوباش ديل في جدل فلسفي
كان لي يوم الليلة ما خلصت
كسرة .............السودان اصبح بلد الغرائب والعجائب الله يجازي اللي كان السبب .......


#357151 [بابكر]
0.00/5 (0 صوت)

05-07-2012 02:00 PM
الشكيه لى غير الله مزلا


#357079 [سليم]
0.00/5 (0 صوت)

05-07-2012 12:47 PM
انا قبل كم يوم مشيت عشان استخرج البطاقة القومية في البداية اخدوا مني الرسوم وقدرها45جنيه وادوني الايصال ونسبة للتعب ووقوف الصفوف انا ما دققت في الايصال ولما رجعت البيت لقيت قيمة الايصال 40جنيه حادثة تانية في المجلس الهندسي وهو المكان الذي يستخرج منه الرقم الهندسي للمهندسين حيث ان رسوم الرقم الهندسي المقررة من وزارة المالية هي 30 جنيه لكنهم يجبرونك علي دفع 60 جنيه مقسمة علي دفعتين ايصال بقيمة 30جنيه صادر من وزارة المالية وايصال ايضا بقيمة 30جنيه لكنه وهمي ليس له اصل ولا فصل


#357069 [ود عويضة]
0.00/5 (0 صوت)

05-07-2012 12:41 PM
الا الكسرة الجديدة - اكيد ناوي تكسر عين الشرطة - بس جات عليها - عينك في ابوقناية نائم في العسل عايز تنقح طار الجماعة ديل - تعال من الآخر انت ناوي على ايه - خط هيثرو الانتربول ما مسكو - عايز يمسكلك الجماعة ديل - ديل كانوا مقددنها قبل الجماعة ديل ما يظهروا في الكفر
ود عويضة يقترح عليك كسرة جديدة تفيدناالناس في معيشة وهي كم؟؟؟
يعني سعر الدولار الليلة بكم - اتوقع المقدم محمد زين يجي يحول عندك القروش التي جمعوهابدون ايصال من عبدو اخوان


#357052 [مسلم]
0.00/5 (0 صوت)

05-07-2012 12:31 PM
انا قبل كم يوم مشيت عشان استخرج البطاقة القومية في البداية اخدوا مني الرسوم وقدرها45جنيه وادوني الايصال ونسبة للتعب ووقوف الصفوف انا ما دققت في الايصال ولما رجعت البيت لقيت قيمة الايصال 40جنيه حادثة تانية في المجلس الهندسي وهو المكان الذي يستخرج منه الرقم الهندسي للمهندسين حيث ان رسوم الرقم الهندسي المقررة من وزارة المالية هي 30 جنيه لكنهم يجبرونك علي دفع 60 جنيه مقسمة علي دفعتين ايصال بقيمة 30جنيه صادر من وزارة المالية وايصال ايضا بقيمة 30جنيه لكنه وهمي ليس له اصل ولا فصل


#357030 [سامر المدنى]
0.00/5 (0 صوت)

05-07-2012 12:15 PM
ياود جبرة ماتخليها مستورة ,, شنو يعنى اتنين جنيه واتناشر جنيه الناس ديل انت قايل ماعندهم ناس منتظرينهم يرجعوا ليهم آخر النهار بى كيس موز والا شنو ?,, تقول لى اورنيك 15 .. ياحليل الأرانيك والبيراجعوا الأرانيك ظاطهم,, ملعون ابوكى بلد


#356963 [وليد العمدة]
5.00/5 (1 صوت)

05-07-2012 11:14 AM
الشكوى ليك يااااالله الشكوى لي غيرك مزلة


#356941 [ابو احمد]
0.00/5 (0 صوت)

05-07-2012 10:58 AM
نفس القصه دي حصلت علي في جهازالغتربين الخرطوم تدفع مبلغ اكثر مما هو مكتوب في الايصال سرقه عينك عينك ياناس المشروع الحضاري حاميها حراميها


#356903 [ود الحاجة]
0.00/5 (0 صوت)

05-07-2012 10:39 AM
يا استاذ جبرا اعرض الموضوع على البرلمان النائم . خليهم ينزلوا من ابراجهم العاجية و لو لمرة واحدة


#356899 [كايلتود]
5.00/5 (1 صوت)

05-07-2012 10:37 AM
الأمثلة كثيرة في نهب اموال الشعب السوداني :

1- دفعنا مبلغ 50 ريال اجباري لدعم ترعة الرهد وكنانة !!! واين ذهبت ؟؟
2- ندفع بالسفارة بالسعودية 1 ريال عند مدخل السفارة والقنصلية وبدون مستند !!! ولاحظ مرة رقمي كان 496 يعني اضرب 496×1 ريال يومي في 26 يوم = 12.896 ريال شهري خ12 شهر =154.752 ريال غيررسوم تجديد الجواز 280 ريال × 496 = 138.880 ريال ×12 شهر = 1.666.560 ريال +154.752= 1.821.312 ريال دخل سنوي .وغير المعاملات الاخري (حسبنا الله ونعم الوكيل)
3- سافرت احدي اجازتي لارض الوطن ولدي سيارة خاصة (هايس) كان ذلك عام 2006م حيث حاولت المستحيل لترخيصها لحمل الركاب ولم افلح وكان لزاما علي ان ادفع يوميا مخالفة مرورية بمبلغ 10.000 الف جنيه وبعدها اعمل .. ولكن الشئ المؤسف فكرت أخذ اخي وزوجته وابن اختي واسرتي للسفر لحضور مناسبة عيد في بلدي وعند مخرج الخرطوم قابلنا عسكري قافل الطريق ووضع براميل تقودنا الي حافلة يجلس بداخلها بنت وولدين ؛؛ نزل اخي عليهم وتأخر عندهم ذهبت اليهم واسال الحاصل ايه ... قال لي ديل ناس الضرائب وعاوزين ضرائب علي الحافلة والركاب زعلت جدا جدا وقلت ليهم يا جماعة ديل ما ركاب ..واصبحنا في شد وجذب وشتيمة وسب وتخيلوا المبلغ المطلوب 300.000الف جنيه وتم خصمه الي ان وصل الي 100.000 الف جنية ....ولازم تدفع وكلام من هذا القبيل ؛؛؛ ساعتها اشتد غضبي وحلفت ما ادفع لهم قرش واحد والعاوزين تعملوة اعملوة ولم نجد معهم حل وفكرنا الرجوع وركب البصات العادية ونسافر ... ولكن الحمد لله اخيرا اطلقوا سراحنا ولم ندفع لهم قرش وللاسف بعد ان تحركنا منهم وجدنا برضو نقطة اخري دعم للجهة الفلانية وغيرها الكثير حتي وصلنا الي وجهتنا ...
نرجع نقول .... ياهووووووووو ده السودان !!!!!!!


#356889 [نجاشى]
0.00/5 (0 صوت)

05-07-2012 10:30 AM
استاذ جبرة برضو فى السجل المدنى كررى الحارة 17 مشيت طلعت الرقم الوطنى بعد استخراج شهادة القيد الوطنى سالونى الشباب المجندين هناك اذا كنت عاوز استخرج بطاقة شخصية ورديت عليهم بان لى بطاقة شخصية وصلاحيتها ما انتهت اقنعون بان البطاقة القديمة بعد استخراج شهادة القيد المدنى غير صالحة لازم استخرج البطاقة الجديدة وقمت بالفعل باستخراج البطاقة الجديدة ودفعتة وقتها 41 جينه وعندما استلمت الايصال من المحاسبة وجدت انو مكتوب عليه 30 جنيه وسالتها ال11 جنيه بتمشى وين قالت خدمات واذكرهم جميهم المجندين هناك وخاص الذى ضحك على يسمى الفياض ومعه واحدة ست برتبة الرائد لكن والحق يقال بقية الاصتاف كلهم ممتازين من ضباط وضباط صف وخصوصا النقيب الصفوفى والملازم التجانى


#356879 [خرافي]
0.00/5 (0 صوت)

05-07-2012 10:23 AM
أحيييييييييييييييييي يا مرارتي !!!!
ده كلو كوم والبحصل في ميناء حظيرة سواكن للبهايم كوم , لو جيت مسافر يشيلوا منك رسوم فحص الجواز وبدون أورنيك 15, ولو داخل يشيلوا منك رسوم على القطعة الواحدة عشرة جنيه وده كلو بدون أورنيك 15 طبعاً.. والشرطة تحت خدمة الشعب ..


#356877 [ود الشريف]
0.00/5 (0 صوت)

05-07-2012 10:21 AM
الاستاذ الكريم / الفاتح يوسف جبرا دي رسوم تسهيل الشكوى لله . كسرة


#356817 [واحد كان منهم]
5.00/5 (1 صوت)

05-07-2012 09:34 AM
انت ما سمعت بضباط المرور ؟ بيدوا المستجد جنيه واااااااااااحد ويقولوا ليهو عايزين نفطر سمك وتجيب معاهو حاجة باردة ...لما المستجد ( يندهش ) ويستغرب يقولوا ليهو امشي ..اتصرف يا مستجد ...طبعا ح يتصرف ويمشي الشارع .....


#356806 [ابو ابراهيم]
0.00/5 (0 صوت)

05-07-2012 09:26 AM
يا حبرا يا اخوي اظن وبعض الظن اثم انو القروش البدون ايصال 15 دي حوافز لافراد الشرطه الذين يعملون علي هذه الخدمه عشان يصلحوا احوالهم من حالة رواتبهم التي لاتغني ولا تشبع من جوع ولو التزموا بؤرنيك 15 فقط بدون الحوافز مش حتلقي واحد في مكتبه عشان يخدمك كلهم تلقاهم ذهبوا للسوق عشان يغطوا النقص في رواتبهم المهببه علي قولة اخوانا المصريين والامور دي مقننه بالسكوت ومن امثلة ذلك الحوافز الذي يدفعها اباء التلاميذ في المدارس الحكوميه تحت مسميات مختلفه حتي يحتفظوا بالمعلمين داخل المدرسه والفصول خلال اليوم الدراسي والا لوتركوهم علي رواتب الحكومه لذهبوا للمدارس الخاصه خلال اليوم وتركوا تلاميذ الغبش بدون دراسه


ردود على ابو ابراهيم
United States [mohy] 05-07-2012 02:00 PM
والله كلامك صاح نحنا ما بنأيدها لكن لو مشيت أورنيك 15 بتمشي لي بطون كبيرة العالم ديل مساكين بس خليهم يشيلوا بالمعروف لأنو دا ما حق


#356795 [nader]
5.00/5 (1 صوت)

05-07-2012 09:06 AM
عليك الله يا شيخ جبرا كان ردوا عليك الناس ديل ضيف ليهم السؤال ده كمان ناس جوازات المغتربين ببيعوا ليك استمارة تاشيرة الخروج برضه من غير ايصال ،،،،،، بعدين وانا واقف فى صف من صفوف جباياتم سمعت شكله بين البنات الراصنهن كتار بلا شغلا حول صندوق او بالعاميه خته حول مين الحيشيل اول صرفه شوف ناس مرطبين كيف


ردود على nader
United States [زهجنا من الغربه.. ما تمشوا خلونا نرجع] 05-07-2012 09:52 AM
ما مرطبين بحقنا!!! يذلونا ويقلعوا قروشنا من غير وجه حق


#356767 [سليمان قش]
5.00/5 (1 صوت)

05-07-2012 08:05 AM
بلغ بت سر الختم عشان تبلغ ود مرغني عشان يبلغ علي عثمان............ وانا ما بفسر وانت ما تقصر


#356738 [aladdin]
5.00/5 (3 صوت)

05-07-2012 05:31 AM
سلام
أنا قبل سنتين مشيت أوثق شهادة في الخارجية و الموظف ما رجع لي الباقي (٢٠٠٠ جنيه) و لمن طالبت بحقي قال لي (أنت أحسن من غيرك ؟). قلت ليه (أنا ما عافي ليك) و طبعاً ما إشتغل بي.
كسرة: كل ما أتذكر القصة دي باستحقر نفسي لأني ما عرفت آخد حقي.


ردود على aladdin
United States [ادروب] 05-07-2012 01:09 PM
كلنا نستحقر نفسنا لمن نتذكر انوا لازم ندفع من غير وجه حق لاننا نخاف علي معايش اولادنا والله هو الغالب


#356674 [ود ابليس]
5.00/5 (4 صوت)

05-07-2012 01:37 AM
ده كلوا كوم وقصه انو الرئيس عاوز يعمل استنساخ ديه كوم -انتو النعجه دولى الحصل ليها شنو-


ردود على ود ابليس
United States [ودالرحال] 05-07-2012 10:07 AM
السلام عليكم ورحمة الله وبركاته
اولا يااخينا انت ماود ابليس انا عارفك انت زول مسلم مؤمن فارجوك ثم ارجوك غير اسمك ده
ابليس ملعون مطرود من رحمة اللة عارفين ابليس عمل وعمل حتى طرد اهه انت عملته شنو
حتى ولوكنت عامل اى حاجة انت ممكن تتوب وتستغفر ربك يتوب عليك
اللهم تب علينا جميعا


#356637 [ابوانوار]
5.00/5 (2 صوت)

05-07-2012 12:22 AM
ليه مايعملوا كده اذا كان وزير الداخلية ذات نفسوا عامل حساب جانبي لايستطيع المراجع العام الوصول اليه حسب افادته في تقريره السنوي ولو مشيت المغتربين تلقي العجب مافي مبلغ بتدفعو يطابق الايصال الذي يسلم لك .خليناهم الى الله نستعيدها منهم يوم الموقف العظيم كان في الدنيا او اللآخرة .


ردود على ابوانوار
United States [لَتُسْأََلُنَّ] 05-07-2012 02:12 AM
ربما يصل وزير الداخلية بالحساب المجنب رحمه في دولة جارة.


#356617 [بت ملوك النيل]
5.00/5 (4 صوت)

05-06-2012 11:44 PM
الشكية لي اب ايدا قوية


#356610 [sabra150]
5.00/5 (3 صوت)

05-06-2012 11:32 PM
بلغوا الخال الرئاسي هاها؟؟والحكامة بنت (فضل الله )


#356599 [عبدالله]
5.00/5 (3 صوت)

05-06-2012 11:21 PM
يأخى عليى الطلاق حيرونا معاهم ؟؟؟؟؟؟؟؟؟


#356588 [Koffi]
5.00/5 (3 صوت)

05-06-2012 11:12 PM
مبرووووووك والله يا العين الساهرة واليد الأمينة .... دي عادي كان عندنا بوليس في الحله امه ست عرقي ولا هو خلا البوليس وهي خلت بيع العرقي إحنا شعب طيب والله عادي الواحد بقي لا عارف يضحك ولا يبكي


#356545 [واحد من الناس]
5.00/5 (4 صوت)

05-06-2012 10:20 PM
ياخ القصه دي لو بقت على المحلات الذكرتها دي ماكويس
الاسبوع الفات مشيت لاستخراج بطاقة الرقم الوطني
ولاحظنا اعلان مكتوب بقلم على شباك التوريد انه وابتدا من تارخ (مامتذكر لكن في شهر 4 الماضي ) تم تعديل الرسوم لتكون 45 جنية بدلا من 37 جنية للعلم وانفاذ ....
اها دفعنا ال 45 .. وحررو لينا الايصالبارنيك 15
اكتشفنا بعدها انهم قيدو مبلغ 37 جنية فقط والباقي نامو بيهو ...
اها نشتكي لمنو ؟؟؟ الكلام ده لسة حاصل يومي .. قالو رسوم استخراج فايل قال ؟؟؟


#356539 [tarigosman]
4.25/5 (6 صوت)

05-06-2012 10:14 PM
بلغ الشرطة ياود جبرا..!!!!؟؟؟؟؟؟؟؟؟؟؟لانو 999 لا يمكن الوصول الية حاليا.


ردود على tarigosman
United States [ود الخضر] 05-08-2012 01:02 PM
حينما تري تعامل المحصلين او امناء الصناديق و استهتارهم مع عهدة الخزنه التي لديهم الواحد فاتح الدرج للاخر و يجدع ساكت القروش و يقوم من محلو و يمشي يمين و شمال دون حرص علي الفلوس التي من المفروض انها عهده يسأل عليها اخر اليوم ويتم جردها بالظبط تشك ان هناك اصلا نظام محاسبي و تدقيق و مراجعه متبع و هذا في مرافق حكوميه كثيره المسألأه اكبر من انو اورنيك 15 او 21 او 600

United States [الهادي] 05-07-2012 10:57 AM
لك التحية الأستاذ جبرا ............ الغريبة انو القصة ده منتشرة في كل معاملات الشرطة ..... مثلا في ميناء بورتسودان ........... تجد ان الريسوم المكتوبة في الايصال 10 جنية والمدفوع 11جنيه كما ان هناك بعض المبالغ تدفع دون ايصال مالي بل ايصالات مطبوعة طباعة واحيانا تدفع من دون ايصال تجد هناك شرطي يوجه الناس للدفع وحسب المزاج يمكن ان تزوغ منه واذا كنت مسكين تدفع تدفع


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة